|
يا ناس جبل أولياء زولكم دة كضااااااااااااااااااااااااب
|
Quote: إخوتي و أخواتي أعضاء و زوار منتديات جبل أولياء فردوس النيل الأبيض الأفاضل
السلام عليكم و رحمة الله و بركاته و أسعد الله مساءكم. ضل الضحى ده شئ جميل إفتقدناه كلنا لمن كنا أبطال ركلسة زمااااااااان و قعدات العجل المقزوز في شارع القيامة قدام بيت عمك عبد المحسن و الدكة تكون عامرة بدهاليز النجر و القطع الأخضر و المشمراتية على رأسهم نفاش أبو ساطور و هباش الشليق ما أصلوا هباش و نفاش ديل كانوا بتنافسوا في النجر و الهبش و مافي مناسبة كدى جات في البجاء و الحسناب ما نجرو فيها نجرهم و نفشوا فيها الماشي و الغاشي.... أيام جميلة و حلوة و الناس كانت سريرتها بيضاء و على طاري حاكوي ضل الضحى ده طبعاً أهلنا الشوايقة (التحية لي أخونا الطاهر عثمان) مشهورين بسرعة البديهة و روح الفكاهة و الدعابة و بمتازوا بي حلاوة السرد الموضوعي للقصة و أنا أهلنا الشوايقة ديل بربطني معاهم غرام عجيب من أيام الجامعة و لحد أسع. المهم في الأمر قبل يومين إتصلت على أخونا و حبيبنا د. طارق (بيطرة الزقازيق خريج من سنة حفروا البحر و مقيم بالقصيم) و هو طبعاً شايقي على السكينة و لسا لهجة الشوايقة معاهو و لامن يتكلم معاك و تجي في خشمو كلمة فيها ياء (معرجة) يجرها ليك جنس جرة لامن أنت تحن على الياء دي المهم يا الحبان و بعدما تجاذبنا أطراف الحديث قلت ليهو يا دكتور طارق ياخي ما تدينا حاجة من ذكرياتك الجميلية ديك و محنك الكنت قادينا بيها زمان لامن كنا شغالين سواء في الرياض... ضحك ضحكة طويلة و قال لي (الله يجازي محنك يا ابو عويض و الله ذكرتنا بالذي مضي و الذي كان ثم تنهد تنهيدة قوية ....... و قال (هيييييي ديك أيام كانت حلوي (يعني حلوة باللهجة الشايقية) بتعرف أجمل حاجة فيها شنو مسألة الإجازة الصيفيي (ة) و الإندراشي (الإندراشة) في شغل الطلب و البنيان و الله تعرف نحن الخرطوم دي و بالذات الصحافات و الإمتداد (الدرجة الثالثة) و العشرات و الجبرات دي ترابها ده كلو نقلناقوا في كتوفني (بي لهجة شايقية) و العمارات اللتا (يعني حقتها) الي شايفا واقفي دي كلها بنيناها فوق كتوفنا دي كدى أنحكي ليك القصة المحيري (ة) دي حصلت بيني و بين واحد صاحبي شديد إسمو برضو عوض و ما أفضلو عليك) و بدأ أد. طارق الحكاية طبعاً بي لهجته الشايقية العذبة الجميلية التي تزينها جرة أهلنا الشوايقة للحروف الأخيرة المتحركة )
دحين يا الحبيب ونحن في الثانوي انا وصحبي عوض دا كنا شغالين طلب مع بناي كدي ايدو خضراْء تحلف تقول الزول دة ساقية يمين من تبدأ الاجازة ونحن مدورين يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد غربل الرملة يا ولد... الخرصانة وصلت ولا لسا... بكرة حا نعمل البيم... المهم يا الحبيب الرزق يوم قام ساقنا للعمارات عندنا فيها شغل شهر وكان الوكت آخر الاجازة ونحن مقدمين للجامعة بعد ما امتحنا الشهادة.. عوض صحبي دا شليق شلاقة عدوكم.. قوم يوم ونحن ماشين على العمارات جاب اورنيق الجامعة معاهو.قال عايز يستاذن من المعلم عشان يكمل الاجراءات... انا الكلام حرقني خفت الارانيق دي تقوم تغتس في الاسمنت والطوب ويكون تعبنا راح شمار في مرقة...المهم طلعنا الطابق التالت عشان نغير ونلبس لبس الشغل... عوض صاحبي مبسوط الليلة ويغني شافلو مسمار علق فيهو هدوما وبدأ يلبس في لبس الشغل.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب.. انا قلت ليه ياخي ما نغير لبس الشغل دا هنا في العمارات ديل ناس هاي ويمكن يتهمونا باكلة لحوم البشر... حلف ما يغيرو لكن الحكاية يبدو عندها معنى بعدين بيظهر..