يا ناس جبل أولياء زولكم دة كضااااااااااااااااااااااااب

Quote: إخوتي و أخواتي أعضاء و زوار منتديات جبل أولياء فردوس النيل الأبيض الأفاضل السلام عليكم و رحمة الله و بركاته و أسعد الله مساءكم. ضل الضحى ده شئ جميل إفتقدناه كلنا لمن كنا أبطال ركلسة زمااااااااان و قعدات العجل المقزوز في شارع القيامة قدام بيت عمك عبد المحسن و الدكة تكون عامرة بدهاليز النجر و القطع الأخضر و المشمراتية على رأسهم نفاش أبو ساطور و هباش الشليق ما أصلوا هباش و نفاش ديل كانوا بتنافسوا في النجر و الهبش و مافي مناسبة كدى جات في البجاء و الحسناب ما نجرو فيها نجرهم و نفشوا فيها الماشي و الغاشي.... أيام جميلة و حلوة و الناس كانت سريرتها بيضاء و على طاري حاكوي ضل الضحى ده طبعاً أهلنا الشوايقة (التحية لي أخونا الطاهر عثمان) مشهورين بسرعة البديهة و روح الفكاهة و الدعابة و بمتازوا بي حلاوة السرد الموضوعي للقصة و أنا أهلنا الشوايقة ديل بربطني معاهم غرام عجيب من أيام الجامعة و لحد أسع. المهم في الأمر قبل يومين إتصلت على أخونا و حبيبنا د. طارق (بيطرة الزقازيق خريج من سنة حفروا البحر و مقيم بالقصيم) و هو طبعاً شايقي على السكينة و لسا لهجة الشوايقة معاهو و لامن يتكلم معاك و تجي في خشمو كلمة فيها ياء (معرجة) يجرها ليك جنس جرة لامن أنت تحن على الياء دي المهم يا الحبان و بعدما تجاذبنا أطراف الحديث قلت ليهو يا دكتور طارق ياخي ما تدينا حاجة من ذكرياتك الجميلية ديك و محنك الكنت قادينا بيها زمان لامن كنا شغالين سواء في الرياض... ضحك ضحكة طويلة و قال لي (الله يجازي محنك يا ابو عويض و الله ذكرتنا بالذي مضي و الذي كان ثم تنهد تنهيدة قوية ....... و قال (هيييييي ديك أيام كانت حلوي (يعني حلوة باللهجة الشايقية) بتعرف أجمل حاجة فيها شنو مسألة الإجازة الصيفيي (ة) و الإندراشي (الإندراشة) في شغل الطلب و البنيان و الله تعرف نحن الخرطوم دي و بالذات الصحافات و الإمتداد (الدرجة الثالثة) و العشرات و الجبرات دي ترابها ده كلو نقلناقوا في كتوفني (بي لهجة شايقية) و العمارات اللتا (يعني حقتها) الي شايفا واقفي دي كلها بنيناها فوق كتوفنا دي كدى أنحكي ليك القصة المحيري (ة) دي حصلت بيني و بين واحد صاحبي شديد إسمو برضو عوض و ما أفضلو عليك) و بدأ أد. طارق الحكاية طبعاً بي لهجته الشايقية العذبة الجميلية التي تزينها جرة أهلنا الشوايقة للحروف الأخيرة المتحركة ) دحين يا الحبيب ونحن في الثانوي انا وصحبي عوض دا كنا شغالين طلب مع بناي كدي ايدو خضراْء تحلف تقول الزول دة ساقية يمين من تبدأ الاجازة ونحن مدورين يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد غربل الرملة يا ولد... الخرصانة وصلت ولا لسا... بكرة حا نعمل البيم... المهم يا الحبيب الرزق يوم قام ساقنا للعمارات عندنا فيها شغل شهر وكان الوكت آخر الاجازة ونحن مقدمين للجامعة بعد ما امتحنا الشهادة.. عوض صحبي دا شليق شلاقة عدوكم.. قوم يوم ونحن ماشين على العمارات جاب اورنيق الجامعة معاهو.قال عايز يستاذن من المعلم عشان يكمل الاجراءات... انا الكلام حرقني خفت الارانيق دي تقوم تغتس في الاسمنت والطوب ويكون تعبنا راح شمار في مرقة...المهم طلعنا الطابق التالت عشان نغير ونلبس لبس الشغل... عوض صاحبي مبسوط الليلة ويغني شافلو مسمار علق فيهو هدوما وبدأ يلبس في لبس الشغل.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب.. انا قلت ليه ياخي ما نغير لبس الشغل دا هنا في العمارات ديل ناس هاي ويمكن يتهمونا باكلة لحوم البشر... حلف ما يغيرو لكن الحكاية يبدو عندها معنى بعدين بيظهر..المهم كملنا صباحيتنا وقبل ما نمشي نفطر قلت ليه ياخي الارانيق دي شوفليها طوبة اهجرها بيها عشان ما تطير قال لي يا زول ما تخاف يلا نمشي نفطر... ومشينا الديم يا ابو عويض وضربنا الفول في سوق الديم وجينا منفوخين وكروشنا قدامنا زي الحنابيك تحلف لو ختو ليك سهم نشاب في صرتك وقالولك شيل نفسك وتاني ختو السهم يصل الصحافة من الديم من شدة ما زردناها فول...عوض على غير عادتو يغني ساكت في الطريق... المهم لامن وصلنا لقينالكم بنيتا سمحي جنس سماح واقفة منتظرانا... جملة الايمان وجيها من شدة ما ناعم ان بقى كبولم فيهو عسل نحل ينزلق منه.. بالله البت وشها اصفر ومندي تقول منقة قلب التور... وانا وعوض صحبي وقفنا مبلمين تحلف تقول ما عمرنا اتكلمنا قبل دة.. والموقف كانت فيهو مفارقات عجيبة خلاص البت بي سماحتها دي كلها وعوض وشوا مليان اسمنت وراسه مغبر عامل زي الدرابة... المهم يا الحبان البنية قامت حلت الموقف وسألتنا منو فيكم عوض؟ انا اتشجعت وقلت ليها دا... قامت قالت ليه انت حا تدخل السنة دي كلية الصيدلة؟؟؟ قاليها ايوة.. قامت قالت ليه: ياخي انت راجل مكافح خلاص... الكلمة دي وقعتلنا في جرح... لاننا كنا بنسمعهامن اخوان عوض الكبار لمن يجوا من الجامعة ونحن منجعصين وصتهم ويقعدوا يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا.... ونواصل.... لسا الكلام فيه بواقي و بواقي

