|
|
 يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها
|
مجانًا سااااي ... مِلِح يعني ... معقول كِده أكون بينكُم وما إكْتشفتو إمْكانِياتي ... مواهبي ... إسْتفيدو مِن الحاجات -السمحه- الحَواليكُم ... لا سِيما أنها " مجانِية " وكِده ... بِت إبراهيم قالت : عليها " الجبنه " وسندوِتشات " التونا " وعلشان ما دايِر أي تأويلات بِشأن عِلاقتي مع " عادِل التيجاني " ما حأطلُب مِنو صالة مركز أصدِقاء البيئة ... حأعملا في صالة " غير " حاجة كِده ما حتِتْوقعوها ... يعني مُفاجأة ... مُش الدُنيا عيد؟
المذكورين أدناه ما يِجو حفلتي بتاتًا :
(1) عادِل التيجاني ...
(2) هشام درماس (مُش لأنو شايقي ... أبدًا والله ... بس ما يِجي ... وإن شاءالله يِكون ظاتوو سافر)
(3) الزول الغنا لينا في رحلة "مزرعة الدوسري-الشحانِية" زول غياظ بِشكل ياخ صوتو جميل لامِن غلط .. النوع ده أصلو لا بيني لا بينو ..
(4) صلاح عبدالله ...
(5) أحمد عبدالمُنعم (بقيت بِتظهر في الجرايِد كمان ... شكيتك على الله ... مالك ما حدثتني) ...
يا جماعة أنا جاد جِدًا ... عاوِز أخلي ليكُم العيد ده " مُخْتلِف " " مُبْتهِج " ... محمد السُني بِكون مشغول في العيد عفيتو مِن الجيه ... ما تجي ... أنا بِصراحة كِده ما عاوِز أي " زميل " يجي حفلتي دي ... أنا في مرحلة الإنْتِشار ما عاوِز لي كلام يجيبلو إعْتِذار ...
جيبو معاكُم أي زول أي زول ياخ ... جيبو الشُفع ... بِالمُناسبة عندي ليهُم أُغنِية خاصة جِدًا (عطِشو لي الجيم وحياة أبوكُم) ماف زوله تتحجج بِأي عُذر ... يا زوله أقولِك قوله أكان دايره تَورِقي خُضرتِك تعالي ورِقيها في حفلتي ... حتُوزع التذاكِر ظاتا بِشكل مُخْتلِف ... حأرسِل " رِسالة " في جوال كُل زول/زوله مدعو فوقا بكان الحفل وميعادو ...
|
|
 
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: الطيب شيقوق)
|
omer osman
| Quote: عمرنا ما سمعنا بي رطاني غناي ..... عدا وردي ... |
الخليل (صاي) ... مُبارك حسن بركات (محس العيلفون) ... أحمد المُصطفى (محس العيلفون) ... إبراهيم عَوض (كنزي) ... سَيِد خليفة (محس العيلفون) ... حمد الرَيح (محس توتي) ... زكي عبدالكريم (ما تشوفو مَشلخ H تقول مِن عِندُكُم) ... البلابِل (حلفا) ... أمير حلفا ... محمد زمراوي ... علو ديل خواجات ... وهسِع في عصرِنا هذا عزام حسن فرح (عبري) ... شوفو الإمْبريالي ... الشِيوعي ... البعثي ... ده
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: عزام حسن فرح)
|
ود شيقوق ...
