|
قال : ( أنا كُنت نَاوي الحَج لكن قَبضوني ) !
|
قال : ( أنا كُنت نَاوي الحَج لكن قَبضوني )
مُقدِم البرنامَج :
ـ مولانا معانا خط .. ألو .. ألو
مُقدِم البرنامَج :
ـ ألو ... ألو
المواطن :
ـ السلام عليكم .
مُقدِم البرنامَج :
ـ وعليكم السلام ورحمة الله .. قول إسمَك ووَطي التلفزيون .
المواطن : ـ أنا عبد الرحمن عبد الجليل مختار من قِريحتي رَاحت .
مُقدِم البرنامَج :
ـ طيب يا عبدالرحمن وطي التلفزيون .
المواطن : ـ التلفزيون ما بتاعِي . أنا ضيف ساكِت .
مُقدِم البرنامَج :
ـ طيب كلمُن يوطوهو ليك .
المواطن :
ـ هُم مافيشين .
مُقدِم البرنامَج : ـ طيب ما توطيهو إنتَ !.
المواطن :
ـ الناس ديل بتاعين مَشاكِل .
مُقدِم البرنامَج :
ـ إنتَ بتتكلم من شِنو ؟
المواطن :
ـ من الموبايل .
مُقدِم البرنامَج :
ـ طيب ما تسيب الأوضة واطلع برة وكلمنا .
المواطن : ـ أنا قاعد في السَهلة .
مُقدِم البرنامَج :
ـ طيب .. أمشي بعيد وأرفع صوتك وقول سؤالَك .
المواطن :
ـ أنا داير أكلم مولانا مُمكن تديني فُرصة ؟
مُقدِم البرنامِج :
ـ أتفضل .
المواطن :
ـ مولانا أنا كٌنت ناوي الحج . وصلت السعودية أصلو للعُمرة ، وصبرتَ كتير أدور لَي شُغُل و ما لقيت ، لحَدي ما دخل شهر الحج وقلتَ أحِج . ويوم ( 8 ) في الشهر الشرطة السعودية قبضتني ، أها يا مولانا وَضعِي كيف ؟
مولانا :
ـ اللللللللللللللللله إنتَ أحْرمتَ وبعدين قبضوك ؟
المواطن :
ـ أيوة
مولانا :
ـ إنتَ مُتمتِع ؟
المواطن :
ـ مُتمتِع يعني شنو ؟
مولانا :
ـ إنت داير تحج وما عارف مُتمَتِع يعني شنو ؟
المواطن :
ـ لأ ....عارِف لكن قلتَ أتأكد .
مولانا :
ـ إنت مُقْرِِن ؟
المواطن :
ـ لأ.. يا مولانا ما تصعِّب الموضوع . السودان كُلو قاعد يسمع
وكمان المغتربين ، سُمعتي بِتبُوظ .
مولانا :
ـ دحين إنتَ ما عِندك غير النية… ، و لا شِنُو ؟
المواطن :
ـ شِنُو !
مولانا :
ـ شِنُو.. ! يعني سويت نُسُكك من طواف …؟
المواطن :
ـ لأ
مولانا :
ـ طيب ما ياهُو كلامنا !. أنتَ زول نية بَس ؟
المواطن :
ـ لكن أنا مُحرِم !
مولانا :
ـ في النهاية إنتَ عِندك النية . ربنا قال إنما الأعمال بالنيات . ربنا بإذنه تعالى يديك أجر النية ، والسنة الجاية إن شاء الله تسوي أوراقك كاملة . وتَجي في النُور ، وتحج . بدل ما تخُت إيدَك في قلبك ، ياربي ممكن يقبضوني في الحَرم ، يقبضوني في الطريق ، يقبضوني جَنب الحمامات . الحج مع الخوف بِزعزع العِبادة .
المواطن :
ـ مولانا عندي سؤال تاني .
مولانا :
ـ أتفضل
المواطن :
ـ الناس المغتربين البِطولوا من نُسوانُم تسعة سنين وضعهم كيف ؟
مولانا :
ـ الواحِد البتزَوج دة ما عارِف إنو زوجتو دي عندها حقوق وواجبات.
ولا الواحِد فيكُم ياخُد بنات الناس ساكِت وينطَلِق ؟
المواطن :
ـ عارِف .
مولانا :
ـ بَس من ديك وعِيك .
المواطن :
ـ والله ما صاح .
مولانا :
ـ طيب أنتَ وَكِت عارف الكلام دة ما صاح ما تكَلِم السألك دة.
المواطن :
ـ أنا كلامي ما بِسمعوهو ، لكن إنتَ طبعاً مولانا .
مولانا :
ـ الواحِد المفروض يرجَع بَلَدو إن شاء الله ولو زيارة خمستاشر يوم ،
على الأقل يتونَس مع مرتو ويشوف وليداتو . كان الموضوع صعب يرجع بلدو يشتغل .
المواطن :
ـ لكن السودان ما فيهو شُغل .
مولانا :
ـ الواحِد يتوكَل . وربنا قال البِتوكَل ربنا بِرزقو . دحين كلامي دة ما ياهو ؟
المواطن : ـ يا هو يا مولانا .
مولانا :
ـ الواحِد لو ما لقى شُغل إنشاء الله ياكُلها كِسرة بى موية .
ولو الكِسرة غالية ياكُل أي حاجة بى موية .
عبدالله الشقليني 15/4/2005 م
|
|
|
|
|
|
|
|
|