|
|
|
 Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: محمد مكى محمد)
|
حي القلعه بيتنا
وسوق الشجره بيت ست بيتنا
وودنوباوي والعمده رابطتنا في الجامعه
ود البنا - البيان - الركابية - السيد المكي ( اعز الأصدقاء )
ياسر عبد الرحيم ( الدوخ) - عبد الله ميرغني ( نانيه ) عبد الله صلاح ( شيخ العرب ) خالد محمد زين ( انطون ) ابراهيم محمد فقير ( فريني )
وبقية العقد الفريد _ ناصر عجيب - سامي زروق - لبنى حاتم - هالة ابو قرون - امل السني - محمد عثمان الشيخ جنابو - انعام محمد علي - عماد قريب الله - نزار عوض - اكثم مساعد - رشيده محمود - محمود البرلوم - امير محمد مختار ( العتوت )
| |
 
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: غادة مكى محمد)
|
قالدت سوق الشجرة
وابرووف و البنات
الذنكى سوق الناقة والناس و الخضار
و قطعت حى البوستة
مرفوع الكلام ودمى ينبح ويندهك
من ليل ملتخ بالكوابيس و السهر
فجيت رؤاى
تاوقت بى عين اليمين جوة الشمال
من قلبى كان نازل مطر
وعبيت مشاعرى من النسيم
و زفرت طلعت الوحيح
قلت النسيم ما يجرحك
الله اذا ما ارتاح شجاى صبح الحزن مليان ضحك
جانى المنادى ينادى بيك
سرت ذى الضو عليك
و صرخت يا جنة بلال
عالجنى يا عابدين شرف
سامحنى يا استاد الهلال
الا يا امدرمان بشوف
كل المدن فى توب سماحتك تنجهك
ذهت الفتيحاب بالشمس
واتبسمت بانت على وش ابكدوك
و العرضة غنت من مضامير الحقيبة الصادحة هم ما بشبهوك
واتلملمن بنوت فريق القلعة غنن من شعر ناس ابصلاح
ياالله لزمنى الجراح و اجعلنى مطلوق الصراح
عشق المدن تور على جرح الغرام
وانا الغرامى عليك خايف من جمالك يشدهك
| |
|
|
|
|
|
|
|
 Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Mutwali Malik)
|
مجدي عوض صديق ووووين أراضيك انت يا زول !
و انت جايب سيرة امدرمان ما تنسي حي المسالمة باعتبار حق الجيرة و باعتباره أحلي و اجمل
احياء امدرمان و اكثرها حضارة و رقي ( ما تزعلوا مننا يا ناس الاحياء التانين )
كلنا اولاد قلبا بس بصراحة المسالمة غير ..
Quote: وبقية العقد الفريد _ ناصر عجيب - سامي زروق - لبنى حاتم - هالة ابو قرون
- امل السني - محمد عثمان الشيخ جنابو - انعام محمد علي - عماد قريب الله - نزار عوض
- اكثم مساعد - رشيده محمود - محمود البرلوم - امير محمد مختار ( العتوت ) |
شنو يا واثق ياخ انا اسمي وووووين ولا خلاص طلعتوني من الشلة دي ؟ قلت يمكن دي شلة السناير لكن لما لقيت
اسم امير مختار محشور معاهم انتابني شعور بالغيرة ! يااااا حليل الايام ديك و ياريت تعمل لينا بوست علي
شاكلة اولاد شلتنا بتاع اخونا عزان سعيد و سميهو لينا اولاد و بنات رابطتنا .