| Quote: سيد خليفة ( رفاعي - عسيلاتي) من العسيلات يا مسنوح |
يا زول الزول مِن الدِبيبة الجنب العيلفون وناس الدِبيبة والعيلفون أهل ساي ... نحنا أخير نمشي البوليس يا زول
ـــــــــــ
| Quote: قلت تحب الجيم المعطشة ؟ |
والله في قناة " الشُروق " في مُذيع سوداني ، دايمًا بِيقرا الأخبار ... بِعطِش ليك " الجيم " دي تقول دايِرا " تيراب " والله ساعة يِقول ليك " جججججججوبا " والله أنا بِجاي تِلقائِيًا كِده ... والله ما بقصُد ... بقولا " ماااااالِك علينا " ... عطِشا عطِشا الله يِرضى عليك ... عاد الغُربة دي ما نمرُق حتو مِنا بِجيم مُعطشة ... عطِشا عطِشا
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: عزام حسن فرح)
|
كلامك صاح هو من الدبيبة ورفاعي
| Quote: والله في قناة " الشُروق " في مُذيع سوداني ، دايمًا بِيقرا الأخبار ... بِعطِش ليك " الجيم " دي تقول دايِرا " تيراب " والله ساعة يِقول ليك " جججججججوبا " والله أنا بِجاي تِلقائِيًا كِده ... والله ما بقصُد ... بقولا " ماااااالِك علينا " ... عطِشا عطِشا الله يِرضى عليك ... عاد الغُربة دي ما نمرُق حتو مِنا بِجيم مُعطشة ... عطِشا عطِشا |
يجازي محنك ضحكتني
تقول دايرا شنوووووووووووووو؟ تيراب
مسنووووووح
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: طارق ميرغني)
|
| Quote: (3) الزول الغنا لينا في رحلة "مزرعة الدوسري-الشحانِية" زول غياظ بِشكل ياخ صوتو جميل لامِن غلط .. النوع ده أصلو لا بيني لا بينو .. |
خَايف من المُنافسة ولا شُنو يا ابو العزائم....
كان كِده درماس لازم يجيكم, وانشاء الله ما يكون
سَافر, عشان المنافسة تبقي جَد جَد ....
بعدين يا عزام لو الحكاية عَصلجت معاك اَقلِب
ليهم غُناء بالرُطانه وخُـومهم كده عشان ما يجيبو خبرك بالشين .
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: طارق ميرغني)
|
| Quote: وهسِع في عصرِنا هذا عزام حسن فرح (عبري) |
يا قريبي حيرتني عدييل..قول شاعر ..معلم ..عالم..محاسب..مراجع ..محامي .. شيخ دين(عشان ما تتلخبط مع شيوخ تانين) ..مفتي .مولانا ... من "عبري" ؟؟.... انت بتلخبط لينا النظام بتاعنا انا غايتو فنان من عبري غير رفيق الصبا المرحوم عصفور ما بعرف .....؟؟ غايتو بختهم ناس الدوحة حفلة سوارييه والتصقيق ممنوع عشان ما تجلدو ...
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: احمد الدسكو)
|
هويدا بِتْ شرف الدين ...
يا زوله عليك الله إنتي كيفِنك ... كُل عام وإنتي بِخير ... تزوري النبي وتمْسِكي شُباكو إن شاءالله ... قولي آمين
| Quote: رسلوا لينا التزاكر يا جماعه إن شاء الل شيرنق دي ما بنفوتها تب وبالعدم كدا اعملوا لينا تسجيل إن شاء الله يقبضوك ناس النظام العام |
لو ناس الدَوحة ديل ختو الرحمن في قُلوبُم الحفلة بِتنجح ... ما فوقا تذاكِر ... حفلة مِلِح ساااي ... ما الدُنيا قبايِل عيد ... وبعدين أنا دايِر أديهُم حاجة جديدة جميلة (مُمْكِن تعطِشي لي الجيم لو سمحتي ... شُكرًا) ... بس طوااااالي في كورة ... طوالي في زول/زوله جاي يِغني في قطر ... الناس ديل بِقو يِسوو بُروفاتُم في قطر ولا شنو ... الحفلات القامت في قطر صدِقيني في دِيوم بحري أيام ما كُنا " نِحنا " ما حِضِرنا قدُرا ... هسِع " ايمان لندن " ما كانت في الدَوحة ومسخت علينا الفِجه ومشت ... الواحِد ما قِدِر أصلو يِركِز في صوتا ... جهرتنا شكيتا على الله ... الجابا شنو صادا؟ عِندي أُغنِية مِن كلِماتي وألحاني وتَوزيعي -ما شغال بِالموصِلي شغله- مُمكِن أرسِلا ليك ... أرسِلا ... طَيِب ... وبعدين نِحنا ظاتووو ناس " النِظام العام "
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: عزام حسن فرح)
|
د. يوسُف محمد طاهِر ...
