|
|
 Re: رحيق ... وحريق (Re: HAYDER GASIM)
|
خاطر من المهجر
عثمان أخوي جوة البلد
إكافح وإنافح
وإطاوح العنت
إكدح شديد
إصل البعيد
إفل الحديد
عشان إوفر للعيال
ما إقيم الاود
ويا خسارة ونحن برة
نمحق فى الزمن
ونضيع معاهو وننتظر
إما ناس عثمان
الفوق شقاهم
إعدلو البلد
أو ننشغل بي مراسيم اللا بلد
نطرق أبواب الهجرة
وكل يوم زايدين عدد
وكل يوم فى حالة سفر
نستخرج جوازات القشر
نقاوم ظروف اليأس والفتر
نتأبط زي كل المسافرين دليل
ننتظر فى المطارات
اليوم إتلوه ليل
فى رحلة وأي رحلة
بحثا عن وطن بديل
نبقى فى لحظة
أوفق خلق الله والبشر
ونقدم ... ننتصر
علي كل الاجهزة والمراقبين
الرسميين منهم والاندركفر
الشغلهم...
أن يكروا فينا البصر
وأن يتخيروا الضحايا
بي تهم ... لون البشرة
والدين واللاست نيم
وإحتمالات الارهاب والخطر
والمحظوظ ...
إطلع سلم الطيارة
وإقطع المحيط والبحر
وإقول يا دنيا يا جديدة
يا موضة يا قديمة
إتفضلي وورينا
إيش عندك لينا
وإيه الناقصنا فيك
والزايدنا طينا
وحا نلعبك فى ياتو أرض
وبي ياتو تيم
وحا ناخدك من ياتو جنب
وعلي ياتو بنك
وكيف ورق الهوية عندك
ووين نتوهط نقيم
وإيش إبقى الامريكان دريم
ويا خسارة ونحن بره
وفينا حسرة
تضارع غمة المجهول
والمآقي التسيب
وبينا سترة ... ما بتداري
عورة الزمن العطيب
وما تسمعوا ...
بي فلان فى أمريكا
وعلان فى أوربا
نحن هنا وهناك
لا جهابزة لا يحزنون
إتفتشنا زي الترتيب
وبصمنا بالعشرة
وغلظنا فى القسم المهيب
ورتبنا القصص زي العجب
عشان هم الببحتوا ويسألوا
ونحن البنتملص ... نجيب
وده كلو عشان
كيساتنا تمشي
وما تتعثر تخيب
ويا خسارة ونحن برة
وعثمان أخوي جوةالشغل
إوطد فى تقاليدنا الكريمة
وفى المثل
إباصر فى حياتو
عشان حياة الآخرين
ما تضل السبل
... وما إفرق
بين بتو الدايرة تتعلم
فى وضع إستثنائي
وبين أمو التساسق
كل يوم لي أخصائي
وبين صديقا نابو
مصيب مفاجيء
ويا خسارة ونحن برة
لا قادرين نساوق حالة الداخل
وأضعف الايمان قرشين مبرة
لا قادرين نقتنع
بالجوة جوة والبرة برة
ويا خسارة ونحن برة
وعثمان أخوي جوة الوطن
لا بعرف النحن فيهو
لا لازمو ولا مشتهيهو
لا داير إبدل واقعو
بي إحتمال أو مظنة
وما مستعد إقايض
بلد بي جنة
يا وطن يا محنة
يا جامع يا سرايا
يا العشم يا عشايا
يا الياقوت والحصايا
يا البردة والضرايا
... وعثمان أخوي
إفتل ضراعو وإنهمك
فى الما لعب والما كضب
إدور رحى الساقية
وإلوح لي رويح باكية
بلأمل القوي وما مرتبك
وعثمان اليشترك
فى إعادة إنتاج الحياه
وتكرير الصمود ... رمز الهلب
... حار القلب
منعدل تال مرامو ومنكرب
... خابر الدرب
يراعي للصبية والعيال
... إباصر الموجود
لي الما أكل والما شرب
والواصل فرض الجيرة والعشيرة
إن كان فرح
وإن كان مكروها كرب
ويا خسارة ونحن برة
ضالين الدرب
قطعنا البحور والفيافي
هاربين بالمعنى السياسي
فازين نلقط محصول أساسي
قال نروق ونرتاح
من جري الباصات
والباعوضة والشمس اللافحة
ومن ضيق المعيشة
والسلطة الجامحة
والرغبة الشامخة
فى ان نعدل ...
أوضاع الوطن الكريهة
مرة نتوسل بندقية
ومرة نقول إنتفاضة محمية
ومرة نتطلع لي حلول سياسية
والهاون إبقى بخرة
والكلاشن رقية
والمعسكر إبقى حولية
وتوط الشغلانية
ويا ما شفنا وسمعنا
فى المداين وفى الضهاري
أبو السيخ.. النياشين ... المطاوي
وأبو المايك البلاوي
والشيخ الضاوي
والاخضر كساوي
والاحمر مخاوي
والاصفر فتاي
والاشطر يساوي
ويا ما كترت
المبادرات والفتاوي
وطراطيش كلام
فى ذات السياق
وخرابيش وفاق
يا أرق فى الناس مداوم
يا قرف فى الحلة حايم
يا دنيا وشفنا فيك
كيمان مظالم
يا شعب يا ملدوغ ووارم
يا مجتمع يا دولي يا محترم
يا شفقان تخرم ....
