|
بالفنون الشعبية والأغاني الوطنية مبروك مريم محجوب وأنريكو (صور)
|
حينما كان محجوب شريف يقبع في سجون السفاح نميري ما بين بورتسودان وكوبر وغيرهما في أواخر سبعينات القرن الماضي كانت أميرة الجزولي هنا تنتظر شمساً تسطع كما سطعت في ذلك الصباح الإغر في الواحد والعشرين من أكتوبر عام 1964م ، وعندماغني لمريم : تبتبا تبتبا تبتبا تبتب باكر تعرف تقرا وتكتب وياما ترتب نحنا بنحلم وكم نتمنى هي تحقق كل ما تحب تبني حياتا الند بالند اي مكانة وخانة تسد هدهدا هدهد كل الورد ينوم ويفرهد زي عصفورة تطير وترك تحبا وتمسك وتاني تفك سيبا تفكفك سيبا تلكلك عايزة تنطط بكرة حترسم و ياما تخطط بكرة حا يبنوا مدائن ضو ما بيعكر صفو الجو صفارة حرب تشطب من قاموس الدنيا الضرب الشك الخوف ينعموا كم بالشم والشوف واغاني الحب
حينما نادته أميرة من علي البعد (تبتبا) حتي تسكت الطفلةمريم ذات الأعوام التي لم تتعدي اصابع اليد الواحد إثر عضة نملة مشاكسة ارادت أن تشاركها اللعب . كان يعلم بإحساس الشاعر أن المستقبل لها ولأطفال بلادي وليس للمجرمين الطغاة .. تحققت نبؤة الشاعر وبحنان الأب رعاها حتي صارت عروس ، إحتفل بها في هذا اليوم الأغر في رمزية واضحة .. مبروك مريم محجوب شريف مبروك صديقي أنريكو ذاك الألماني اللماح بنكهة سودانية
|
|
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: زهير الزناتي)
|
الأخ الـحـبـيـب الـحـبـوب،
زهير الزناتي، تـحياتي ومـودتي، وألف شكـر علي هـذا (البوسـت) الجـميل شـكلآ ومـوضـوعآ ومـضـمونآ، وجزاك الله كل خير علي هـذه الهدية التي جاءت منـك في زمن الأحباطات والمآسي والمحن والأخبار التي تفلق الحجـر فتقسمه الي الف حتة وحـتة. شكرآ لك علي الافراح التي غمرت بها الجميع وخـصوصآ شخـصي الضعيـف اذا ماعرفت انني عاصرت ولادة مريـم وفرحت مع الاخيـر بـمقدمها، وهاهي الأن عـروسة واحلي من كل العرائس. *** - اللهم نسألك ان تزيد العروسين افراحآ فوق افراح، وتمتعهم بالسعادة الكاملة وان تكون كل ايامـهم بـهجة ومسرات، وتغـمر الأهـل وخاصـة الحـبيب مـحجوب شريف بالصـحة التامة والعافية الكاملة.
*** - ولك منـي اجمل تحياتي.
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: زهير الزناتي)
|
كل الامنيات للعروسين الجمليين,,, ببيت مال ودستة من العيال
,,, حفلة الزواج...كان عبارة عن بلد ,,, شاسع ومختلف ومتجانس ,,, ,,, لكن دا ما "أبانا" ,,,محجوب ولا عجب
بالمناسبة سلم لى على ابو 3 سنون دا
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: صديق الموج)
|
ي الله لو عندى علم مسبق لحضرت العرس
الف مبروك العم محجوب والاخت مريم
والخاله اميره
والعم حسن الجزولى
وكل السودان
سمعت اسم كده حسن شمت صراحه لى 20 سنه ما سمعت هذا الاسم فهو رجل مجامل درجه اولى وين ما تشى تلقاهو قدامك فى الاتراح والافراح ياه زمن طيل الله يديهو العافيه ان شا اله
كل التحايا ايضا للاخت مى . وكاتب البوست فناقل الفرح اكيد انسان مفرح وان شا الله لنا اتصال مع العم محجوب لللتبريكات غدا لو امد الله فى العمر .