المهم كملنا صباحيتنا وقبل ما نمشي نفطر قلت ليه ياخي الارانيق دي شوفليها طوبة اهجرها بيها عشان ما تطير قال لي يا زول ما تخاف يلا نمشي نفطر... ومشينا الديم يا ابو عويض وضربنا الفول في سوق الديم وجينا منفوخين وكروشنا قدامنا زي الحنابيك تحلف لو ختو ليك سهم نشاب في صرتك وقالولك شيل نفسك وتاني ختو السهم يصل الصحافة من الديم من شدة ما زردناها فول...عوض على غير عادتو يغني ساكت في الطريق... المهم لامن وصلنا لقينالكم بنيتا سمحي جنس سماح واقفة منتظرانا... جملة الايمان وجيها من شدة ما ناعم ان بقى كبولم فيهو عسل نحل ينزلق منه.. بالله البت وشها اصفر ومندي تقول منقة قلب التور... وانا وعوض صحبي وقفنا مبلمين تحلف تقول ما عمرنا اتكلمنا قبل دة.. والموقف كانت فيهو مفارقات عجيبة خلاص البت بي سماحتها دي كلها وعوض وشوا مليان اسمنت وراسه مغبر عامل زي الدرابة... المهم يا الحبان البنية قامت حلت الموقف وسألتنا منو فيكم عوض؟ انا اتشجعت وقلت ليها دا... قامت قالت ليه انت حا تدخل السنة دي كلية الصيدلة؟؟؟ قاليها ايوة.. قامت قالت ليه: ياخي انت راجل مكافح خلاص... الكلمة دي وقعتلنا في جرح... لاننا كنا بنسمعهامن اخوان عوض الكبار لمن يجوا من الجامعة ونحن منجعصين وصتهم ويقعدوا يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا.... ونواصل.... لسا الكلام فيه بواقي و بواقي
|
الزول دة الله بيسألني لا بعرفه لا شفته وانا في حياتي لا مشيت السعودية لا اشتغلت فيها وكمان عاملني شغال في القصيم الزول دة ان بقى كان نقل القصة من سكات ماني كنت سائل منه بس كمان جابتلها كضب وسعودية وتليفونات والحالة دة مشرف في المنتدى ان بقى عنقالي ساكت زينا كان سوى شنو
ودة الرابط: http://www.goraaljabal.com/vb/showthread.php?t=3477
وللتوثيق الزول دة مشترك بي اسم ود نصيري
يا ريت لو واحد من جهابزة التكنلوجيا يصور الصفحة وينزلها لينا في شكل صورة
ياخي الاسافير دي حرامية خلاص
|
|
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: ياسر بيناوي)
|
Quote: دابك ياود جبرين دابك اها عاد ضوق المغسة والمساسقة وراء حاجاتك
انا غايتو( حكايتالبت الصارت وردة) قطعت قلبي بالجري وراها
شي سووني صاحبا ليهن وشي سوني بتاع سطله وواحدين نكروني حطب
غايتو الله يكون في عونك |
ود بيناوي كيفنك ابوي غايتو ((البت الشديدي)) دي سوتلي جنس سوا الله يدينا خيرها بس فشان كدي انا ابيت اتمها
ياخي زح ((الصفوري)) أليلك دة كدي يا دوبنا نص النهار نحن
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: معاوية المدير)
|
Quote: خلو يا ود جبرين يرتع الزول ده خيالو واسع بالحيل. عليك أمان الله جيهك جِنس جيهة, أكان أنت ما جيت نفيت كلامو ده بنفسك, وحات الله كنت أقول فردتك للطيش... |
والله يا ود المدير بقيت افتش في ذاكرتي ان بقيت بعرفلي زول في جبل اولياء يمين ما لقيت التكتح والعجب يتكلم وهو واثق من تليفوناته
رمضان كريم يا الحبيب
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: العوض المسلمي)
|
Quote: طارق جبريل وينك يا راجل ,, رمضان كريم وتصوم وتفطر علي خير ,, يا زول يمكن الزول ده بتحدث عن طارق تاني !!! زي ماقالوا فرصه نقوليك كل عام وانت والاسره بالف خير ,, |
اووووووووووووه زعيم الخرطوم حباب الزين ود المسلمي رمضان كريم يا الحبيب وكل سنة وانت طيب
هي لكن يا المسلمي كيفن يكون قاصدلو طارقا تاني وهو ناقل كلامي بي ضبانتو
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: طارق جبريل)
|
الأخ طارق جبريل السلام عليكم ورحمة الله وبركاته وأبارك لكم الشهر الكريم وكل عام وأنتم بخير قمت بالاتصال على الأخ ( ود نصيري ) للاستفسار عن المادة المنشورة بمنتديات جبل أولياء فردوس النيل الأبيض وأفاد بأنه ذكر اسم كاتبها طارق وربما لم يذكر الاسم كاملا ولا المصدر وسيقوم بكتابة توضيح للأمر واعتذار وسأقوم بإدراجه هنا حال استلامه منه .
