البلاوي النازلة علي حزب المؤتمر الوطني و هو يستعد الي فعل شئ يجعل عملية تزوير الانتخابات (مبلوعة),, جعلت هذه الكلمة (غروت) تتردد في نافوخي من كم يوم.. ما بين وجاهة الكتابة تحتها كعنوان و عدم الوجاهة زادت مصائب المؤتمر الوطني لتصل ذروتها بفضيحة تركيا المدوية.. اعني بفضيحة تركيا اطرار السيد الرئيس (لارجاء) زيارته لتركيا (التي عادت لهم!) الي وقت آخر لان علاقة الشريكين (الصلدة جدا الي حين سفر السيد الرئيس) قد اصابتها عين حسود لابد للرئيس ان يعود و يقدها بعود (الكابلي)... يا يا يا حلو.. الناس ديل عشرين سنة بكضبوا و يعملوا السبعة و ذمتها معقولة ما يجيدوا صنعتهم للدرجة دي؟؟... عندي احساس انه خلاص دخلوا في مرحلة الفضيحة الكبري و الما يشتري يتفرج.. لانه مافي (كضاب عاقل) ببرر التبرير العجيب دا.. حكاية ارجاء دي براها قصة فما الذي ارجأه فخامته؟.. الدعوة ليست في اطار العلاقات الثنائية علشان يقول انه قد تم ارجاؤها علي ان تتم في وقت لاحق.. فتركيا كما يعلم الجميع مجرد مستضيف لمناسبة بشكلها و جوهرها تمر كل ربع قرن.. فالدعوة دي بالتحديد لا يمكن تأجيلها لانه المؤتمر التمت ليهو الدعوة ما دائم الانعقاد، زي تعتذر لصاحبك و انت في طريقك لعرسه بانك ما ح تقدر تحضر لكن بتمشي لادارة الصالة الاتعملت فيها الحفله تبارك ليهم.. القذافي الاسمه القذافي و اجرك علي الله سردب عقود من الزمن ما سوي زي سواة ناسنا ديل.. يبقي حكاية ارجاء دي ما كان في ليها داعي و لو هم ما بخجلوا نحنا عندنا ارتفاع في درجة الحياء و حساسية مشاعر و فوق دا كله مختوتين في وش المدفع.. لي كم يوم داخل في ضفوري و شايف الخلق البقابلهم من كل الجنسيات بيسخروا مني و انا لا ايدي لا كراعي في الموضوع يعلم الله.. اها ان شاء الله مشاكل الشريك (المفاجئة) تكون اتحلت؟..
هامش اهلنا يقول البقرة عرزت اذا جف ضرعها و اوضح مظهر علي عرزان بقرة الانقاذ انفضاض اهلها في الجزيرة عنها و يقول اهل الخليج السيارة غرزت اذا وحلت في الرمال و لم تقوي علي الحركة و وحل الانقاذ ما جديد لكن البوسوا فيهو اليومين ديل لا حكي لا بقي، تزوير علي الهواء مباشرة و الشكوي من تزوير الحركة للسجل الانتخابي، يا ايها المنقذون زويروا فلا سبيل لكم غيره، و الا كيف تحصلوا علي تأييد شعب تستعدونه كل صباح و مساء؟ مع التزوير الكامل الدسم امامك تحدي يشبه المعجزة بان تبرروا لماذا اعطاكم مزارعي الجزيرة اصواتهم بعد اكتساحكم لجميع دوائر الاقليم، و ما هو السر الالهي الذي فوز مرشحوكم في مناطق سالت فيها دماء اهلها بدل ان مياه من سد شيد او اخري تنتظر و قد بدلت تبديلا، الدم كما قلنا بدل مياه الري و كهربة الاعصاب بدل كهربة _الديدن المعهود).. فرجاءا لا تشغلكم عمليات التزوير عن تحضير التبرير ما تنتظروا لمان تفوزوا فوز محرج ليكم اكتر مننا نحنا المفوضين امرنا لله و تزيدوا وجعنا بتبريرات وقتية اثبتت التجربة انها تأتي مضحكة مبكية و قد تكتلوا ليكم وطن..
11-10-2009, 01:46 PM
نصار نصار
تاريخ التسجيل: 09-17-2002
مجموع المشاركات: 11660
قالوا البكضب ما بدخل دقنو فى الواطة ... التبرير فى عملية ( تزوغون ) جاء مرتبا وبعناية تفوق المركزة .. البشير يعلم علم اليقين انه لن يتخطى بطائرته اى اجواء تتبع للتراب الغربى ولو بصورة باعتبار ما سيكون مثل حالة تركيا .. لذلك وكى لا تكون الفضائح متوالدة ومتراكمة ويروح الطلاق والقسم الكتير داك وبعضا من الجزم الحامت فوق شاشاتنا الفضائية حمل اليه بعض جهابزة المكر السئ الذى سيحقيق بهم باذنه تعالى ( حملوا ) اليه تركيب وش الككو قبل يومين من انتقال المؤتمر الاقتصادى الاسلامى الى استانبول .. وبحرفنة عالية شديد شافوا الحيطة القصيرة فى مثل هذه الارتباكات فما كان الا وان وجهوا سهامهم الى الحركة الشعبية وبعض قوى الشمال كى تكون الطبخة مؤسسة ( لكن القنابير اتقطعت زمااان ) ونسوا ان الشعب بلاها فى الوقت الراهن
الخواف عمر البشير لا جديدة عليه هذه الزوغات .. نعم .. جعل الشعب السودانى اضحوكة امام شعوب العالم العزيزة المكرمة فاخرجوا فينا نكات الارض بالجبن والرجالة ( الموبوءة ) .. بلا كرامة او استحياء هناك من يداهنون وان رمزهم و ( راجلهم ) هو الاشجع والاسمى والاعز ... وانه يملك مفاتيح طعن الفيل فى عينو . دى قالوا ضيق الشريكين ... طيب اليست هناك اخريات ( زاغ ) منها نفس البشير وكانت بلا ضيق نفس ؟!! جوهانسبيرغ وكمبالا وكراكاس وابوجا ونيويورك فى قمة الامم المتحدة ... هل فى كل مراحل الزوغان ان الشريك الاخر ضاق نفسو ؟!!
