|
|
 إدريس الامير عامان بعد الرحيل ،، صبّ دمعي وانا قلبي ساكن ..!!
|
تجارب نادرة في الجمع بين المواهب الثلاثة الكتابة والتلحين والغناء في تاريخ الفن السوداني ،، كان احد اهم اشراقاتها الفنان الراحل ادريس بن الخليفة علي نور والذي اشتهر ب ( ادريس الامير ) في مدينة بورتسودان ومن ثم ذاع صيته الى اصقاع السودان المختلفة عبر الاذاعة السودانية في منتصف او اواخر الستينيات ولاحقا التلفزيون السوداني باغنياته الشهيرة :
من شرقنا الحبيب اهديكم كل طيب
غناوينا وامانينا وانا شوقي ليكم طال
والتي مزج فيها بين البجاوية والعربية وافتتح بها مشوارا فنيا طويلا امتد بعمر اجيال ..
ثم نقلته اغنيته ذائعة الصيت ( سواكن )
صب دمعي وانا قلبي ساكن
حار فراقك نار يا سواكن
نقلته هذه الاغنية الى آفاق الشهرة وفضاء الفن والجمال ،، اذ اعاد بها الى سواكن بعض مجدها المنسي والى نفسه بصمة فنية اخذت من سواكن بعض رحيقها القديم وقدمته الى الناس كصوت خرج من عمق حضارة ضاربة في التاريخ ليتماهى مع اصوات اخرى عبرت عن حضارات مختلفة في هذا السودان ويضيف اليها ضلعا مفقودا سقط بعد رحيل امير الشرق عثمان دقنة ،، ليكون هو اميرا جديدا تحتفي به الفنون ويحتفي بها ..
ومن بعد سواكن توالت اغنياته واعماله التي اشتهر بها وسبقته الى عاصمة الاضواء الخرطوم تماما كما فعل صديقه الراحل صالح الضي والذي سمع عنه الناس ( يا جميل يا حلو ،، الدم الشربات مكملو ) و ( اوعك تخلف الميعاد وانت عارف شوقي كم ) وبدءوا في ترديدها وهو لم يفارق بعد ورشة النجارة التي كان يعمل فيها بمدينة بورتسودان ..
عرف الناس ايضا عن ادريس الامير ( زاهي في زيك في وسامتك ،، ما نحن عايشين على ابتسامتك ) و ( انا صابر على الصبر وانت عارف ،، نار الصبر زي الجمر وانا خايف ) وغيرها الكثير والكثير من الاغنيات الرائعة التي شكلت مع رصيفاتها الاخريات لحسين بازرعة وفاروق محمد صديق وصالح الضي وعبد الرحيم الشامي وكابلي ومن بعدهم حيدر بورتسودان وعادل مسلم ومحمد البدري ملمحا مختلفا لجغرافيا الاغنية السودانية ..
قال لي ذات مرة انه استمع للراحل ابراهيم عوض لاول مرة من الاذاعة السودانية وكان وقتها في احدى قرى جنوب طوكر واظنها ان لم تخني الذاكرة قرية ( عدوبنا ) وكان وقتها صبيا يافعا في اولى عتبات التعليم وكانت تلك القرية حديثة عهد بالراديو الترانسستور وتحلق اهل القرية جميعهم حول ذلك الراديو ،، تلك المعجزة التكنولوجية المحيرة بمعطيات ذلك الزمان ،، وكان هو من بينهم ،، لكنه كان مشدوها ومجذوبا الى شيئ آخر لا يقل اعجازا عن اختراع الراديو ،، صوت الراحل ابراهيم عوض وهو يغني :
حبيبي جنني غير حالي
حير فكري دا الشغل بالي
ومن يومها انشغل بال الامير بالغناء وسحره وعوالمه الى ان رحل عن هذه الدنيا وفيه شيئ من سحر ابراهيم عوض ،، ودستور حي العرب امدرمان من لدن ود الريح واولاد الحاوي وميرغني المامون واحمد حسن جمعة والتاج مصطفى و حسن عطية مرورا بكل نوابغ امدرمان القديمة في ذلك الزمان ،، وكذلك نداوة البحر وحنين بورتسودان ،، والاهم سحر سواكن واساطيرها وجنها وانسها من لدن سليمان عليه السلام ..