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: abdalla osman)
|
مليون مبروك لإبنتنا العروس مريم وللعريس انريكو و إن شاء الله بيت جمال ونضال ،، بيت مال و اطفال اطفال المان بنكهة سودانية اطفال سودانيون بنكهة المانية
وقديمآ قال أحدهم أن السودانييين ، المان افريقيا
مبروك للصديق العزيز أستاذي محجوب شريف ومبروك لإستاذتنا مريم الجزولي ولأصدقائي كمال وحسن وعبدالمنعم و مجدي
ومبروك لكل الأصدقاء الذين يعدون العروس إبنتهم واميرة ومحجوب اشقائهم ورفاقهم
وشكرآ يا زناتي عامل كاميرتك النضيفة دي
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: SHIBKA)
|
والله يا زناتي إتفاجأت بالخبر وشكراً ليك كتييييييييييييييييييييييييييييييييييييييير
ألف ألف مبرووووووووووووووووووووووووووووووووك صديقتي وأختي وزميلتي ( بس عاتبه عليك إني ما عرفت الإ الآن ) وأأسف على التقصير إنشاءالله بيت مال وعيال ويغلبك بالمال تغلبيه بالعيال زي ما بقولوا حبوباتنا ( عارفاك حنينه وبتحبي كلامن ) ألف مبروك ليك ولانريكو ويا رب كل السعاده والهنا
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: مريم عبد الله)
|
الحبيب زهير
ألف مبروك لمريم وعقبال مي وجميع بناتنا
والتهاني المستمرة عبرك لشاعرنا الكبير الإنسان محجوب الشريف إبن مريم محمود
و لزوجته جمل الشيل اميرة الجزولي
نسأل الله ان يجمع بينهم على الخير
منتظرين باقي الصور التي تعبر عن عظم المناسبة ومن فيها
وسلام يا صاحب وللجميع
------------------------ قصيدة مريم ومي للجميع بهذه المناسبة
Quote: مريم ومى بنياتي وحشتّنى ولعبتن بى تحياتى تصحو امامى اشواقا تهز النبض وتاكى عميقا من شعاب النوم الاقى الذكري بتاكى سلاماً يا حمامتى اسكن فى مسامتى سلاماً يا غمامتى البتدني ابتساماتى
مريم ومى بنياتي وحشتّنى ولعبتن بى يسافر قلبى صوتي يرن يسابق الريح قلب الوالد انت صحيح تحن وتهم حذراك من الجواك وحذراك من جري التبريح حتهرب منو جلدك وين ويوماً ما حتسكت وتم واخط رأسى وافارق دنيتى وناسى واخلى وراي كراسى فما تسود سطر بالشين وما تعود اساك العين وما تشمت عدوي فينى مريم ومى بنياتي وحشتّنى ولعبتن بى
طريق الشعب اوسع من زحام الضيق وقلب الشعب ارحب من رحاب الضو ونبض الشعب كلو حلم بداهو بتم تطلع من شقوق الارض الاف المدن قامات ويطلع حتى من قلب الحجر والصى شجر متشابك الهامات وجيلاً جاى حلو الشهد صبايا وفتيه يمرحوا فى صباح الغد عيونهم برقهن لماح سؤالهم رد خفاف ولطاف وثابين اوان الجد دفاعا عن حياض السلم والافصاح سلمو لى عليهم == سلمو لى عليهم جملة حتى اللسه قبل الخلق والتكوين صناع الحياة اليوماتى ملح الارض نبض الشعر والموسيقى والتلوين هدامين قلاع الخوف كانت هذه الدراجة يوماً ما كلاشنكوف مابين منارات السمع والشوف
نقاشين جدار الصمت نساجين خيوط الشمس كهربجية للظلمات واجمل ما تكون الدنيا رسامين حفاريين مجارى العصر نصراً نصر حروفم وا حلالى تشمهن ترتاح ح حرية ت تغير ت تعليم ك كتاب م مسمار
ح حرية ت تغير ت تعدين ج جرار
سكة حديد وتهز وترز ب بحارة بحراً عب وثار وطن مدرار جرت تتلاحق الانهار كما بتتلاحق الاعراف كما بتتمازج الالوان كما بتتصافح الاديان كما بتتمازج الالوان هجيناً من سلالات الفخار والعز مرور النسمة ويداً هبة الاعصار علم فى نشرة الاخبار وهيبة على امتداد الكون علما فى حماه الوردة حتى الزهرة والمريخ شبح حرب النجوم انزاح ايادى القهر خلف الظهر مكتوفين افاعى السحت حيث مذابل التاريخ
