Quote: الليلة اول يوم اشوف البوست ده فاذا بالاعمى شايل المكسر و اتاريكم حاتلين بي هنا لكن ليكم حق الجمال دا زول بيلوم فيه مافي
شكرا يا نازك، البوست ده ما فيهو أعمى لكن مسألة التِكِسِّر دي إختلفو فيها العلماء، الناس الهنا ديل إجتمعوا على الجمال طبيعة وبشر وفنون والسماحه يا نازك ،كما قال شوقي في يا نائح الطلح، زي المصيبة بتجمع المصابين. على أية حال نحمد لك أنك لم تلومينا في الإحتفاء بصنع المولى القدير الخالق البديع،
09-25-2010, 11:34 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
يا موج ، صدقني لم أستوعب كلام ودالرضي إلا في مداخلتك هذه يعني إفادتك عن الطول والعرض دي لم يسبقك عليها أحد ، بالله قال ليهم رأسيا وأفقيا؟ ودالرضي يا صديق كان يتلقى وصفا من الفضاء وهذا واضح في مجمل أشعاره مثله مثل أهل وادي عبقر وربما تخطاهم قليلا في جمال الوصف المتفرد المجنون القال:
Quote: بوست سمح والله والصور الفيهو تلوع الـch ــبد ولا ازيد
اما الترنيمة المصاحبة للصفحة دي، فهي لاشك ملائكية والحصين البنفرن فيها ديل ذاتم من نسل البراق دحين انا مغرود فيها بالحيل، رسلها لي ينوبك ثواب. قد اربطها في رقبة بعير العطفة او اعلقها طوال موسم الخريف في قمة اطول شدرة وعشمي فيها تنزل المطر وتنضرالزرع وتزيد الضرع وتحل نزاعات البدو على اراضي الزراعة المطرية
أبوحريره، والله الـــ ch ــــبد دي إبداع أكتر من الغنيه زاتا، ياخ أرسل لي عنوان بريدك الإلكتروني ودع الباقي لي، يجيك الغناء السمح في مكانك وبعد داك أربطو في جيد الجياد والأحصنة لكن كلامك عن الزرع والضرع خوَّفني يا ود يوسف، إت يا زول بي صِحّك؟
09-26-2010, 10:01 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: المُحيّر جداً هي الموسيقي بتاعتم يا ود المرتضى
أها دي يا مولاي الصادق الحاجه المحيراني فيهم، لا أعرف شيئا في علم الموسيقى وما لاقي زول يقعِّد لي الموضوع ده ويوريني الناس ديل بنريد غناهم ليه، المسألة ما آلات وألحان أو إيقاع لأنو (الرميه) زاتا بنحبها ، هسه شوف رمية الشاب Tewodros (تيدي آفرو)المرافقة لهذه الصفحة تجدها رغم عدم إلمامي بلغتها ومعانيها أجدهـا مريحة لمسامعي حتى لو سحب منها نقرات الطنبور المرافقه. شوف لما واحد من المجانين العندهم يعزف ساكسفون ، يمحِّنك ويجرَِدك من كل حواسك الأخرى عدا السمع، ومرات السمع زاتو بروح ، تخدير كامل.
09-27-2010, 01:03 AM
صديق الموج
صديق الموج
تاريخ التسجيل: 03-17-2004
مجموع المشاركات: 19433
Quote: الصورة دى من ما نزلت بوستر دعاية للسياحة فى وكالات الطيران . الواحد قال لابد ان يزور ارض الجمال وقد كان ..
أذكر أن الصورة التي عناها (تبلدينا) كانت تُعلّق على حوائط مكاتب السفر والسياحة وغرف طلاب الجامعات في ثمانينيات القرن المنصرم وكان وكلاء الخطوط الإثيوبية يحرصون على إبراز جماليات إثيوبيا لأمثال تبلدينا وكل عاشق للجمال.