تحياااااااتي لكل من مرً من هنا و بذل حرف محبة لامدرمان
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: heba Elmahi)
|
شارع العرضة وحى الغنادير
وزنكى الخضار وسجك الفاتح وآيسكريم الملازمين
وأجمل سمك من الموردة وأجمل كوارع نية من سوق ليبيا
وأجمل كوارع نجيضة من العباسية
وأجمل نسوان مشلخات فى أمدرمان
والله لمن أشوف لى مرة مشلخة فى أمدرمان دموعى بتطفر
بيت المال وحى العرب والزحمة
أجمل رجال عجائز فى أمدرمان كلامهم جميل ومهذبين بصورة مدهشة
لو لاقيت واحد فى سقط لقط فتح خشموا إتكلم معاك تعرفوا من ناس أمدرمان القدام
أمدرمان دى زى صورة الموناليزا الأصلية
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: زينب بدر الدين)
|
أختي
زينب
Quote: شارع العرضة وحى الغنادير
وزنكى الخضار وسجك الفاتح وآيسكريم الملازمين
وأجمل سمك من الموردة وأجمل كوارع نية من سوق ليبيا
وأجمل كوارع نجيضة من العباسية
وأجمل نسوان مشلخات فى أمدرمان
والله لمن أشوف لى مرة مشلخة فى أمدرمان دموعى بتطفر
بيت المال وحى العرب والزحمة
أجمل رجال عجائز فى أمدرمان كلامهم جميل ومهذبين بصورة مدهشة
لو لاقيت واحد فى سقط لقط فتح خشموا إتكلم معاك تعرفوا من ناس أمدرمان القدام
أمدرمان دى زى صورة الموناليزا الأصلية |
دا أجمل كلام إتقال في أم درمان
يا سلام عليك
وياسلام علي أهلك
وتسلمي
يا أخت روحي
تحياتي واحتراماتي
| |
|
|
|
|
|
|
|
|
 Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: rummana)
|
Quote: ام درمان سخانة
ماعايزين حبة طراوة من بحري
--
كرهتونا قال قراير وراحة ضمير |
وليد عبد اللطيف كلامك ريحني,
أمدرمان زحمه وزقاقاتها ما مفهومه,
هسي أتحدي ناس أمدرمان لو يعرفو يوصفوا المحلات القالوها دي,
محل الفول الخطير القلتوهو ده عشان تعرفوا تصلوهو,
فجأه وانتو ما شين في الشارع بتلقو روحكم جوه بيت زول !!!!!!! 
ده غير انها حر وكتمه وأرضها حجر 
سوق أمدرمان والشهداء وماعارفه شنو, بس يوم الحشر العظيم,
البدخلهم مفقود والطالع منهم مولود !!!
الثورات اخر الدنيا, وقربوا يبقوا متين ثوره !!!!!!!
بعدين أمدرمان دي الناس البيجوا بحري منّها بالكبري بيكونوا مغبرين مغبرين
زحمه ياخ, وهيصه مبالغ فيها
غايتو ناسها لو عرفت المفرحهم بيها شنو, أرتاح !!!!!!!!
سيد البوست سلامات,
وبحـــــــــري طـــــــــــــراوه 
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Amany Elamin)
|
| Quote: من شدة ما أخدت راحتي المداخلات بقت تمشي تلاته تلاته هههههههه |
بت الامين
يعني رشيتيهم رش تقيل بسلاح بروفايلك دا
وذكرتيني واحد قبل سنتين جانا من ام درمان في البيت
واثنا الونسة اشتغلت ام درمان ياخي شاكلني وقرب يضربني في بيتنا
عِلا النصيحة الواحد لما يدخل ام درمان
كانه بيشوف في تفاصيل قصة او رواية ممتعه
(عالم جميل )
| Quote: هسي هنا في الاسفير ده قلت أقول الفي نفسي من غير خوف |
ارجي الراجيك
-----------------------
اماني زيديهم
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Ammar Elyas Babiker Hassan)
|
وليد عبد اللطيف,,
Quote: بت الامين
يعني رشيتيهم رش تقيل بسلاح بروفايلك دا
وذكرتيني واحد قبل سنتين جانا من ام درمان في البيت
واثنا الونسة اشتغلت ام درمان ياخي شاكلني وقرب يضربني في بيتنا
عِلا النصيحة الواحد لما يدخل ام درمان
كانه بيشوف في تفاصيل قصة او رواية ممتعه
(عالم جميل ) |
شايفاك عامل ليك مرّاقه
قصه وروايه وحكايه ههههه
ماتمسك العصايه من النص ياوليد
بعدين كويس ذكرتني المسدس الفي بروفايلي, عشان أبطّل رجفه وأثبت هههههه
حاول تعمل لي ساتر, لو وليد الشفت ظهر, كلمني عشان أتلاشي لووووووول
داليا حافظ,,
كان بي حقّهم ماعارفه !!
عارفه, هسي يجيني حمّور زياده يعملها لي تاريخ أمدرمان وهوي أمدرمان, وماعارفه شنو !
