|
|
 Re: بعشـــــــــوم الدروشـــــــــــــــــــــــــاب....... (Re: Hisham Ibrahim)
|
سجيمان الساحريات ديل ما قابلن حبوبة صلاح غريبة على لسان حفيدها شابكانا ما تصوتوا إلا للبشير وكان شفتولكم زول غير البشير حا تتعبوا وتندموا عليك الله شوف المرا دي كان عندها لاب توب كانت عملت لينا شنو دي الحالة بتكتب through حفيدها صلاح غريبه مش كده.
من زمااااان زمن الخريف تربية الأسر السودانية لي أولادها كلها خزعبلات وتخويف وترهيب – المفروض في الحتة دي نمسك قوي وكل واحد يشتكي حبوبتو ويقول عليها إرهابية كانت بتخوفني والما عندو حبوبه اليشتكي حبوبة صلاح غريبه تراها ديك عايشه والله يديها طولة العمر والعافية كمان – كان داير تلعب ساكت يقولو ليك الدودو والسحار والبعشوم وكان ما شربت اللبن وبطنك ملانه تشربو إن شاء الله تطرشو أو يطق فيك عرق وإن بقيتاً ما شربتو أم قيردون أو أى إسم حركي لأي بعاتي سوف يشربه ويمكن كمان يكفتك ويعوج خشمك ويبقي سجمك. أها مع التربية دي إن إنزنقت ساكت في الليل تأكلها في حنانك وتأجل الواجب للصباح إذا كان التكل فيهو بعشوم المستراح محل النجاسه والشواطين الما كضب يكون فيهو شنو وطبعاً الكنيف عادة ما يبعد عن أقرب منطقة مأهولة بالسكان في البيت بمسافة 30 خريفاً يعني يا بي ركشه يا جكه لو لياقتك fit يا كمان إنت وصبرك وقوة تحملك كان قحيت أو عطست أو عترت ساكت يمكن يحدث ما لا يحمد عقباه وتبقى سيرتك هى الكلام.
أنا زماااااااان زمن الإنجليز مشيت ناس عمتي بت وهب وإتمسيت عندهم بالحيل وكان ما في قمره الضلمه دي يسألني الله أصبعك ما تشوفو وفي حتة كدي في غابة كبيرة فيها منطقة زي رأس أخونا الأدمنستيريتور ما فيها طندبايه ساكت قايمه وناس الحلة والحلال المجاورة مسمنها أم بطناً طويلة – أسألوا منها منصور المفتاح عنده أصحاب وأصدقاء من تلك الأمصار – أها أم بطناً طويلة دي قالو ليك مستفه بالبعاعييت والسحاحير والشواطين وأرجل راجل كان بقي سكران ما بشقاها بعد المغرب وحتى الدواب بتحرن وما بتمشي إلا تحت تهديد الضرب بالسياط واللكلكه بالكرعين زي الكابويات بس ديل عندهم حديدة مدورة في نعلاتهم قالو إسمها المهماز بهمزو بيها الحصان عشان يفتح ويجري صاح ساعة الضرب يصبح شديد المهم راكب فوق حمار عمي وهو حمار الصلاة على النبي باقيلو شويه ويكون فرس مش زي حمير اليومين ديل الحمار من شدة ما قصير تقول بمبر في بيت مريسه بالله كرعيك يجرن بالواطه أو تعقلن وتبقي زي المزنوق في رحلة من رحلات السنغافورية من منطقة الخليج إلى مطار changi الدولي ، أها وكت دخلت تلك المنطقة الجرداء (أم بطناً طويلة) بدأت الوساويس تنتابني وبدأت أسمع أصوت غريبة وأتخيل مناظر أمامي لبعاعيت وسحاحير يحاولوا يخوفوني وبعد شوية بديت أسمع صوت جنزير وحكيت أضاني لامن جابت شمع وبرضو الصوت ياهو الصوت وقدر ما حاولت أتلفت وراي أشوف دا صوت شنو رقبتي دي إتعسمت وبقت ما بتلف تقول مصبوبه وبقيت متل العنز البترضع روحا يقومو يجيبو ليهم علبة نيدو أو بسله قديمه يحشروها ليها في رقبتا وكل ما تحاول تتني رقبتا عش ترضع العلبه تعتر ليها ، المهم نفسي قام وقلت خلاص الليله شياطين وسحاحير أم بطناً طويلة ديل كلهم بسجمو خشمي وقدر ما حاولت أتذكر شي من القرآن أتحصن بيهو غلبني أجي أقول قل هو الله أحد أتكس في قل دي وما أقدر أقول البعدا أها وأنا في الحاله الشلش دي يقوم الحمار يفرمل أتاري وصلت أهلي وأول ما نزلت من الحمار يقوم يدنقر رقبتو في الأرض بعد أن حط الحمل الثقيل عن كاهله ويديها نفخه يتطاير معاها رزاز أها أقوم أسمع ليك صوت الجنزير أتاريهو كان مربوط في رقبة الحمار ومن غيظي وحماقتي أعاين لي الحمار وأقولو أمك وأسجو أم كف وأيدي طبعاً ورمت وإنفصلت وبقيت في جبيرة والطريقة التنومني مساهر لا الصباح لامن الديك عوعا عيني ما لاقن النوم ، وحبوبتي ما حبوبة غريبة قالت لي يا ولدي في زول عاقل بكفتلو حمار قلت ليها "كناطح صخرة يوم ليوهنها" قالت لي هووووي آجنا أعقل والله تمشي تنطح تور عمك إلا يعور عينك ولا يقدلك بنطنك.
