|
Re: قطر نيالا... (Re: محمد ادم الحسن)
|
محمد ادم تحياتي تعرف قطر نيالا ده طالبني قروش كتيرة فكنت من ركاب السطوح دائما في العلالي وبفتش طريقة اشوفهم طالبني كم وارجعها ليهم. اولا ترتيب المحطات وقعت في بعض الاخطاء في الترتيب وادخلت ثلاث محطات لايمر بهم القطار وهما غزالة جاوزت وهي شمال الضعين وابومطارق وهي جنوب الضعين وابوكارنكا وهي شمال غرب عديلة واليك الترتيب من الضعين الي بابنوسة الجلابي بخيت دار السلام ابوجابره عديلة شارف التبون ابورفاي فرع الهبيل بابنوسة
Quote: ومطر قادم هيركب معانا |
في السطوح طبعا
Quote: وبابنوسه تسألكم عن إبنها |
وهو الاخ والصديق الغائب الحاضر عيسي محمد ونسي رد الله غربته وغربتك انت برضو وكل الاشواق
| |
|
|
|
|
|
|
Re: قطر نيالا... (Re: مطر قادم)
|
Quote: الجلابي بخيت دار السلام ابوجابره عديلة شارف التبون ابورفاي فرع الهبيل بابنوسة
|
عارفك مسطحاتي قدييم
يامطر عز الحريق تحياتي وأشوقي الحارة جدًا رغم برودة الجو هنا. وكدي إستلم أدفر معانا القطر دا شوية لغاية لما نشوف حنوصل الخرطوم دي متين؟
| |
|
|
|
|
|
|
Re: قطر نيالا... (Re: محمد ادم الحسن)
|
و حمدة
Quote: وكدي إستلم أدفر معانا القطر دا شوية لغاية لما نشوف حنوصل الخرطوم دي متين؟ |
تاااااانى الزراع الطويل؟
.................. انتو شنو ردا الله غربتكم دي؟ فهمونا ياخ؟!
| |
|
|
|
|
|
|
Re: قطر نيالا... (Re: سفيان بشير نابرى)
|
يا محمد ادم سلامات شكلوا كان الكمسارى مديك زرة والقطر مارق من الضعين عشان كدة لخبطت المحطات الضعين - الجلابى - دارالسلام - بخيت - ابوجابرة المحطة - عديلة - شارف - التبون - ابو رفاى - فرع الهبيل - وبعد داك مطر قادم يسطح معاك بعد ما القطر يقعد يدخل يدخل الورشة ستة ساعات والناس تدقش الحلة - تستحم فى بيوت السكة حديد والمقطاع والمصنع - تاكل وتشرب - وما تسنى الكوشتينة ايام رغم عذابات السفر او كما يقولو وعثاء السفر بس لها ذكرياتها وطعمها ل بابنوسة وقع خاص فى نفسى كم اشتاقك
| |
|
|
|
|
|
|
Re: قطر نيالا... (Re: سفيان بشير نابرى)
|
تعرف يامحمد ادم هناك هداي من ابناء المسيرية اسمه صاغه او ساغه قال قصيدته وهي تعد وتحصي المحطات من الخرطوم عمومي محطة محطة لم ينسي ولا محطة حتي قلنا علي السكة حديد مكافأته وتكريمه لكنه حينما ياتي لمحطة بوطه وهي المحطة قبل بابنوسة فبدلا عن ان يقول بابنوسة يردد حرف ب ب ب ب ب ب ب بابنوسة ومانطيت الالبان مناك ويقصد لم يواصل بعد ذلك ونزل والالبان قصد به مصنع البان بابنوسة.