وأقدم اعتذاري باسم منتديات جبل أولياء فردوس النيل الأبيض عن عدم تحري الدقة في التأكد من المصدر .
البشير دفع الله المدير العام لمنتديات جبل أولياء فردوس النيل الأبيض [email protected] 00966596218431
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: البشير دفع الله)
|
Quote: الأخ طارق جبريل السلام عليكم ورحمة الله وبركاته وأبارك لكم الشهر الكريم وكل عام وأنتم بخير قمت بالاتصال على الأخ ( ود نصيري ) للاستفسار عن المادة المنشورة بمنتديات جبل أولياء فردوس النيل الأبيض وأفاد بأنه ذكر اسم كاتبها طارق وربما لم يذكر الاسم كاملا ولا المصدر وسيقوم بكتابة توضيح للأمر واعتذار وسأقوم بإدراجه هنا حال استلامه منه .
وأقدم اعتذاري باسم منتديات جبل أولياء فردوس النيل الأبيض عن عدم تحري الدقة في التأكد من المصدر .
البشير دفع الله المدير العام لمنتديات جبل أولياء فردوس النيل الأبيض
|
البشير ود دفع الله كيفنك ابوي ياخي الموضوع كنقل ماهو مستحق والله انا استغرابي فقط في انه الزول دة ضرب لي تليفون وانا اشتغلت معاهو في الرياض وهسي شغال في القصيم... وانا في حياتي ما مشيت السعودية نهائي لو كان نقل الموضوع حتى من غير ذكر الاسم كان عادي عندي تعرف المنابر دة اصبحت شي مهم لانها توثق بشكل غير مباشر لذا لا يمكن ان توثق شي غير صحيح عموما يا سيدي شكرا ليك كتير وانسى الموضوع يا زول وما تكبره اصلو كله ما جايب تمنه
رمضان كريم ليك ولي ود نصيري
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: طارق جبريل)
|
Quote: البشير ود دفع الله كيفنك ابوي ياخي الموضوع كنقل ماهو مستحق والله انا استغرابي فقط في انه الزول دة ضرب لي تليفون وانا اشتغلت معاهو في الرياض وهسي شغال في القصيم... وانا في حياتي ما مشيت السعودية نهائي لو كان نقل الموضوع حتى من غير ذكر الاسم كان عادي عندي تعرف المنابر دة اصبحت شي مهم لانها توثق بشكل غير مباشر لذا لا يمكن ان توثق شي غير صحيح عموما يا سيدي شكرا ليك كتير وانسى الموضوع يا زول وما تكبره اصلو كله ما جايب تمنه
رمضان كريم ليك ولي ود نصيري |
أخي طارق جبريل تحية وتقدير مجددا أشكر لك هذا الرد الراقي والمادة قيمة أدبية راقية , وقد قرأتها من قبل هنا وفي موقع الراكوبة وشاركت مبديا إعجابي بها في وقتها , وهي تستحق وأكثر , كما أن حفظ الحقوق الأدبية واجب , ولا يمكن أن نغبط الناس حقوقهم . والأخ ود نصيري أعرفه جيدا وربما اختلط عليه الأمر , ولكن أؤكد لك أن ما تم من جانبه كان بحسن نية , ولم يكن له أي أبعاد أخرى , حتى أن المادة قام بتنزيلها في قسم يختص بالطرائف والسرد الكوميدي الممتع والجميل . ومن جانبنا قمنا باللازم بقفل الموضوع والاعتذار الذي آمل أن يلقى عندكم القبول . وان كنت أعرفك منذ زمن من على البعد فلعل هذه الحادثة تقربنا اليك أكثر , وربما أكن أول صديق أو معرفة لك من أبناء جبل أولياء ( فردوس النيل الأبيض ) . وأتشرف بذلك . احترامي وتقديري
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: البشير دفع الله)
|
Quote:
أخي طارق جبريل تحية وتقدير مجددا أشكر لك هذا الرد الراقي والمادة قيمة أدبية راقية , وقد قرأتها من قبل هنا وفي موقع الراكوبة وشاركت مبديا إعجابي بها في وقتها , وهي تستحق وأكثر , كما أن حفظ الحقوق الأدبية واجب , ولا يمكن أن نغبط الناس حقوقهم . والأخ ود نصيري أعرفه جيدا وربما اختلط عليه الأمر , ولكن أؤكد لك أن ما تم من جانبه كان بحسن نية , ولم يكن له أي أبعاد أخرى , حتى أن المادة قام بتنزيلها في قسم يختص بالطرائف والسرد الكوميدي الممتع والجميل . ومن جانبنا قمنا باللازم بقفل الموضوع والاعتذار الذي آمل أن يلقى عندكم القبول . وان كنت أعرفك منذ زمن من على البعد فلعل هذه الحادثة تقربنا اليك أكثر , وربما أكن أول صديق أو معرفة لك من أبناء جبل أولياء ( فردوس النيل الأبيض ) . وأتشرف بذلك . احترامي وتقديري |
تعرف يا البشير يا ريت كل يوم اعمل لي شكلة هنا عشان الواحد يكسب صديق جديد في قامتك يا سيدي دون رياء شرف كبير لي صداقتك واتمنى ان تسعفني الايام للتعرف على ود نصيري لك ولاهل جبل اولياء كل الود والمحبة وتصوموا وتفطروا علي خير
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: عبدالله كع)
|
Quote: رمضان كريم يا دكتور ... وحاتك انا قلته الدكتور جانا هنا في ا لسعوديه وفي القصيم 300 - 400 كيلو من الرياض .. لكن بتاع الجبل ده ما سا هل .. فكاك فك !!