الكلام البسل الروح داك ههههه
عمّار الياس,,
Quote: الما عرس من امدرمان
وما سكن بحري
و ما اشتغل في الخرطوم
عمروا كل ضايع |
ماقلنا تامينّها حرفنه,
غايتو بحري دي نحن ما بنسكّن فيها الا البناسبنا,
البعرس من امدرمان يسكن امدرمان قبلو ياجماعه, وللا شنو؟
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: منال)
|
| Quote: صالح فى حى البوسته |
ده عندو فول عجيب
انا سكنت عدة سنوات في عمارة الجزلي الشينة ديك في حي البوستة
وعمك صالح ده محلو جنبنا الهيتة بالهيتة والله عندو فول يرمي في الشوك
وشطة ومخللات بجيبا من وين ما عارفو
خاصة عندما يظبط الفول ويقول ليك ( زيت ،، سمنة ) يعني داير زيت ام سمن
فول عمك صالح ده كلامو تاني وكل ما انزل في الاجازة لازم اول شئ اعملو هو فطور عند صالح
ثم بعد ذلك نبحث عن الطريق الي قندهار
ام درمان حياها الغمام
والتراب والحسرة لبت الامين وود الصائم
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: محمد حيدر المشرف)
|
كتبت أماني الأمين
Quote: وليد عبد اللطيف كلامك ريحني,
أمدرمان زحمه وزقاقاتها ما مفهومه,
هسي أتحدي ناس أمدرمان لو يعرفو يوصفوا المحلات القالوها دي,
محل الفول الخطير القلتوهو ده عشان تعرفوا تصلوهو,
فجأه وانتو ما شين في الشارع بتلقو روحكم جوه بيت زول !!!!!!!
ده غير انها حر وكتمه وأرضها حجر
سوق أمدرمان والشهداء وماعارفه شنو, بس يوم الحشر العظيم,
البدخلهم مفقود والطالع منهم مولود !!!
الثورات اخر الدنيا, وقربوا يبقوا متين ثوره !!!!!!!
بعدين أمدرمان دي الناس البيجوا بحري منّها بالكبري بيكونوا مغبرين مغبرين
زحمه ياخ, وهيصه مبالغ فيها
غايتو ناسها لو عرفت المفرحهم بيها شنو, أرتاح !!!!!!!!
سيد البوست سلامات,
وبحـــــــــري طـــــــــــــراوه |
دي راكبة من وين دي؟؟؟
ادوها قروشا خلوها تنزل..
أصلو في المثل قالوا الما بتحلقوووو جدعووووو
ولا شنوووووووو
سلام يا ناس (قلبا) يا أحلى ناسسسسسسسس
(عدل بواسطة خالد حامد الجزولي on 04-20-2010, 05:34 PM)
| |
|
|
|
|
|
|
|
|
 Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: خالد حامد الجزولي)
|
وأنا قال ملاوزه من وليد الشفت !
اتلموا علي شفوت أمدرمان كلهم في البوست
يا جماعه والله شفوت أمدرمان كرّهونا الجامعه,
أولادهم علي بناتهم,
أوللللل شئ بناتهم شفتات بشكل يحير !!!
جايبين خبر أييييي شئ في الدنيا,
ونحن ناس بحري ديل ماجايبين خبر الدنيا,
الخرطوم دي عارفينها شبر شبر,
وتلقاهم جايبين خبر المحل الصغيييييير البيبيع شنو ما عارفه في أقصي جحر في السوق العربي,
وخبر أي شئ في الدنيا بيجيبوهو من وين والأحسن ياتو, وصناعته شنو,
والاستوردو منو ومن وين !!!!!
ياخ مشيتهم مشية شفتنه, وكلامهم زاتو يخوّف من شدة ما قوي ومركّز,
غايتو نحن في الجامعه كنّا بنخاف منّهم عديل,
لأنهم مفتحات بشكل ما طبيعي, وشئ كده بسألو منو مافي,
أما أولاد أمدرمان فحدث ولا حرج,
يعني لو ديل البنات الأولاد حيكونو كيف !!