كانت منتجاته من اللبن المجفف يكتب عليها (لبن بقاره) ياحليل المصنع الذي اقامه الروس في 67 بساعدك في المحطات من بابنوسة بوطه صموعه وادي الغلة الفولة البوبويا جبل البيجا ابوكوع الدقاق الدواس ابوزبد ابوقلب الفينقر الضروس الدبيبات الحمادي شيكان ام سرير الغبشة عرديبه الرهد ومابين الدبيبات والرهد شاكي في صحتها وبجيك صاد ان دعي الداعي لباقي المحطات تاني حاجة سافرت قبل عام الي نيالا من بابنوسة وهي مسافة حوالي 400 كيلوا تقريبا فالقطار اوصلنا نيالا في سبعة ايام بلياليها لانه كان يسير بسرعة بطيئة وفي النهار ولايتحرك ليلا وفي مقدمته وموخرته طاقم حراسة من الجيش ومن الشرطة مدججا بالسلاح وزمان يامحمد كان قطار نيالا ثلاث مرات في الاسبوع والان اصبح مرة في الشهر ردد معي يامحمد لابديل للسكة حديد الا السكة الحديد فهي الناقل الوطني بامتياز لانه كان ينقل معظم السودانيين في ترحالهم فليعد للسكة حديد مجدها الآفل
| |
|
|
|
|
|
|
Re: قطر نيالا... (Re: مطر قادم)
|
الاخ والصديق سفيان تحياتي
Quote: انتو شنو ردا الله غربتكم دي؟ فهمونا ياخ؟! |
هي في اوضح وابهي معانيها ان اي سوداني مكانه الطبيعي بلده فلو سافر للحج او العلاج او الاغتراب فبذلك يتضرر هو واهله فنقول رد الله غربته ليعيش حياته وسط اهله وذويه واحبابه والغربة ان شاء الله تعدمي ياتعقري كما تقول عقد الجلاد وانت في القاهرة فحينما يقول لك الناس رد الله غربتك فهي دعوة لترجع لاسرتك وبلدك واصحابك وتكون سعيد بلقياهم وعارفك جاي للقاهرة فرد الله غربتك
| |
|
|
|
|
|
|
Re: قطر نيالا... (Re: مطر قادم)
|
يا محمد ادم قطر نيالا مشروع كتاب وافلام توثيقية وحكايات ووووو من نيالا للخرطوم حكاية ومن الخرطوم لنيالا حكاوى وفى نص الحكاوى دى الطلاب وحكاويهم كثيرة خاصة ومعاناة طلاب الغرب عموما دارفور وكردفان مع السفر والسكن فى الخرطوم مرة وتقريبا الكلام ده فى 2001 م ماشين عيد رمضان انا وعبدالحميد ادريكه وهيثم مطر اولاد زالنجى وانور عبدالله من نيالا وشلة كبيرة من طلاب النيلين الدنيا رمضان وناس دارفور بيصوموا حتى وهم مسافرين لا حجز لا تذاكر قطر عيد جى من الخرطوم مغلق فى الرهد كان المشهد غريب القطر صفر انا متذكر رجلى واحدة فى سلم العربة والتانية فى الهواء لما القطر بيصل محطة الناس بتفتش على اكل وشاى احنا كنا بنطلق كرعينا وتديها شوية نومة فى ابوزبذ اعتقل بوليس السكة حديد هيثم مطر وانور عبدالله وتقريبا القطر فاتهم وقدموهم لمحاكمة
يا مطر لا بديل للسكة حديد الا السكة حديد ولا بديل لنادى السكة حديد بابنوسة الا نادى السكة حديد وفريق السكة حديد
كان فى واحد بيحوم القطر بتاع شاى بيسمع المحطات اسمو حمادة سكر زيادة
| |
|
|
|
|
|
|
Re: قطر نيالا... (Re: ماجد معالى)
|
Quote: لا بديل للسكة حديد الا السكة حديد ولا بديل لنادى السكة حديد بابنوسة الا نادى السكة حديد وفريق السكة حديد
|
ياماجد معالي تحيات وسلام كتيير
بالله عليك واصل خلينا نستعيد ماتبقي من ذكريات السفر (إلي نيالا وبابنوسه والضعين) في هذا الزمن الصعب
ودي بتذكرني من الأسكلا وحلا.