وقد كان ذلك الخيار صعبا عليه وعلى اسرته التي كان على راسها والده الخليفة علي نور احد اهم اعيان مدينة بورتسودان في ذلك الزمان ،، واحد اهم اعمدة الطريقة الختمية والحركة الاتحادية ،، وبين ظهرانيهم خلوة القرآن في حي ديم المدينة العريق ،، شمال سوقها القديم ،، تلك الخلوة التي بدأ منها تعلم الحروف وفنون النغم وتوازن الايقاع مفردا أو بصحبة اقرانه على هيئة فرقة أو جوقة ..
وساعود اليكم ،،،
|
|
 
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: Mahassin Ibrahim)
|
الاخت العزيزة محاسن
كل عام وانت بالف خير
شكرا على المرور ،، اغنيات ادريس الامير ستظل خالدة تذكرها كل الاجيال ..
ما يحمد له انه كان وفيا لمدينته بورتسودان على الرغم من اغراءات الاضواء ووسائل الاعلام الاخرى في الخرطوم لكنه آثر ان يبقى حيث تشرق الشمس اذ كان يعتقد ان الفن الاصيل يفرض نفسه على الناس وعلى وسائل الاعلام ،، والتي كانت تتحين الفرص وتجتهد للقائه في ارض الثغر الحبيب ..
يرحمه الله رحمة واسعة
| |
|
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: Salwa Seyam)
|
الاخوان حمزة وسلوى
كل سنة وانتو طيبين
انا سعيد بهذا المرور وتتبع هذا الخيط ،، عطاء الرجل وانسانيته تحفز للتوثيق وله والتعريف به ،،
ادريس الامير لم يكن مجرد فنان ،، كان شاعرا وكاتبا ومطربا وموثقا لحركة الفن السوداني على امتداد مراحله ،،
صدر له قبل اسابيع قليلة الكتاب الذي كان يحلم ان تتم طباعته قبل رحيله لكن شاءت الاقدار ان يصدر بعد ذلك الرحيل بعامين وهو كتاب (( اغنيات في ضمير الامة )) وسنعرض الى اهم ما جاء فيه حين تصلني النسخة ان شاء الله ،،
شكرا سلوى على هذه الاضافات الجميلة عبر الفيديو
ولنا عودة ..
| |
|
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: Huda AbdelMoniem)
|
الاستاذ / حامد ود الناظر
عيدك سعيد
تابعت بوستك عن الهرم الرابع
الاستاذ / بازرعة وها انا اتابعك
هنا وانت توثق لاحد الراحلين الخوالد
ادريس الامير والذي شكل وجداننا نحن
ابناء المنطقة في وقت كان من الصعب
بمكان الاستماع الي اي صوت الا من خلال
الاذاعة....
متابعة معك وانت بكل هذا الوفاء لهذه
المدينة الام( بورسودان) ومبدعيها .
ستجدني ضيفا دائما في هذه الاتكاءات التي
تتحفنا بها ممثلا للمنطقة الجنوبية( ديم كوريا )
ومعا لنفض الغبار عن كل هذا الجمال الذي لم يكشف
احد عنه برغم جماله وكثرته .
لك الود والاحترام والتقدير
هارون دياب
ممثل .....
كوريا مونج / حي اولي
| |
|
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: haroon diyab)
|
حباب العمدة هارون دياب
كل سنة وانت طيب وناس كوريا مونج وكوريا ثقافة وحي اولي ولغاية راس الشيطان ،،
كلهم بالف خير ،،
اتخيل تركب بص كوريا من آخر محطة جنب المدرسة ،، ويمشي بيك علي مهلتو ( يافطة ، يافطة )
الجعلي - جامع الشايقية - حي البوستة - مدرسة سعدابي وما ادراك ما سعدابي ..
تصل ديم سواكن ،، ينزل السواق يشرب ليه كباية شاي لغاية البص ما يملا ،، تجيك زهجة
تغير رايك من مشوار السوق ،، تنزل القهوة تلاقي الشباب الحلوين وهاك يا ونسة ويا كورة
القاش والدلتا لاعبين في كاس المحافظ في الرابطة ،، حكاوي الكجور والاناطين وغالبين تلاتة صفر
وغالبين اتنين صفر وبي حليفتها ،،
وتنتهي الكورة
وتخيب كل الرهانات والحلايف بالطلاق ،، المباراة تعادل صفر - صفر ،، ملعون ابو الكجور ..