Quote: يكفينا تنزل لينا صور الحفلة يا عزام
أو تسجيل لأننا ما بنقدر نجيك , وما عاوزين
نكلف عليك بإرسال التذاكر, مع إنك
قرررررررررررريب مننا. |
يعني حتكون أقرب مِن حبل الوريد ... الناس في الدَوحة حاقدة ما تعرِف ... بغرانا ما تعرِف ... بقدر أفهم حِقد وبغر زُملاء المِهنة ... مساكين خايفين على عداداتُم ... وسط قريب (بِالقاف وحياة أبوك) ... أها حأغني ومجانًا وفي فُندُق 3 نُجوم وبِعشاهو ... النشوف إيمان لندن حتعمِل شنو؟ شكيتا على الله السماحا مِدَفِقة مِنا ... شرقتنا ... فلقتنا ...
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: طارق ميرغني)
|
أبو ساندرا ...
| Quote: بس أديني فرصة آخد أذنها |
إذِن منو يا زول؟ يا زول حفلتي حفلة رُجال والغُنا الفوقا غُنا رُجال ... غُنا البنات شِنْ غرضْكُم بيهو ... إنتو ما بِتِختشو ليه؟
- ماشي وين يا بابا؟
- لإيمان لندن يا ساندرا
- وحفلة عزام يا بابا ما ماشي ليها؟
- 6ففق5478تت88976فاىه99ودين ×÷8987اع8أبوكي،،خ0لقث6788خ98تت7هة6547عزام ظاتووو
- بابا قال شنو يا ماما؟
- ما عارفة زي تقول سِمعت : < ... أبوكي و... عزام >
أمشي ياخ ... شيوعي ... شابِكنا < إتْحِدو إتْحِدو > إنت ما < تِتحِد > معاي
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: احمد الدسكو)
|
abubakr
كُل عام وأنت بِخير ... القابلا على أمانيك إن شاءالله
| Quote: يا قريبي حيرتني عدييل..قول شاعر ..معلم ..عالم..محاسب..مراجع ..محامي .. شيخ دين(عشان ما تتلخبط مع شيوخ تانين) ..مفتي .مولانا ... من "عبري" ؟؟.... انت بتلخبط لينا النظام بتاعنا انا غايتو فنان من عبري غير رفيق الصبا المرحوم عصفور ما بعرف .....؟؟ غايتو بختهم ناس الدوحة حفلة سوارييه والتصقيق ممنوع عشان ما تجلدو ... |
شُفت كِمِية المؤامرات التي تُحاك ضِدي يا قريبي ... قاعِد حولهُم ... يا عزام الإنتِخابات ... يا عزام ناس السِفارة ماشين الشحانِية ... يا عزام ما تنسى ندَوة القانونِيين ... يا عزام في كبسيبا في المدرسة السودانِية ... يا عزام تعال إجتِماع الجالية ... عزام تطير عيشتو ... والفنانين البِرِكو في الدَوحة أكتر مِن المُغْترِبين فوقا ... التقول إتِحاد فن الغِناء رحلوهو بِجاي ... ما لاقي لي فُرصة مع العالم دي كلو كلو ... والسنة جت في دَوري ... هِلال الخرطوم ضِد هلال بورتسودان ... مِريخ الخرطوم ضِد مريخ الحصاحيصا -شعب ما عِندو إبداع ، حتى في أُسمو النوادي ما قِدرو يِنْجِرو أُسوم جديد ... يعني وِكتين إكْتشفو إنو كُبري < الحُرِية > بِنزِل على < السجانة > ما كانو يِغَيِرو إسِم واحِد فيهُم ... شعب ما مُبدِع ... يِقول ليك لِلكِبريتا < الزهرة > ولِلريحة هيل الخُمْره < الصاروخ > ... يِسْكُنو في الكلاكلة ويِدْفِنو موتاهُم على الكورنيش في < حله حمد > و< حله خوجلي > ... أنا آلَيت على نفسي أن أخرج هؤلاء القَوم مِن وهْدتِهِم هذِهِ ... حأقدِم " فن " يِتْذوقوهو قُبال ما " يِسْمعوهو " أصلو ماف زول يِقول لي أي حاجة بِخصوص صوتي الفي حلقي ده لأن ما مُمكِن أصدِق إنو بِت إبراهيم تكون " مُنافقة " لأنها بِتسمعني ليها (18) سنة
- الرسول أكان تغني لي " خضاري البِحالي ماهو داري جافاني "
عاوزين تقولو إنو (18) سنة بِت إبراهيم بِتْنافِق فوقي < ما بصدِقكم > ده حسد نِحنا النوبِيين مُتَعَوِدين عليهو مِنكُم ... قريبي < الخليل > لامِن كتب وغنى < مِن فِتيح لِلخور لِلمزالِق ... قدله يا مولاي حافي حالِق > شُعراء أُم دُرمان حقدو عليهو وقالو : < بِالله شوفو الرطاني الأمِس جا ده ... يِسوي أُم دُرمان مِتْل < الكعبة > ونحنا قاعدين فوق < لي في المسالما غزال نافِر بغني عليهو > حقدو عليهو يا قريبي ...
