ماذا قصدت قناة أم درمان من هذا التعليق على هذه الصورة؟

Quote: "مانديـلا العنـيد"

Quote: والحقيقة من أكثر مايجذبني لمتابعة البوستات النكهة التاريخئة والتوثيقية في بعضها؛ وما يعجبني أكثر هو الإنزلاق الخفي للحاضر الى الماضي ليتحول الى تاريخ وأنا من عُشاق التاريخ ولم ينقذني منه سوى الانبهار باللغة ولا غرابة.. فاللغات من أهم مكونات التاريخ..

شكرا د. عائشة فقد سعدت بعبارة (الإنزلاق الخفي) ومجمل حديثك ، نعم ، هكذا
يكون التزلج بين الماضي والحاضر والإنزلاق بين المعلومة والطرفة وأسلوبك السهل الممتنع
في المزج بين النقائض .

فطين ، بعد كل هذه العقود ، أضحكت كل من مر بهذه المساحة كمرور نهرو المُتخيَّل بها :
هاي فتين..

التاريخ مدهش رغم مقولة يرددها البعض بأنه لايوجد تاريخ فالأحداث متصلة وربما يجدوا
في نظريات إينشتين وتعريفه للزمن ما يدعم ذلك لكن هذا لايحول دون أن نمتطي آلة الزمن
لنستدعي أحداثا بعينها من الماضي فتكون حاضرا نسبيا والعكس صحيح ، هسه بالله يا دكتوره
قارني بين الماضي والحاضر أدناه ودليني أين الماضي وأين الحاضر:




أعلاه البرلمان عام 1951 وأدناه بعد 60 سنه




الناس ديل كل واحد منهم ينظر في اتجاه مختلف وهذا انعكاس لما يدور في رأس كل منهم (أعني الما نايمين)
ولا أجد تعليقا مناسبا لهذه الوجوه المحتارة سوى ما يردده ترباس :
وجوهكم فيها شئ يحيِّر ويغيِّر إتجــاه الزول

.

Quote: ياخي الغرب الامريكي وثق لسفاحيه واشهر سارقي عهد كاوبوي ونحن خجلانين نوثق لرجال كما النجوم الزواهر ونساء كاملات الدسم والفكره بوحوا يرحمكم الله

Quote: التي تقف إلى جوار عبود ليست هي زوجته بل هي زوجة السفير السوداني لدى الولايات المتحدة آنذاك الدكتور الحضري وهو يقف في الصورة خلف الرئيس جون كنيدي.. السيدة زوجة السفير إن لاحظتم للشبة هي شقيقة الفنان الكبير عبدالكريم الكابلي

يا الأمين ، بسبب مداخلتك أعلاه وال unauthentic information غير المقصودة الواردة
فيها – بالطبع – وردتني إيميلات ومسنجرات وتلفونات وفاكسات والحمد لله التلكسات وقفوها ،
جلها يقول :

(يا مرتضى زوجة د/ عثمان الحضري ما أخت الكابلي ..هي مصرية إسمها فهيمة خلي الناس تتأكد
من المعلومات ، صحيح الفي الصورة زوجة السفير ) ، طبعن يا اللمين أنا بالذات مسألة دا
متزوج منو ودي (ماخده) منو ما عندي فيها نفقه ولا بقربا لأسباب كثيرة ، وفي البوست المعني

الرئيس عبود ، كيندي ، جاكلين، وحرم عبود (صورة)

صححني بعض الأعضاء وأكدوا أن عبود لم تصحبه حرمه في تلك الرحلة وأن من تظهر في الصورة كانت زوجة
السفير ، وبالطبع معظم معلوماتي عن تلك الرحلة كانت من قراءاتي لأنني لم أعاصرها أو أعيها، وتفريعا
على هذا تكون قصة أخت كابلي ( مع احترامنا للجميع) غير صحيحة (لو تصدق) ومن ثم قول للقراء (إني أعتذر) ،
وسينتظروك فلا تكن ضنينا بالوعد لأنو وقتها سيستصحب بعضهم غنا الزمن دا ويقولوا ليك بأمانه
عمليتك ما ظريفه وحركتك ..

Quote: بس كان ممكن يعملوها بطريقة واسلوب احسن من كده، بس نقول شنو؟؟ ماااا من امدرمان وكده

