لا حولا... يا بريمة نكتا الكلام ده من وين؟ وإتا البيوديك لغاية هارفارد شنو بلسانك المعووج خلاقة ده؟
وكتر خير كل الأحباب والأصحاب القالوا فينا ما لا نستحق!
ونعم يا سيدي أنا مدرس ودي مهنتي منذ ستة سنوات.... ونعم نحنا أكاديميين من الدرجة الرابعة، وموش من التانية ذي ما قلتا... ونعم مرتباتنا ضئيلة ومع الضرايب والتأمين والمصاريف بالكاد نصل بيها آخر الشهر... وخاصة لامن تكون عايش في مدينتين من أغلى مدن أمريكا!
وفي الحقيقة كمان مرتباتنا معلنة في الموقع بتاع الجامعة لتحقيق أقصى مرحلة من الشفافية... ولأننا شغالين في جامعة خاصة وغير ربحية!
يعني ما جبتا جديد...
بس كمان أول مرة في حياتي أسمع لي زول بينبذ ليهو مدرس في مهنتو... وما عارف في عهد الإنحطاط الخلقي ده.. التدريس بقت شغلانة منكورة ولا شنو؟
كدي عاين لكلامك ده وورينا شن نفهم منو:
Quote: قضيتى أن محمد يس .. يجعل من نفسه أبهة وهيلامانة .. وهو متواضع أكاديمياً وسياسياً ..
والمتواضع لغوياً يا بريمة غير الوضـيع!
ولله الحمد على نعمة التواضع... لكن المصيبة في الزول البيكون وضـيع متلك... والحمد لله الذي أتاح لينا نعمة الحديث بعدة لغات وإجادتها لدرجة إننا بناكل عيش منها.
وتعرف من حسن حظي إنو المدرسة الأنا شغال فيها عضو في الـ Ivy League والأتاح لي تدريس طلاب من تمانية جامعات هي الأعظم في العالم... ومن كل المراحل الجامعية.. من البرالمة وحتى ما فوق الدكتوراة.... وده بيديك شوية دفعة مادية ومعنوية!
وهارفارد بميزانيتها التي تبلغ 35 مليار دولار توظف كل مدخولاتها في برامجها الأكاديمية... يعني إنجازاتها ما بتنتهي... وكل مدرس شغال فيها عندو دور تربوي وأكاديمي ومطالب ببحوث وبرامج مستمرة لمنفعة الجامعة ولمنفعة الإنسانية... وده بيفرض على طاقهما بذل جهود خارقة تتطلب منك جهد ذهني وقراءة مستمرة ودورات تعليمية وتثقيفية شبه يومية!
ونعود لمسألة التواضع يا بريمة.... في أول يوم لي في الجامعة وجدتا إنو مكتبي بيقع بين مكتب البروف جون موقاني، أعظم عالم لغوي بالعالم متخصص في أفريقيا... ومكتب البروف هنري لويس غيت، أعظم عالم في الدراسات الإنسانية والأفرو-أمريكية... ويا للهول... كيف لي وأنا الوضيع بمقياس السيد بريمة أن أكون بين هذان العالمان؟
وفعلاً، من تواضع لله رفعه. ورأيت فيهما تواضعاً عظيماً للعلم وللبشرية... ونعمت عندهما بإستقبال حافل أذهلني وأدهشني... ومهدا لي به الطريق وسهلا عليّ المهمة!
تعلمت منهما ومن غيرهما من الأساتذة والزملاء حب المهنة وواجب الإتقان... وكانا لي نعم الـ Mentors وتراني أعتز حالياً بصداقتهما وحميمية الزملاء والزميلات بكل أقسام الجامعة وكلياتها المختلفة.
فأنا أتعلم كل يوم من طلابي ومن كل أساتذتي وزملائي في هذه الجامعة العريقة!
وأنتا يا بريمة قد لا تزال ممتن لأستاذك الأول الذي علمك فك الخط وأنت صغير.... فهل يا ترى ستمتن لمن يعلمك فك حروف لغة جديدة عليك وأنت كبير السن تهضرب؟
ولا مجال هنا للسخرية أو التهكم في العمل المهني.... لأنه قدرك!!
وعيب الواحد لامن يهبش ليهو حاجة هي ليست ملككـ.. بل ملك هي لغيرك....
إذا عندك دواس مع محمد يسين... أهبشو لو راجل في حاجتو.... وما عندك مانع.... كلنا وضـيعين ومخلوقين من عجينة طين!
وشوقي قال في المعلم:
قم للمعلم وفه التبجيلا ***** كاد المعلم أن يكون رسولا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Mohamed Yassin Khalifa
فيس بوك
تويتر
انستقرام
يوتيوب
بنتيريست