تَقَبَّل الله
09-27-2010, 09:18 PM
علاء الدين صالح
علاء الدين صالح
تاريخ التسجيل: 08-11-2009
مجموع المشاركات: 1760
الصورة دي نحنا قُمنا لقيناها مبَرْوَزة في صالون بيتنا من ما تبّينا.. لم تفارق هذه الصورة مخيلتنا أبداً من السبعينات.. فكيف لا أعشق جمالك؟ ما رأت عيناي مثالك.. كان كل ما يجينا ضيف يعلِّق على الصورة.. تعرفوا أجمل حاجة مُلفِتة في الأُنثى الفي الصورة دي شنو.. ودة كان دايماً سؤالي لأي زول بيشوفها عندنا.. (أنفها).. ياخي دي لمَّن الواحد يجي يوصِّف تفاصيل وشَّها.. ما ممكن يقول جزافاً نخرة وشلاليف وجضوم.. في الحالة دي لا بُدَّ أن نسمي الأشياء بمسمياتها
وعشان كدة أنا حبّيتا
09-30-2010, 08:31 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
شكرا يا موج على التصحيح ، بس التوب شبك في التنه دي كنت محتاج ليها في بوست (المعلومه بنت الميداح) وأساطير موريتانيا السمحه (ناس محمد ولد بكاي)، الله يجازي الهكر ويجازي الكان السبب ، لكنني ما زلت عند رأيي بأننا عملاء للقرن الأفريقي وموريتانيا ومنطقة العيون دون أن نحيد عن خط الطوارق والأمازيغ ، وما يصلح هنا يصلح هناك. شايف الطيب قال:
هارد الكبده والقلب مستعد لي سلخو
ظبي النتيله
09-28-2010, 01:46 PM
jini
jini
تاريخ التسجيل: 02-05-2002
مجموع المشاركات: 30720
Quote: يا مرتضى ان شاء الله البوست دا نقلتوا للربع الجديد
ظاهر انو الناس دي ما شبعت من الجمال دا
أنا ما بنقل يا دكتور، البنقل بكري ، أنا بس أقدم طلب وبكري يقرر وقصة النقل دي فِتِرت منها جد ، ياخ نحن بننقل ونتنقل منذ نعومة أظفارنا ويفاعة خواطرنا، بعدين - زي ما قلت - الجمال دا مافي زول بيشبع منو ، شوف ودالرضي الأسطوري فات المية سنه ولم يرو ظمأ الجمال ، الناس البيعرفو السماحه مشكلتم سمحه وكبيره يا قرشي.
Quote: محمد يا اخوى والله البنيات يكتلن الزول مش ينسنو اها دى نقصتها بيت القصيد كمان..
أها ،الحمدلله اللحقتني قبل بدرالدين شنا ، كان فتح ضدي بلاغ، لأنو عندو زار في (أحرموني) ومابرح يدعو العباد ويُذكِّرهم بسنة الإسلام السلام. البنيّات ياريتن لو بكتلن يا موج كان الرُهاف إرتاحوا ، بس ديل كلما نضجت جلود العاشقين كأنهم يبدلونهم غيرها ومن ثم لايملك صرعى الجمال سوى الترديد مع أحمد المصطفى (يا ناري قيدي).. ليزر و ستالين وحرايق والدفاع المدني نايم... أها يا موج واو (طاوعنو ) و (عصنو) من الراحل الشامخ بادي الذي كان يقوقي لكنه حين يصل إلى (الردف بالحشا رقّصنو) لايملك إلا الصياح المشابه ل (الترجمة) عند الصوفية.
طاوعنو وصدَّن عصنو شال جديهن ما خلَّصنو شوف جريهن كيف باقصنو خطوه خطوه المشي نقَّصنو والردف بالحشا رقَّصنو يلا ياقُنَّاص روقو صِنُّو والتلذذ في الارتياح - عبدالله العشوق -
10-02-2010, 09:53 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
أستاذنا الفاروق، سلام الله عليك، يسعدني أن (أراك) بعد الغياب الطال واستمر كما أسعدتني كلماتك، يا سيدي الكريم في المنبر أقلام تسعد الروح المُعَنى أتمنى مجرد أن أكون قريبا منها لكن ، ككل البشر، أفرحني الإطراء وليتنا نكون بالفعل جميلين هنا أو نغادر. مودتي يا أبا ناصر.