وتلف صينية
فى قلب افريقيا وتسلم
مرة علي الجياع
ومرة على الجناه
ومرة تحتار تألم
ولمن نفكر فى ذات نفسنا
ونتخيلنا باك هوم
تتقنطر أحلامنا كوم
قال نشمر السواعد
ونبني البيوت بالمسلح
والعقود المتينة
وندكك الحوايط المايلة
والرواكيب الضريمة
ونقبل على المنشية
والمهندسين والمعمورة
وكل الميمات الكريمة
نسكن فى قلب الجعاص
ونجر نفسا طويل
وننسى الماضي
ونحسا فى إغوارو وإتماص
المحروم فينا إبقى غندول
وإبقى قدوم وفاس
والكان فقير إلبس الالماظ
والمهزوم فى أي ليق
إبقى قناص وإبقى فواز
حاجات كتيرة راودتنا
فى المنافي القصية
وفى الشتات
قال ... نلملم المواهي
فى بلاد الخواجات
نمتنع الملاهي
ونبقى الدواهي
نصرف القليل ونوفر الكتير
ونشتغل فى مجالنا
والناس مقامات
نحفظ أولادنا
من سوالبا غايصة
فى المجتمع جينات
ونرسل لى أهلنا
الاخضر الاصلع
من الدولارات
ولما نلقى زول
مسافر للوطن
نخصو من الامريكى بالملايات
ومن الياباني بالكوريلات
ومن الخليج الدهب
عالى العيار عابر القارات
ومن إنجلترا التياب
الفي عبد الصمد لازم الصفات
وهاك يا أبهة
ويا فاضي إنبرش
ويا حلم إندرش
فى أسيف الواقع
وبئس المعطيات
وهاك يا جرب ويا لواصة
ويا ألم فوق للإحتمال
وفي غاية التعاسة
إتضهبنا فى المجمع الصناعى
المؤهل فينا لا إتوفق
ولا شم الراحة واعي
لا بهارج ...
لا أوقدنا للفرح مسارج
الطبيب بي قدرة القادر
إبقى ساعي
وإعمل ( دليفري )
بس مش للحوامل
وإنما للزبائن
الدايرين الاكل ساخن
والخدمال سراع
ومفتول ضراعي
إسخن مكن المصانع
وإسخر الانتاج تباعي
لكن وين مع الفاقة
البفت درسا إجباري
... وآخر طواعي
وعثمان أخوي
مشتعل فى همو ضاري
ما نكس فى ظروف الطوارئ
أي راية وحسابو جاري
وماش مستلم خط الوسط
ياخد يوزع فى الباصات
... إراعي
كيف إدافع ومتين إهاجم
إربط الافعال بالدواعي
وأشوف شوف العين
الما زي مناظرا
مشفوعة بالاجهزة
وبالشريط الرقابي
وما زي تصاويرا
تقزم هيبة الشارع
ومسروعو اليبتق
والريق حبابي
وفعل الزين إزيل البين
وتفرخ عزة
فى الجنيات الحبابن
إن حلوا صيفا أو شواتى
إطلع نفس واطي
إنزل بحر عالي
إطرح دميرة
وتفرح مهيرة
وإبقى الموسم فرح ... هليلة
والعشم قادل مسيرة
والمسيرة تاريخ وسيرة
فى الاحضان وثيرة
وبالاعماق جديرة
وفى فضاءك يا وطن
نلطخ العرسان ضريرة
نلزمك جرتق حنة وحريرة
ناخد من قفاك
ملامحك ... مشاويرك
تضاريسك ... رؤاك
ونتوقف حداك
وندور حواك
وإبقى وطن الكل
... منانا ومناك
وعثمان أخوي
إستف أحمالو وإغالب
جور الزمن أسف الظروف
غل الكفوف سايب الفتن
والشعاليل التحرق ضلوع الجهال
تنذر بأخطار المآل
تترع منكور الإحن
وعثمان الكلس راجل المحن
إسمر يافطة فى مفترق الطرق
للجايين من الاجيال
تفرز سبيل لي خالي الوفاض
من طريق فاعل فى الوطن
زاخر فى شجونو
شايل فى أشواقو وكمن
مستقصد ديمقراطية
حرية ... كرامة وكياسة
مستشعر آفاق الحداثة
ولافق فى سودان البديل
بالروح والبدن
متطلع لى بلاد شامخة
زى نيلا وصحاريها
وغابا وجبالا
وناسا الزين
والزمن الحنين
والارث المكين
ويا معاز الله
من أخلاط لبد
ومن هوان وسهد
ومن حاكم واستبد
ويا من فى ألطافك
رحمة تميد ... ونستمد
|
|
 
|
|
|
|
|
| العنوان |
الكاتب |
Date |
| رحيق ... وحريق | HAYDER GASIM | 01-26-06, 08:52 PM |
