|
Re: أنا وعزاز شامى وآخرون ... يقظة (خلايا المريخ النائمة) ..... (Re: tmbis)
|
الكاف يسلم الهلال كأس رد الاعتبار .. مبروك يا الهلالاب رفعتم رأس الشعب
Quote: قبل ما نرد الاعتبار ننظر شوية هو التنظير بقروش ؟؟؟؟؟؟؟؟؟ نحنا السودانيين اغرب شعب فى الدنيا ... قووووووووول كيف ..؟؟؟ قلت لى كيف ... اى حاجة عندنا ليها شماعة جاهزة ... زى الترزى بنفصل الشماعة حسب المقاس ونقوم نصدق ... يعنى مثلا ... الكهرباء تقطع فى الشتا .. ناس الكهرباء يقولوا لينا انخفاض منسوب النيل هو السبب ... نصدق وننتظر فصل الخريف .. برضو الكهرباء تقطع فى الخريف .. ناس الكهرباء يقولوا لينا ارتفاع منسوب النيل هو السبب .. تانى نصدق .. وطبعا ما حننتظر الربيع عشان ما عندنا فصل ربيع فى السودان .. يعنى ببساطة كدة ناس الكهرباء ديل عايزننا نصدق انو هم عملوا اللى عليهم لكن النيل دة ابن كلب ومعاكسانا زى ما امريكيا دى قاعدة لينا فى حلقنا ... يا نيل يا طويل يا ملولو يا ابن الكلب بطل حركات خلينا نشوف ناس الكهرباء ديل يقولوا شنو ... وطبعا مافى زول عايز يقيف قدام المشكلة عشان يعالجها ... شماعة وخلاص مثلا ... عندك البترول ... لما البترول طلع وماشفنا حاجة .. قالوا لينا دى مصاريف الحرب براها بتسقط حجر الميزانية .. انتظرنا السلام ... قالوا لينا وانتو فاكرين السلام دة مهره رخيص ؟؟ ونحنا المساكين عينا فى العمارات والفلل ونصدق اغرب شماعة فى تاريخ البشرية برضو عندنا فى السودان .. بس ناس الاحصاءات ديل حاقرين بينا ... يجى الخريف واللوارى تقيف والبلد تغرق فى شبر موية .. الحكومة ببساطة تجى تقول لينا الخريف فاجأنا .. اصلو دة خريف ولة د . خليل ابراهيم ؟؟؟ اسع اليومين دى كمان ظهرت شماعة او موضة جديدة اسمها رد الاعتبار ..... عندى واحد صاحبى اخد شاكوش من حبيبته ... طوالى قام رد اعتباره .. مشى عمل علاقة مع حبوبة البت ... الحبوبة صدقت وبقت تجلبط فى الروج والاحمر والمكياج والدلكة .. عمنا حسن قالوا مشى سكر مع اصحابو وقف لط ... لما جاى راجع البيت من شدة السكر ما عرف باب البيت ... الشباب قاعدين جلسة سمر قدام بيت عمنا حسن ... عمنا حسن قام سأل الشباب .. يا شباب بيت عمكم حسن وين ؟؟؟ الشباب قالوا ليه ما انت عمنا حسن ظااااطو .. عمك حسن قال ليهم انا ما سألتكم من عمكم حسن انا سألتكم من بيت عمكم حسن .. رأيكم شنو يا شباب نرد اعتبارنا .. اوعكم تقولوا لى نرد اعتبارنا من شنو ؟؟؟ انا قلت ليكم نرد اعتبارنا ولا قلت ليكم من شنو ؟؟؟ اسع ناس الهلال ديل قالوا ردينا اعتبار الكرة السودانية .. ما تقولوا لى الكرة السودانية دخلها شنو .. المهم هم ردوا اعتبار الكرة السودانية .. يعنى ناس الهلال ديل ليهم 80 سنة بيلعبوا فى افريقيا ونحن نستغرب متين يجيبوا لينا كاس .. اتاريهم ما ذى باقى الفرق بيلعبوا للكاس .. هم بيلعبوا عشان يتغلبوا خمسة فى ارضهم ويمشوا يفوزوا اتنين برا ارضهم ويشيلوا كاس رد الاعتبار ... سنة 64 فى نفس البطولة دى .. فريق المحلة المصرى فاز على الهلال اربعة فى القاهرة ناس الهلال فى امدرمان فازوا اربعة وطاروا ومن هناك شابكننا رد اعتبار .. سنة 2009 برضو ردوا اعتبار مع مازيمبى ... بقينا زى ناس الكهرباء والخريف والشتاء واحد ذى 64 و2009 .. يعنى الجماعة ما عايزين يعالجوا الاسباب عشان يضوقوا ليهم كاس ... كل سنة بيردوا الاعتبار والجماهير تصدق .. انتو مين قال ليكم ضيعوا اعتباركم عشان تردوه ؟؟؟ طيب نحنا صدقنا ومبروك للهلال كاس رد الاعتبار بسن نحنا ذنبنا شنو ؟؟؟ حاشرين السودان المسكين دة معاكم مالكم ؟؟ قال الكرة السودانية قال اها يا أخوان ... قلت لى نرد اعتبارنا من شنو ؟؟؟ وفى الختام نبارك للهلالاب كاس رد الاعتبار الذى افرح الشعب السودانى الذى ضيع اعتباره لانه اعتمد عليكم لتحقيق بطولة ... وهذا البوست هو رد اعتبار مقدما من الصحف التى ستصدر اليوم لتخدع الجمهور مثل كل عام برد الاعتبار ... الف مبروك
|
|
|
|
|
|
|
العنوان |
الكاتب |
Date |
أنا وعزاز شامى وآخرون ... يقظة (خلايا المريخ النائمة) ..... | Giwey | 10-05-09, 08:41 AM |
Re: أنا وعزاز شامى وآخرون ... يقظة (خلايا المريخ النائمة) ..... | Muna Khugali | 10-05-09, 10:23 AM |
Re: أنا وعزاز شامى وآخرون ... يقظة (خلايا المريخ النائمة) ..... | على محمد على بشير | 10-05-09, 10:27 AM |
Re: أنا وعزاز شامى وآخرون ... يقظة (خلايا المريخ النائمة) ..... | Giwey | 10-05-09, 10:57 AM |
Re: أنا وعزاز شامى وآخرون ... يقظة (خلايا المريخ النائمة) ..... | على محمد على بشير | 10-05-09, 11:02 AM |
Re: أنا وعزاز شامى وآخرون ... يقظة (خلايا المريخ النائمة) ..... | Giwey | 10-05-09, 12:27 PM |
Re: أنا وعزاز شامى وآخرون ... يقظة (خلايا المريخ النائمة) ..... | Ishraga Mustafa | 10-05-09, 12:44 PM |
Re: أنا وعزاز شامى وآخرون ... يقظة (خلايا المريخ النائمة) ..... | نجلاء سيد أحمد | 10-05-09, 12:57 PM |
Re: أنا وعزاز شامى وآخرون ... يقظة (خلايا المريخ النائمة) ..... | Giwey | 10-05-09, 01:40 PM |
Re: أنا وعزاز شامى وآخرون ... يقظة (خلايا المريخ النائمة) ..... | tmbis | 10-19-09, 08:51 AM |
Re: أنا وعزاز شامى وآخرون ... يقظة (خلايا المريخ النائمة) ..... | tmbis | 10-19-09, 11:07 AM |
Re: أنا وعزاز شامى وآخرون ... يقظة (خلايا المريخ النائمة) ..... | Giwey | 10-19-09, 11:35 AM |
Re: أنا وعزاز شامى وآخرون ... يقظة (خلايا المريخ النائمة) ..... | tmbis | 10-19-09, 12:03 PM |
Re: أنا وعزاز شامى وآخرون ... يقظة (خلايا المريخ النائمة) ..... | tmbis | 10-21-09, 06:57 AM |
Re: أنا وعزاز شامى وآخرون ... يقظة (خلايا المريخ النائمة) ..... | tmbis | 10-25-09, 10:55 AM |
|
|
| |