بنوتـة سودانية تفتح النار علي مشهد ومرأي من الجميع
قد تكون الاضائة لازمة في مثل هذه الاحوال و صديقتي أمدرمانية شقيّة هديئة.. تزورني كالحلم في بريدي... وتنده علي الاصالة و تتسكّع بين الوريد وبين الوريد... سودانية كاملة الدسم.. مزاجية كنهر النيل حين الخريف... تنفحنا بخصوبة الجروف وقد نكون منها مثلما كانت كسلا التي أغضبت قاشـها وكان الطوفان.... وصلتني هذه الرسالة عبر الأيميل وكانت جريئة جسورة لطيفة ظريفة شفيفة عفيفة Subject: سلام Date: Tue, 29 Jun 2004 20:28:39 +0000 الأخ العزيز / ياسين لك منى كل الود والحب والتحايا العطرة و شكرا على الأيميل الظريف . مرسلة ليك الأيميل دا وكلى عشم فى سعادتكم بالتكرم بالأفادة و طبعا يا أستاذ/ ياسين عهدنا فيك كل الصراحة المطلقة !! بس الموضوع دا بالذات ما عندى الجرأة الكافية لمناقشته و بعدين عارف أهلك السودانيين الما طيبين بيخلطوا الكيمان مع بعض. بس أوعك تقول لى ماخدة موقف من الرجال ولا ماسحة بيهم الواطة!! كل القصة يا عزيزى الواحد من خلال ال شافو و ال لسمعوا و الشئ الحاصل فى مجتمعنا ( وأنا طبعا متفرجة ممتازة بس الحمدلله فى السر و الا كان خلايق الله أدونى علقة نظيفة) . السؤال كالآتى: ليه يا ياسين الشارع السودانى دا بقى زفت و طين كده ما عندو تفكير الا فى الجنس و العلاقات الجنسية ؟؟!! و ليه الرجل السودانى بيفترض انو اى بت ماشة فى الشارع عارضة نفسها كسلعة؟؟!! وليه الجنس يبقى الأساس فى علاقة الرجل و المرأة ؟؟!! و زمان كان الرجل السودانى بيحترم البت المهذبة هسع ما يشوف ليك أى بت طوالى يمشى يقدم عروضو و يطرح ليك نفسه؟؟!! و ليه أساسا بيفترض انو أى بنية شغالة فى سوق الرذيلة و الفساد؟؟!! وليه الونسة بين الجنسين بقت عبارة عن خلط تافه و ونسة فارغة الناس دى حاصل عليها شنو مستواها بقى منجط كدا؟؟؟ طيب لو سلمنا بأنو مجتمعنا عايش مشكلة خطيرة والناس دى بنى آدميين ما ملايكة بتطير و عندها أجنحة ... طيب نخت الفروض الآتية: 1) سن الزواج فى السودان ارتفعت بصورة ملحوظة بسبب الظروف و الضغوط الأقتصادية والشباب السودانى معروف بأنو نشط جنسيا لكن هل الجنس هو الوسيلة الفعالة لحل المشكلة بتاعة أرتفاع سن الزواج وهل الرجل لازم يمارسه مع كل من هب و دب ؟؟!! طيب وافقنا بأنو الجنس حل لمشكة و هو غريزة طبيعية أها البيحل مشكلة الأيـــدز شنو ؟؟!! 2) عرفنا الشباب ما قادرين على الصيام طيب الرجال المتزوجين ديل ما لهم ؟؟ الحاصل عليهم شنو بقوا سعرانين كدا؟؟!! طبعا ما أى راجل أتزوج يبقى أنصار سنة و ما يصافح. أبدا لكن لكن الراجل لمن يكون متزوج و مدمن لسع على الونسة الفارغة والخلط و الجنس طيب هو متزوج على سجم شنو ؟؟ الزوجة دى عملوها لشنو؟؟ أها قلنا ما سعيد مع زوجته و التعاسة الزوجية فى السودان بقت زى المرض المعدى كأنو فيروس حايم و لا طاير فى الهواء الناس كلهم شربوا مع الموية. طيب يا عزيزى قلنا أسباب التعاسة الزوجية كالآتى : • زمان كان الواحد يحب من بنات الجامعة أو من جيله لكن هسع مع ظروفنا الأقتصادية دى النجاح بتاع قصص الحب بقى أسطورة من نسج الخيال بقى الواحد يخلص الجامعة (زى حبيب نورة كدا) و يشتغل فترة طويلة يكون نفسه ولمن يجهز يلقى البنات البيعرفهم كلهم اتزوجوا يقوم يختار شريكة حياته كالآتى: • من جيل أصغر منه بالتالى