| |
|
|
|
|
|
|
Re: قطر نيالا... (Re: ماجد معالى)
|
ماجد معالي ياحبيب تحياتي شكرا للذكريات الجميلة عن بابنوسة فريق السكة حديد بابنوسه اسمه الشبيبه وكم احزنني انا مشجع فريق الاهلي بابنوسة انه حين مباراة الاهلي والشبيبة تقوم ادارة السكة حديد بتكليف سعيد مدافع الاهلي والكهربائي بالسكة حديد بمرافقة احد قطاراتها.ليسافر وتقام المباراة بدونه كتر خير سودان بابور صخرة دفاع الاهلي وكل الكوكبة في فريق الاهلي تقوم بالواجب الكروي وواجب السكة حديد ياماجد معالي حماده الي الان مازال يرافق قطاراتنا في الشمال والغرب ومازالت عباراته المحببة تشنف اذاننا فيقول عن القهوة القهوات تزيل الهبنات حماده احد رموز السكة حديد الجميلة فلك وله عاطر التحيات
| |
|
|
|
|
|
|
Re: قطر نيالا... (Re: مطر قادم)
|
Quote: ردد معي يامحمد لابديل للسكة حديد الا السكة الحديد |
لا بديل للسكة حديد إلا السكه حديد
تسقط تسقط حكومة الجبهة..
| |
|
|
|
|
|
|
Re: قطر نيالا... (Re: محمد ادم الحسن)
|
Quote: تاني حاجة سافرت قبل عام الي نيالا من بابنوسة وهي مسافة حوالي 400 كيلوا تقريبا فالقطار اوصلنا نيالا في سبعة ايام بلياليها |
وحاة الله انت استلمته حق السفر بالطيران اها معلومة انك مشيت بالقطر دى جاءت هسي!!! غايتو عمائلك عجيبة. معليش يا استراليا.
| |
|
|
|
|
|
|
Re: قطر نيالا... (Re: حافظ عبد النبى)
|
Quote: في محطة مهمة جدا اسمها بارا |
حافظ ياخوي حبابك
يازول إنت متأكد راكب معانا قطر نيالا ،
ولا قطار الشوق
المهم لبارا ولميونها وخدارا ، ألف سلام وتحية
ويقولون :
كلما فتح حلم الوصول سكة قفل وجع الرحيل أبواب
تحياتي وكن بخير
| |
|
|
|
|
|
|
Re: قطر نيالا... (Re: محمد ادم الحسن)
|
يا مطر انا كنت اقصد نادى (شرطة السكة حديد) لعبت فيهو ايام الخدمة الالزامية مع محمد داؤد انا ذاتى اهلاوى وبيتنا فى حى الجلابة سفيان يقوم يشوف حى الجلابة دى يقول الزول ده جلابى كمان منو البنسى حمدان رحمة والحوار ومسلم وعفيفى بقارى وغيرهم من ارتدوا شعار الاهلى
| |
|
|
|
|
|
|
Re: قطر نيالا... (Re: مطر قادم)
|
Quote: يا مطر انا كنت اقصد نادى (شرطة السكة حديد) لعبت فيهو ايام الخدمة الالزامية مع محمد داؤد انا ذاتى اهلاوى وبيتنا فى حى الجلابة سفيان يقوم يشوف حى الجلابة دى يقول الزول ده جلابى كمان منو البنسى حمدان رحمة والحوار ومسلم وعفيفى بقارى وغيرهم من ارتدوا شعار الاهلى |
ياخي طالما انت اهلاوي كان تلعب في الاهلي ذكرتني الاخ والصديق حميده كرفو يسكن حي الجلابه ويلعب في فريق الشرطة وهو بقاري واهلاوي ولو جيت للاهلي بابنوسة من زماااااان فالقائمة تطول واذكر منها الحارس الفذ المرحوم مادبو محمد حمدان ومحمد عيسي وابوالاصابع عثمان محمد الحسن بوكش سودان بابور هاشم قريب ابوطاهر سعيد حامد حكومة الحوار محمد مسلم ورئيس النادي استاذنا عبد الله الحرية شطة وعبدالله ابوالقاسم والفاتح حسن وفائز سيد واخرون يا للاهلي من فريق محبب
| |
|
|
|
|
|
|
Re: قطر نيالا... (Re: مطر قادم)
|
ياسلااااااام عليك يامطر
كدا حليت لينا الرحلة وبقت فيها شجون ولهفة وأشواق.
