جهات مجهولة تشوش على بث تلفزيون السودان

Quote: وهل تلفزيون السودان عدو لأمريكا؟؟؟ وإن كان كذلك (خلينا نصدق الوهم)... هل هو أكثر عداءاً من الجزيرة وتلفزيونات كوريا وفنزويلا وإيران وحزب الله وووووووو... ما في يوم سمعنا ولا شفنا التلفزيونات دي قاعدين يشوشو عليها... يا أخوانا التشويش ده بيكون من سجم الرماد القاعد يبثه لينا ويطمم بيه بطونا، ولا الكهرباء الكل يوم قاطعة، وكمان ما تنسوا الكفاءآت الفنية المشت للصالح العام وحل محلها غثاء السيل بشهادة الولاء بدلاً عن الشهادات العلمية. وما تنسى لزوميات الدعاية الإنتخابية (النمر النمر هجم النمر)... طبعاً الإنتخابات أفرزت الكثير والكثير فسفاح الأمن مرشح الدائرة 5 مروي فجأة أصبح من الخيرين (بنجد) ومن بناة المدارس والنوادي وشعاره (ولدنا البخدم بلدنا)؟؟؟ وفي الخرطوم ستات الشاي بقن مواطنات صالحات ويعولن أسر وعندهن أولاد في الجامعات (قبل الإنتخابات كانن بنات كلب ما يستحقن غير عصا الكشة الغليظة)، الغريب أنو الوالي بيقول كان شفتوا كشه كلموني (صباح العسل يا والي السجم والرماد، هي كشات الجن دي قاعد يسويها منو لامن يكلموك)، غايتو يا ستات الشاي حدكن في الرفاهية أبريل عشان كده ما توقفن التدريبات على الجري السريع... جالية السودانيين بمصر دابه ظهرت ووفجأة جاها دعم مليون دولار ،،، (غايتو كان ما قبضوها قبل أبريل يبقوا قبضوا الريح، وأي ريح؟؟؟).. بس تعرفوا أكتر حاجة ضحكتني في حملة الريس، كلامو عن التعليم قبل الإنقاذ (كان رفاهية الأغنياء لأبنائهم)،، ودي عرفت بيها أنه حسن أحمد البشير والد الريس كان من الأغنياء فرفه أبناءه بالتعليم (مهندسين وأطباء وعسكري بقى رئيس). شفتوا كيف؟ يا أخوانا بالله عليكم الله خياراتكم في من تؤيدون دي حرية شخصية لكن كمان أحترموا عقولنا وما تمرضونا أصلنا برانا عقاب عمر.... الشايقي