ماعارفه الشفتنه دي جزء من البيئه وللا وراثه وللا الحاصل شنو
غايتو البوست ده الله يمرقني منو قبل ما أتدقه لووووووول
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Amany Elamin)
|
وليد داوش,,
| Quote: بنصدع وبطنا بتطم ونحس بروحنا مخنوقين ومانبقى كويسن الا لما نرجع ليها... |
الغريبه ده نفس البحصل لينا لما بنمشيها, وما بنبقي كويسين الا لما نطلع منّها
وليد عبد اللطيف,,
| Quote: الزعيمة اماني انا وود الصايم رهن الاشارة وما تخافي |
علي الله وعليكم,
الجماعه الأعداء بدوا يظهروا لوووول
منال بتاعت بنات الأحفاد,,
| Quote: امدرمان العراقة والاصالة الجمال والثقافة والاناقة |
ده كلللللو في بحري عندنا,
زيدي عليهم الرقي والروقه والطراوه
أخونا محمد الواثق,,
Quote: كان انت ياكي اماني بتاعة الشارقة اخت د. مهدي الأمين انت ماشه من ام درمان وين ( الريف الشمالي ).
الغبار الأصلي . |
يعني نقول بحري طراوه تقولو الريف الشمالي؟
ما أنا والله, اسم علي اسم,
الغبار ده الا نقطع ليهو الكبري لوووووول
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Amany Elamin)
|
يامجدي سيد البوست,
Quote: داير تلعب كوره الا في ام درمان
داير تغني الا في اتحاد الفنانيين ام درمان |
حنبدأ نحسب المبدعين فنانين ولاعبين كوره المن بحري ما حنخلص,
بعدين نحن أصلا عايزينكم تقفلوا الكبري ,
عشان الزحمه العاملينها لينا شئ سعد قشره وشئ كبري المك نمر,
وشئ ضهب في بحري والوساع والطراوه
ود المشرف,,
Quote: مشكلة ناس بحري الوحيده إنهم ما من امدرمان ..
يعنى مافيهم شباب من ود أرو ..
يعنى بناتم مافيهن بنات ممكن يكونن من الملازمين ..
يعنى ما ممكن حفلاتهم تكون فى ابروف ..
يعنى زمان ما اكلو ايسكريم فى فاربتر ..
يعنى ما لعبوا كوره فى العرضه ..
يعنى فطور الجمعه الا يهاجروا عشان يجيبو فيهو سمك من سكى
يعنى ما فى عشا عند الجان .. |
كان كده ما عندنا أيييييي مشكله معناتها
أبروف والملازمين ديل بالذات حوالينا ولا علينا,
عارف مره كنا منظمين ويركشوب وجونا أجانب محترمين كده,
سقناهم في لفه في الخرطوم, لما وصلنا أمدرمان من بحري وتحديدا نزلنا بأبو روف,
قاموا سألونا أمدرمان يعني شنو
غايتو لمن قعدنا نشرح "في أم در أمان" وجابت ليها ترجمه و"بيرل Pearl" وبتاع’’
الضحك كتلنا ههههههه قلنا هسي الخواجات يقولوا الناس ديل وهم وللا شنو, بيرل شنو في الحفر دي لووووول
| |
|
|
|
|
|
|
|
|
hhh
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: ALZOLZATOO)
|
الأعزاء
الأستاذ وود الأستاذ/ مجدي عوض صديق
أخونا الأصغر وود حلتنا العباسيه
كيفك
تفتح بوست عن أم درمان
معناتها إننا لازم نأدي الواجب
و نزوره
بخصوص الناس البتكره أم درمان
و عندما كبت إحدي الصحف الرياضيه الحمراء التوجه
عن أن الرائحه المنبعثه من سوق الملجه
تصيبهم بالغثيان عند حضورهم لأستاد الهلال
كتبت
Quote: و أصبحت رائحة سوق الملجة الحارقة التي تهب علي أستاد الهلال تزكم أنوف صحفيي الصدأ
لكن عذرا صديقي
لم تؤثر تلك الرائحة علي كرومة وهو يلحن أنا وانت والنيل و القمر في نادي الهلال
لم تؤثر تلك الرائحة علي عبدالرحمن الريح وهو يسطر الفن السوداني الحديث في حي العرب شمال استاد الهلال
لم تؤثر تلك الرائحة علي أصوات رمضان حسن وحسن عطية والجابري وابراهيم عوض ومحمد احمد عوض حول نادي الهلال
لم تؤثر تلك الرائحة علي التجاني يوسف بشير في المعهد العلمي جوار نادي الهلال
لم تؤثر تلك الرائحة علي الشيخ محمد أحمد البرير وهو يبني بثبات صروحه الاقتصادية شرق نادي الهلال
لم تؤثر تلك الرائحة علي ال بدري وهم يبنون صروحهم العلمية غرب نادي الهلال
و أخيرا
لم تؤثر تلك الرائحة علي اللاعبين والمشاركين في الدورات الدولية للبلياردو بنادي التاج غرب نادي الهلال
بالمناسبة الهلال والمريخ ديل بتاعين أمدرمان والما عاجبو اليمشي يسوي ليهو هلال ومريخ في............ |
مزمل ابو القاسم .. يواصل حربه القذره ضد نجوم الهلال وعل... أن يتحمل النتائج !!
