|
|
 راس حربة في تيم الشعب (هاشم صديق)
|
التكوين
إسمي خميس ود كوة العاتي
كان عجلاتي
وأمي مهيرة أبوها بشارة كان ساعاتي
أبوي من بارا وأمي اتولدت في حلة غميسة
ما بتتشاف في أي خريطة
باي طريقة
باي شطارة
كان بي عين أو نضارة
أمي وأبوي صدفة اتلاقو في الدنيا الشاسعه
في الرحمة الواسعه
في قطر الهم الدرجة الرابعه
كانوا عوايل في السفر الصدفه
ملح وملاح ونسة وعرفة
تسالي وترمس وقهوة بقرفه
وفي الونسة السمحه
في القطر الزحمه
قلب الوالد حن ورف
وقلب الوالدة اتخج وخف
بعد شهرين
صبحوا اتنين
اتلمو في اسره
في بيت في البقعه
وسط العرضه
أبوي فقران لكن بدباره
مهر الوالدة كان سحاره "1"
تلاته جنيه .. سعفه وورده
وفركه وفرده .. تبروقة ومصحف
وبمبر ومبخر .. تربيزة يتيمه
نص دسته كبابي .. كفتيره قديمه
وكم هبابي بحبال منشده
جابونا تلاته (بتين) و(ولد)
ربونا بكسره
كسونا الستره
شربنا اللبن الصافي الأصلي ما اتمطقنا طعم البودره
شبينا كبرنا فهمنا نطقنا وكسبنا القدره
وأنا كت مقرم وود تفتيحه
والدنيا دي كانت طيبه فسيحه
سينما برمبل باسطة (بين) الترماج "2"
حبوبه عجوبه والنفاج
قصبة السكر وعنوكوليب ونبلة قويه
(وقولوبيه)"3"
شرك للطير
رحلة عيد لجزيرة توتي أو الباقير
شدر كافوري .. سواقي الحاج
جنينة النزهه .. زنكي اللحمة "4"
وقهوة نوري .. والدافوري
قيامه عجاج
أنا كت حريف والكوره شراب
احاور النمله في جحر الضب
أبهدل أجندل أشطر باك
أو هاف باك..أفرشو رررب
روضت الكوره
بدل مأسورها بقت ماسورتي المجنونه
بت الكلب
واترقيت للتيم الأول في الكتاب
وكبرت بقيت مفتل وشاب
اتنورت عن الأوطان واتفتحت على الأحزاب
- العرضه جنوب
- العرضه شمال
- خور ابوعنجه
- بيت المال
- شارع الطابيه
- تيم الطاغيه
- كار المافيا
-جنينة سيدي
- سور القبه
- ضرايح بحري
- شرايف بري
- رافع الرايه
- تيم القعده والإندايه
- ناس شاشاما .. نادي شليل
- الحوليه دق النوبه في حمد النيل
- السامراب
- نادي الكاب
..... إلخ
وإلخ
بخا بخ
في العجن اللخ
ولأني حريف وود لعاب
سكتني عيون من باب لي باب
اتسجلت في تيم مغمور
مرقت سريع لتيم مشهور
والبلد أتيام
والناس اقسام
شارع خاص وشارع عام
أتيام فارعين .. اتيام أقزام
أحزاب فارغين .. أحزاب أعلام
دروب وحروب صدام وكلام
وأنا كت خميس ود كوة العاتي
بقيت موضوع
تصفيق وشيوع
مرات محبوب احس بسلام
ومرات اتخاف تقول بعاتي
مرات اخلاص لشعار التيم
مرات معدود في الحال متواطي
الوعي
من تيم الشوف الضيق ضقت
اتاملت الحال المايل
شفت الناس خصام وقبايل
فكيت تسجيلي
بايدي وعقلي
واتسجلت في تيم الشعب الغالي الثوري
وأنا أصلي مصحصح وود تفتيحة ولاعب فقري
مرقت سريع من تيم الحارة للميدان الواسع دوغري
أنا لا (وارغو) لا (إيفياني)
لا (ودطمبل) لا (مساوي)
اتسجلت بحق طعميه
شراب مقدود وكداره هديه
وكيس تمباك
واتفننت أكون راس حربه
واتجننت عديل في المحور
واتقطعت اكون مساك
اتراقبت كتير بالصف
واتكعبلت كتير من خلف
ولأني خميس ود كوة العاتي
أقع وأقوم كمان سداري
تقول عجلاتي
وقعت كتير لاكني وقفت
حاورت دفرت
بعزم الشعب وصلت المرمي
كم سددت .. كم سجلت .. كم دافعت