يا حبيب الجاتك في في طلبك ( الطاء مضمومه ) سامحتك
وتصوم وتفطر علي خير يا زول |
والله يا كعكوعي انا السعودية بالجوة بس بكون جيت من فوقها لانه ركبت القطرية مرة
غايتو البت الشديدة دي جابت لينا كفوة
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: طارق جبريل)
|
Quote: كع دا معاهو ولا شنو قال ليك الكلام الهنا كدا و مافيهو غلط |
فيصل حرام عليك يا خي .. البروفيل في وادي وانت في وادي رمضان كريم
احححححححح
Quote: ما رشاشة يا فيصل اتوقع منه اي حاج |
وانت صدقتو ... !! انشالله يجي واحد واسمو الجغروي .. من طيبه الحسناب ويقول دكتور طارق ده اخوي .... اداني قصه دي اتجدعه بيها شويه في المنتدي حقنا )))
الظاهر الصيام ودركم تب
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: مزمل خيرى)
|
استاذ طارق كل سنة وانت طيب ياخي ووليداتك علهم طيبين
الشكية لي الله الحق زولك مواصل وشوف اسع كتب شنو
Quote: خواني عبد الرحمن و النعيم صبراً ببل الآبري ما عندكم؟ ههههههههه شكراً لكم غاية الشكر للمتابعة و كدى خلوني أدي صاحبي د. طارق ده رنة أشوفه فاضي و لا بطارد في الجداد و البهايم (في مزارع القصيم) و أرجع ليكم |
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: مزمل خيرى)
|
ما عارف ليه ما بقدر اصدق طوالي .. و ما عارف ليه الحكايات بتكون داير ليها شرح معاي ..
* ( هضربة صائم ) ..
.. ..
نخش في الموضوع .. القال ليك منو انه دا انت .. و لا الشهرة متاعب لمن تتعب صاحبها يقعد يتوهم انه دا هو .. الزول دا قال طارق .. خريج الزقازيق .. قاعد في مدينة القصيم .. شايقي .. كان شغال بناي او طلبة .. مواصفات ممكن تنطبق علي الكثير الكثير الكثير الكثير .. ( في صدى و لا ما في ) .. طوالي شلت الكلام و جيت تقول دا انت .. ليه يعني انت بالتحديد .. هل تعتبر نفسك مشهور مشهور مشهور مشهور ( في صدى و لا ما في ياخي ) .. ما قادر اصدقك .. امشي اعتذر للزول دا و خليهو يتم باقي ونسته مع اصحابه .. و انت زاتو الوداك تفتش علي شهرتك في منتديات جبل اولياء شنو .. و لا واحد رسل ليك شهرتك دي في الايميل ..
.. ..
رمضان كريم كريم كريم كريم كريم كريم .. ( ما في صدى مش كدا )
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: humida)
|
Quote: نخش في الموضوع .. القال ليك منو انه دا انت .. و لا الشهرة متاعب لمن تتعب صاحبها يقعد يتوهم انه دا هو .. الزول دا قال طارق .. خريج الزقازيق .. قاعد في مدينة القصيم .. شايقي .. كان شغال بناي او طلبة .. مواصفات ممكن تنطبق علي الكثير الكثير الكثير الكثير .. ( في صدى و لا ما في ) .. طوالي شلت الكلام و جيت تقول دا انت .. ليه يعني انت بالتحديد .. هل تعتبر نفسك مشهور مشهور مشهور مشهور ( في صدى و لا ما في ياخي ) .. ما قادر اصدقك .. امشي اعتذر للزول دا و خليهو يتم باقي ونسته مع اصحابه .. و انت زاتو الوداك تفتش علي شهرتك في منتديات جبل اولياء شنو .. و لا واحد رسل ليك شهرتك دي في الايميل ..