سلمو لى عليهم جملة حتى اللسة قبل الخلق والتكوين بشوفهم كلهم حسه عصافيراً ترك جنبى نوافيراً ترش قلبى حمامتى بتشرب حسه من ايدى مريم ومى بنياتى سمعت صوتى جيت هى مريم ومى بنياتى سمعت حسى جيت هى طلعتن من زوايا السجن كالبلاب وبين السونكى والترباس وبالرقاق وحلق الباب وعبر السور زى النجمة والعصفور تجرن جدولاً رقاق من حبل العشم فتلات من حقل الوطن شتلات امكمن الفى قلب جبتن لى من تيابها شراع منديلاً خيوطو شعاع وكراساً مسطر بالضحى اللماع وخط ايدا وشعورا الحى شعورا الحي وقالت لى قالت لى وقالت لى سلاماً يا ابو مريم ومى ثباتك شعلة فى ايدى بناتك خلى راسن فوق وحاشك الكلام النى وحاتك ما انكسرنا وراك ولابداً يعود الحى وفجراً كالكرب حيبين وشعب تترب حيقوم ويملا شوارع الخرطوم وتجر مدامع الحلال تجر النم تسوى القوق فوق سودانا فوق سودانا فوق بدل شاهيك اشرب دم اذا قلت الكلام النى وانا الما عندى ليهن شىء لا فى البنك ولا فى الدين سوى الكلمة المابتنداس ولا بصبح مكان الرف ولا عصفورة جو الكف ولا صقر يحلق فوق وينزل كف نبض الشعب اجمل من بريق الماس واجمل من حليب الستره ما حبيت مشارب كاس كما القمرية بين اغصانها اشرف من موائد ناس واقرب للوطن من ناس وخيراً جانا ما عم البلد وسواس أذن فلتقرع الاجراس مريم حضرى الكراس أميرة ومى تعالن جاى نغنى لاخر المشوار نغنى لاخر الانفاس نغنى لاخر المشوار نغنى لاخر الانفاس
|
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: زهير الزناتي)
|
فرحك ملأ الجو
عَطرَ بالحمام السلاااام
وزغردت ليه النجوم
صدحت كمنجات الولف
بالمحنة،،،،، وبالوئام
رقصت في السما الغيوم
ومن حُسن الحضور
تدافعت جماهير الوقت
تهتف للحقيقة والجمال
الزرعتها
نِسب الجُمل والحروف
حديقة متناسقة
في قلب غابة الكلام
في ذاك المساء الجميل
إتفتحت أغاني وموسيقى
لأسرة جديدة
ضد السوق
وضد الزيف
في سماها النجوم
أميرة ومريم ومي
والشمس
محجوب شريف
أسرة جديدة من السودان النضيف
فرحك ملأ الجو
ياضل السودان الوريف
------------ ألف مبروك للعروسين ولأسرة الشاعر الأستاذ النضير محجوب شريف وللأستاذة أميرة الجزولي وعائلتها
جعله الله زواجاً مباركاً ورزق اهله السكينة والرحمة
وجعله بيت علم ونضال ييسر لاهله وأبنائه ومعارفة الحكمة والجمال
وألف مبروك خاصة لحسن ومها الجزولي
والتهاني لكل السودان
حعل الله كل الأيام أفراحاً لكم
والسلام
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: Samer Osman)
|
بالأمس رقص السودان
شباب الجلاد أبدعوا
"عشه وميري مدرسه الحياة المعموره لا كراس لا سبوره لا تقرير سمح رقاكي لا دبوره تحيي تعيشي لا مقهوره لا منهوره لا خاطر جناك مكسور بل مستوره يامستوره يا ذات الضرى المستور سلاما يا غزالات العمل والبيت ملاياتك ضفاف النيل احب واديك هذا الحوش احب الشاي مع القرقوش احب المستك الفواح اهيم في غمرة النعناع بن ومدق وجمرات تسخن الايقاع سلاما يا نساء الارض قاطبة بكل مكان"
فجاد كل بمشاعره
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: زهير الزناتي)
|
يا سلام يا أبو ساندرا علي الود أنريكو ليتك عرفته ، فهو إنسان حقيقي ود بلد وزيادة في الظرف واللطف والشهامة ... تعلم من محجوب شريف كل الأشياء الجميلة فهو إبنه الذي لم يلده .. أنريكو من أنبه الناس الذين ألتقيتهم بل وأذكاهم .. ساخر وإبن نكتة كناية عن إنه لماح . تلعم العربية علي الطريقة السودانية في وقت وجيز ، تحت شجرة محجوب شريف كنا ثلاثتنا في ونسة سودانية صرفة ، كنا نستمع لصوت البلابل من بعيد ، عمك محجوب كثيراً ما يهاظره فقال له وبدارجية سودانية لذيذة : - ويك الشعب الألماني مسكين ما عنده البلابل . فرد بسرعة . - ويك الشعب السوداني مسكين ما عنده أنجيل ميركل .