| Re: رحيق ... وحريق | HAYDER GASIM | 01-26-06, 08:56 PM |
| Re: رحيق ... وحريق | HAYDER GASIM | 01-27-06, 06:26 PM |
| Re: رحيق ... وحريق | HAYDER GASIM | 01-28-06, 10:52 PM |
| Re: رحيق ... وحريق | HAYDER GASIM | 01-29-06, 05:00 PM |
| Re: رحيق ... وحريق | HAYDER GASIM | 01-29-06, 08:27 PM |
| Re: رحيق ... وحريق | HAYDER GASIM | 01-30-06, 09:34 PM |
| Re: رحيق ... وحريق | HAYDER GASIM | 01-31-06, 09:23 PM |
| Re: رحيق ... وحريق | HAYDER GASIM | 02-02-06, 05:20 PM |
| Re: رحيق ... وحريق | HAYDER GASIM | 02-03-06, 11:36 PM |
| Re: رحيق ... وحريق | HAYDER GASIM | 02-05-06, 01:26 PM |
| Re: رحيق ... وحريق | HAYDER GASIM | 02-06-06, 06:50 PM |
| Re: رحيق ... وحريق | HAYDER GASIM | 03-05-06, 06:55 PM |
| Re: رحيق ... وحريق | HAYDER GASIM | 03-05-06, 06:58 PM |
| Re: رحيق ... وحريق | HAYDER GASIM | 03-05-06, 06:59 PM |
| Re: رحيق ... وحريق | HAYDER GASIM | 03-05-06, 07:01 PM |
| Re: رحيق ... وحريق | HAYDER GASIM | 03-05-06, 07:15 PM |
| Re: رحيق ... وحريق | HAYDER GASIM | 03-05-06, 07:17 PM |
| Re: رحيق ... وحريق | HAYDER GASIM | 03-05-06, 07:20 PM |
| Re: رحيق ... وحريق | HAYDER GASIM | 03-05-06, 07:21 PM |
| Re: رحيق ... وحريق | HAYDER GASIM | 03-05-06, 07:23 PM |
| Re: رحيق ... وحريق | HAYDER GASIM | 03-05-06, 07:24 PM |
| Re: رحيق ... وحريق | HAYDER GASIM | 03-05-06, 07:25 PM |
| Re: رحيق ... وحريق | HAYDER GASIM | 03-05-06, 07:26 PM |
| Re: رحيق ... وحريق | HAYDER GASIM | 03-05-06, 07:27 PM |
| Re: رحيق ... وحريق | HAYDER GASIM | 03-05-06, 07:29 PM |
| Re: رحيق ... وحريق | HAYDER GASIM | 03-05-06, 07:31 PM |
| Re: رحيق ... وحريق | HAYDER GASIM | 03-05-06, 07:32 PM |
| Re: رحيق ... وحريق | HAYDER GASIM | 03-05-06, 07:34 PM |
| Re: رحيق ... وحريق | HAYDER GASIM | 03-06-06, 07:56 PM |
| Re: رحيق ... وحريق | HAYDER GASIM | 03-06-06, 07:58 PM |
| Re: رحيق ... وحريق | HAYDER GASIM | 03-06-06, 07:59 PM |
| Re: رحيق ... وحريق | HAYDER GASIM | 03-06-06, 08:02 PM |
| Re: رحيق ... وحريق | HAYDER GASIM | 03-07-06, 07:13 PM |
| Re: رحيق ... وحريق | HAYDER GASIM | 03-07-06, 07:15 PM |
| Re: رحيق ... وحريق | HAYDER GASIM | 03-07-06, 07:17 PM |
| Re: رحيق ... وحريق | HAYDER GASIM | 03-07-06, 07:20 PM |
| Re: رحيق ... وحريق | HAYDER GASIM | 03-07-06, 07:22 PM |
| Re: رحيق ... وحريق | HAYDER GASIM | 03-07-06, 07:25 PM |
| Re: رحيق ... وحريق | HAYDER GASIM | 03-10-06, 10:16 PM |
| Re: رحيق ... وحريق | HAYDER GASIM | 03-10-06, 10:18 PM |
| Re: رحيق ... وحريق | HAYDER GASIM | 03-13-06, 08:08 PM |
| Re: رحيق ... وحريق | HAYDER GASIM | 03-13-06, 08:10 PM |
| Re: رحيق ... وحريق | HAYDER GASIM | 03-13-06, 08:11 PM |
| Re: رحيق ... وحريق | HAYDER GASIM | 03-25-06, 11:01 PM |
|
| |
HAYDER GASIM
فيس بوك
تويتر
انستقرام
يوتيوب
بنتيريست