.. ..
رمضان كريم كريم كريم كريم كريم كريم .. ( ما في صدى مش كدا ) |
حميدة كيفنك ابوي رمضان كريم وكل سنة وانت بالف خير
الرسول يا حميدة لا تقبل علي والله انا مسيكين العتوت ياكل عشاي خليك من الغنماية
اول شي يا الحبيب انا لاني مشهور لا كايسلي شهرة يعلم الله كل ما في الموضوع ضربلي واحد بلدياتي وقال لي انت متين اشتغلت في الرياض ولا في القصيم الشي البعرفه انك ما جيت السعودية دي كله كله وقام اداني الرابط لو رجعت يا حميدة لي مكتبتي ومشيت الرابط بتاع جبل اولياء حا تلقى القصة دي انا كتبتها اكتر من سنتين يعني القصة ماها ونسي مع اصحابه ولو نقلها ساكت حتى من غير يجيب سيرتي والله ماني ساْءلو بس الراجل دة قال صاحبي وبيضرب لي تليفون في القصيم وانا البيطرة دي والله اشتغلت بيها ستة شهور وخليتها ورميت شهادتها
وبعدين يا حميدة كدي شوف اعتذار الزول دة تحت في مداخلة ود دفع الله حا تلقى كلامي طلع صاح
اها صدقتني ولا لليلي
دحين يا الحبيب لا تعصر علي شديد
اها كلامي جابلو صدي ولا لليلي
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: مزمل خيرى)
|
Quote: الأخ الفاضل د. طارق جبريل
السلام عليكم و رحمة الله و بركاته،،، و رمضان كريم في الحقيقة لقد قرءات قصة طارق و عوض في أكثر من موقع في النت و قد كتبت بأقلام أكثر من كاتب و بعد متابعتي الحثيثة لها قد قد عرفت أنا كاتبها شخصك العظيم د. طارق جبريل و لنظراً لما فيها من حكم و مواعظ و روح فكاهة وددت أن أنشرها في موقعنا مع الحفاظ بحقك الأدبي و ذكر أسمك و سرد القصة و كأنها تروى بلسانك و هذا من أعجابي بها و أعجابي بأسلوبك الكريم و أنا أعتذر لك غاية العذر أن لانني ذكرت أن بيننا صداقة و هذا أتي من عشمي في صداقتك و مؤائمة سرد القصة و ليس في النفس غير ذلك فأسمح لي أخي أن غض هذا مضجعك و لو ودتت سوف يتم إلغاء هذا البوست و نلتمس منك السموحة. ود نصيري
|
الأخ طارق جبريل تحية وتقدير مجددا هذا نص الرسالة التي وصلتني من الأخ ود نصيري كما هي موجهة لشخصكم الكريم .
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: البشير دفع الله)
|
Quote: الأخ الفاضل د. طارق جبريل
السلام عليكم و رحمة الله و بركاته،،، و رمضان كريم في الحقيقة لقد قرءات قصة طارق و عوض في أكثر من موقع في النت و قد كتبت بأقلام أكثر من كاتب و بعد متابعتي الحثيثة لها قد قد عرفت أنا كاتبها شخصك العظيم د. طارق جبريل و لنظراً لما فيها من حكم و مواعظ و روح فكاهة وددت أن أنشرها في موقعنا مع الحفاظ بحقك الأدبي و ذكر أسمك و سرد القصة و كأنها تروى بلسانك و هذا من أعجابي بها و أعجابي بأسلوبك الكريم و أنا أعتذر لك غاية العذر أن لانني ذكرت أن بيننا صداقة و هذا أتي من عشمي في صداقتك و مؤائمة سرد القصة و ليس في النفس غير ذلك فأسمح لي أخي أن غض هذا مضجعك و لو ودتت سوف يتم إلغاء هذا البوست و نلتمس منك السموحة. ود نصيري |
Quote: الأخ طارق جبريل تحية وتقدير مجددا هذا نص الرسالة التي وصلتني من الأخ ود نصيري كما هي موجهة لشخصكم الكريم . |
البشير كيفنك ياخي كدة انا والله الكسبان يعني الواحد زاد ليه صديق جديد ودة شي يفرح يعلم الله التحية لي ود نصيري ولك ولكل احباب جبل أولياء
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: GamarBoBa)
|