| |
|
|
|
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: النصرى أمين)
|
اختنا اماني الامين
تحياتي
عشان بس تعرفي ليه بنعشق امدر اتمعني في كلام عمي شوقي بدري.
Quote: زقاق الصابرين في امدرمان
زمان في السينما في اللوج كان في بوفيه بقدم شاي و كنافه و باسطه وليموناده، و جرسونات .
في واحد كورك في الجرسون ( زح ياخ انته واقف هنا ليه ؟ ) ، و تأثرا بثقافة السينما قال الجرسون ( انا هنا علي طلب الجمهور ) .
و علي طلب رضا نكتب عن زقاق الصابرين .
مدخلي علي الزقاق كان اخي الطيب سعد الفكي . الذي حضر من الشريق من الرباطاب و عمل جرسونا في الداخله ( اتبره ) ، ثم حضر لاخته فاطنه التي كانت تسكن خلف منزل ال مدثر و الاخ مصطفي مدثر يعرفه جيدا كصديق و احد ابناء الحي .
الطيب بدأ كخياط مبتدئ في الزقاق ثم صار احد معالم الزقاق . و رئيسا لنادي الربيع الذي تأسس في سنه 1927 اي قبل فريق المريخ و الهلال و بعد فريق المورده .
اذكر ان الاخ عبدالعظيم مهدي عبدالرحمن الذي صار مدير للكليه الحربيه كان يمازح الطيب عندما يقول انه خياط ( خياط شنو ياخ ، انته بتخيط العراريق ابو اباطا اسود .) .قديما كانت هنالك عراريق بدون اكمام من الدموريه وزن عشره . و تعني عشره فتلات في عشره فتلات في كل سنتيمتر مربع و هنالك رقعه سوداء في منطقه الابط . و كان هذا ما يرتديه اغلب السودانيين . و تظهر هذه العراريق في رسومات و صور المهديه .
الزقاق كان مدرسه كامله ، اغلب الدكاكين عباره عن دكاكين الجاهز و الدكان عادة لا يزيد عن حوالي 3*3 متر او يزيد قليلا . و مكون من رفوف ، بنك للقص و ثلاثه او اربعه مكنات و خزنه علي الجنب . و هنالك بعض الترزيه مثل الخير الذي كان مثقفا يقرأ كل الجرائد اليوميه و ينتمي الي تنظيم الاخوان المسلمين ، و كان يقصده كثير من اعيان امدرمان لعمل الجلاليب و خاصه المكسوره دبل عمود . و خياطة الجلابيه تكلف 25 قرش و العمود 10 قروش و هناك متخصصين في عمل العمود فقط . و اغلبهم نساء في منازلهم .
و هنالك العم مقبل الذي كان ضخم الجسم و عندما يجلس للاستراحه علي التبروقه له سير عريض في شكل حلقه كبيره يمتد من ظهره الي ركبتيه و هو كذلك خياط جلاليب و عراريق .
الطيب بدا عمله مع عمنا شروني و كان يقوم بتطبيق القماش كطاقه كامله و يقوم بقصها بالمقص و يشكلها حسب المقاسات . و تبدأ باللباسات الصغيره للاطفال و الدسته بي 18 قرش سعر الجمله و لباسات كبيره الي الفساتين للنساء و الدسته بي 3 جنيه و 60 قرش .و سالته مره ( انتو يا الطيب هدومكم دي بتهد ؟ ) ، فكان رده ( من المروحه دي بتهد ) .
التعلمجي يبدأ بعقد اللساتك و يتطور لكي يشطب ثم يبدا في خياطة اللباسات و يتطور . و تعلق العينات علي الحبال كما يبدو في الصوره ، و يحضر المشترون من الاقاليم و يشترون البضاعه و يحملونها علي اللواري و تلبس كل الجزيره و غرب السودان و شرقه من سوق الشوام زقاق الصابرين و ما حوله . و كانها ملابس كرستيان ديور .