وقول لسفيان نحن بقينا جايين للمركز بقطرين قطار الشوق ، وقطر نيالا
وقول لحافظ ياخوي بارا دي قطر الشوق دا بغشاها ما تخاف.
ودمت لك تحياتي
| |
|
|
|
|
|
|
Re: قطر نيالا... (Re: محمد ادم الحسن)
|
ود ادم سلامات ده القطر الشال الحبايب في عز النهار.. انت عارف لمة الناس في المحطة اجمل ما في السفر.. صافرة المغادرة لقطر نيالا تعلن بداية مباراة في كرة القدم في ميدان السكة حديد..
| |
|
|
|
|
|
|
Re: قطر نيالا... (Re: ذواليد سليمان مصطفى)
|
ذو اليد ودعمك كيفك إنت؟
الغنية دي بتاعة أحمد شارف
وأحمد شارف دا حكاية تانية وكتاب تاني
(بالله عليك الله يامطر) أحمد شارف دا داير ليه بوست كارب كدا
المهم الغنية كلماتها :
الزول الماعندا زوق؟ الزول دا منو سقاه ألمي الحوض؟
صفر قطر نالا وعندي حبيب شالا عندي حبيب شالا ... في الغربة البطاله
| |
|
|
|
|
|
|
Re: قطر نيالا... (Re: محمد ادم الحسن)
|
ابن عمي
كل عام وانت بخير
الاغنية كلمات والحان يوسف باب الله
اطال الله فى عمره
وهو الذي خرج بالتراث الدارفوري الى العالمية
ولولا هو والاستاذ ابراهيم سوناتا لما كان عمر احساس واحمد شارف
والحق يقال
لان هؤلاء لي بهم معرفة شخصية
واحمد شارف هو صديق عزيز ولا افضله على الاخرين اذا اردت الاتصال به هذا هاتفه 00249912965497
بخصوص بوست عن احمد شارف مهم للغاية افتح البوست يا مطر قادم ولك الف تحية
| |
|
|
|
|
|
|
Re: قطر نيالا... (Re: ذواليد سليمان مصطفى)
|
الاخ محمد ادم الحسن وبقية الاخوة
زكرتونا ايام التسطيح والمشترك
انا من قرية هلال بين محطة بخيت وابوجابرة والسكة حديد تمر بالقرب من زراعتنا فلنا زكريات جميلة مع قطر نيالا
الوليد محمد احمد-المحامي-بروكلن-نيويورك
| |
|
|
|
|
|
|
Re: قطر نيالا... (Re: Elwaleed M. Ahmed)
|
حباب أولاد الغرب
محمد أدم .. منور البورد.
قصص الحب فى القطار نسيتوها أم أعددتموها من المسكوت عنه !
مرات كتيره نكونوا فى محطة القطار فى الدبيبات أو الحمادى ويركب الواحد فى القطار لثلاثة محطات حب ساكت .. متابع ليك واحدة.
وبعدين نسيتوا أيضاً حكايات النشالين: واحد بقارى رابط صرة قروش فى عمته .. الحرامى ركب معاه محطات ولم يعرف محل القروش .. فى الأخير شك فى أن الزول صارى القروش فى طاقيته تحت العمة .. مشى أشترى بطيخه وأثناء قام القطار متحرك .. الحرامى ناول الزول البطيخة .. أمسك يا عمك .. عمك أستلم البطيخة والحرامى أستلم العمة وكسح.