10-04-2010, 12:14 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
ليه يا طارق تدعو لهم بالشفاء من علتهم العليلة؟ صدقني ، أجمل ما في الناس هو استجابتهم للجمال أيا كان والتعامل معه، الناس الرشّوا البطانه ، ود الموج وصحبه الميامين كما تفضلت ، ديل حباهم المولى بشبكة أحاسيس نظيفة وسليمه ، يطربوا للغناء الباذخ والموسيقى المُسكِرة والشِعر الماطر والقيافه الخمج ، زي ديل يا طارق بكونوا برضو كرماء وشجعان وذوي شهامة ومروءة ، مرهفين وبكايين مش (تُجُم) وكأنهم وتماثيل مدام توسو أولاد خالات. الله لاشفاهم.
قول آمين
تنبيه أخير: القصه ما مجوهرات وبيوت أزياء عالميه وزي ما قال عبدالرحمن الريح:
ما شوهوك بفصادة على الخدود السادة طبيعى خلقة ربك ما داير زيادة مع لونك الاسمر ورد الخدود مُحمَر لا بودرة لا أحمر آيات محاسنك زى ماء الحياة أو ألوان محاسنك زى ما هي ياها
10-04-2010, 02:37 PM
saadeldin abdelrahman
saadeldin abdelrahman
تاريخ التسجيل: 09-03-2004
مجموع المشاركات: 8857
الغريبة كل مرة اجي متلصص القى لي شبيهة لإحداهن حتى أخالها هي.. صاحبة إحدى الصور "المتشابهات" إكتفت بالضحك و السؤال: عليك الله بتشبهني للدرجة دي؟ يبدو أن تيارات الجمال هنا حمولتها عالية و تسبب بعض أعطال الحواس.. ده كان ربنا شافك من الشلل! ..نيل و برد أو ليل و عاشقة.. كلو صاعق و برقد غرب!
10-05-2010, 11:33 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: الغريبة كل مرة اجي متلصص القى لي شبيهة لإحداهن حتى أخالها هي.. صاحبة إحدى الصور "المتشابهات" إكتفت بالضحك و السؤال: عليك الله بتشبهني للدرجة دي؟
يهمني ردك يا سعد، قلت ليها شنو؟
- يا العزيز هناك حقيقة لا مراء فيها وهي أن السودانيات ، بشكل عام، يشبهن الإثيوبيات إلى حد بعيد والعكس صحيح ولو عدت للتاريخ ستجد أن مليكهم النجاشي حكم مملكة إكسوم بلد أسياسي أفورقي وقيل أنها ضمت جزءا من السودان الحالي ، وتعلم كثافة التداخل بين بلدينا عبر التاريخ منذ جعفر بن أبي طالب الذي هاجر ومعه بعض المسلمين إلى إكسوم بناءا على توجيهات عليا وقدموا طلب لجوء سياسي وأرسلت قريشا عمرو بن العاص وبمعيته تجريدة كيما يحولوا دون جعفر ومبتغاه وكانت القصة المعروفة حين قرأ جعفر على النجاشي سورة مريم حتى بكى النجاشي. المهم في الموضوع يا سعد إنو الناس ديل أهلنا من زمن بس إنت "المتشابهات" عندك كتار ، وقوائمك طويله وإيدك لاحقه وأنا ملاحظ كلما أنزِّل صوره إنت تعمل مداخلة وتقوم تعدِّلا فعرفت أنك تشابهت عليك الدرر، خطير يا سعد. كنت قايلك مسكين زيّنا تمشي بضل الحيطه.