Quote: دكتور الناس ديل غلطوا لكن طلعوا رجال ...لا لفوا لا دوروا وانت اكرمت وفادتهم وما قصرت يديك العافية والله يديم السمح بين الناس والمعروف وياريت من المساحة دي الناس تتعلم كيف تثبت حاجاتها براحة بدون (دامج)كبير بالعكس تطلع بمكاسب
كلكم كدة رمضان كريم |
قمر بوبا كيفنك ورمضان كريم وكل سنة والناس طيبة وحلوة كمان
يا ريت الزول كل يوم يعمل شكلة زي دي ويطلع بي اصحاب زي ديل دي مكاسب جملة الايمان تريح الزول في عضامو
محبتي الاكيدة
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: GamarBoBa)
|
Quote: الناس ديل غلطوا لكن طلعوا رجال ...لا لفوا لا دوروا وانت اكرمت وفادتهم وما قصرت يديك العافية والله يديم السمح بين الناس والمعروف وياريت من المساحة دي الناس تتعلم كيف تثبت حاجاتها براحة بدون (دامج)كبير بالعكس تطلع بمكاسب
كلكم كدة رمضان كريم |
أخي قمر بوبا التحايا النواضر وكل عام وأنتم بخير مشاركتك هذه من أجمل وأصدق المشاركات التي قرأتها وما في النفوس الا الخير في شهر الخير ما تم من جانبنا تم بحسن نية وعدم قصد وأعتذرنا عنه ود . طارق جبريل عفا وصفح وكان أكرم ما يكون معنا وكسبناه أخا وصديقا ,,, بقي ( بعض ) من يتخذون هذه النافذة مكانا للتسلية والاستهزاء , وقد لا يعلمون أنهم بكتاباتهم يؤذون آخرين من حيث لا يعلمون , وأرجو أن تكون لديهم الشجاعة ويمسكون أقلامهم عليهم بعد أن يعتذروا احترامي وتقديري
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: البشير دفع الله)
|
Quote: أخي قمر بوبا التحايا النواضر وكل عام وأنتم بخير مشاركتك هذه من أجمل وأصدق المشاركات التي قرأتها وما في النفوس الا الخير في شهر الخير ما تم من جانبنا تم بحسن نية وعدم قصد وأعتذرنا عنه ود . طارق جبريل عفا وصفح وكان أكرم ما يكون معنا وكسبناه أخا وصديقا ,,, بقي ( بعض ) من يتخذون هذه النافذة مكانا للتسلية والاستهزاء , وقد لا يعلمون أنهم بكتاباتهم يؤذون آخرين من حيث لا يعلمون , وأرجو أن تكون لديهم الشجاعة ويمسكون أقلامهم عليهم بعد أن يعتذروا احترامي وتقديري
|
البشير كيفنك ابوي ياخي ما تزعل من الحبايب ديل والله كلهم قلوبهم بيضاء وبتاعين ضحك ساكت يا زول المهم عندي انه الواحد كسب ليه ناس جدد وود نصيري دة ذاتو شوف ليه طريقة يجينا هنا في حوش بكري
الله يرضى عليك يا ود دفع الله ما تزعل ياخي شفتة الموضوع دة خلق للزول اصحاب في جبل أولياء ياخي لا تندمنا اننا فتحنا البوست السنيح دة
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: عبدالكريم الامين احمد)
|
Quote: تتذكر يا دكتور زمااان قلت ليك قوقل وشوف صبي طلبة اخبارها شنو والسرقة الاسفيرية بقت علي قفا ما تشيل وحسع اخوك في كل ثلاثة شهور عندو كشة اسفيرية راتبة ياخي جنس لقف ولبع وخطف.. بكرة بتلقي وااحد عامل فيها طارق جبريل ومتحكر قاعد في راكوبة بوست من البوستات |
يا هندسة رمضان كريم ياخي الاسافير دي بقت صعبة خلاص والله اصعب من المؤتمر الوطني
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: حيدر حسن ميرغني)
|
ود جبريل - كيفنك
اول شيء رمضان كريم بعدين زولك الكضاب ده .. كتر خيره خلاني ادخل هنا وذي ما ود خيري قال ليك .. دي الشهره .. اها... النجيك في النجيضه .. أنا قاعده ادخل بوستاتك وأنكت كوتاتك بتاعت الغناء ... وكمان متابعه عمتك ... لمن وصلت الخرطوم .. وتفتش في التكسي حقكم ..
شفته كيف .....