بوست جميل
بريمة
| |
|
|
|
|
|
|
Re: قطر نيالا... (Re: بريمة محمد)
|
يا الله مالك ياخى داير تقوم نفسنا !!
الغريبة واقف من سنين برغم أن السكة مافيها شوك بدليل قطارات تنقل البضائع من الخرطوم والكباب من نيالا إلا البشر لعدة اسباب :
1- تفريغ العاصمة من النازحين 2- محاربة السكن العشوائى 3- يتسبب فى مكسب كبير من ناحية إستثمارية 4- مشكلة سياسية وعقد نفسية مزمنة 5- معركة فى غير معترك غير متكافئة 6- هنالك شركات طيران لابد لها وان تدر دخلا
وبرغم ذلك هنالك قطارات تنقل بضائع وترجع محملة بالماشية .. معادلة صعبة ومشفرة !! والولاة فى الإقليم يشيلوا يشيدوا ويمدحوا فى التنمية المتوازنة ؟!
..
| |
|
|
|
|
|
|
Re: قطر نيالا... (Re: ادم الهلباوى)
|
حاجة تانية يا ود ادم والاخوة المتداخلون لقطار نيالا سر خاص معاناة السفر التى لا يمكن ان يتخيلها جيل اليوم افرزت قامات سامقة فى كل المجالات ذكرنى هذا الاخ الوليد الوليد نموذج للانسان الناحج العصامى المثابر ركب قطر نيالا وسطح فيهو من قرية هلال الى الجامعة الاسلامية ومنها الى نيويورك حيث يدير شركة المحاماة الخاصة به وهو من السودانيين القلائل الذين يشتغلون بالمحاماة فى امريكا وهو ناتج قطر نيالا تحياتى اخى الوليد ويا محمد ادم مزيد من التنقيب عن ثمار قطار نيالا
| |
|
|
|
|
|
|
Re: قطر نيالا... (Re: ماجد معالى)
|
يامطر ظهر ليكم اخونا معلم كبير من امريكا حتي لينا الاتو مرة واحدة
الاخ محمد ادم الحسن تحية طيبة ابعثها اليك من ارض المهجر من الشاطئ الغربي للمحيط الاطلنطي بعد ان طال الغياب وزاد الشوقوالحنين الى نيالا البحير وواديها الاخضر وادي برلي اخي قرأت البوست وكأني راكب على سطوح قطر نيالا او قطر شيخو فوق مساعدة بسيطة في الترتيب نيالا - بليل- -ام كردوس - تورطعان - خور شرم - كاسب - صليعة - معاليا - ام وريقات - غزالة جاوزت - الضعين الجلابي - دار السلام - بخيت -ابوجابرة - عديلة - شارف - التبون - ابو رفاعي - فرع الهبيل - بابنوسة بوطة - صموعة - وادي الغلة - الفولة - البابوية - البيجا - ابو كوع - الدقاق - الدواس - ابوزبد ابو قلب - الضروس - الفينقر - الدبيبات - الحمادي - البركة - شيكان - ام سرير - عرديبة - الرهد السميح - ابو حمرة - ام روابة - الغبشة - ودعشانة - تندلتي - سليمة - ام كويكة - الوساعة - كوستي ربك - جبل بيوت - جبل دود - جبل موية - سنار - ود الحداد - الحاج عبدلله - ود النو - العقدة - بركات - مرنجان مدني - طيبة - المسلمية - الفقرة - الحصاحيصا - قرشي - قنب - ابو عشر - المعيلق - الترابي - ود لميط - المسيد ود عيسى - الباقير - سوبا - الشجرة - الخرطوم مودتي دودة عبدالله بخيت cell 0012603123335
| |
|
|
|
|
|
|
Re: قطر نيالا... (Re: حبيب نورة)
|
جرسة ساكت... اصلو الغربة بتهيج الحاجات الزي دي
اختك ذاتا لسه شغالة المحلي داخل عطبرة .. والعجب وكت تسمع قطار الشوق في البرد البكتكت ده..روحك تمرق ( ...زاتو بطلع على قول صديقنا دهب الحلفاوي)
| |
|
|
|
|
|
|
Re: قطر نيالا... (Re: Manal Mohamed Ali)
|
الله عليكم ياشباب
أخي محمد آدم وكل المتداخلين سلام وشوق كتير لكم ولكل المحطات والسهول والبوادي.