تبدأ الحياه في الصباح بالتحيات و الاخبار و نقاشات الكوره و السياسه . و يحضر صاحب البخور و هو يلقي بحفنات متواصله من البخور من مخلايته في المبخر و يتناول المعلوم من كل دكان بدون اي احتجاج . و اصحاب البخور يقسمون السوق فيما بينهم و لا يتعدي احدهم علي حدود الاخرين .
حتي الشحاذين كانوا يعرفون مناطقهم . الدخري كان اشهر مجنون في امدرمان و كان يسكن في الجامع الكبير و له جسم قوي بعضلات بارزه . و عندما يكون بحره عالي ينطلق محطما كل الحجاره و في بعض الاحيان يضعها علي قضيب الترماج و يقوم بتحطيمها بحجاره اكبر . و كثيرا ما يتوقف الترماج الي ان ينتهي الدخري من عمله و هو يقف عاريا كما ولدته امه .
مشكلة الدخري انه قذف ابنه بحجر في حالة غضب فاصابه في مقتل فاختل عقله . و كان يحضر لزقاق الصابرين ليشحذ فلوس طعامه و قد يتصدقون عليه بسروال او عراقي . و في احدي المرات اعطاني الطيب فريني ( يعني قرشين ) و هي قطعه صغيرة الحجم و لهذا يسمي الشخص قليل الحجم بالفريني . و عندما وضعت الفريني في يد الدخري لاحظت قطعا كبيرا فقلت له ( ده من شنو ؟ ) فنظر الي بحيره و تعجب و كانني بليد و قال ( من شنو ! ، ما من الجن . ) .
الزقاق كان دنيا كامله يتكسب منه كميه ضخمه من البشر . فهنالك السبابه امثال الاخ حموده النعيمابي الذي استلمت منه خطاب قبل شهور . و في مره كان يحمل مركوب نمر بالربل ( نوع من المطاط الفاخر ) . و المركوب يساوي 7 جنيهات و بينما هو يعرضه متنقلا بين الدكاكين ، مد احد اهل الباديه و هو يرتدي شقيانه و هي حذاء من الجلد الغير مدبوغ بسيور غير مدبوغه في قوة الصلب ، فقال له النعيمابي ( ها يا عربي ها ، دا مالك بيه ، ده بسوي ليك الحساسيه ) . فضحك الجميع حتي البدوي .
من العاده ان يأكل الجميع معا الا ان البعض كان يأتيهم فطور خاص من المنزل و عمنا( ... ) كان مختلفا و قد اصاب بعض التعليم و عندما وضع الفطور امامه اتي احد البدو مارا فكشكر له عمنا قائلا اتفضل . فجلس البدوي بدون تردد، و بلقمه واحده اخذ نصف البيض من الصحن فصرخ العم فزعا ( لا ..لا .. ده بيض ...ده بيض ) . فصارت هذه الجمله تردد في زقاق الصابرين عندما يلتبس الامر علي اي انسان و يقولون ( لا ..لا ...ده بيض ).
الجلاليب كانت تخيط علي ثلاثه انواع في العاده و هي كرشليق و تعني بزراير ، او دركسون بالفتحه المستديره ، او في احيان نادره بي لياقه و كرشليق و هذه يستعملها بعض سائقي التاكسي و معلمي القهاوي . و القماش عادة هو البوبلين و المتر يساوي 20 قرش و قديما كان هناك قماش يسمونه ( بنك مصر) له عروض عريضه او قماش هزاز فيه خطوط لامعه يسمونه الالاجه يلبسه المعلمين و كبار التجار . العراريق و الساويل عادة من الدبلان او قماش خفيف للعراريق يسمونه الساكوبيس و هذه الكلمه يوصف بها الشخص الضعيف و يقولون ( ده ساكوبيس ساكت ) . و هناك ايضا لبس تكسب و تعني جيب من الامام و من الخلف ، او جناح ام جكو و عادة لانها واسعه تحتاج لسته امتار او خمسه امتار و نصف بدلا عن خمسه امتار . و كما كان يقول العم مقبل ( الترزي شغله تحت .... ما يسلمو للزبون الا يدفع ، كان الزبون شال حاجته ما بجي راجع يدفع ) .
