|
|
|
 Re: ايها الانقاذيون لازلنا بذاكرة قوية فهل انتم مستعدون ؟! (Re: سفيان بشير نابرى)
|
الدين مو دقون
فوق زول سمين وبدين
الدين البعاف الدنيا لي بعدين
الدين مو دعاية ودندنه وتدوين
الدين المعاملة للبعرفو الدين
قال مؤتمر وطني وكذب من قال
ده متامر ولا وطني كمان دجال
حكم الشعب يصدر فيهو بالاجمال
بالبعاد وبالتابيد مع الاشغال
ده حال المؤتمرجية الجيوبة ملانه
قالو بسيطه نرشي فلان وندي فلانه
قايلين بيشتروهم بالفلوس والهانة
ديل ما بياكلو الحرام لو يسكنو الجبانه
رصيدكم في البنوك سندات ومال مسروق
ونحنا رصيدنا حباً في القلوب مدفوق
يا اهل المناكر والعقول الماكره
شعبنا ما نساكم ولا فقدنا الذاكره
بيوت اشباحكم المنصوبه لسع فاكره
واعواد المشانق في السنين الباكره
يا الانقاذ بيوتك عنكبوت وقزاز
وكيف بتجدعي الناس النفوسه عُزاز؟
يا بلد الكرام والعلمه والافذاذ
كيف تتجرع الحنضل من الاكواز؟
فكر المؤتمر متايدزاً ومسرطن
ووثيقة الانضمام تفقد عفافك شرطاً
الانقاذ دي بيت من طين وبداء يتفرتن
وكان طلع النهار سجم الدقون الورطن
استر عورتك يا المؤتمر واتغطي
الاستحيو ماتو اريتك زيهم لو مته.
| |
  
|
|
|
|
|
|
|
|
Re: ايها الانقاذيون لازلنا بذاكرة قوية فهل انتم مستعدون ؟! (Re: نصار)
|
Quote: يا سلام يا سفيان ياخي
مشكلة الكيزان في اننا ح نورث ذاكرتنا لابناءنا
و هم على استعداد جيني
بنتي ذات العامين منعتني من قفل هذا التسجيل
قالت لي دا حلو، دا سودان
|
يا سلام عليك وعلي مزن ومازن ياخ
تعرف قصتك دي ذكرتي واحد صاحبي قال خالو كان
كل ما الكهرباء تقطع بيقول لي شفعو :- ده كلو
من البشير والترابي لوووووووووووووووول وحاتك
شفعو طلعو معارضين من قولت تيت .
Quote: مشكلة كبيرة ان استغضب الكيزان محمد بادي العكودابي
فما عرف شاعرا مثله في معالجة موضوعه |
فعلاً محمد بادي خطير جداً ولغتو بسيطة ومتابعه لاوجاع
السودانيين .
سلام ومحبة
وبركة الوصلته بالسلامة .
| |
|
|
|
|
|
|
|
|
|
Re: ايها الانقاذيون لازلنا بذاكرة قوية فهل انتم مستعدون ؟! (Re: سفيان بشير نابرى)
|
هذا الشعب متحمل وناسو يئنوا
وإنتو خلفتو فوق راسو وبقيتوا تغنوا
يا الإنقاذي هذا الشعب احذر منو
بكرة بيكسر أغلالو ويوريك جنو
بلدنا الرَّبتك بالإنقلاب جازيتا
قلبتها لاورا ومن الوريد حزيتا
كفاك يا المؤتمر جازيتا والله أزيتا
يا الحاميها وحراميها ومطلع زيتا
شدرة المؤتمر رمز الخراب والشوم
ثمارا المرة ما بتنزل من الحلقوم
يوم تسقط رؤوس في الحلبة تقع وتقوم
شعب العزة يقطع شجرة الزقوم
يا ناس القصر الليلة كيف أصبحتو
نزع الروح أليم والكرسي كان ودعتو
رفعنالكم علم وجيتوا اشَّبحتو
حكمناكم نُضاف وحكمتو واتربحتو
يا ناس القصر الليلة كيف قيلتو
شاطي النيل حداكم وفيهو اتنيلتو
شفتو الإتحادي وبالفزع ميلتو
بعد أب رسوة جال ما أظنكم كيَّلتو
يا ناس القصر الليلة كيف أمسيتو
راجيكم رحيل إن شاء الله اتعشيتو
صدقتو الجرايد وفيها اتغشيتو
حزب الإتحادي الليلة راجع بيتو
راحوا أهل الفضل أهل العقول والقدرة
وبقوا أسيادا أصحاب الوجوه البدرة
حليل أهل المكارم واليمين الخدرا