الزول دة ان بقى كان نقل القصة من سكات ماني كنت سائل منه
بس كمان جابتلها كضب وسعودية وتليفونات
والحالة دة مشرف في المنتدى
ان بقى عنقالي ساكت زينا كان سوى شنو

ودة الرابط:
http://www.goraaljabal.com/vb/showthread.php?t=3477

وللتوثيق الزول دة مشترك بي اسم ود نصيري

يا ريت لو واحد من جهابزة التكنلوجيا يصور الصفحة وينزلها لينا في شكل صورة

ياخي الاسافير دي حرامية خلاص

Quote: ياأخي هسع الزول الكضااااااب ده ما كَتر خيرو الخَلانا نقول ليك رمضان كريم على إنفراد

Quote: دابك ياود جبرين دابك اها عاد ضوق المغسة والمساسقة وراء حاجاتك انا غايتو( حكايتالبت الصارت وردة) قطعت قلبي بالجري وراها شي سووني صاحبا ليهن وشي سوني بتاع سطله وواحدين نكروني حطب غايتو الله يكون في عونك

الله يدينا خيرها بس
فشان كدي انا ابيت اتمها


ياخي زح ((الصفوري)) أليلك دة كدي
يا دوبنا نص النهار نحن

Quote: ضريبة الشهرة ياعمك ... رمضان كريم

يمين برة منبرك شبر مافي زول فارزني






نسيبك داك قول ليه الفيك اتعرفت ورمضان كريم

Quote: خلو يا ود جبرين يرتع الزول ده خيالو واسع بالحيل. عليك أمان الله جيهك جِنس جيهة, أكان أنت ما جيت نفيت كلامو ده بنفسك, وحات الله كنت أقول فردتك للطيش...

رمضان كريم يا الحبيب

Quote: طارق جبريل وينك يا راجل ,, رمضان كريم وتصوم وتفطر علي خير ,, يا زول يمكن الزول ده بتحدث عن طارق تاني !!! زي ماقالوا فرصه نقوليك كل عام وانت والاسره بالف خير ,,

Quote: والله يا ود المدير بقيت افتش في ذاكرتي ان بقيت بعرفلي زول في جبل اولياء

Quote: طارق رمضان كريم قتلى ضمه كده ما بتعرف زول من جبل اولياء؟ ولا يوم ساقوك ناس انعام حيمورة اكلتو السمك هناك؟؟ مشكله!!!!!!