في سنه 1985 اردت ان اعمل توكيل شرعي فاخذت الاخ بله و الطيب سعد للمحكمه و لاحظت ان الطيب يتراجع . و بسؤاله عرفت ان كاتب المحكمه الشرعيه قد اخذ من الطيب سته جلاليب و سته عراريق و سراويل و وعد بالحضور للدفع و لم يرجع . و الكاتب الشرعي كان يرتدي احدي الجلاليب . و الطيب كان يخاف احراجه . فاضطررنا للذهاب الي المحكمه في الخرطوم .تلك كانت اخلاق اهل زقاق الصابرين .
سمعت الطيب يقول لميرغني و هو كذلك اسطي في احد الدكاكين و هو شاب نحيل يرتدي البنطلون ( غا و سا ) . و عندما سالت عرفت ان المقصود بها الزبون الذي يضيع الوقت و لا يشتري .
ميرغني استعار دراجتي الرالي الدبل و عندما تأخر ارجعها و عليها جرسين بلونين مختلفين زادا من جمال الدراجه التي كنت اعتني بها .في نهاية الشارع بعد القهوة الصغيره و المطعم كان السمكريه منهم صديقي عبدالسخي ، و الخير العجلاتي الذي بدأ حياته كصبي عجلاتي مع العم عبدالكريم العجلاتي في بداية شارع كرري و هو خال كمال الجزولي ومجدي و حسن و الاخرين .
السمكريه كذلك كانت لهم مجموعتهم الخاصه و طريقة حياتهم . و عندما تضايق طسم من امرأة اتت بصفيحة خبيز و ارادت لحمها مباشرة و طسم مشغول و المرأه تنق ، فطوح بالصفيحه قائلا ( جننتينا ، هي صفيحه و لا اسطول ) .
في الشتاء كنا نأكل كثيرا الطماطم بالدكوه و الكسره من هجوه في الانجيرا او سوق الكسره غرب سوق الطواقي . و هذه الاكله لا تزال منذ ايام زقاق الصابرين هي اكلتي المفضله .
الخال النور الحاج حمد من حوش حاج حمد المشهور في بيت المال كان يعمل في سوق الشمس بالقرب من سوق التمارا و عندما تشتد الشمس يحضر الي دكان الطيب سعد و يزيح العمل من البنك و يستلقي او يجلس تحت المروحه . و عندما يحتج الطيب يقول له النور ( انته ياخ في بيت اختي ما بتترقد تحت المروحه ، هو كان ما المروحه دي انا بجيك ! ) .الطيب بمثابة الشقيق لنا ، و عندما اتيت به الي المنزل كنت انا في الرابع عشر و هو في حوالي الثامنه عشر من عمره و صار من اهل المنزل . و لا يعمل اي شئ بدون استشارته . و ابنائه يحملون اسمائنا ، الشنقيطي و شوقي و اسعد .و لي ابن يحمل اسمه. و عندما اتصل شوقي الطيب قبل شهور بخصوص المصاريف الجامعيه قلت له ( انته بتين دخلته الجامعه ؟ ) و كان رده ( انته يا عم شوقي طولته بره نسيت السنين ) .
لا اظن ان هنالك اي مكان في العالم كانت توجد فيه روح من الزماله و التأخي و التكامل مثل زقاق الصابرين فاي شخص يموت يعتبر المصاب مصاب الجميع . و اي شخص يتزوج يكون الكشف دائرا ، و اي بيت يقع او مناسبه يكون اهل الزقاق كأسره واحده . و لقد تعلمت كثير من الدروس في الزقاق و سمعت كثير من القصص و كان كل السودان يمر بالزقاق كزبائن . و في منتصف الستينات ظهرت الماكينات الكهربائيه السريعه و تضاعف العمل و ظهر المطرز .
في احدي اجتماعات نقابة الخياطين كان الطيب يتحدث بحميه فقال شخص لا يعرف الطيب ( انته خياط ؟ ) فوضع الطيب ظهر يده امام عينيه قائلا ( ده ( د..ك) ! ) . فالمقص يترك هضاب علي ظهر يد الخياط خاصه خياطي الجاهز . لانهم يقصون عشرات الطبقات من القماش مره واحده .
و كثيرا ما يحضر شخص يحمل عجله علي كتفه و يقوم بسن المقصات في زقاق الصابرين و سوق الشوام .
