|
|
 ابداكي من وين؟ 3
|
ابداكي كيف.....؟
وانا في الارض....
لاموية لاحسا يطول
لاقدرة تديني الامل
لاحيلة تسند فيني طول
ابداكي بس بالله كيف؟
وريني يا حسي الخجول
لاهسه قادر ابتديك
لاجيتي سكتي الفضول
والغيمة ادتني الضهر
واطانشت فيني الحقول
واتشحتف روحي السهت
مشتاقة تسال كل زول
لو مرة شافك في النعاس
بتوضي بيك حسي الكسول
يا راكعة في الجوف اشتهى
تستنى في خشوعي الوصول
يتيمم البحر الحريق
والموية تغرقت في الزهول
مشروقة بيك حد السقف
والموج يكتح في السهول
***
اديني خاتر سكّتك
ببداكي منك وانتهيك
واتباهى بيك جوه الفرح
جواي وافضل اشتهيك
اعتزّا بيك زيك وهج
يا خوفي من وهجي البجيك
يتهجي بيك حرف الكلام
ويعلم الايام مشيك
قبال يتاتيها الخريف
والموية تشرب من وشيك
يا سكتي ودربي الندي
البتمنى ديمه يودي ليك
يبراكي زي ضلك تمام
ويودر الكون في يديك
يا سارقة عينين القلوب
وحنينة في بسمة عنيك
بالله كيفن اوصلك
وريني من وين ابتديك؟
لندن 2005-08-19
|
|
 
|
|
|
|
|
|
|
|
Re: ابداكي من وين؟ 3 (Re: عبدالله وداعه الامين)
|
سامحنى مابقدر أجيك
رسلتا شهوة شوقى ليك
شان بينا باعدت المسافات الطوال
بلد الضباب حجرت عليك
جواى بناضل وارسمك
حافراهو بالازميل وشيك
لون الملامح وغصة الروح
يوم وداعك ونار مشيك
*** ***
نادينى من حرقة نفس مليان حريق
ابدانى من رحلة مناضل
زول رفيق
خلينى دائما اشتهيك
واعد بروقا دون بريق
علمنى اتحدى البعاد
واعرف دهاليز الطريق
*** ***
اعذرنى وكتين اهجرك
واحضنى فى يومى البجيك ..!!
| |
|
|
|
|
|
|
|
|
|
Re: ابداكي من وين؟ 3 (Re: نادية عثمان)
|
أبداها من حس الجمال والروعة فيك
أيداها من صوت الأصالة الطالي بي إحساس مجيك
أيداها بالفرح البسافر في دواخلك ومشتهيك
أبداها يا عيد الله بيك
يا أحلى غنية شوق يدت في اللحظة ديك
تشكر يا رائع على كلماتك الزاهية أيداً
| |
|
|
|
|
|
|
|
|
 Re: ابداكي من وين؟ 3 (Re: Dr. Moiz Bakhiet)
|
حبيبنا الغالي معز
ببداها بيك انت الجمال
والروعة تقدل في مشيك
يا غالي زي كل الاهل
الدنيا تاخد من وشيك
البهجة والطبع السمح
والرقة في الفرح الوشيك
لك عظيم مودتي وكل الحب
شكرا لك ولزهو حضورك وانت تعبق سمائي بلون البنفسج
وشكرا لاحرفك الندية التى زرعت البهجة في وهج السحابة
لك تحياتي وكل الود
| |
|
|
|
|
|
|
|
|
|