متل أبواتنا ديل في زمنا فيهم ندرة
الدين مو دقون فوق زول سمين وبدين
الدين البعاف الدنيا لي بعدين
الدين مو دعاية ودندنة وتدوين
الدين المعاملة للبعرفو الدين
قال مؤتمر وطني وكذب من قال
دا متآمر ولاوطني وكمان دجال
حكم الشعب يصدر فيه بالإجمال
بالإبعاد والتأبيد مع الإشغال
دا حال المؤتمرجية الجيوبا ملانة
قالوا بسيطة نرشي فلان وندي فلانة
قايلين بشتروهم بالفلوس والهانة
ما بياكلوا الحرام لو يسكنوا الجبانة
رصيدكم في البنوك سنداتو مال مسروق
ونحنا رصيدنا حباً في القلوب مدفوق
هي لله هي لله هتافكم حالية المنطوق
دخلنابو المساجد وإنتو الدخلتو السوق
يا أهل المناكر والعقول الماكرة
شعبنا ما نساكم ولا فقد للذاكرة
بيوت أشباحكم المنصوبة لسع فاكرة
وأعواد المشانق في السنين الباكرة
يا الإنقاذ بيوتِك عنكبوت وقزاز
وكيف بتجدعي الناس النفوسا عزاز
يا بلد الكرام والعُلَما والأفذاذ
كيف تتجرَّع الحنضل من الأكواز
فكر المؤتمر متأيدزا ومُسرطن
وثيقة الإنضمام تفقد عفافك شرطا
الإنقاذ دي بيت من طين وبدا يتفرتن
وكان طلع النهار سجم الدقون الوِرطن
السرعة وردَّك يا المؤتمر واتغتى
الإستحيوا ماتوا أريتك زيهم لو مُتَّ
رؤوس الفتنة ديل والخانوا للكسكتة
جونا مرشحين والريحة مالية الحتة
فوق كم يا المؤتمرجي بلا فهم متنبِّر
لا طين في الخلا ولا في البحر بتشبر
قولك في مديح حالنا الصِّبِح متغبر
زي القام بعد حرجم ضبيحتو يكبِّر
بعد جرَّبنا ما بنصدق الكضاب
والنطَّالنا بالشباك ما بنفتحلو خشم الباب
شوف المؤتمرجي الماكر المِلْعاب
غيَّر اسمو تاني وجانا بالقرقاب
أصلو الشعب ما بجيب تاني كوز مطفوق
الجلب الوبا وجلد النساء في السوق
السوداني ما بيهدأ ومزاجو يروق
إلا يساوي قبرو يجرُّو بالواسوق
يبكي المؤتمرجي وصاح وين عصفوري
كان في إيدي فكِّيتو وقلعت ضفوري
دي معركة للكبار مو لعب دافوري
فريق رفع العلم وفريق بني كافوري
من يوم جيتنا بالشباك وحكمك جبري
ليك عشرين سنة ويادوب بنيتلك كوبري
أهلنا اترصوا من توريت ولا حد عبري
ما بيجيبوك حتى ان كان كسيتهم تبري
كل ما جانا قال السد وبدا يتفشر
السد يا جماعة الخير غسيلو منشَّر
نص راسمالو راح والباقي دين إتعسر
وأهلنا في الصحاري عطيش وضاقوا الشر
مرشح مؤتمر شان صوتي شال وأداني
حلال أم حرام لي مواطنا سوداني
فلوسكن يا الحبيب سيد العقل أفتاني
شالوهن تحايل ورجعوهن تاني
شيل عند الضرورة القصوى حاجة خفيفة
وأدي النايب البتشوف صحيفتو نضيفة
قالوا الإنتخاب عملية حرة شفيفة
ما أظن يا الحبيب أصلو الكراسي وريفة
شن الحملة دي الواقف قطارا مفشق
وترجع صاده كل ما المؤتمرجي يعشِّق
مهما ترشي بالأموال ومهما تبشِّق
شعب العزة حالف ينقرك بالدبشق
كتِّر مكرفوناتك ولعلع فيها
أصلو الفيكم اتعرفت وبان خافيها
نار الفتنة شبيتا وجدعتنا فيها
وغير الاتحاديين منو البطفيها
| |
|
|
|
|
|
|
|
|
|
Re: ايها الانقاذيون لازلنا بذاكرة قوية فهل انتم مستعدون ؟! (Re: سفيان بشير نابرى)
|
1
تباً لعصرك ياعمر..تبًا لعصرك ثم تب
عشرون عاماً.. تسرقون .. وتكذبون .. وترقصون
وتذكرون الله دجلاً بالهتاف وبالتمائم واللحى ..