الموعد كالمعتاد مخبازة هارون بالطحنية ،، كيس تمباك من السليك والرجعة كداري
والساكن جنب الجسر توصلوه وترجعو عشان الضلام والرباطة ،، تمرو بي عمك ( برداي )
نايم قدام الدكان بتاع عمك محمد علي داؤود يرفع راسو : انتو منو ؟؟ وماشين وين ؟؟ ( نحن ناس هارون يا عم برداي )
يرجع يرقد تاني ،، وانت تكون آخر واحد يصل بيتهم والكلاب تنبح فيك وواحد من التيمان حسن ولا حسين يلاقيك سكران
يتعرف عليك بصعوبة ،، واخيرا تصل البيت والدنيا حر والكهرباء قاطعة والرطوبة عالية وتلقى ناس البيت كلهم
سرايرهم في الشارع تجر ليك عنقريب ونفسك في موية باااااردة الا التلج مافي
غايتو تاخد ليك جغمتين من الزير وتتقلب في السرير لغاية الصباح تصحى على صوت السقا يكب في الموية ،،
تطمن انو حمام الصباح مضمون ..
العمدة دياب سعيدين بالمتابعة ،،
| |
|
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: حامد الناظر)
|
ود الناظر
حر انت ان تصدق ام لا.....
سالت دمعتين
هيجوا الذكري
وهذه الاماكن والاسماء
جزء عزيز جدا من القلب
وحتي الان لم يمر علي يوم
بدون ان اذكرها بكل التفاصيل
اعتقد بانك قريييييييييييييب
جدا منهم ومنها.....
اخي خالد دياب ذكرني بكم وباخوك حسن
ولكن صدقني الذاكرة خربة بعد غربة طويلة
اكيد......واكيد سنتواصل
اسرتي ستصل غدا بعد ان قضت 3 شهور في ربوع
الام الحنون بورسودان مابين كوريا وحي اولي وسلالاب
اصرارا مني بان يكون تواصلهم مع من احببت مستمرا
فسوف يجدون فيها وفيهم الصدر الحاني كلما
احسوا بجفاف الحواس .؟
شكرا.....جميلا
فقد اعدت لي ماضي الهوي
لنتواصل ونلتقي ....لنرتقي
حبي وتقديري واحترامي
كل الود
| |
|
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: haroon diyab)
|
الغالي هارون دياب
سلامات والله
زي ما قال الحلنقي
هجرة عصافير الخريف
في موسم الشوق الحلو
هيج رحيلها مع الغروب
احساس غلبني اتحملو
وكتمت اشواق الحنين
داير الدموع يتقلو
ورجعت خليت الدموع
يرتاحو مني وينزلو
انا قصدت الدموع تنزل ،، علها تغسل وجع الغربة
ربنا يجيب الاولاد بالسلامة ويرجعو ليك شايلين حنين يكفيك فترة طويلة ،،
غايتو خليهم يعبو قدر ما يقدرو ..
سلامي للاخ خالد ،، وبالمناسبة حسن عمي طبعا ،، وكنت ازور معه كل تلك الاماكن الرائعة
التي كنت بالفعل قريبا منها ..
وهي اليوم تغيرت ملامحها بالكامل تقريبا فاذا عدت لن تجد بالطبع مكتبة كردفان واحمد عباس
حيث كانت تقف بصات كوريا ولن تجدها هي الاخرى ايضا ،، واصوات الاغنيات تنطلق من مرطبات الملتقى والهلال
والتي تبددت في فضاء بورتسودان بعد ان اتى عليها الوالي الجديد ايلا ..
| |
|
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: AnwarKing)
|
انور كنج
سلامات وكل سنة وانت طيب
انا من بورتسودان بالفعل لكن ما من كوريا وان كنت اتمنى ذلك ،، بس كانت مشاغلة للعزيز دياب ،،
ديم النور حي الزهور لا موية لانور مع انو الحال الآن اختلف شوية ، الاميرية المتوسطة ، البحر الاحمر الثانوية ، اتحاد الادباء والفنانين
اذاعة بورتسودان ، دي ابرز العناوين
شكرا على المرور الجميل
في حضرة الذكرى الغالية لادريس الامير
| |
|
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: haroon diyab)
|
شكرا الاستاذ حامد الناظر لهذا الوفاء ولذكرى حرى مع هذا الصوت الغريد والبُلبل الشرقاوي
الامير ادريس الامير الشاعر القامة وكم من الناس تستمع لهذه الاغنية وتطرب للصوت دون معرفة
كافية بالشاعر والملحن والفنان وقبل كل ذلك الاستاذ ادريس الامير فهل هو القصور الاعلامي وما
سبب ذلك ادريس الامير غنى كما لم يغني غيره فلماذا ظل مغمورا بين كل هذه الضجة من فناني
السودان الاخرين ؟؟؟
........................................................................حجر.