Quote: ياخى دا صعب شديد ،،،، كذب بالطريق الصاح

نان هو يا ود التوم ان بقى شال القصة ونقلها اليتجدع ان كان متجدع
بس ما يصاحبني وانا ما بعرفه

Quote: كدي يا طارق يا ود جبرين .. خلينا من كلامك دا .. بركه العرفتك سري يا يمه .. ماك عارفني شايقي نان..؟؟ بركه اللقيتك طيب يا يمه ... تصوم وتفطر عافيي انشالله

حبابك الف

Quote: الأخ طارق جبريل السلام عليكم ورحمة الله وبركاته وأبارك لكم الشهر الكريم وكل عام وأنتم بخير قمت بالاتصال على الأخ ( ود نصيري ) للاستفسار عن المادة المنشورة بمنتديات جبل أولياء فردوس النيل الأبيض وأفاد بأنه ذكر اسم كاتبها طارق وربما لم يذكر الاسم كاملا ولا المصدر وسيقوم بكتابة توضيح للأمر واعتذار وسأقوم بإدراجه هنا حال استلامه منه . وأقدم اعتذاري باسم منتديات جبل أولياء فردوس النيل الأبيض عن عدم تحري الدقة في التأكد من المصدر . البشير دفع الله المدير العام لمنتديات جبل أولياء فردوس النيل الأبيض

رمضان كريم ليك ولي ود نصيري

Quote: البشير ود دفع الله كيفنك ابوي ياخي الموضوع كنقل ماهو مستحق والله انا استغرابي فقط في انه الزول دة ضرب لي تليفون وانا اشتغلت معاهو في الرياض وهسي شغال في القصيم... وانا في حياتي ما مشيت السعودية نهائي لو كان نقل الموضوع حتى من غير ذكر الاسم كان عادي عندي تعرف المنابر دة اصبحت شي مهم لانها توثق بشكل غير مباشر لذا لا يمكن ان توثق شي غير صحيح عموما يا سيدي شكرا ليك كتير وانسى الموضوع يا زول وما تكبره اصلو كله ما جايب تمنه رمضان كريم ليك ولي ود نصيري

Quote: أخي طارق جبريل تحية وتقدير مجددا أشكر لك هذا الرد الراقي والمادة قيمة أدبية راقية , وقد قرأتها من قبل هنا وفي موقع الراكوبة وشاركت مبديا إعجابي بها في وقتها , وهي تستحق وأكثر , كما أن حفظ الحقوق الأدبية واجب , ولا يمكن أن نغبط الناس حقوقهم . والأخ ود نصيري أعرفه جيدا وربما اختلط عليه الأمر , ولكن أؤكد لك أن ما تم من جانبه كان بحسن نية , ولم يكن له أي أبعاد أخرى , حتى أن المادة قام بتنزيلها في قسم يختص بالطرائف والسرد الكوميدي الممتع والجميل . ومن جانبنا قمنا باللازم بقفل الموضوع والاعتذار الذي آمل أن يلقى عندكم القبول . وان كنت أعرفك منذ زمن من على البعد فلعل هذه الحادثة تقربنا اليك أكثر , وربما أكن أول صديق أو معرفة لك من أبناء جبل أولياء ( فردوس النيل الأبيض ) . وأتشرف بذلك . احترامي وتقديري

Quote: رمضان كريم يا دكتور ... وحاتك انا قلته الدكتور جانا هنا في ا لسعوديه وفي القصيم 300 - 400 كيلو من الرياض .. لكن بتاع الجبل ده ما سا هل .. فكاك فك !! يا حبيب الجاتك في في طلبك ( الطاء مضمومه ) سامحتك وتصوم وتفطر علي خير يا زول

غايتو البت الشديدة دي جابت لينا كفوة

Quote: كع دا معاهو ولا شنو قال ليك الكلام الهنا كدا و مافيهو غلط رمضان كريم يا ريس

رمضان كريم يا حبيبنا
وكل سنة وانت والبنيات بالف خير

Quote: كع دا معاهو ولا شنو قال ليك الكلام الهنا كدا و مافيهو غلط

رمضان كريم

احححححححح

Quote: ما رشاشة يا فيصل اتوقع منه اي حاج

وانت صدقتو ... !!
انشالله يجي واحد واسمو الجغروي .. من طيبه الحسناب
ويقول دكتور طارق ده اخوي .... اداني قصه دي اتجدعه بيها شويه في المنتدي حقنا )))