تنبيه :تاني يا سعد كان زولتك قالت ليك دي بتشبهني قول ليها عاد إنتي البِشبَهِك منو
10-05-2010, 12:02 PM
ندى عثمان حسن
ندى عثمان حسن
تاريخ التسجيل: 11-20-2009
مجموع المشاركات: 875
Quote: تنبيه :تاني يا سعد كان زولتك قالت ليك دي بتشبهني قول ليها عاد إنتي البِشبَهِك منو
لووووووول@ سعد
برجع بروقة وبوصف ليكم الناس ديل وجيرتهم ......
أوتضحكين علي يا ندى و أنا أتلقى السحر من كبيرنا لئن لم تعودي على وجه السرعة لتلفت أكبادنا - التالفة من يوما- في ورد مولانا الكائن هذا (تلفا على تلف) و عركينا الصادح : ما بتشبه القمر البتاوق من سما لا بتشبه البحر الخدار وجمالها ماحاق فى غنا مشيها زى قدل البشاير بى مهل وحديسها زي همس النسايم للنخل ايدينها صابغن الورد وسلامها زي روق الجداول فى الارض
هاشم صديق
10-05-2010, 04:20 PM
Abdlaziz Eisa
Abdlaziz Eisa
تاريخ التسجيل: 02-03-2007
مجموع المشاركات: 22291
Quote: : العزيز هناك حقيقة لا مراء فيها وهي أن السودانيات ، بشكل عام، يشبهن الإثيوبيات إلى حد بعيد والعكس صحيح
بس خلااااااااس , إياك أعنى ياجارة
أهلا بالندى، (بس خلاااااااس) دي يعني شنو ؟ أنا قلت (بشكل عام ) يعني بشكل عام، بس بناتنا ، والحمدلله على كل حال، بيفهمونا كويس عشان كدا بنشوفم سمحات مش قيافه بس، هسه أنا نصيحتي الفوق لسعدالدين ما قايل في واحده بتقراها لأنو ده كلام لرجال، طيب، شوف يا سعد، البت اول ما تلاقيها قول ليها : أنا مشبِّهِك ، بعد اللقاء التالت قول ليها : بتشبهي لي (فلانه)* ولما تخطبا قول ليها شبهك عدم، بعد العرس قول ليها : إنتي تشبهي رُوحِك.
أوكي؟
- * (فلانه) دي لازم تكون صاروخ Stinger
10-05-2010, 09:56 PM
jini
jini
تاريخ التسجيل: 02-05-2002
مجموع المشاركات: 30720
Quote: انا مـتأكد مافى واحد فيكم شاف الفيديو دا! الزول دا شغال شنو!
صدقني يا جني الفيديو شفتو بمجرد ما أتيحت الفرصه وكنت عايز أقول ليك الزول ده أنا ما متأكد شغال شنو لكن يبدو إنو كان حارس مرمى واعتزل وتم تكريمو ، لكن من ناحية أخرى فكرت في إنو الزول ده رايحه ليهو (بُقَجه) وحاولت أربط بينها وبين (الشنطه) الحايم بيها دي وتوقعت إنو حاينتهي بشيل (قُفَّه).
10-05-2010, 09:58 PM
صديق الموج
صديق الموج
تاريخ التسجيل: 03-17-2004
مجموع المشاركات: 19433
سال محدثى : كم فرده يعنى الشاعر قلت : اثنين قال :كذبت قلت: كم غير الفردتين التى يعرف الجيع قال: بل ثلاثه قلت : كيف قال: الفرده اللابساها بعيده من جسمها ما بتحسبها لله در اهل سارة،،،
10-06-2010, 10:30 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: شوف يا سعد، البت اول ما تلاقيها قول ليها : أنا مشبِّهِك ، بعد اللقاء التالت قول ليها : بتشبهي لي (فلانه)* ولما تخطبا قول ليها شبهك عدم، بعد العرس قول ليها : إنتي تشبهي رُوحِك.
