ليس دفاعا عن الفنان خالد الكودي

Quote: أووووووووو السير بشاشا، وينك يا فردة؟ والله يا بشاشا إنت ماكل ليك حاجة.... أصلك ماك براك. أها آللغيلف الإنسان المجرّي دا ما فكيتك بيهو من زنقة عدوك الكان خاتيك فيها حاج دكين. ولامن تقوم الساعة ما بتنظّر أحسن منو كحل سلمي للهُويّة. هسّع ما بتخجل راجل كبيير كدا وعايش في أمريكا أم الحضارة تقول الحديث عن الموسيقى ترف!؟ ياخي في نظريات قالت الوجود دل كلو قيم بتاع موسيقى، ما سمعت بـ: Superstring theory نظرية الأوتار الفائقة؟؟ كدي أمشي فتّشها شوفها بتقول في شنو؟ بعدين قلت لي مافي حاجة اسمها "صدفة؟" ودي برضها قوانين رياضية ونظريات طويلة عريضة في الرياضيات والفيزياء حول نشأة الوجود. ملاحظ إنّك إنت بتغالط (الوجود ذاتو) و(المعرفة ذاتها) و(العلوم التطبيقية في تولاها) أها البحميك تغالطني أنا المجرّي الله والرسول دا شنو؟ عارف يا بشاشا؟ زمان كنت مفتكرك شخص "صادق!" وشويّة شويّة ألاحظ فيك وأنت تهاجم من طرف وتدفس الناس دفساً وبالقوة في (حظيرة الجلابة)! هسّع لو خريت عديل بتقدر تجيب لي سطر ني، وألا فيهو ذرّة تجلبن، أتحدّاك، ياخي أنا رأسي دا صاحي لأي حرف أكتبه. إذن كيف حشرتني في حظيرة الجلابة!؟ أيووووة، معناها إنت (منتفع) من هذه الطريقة وهذا الأسلوب! وكلّ مرة أراجع شتارتك –كنت مفتكرها شتارة وسوء منهج دعوي- أبداً، أكتشف إنّها حاجة مقصودة وشكلها منفعة منفعة، ما هي هذه المنفعة؟ هي (التميُّز) لو كان معظم المثقفين السودانيين لا يختلفون عن بشاشا في رؤيتهم للعدالة، إذن ما قيمة بشاشا!؟ أهاااا كدا بشاشا ما عندو قيمة إلا وسط هؤلاء الناس. وهؤلاء الناس يفوقونه معرفة وحنكة ولهم قيمتهم التي تعبوا عليها فعلاً في حارات البحوث والفنون ووو..إلخ مما يعجز عنه بشاشا ولم يؤت فيه مثقال ذرّة من نبوغ. فبشاشا مجرّد مستكرت جلابي –بالجد جد- يبحث عن أطروحة خاصّة به، في الحقيقة عن (عرش) يناسب أميراً كوشياً مفرداً. والقيم بتاعك وااضح، الناس لو قالوا ليك نحن عرب، تقول لا. إنتو زنوج. يقولوا ليك خلاص نحن زنوج وكلّنا إكوان –كما يقول ليركس ناس عقد الجلاد، تقول لا إنتو جلابة. مجنون إنت؟ ياها ذاتها حجوة البيضة والسوسيو. يا زول بوب مارلي بتاع الساعة كم؟ بوب مارلي دا مغنّي كويس آآي، لكن فعلاً بشبهك في جهله لدرجة يعبد هيلا سلاسي مش يغني ليهو ساي يا منصور علي. قال دا Judah قبل ما يبدأ ليك الحفلة يقعد يكورك: جاااه جااااه جاااه.... مقدّساً لهذا الديكتاتور النعيل والرذيل. وهو بالإضافة لمغنيي الراب أكثر من أساؤوا لقضايانا، هؤلاء هم المسؤولون عن كل شاب أسود قتله الكراك وقتلته المخدّرات، وعن كل شاب أسود جاهل، وعن كل شاب أسود متبنٍّ للعنف كمنهج حياة، ديل جَهَلة وكرّسوا للجهل: يقول بوب مارلي: if I’m educated man I will be dam fool ويسأل عن هذا السم الذي انتحر به فيقول: nooo it’s a plaaant سجم خشمك، وسجم خشمنا كسود لو بنتقدّم خطوة واحدة بالجهل والمخدّرات والعنف. سخف ما بعدو سخف، اقرأ الفروقات بين لوثر كينغ شابّاً ولوثر كينغ رجلاً حكيماً ناضجاً وزعيماً حقيقياً لتعرف الفرق، إن كان لك عقل يفهم. مانديلا قال في ما معناه: العبودية لم تنتهِ في جنوب إفريقيا، ولن تنتهي إلا بالتعليم. أرجو أن تعلّم نفسك يا بشاشا، وأن تعطيها زمناً لتقرأ سطراً في اليوم.

(عدل بواسطة الصادق اسماعيل on 11-01-2007, 00:10 AM)