يا أبنعوف أولاد أم درمان ما بيعملوا كدا ،
ديل عملوا المسرح القومي والإذاعه والتلفزيون والهلال والمريخ والمورده وإبراهيم عوض
وعبدالرحمن الريح وعبيد عبدالرحمن وسيد عبدالعزيز والمهدي والأزهري وأبوصلاح والجابري
وميرغني المامون واحمد حسن جمعه وود الحاوي وزيدان و الصلحي والهادي الضلالي والطابيه
والطريق الشاقي الترام قبل أن يدمره البرلمان..
ياخ ديل الإعلام والثقافة زاتا .. مش شايف الوثيقة اللي جابا شيقوق أعلاه من كلية غردون 1936
وتتحدث فقط عن أولاد أم درمان؟
سمعت شاعر قال : لي في الكلاكله غزال؟
أو يا ظبية المنشيه الفي الخمائل حالمه؟
ياخ ظبية المسالمه دي لو حضرت الزمن دا كان أشواريا راي لِحست كوعا أو أكلت نيم
كما يقول خطباء التتار وزمن الكوليرا ،
أوعا تجيب لي أغنية يا بنات بحري قالوا بتحبو لأنو سمعت إنو رمضان زايد كان قاصد بيها بنات مدني..
ياخ منذ طفولتنا تم تنويرنا بأسباب الضهبان والجن والطششان والبشتنه وحذرونا إستنادا إلى سابقه قضائية
عنوانها (ضيعني ساكن المورده) ..

Quote: فقط لي ملاحظة ، لا تغير من مجرى الحديث في البوست وهي ان التعليق الذي اوردته قناة امدرمان ليس ( الحمدلله أن د. التجاني الماحي ود. شداد كانا في استقبال الملكة ) بل : ( من حسن حظنا ان التجاني الماحي ودكنور شداد استقبلا الملكة) ....

Quote: ليس لدى الجنرال من يزاوره.

Quote: وبالبحث وجدنا أن أكثر مبلغ يحتاج إليه التلميذ الداخلي شهريا هو خمسون قرشا

Quote: يا دوب قدرنا ندخل النت ونعرف الحاصل شنو

أحمد القرشي تستاهل .. كلما أقول ليك كيف حالك تقول لي (زين)..
إن شاءالله لقيت بارا والأبيض كويسين..
عروس الرمال ،
هسه لقبتوها شنو؟



يا سلام على صورة قريبك يا كوستاوي ..
شوف النضافه والإنضباط ..
شوف الشلوخ كيف متجانسه مع الكاب ..

لاشك كانوا بيغنوا ليهم الأبيض ضميرك
هسه اليونيفورم الأبيض زي لون الشفق عند المغارب
شارب لامن يترتح ..
..

Quote: بنات الثانوي (خلطة سودانية و خواجيات مستعمرات) غايتو المولد دا فاتنا كان الخلط إستريو مرة توب و مرة سادة

يا سلام ياخ ،
بالله شوف شلال الأدب والجمال الزي قوس قزح دا،
تقول لي Niagara Falls !!
عرفت ليه ناس عتيق كتبوا أيام صفانا قبل أن نلج عصر القدو قدو؟
عرفت ليه ناس أبوصلاح قالوا:

الضـمـيـر الرنـع تهـادى نـظرْتو بـي عينـي زاد سهادا
يانجـم سائــلك الشـهادة كفاي عذاب روحـي طال جهادا
ليك لحاظ مـاسكة في القيادة ولـي جروح مـاشّة في ازديادا
أرجـوك ياصـاحب السـيادة قلـيل مـراهـم مـن العـيادة

أجزخانة أبونخلة ياخ ..

قال أسترازينيكا ومايو كلينيك قال ..

Quote: اتلمت اللغة علي اللذين يؤثرونها علي انفسهم وبهم خصاصة بالجد!!

Quote: زيارة فريق سانتوس البرازيلي للسودان في أواخر الستينات في أول زيارة للنجم العالمي بيليه للقارة

فكَّت يا كوستاوي،
دا الخرف المبكر early senility وكدا..
كلامك دا لو قراهو سعادة اللواء عمر علي حسن بيفصلك من المنبر،
سانتوس جاء إلى الخرطوم في 1972 وليس أواخر الستينيات كما ورد خطأ في معظم المواقع..
الصوره أدناه لرئيس الهلال وقتها الراحل أحمد عبدالرحمن الشيخ مع الجوهرة السوداء Pele
شوف وجاهة رئيس نادي الهلال وقتها ، هسه لو جاءنا بيليه ياخد لكمه زي الترتيب أصلو
رؤساء الزمن دا خطيرين في اللكم بس مشكلتهم نكَّارين وبيزوغوا لأقرب مستشفى ،
قال alibai قال..




يا (أبوحسين) ،

الأحداث الجبتها في البوست دا معظمها جرى في طفولتي الباكره وشرخ الصبا (إيه رأيك في "شرخ" دي بالله)
وبالطبع بعضها جرى قبل أن أولد ، والكلام دا عشان ما تِطَمَّن وترقد قفا ، لكن بكل صدق مباراة سانتوس
شاهدتها مع الوالد في استاد الهلال وأنا أغادر محطة الطفولة البريئة إلى بدايات الريده ..
البريئه برضو.. .