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: عزام حسن فرح)
|
طارِق ميرغني ...
Quote: حزف لانني وجدت انه من غير صالح بت ابراهيم ولا انا اي تعليق او اعتراض علي غناء
عزام لانو بعد العيد ناوي اديهو بعض الالحان |
بِت إبراهيم أريتو عِندي عُمرين عُمر أديهو ليها والعُمر التاني < فُلانه > تلبسو مداس ... أنا بتْصرف ما مُشكِلة .. بلقى لي حل ... أها النبشِرك كمان يا خوي ... بمدح ... بمدح سيدي الرسول ... مو حسب التوجه العام في سودان عُمر البِسير ... لا لا ... تيلاد قديم وحاتك إتْ ... شوف بِالله عدم الإعتِبار ده ... ودالحاوي في قطر وعزام في قطر = خطر عديل كَدي ... وبِرغم ذلِك ما لاقيتو ... ده بقدر أسموهو شنو غير مؤامرة دُبِرت بِلَيل ... حتى المُستشار حسن طه ما نفعني في إنْتِشاري الغِنائي ... وحالتنا يوماتي على الله بِنغني < زي ما بِتريدني بريدك >
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: عزام حسن فرح)
|
عِماد الدين عبدالله
كُل عام وإنت بِخير ... القابلا على أمانيك إن شاءالله
| Quote: ولا نشكل ليك ونكتر من اشكال ناس جماعة لندن |
والله حقو الواحِد يِكْتِب جواب مُسجل لِعم " لندن " يِقوليهو فيهو ياخ بِتْك مسخت علينا الفِجه يا تلِمها عليك يا تلِمنا نحنا ونخلص ياخ
ــــــــــــــ
| Quote: اها بدرالدين الامير نجيبوا معانا |
أكان حدثتو إنت زاتك ما تجي ... بدرالدين شنو كمان الحيِستَوعب كلِماتي وألحاني وتَوزيعي ... إنت ما شُفتو قال فوق " نانسي عجاج " شنو قال بشتنت الأُغنِية بشتنه ... المَبشتن إنت يا خوي ... " نانسي عجاج " دي أكان جات وقفت فوق المسرح ساي بِنصفِق ليها ، ياخ دي بِتثبِت إنو في " الزير " الحايِمين بيهو ده " قلب " أكان حدثتو يا زول إنت زاتك ما تجي حفلتي ...
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: عزام حسن فرح)
|
ناجية مصطفى ...