Re: ابداكي من وين؟ 3 (Re: نادية عثمان)
|
لو ما اسامحك ببقى زول
لا بهوى لا بسعد شريك
لا بشبهك وانتي الجمال
لامرة ساكت حسى بيك
وان جيتي ببداكي الفرح
يا اغلى من نفسي التجيك
مشحونة بي شوق العمر
ومحنة بتفتّر ا يديك
لو بينا باعدت الظروف
تلقيني ساكن ديمه فيك
اتنفسك وانتي المسك
جواي وافضل مشتهيك
ناديت عليك جواي وله
يا دافقة في ولهي الحريق
لاجيتي سكتي الدموع
لا مرة سديتي الطريق
يا قاطعة بي ليل الشجن
لو كنتي لي روحي الرفيق
بتوضى بيك فوق السحاب
اتوسدك وانتي البريق
اسقيك حنان كل الولف
كان اروى في روحي الشهيق
اتناسى بيك قدري الوقف
راجيكي يا كل الرحيق
عبدالله وداعه الامبن
لندن 21.08.2005
| |
|
|
|
|
|
|
|
|
|
Re: ابداكي من وين؟ 3 (Re: altahir_2)
|
Quote: أبداها من حس الجمال والروعة فيك
أيداها من صوت الأصالة الطالي بي إحساس مجيك
أيداها بالفرح البسافر في دواخلك ومشتهيك
أبداها يا عيد الله بيك
يا أحلى غنية شوق يدت في اللحظة ديك |
قول نبدأ بيك
ياانت يافرح المهج وسر العذاب
فتشت ليك جوّة الوريد
وقفلت بابى على الضباب
ظنيت رويت من شوقى ليك
ومالقيت حداك غير الرهاب
جيت ابدأ بيك الق الفصول
ياكلمة الحب فى الكتاب
اسرج خيول مر الشتات
واطلق سراح نجم السحاب
انا ببدأ بيك صفحة حضور
ياغالى بس سيب الغياب !!
| |
|
|
|
|
|
|
|
|
|
Re: ابداكي من وين؟ 3 (Re: altahir_2)
|
وانا معاك اخي الطاهر اكتفي بالاستمتاع انهم الحب..
هم الجمال .. فلنجلس تحت هذه الاشجار الوارفه نرتاح من
من عنا الحياة لهم ولك كل احترام وتلبسوا ثوب العافيه دائما
| |
|
|
|
|
|
|
|
|
|
Re: ابداكي من وين؟ 3 (Re: عبدالله وداعه الامين)
|
ما اجملكم ايها الاحباب وانتم تنثرون حبات الفرح فى طرقاتنا
النشوة تملأؤنى وانا اقرأ هذه الروائع وتلك المساجلات
لعلنا نعود للعهود الذهبية للأدب من بوابة هذا البوست
واصلوا امتاعنا وتناسوا وجودنا
فنحن نسعد بتواصلكم
| |
|
|
|
|
|
|
|
|
|
Re: ابداكي من وين؟ 3 (Re: قرشـــو)
|
من نشوة الروح باللقاء ببدأ النغم وحلو النشيد
جاياك محننة بالحبور متحدية الحزن العنيد
خلينى فى الخاطر دوام زى بسمة اليوم السعيد
انا لو مشيت وبعدت يوم برجع وأعود حتما أكيد
اتوشح الشوق والغرام شايلة الوله وجعا شديد
ابداك يافرح الوجود بداية الطفل الوليد
شايلاك فى الاعماق غرام وشايفاك حب ابدا وحيد !