| |
|
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: حامد الناظر)
|
العزيز حامد الناظر
ذكريات رائعة وجميلة صحبتنا خلالها مع كوكب بورتسودان الراحل إدريس الأمير
تذكرت تلك الأيام الجميلة التى جمعتني به فى كثير من المواقع
تذكرت ضحكته الحانية وكلماته الطيبة النابعة من قلب أطيب
تذكرت صوته العذب وهو يدندن بكل أغنياته الحلوه وبعض الأغنيات المطروقة
تذكرت اليوم الأول الذى التقيته فيه ونحن نجلس ثلاثتنا فى مكتبة البلدية الشهيرة
جلسة جمعتنا مع هذا الكوكب الراحل فى حضرة العزيز الأستاذ محمد أحمد عبدالقادر ابن برام البار
كانت هى المرة الأولى التى التقيه فيها ولم أنقطع بعدها عن مجالسته
كنا نذهب لننهل مع معين المعرفة الكثير الكثير
وقد يقول البعض أن معين المعرفة يتوفر فقط بين جنبات طيبة الذكر مكتبة البلدية
لا بل تعداها لمكان آخر هو عقل وقلب ودواخل هذا الرائع الشفيف
ألا رحم الله الفقيد رحمة واسعة وادخله الجنة مع الأبرار
وبارك فى أسرته ووفقهم الى طريق الخير والفلاح
ولنا عودة بمشيئة الله إن كان فى العمر بقية
| |
|
|
|
|
|
|
|
|
|
Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: محمد خليل ساني)
|
الاخوان الاعزاء حجر ، عبد العزيز
شكرا على المرور الجميل وهذا الوفاء لمدينة بورتسودان واميرها الفنان ،،
شحوتاي ليك وحشة والله ،، وشكرا على هذه اللفتة فالرجل عاش ومات مظلوما دون ان يعطيه الاعلام ما يستحق من اهتمام..
العزيز العريس ساني
سلامات ( قبل ما انسى ،، موضوعك في البال بس كنت منتظر الزميلة سلمى حتى تعود من السودان وسيكون الموضوع بطرفك قريبا )
اشكرك على تتبع هذا الخيط وهذه الاضافات التي حملت ايضا اسما مهما في دنيا الصحافة والاعلام الاستاذ محمد احمد عبد القادر
ذلك الرجل الجميل الذي تسعده النجاحات ويهتم بالتوثيق ،، وهو احد الكتاب الصحفيين الذين ظلوا اوفياء لمدينة بورتسودان
ولبلبلها الاستاذ الامير ..
صدقت اخي ساني فالرجل كان مكتبة تمشي وكنزا هائلا من المعلومات الخاصة التي لا تتوافر الا عنده ،، فقد كان شاهدا على
الكثير من الاحداث الفنية ومتعه الله بذاكرة ( زي الموس ) لم تكن تنسى شاردة أو واردة ..
اجمل ما في هذا البوست انه حرك الصديق دياب واثار فيه شجونا لم يقدر على كتمانها ،،
انا غايتو خلخلت اخونا دياب بالبوست ده وقلبت عليه المواجع والذكريات ،،
الشوق فاض بي وحيرني
يا عروس البحر الوردية
يا طفلة وديعة وفتانة
في المشية بترمي العيدية
التحية للرائع عادل مسلم وللشاعر الصديق محمد عبد الله بابكر
على هذه الاغنية الاروع ،،
| |
|
|
|
|
|
|
|
|
 Re: إدريس الامير عامان بعد الرحيل ،، صبّ دمعي وانا قلبي ساكن ..!! (Re: haroon diyab)
|
معقووووله لكن
بوست زى الورد كده غاب من عينى كيف ..
ياالله يظل ادريس الامير واغنياته خالده فينا متى ما نبض القلب ...
وفى سكونك شامخات قصور يا سواكن تحكى مجدك عبر العصور يا سواكن ..
حامد الناظر استشعرت حرفك لتبث فيناكل هذا العبق فلك الشكر مثنى ورباع ...
غرزه
لكن حيرتنى ياخ قربت اصدق انك ساكن كوريا مع علمى التام بديم النور.. لك ولجميع الاهل بديم النور وكوريا وبورتسودان وسواكن كامل الود كامل الحب كامل الوفاء ( وحى الاقاريق عشان ما تزعل تراجى مصطفى )
| |
|
|
|
|
|
|
| |
حامد الناظر
حمزه بابكر الكوبي
haroon diyab
AnwarKing
الرفاعي عبدالعاطي حجر
Abdlaziz Eisa
ادم شحوتاي
محمد خليل ساني
حسين عوضاى
فيس بوك
تويتر
انستقرام
يوتيوب
بنتيريست