كل عام وأنتم بخير وعافية ... القابلا على أمانيك ... توصلي شُباك النبي ... قولي آمين
Quote: عزام كل سنة وانت طيب
سيبك من ناس الدوحة ديل اصلهم مابعرفوا الغنا |
صدقتي والله ... الناس ديل ما بعرفو الغُنا ... في رحلة الشحانِية ... عبدالمنعِم يادوب بِصلِح في طبلتو والفنان المايِك ما مسكو ... أشوف ليك أبو ساندرا بِهناك بِهوزِز فوق راسو ، يعني الود إنْدمج ... وفي واحِد أكان بِوراي أسمعو يِكورِك < يا سلالالالالام > قلت ليهو يا سلام في شنو يا زول والغُنا لِسع ما بدا ... قال لي أصلو أنا مُستعجِل شوية ما حأقدر أحضر الغُنا ، فقلت أعبِر عن مَكْنوناتي مُقدمًا ، علشان البِرِسْتيج وكِده ... أُمه مِتِل دي أغني ليها كيف يا ناجية؟
ــــــــــــــــــــــ
Quote: اها انا كيتن على الناس العاملين فيها فنانين
انا حاجزاك لى عرس طارق وفى الحنة كمان عشان
الناس تسمعك بى مزاج اها قصرت معاك. |
شوفو الأصل لامِن يِسوي عوايدو ... العِرِس مُمكن أجيب فوقو بِت إبراهيم ... عِلا الحِنه دي أصلو ما تباريني كلو كلو ... دايِر أتحنن ... معقول الزول ما يِجَلْبِطلو حِنه عِلا في عِرسو ... والله أنا بريدكُم ساي لله ... معقول الواحِد يريد الأبو والأُم وأولادُم وجيرانُم (آل النور عُثمان أبكر) والله لقيتكُم إنتو وجيرانكُم أهل جد جد
أسمعي يا ناجية ... بدرالدين الأمير حتعْزِموهو في عِرِس طارِق ... عِندي إقْتِراح شاوري فوقو سعادتو ... أعمِلو العِرِس مُتزامِن مع أي فعالِية حيِشترِك فوقا مكتب الترجمة هيل بدرالدين ... كده أحسن ... يعني حيِنقُصكُم شنو ... علو سيكارو والنضارة! كدي فكِري في المَوضوع ده
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: abubakr)
|
| Quote: ليكم البحر القدام الدوحة دي بيسويها |
ابوبكر
قريبك ماتمسكو في الكلام الجنس دا هسي يجى يقوليك خليت الغنا
وداير عمل لي قبة على ضاف الخليج المهم ياسيدى نحن كونا لجنة
لدراسة الحالة على ارض الواقع براسة اسماعيل محمد الحسن وعضوية
عماد الشبلى وبدرالدين الامير وحا نجيكم بالخبر اليقين لكن والى
حينه انا كان شفت قريبك عزام وافق قرب مكرفون ببلغ الشرطة
| |
|
|
|
|
|
|
|
|
|
Re: يا ناس الدَوحة ما تْكونو كِده ياخ ... عاوِز أعمِل حفلة أغني ليكُم فيها (Re: عبدالكريم الامين احمد)
|
abubakr
دي قُبه جدي سيدي / شيخ إدريس علي المرضي (أنجب) سيدي / محمد عُثمان (أنجب) حرم سيدي (أنجبت) سيدي / حسن فرح محمد (أنجب) سيدي / عزام
(أنجب) سيدي / رشاد (السَكود المحس - قرية كويكة)
وأغلب القُبب مِن سوبا إلى خزان سِنار مِن ذُرِية سيدي / شيخ إدريس ود الأرباب المحسي الما كضاب
أنا في الحقيقة بحاوِل أكون زول عادي ... يعني ... علشان أقرِب مِن الآخرين المُسْتهدفين بِالنسبة لي أنا ... لأن مِن ضِمن واجِباتي ، على ضوء تاريخ أُسرتي الديني أن أُحبِب الآخرين في الطريق المفروض يِمْشوهو ، ودي بِتكون بِالسُبُل المشروعة ... في الحقيقة ماف زول تعبي زي بدرالدين ده ... شيطانو قوي ... مِن شِده ما هو قوي ، بِقيت أضهب ، ده بدرالدين ولا ده الشيطان في رقبتو ... على كُل حال شغال في الإتنين ... وكُل البرجوهو أنو واحِد فيهُم يِنقل مِن وهدتو ... < بس أنا خايِف > إنو الشيطان يِتهدي ويِغْتِس بدرالدين ...
| |
|
|
|
|
|
|
| |
عزام حسن فرح
omer osman
الطيب شيقوق
هويدا شرف الدين
د.يوسف محمد طاهر
أبو ساندرا
احمد محمد بشير
abubakr
احمد الدسكو
عماد الدين عبدالله
sumah
بدر الدين الأمير
Abureesh
عبدالكريم الامين احمد
فيس بوك
تويتر
انستقرام
يوتيوب
بنتيريست