المهم يا خوي كتير من المتابعين بره بره عندهم بوستات معينه بفكو بيها الضيقه .. وانا من الناس الكنته بفك ضيقتي ببوست عمتك النزلت الخرطوم ... واهلنا الشايقيه عموماً بلسانك
وأخيرا دخلت حوش بكري ولميت فيك ... مالك ما بترحب بي .. يعني ما برلومه ولا ما برلومه...
بت الصادق
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: عفاف الصادق بابكر)
|
بت الصادق كيفنك ورمضان كريم
Quote: بعدين زولك الكضاب ده .. كتر خيره خلاني ادخل هنا |
والله بالجد كتر خير ود نصيري الجابكم لي وزي ما قلت فوق انا اسعد زول بي ود نصيري دة كونه يجيب ليك الناس السمحي بالحيل ديل
Quote: أنا قاعده ادخل بوستاتك وأنكت كوتاتك بتاعت الغناء ... وكمان متابعه عمتك ... لمن وصلت الخرطوم .. وتفتش في التكسي حقكم ..
|
شرف كبير بالحيل يا ستي انك تقري الجن البسوي فيهو هني دة
Quote: وأخيرا دخلت حوش بكري ولميت فيك ... مالك ما بترحب بي .. يعني ما برلومه ولا ما برلومه...
|
وحات نضري ما شفت بوستيك الاول ويا ستي دة اعتذار على الملأ والف مرحب بيك في ام دفسو أليل بكري دة
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: طارق جبريل)
|
Quote: تعرف الرنة دي ذاتها الممحناني |
طارق جبريل كيفنك ...يا زول يا حلو والله ردك لي ناس جبل أولياء اجمل من القصة نفسها
كدي خليني من الرنات والحكايات كلها ...صبحي عوض بلال كان طلبة ولا صبي طلبة ..دا سؤال مهم طبعا لو صبحي متابع المشكلة بتقلع بيني وبينو ....صبحي ود حلتنــــا ..................................................................ازهري
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: SHIBKA)
|
Quote: أجمل مافي البوست انك اخدت حقك من غير كواريك ونقة كتيرة
براحة براحة حقك جاك وباعتذارو كمان |
الحق أحق أن يتبع
وما حدث من جانبنا كان خطأ وسؤ تقدير وكله غير مقصود , فالنوايا حسنة تماما
وسواء أن تم تنبيهنا بهذا البوست أم برسالة خاصة أو بأي وسيلة أخرى كنا سنتراجع ونعتذر
ونتعلم من أخطائنا وذلاتنا , ومن كان منكم بلا خطيئة .....
الا أنني سعدت جدا بهذا البوست أن أتاح لي التواصل الجميل مع المتداخلين ورؤية تباين ردود أفعالهم
ما بين متضامن مع د . طارق جبريل ( في غير معترك ) وما بين شامت ومستهزئ , ومن أراد أن يمضي وقتا
ممتعا يلوك في لحوم الناس في هذا الشهر الفضيل ( بالطبع لا أعنيك أنت يا شبكه لأنك لست منهم ).
لكنها فرصة يا شبكة انو نلاقيك بي جاي عشان نبارك ليك الشهر الكريم
وكل عام وأنتم بخير
مودتيي
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: سيف الدولة كامل)
|
Quote: والله طلعتو ناس اكرمين باعتذاركم لطارق جبريل بالرغم من انه طارق
راجل سكره وما بزعل من زول, وبقيتو معرفة اها اهم حاج العوزومه
لامن يرجع السودان كترو من البلطي والكبروس .
شكرا يا البشير وطارق ود قبايل ومعرفته كنز وود نصيري ما قصر
عرفنا بي رجال
|
التحية والتقدير أخي سيف الدولة كامل
علي باليمين كلامك ده مفروض يتكتب بموية الدهب
وعلى قول الخليجيين ( صح لسانك )
البوست ده على الرغم من انو د . طارق أطلق عليه في واحده من مشاركاتو الفوق ( بوست سنيح )
الا انو حقق بالنسبة لي وعلى المستوى الشخصي مكاسب كبيرة جدا لأنو أتاح لي التعرف الى رجال
بمواقفهم المشرفة ورؤيتهم الثاقبة وتحليلهم للمواقف .
شرف لي أخي سيف الدولة أن أتعرف اليك كما تشرفت قبلها بالتعرف الى قمر بوبا وطارق جبريل وآخرون
وبعدين أنا ما عارف قصتي مع الشوايقة ديل شنو ؟
يمكنني أن أقول أن جل أصدقائي الخلص من الشوايقة ( وده ما كسير تلج يا طارق ) لأنك قبلت اعتذارنا
بكرم وأريحية دون أن تحوجنا الى أي شئ .