ياأخي ذكرتونا وهيجتوا الاشواق لتلك الرحلةالممتعة ولكل ما فيها من تنوع في المناخ والتربة
والناس , فلكل محطة ومنطقة نكهتها ومزاقها الخاص خصوصا اذا كانت الرحلة خريف وانت ماري بالسهول
والقيزان دول في الزراعة ودولاك سارحين بي بقيراتم وداك راكب جمله ماشي صعيد وانت مستمتع بريحة
الدعاش وجمال الطبيعة الربانية...
يالها من ايام!!!
| |
|
|
|
|
|
|
Re: قطر نيالا... (Re: اناهيد كمال)
|
السكة حديد او سكك حديد السودان اولا كانت سودانير العاجباكم دي تتبع للسكة حديد تخيلوا!!! لذلك فالسكة حديد هي الناقل الوطني بامتياز لان سودانير تابعه لها ولو الي حين فتبعتها ردحا من الزمن وبابنوسة كانت رئاسة الاقليم الغربي للسكه حديد وبها ورشة عظيمه اهلت اناس كثر لمستويات فنية رائعه
ثم مأساة السكة حديد هي قفلها لمدرسة جبيت فهي من اعظم المدارس في تاريخ السكة حديد مازال الناس في السكة حديد مستغربون لقفل هذه المدرسة وهي بمثابة أس التعليم الفني او ان شئت قل جامعة السكة حديد فهي تدفع سنويا بخريجيين مؤهلين بمستوي رفيع ومقتدر في مجالات الخراطة البرادة الكهرباء الميكانيكا وتخصصات اخري تشمل اعمال هندسية وفنية ومايتعلق بالصيانة والخ
وخطر لي سؤال ماذا لوقامت الصين مثلا باقامة خط جديد من بورسودان الي الجنينة ومن بابنوسة لواو ومنها لجوبا ونمولي والدمازين ومن نيالا الي الفاشر ومنها الي دنقلا وبذلك نكون ربطنا السودان مع بعضه البعض والاخوة الصينيون بعد انجاز الخط وفقا للمواصافات العالمية في عرض الخط ومواصفات بنيته التحتية نقول لهم ده دين لمدة خمسين سنة بالاقساط المريحة وهو بجيب حقة وبالزيادة وبلاش خصخصه لم نلن منها الا اسمها الرنان والضمان بترولنا اما القطارات وعربات الركاب وعربات البضاعة فتعالوا الي كلمة سواء فالمجر دولة ذات باع او غيرها نستورد منها قاطرات وعربات وعقد للصيانة لمدة خمسين سنة وبدين مريح وبضمانات مريحة وبذلك سنجني فوائد جمة اولا نتنقل بسرعة وللزمن قيمة ثم تنخفض الاسعار بخفض قيمة الترحيل للمحاصيل والخضروات والفواكه انا بحلم ومشيت بعيد ولا انا الصاح المهم في امريكا وروسيا والصين واليابان والمجر للسكة حديد شأن عظيم فلتكن سكة حديدنا بين الامم
| |
|
|
|
|
|
|
Re: قطر نيالا... (Re: مطر قادم)
|
Quote: السكة حديد او سكك حديد السودان |
يامطر قادم
أنا سلمتك (قطري) وكنت قايلك أمين عليه؟
ـــــــــــــــــــــــــــــــ تاني حاجة لازم تسافر بالقطر. ولا شنو؟
| |
|
|
|
|
|
|
Re: قطر نيالا... (Re: اناهيد كمال)
|
Quote: والحمد لله ما بصل امدرمان؟؟؟؟؟؟؟ |
أناهيد كمال تحية قلبية
هو طبعاً مفروض يصل أمدرمان لعدة أعتبارات منها بدل ما يقطع ليه كم كبري ويلف ماكان بهنا أقرب لكن طبعا ولأن ناس الغرب بيسروا القلب وبيحبوا التواصل كان لازم يكون للجزيرة والنيل الأبيض نصيب من قطر نيالا.