الظاهر الصيام ودركم تب

Quote: انشالله يجي واحد واسمو الجغروي .. من طيبه الحسناب ويقول دكتور طارق ده اخوي .... اداني قصه دي اتجدعه بيها شويه في المنتدي حقنا

Quote: خواني عبد الرحمن و النعيم صبراً ببل الآبري ما عندكم؟ ههههههههه شكراً لكم غاية الشكر للمتابعة و كدى خلوني أدي صاحبي د. طارق ده رنة أشوفه فاضي و لا بطارد في الجداد و البهايم (في مزارع القصيم) و أرجع ليكم

Quote: استاذ طارق كل سنة وانت طيب ياخي ووليداتك علهم طيبين الشكية لي الله الحق زولك مواصل وشوف اسع كتب شنو

Quote: نخش في الموضوع .. القال ليك منو انه دا انت .. و لا الشهرة متاعب لمن تتعب صاحبها يقعد يتوهم انه دا هو .. الزول دا قال طارق .. خريج الزقازيق .. قاعد في مدينة القصيم .. شايقي .. كان شغال بناي او طلبة .. مواصفات ممكن تنطبق علي الكثير الكثير الكثير الكثير .. ( في صدى و لا ما في ) .. طوالي شلت الكلام و جيت تقول دا انت .. ليه يعني انت بالتحديد .. هل تعتبر نفسك مشهور مشهور مشهور مشهور ( في صدى و لا ما في ياخي ) .. ما قادر اصدقك .. امشي اعتذر للزول دا و خليهو يتم باقي ونسته مع اصحابه .. و انت زاتو الوداك تفتش علي شهرتك في منتديات جبل اولياء شنو .. و لا واحد رسل ليك شهرتك دي في الايميل .. .. .. رمضان كريم كريم كريم كريم كريم كريم .. ( ما في صدى مش كدا )

Quote: الأخ الفاضل د. طارق جبريل السلام عليكم و رحمة الله و بركاته،،، و رمضان كريم في الحقيقة لقد قرءات قصة طارق و عوض في أكثر من موقع في النت و قد كتبت بأقلام أكثر من كاتب و بعد متابعتي الحثيثة لها قد قد عرفت أنا كاتبها شخصك العظيم د. طارق جبريل و لنظراً لما فيها من حكم و مواعظ و روح فكاهة وددت أن أنشرها في موقعنا مع الحفاظ بحقك الأدبي و ذكر أسمك و سرد القصة و كأنها تروى بلسانك و هذا من أعجابي بها و أعجابي بأسلوبك الكريم و أنا أعتذر لك غاية العذر أن لانني ذكرت أن بيننا صداقة و هذا أتي من عشمي في صداقتك و مؤائمة سرد القصة و ليس في النفس غير ذلك فأسمح لي أخي أن غض هذا مضجعك و لو ودتت سوف يتم إلغاء هذا البوست و نلتمس منك السموحة. ود نصيري

Quote: الأخ الفاضل د. طارق جبريل السلام عليكم و رحمة الله و بركاته،،، و رمضان كريم في الحقيقة لقد قرءات قصة طارق و عوض في أكثر من موقع في النت و قد كتبت بأقلام أكثر من كاتب و بعد متابعتي الحثيثة لها قد قد عرفت أنا كاتبها شخصك العظيم د. طارق جبريل و لنظراً لما فيها من حكم و مواعظ و روح فكاهة وددت أن أنشرها في موقعنا مع الحفاظ بحقك الأدبي و ذكر أسمك و سرد القصة و كأنها تروى بلسانك و هذا من أعجابي بها و أعجابي بأسلوبك الكريم و أنا أعتذر لك غاية العذر أن لانني ذكرت أن بيننا صداقة و هذا أتي من عشمي في صداقتك و مؤائمة سرد القصة و ليس في النفس غير ذلك فأسمح لي أخي أن غض هذا مضجعك و لو ودتت سوف يتم إلغاء هذا البوست و نلتمس منك السموحة. ود نصيري

Quote: الشهرة متاعب ياطارق .. كل سنة وانت طيب ورمضان كريم ..

يمين في المنبر دة خليك من برة
تسال زول عن طارق جبريل دة يقولك دي حبوب تيتنوس

Quote: وحاتك يا طارق زولك مصنننقر وخاتي صورتو .... إنت يا النجيض .. زولاً كدي يظهر فوق قفاك مافي.