أوكي؟
- * (فلانه) دي لازم تكون صاروخ Stinger
لقيتك أبو المساكين لكن :) سمعا و طاعة و حبا و كرامة
10-07-2010, 08:28 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
Quote: أهلا بالندى، (بس خلاااااااس) دي يعني شنو ؟ أنا قلت (بشكل عام ) يعني بشكل عام، بس بناتنا ، والحمدلله على كل حال، بيفهمونا
يامولانا , بـ بس خلاس دى , انا أخدت كل القيافة الفى البوست واديتا السودانيات.
Quote: هسه أنا نصيحتي الفوق لسعدالدين ما قايل في واحده بتقراها لأنو ده كلام لرجال،
حسة انا اسوى شنو يعنى؟ :-)
Quote: طيب، شوف يا سعد، البت اول ما تلاقيها قول ليها : أنا مشبِّهِك ، بعد اللقاء التالت قول ليها : بتشبهي لي (فلانه)* ولما تخطبا قول ليها شبهك عدم، بعد العرس قول ليها : إنتي تشبهي رُوحِك.
أوكي؟
بالطريقة دى سعد حجرو ح يغتس.
10-06-2010, 11:28 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
يا العزيز، في بوست أخطر المخلوقات قلت لك أن الخطورة ليست قصرا على الشريرين والدبايب والعقارب والهبايب ، فهناك مخلوقات مدمره و ( بنظرة بتذوِّب حجر). ناس عيونم (نيرانا ما بترحم) وأخرى قالوا عليها مدافع السواحل وحلف بيها عثمان حسين وقال وحياة عيون الصيد، عيون يا عبدالعزيز ، أجارك الله ، الكوبرا والأباتشي بالنسبه ليهم حمام سلام.
غايتو ربنا يحفظ عباده.
10-06-2010, 05:19 AM
ندى عثمان حسن
ندى عثمان حسن
تاريخ التسجيل: 11-20-2009
مجموع المشاركات: 875
أغرب شيئ يا ندى.. كنا بنحب في الطفولة و كان إسمها على إسمك والله و كان بحبها معاي كل شفع الحلة و زملاءنا في الخلوة ( بنحب في الخلوة مش شفع؟ ) و حين تجاسرت ذات مرة و طلبت دفترها زاعما أن الدرس قد فاتني و كانت محاولة جريئة بغرض دس خطاب.. استجداني زملائي ليدسوا خطاباتهم معي فرفضت بشدة لأنه ده دفتر الحبيبة و ليس صندوق اقتراع! و لا زلت اذكر جلستي في الصالون و أنا أصيغ عرضحالي حتى تكوم الDraft و كنت بكتب ليه بي دمي الرسائل كنت شاعر فيه بتعذب ضميري كل كلمة حنان يفيض يغمر سطوري كل حرف كتبتو من أعماق شعوري إفتكرته يرد يطمني بخطابو غفر الله لكم أبا داؤود و برعي و وسعتكم رحمته و يبدو أن أحد الDraft قد وقع في أيدي الطابور الخامس بالبيت فكانوا إذا أرادوني أن (أحرد) رددوا : و الندى السائل على وجنتيها رطب الخد و الجبين و حلا ..فتحرم علي النعمة في التو و اللحظة بفعل أخوان مردة و ملوك مكايدة يحلو لهم إشعال الجذوة أينما بدت لهم سانحة و كيفما شاؤوا.. دحين يا الندى أنا مشبه عليك.. يضحك نهاركم
10-06-2010, 00:12 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
أها يا سعد، زي ما قال عماد وقالت ندى، هسه أنا أسوي شنو؟
صَدَق هاشم، وصدق أبوداؤود حين يغني (حليل الفاهو ما هرّاج) هدوء التعابير ولين العباره في أدب مستدام، في ناس سلامم يعيد الطمأنينة والسكينة للمجموعة الشمسية، وفي ناس سلامم ، حتى كان عملوا ليهو وزارة ، يكفي لتوتير الجنس البشري بلا استثناء. ناس قُراب سمحين زي معرض كتاب،
طول يا ليل على الباســـل على هضـــــــــــــليما متماثل
10-06-2010, 04:20 PM
صديق الموج
صديق الموج
تاريخ التسجيل: 03-17-2004
مجموع المشاركات: 19433
المتشابهة الأولى ديك يا مولانا كانت زميلة قديمة و هسه بي وليدا :) أما دي:
فقطع شك هي ممرضة في مدينة بريسبين قدر ما حاولت أجيب الsource حق الصورة ما لميت فيهو لكن كان لاقيتها بالدرب الا أوريها البوست ده لأنه ما ممكن يكون شبه قدر ده أصلو!