فارق السن كبير جدا و عامل السن دا معروف بيشكل حاجز فى التعامل. • من خلال أمه و أخوات يعنى اتزوج بمقاييس ما حقتو بتاعة أهله. • اتزوج حسب مبدأ الأنوثة و لمن مرت سنة أو اتنين أو تلاتة من عمر الزواج شعر بالملل الزوجى لأنو الأنسان بطبعه بيمل الحاجات المادية و أساسا ما فى مشاعر مشتركة بينة و بين زوجته و الزواج من أصلو قائم على حاجة هامشية بتزول مع الأيام والزمن بالتالى لجأ للمراهقة المتأخرة عشان يتناسى فشله. • ما نظلم الرجال برضو البت السودانية بتبقى تقليدية بعد العرس يعنى الحب والحنان و البكش و الكبكبة ديك تقوم تجدعها وراء ظهرها لأنها خلاص وصلت لهدفها المنشود اللى هو بيت الزوجية و تهتم أكتر بالمجاملات – المطبخ – رسم الحنة – موضة التياب تبقى ونستها بايخة و أحيانا حسب ما سمعت فى أزواج خالص ما بيتكلموا مع بعض!!! • الأحباطات و الفشل المتكرر لقصص الحب القديمة خلى الجنسين (رجل أو بنية) يكفر و يلعن زواج الحب أى واحد عندو تجربة مؤلمة وفاشلة خلتو يبعد عن سكة الرومانسية وفهم البنات بقى راجل ولا ضل حيطة و الرجال ولية والسلام يعنى الخلاصة داخلين القفص الذهبى بدون نفس. • المصالح المادية بسبب الفقر و الضغوط الأقتصادية يعنى فرصة لعريس مرتاح أو فى امريكا يطلع البت من حر السودان و تلتلتة المواصلات و فرصة لحياة أفضل يعنى الزوج مش رفيق عمر وشريك حياة بل ممول أقتصادى. • فترة الخطوبة وما أدراك ما فترة الخطوبة يعنى الطرفين يعيشوا الرومانسية لحدى الآخر يقروا جريدة واحدة- كاتب واحد- عمود واحد- يسمعوا موسيقى واحدة – فنان واحد- فريق كورة واحد .... الخ بعد الزواج أى زول ظهر بوشو الحقيقى ورمى القناع وجات مشاكل الأيجار و الفواتير. • الجرى بتاع المجاملات و الأعراس أجروا حصلوا الجنازة فى المقابر ... أجروا فلان فى المستشفى ... أجروا باركوا سد المال ...العقد.... حتى الولادة ... تلقى الرجال فى الدايات!!! أما آن لهؤلاء أن ينخمدوا ؟؟؟؟ و يشيلوا نفسهم من الشلهتة والجرى ما فى مجتمع ما فيهو مجاملات لكن ما بالصورة المريضة دى!!!بس أموت أنا يا ياسين!! فيها شنو لو أى زوجين قللوا من الجرى فى حدود الأهم و باقى الزمن مشوا لكازينو- مسرح – حديقة انشاءالله قعدوا فى البيت عاينوا لبعض مش أحسن ؟؟؟!! • مجتمعنا السودانى باختلاف مستوياته لسع مجتمع ريفى يعنى البصمة الريفية البدائية لسع معششة فى عقلنا الباطن يعنى فهم السودانيين للزواج وسيلة لزيادة النسل و أستمرار لأسم الأسرة والبت السودانية من هى صغيرة بيتعمل ليها غسيل مخ انها لازم تتخارج بدرى و بأسرع فرصة ما المسألة كلها زيادة نسل والسلام على نبينا طه. • معليش يا ياسين كترت عليك الكلام بس أنا يوميا بتلقى صدمات من الدهشة و الأستغراب فى بنى وطنى ما عارفة الحاصل عليهم شنو؟؟؟ وين الصح و وين الخطأ منو الكاتل منو المكتول منو السائل منو المسئول ؟؟؟ ولا أحسن اقتراح على رأى صاحبتى ما فى زولا يملأ العين عشان كدا مافى داعى للنضمى نعرس ونجيب تلاتة بنات ونفك الراجل عكس الهواء فى الختام تقبل شكرى و اعتذارى ماشة أنوم الهواء حلو جدا فى الحوش والقمرة لسع هلال و بالمناسبة يا ياسين أنا عندى حب أزلى فى دمى مع القمر ومناجاته. DEW DROPS

[رد على الموضوع] صفحة 1 „‰ 1: << 1 >>

��

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]