______________ بس أمدرمان دي بنجيها بالعربات.
| |
|
|
|
|
|
|
Re: قطر نيالا... (Re: ادم الهلباوى)
|
Quote: 1- تفريغ العاصمة من النازحين 2- محاربة السكن العشوائى 3- يتسبب فى مكسب كبير من ناحية إستثمارية 4- مشكلة سياسية وعقد نفسية مزمنة 5- معركة فى غير معترك غير متكافئة 6- هنالك شركات طيران لابد لها وان تدر دخلا |
كلام في الصميم والله ياهلباوي ولا تعليق
كن بخير
| |
|
|
|
|
|
|
Re: قطر نيالا... (Re: بريمة محمد)
|
Quote: وبعدين نسيتوا أيضاً حكايات النشالين: واحد بقارى رابط صرة قروش فى عمته .. الحرامى ركب معاه محطات ولم يعرف محل القروش .. فى الأخير شك فى أن الزول صارى القروش فى طاقيته تحت العمة .. مشى أشترى بطيخه وأثناء قام القطار متحرك .. الحرامى ناول الزول البطيخة .. أمسك يا عمك .. عمك أستلم البطيخة والحرامى أستلم العمة وكسح.
|
بريمة تحياتي وسلامي
برضو إتزكرت عمك شحات كدا في محطة الضعين كلما القطر يصل الضعين تلقاه أول المستقبلين للقطر ولابس ليه جلابية رثة جدا ومشرطة
ويكوريك : جلابية ... جلابية ... جلابية
وبس وكم واحد يديه جلابية يعلقها في كتفو ويحوم جلابية ... جلابية و ظل يجمع في الجلاليب حتي فترة طويلة ماعارف عمك دا يكون عدد الجلاليب الماها كم لغاية أسع؟
ممكن مطر قادم يستطلع لينا الموضوع دا.
| |
|
|
|
|
|
|
Re: قطر نيالا... (Re: Elwaleed M. Ahmed)
|
Quote: انا من قرية هلال بين محطة بخيت وابوجابرة والسكة حديد تمر بالقرب من زراعتنا فلنا زكريات جميلة مع قطر نيالا
الوليد محمد احمد-المحامي-بروكلن-نيويورك |
أستاذ الوليد لك تحياتي ولناس قرية هلال الف سلام
أرجو أن تحكي لنا بعض من تلك الزكريات.
| |
|
|
|
|
|
|
Re: قطر نيالا... (Re: محمد ادم الحسن)
|
محمد آدم الحسن سلامات
يا زةل ديل كلهم يومين غربه ووصلت في نكش الذكريات لحد قطر نيالا وبقيت تعد في المحطات كمان؟؟
ربنا يخفف عليك...هانت السنه الاولى صعبه لكن بتتعود.
يا جماعه اظنكم ما ناقشين سفيان ما عارف محمد أدم سافر لهولندا؟؟
ولا شنو يا سفيان؟؟؟
محمد الحسن
بالله تلفونك بالماسنجر
وحليل زمن قطر نيالا...دي ذكريات خلوها ساي
انت ما جيتوا بعد ما انتهى المولد؟؟؟
| |
|
|
|
|
|
|
|