| |
|
|
|
|
|
|
|
|
|
Re: ابداكي من وين؟ 3 (Re: نادية عثمان)
|
Quote: من نشوة الروح باللقاء ببدأ النغم وحلو النشيد
جاياك محننة بالحبور متحدية الحزن العنيد
خلينى فى الخاطر دوام زى بسمة اليوم السعيد
انا لو مشيت وبعدت يوم برجع وأعود حتما أكيد
اتوشح الشوق والغرام شايلة الوله وجعا شديد
ابداك يافرح الوجود بداية الطفل الوليد
شايلاك فى الاعماق غرام وشايفاك حب ابدا وحيد ! |
يا نشوة الروح ارسي بي
ما تعزبي القلب الشريد
خليكي ساكنة معاي هنا
وابقيلي بسمة كل عيد
راجيكي بين قلبك وانا
مشتاق افتش في الوريد
لو القى حاجة بتشبهك
وتصحي في نفسي النشيد
يا حارسة عيني في المنام
والله بشتاق ليك شديد
بتفقدك وانتي القمر
جواي وقمرك هو الوحيد
علمني اقراك في النعاس
اتهجى بيك حرفي العنيد
وابداكي يا كل الغنى
من شهقة الوجع الشديد
كان ارسى بيك فيني المنى
واستنشقك زي كلي ريد
وادفي بيك فيني الحنين
واطمن القلب السعيد
عبدالله
لندن 26.08.2005
| |
|
|
|
|
|
|
|
|
|
Re: ابداكي من وين؟ 3 (Re: عبدالله وداعه الامين)
|
راجيكي بين قلبك وانا
مشتاق افتش في الوريد
لو القى حاجة بتشبهك
وتصحي في نفسي النشيد
يا حارسة عيني في المنام
والله بشتاق ليك شديد
بتفقدك وانتي القمر
جواي وقمرك هو الوحيد
علمني اقراك في النعاس
اتهجى بيك حرفي العنيد
وابداكي يا كل الغنى
من شهقة الوجع الشديد
كان ارسى بيك فيني المنى
واستنشقك زي كلي ريد
وادفي بيك فيني الحنين
واطمن القلب السعيد
كلام مرتب .....يعطيك العافية
| |
|
|
|
|
|
|
|
|
|
Re: ابداكي من وين؟ 3 (Re: نادية عثمان)
|
عزيزنا عبدالله ..
وأقرأ لك أبداكي من وين .. وقبل أن نستمسك بالبداية تقتحم نادية
عثمان النص لتضيف دهشة عليه فبل أن نستفيق نفاجأ بدكتور معز يضيف بريشته شيئا ثم يغوص .. لقد إكتمل الضياء .. عاشت الروائع التى تضيف شيئآ
للحياة..
صدق يا شوقي أول أمس كنت أتصفح بعض من أشعارك وكذلك لسوما وبشار كم أفتقدكم .. وقل للوجع الخرافي أنني أفتقد قصائدها إيضا ..
أما أنا فمازلت غارقآ في مأساة نيوأورليانز.. وقلت لنفسي( ديل جدودهم موليدين هنا يعني أمريكان جد أمال نحن السود الجينا هسع يعملوا فينا شنو)
شكرا على النص الإضائة..
وأقول للطاهر العزيز
عربدت بي هاجسات الشوق إذ طال النوي
وتوالت ذكريات عطرات بالهوي
والله يالطاهر نفتقدك إيضا وبشده .. فهلا أبنت الظهور!
| |
|
|
|
|
|
|
|
|
|
Re: ابداكي من وين؟ 3 (Re: malamih)
|
الحبيب عادل
ازيك يا ود نجيلة ويالملامحك من ملامحي
شكرا لك حبيبنا وجد ليك وحشة والله وينك يا رائع؟
جد البال والنافذة هنا وكل الجهات فاقداك اتمنى ان تكون والاسرة الكريمة على احسن حال
سعيد بيك حبيبنا وفخور بي كل كلامك الرائع في حق من تفتقدهم فانت دوما على البال ومنتظرين نسمعك يلا تعال شيل معانا كتف الغنى الميل
لك ودي وتحياتي ومحبتي
عبدالله
| |
|
|
|
|
|
|
|
|
|
Re: ابداكي من وين؟ 3 (Re: نادية عثمان)
|
نادية ليه زعلانة؟
الله لاجاب يوم زعلك
وجد فاقدنك
وعشان زعلانه بهديكي دي
ماقدر المقام بس قدر العندي
العين بصير وايد شعري قصيرة
جريت بي روحي اتشابا
واساسق في الدريب احلم
يدفي قليبي طيب لقياك
عشان يهدى اشتياقي الكان
مودر من سنين وسنين
وكايس بس يلاقي هواك
لانك اسمى من الناس
ومن روحي بالبتحلف بيك
وتعرف انو غير دنياك
بكون لي الدنيا لون تاني
وبتبقى الفرحة ما ياهه
وحتى غنايا ماهو غناك
وطعم الناس بكون امسخ
لانك انتا كل الناس
واجمل حتى في معناك
اريت الدنيا تسرقني
وتشيل اشواقي تمشيلك
عشان يا روحي بتمناك
وبحلم بيك وقت احلم
بشاير ماليا كل الكون
وانا الماليني حبي الجاك
يساسق فيكا من تاني
وما قادر يغالب الشوق
وما قادر يطوله سماك
عبدالله وداعه الامين
22.10.2005
| |
|
|
|
|
|
|
|
|
|
Re: ابداكي من وين؟ 3 (Re: عبدالله وداعه الامين)
|
شايلة الهم عشان ياحب
بكرة مسافرة ماشة بعيد
للوطن العيونو كبار
ووشو كما صباح العيد
لى اشجانى ماشة اعييد
كت دايراكا تمشى معاى
عشان الشوق غلبنى شديد
خايفة بعادى يحرق فيك
اصلك زول رقيق غريد
عايزاك ياحبيبى هناك
بدونك وطنى ماهو سعيد !!!