كم مررت .. كم قومت نفس عراضه
مع أني مراقب ديمة بلاعب لاصق فيني كأنو قراده
ومرات ممسوك بي زول عتالي
جابوهو عشاني مخصوص من مالي
شعارو الغالي
لاباص لابصه
يتابع يراقب تقول مرسال من جهة مختصه
لكني طرحتو .. جمعتو .. قسمتو
جدعتو بعيد بره الخط
اتمدد يقنت زي ضكر البط
ولأنو الكوره والدنيا الصعبه بحر ممدود لاحد لاشط
في درب الواقع أكتر واكتر
التحكيم الفاشل ياما شهر في وشي الكرت الأصفر
ومره الأحمر
وجرايد النقه كانت أخطر
ألف إشاعه .. وكم شماعه
سموم وحراب
كم سووني بعت وخنت أو ساومت
واتقاعست بعت قضية قبضت رهاب
اتهافت عديل لي والي أو دقيت في السر لي باب
واتوسلت عيون أرباب
مع إني خميس ود كوة العاتي
ود تفتيحة مصحصح وفقري
مرقت عديل من باب الحاره الضيق ضايق للميدان الواسع دوغري
فكيت تسجيلي بايدي وعقلي
واتسجلت في تيم الشعب الغلي الثوري]
الجمر
صباح يوم داكا يوم ما وراغوا باع كرعينو بالدولار
وسعر التيوة صار مليار
صبحت ملسوع .. قرصني الجوع
فركت عيوني شفت الدار
صباح الخير علي ماسورة نازلة شخير
صباح النور على اسلاك من أمبارح وقاطع النور
صباح الخير علي الرادي وكت ورجغ وكلامو نزل
تقول هسع رماهو جمل
في نص الخور
صباح الخير علي الثورة وكت صبح الهتاف في الكورة والتحكيم
صباح الخير على الفيلا على المليار وجيب الشعب صام أيامو من مليم
وصار هلكان وياكل نيم
صباح الخير صحيت كحيان .. مشيت كسلان على الكنتين لقيت في غفله زادو الشاي
دقيق الفينو طار لي فوق عديل رفرف على الهبباي
تبنت الزيت
لقيت الزيت يقول ياريت
صبح حاوي يقيف ويرقص عديل في الخيت
والفتريته رفعت راسا واتنفشت تقول زرعوها في لاهاي
تقول جابوها من أمريكا
صعب أصبح سواد الناس يضوقو الكسره بي ويكا
صباح الخير على الأحزاب
فك تسجيل .. وهجره عديل .. ولعبه شليل
ضحك بدموع ودموع الشعب ماصافح عيون منديل
صباح الخير على الأمثال على الأعراف
على الجوكيه والصراف
شكيتكم إنتو لا (للفيفا) .. لا (للكاف)
شكيتكم للذي ما رد يوم مظلوم ولااهمل نصوص إنصاف
التوقيع
إسمي خميس ود كوة العاتي
كان عجلاتي
وأمي مهيرة أبوها بشارة كان ساعاتي
أنا ود تفتيحة من الدافوري ولاعب فقري
مرقت سريع من تيم الشله على الميدان الواسع دوغري
واتسجلت في تيم الشعب الغالي الثوري
أنا لا ساركوزي
لا أوباما
لا أوبينا
لا كامارا
أنا لا سيدا
لا مساوي
لا ود طمبل
لا إيفياني
اتسجلت بكيس طعمية
شراب مقدود وكداره هديه
وكيس تمباك
واتفننت أكون راس حربه
واتجننت عديل في المحور واتقطعت أكون مساك
الهوامش :-
1/ السحاره : صندوق خشبي مزركش بالألوان كانت تحفظ به الملابس والأواني وأحياناً المصاغ ، اشتهر بكونه أثاث (العروس) في ثلاثينيات واربعينيات القرن الماضي
2/ باسطة (بَِين) : بَيِن هو صاحب عربة خشبية زجاجية بيضاء تدفر باليدين لبيع الباسطة
3/ القولبية : شرك أو مصيدة لإصطياد الطير كان يستخدمه الصبية وكان يدفن في التراب ولاتظهر منه غير حبة الذرة المستخدمة كطعم للطير
4/ جنينة النزهه : حديقة الحيوانات
|
|
 
|
|
|
|
محمد ابو القاسم
فيس بوك
تويتر
انستقرام
يوتيوب
بنتيريست