10-07-2010, 04:39 PM
Abdlaziz Eisa
Abdlaziz Eisa
تاريخ التسجيل: 02-03-2007
مجموع المشاركات: 22291
Quote: يا العزيز، في بوست أخطر المخلوقات قلت لك أن الخطورة ليست قصرا على الشريرين والدبايب والعقارب والهبايب ، فهناك مخلوقات مدمره و ( بنظرة بتذوِّب حجر). ناس عيونم (نيرانا ما بترحم) وأخرى قالوا عليها مدافع السواحل وحلف بيها عثمان حسين وقال وحياة عيون الصيد، عيون يا عبدالعزيز ، أجارك الله ، الكوبرا والأباتشي بالنسبه ليهم حمام سلام.
غايتو ربنا يحفظ عباده.
عزيزي ود المرتضى
سلامات
مريت ورديت على كلامك الجميل وخطير...
كنت لازم أمشي للدبايب اولا وأجي هنا للتحلية..
تحياتي
10-10-2010, 10:35 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
عليك النبي يا موج اعتر ليك أنا و لا إنت البتكفينا علي وشنا بعدين رقيتني أصعب مرتقى و أنت تجمعني بمولانا و د.القرشي ياخي ديل ناس اللحن و الدنا ثم
---------- ندى دي مالها عملت غمرانة ياخي أنا بهزر ساي أبقي مارقة. ---------------
مولانا إن شاء الله المشاكل الفنية إنتهت اليوم داك حسيت بأني غريب هناك هههه شعرت بمداخلاتي كأنها صنوبر أو كأني السامري الذي غوى الغريبة لقيت ملاسي عامل مداخلة بعدي عادي و بدون أي شخشخة
محبتي
10-19-2010, 10:46 AM
Tabaldina
Tabaldina
تاريخ التسجيل: 02-12-2002
مجموع المشاركات: 11844
تاالله يا تبلدينا ما ناوي تجيبا البر خالص! لكن ممرضتنا دي بيننا ساعة و نصف بالعربية (كنت عايز اكتب سواقة لكن خفت المسلطين و القراءة بالإضنين و الحاجات التانية) ياخي ما عذبتكم ولا حاجة! هسه البتسوي فيهو إنت ده تسرية؟؟ ما ياهو عذبني و تفنن! عذبننا بنات حواء في الهضبة و مليكها الذي لا يظلم عنده أحد ديل الأولى ديك شبهتها على زميلة سودانية و حسب إجابتها المتسائلة فمعناها يخلق من الشبه أربعين بس مرات بكون وااااحد بس! ساعة و نصف و لحظة حظ أو سمها سعد لو لميت فيها إلا أتصور معاها و أجيبا ليكم هنا و كمان لو قالت لي دي ما أنا و أبت ! بحنسها عشان الموج يقارن و يحكم فيا أخينا رفقا بالريايل
----- أين ذهب كبيرنا؟؟
10-19-2010, 10:19 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
بالله ناس الموج و ود جبرين ديل أعملوا ليهم مغادرة بدون أي حاجة زاتو ما ملتزمين باللوائح و لا بدفعوا إشتراكات و مساهماتهم في رقبتا متأخرة و بستعملوا أسلحة محظورة!
10-21-2010, 00:35 AM
صديق الموج
صديق الموج
تاريخ التسجيل: 03-17-2004
مجموع المشاركات: 19433
Quote: بالله ناس الموج و ود جبرين ديل أعملوا ليهم مغادرة بدون أي حاجة زاتو ما ملتزمين باللوائح و لا بدفعوا إشتراكات و مساهماتهم في رقبتا متأخرة و بستعملوا أسلحة محظورة!