| |
|
|
|
|
|
|
|
|
|
Re: ابداكي من وين؟ 3 (Re: عنيده)
|
تبداها كيف؟؟
وانت الفرح عم ّ الفصول
وانت العشم لما العشم
بين المحبين ناقشنو قول
تبداها كيف؟؟
وانت النجم وعلاك قريب
بس نحن ماقادرين نطول
وانت الصبابات القبيل
عاجبانا في وقت الاصيل
تبداها كيف؟؟
اصلو البداية معاك بدت
في شرقتك زمن الافول
ما انت اديت الدعاش نفس
المطر , وموية البحر
منك هطول..
يا منبع الريد الأكيد, يا
سكة الحالمين وصول
تبداها كيف؟؟
لو كان نهايتك مبتدأ
وانت العمر مغروس
على زهرة شتول
والشوق معاك غلبو الصبر
حتى الجمر حرقو الذهول
.,,,,,
..,,,,,,,,,,
....,,,,,,,,,,
...,,,,,,,,
أبداها لما الموج يداعب ضفتيك
لما الفرح لافينو بورق الهدايا
وقالو ليك..
أبداها وقتين القمر قال مشتهيك
يا مصدر الجفا والحنين,
يا مفجر الافراح أنين
أبداها قبال تنتهيك !!
أبداها يا ألق المدائن
والفنارات غايصة مابين لجتيك
أبداها في غبش الضباب والرؤيا
ما بينك اليك !!
ما إنت في مدن الضباب سهران
كتير ,,والهم يناقرك ويرتجيك
أبداها يازول من حمأ ,, خليها
تعشق مقلتيك,,
| |
|
|
|
|
|
|
|
|
|
Re: ابداكي من وين؟ 3 (Re: بخاري بشير)
|
عنيدة تسلمي عزيزتي زشكرا على الطلة
فرحانة بيك كل القلوب ويديك الف عافية
دي هدية ليكي وعربون محبة
يا بنية من وهج الشمس
وحنينة زي وقع القصيدة
طاعمة زي نيل الفرح
للكل تقطّع من وريده
وتشتل الكون بالوفاء
وتنوّر الناس البعيدة
محبة تديهم عشق
ورهافة الحس السعيدة
بالجد نحبك ياوجع
ارواحنا لو تدينا ريدة
بيكي بنطول السماء
والضحكة تعرف انو عيدة
يوم تغازل ضحكتك
وعيونا تصرخ يا عنيدة
عبدالله وداعه
29.10.2005
| |
|
|
|
|
|
|
|
|
|
Re: ابداكي من وين؟ 3 (Re: بخاري بشير)
|
الاخ العزيز بخاري
كل سنة وانت طيب وربنا يحقق الاماني
مرحب بيك حبيبنا ويديك الف عافية
شكرا الى رفع البوست والسؤال
ما ناسيك بس مشاغل الدنيا
بجيك بعدين
كل التحايا والود
عبدالله
| |
|
|
|
|
|
|
| |
Dr. Moiz Bakhiet
altahir_2
عماد شمت
قرشـــو
waleedi399
waleed500
saif massad ali
عنيده
بخاري بشير
فيس بوك
تويتر
انستقرام
يوتيوب
بنتيريست