بس شوف الرابط ده وتاريخه 9 / 04/ 2007 م ولو أذنت لي يا طارق لأفت اسمك فيه .
http://www.alrakoba.com/vb/%C7%E1%D1%C7%DF%E6%C8%C9-%C7...%E6%C7%ED%DE%C9.html
وبالنسبة للعزومة أخوي سيف الدولة كامل خليها علينا نحن ناس الجبل بس انت شرفنا بالحضور
احترامي وتقديري
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: البشير دفع الله)
|
يا دكتور .. صباح الخير والراجل ده انصفك هنا ...
Quote: تسلمي أختي نور طيبة على هذا الإطراء فحقيقة د. طارق أنسان مبدع في الوصف و قد حكى هو نفسه هذه القصة في موقع سودانيز أون لاين و كذلك منبر شبكة السودان فله التحية و لكل من شارك بإحساسه و وجدانه في متابعة و مشاهدة هذه القصة الجميلية التي تنفع أن تكون مسلسل درامي (ممكن يكون ليه لا؟؟؟). |
ويا ناس جبل اولياء منتداكم جميل والله ...
حميدة ... الطيب قطن بسلم عليك شديد ...
مودتي للجميع ..
اسامة
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: سيف الدولة كامل)
|
Quote: والله طلعتو ناس اكرمين باعتذاركم لطارق جبريل بالرغم من انه طارق
راجل سكره وما بزعل من زول, وبقيتو معرفة اها اهم حاج العوزومه
لامن يرجع السودان كترو من البلطي والكبروس .
شكرا يا البشير وطارق ود قبايل ومعرفته كنز وود نصيري ما قصر
عرفنا بي رجال
|
استاذنا سيف الله يخضر ضراعك انا ذاتي عزومة السمك دي من غيرك ما بمشيها
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: طارق جبريل)
|
الدكتور طارق جبريل- كتر خير ود النصري لولاه ما أطلعنا على هذا السرد الجميل، لقد ذكرتنا بلغة أهلنا الشوايقة التي زحفت عليها الطنطنة والعولمة الله يجازيهم. ورجعت بي إلى لغة البسيط الممتنع ودعاش القرية في قصص وروايات صديقك الروائي العالمي فخر السودان والسودانيين المغفور له بإذن الله تعالى الطيب صالح، أنا لا أقول هناك من يجاريه لكن كرفت ريحة أهلنا الطيبين في قرى المليون ميل مربع. ورجعت بي الذاكرة إلى المغرب عندما كنت أنا وزميلي محمد إبراهيم نزور المغرب لتغطية مؤتمرات المنظمة الإسلامية للتربية والعلوم والثقافة، كان في ذلك الوقت يستضيفنا المغفور له بإذن الله تعالى الأستاذ أبوبكر الصديق الشريف في داره العامرة بالرباط، أسأل الله لعائلته التوفيق والسداد والمستقبل أمامهم بإذن الله. خليتك في عافية، ورمضان كريم.
| |
|
|
|
|
|
|
Re: يا ناس جبل أولياء زولكم دة كضااااااااااااااااااااااااب (Re: حمد إبراهيم محمد)
|
Quote: الدكتور طارق جبريل- كتر خير ود النصري لولاه ما أطلعنا على هذا السرد الجميل، لقد ذكرتنا بلغة أهلنا الشوايقة التي زحفت عليها الطنطنة والعولمة الله يجازيهم. ورجعت بي إلى لغة البسيط الممتنع ودعاش القرية في قصص وروايات صديقك الروائي العالمي فخر السودان والسودانيين المغفور له بإذن الله تعالى الطيب صالح، أنا لا أقول هناك من يجاريه لكن كرفت ريحة أهلنا الطيبين في قرى المليون ميل مربع. ورجعت بي الذاكرة إلى المغرب عندما كنت أنا وزميلي محمد إبراهيم نزور المغرب لتغطية مؤتمرات المنظمة الإسلامية للتربية والعلوم والثقافة، كان في ذلك الوقت يستضيفنا المغفور له بإذن الله تعالى الأستاذ أبوبكر الصديق الشريف في داره العامرة بالرباط، أسأل الله لعائلته التوفيق والسداد والمستقبل أمامهم بإذن الله. خليتك في عافية، ورمضان كريم.
|
حمد ابراهيم كيفنك ياخي يا سيدي اشكر لك هذه الكلمات الطيبات
الطيب صالح اديب ضخم رحمه الله فقرة واحدة من موسم الهجرة الى الشمال تعادل كل هذا المنبر (راي شخصي)
رحم الله ابوبكر الشريف كان رجلا عجيبا في كل شئ اسرته لا زالت هنا وهم بخير
اكرر شكري على كلمات بالتاكيد اكبر مني بمراحل
الود كله
| |
|
|
|
|
|
|
|