|
|
|
 Re: حمار يتبع رسميا للأمم المتحدة في السودان (صور) (Re: قلقو)
|
حمار يتبع رسميا للامم المتحدة.. برضو وارد.. ما هي الامم المتحدة برضو محتاجة لي حمير لانو في مناطق في السودان لا يمكن الوصول اليها الا بواسطة الحمار و زي ما عندهم العربات الرباعية الدفع اهي دي قوة ربانية رباعية الدفع وسهلة الدفع
بس المحيرني .. هل الحمار دة عندو حصانة؟
| |
 
|
|
|
|
|
|
|
|
Re: حمار يتبع رسميا للأمم المتحدة في السودان (صور) (Re: GamarBoBa)
|
| Quote: هل الحمار دة عندو حصانة؟ |
نعم يا الفضل... كل الحيوانات المملوكة للبعثات الدبلوماسية لديها حصانة
وأوراق وبطاقات دبلوماسية
أنت ماسمعتا بقصة كديسة السفير السوداني في فرنسا؟
ودي فعلا قصة حقيقية وكان فيها تفعيل لقوانين فينا البتحكم العلاقات الدبلوماسية بين الدول
زمان واحدة زميلتنا كانت معانا في الـ IOM قالت ليا إنهم إضطروا يأجرو ليهم شوية حمير
في جبال التبت عشان يصلو لناس الدايلاما... في منطقة جبلية قاسية
وكمان تم تأجير وشراء بعض الحمير في أفقانستان من قبل الأمم المتحدة
يعني الحمير والبهائم مرات بيفيدو أكتر من الهلكوبترز
___________________
ووينك يا واصل؟
| |
|
|
|
|
|
|
|
|
|
Re: حمار يتبع رسميا للأمم المتحدة في السودان (صور) (Re: ماضي ابو العزائم)
|
Quote: أنت ماسمعتا بقصة كديسة السفير السوداني في فرنسا؟
ودي فعلا قصة حقيقية وكان فيها تفعيل لقوانين فينا البتحكم العلاقات الدبلوماسية بين الدول
|
يطرشني يا ودالخليفة.. ولو قلت لي كديسة السفير الفرنسي في السودان (كنا نقول معليشي).. لانو الفرنسيين عندهم ثقافة إقتناء القطط والكلاب والحيوانات الاليفة.. لكن نحن عندنا لما يقول ليك عندك كديسة ما عندها غير معنى واحد... أتمنى ان تكون كديسة السيد السفير قطة وليست (نقطة)
ودمتم مع تحياتي وودي
| |
|
|
|
|
|
|
|
|
|
Re: حمار يتبع رسميا للأمم المتحدة في السودان (صور) (Re: elfadl abdellatif)
|
الفضل سلامات...
يا أخي دي قصة حصلت من مدة طويلة في سفارتنا في باريس
وهي إنو السفير كان عندو قطة أليفة أولاده كانو بيحبوها وبيهتمو بيها
في مرة كان السفير مسافر إجازة مع الأسرة وفتش على زول يهتم بالقطة بتاعتو
ولضيق الوقت ما لقى غير عمك سوداني كان شغال مراسلة في السفارة لسنين طويلة
وصاحبنا المراسلة ما قصر... شال القطة بعربية السفارة ووداها بيته وآخر إهتمام
أها بعد السفير جا راجع قال ليهو الأولاد بيسألو عن قطتهم... أرجوك جيبا ليهم
وصاحبنا ما صدق... وقدر ما حاول ما لقى عربية توديهو بيتو عشان يجيبها
وفي النهاية ركب البص ومشى شالها في شوال وركب بيها البص!
وفي نص الطريق قامت الكديسة الفضيحة تنونو جوه الشوال ولفتت أنظار الركاب
وقامت واحدة فرنسية عجوز ما لاقية ليها موضوع ومشت للسواق وقالت ليهو:
في زول أسود شايل كديسة في شوال... أظنه سارقها ولا عاوز يأكلها
وهنا ما صدق سواق البص ومشى بي بصه لأول قسم كلم البوليس...
وطبعا جو وأخدو الشوال من عمك بي كديسته وكلبشوه
وعمنا ده رغم عيشتو الطويلة في باريس... إلا فرنسيته ضعيفة وما قدر يفسر الحكاية للبوليس
وكأجراء متبع قام البوليس بأستدعاء جماعة الرفق بالكدايس عشان يفحصو كديستناديك
وعملو تحرياتهم عشان يشوفو لو في بلاغ عن كديسة ضائعة أو مسروقة...
ولمن جو يفيشو عمنا( عشان يمكن يكون مجرم ولا لاء) قام عمك بقدرة قادر قال ليهم
أنا شغال في السفارة السودانية ودي كديسة السيد السفير...
قام البوليس إتصل بالسفارة وكلمو السفير الأكد ليهم إنو دي كديسته...
وطبعا البوليس إقتنع بأنه دي كديسة السيد السفير
بس المشكلة كانت إنو في بلاغ رسمي وجريمة إعتداء ضد حيوان (شيلها جوة شوال) ولازم يفحصوها ويتأكدو إنها سليمة
وده طبعا موضوع طويل وبيجرجر... وممكن يصل وسائل الأعلام الفرنسية وتبقى فضيحة
أها السفير طلب من البوليس إطلاق سراح الكديسة وعمنا الساعي فورا وطلب إبلاغ الخارجية
وأكد ليهم أنو دي كديسة عندها حصانة حسب ميثاق فيينا والشايلها كان في مهمة تبع السفارة
وهو نفسه عامل بالسفارة... وده بيعطيهو حصانة أثناء تأدية عمله حسب الميثاق
وهنا ممكن تتخيل الوضع الكان فيهو ضابط الشرطة الجاته قضية معقدة ذي دي
وأكيد عمل إتصالاته برئيسه ومنه لرئاسة الشرطة ومنها للداخلية ثم الخارجية
لغاية ما جات الموافقة بأطلاق سراح عمك وكديسة السفير والرسل ليهم عربة دبلوماسية لنقلهم
للسفارة (*)
وده ممكن يوريك أن الأنسان والحيوان عندهم حصانة دبلوماسية حسب القانون الدولي
ودي قصة قديمة ولكن في واحدة مشابهة ليها تم نشرها مؤخرا أعتقد إنها كانت
تتعلق بكديسة لحرم القائم بالأعمال الأمريكي السابق
وياريت لو حد منكم نكتا لينا
وتسلم...
| |
|
|
|
|
|
|
| |
Wasil Ali
أسامة عبد الجليل
Mohamed Yassin Khalifa
حيدر حسن ميرغني
Abureesh
Ahmed Alim
أزهري عبد الرحمن
قلقو
elfadl abdellatif
محمد عبد الماجد الصايم
GamarBoBa
ماضي ابو العزائم
ALGARADABI
Moawia Mohammed
فيس بوك
تويتر
انستقرام
يوتيوب
بنتيريست