المصيبة الكبرى ان الزوغة دى هى اسلامية ... وانه امير المؤمنين كما نصبوه سابقا .. فكيف بأمير المؤمنين ( الا ) يحضر قمة فيها امراء مؤمني العالم الاسلامى ؟!!
عنوانك كتلنى بالضحك يا نصار
11-10-2009, 11:52 PM
نصار نصار
تاريخ التسجيل: 09-17-2002
مجموع المشاركات: 11660
العزيز الفاتح الصادق حامد سعيد بمداخلتك و الله يا الفاتح اخوي الناس ديل خلاص الدنيا ادتهم ضهرا تب و انا خايف اني اكون اصبت بالتنقاض النفسي بتاع علاقة الضحية و الجلاد، زي مرات كدا بحن عليهم، حكمة الله هم الوحيدين الما عارفين الحالة الوصلوليها و لا عاملين رايحين ما عارف
تصور اني ما منزعج من حتمية تزويرهم للانتخابات ابدا ابدا و لو كان في امل في بقية عقل فيهم كنا نصحناهم الا يفعلوا لانهم من سابعة المستحيلات بوضعهم الراهن دا يقدروا يقنعوا طفل في السودان ولا في كوكب اخر انهم حتي بتزوير محدود بفوزوا في الانتخابات القادمة... بيظنوا انهم بتموها غلاط و يدعوا اكتساب شرعية.. لكن مشكلتهم انهم اطروا لتزوير الاحصاء السكاني و قاعدين يزوروا في عملية التسجيل و يختموها بمهرجان التزوير الدولي في عملية الاقتراع و فرز الاصوات.. ناسين انه الانتخابات ما حقت الاحزاب.. و بكدا بيشتروا عداوة الشعب كله و هم اصلا ما مقصرين يبيعوا في مشروع الجزيرة و يعمقوا في مآسي ضحاياهم في طول الوطن و عرضه.. حكايتهم بايظة ح يفوزوا فوز يتمنوا لو كانوا خسروا الانتخابات و كسبوا مخرج
11-14-2009, 06:19 PM
نصار نصار
تاريخ التسجيل: 09-17-2002
مجموع المشاركات: 11660
الحركة الشعبية اليومين ديل شغالة مع المؤتمر الوطني شغل غتيت جدا ناي المؤتمر خطتهم انهم يحيدوها و يغمتوها في لقاءات ليها اول و ما ليها اخر متبعين النهج الاسرائيل بتاع الحوار من اجل الحوار لحد ما العملية الانتخابية تبدأ يقولوا للحركة اشارتكم خضراء لكن الحركة مصحصحة ليهم تقعد معاهم تشاهد ضحكاتهم و كلامهم التخديري و تمرق تقول المفروض يتقال زي تصريحات باقان الليلة عن تملكهم لدلائل تلاع المؤتمر الوطني في ولايات الجنوب و الشمال...
11-14-2009, 06:33 PM
Nazik Eltayeb Nazik Eltayeb
تاريخ التسجيل: 11-27-2007
مجموع المشاركات: 2357
اخي نصار الجماعة شغالين بيديهم وكرعيهم في تنفيذ عملية التزوير اليوم سقت ناس البيت والاقارب ومشيت سجلت ولمن طلعنا من المركز نادونا الجماعة الخاتين الكراس والترابيز تعالوا سجلوا ارقامكم قلت لهم ليه؟ قال احدهم يعنى احتياط وكده اذا حصلت مشكلة اجبتهم بصيحة المنتصر وانا الوح بايصال التسجيل شكراًمما محتاجين مادام معانا ده حنصوت حنصوت و اسقط في يدهم ماتت الكلمات في افواههم
11-14-2009, 06:44 PM
نصار نصار
تاريخ التسجيل: 09-17-2002
مجموع المشاركات: 11660
تسلمي نازك ان شاء الله الناس كلهم يوعوا ليهم زيكم لكن في النهاية ما حي يسمحوا لاي نتيجة في غير صالحهم حتي اذا اطروا للتنوير في شارع الله اكبر الناس يسووا العليهم عشان تكون فضيحتهم لا حكت ولا بقت
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
نصار
الفاتح الصادق حامد
Nazik Eltayeb
فيس بوك
تويتر
انستقرام
يوتيوب
بنتيريست