في بدايه الديمقراطيه الثانيه ابدي الطيب تعبه من موضوع الخياطه . فاقترح الشنقيطي محل للسندوتشات و اعجبت انا بالفكره . و بدأنا في البحث عن المكان الا ان الطيب رجع و غير رأيه و قال ان زوجته رقيه قالت انه اذا بدأ يبيع الاكل فستعود الي الرباطاب و اضاف ( اودي وشي وين من ناس زقاق الصابرين ) . و اخيرا اقترح سيارة تاكسي ، و اضاف الشنقيطي فكرة بوتيك في ركن مدرسة الاحفاد شارع المورده .
و عندما سلمته مفتاح السياره و بدأ النجارين في عمل التخشيبه و اتت البضاعه من اوربا و الخليج بدأ الطيب مهموما فلم يكن في استطاعته ان يترك زقاق الصابرين . و لم تنقطع الزيارات من الجانبين .
في مايو 1969 و في حفل في منزلنا وسط خواجات و مبعوثين، جلس الطيب مع احد الرفاق من الزقاق و عندما ازداد الجمع احضرنا بعض الكاسات فنادانا الطيب و افرغ محتويات الكبايه في الكاسات قائلا ( يعني نحنه ناس زقاق الصابرين ديل ، الكبايات ام كرعين ديل الا نشوفهم في السينما ) .
زقاق الصابرين كان يمثل امدرمان . ابن عمتي عثمان عبدالمجيد ( كوارع ) استلم في سنة 1963 ثلاثه جنيه لشراء اسمنت و الاستعانه ببناء لتبليط ارضيه المطبخ . و والدته وقتها تسكن عند ابنها بابكر عبدالمجيد في منازل الجيش . و اضاع عثمان الفلوس و عندما حضر محتارا الي المنزل اخذه الشنقيطي الي زقاق الصابرين و دفع الطيب 150 قرش و اشترينا كيسين من الاسمنت بي 130 قرش و 15 قرش لعربة الكارو و قمت انا بتبليط ارضية المطبخ . و لهذا فالزقاق دائما في وجداني .
ما ان تغرب الشمس حتي يصير الزقاق ميتا و خاليا من اي حياة حتي من القطط و كأنه يرتاح من زحمة النهار و الباعه الذين يحضرون كل شئ من فاكهه و حلويات و صور و براويز و نتائج تعلق في الحائط .
في المساء عندما كنت اذهب الي العم رضوان و هو الكفيف الابيض اللون الذي يبيع راس النيفه عند نهاية الزقاق في شارع العناقريب و امامه لمبه تدل علي مكانه و ابنه قد صار وزيرا في الحكومه الديمقراطيه الاخيره . و الراس عنده يساوي 25 قرش و في العاده بي 15 قرش الا انها بحجم ضخم و كان والدي لا يقبل الا بها .
حتي النشالين و اللصوص كانوا يحضرون للزقاق و لقد سمعت الطيب يقول للضل مع بداية الشريعه و هو اكبر نشال في امدرمان ( و الله يا الضل خايفين عليك من القطع ) فتنهد الضل قائلا ( القطع ساهل ، الكلام الزيت المغلي ) .
و عندما كنت اطل الزقاق في الليل او المساء كان يبدو مختلفا و كانما هو زقاق اخر .
شوقي |
| |
|
|
|
|
|
|
|
مجدي عوض صديق
منتصرمحمد زكى
محمد مكى محمد
Adam Mousa
محمد الواثق
Osama Mohammed
كمال سالم
ismeil abbas
هاشم محمد الحسن عبدالله
غادة مكى محمد
HAMZA SULIMAN
خالد حامد الجزولي
د.محمد حسن
محمد حيدر المشرف
وليد عبد اللطيف
مرتضى الفاتح الزيلعي
خالد كدودي
شكرى سليمان ماطوس
Mutwali Malik
زينب بدر الدين
Hussein Mallasi
محمد عبد الماجد الصايم
محمد الامين محمد
rummana
waleed dawash
داليا حافظ
Ammar Elyas Babiker Hassan
عمران حسن صالح
محمد المختار الزيادى
عبد اللطيف السيدح
عليش
ALZOLZATOO
محمد حيدر
فيس بوك
تويتر
انستقرام
يوتيوب
بنتيريست