وبعض آيات السور ..
عشرون عاماً .. تشربون دماءنا .. ومياهنا .. والنفط والثروات من كل الحفر ..
عشرون عاماً تأكلون من الضرائب والعوائد .. تحصدون الحرث ..
والنسل
وحبات المطر..
عشرون عاماً تأكلون من النفاياتِ والقيمة المضافة ..
والعوائد .. والوبر ..
عشرون عاماً يا عمر .. والشعب مغشى البصر .. سر ياعمر .. !
2-
عشرون عاماً فى أراجيفٍ وزيفٍ وضلالٍ .. وسعر
قد بنيناها شوامخ .. جامعاتٍ مشرئباتٍ .. طرائق وكبارى .. ونفق
حقاً نفق .. حقاَ نفق !!
ماذاك إلا العشر من عشر الضرائب ياعمر ..
بل ذاك إستثمار رهطك فى البلاد وفى البشر ..!
تستثمرون بمالنا فينا ونهتف .. ياعمر ..!
3-
وعظائم العشرين عاماً لاتعد ..
فرية كبرى تعالت وانطلت .. كل الفواتير اللعينة مزقت !!
كل الصفوف قد توارت واختفت ..
الفواتير تسدد .. لاتمزق ياعمر !
الشعب قد دفع الثمن .. دفع الفواتير اللعينة
خبزاً .. وبنزيناً .. وسكر .. ونكد ..
4-
بالله بالدين المطهر تكذبون .. بالله بالدين المطهر تسرقون .. وترقصون !
حتى موائدنا اختفت .. غدت (الفلافل) أكلنا .. لغدائنا وعشائنا ..
نقتاتها فى الشارع المغبر .. لا ألماً نحس ولا خطر .. والشعب مغشى البصر
سر ياعمر .. !
5-
ومشايخ فوق المنابر يهتفون ..
يأمرون بطاعة الرحمن والرسل الكرام .. وبالعمر .. هذا العمر .. هذا الأمام المنتظر .
لاتخرجوا عن طوعه فتطردون وتحشرون
لست الأمام مبايعاً لست الخليفة ياعمر والشعب مغشى البصر .. سر ياعمر
عشرون عاماً .. تكذبون .. وترقصون ..
وتهتفون (هى لله لا للسلطه ولا للجاه ) .. بل هى للسلطة هى للجاه .. يا الله .. يا الله .. ! الكذب باسم الدين فى الشعب له أمضى أثر ..
الكذب باسم الدين فى البسطاء أفيون خطر ..
الكذب باسم الدين فى السودان سحر مستمر .. والشعب مغشى البصر ..
سر ياعمر .. ! عشرون عاماً من شقيات النساء ترضعون ..
من بائعات الشاى .. لاتتورعون .. من سائقى الركشات ..
عمال الطبالى تسرقون ..تباً لعصرك ثم تب !
6-
عشرون عاماً يا عمر .. بمواردنا ومكاسبنا ..
كنانة والرهد .. بعتم أراضينا ولا ندرى لمن ؟ بعتم أراضينا ولا ندرى الثمن ؟ بيعاً وإيجاراً .. ورهن .. إنه الجرم الذى لا يغتفر !
أين المفر يا عمر .. أين المفر ؟
وبعد عشرين عجافاً .. شجرة الزقوم رمز المؤتمر ..!!
(أنها شجرة تخرج من أصل الجحيم .. طلعها كأنه رؤوس الشياطين )
إبن يا نافع لى صرحاً أغر .. أوماتدرى بأن هذا الشعب مغشى البصر ؟
إلق عليه من فتات الخبز يأتى منهمر ..
إلق عليه من فتات العيش يأتى منفجر .. نحو السيادة والشموخ المستقر ..
صوب القوى الأمين المنتصر ! أكذا القوى ؟!
أكذا القوى مطارد بجرائم الحرب اللعينة فى مطارات الدول؟
أكذا الأمين يا عمر ؟
ألا يا أيها النيل تبارك و انهمر ..
ألا يا أيها النهر تدفق وانكسر ..
ألا يا أيها الشعب الخطر ..
ألا يا أيها الشعب تدافع وانفجر ..
ألا يا أيها الشعب انتصر !!
الف شكر للشاعر :-
معتصم محي الدين محمد
| |
|
|
|
|
|
|
| |
سفيان بشير نابرى
فتحي البحيري
نصار
نيازي مصطفى
فيس بوك
تويتر
انستقرام
يوتيوب
بنتيريست