إنت آ جنا ماك نصيح ولا شنو ، وإلى أن أجد طريقة لمناطحة التيران أتركك في بحثك الدؤوب عن السحاحير والبعاعيت وعشه أم ضنب والسعلوه وبقية أساطير الأولين.
نحنا غايتو مجتمع يفك الكضبه ويصدقا وبعدين يخاف منها وهي كضبه ، ومرات كدي بقول حبوباتنا ديل كان متعلمات كان ألفن كتب تقول لي أجاثا كريستي ودان براون إنتو بتعرفوا شنو
|
|
  
|
|
|
|
|
| العنوان |
الكاتب |
Date |
| بعشـــــــــوم الدروشـــــــــــــــــــــــــاب....... | سجيمان | 02-23-10, 00:09 AM |
| Re: بعشـــــــــوم الدروشـــــــــــــــــــــــــاب....... | Hisham Ibrahim | 02-23-10, 06:40 AM |
| Re: بعشـــــــــوم الدروشـــــــــــــــــــــــــاب....... | almulaomar | 02-23-10, 07:50 AM |
| Re: بعشـــــــــوم الدروشـــــــــــــــــــــــــاب....... | سجيمان | 02-24-10, 10:05 AM |
| Re: بعشـــــــــوم الدروشـــــــــــــــــــــــــاب....... | سجيمان | 03-20-10, 08:15 PM |
| Re: بعشـــــــــوم الدروشـــــــــــــــــــــــــاب....... | سجيمان | 02-23-10, 08:44 AM |
| Re: بعشـــــــــوم الدروشـــــــــــــــــــــــــاب....... | almulaomar | 02-24-10, 01:47 PM |
| Re: بعشـــــــــوم الدروشـــــــــــــــــــــــــاب....... | سجيمان | 02-24-10, 07:07 PM |
| Re: بعشـــــــــوم الدروشـــــــــــــــــــــــــاب....... | سجيمان | 02-25-10, 08:34 AM |
| Re: بعشـــــــــوم الدروشـــــــــــــــــــــــــاب....... | عبدالرحيم أبراهيم العبيد | 02-25-10, 08:43 AM |
| Re: بعشـــــــــوم الدروشـــــــــــــــــــــــــاب....... | سجيمان | 02-25-10, 04:47 PM |
| Re: بعشـــــــــوم الدروشـــــــــــــــــــــــــاب....... | سجيمان | 02-27-10, 06:55 PM |
| Re: بعشـــــــــوم الدروشـــــــــــــــــــــــــاب....... | almulaomar | 02-25-10, 08:51 AM |
| Re: بعشـــــــــوم الدروشـــــــــــــــــــــــــاب....... | المكاشفي الخضر الطاهر | 02-27-10, 10:30 PM |
| Re: بعشـــــــــوم الدروشـــــــــــــــــــــــــاب....... | سجيمان | 02-28-10, 06:58 PM |
| Re: بعشـــــــــوم الدروشـــــــــــــــــــــــــاب....... | سجيمان | 02-28-10, 10:47 AM |
| Re: بعشـــــــــوم الدروشـــــــــــــــــــــــــاب....... | almulaomar | 02-28-10, 11:38 AM |
| Re: بعشـــــــــوم الدروشـــــــــــــــــــــــــاب....... | almulaomar | 03-02-10, 08:15 AM |
| Re: بعشـــــــــوم الدروشـــــــــــــــــــــــــاب....... | سجيمان | 03-03-10, 11:05 AM |
| Re: بعشـــــــــوم الدروشـــــــــــــــــــــــــاب....... | dardiri satti | 03-03-10, 01:31 PM |
| Re: بعشـــــــــوم الدروشـــــــــــــــــــــــــاب....... | سجيمان | 03-04-10, 08:04 AM |
| Re: بعشـــــــــوم الدروشـــــــــــــــــــــــــاب....... | dardiri satti | 03-03-10, 01:33 PM |
| Re: بعشـــــــــوم الدروشـــــــــــــــــــــــــاب....... | سجيمان | 03-09-10, 11:06 AM |
| Re: بعشـــــــــوم الدروشـــــــــــــــــــــــــاب....... | سجيمان | 03-26-10, 01:48 PM |
|
| |
almulaomar
فيس بوك
تويتر
انستقرام
يوتيوب
بنتيريست