جاء للسودان للدراسة فأحب السودان وأهل السودان ، خلق علائق واسعة مع كثير من الأسر السودانية ، خاصة تلك التي تنحدر من جنوب كردفان ، بحكم دراسته في تلك المنطقة ، فكانت علاقته مع أسرة د. جمعة والتي جاءت لزواجه بكل إمتدادها الكبير ومعها الفرق الشعبية التي تعبر عن تراث تلك المنطقة . ألتقيت صديقي علي إبن خالة د. جمعة في الزواج ، وكأنه يجيب علي تساؤل لم يدر بخلدي ، - طبعاً نحن أهل العريس . فقلت له : - نحن كلنا أهل العروس والعريس . رغم أن أنريكو ينحدر من أسرة تنتمي لألمانيا الشرقية السابقة إلا إنه لا يحب السياسية حتي يحافظ علي طهره الأكاديمي . عشان كده ما تفكر تجنده للحزب يا كبير . أنريكو شخص رائع تماماً ومثله يستحق أن يكون رفيق درب لمريم بت محجوب شريف
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: البدري عبد الله)
|
مريوم حبيبة الكل محجوب ابوالكل اميرة ومى حبيبات البلد منجم بالامس القريب كنت حضورا يوم مولدك ايتها الجميلة كان يوما حلوا مثلك رمضان كان وكنت فى زيارة بيتكم لابارك قدومك ايتها الجميلة لكنك لم تكونى هناك بعد كانت اميرة ما تزال فى المستشفى وحين التقينا مرة اخرى اخرى كنتى نديدتى وحميمة لدى كنا فى بيتكم يوم سافر محجوب للاستشفاء رفقة اميرته وبتنا تلك الليلة فى بيتكم قبلها التقينا قبل سفر محجوب كان يضحك كلما كلمه احد لاننى كنت البس جلابيته ـ عارف الليلة معانا منو ؟معانا سلمى الشيخ وهسى لابسة جلابيتى لانه مافى زول بلابسا ؟ هكذا كان محجوب وكنا فى تلك الليلة الماطرة يدفئنا بروحه الماتحة من روح كل البلاد مبروك يا ايتها البنت الحبيبة اجمل البنات واقربهن الى روحى وقلبى عافية حبيبة وعز وعمر مديد وحياة كل السعادة تحيطك لك اجمل المنى من امك سلمى
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: humida)
|
مبروك إنريكو ومريم
Quote: ســــــــؤال .. هل زواج ابنة الاستاذ محجوب شــريف من خواجة .. هو جزء من الطقــم بتاع المثقف السـوداني .. ؟ |
يا حُميدة عارف سؤالك ده عامل زي شنو ؟؟
لما يلاقيك شافع ويقول ليك : "يخثيييي في راجل إسمو حَميدة (بالفتحة)" ... إنريكو دخل الإسلام عبر هذه الأسرة بتعاملها وفهمها إنريكو عاش في جبال النوبة فكان حبهم له بلا حدود إنريكو دعا العم محجوب وأميرة للتعرف على أسرته بألمانيا وهناك تعرف محجوب وأميرة على أسرة مفخرة ... وباركا لهذه الزيجة التي جاءت مثالية في كل شئ وندعو الله لهما بالسعادة لكن ليك حق ما تستوعب فهذا المحجوب وهذه الأميرة والعروس مريم وقسيمتها مي يدهشوننا دوما بما هو جميل ... فإنريكو منا وهما كوعد بغد جميل وأطفال سودالمان "يجيبوا لينا كاس العالم"
فهمت يا أبو ضمة
وشكرا للتهنئة
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: طه كروم)
|
ليلة ويالها من ليلة
مليون .. مبروك للحبيبه العزبزة الابنه
مريومه العروسة.. وزيتة الشباب لحدهم.. الانسانه
الرائعه.. الشوفتهاوطلتها تدخل البهجة والسرور لقلب وعقل
كل من يراها ويتعامل معها
حبيبة الكل .. شجرة الضل ومليون مبروك للعريس الرقيق ولطيف انريكو
الهاش الباش والبسمه لاتفارق شفتيه مطلقا
تحس بالالفه في التعامل معه
ومية مليوت مبروك للاعزاء الاجلاء
محجوب شربف واميرة الجزولي ومي
ولكل افراد الاسرة الكريمة والاصدقاء
وشكرا للصديق زهير سبقتنا ودائما سباق
ولي عودة
ايها الاحباب لوصف مشاعر الحضور
وكيف كانت التفاصيل الرائعة
للمشهد الانساني الاجتماعي الخلاق
عفاف ابوكشوه
| |
|
|
|
|
|
|
Re: بالفنون الشعبية والأغاني الوطنية مبروك مريم محجوب وأنريكو (صور) (Re: عفاف ابوكشوه)
|
مبروك مريومة وابوى محجوب .. Quote: ســــــــؤال .. هل زواج ابنة الاستاذ محجوب شــريف من خواجة .. هو جزء من الطقــم بتاع المثقف السـوداني .. ؟ |
غايتو يا حميده حسااااده تولدك البنات !
هسه السودانى طعمو شنو ؟ شين يعنى وبى سفه ؟؟ انت المااااا مثقف دا لو ختو ليك دا والسودانى بتقول ليها شيلى ياتو ؟
ــــــــــــــــــــــ الحمد لله انا ح اعرس كينى .. ما خواجه اها النشوفك ح تقول شنو ؟
| |
|
|
|
|
|
|
|