يا زول اصلها خلق الله دي دايشي وترانا دايشين معاها

رمضان كريم وتصوموا وتفطروا علي خير يا رب

Quote: دكتور الناس ديل غلطوا لكن طلعوا رجال ...لا لفوا لا دوروا وانت اكرمت وفادتهم وما قصرت يديك العافية والله يديم السمح بين الناس والمعروف وياريت من المساحة دي الناس تتعلم كيف تثبت حاجاتها براحة بدون (دامج)كبير بالعكس تطلع بمكاسب كلكم كدة رمضان كريم

Quote: الناس ديل غلطوا لكن طلعوا رجال ...لا لفوا لا دوروا وانت اكرمت وفادتهم وما قصرت يديك العافية والله يديم السمح بين الناس والمعروف وياريت من المساحة دي الناس تتعلم كيف تثبت حاجاتها براحة بدون (دامج)كبير بالعكس تطلع بمكاسب كلكم كدة رمضان كريم

Quote: أخي قمر بوبا التحايا النواضر وكل عام وأنتم بخير مشاركتك هذه من أجمل وأصدق المشاركات التي قرأتها وما في النفوس الا الخير في شهر الخير ما تم من جانبنا تم بحسن نية وعدم قصد وأعتذرنا عنه ود . طارق جبريل عفا وصفح وكان أكرم ما يكون معنا وكسبناه أخا وصديقا ,,, بقي ( بعض ) من يتخذون هذه النافذة مكانا للتسلية والاستهزاء , وقد لا يعلمون أنهم بكتاباتهم يؤذون آخرين من حيث لا يعلمون , وأرجو أن تكون لديهم الشجاعة ويمسكون أقلامهم عليهم بعد أن يعتذروا احترامي وتقديري

Quote: حبيبنا \ ود جبرين ,, رمضان كريم اها ياخوي معرفة جبل اولياء دي ما سمحه بالحيل بس لامن تدور تمشي تزورهم حدثنا اصلي مشتهي البلطي. تسلم يا دكتور

Quote: رمضان كريم يا دكتور ذكرني واحد جارنا كان اي نكتة لما يحكيها ليك يقول عن بطلها واحد خالنا او قريبنا او صاحبنا كنوع من اضفاء المصداقية على النكتة تخيّل حتى نكت المصريين و الزلم يسودنها و يطلّع اسيادها قرايبو

Quote: تتذكر يا دكتور زمااان قلت ليك قوقل وشوف صبي طلبة اخبارها شنو والسرقة الاسفيرية بقت علي قفا ما تشيل وحسع اخوك في كل ثلاثة شهور عندو كشة اسفيرية راتبة ياخي جنس لقف ولبع وخطف.. بكرة بتلقي وااحد عامل فيها طارق جبريل ومتحكر قاعد في راكوبة بوست من البوستات

Quote: والله اصعب من المؤتمر الوطني

رمضان كريم يادكتور

Quote: لا انت كمان ما تبالغ رمضان كريم يادكتور

Quote: وكل سنة وانت طيب والجاتك في قصتك سامحتك

Quote: والله انا ذاتي كايس للبُلطي دة

Quote: الرسول يا حميدة لا تقبل علي والله انا مسيكين العتوت ياكل عشاي خليك من الغنماية

Quote: بعدين زولك الكضاب ده .. كتر خيره خلاني ادخل هنا

Quote: يازول انا درست هناك وماسمعت بإسمك ده (كاااااك)

Quote: انت بس جهز نفسك لفطور الجالية يوم الجمعة

Quote: تعرف الرنة دي ذاتها الممحناني

Quote: أجمل مافي البوست انك اخدت حقك من غير كواريك ونقة كتيرة براحة براحة حقك جاك وباعتذارو كمان

Quote: والله طلعتو ناس اكرمين باعتذاركم لطارق جبريل بالرغم من انه طارق راجل سكره وما بزعل من زول, وبقيتو معرفة اها اهم حاج العوزومه لامن يرجع السودان كترو من البلطي والكبروس . شكرا يا البشير وطارق ود قبايل ومعرفته كنز وود نصيري ما قصر عرفنا بي رجال

Quote: تسلمي أختي نور طيبة على هذا الإطراء فحقيقة د. طارق أنسان مبدع في الوصف و قد حكى هو نفسه هذه القصة في موقع سودانيز أون لاين و كذلك منبر شبكة السودان فله التحية و لكل من شارك بإحساسه و وجدانه في متابعة و مشاهدة هذه القصة الجميلية التي تنفع أن تكون مسلسل درامي (ممكن يكون ليه لا؟؟؟).