سعد الدين حبابك
طيب مولانا زاتو بستعمل منشطات الفيفا ما وقفتو ليه؟؟؟ لكن بصراحه طارق بستحق التوقيف لانو حا يوقف ليه يوم قلب زول بجمكسين،،،
10-21-2010, 08:27 AM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
يا سعد ، لاوجه للمقارنة بين ودجبرين والموج، فالأخير ، حفظه الله ورعاه، كسر ليهو بنك وأمبارح سدد متأخراتو جت، وودجبرين اتضح إنو عندو فروع، وبرضو مقبوله مِنُّو ، الكلام في البتفرجو كيري ساي ديل، ناس تتاوق وما عايزه تدفع ال VAT وتتهرب من الضرائب. عفيت منكن يا مفتشات الضرائب..
نجوم تتأمل في كواكب انتثرت وكواكب اندثرت
10-21-2010, 07:01 AM
Tabaldina
Tabaldina
تاريخ التسجيل: 02-12-2002
مجموع المشاركات: 11844
يا أخوانا ما كلمتونا نعمل ساتر الشئ بقت ذخيرتو حية! يا موج و ودجبرين تقعدوا تتباصوا فينا كدا لمن تجيبوا ضقلا يلولح يا ناس إشتراكاتكم وصلت تب و مقدم سنة كمان الشهادة و العمل الطيب!
10-22-2010, 07:33 PM
محمد المرتضى حامد
محمد المرتضى حامد
تاريخ التسجيل: 08-14-2006
مجموع المشاركات: 10832
المشاط القديم الجديد ربما يتفق معي كثير من (أهل العلم) أن المشاط بز تخريجات الكوافير ، أحمد القرشي ، دحين إنت البوست بتاعك كان عن المشاط ولا عن الشلوخ؟ على أية حال لم أر فناً بهذا المستوى سوى عند أهلنا الأثيوبيين وبعض أمهاتنا وحبوباتنا وثلة من الفنانات المعاصرات، و(فنانات ) أقصد بها ال (فنانات) الفنانات.
ونتائج مشابهة لذلك الإبداع ، مع مضادات أرضية
(الزول المبوبح جيدو مو متـــــــــــــــاني كسّر ضلعي يا خلاني ديسو عمــــــــــاني دي المشاطة ماخدة أسبوع في التحتاني جود يا الخالقو لسا ما انبدا الفوقـــــاني)
10-22-2010, 08:49 PM
صديق الموج
صديق الموج
تاريخ التسجيل: 03-17-2004
مجموع المشاركات: 19433
Quote: (الزول المبوبح جيدو مو متـــــــــــــــاني كسّر ضلعي يا خلاني ديسو عمــــــــــاني دي المشاطة ماخدة أسبوع في التحتاني جود يا الخالقو لسا ما انبدا الفوقـــــاني)
عمك ود الرضى قال ليها:
ديسك اللى المشاطة قلق يسترك لو كــــان مكلق قلـــــبى فى ريـدك مغلق مالى والخــــط المعلق
يا موج، شوف المضيفات الجويات اللائي يوفرن الرعاية والعناية بين طيات السحاب، عليك الله شوف البنات اليجبرن الخاطر ديل ،
- تشرب شنو يا موج؟ -عيناك لي سُقيا، - أجيب ليك بطانيه يا صديق؟ - الليل الليل ما بنومو لأني أنا حارس نجومو - أخفِّض ليك الإضاءة؟ - هل يخفى القمر .. - متأكد؟ - جذاب حسنه رايع لادن خلقه مايع رقص البان مشيه تحب تنظر وشيه عيونك تختشيه من قوة ضياهو ومن شدة حياهو - طيب ، أسبرين يا موج أو أي أنالجيسك؟ - يالمنظرك للعين يطيب تبدل الظلمات بنور وتبدل الأحزان سرور إن شافك المرضان يطيب
مُش قاعدين يجيبوا ملايكه بأجنحه في السحاب؟ ما ياهم ديل ، إنت قايل شنو؟ هسه شوف عميد كلية الطيران البين الزهور متصور ده مش أمه داعيه ليهو؟ بالله مش كان تكون انت العميد؟ دي دفعة أبريل 2010 يا صديق ، يلا أمشي أحجز، أقصد رحله ، مش (رحله).