Quote: بالطبع لن أكون ضنين الوعد .. ولابد أن أعتذر.. وأعتذر بشدة

يا أمين ياخ مسألة (لو تصدق) و (إني أعتذر) و (ضنين الوعد) لم تكن سوى مزحة
لا أكثر ، يا العزيز هي البلد كلها زُيِّفت دعك عن إسم زوجة سفير فمافي سبب لاعتذارك يا أمير.
هسه بالله ممكن تصدق دي صورة لشارع في الخرطوم في ستينيات القرن المنصرم؟
زمان الشوارع بيغسلوها بالليل ، هسه اليغسلوا بيهو الوش الصباح مافي..
الواحد زاتو ما عارف يودي وشو وين..
المويه - كان اتلقت - تكون عايزه ليها مويه يغسلوها بيها..
رمضان الباقي ليهو شهر دا ما حاتفرز الحلومر من القمردين من الجردقه..
إلا إذا كان إفطارك مع الوجوه المتوضئة..
أو عندك فلتر في البلعوم..




.

Quote: في البي بي سي فقد كانت تتسلطن في لقاءاتها كثيرا حتى يظهر ذلك في صوتها وكلماتها

Quote: مديحة رشيد المدفعى هدى رشيد المدفعى ماجد سرحان السودانى اسمه راح منى (أيوب صديق) ومقدم برنامج قول على قول أيوب صديق

المهندس أيوب صديق يا شمس كان له أسلوبه الخاص به ولا أدري
كيف أصفه لكنه كان محط إعجاب مستمعي البي بي سي العربية من كافة الناطقين
بها حيث كنا نداوم على الإستماع لرسائل المستمعين.
بالطبع سبقه إلى هناك الضخم الطيب صالح ..

كان كل شئ يسير كما ينبغي ، كنا نعلِّم الغير من حولنا كيف
تكون المؤسسية. في الخليج ما زال كبارهم يقولون لنا أن
السودانيين لهم فضل في تأسيس الكثير من المؤسسات والإداره
والتعليم والصحه والإسكان والبلديات والعسكريه ودواوين
الحكومة ومساعدة دول عدة في تأسيس شركات الطيران ، نعم
سودانير بدأت في 1947 وكانت رائده في مجالها ومحيطها دون
حوادث حتى تسعينيات القرن المنصرم.. وهنا تحيه خاصة لعزيزنا
الفاتح جبرا وخط هيثرو وكدا..

أهديك صورة وجدتها في النت لشارع الجمهورية في الستينيات،
زمن خذيني باليمين وانا راقد شمال ، الحركه كانت يسار والغريبه
أهل اليسار وصلوا السلطه وقلبوها يمين..
حاليا لا جمهوريه لا شارع لا يسار لايمين لا حق لا باطل..

الصوره - كما ترى - في عز الضُهُر ، حاليا الشارع دا لازم تكتب وصيتك
قبل أن تدخله في عز الضهر.. أما في الليل .. يكفي إنو كان في
قماش لفساتين البنات يتلاصف بعدة ألوان يسمى (الخرطوم بالليل).




قلت ليك عين شديده .. ليزر بس.
.

Quote: آخر زمن نميري الناس صباحاً بتكون في صف البنزين الآن الناس صباحاً بتكون شايلة الجرادل في صف المويه أها بالله مُش إطورنا ....؟؟؟؟

شوف يا ABUHUSSEIN إنت بتاع سياسه وأنا زول مسكين بمشي بضل المنبر ولا أفقه في ساس
يسوس فلا تنحرف بالبوست ، هسه يقبلوا علينا ناس لوك وهوبز وما نعرف نقبل وين..

بالله يوم مباراة سانتوس إنت في الإبتدائي زي ناس كوستا؟ الله يطمنك،
د. محمد حسن في المباراه ديك كان رجل خط ..

Quote: كانت فطين، ولازالت، من مصادر المرح الساخر في حياتنا الدراسية؛ لها التحية وهي في زيارة ابنتها واحفادها بالمملكة العربية السعودية حفظهم الله.

Quote: أتمنى ان يعود الثوار الى توعية الشارع وتحريكه بواسطة وسائلنا المعروفة والمجربة وهي المنشورات

يا أحمد ، في زمن التويتر والآيباد والإسكايب والفايبر تاني داير ترجعنا لي دي:




ياخ الإنتفاضات المجاورة جميعها تخطت وسيلة المنشورات ونجحت وأنا موقن أن الحاله
الفينا دي ما دايرا ليها كتابه كما جاء بنكتة البعثي القبضوهو ناس الأمن في المحطه
الوسطى بيوزع في ورق A4 أبيض فاضي .

لكن بيني وبينك المنشورات ليها طعم ورائحة، زي الملاح المطبوخ على الفحم وزي منديل فلانه
المعطر و جواب المحبوبه الكاتباهو بالخط الشين داك الكنا بنشوفو أحلى من عسل النحل ..
قاتل الله الإيميل والميكرويف ..
والتيشوز..