هسه دي كُليّه ولّ خميله
والروضة في موقع خصيب حضنوها وإتلافوا النهور ترى فيها أنواع الزهور من كل لون أخدت نصيب
10-22-2010, 09:50 PM
صديق الموج
صديق الموج
تاريخ التسجيل: 03-17-2004
مجموع المشاركات: 19433
Quote: مُش قاعدين يجيبوا ملايكه بأجنحه في السحاب؟ ما ياهم ديل ، إنت قايل شنو؟ هسه شوف عميد كلية الطيران البين الزهور متصور ده مش أمه داعيه ليهو؟ بالله مش كان تكون انت العميد؟ دي دفعة أبريل 2010 يا صديق ، يلا أمشي أحجز، أقصد رحله ، مش (رحله).
هسه دي كُليّه ولّ خميله
مولانا على بالطلاق ووحاتك وما طالبنى حليفه البايظ يفتح انى امنت بالطيران،،،
10-22-2010, 10:10 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
رق وسطك خاتم ما بزنده ...... وصديرك قايد والديس جنده كفيلك قلع من عـنــــــــده .......وأكتافك فوقه يا روحي بستنده
ولا دي
حكمه خصرك مائع ولزام ..... حتى فردة عاجك بتلبسه حزام كيف ضهيرك يجبر ما دام ..... لان ورق واشرف على الإعدام في الدروع متقصص وهدام .... والكفيل الواقف لي رفعه خدام
ولا نقول..
يا صدير المهره الكحيلـــه ..... بى غرامك غنى الحمام ما الضمير ابوخصرات نحيله .... في حذوذه يجول الذمام
والله البشبه المريخ ايام بشرى وبشاري لو حكيت ليك قصتو ما بتصدقها اصلا
التقيا انا ودكتور احمد القرشي في بيت محمد المرتضى ومرتضى عرض علينا نفس صورة ام ضمير دي وقال عايز ينزلها في البوست -انا اعترضت عليهو وقلت ليهو انت ابعد منها يا مرتضى وخليني انا المارق للرباء والتلاف انزلها - تخيل يا استاذ صديق لما مرتضى عمل ريفرش لموقع سودانيز لقاك انت نزلت نفس الصورة !!!!!!!!!!!!
سبحان الله
10-22-2010, 10:47 PM
saadeldin abdelrahman
saadeldin abdelrahman
تاريخ التسجيل: 09-03-2004
مجموع المشاركات: 8857
والله البشبه المريخ ايام بشرى وبشاري لو حكيت ليك قصتو ما بتصدقها اصلا
التقيا انا ودكتور احمد القرشي في بيت محمد المرتضى ومرتضى عرض علينا نفس صورة ام ضمير دي وقال عايز ينزلها في البوست -انا اعترضت عليهو وقلت ليهو انت ابعد منها يا مرتضى وخليني انا المارق للرباء والتلاف انزلها - تخيل يا استاذ صديق لما مرتضى عمل ريفرش لموقع سودانيز لقاك انت نزلت نفس الصورة !!!!!!!!!!!!
ود شيقوق صاحبى الضو ...سلام
زمان كانوا بقولوا القلوب شواهد هسه بقن الضمائر برضو شواهد...
سمعنا بوقع الحافر على الحافر لكن وقع الضمير على الضمير دى جديده..
نحن الله يدينا العافيه وهو اعلم بالضمائر،،،
10-22-2010, 11:18 PM
DKEEN
DKEEN
تاريخ التسجيل: 11-30-2002
مجموع المشاركات: 6772
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة