الإنحناءة لهذا القلم .........الفاتح يوسف جبرا

Quote: خروج نوهائى ! (شمهريشا) هى مملكة (الشواطين) يعيشون فيها .. ينامون ويشربون ويأكلون ويتناسلون ويمارسون حياتهم اليومية حتى إذا ما حان وقت العمل يتم توزيعهم جميعاً على اطراف الدنيا المختلفة فى ( ورديات ) حيث يعمل جميعهم على تضليل ( البنى آدمين ) وافسادهم وجرهم إلى ( المنكر ) والشر والرذيلة والظلم والعدوان على بعضهم البعض .. فوجئ ( الشيطان ) المسئول عن مكتب ( الشواطين ) العاملين بخارج مملكة ( شمهريشا ) بعودة طوعية لجميع الشواطين العاملين بجمهورية ( أمازوينا ) الشئ الذى دعاه إلى توجيه السؤال لبعـــض ( الشواطين ) القادمين من هناك مستفسرا عن السر وراء هذه العودة الجماعية . ش1 – الما برجعنا شنو ؟ كنا زمان شغالين كويس فى أمـان الله .. الشغال ( وسواس) والشغال ( خناس) والشغال شنو مــــا بعرف داك ..فجأة لقينا نفسنا فى الشارع قاعدين عواطليه من ضل حيطه لى ضل عمود .. لى ضل ( خرابه ) .. ش2 – والله جمهورية امازونيا دى زمان الواحد كان مننا أصلو ما بشيل هم ( شغل ) فيها .. من أول يوم يصل يشتغل وكـــمان يحول لى أولادو .. هنا إنبرت زوجه ( ش 2 ) تخاطب المسئول معضدة حديث زوجها : - وحات النار الـ ح نتعذب بيها دى .. ووحات شيخى (إبليس) الما بحلف بيهو بالكضب هناك شدت ظروفنا ما ساءت اولادنا ديل اكلناهم ( صفق الشجر) عضم ساكت ما قدرنا نجيبو ليهم يكدوهو المسئول ينظر إليها فى اندهاش مما قالته ويخاطبهما (هى وزوجها ومجموعة الشواطين) قائلاً : - شنو يعنى الحصل ليكم هناك ؟ شواطين الدنيا دى كلهم قاعدين يشتغلوا وموزعين على الدنيا دى كلها ، الشغال فى الكويت والشغال فى السعودية والشغال فى امريكا والشغال فى الهند والفى اندونسيا وكلهم شغالين ( تش ) إنتو مالكم ؟ ش3 – إنت يعنى يا سعادتك يعنى قايلنا زايغين من ( الضرائب ) ؟ نحنا هناك خــلاص مافى لينا طريقه شغل .. البنى آدمين الهناك شغالين شغلنا وكمان أحسن مننا ! المسئول : طيب يعنى إنتو عاوزننا نعمل ليكم شنو؟ ش3 : عاوزين المسئولين يورونـــا نعمل شنو ؟ والله شــدة ما قعدنا هنــاك ( عطــاله ) الواحـــــد فينا نسى ( يوسوس ) كيف ذاتو .. ش4 – نحنا عاوزين نقابل الملك شمهروش ملك ( شمهريشـــا ) ذاتو .. مش هو المسئول مننا .. خلاص يحل لينا قضيتا دى ويشوف لينا شغله فى أى بلد ثانى .. المسئول : والله بى طريقتكم ، لو عاوزين تمشوا تقابلو (إبليس) ذاتو قابلوهو نحنا هنا ما عندنا غير نشيل منكم الضرائب والجبايات وبس .. نقاش على أحد القهاوى : على قهوة باحد أسواق (شمهريشا) يجلس عدد مـــــــــن (الشواطين ) العائدين من جمهورية امازوينا اشكالهم تنم عن فقر وعوز .. أجسامهم نحيله (مكرمشه) وخشنة يبدو عليها التعب ش1 – والله الواحد ماصدق رجع لى بلدو تانى .. بالله الواحد هناك مما تصبح الواطه يدور ليهوعلى شغلاته يشتغلا ما يلاقى أى (شغله) ويرجع البيت (مهدود) أباطو وانسجم .. ش2 – الما بخلينا هناك نكون عطاله وما عندنا شغل شنو ؟ وكيف ما ترجع اباطك والنجم إذا كان (البنى آدميين ) فــــــــى جمهورية امازونيا دى بقوا يشتغلوا شغلنا وكمان أحسن مننا ش3 : والله أحسن حاجة عملناها انو دقينا خروج نهائى وجينا إن شاء الله هنا ناكل (كسره بى تلج) احسن لينا من هناك . ش 2: (كسرة بى تلج) .. عضم بى (موية فول) دى ما المشكــــله .. المشكله إنو لازم نسمع صوتنا للجهات المسئوله يشوفوا لينا طريقه يخلونا نغترب فى أى بلد تانى غــير (امازونيا) دى .. مش هم برضو المسئولين مننا ومفروض يحلو لينا مشاكلنا . ش 4: وافرض المسئولين ديه جهبينو وعملو نائمين . ش 2: فى الحالة دى مافيش غير نعمل (مظاهره) ؟ ش 4: وحات (النار) انت مشتهى ليك (دقه) ساكت .. ش 2: خلاص نعمل (اعتصام ) ونضرب عن الطعام . ش 4: طعام ؟ هو انته لاقى تاكل طعام عشان نضرب عنو .. ! ش 5: شوفوا .. وحات النار انتو ما عندكم غير حل واااحد .. الجميع : (شنو ؟ ) .. ش 5: أنكم تحاولو تقابلوا الملك (شمهروش) وتشرحو ليهو الحاصل دة ؟ ش 2: وشمهروش .. فاضى لينا عشان يسمعنا ش 4: ولا على كيفو مش كل راع مسئول عن رعيتو .. ش 2: نحنا نمشى نقابل السكرتارية بتاعتو وتشرح ليهم الموضوع .. ونشوف رائيهم شنو .. فى بلاط كهف الملك شمهروش : فى كهف كبير باحدى مناطق مملكة (شمهريشا) ذو اضاءة خافتة يتقدم عدد من (المواطنين الشواطين) فى خوف ووجل نحو بوابه الكهف .. لا يلبثوا أن ترتــعد اوصــــالهم بــــعد سماعـــهم : - ثابت عندك .. أنت وهو يا (شيطان) ؟ الشواطين يرفعون ايديهم عاليا وهم يقفون مرتعدين بينما حرس كهف الملك شمهروش متقدمون نحوهم .. الحرس : ماشين وين كدهـ ؟ قايلناها زريبه ش 2 : (متلعثما) : والله فى الحقيقه .. أصلو .. يعنى الحرس : انت مالك (بتقطع) ما تتكلم طوالى .. ش 2 : هو انتو ما قطعتو نفسنا .. الواحد يحكى طوالى كيف ؟ الحارس : أتكلم .. انتو عاوزين شنو .. ش 3 : عاوزين نقابل الملك شمهروش . الحارس : وانتو منو ؟ ش 4 : يعنى ح نكون منو ما شواطين من عامة الشعب الحارس : وموضوعكم شنو ؟ ش 2 : انت ما سمعت (بالشواطين) العائدين من جمهورية امازونيا ؟ الحارس : ما سمعت ؟ ش 2 : لكن انت تسمع كيف وقاعد (مركلس) لينا فى الكهف دهـ .. وخاتى (البرقر) و (العضام) المدنكله دى .. الحارس : جابت ليها كمن (حسادة) .. وحات (النار) الملك شمهروش دهـ ما تقابلوهو كان (نططتو) !! ش 4 فى إستهجان وتحدى) : ما نقابلو .. ؟ والله نقابلو .. ونقابل (أبليس) ذاتو .. احتدم النقاش وتعالت الأصوات حتى خرج الملك شمهروش من كهفه ووقف على أحد الأحجار العالية المطلة على بوابة الكهف حيث يقف الحارسان وأمامهما ممثلى الشواطين العائدين من أمازونيا شمهروش: شنو الغلبة والغاغة العمالينها دى؟ حارس : يا جلالة الملك ديل شويت شواطين مواطنين قالو عندهم مشكلة وعاوزين يقابلوك ؟ شمهروش: ومن متين الشواطين فى مملكتى دى عندهم مشاكل؟ ش2: (فى تلعثم) : والله سموك أصلو … فى الحقيقه … يعنى شمهروش (منتهرا) : ما تتكلم شنو أصلو وفى الحقيقه ويعنى إنت ح تقدم ليا (شيطان فى حياتنا) ش2: والله أصلو سموك أنحنا (الشواطين) المغتربين فى (جمهورية أمازونيا) كلنا جينا راجعين ودقينا خروج نهائى شمهروش : ليه كده ؟ خلاص شبعتو ؟ ش 3: سموك شبعنا شنو .. نحنا هناك إتبهدلنا بهدلة السنين ! شمهروش (مستغربا) : إتبهدلتو؟ فى (شيطان) يتبهدل ؟ والله إنتو الظاهر شواطين آخر زمن ش 4: نحنا سموك مش الشواطين آخر زمن البنى آدمين الهناك هم الأصبحو شواطين ! شمهروش : كيف يعنى قاموا ليهم (قرون) وبقو زينا كده !! ش2 : لو على القرون هينه ديل بقو يشتغلو شغلنا أحسن مننا – يواصل فى صوت باك – نحنا بس عاوزنكم تشوفو لينا (فيز) لأى بلد تانى .. البنى آدمين الهناك ديل بقو صعبين خلاص !! شمهروش : صعبين ولا إنتو تكونو زائغين من (الحر) والسخانه و(قطع الكهرباء) وعاوزين تمشو ليكم بلد (ترطبو) فيها ؟؟ ش 3: نحنا سموك لا زائغين ولا حاجتين ولو مغالطنا إتأكد بى نفسك وحات شيخنا (إبليس) ديل بقو يعملو حاجات إتخن (شيطان ) ما يعملا .. شفت ليك هسه (شيطان موظف) يقدر يبنى ليهو (عمارتين؟) – مستطردا أقول ليك يا جلالة الملك شمهروش ديل قعدونا عطالة وخالين شغل شمهروش: طيب أنا ح أشوف آخرتا معاكم … أيها الحاجب .. أيها الحاجب !! يتدلى من سقف الكهف فى لمح البصر شيطان يرتدى زياً أحمرأ مميزا وينحنى أمام الملك شمهروش قائلا : الحاجب: لبيك سيدى الملك شمهروش ماذا تريد شمهروش : عاوزك تمشى هسع فى التو واللحظة تشوف ليا (أشيطن) شيطان عندنا فى المملكة دى عشان عاوز أرسلو فى مهمة لجمهورية أمازونيا الحاجب : سمعا وطاعة يا سيدى سوف أحضره لك فى لمح البصر !! يختفى الحاجب برهه من أمام الجميع ويعود متدليا من سقف الكهف ومعه شيطان تبدو عليه ملامح (الشيطنه الشديده) !! الحاجب : ها هو يا سيدى (أشيطن) شيطان لدينا فى المملكة شمهروش (فى حزم ) : إسمك منو ؟ الشيطان : أنا يا جلالة الملك شمهروش إسمى (مبالغة) عشان كل ما أعمل ليا حاجه باقى الشواطين بيقولو ليا دى (مباااالغة) لكن ملقبنى بود (إبليس) !! شمهروش : وشغال وين؟ الشيطان : هسه بطلت الشغل بقيت (إستشارى) ساكت .. يعنى زى ما تقول كلما (شيطان) تغلبو حاجه بيرجع ليا شمهروش : جميل جميل جدا أهو شايف الشواطين القدامك ديل ؟ الشيطان : مالهم ؟ شمهروش: ديل غالباهم حاجه .. قالو ما قادرين على البنى آدمين الفى (أمازونيا) لأنو بقو شواطين أكتر منهم .. وأنا عاوزك تمشى هناك وتورينى شطارتك وتشوف ليا كلامهم ده صاح !!؟؟ الشيطان : سموك فى حاجه محدده عاوزنى أعملا .. أخلى ليك ناس تكتل بعض؟ ولا أخلى ليك زول ياكل قروش (الحكومة) ولا وعاوزنى أعمل شنو ؟ ش (متداخلا) : يا سموك نحنا ما قلنا ليك الحاجات دى بقو بيعملوها براهم وأحسن مننا .. شوف ليهو (إختبار) تانى؟ شمهروش : زى شنو يعنى؟ ش : خليهو مثلا يغش ليهو واحد منهم لو قدر غشاهو معناتو نحنا لسه ممكن نشتغل هناك وح نرجع فى أول (بغلة فضائية) لى شغلنا ! شمهروش : ده كلام صاح .. أنا موافق – ثم بعد تفكبير- شوف يا ود أبليس يا مبالغه إنت أنا ح أديك عربية (صالون) كوريلا موديل 2005 عاوزك تمشى وتستخدم شيطنتك دى وتجينا راجع جايب معاك واحده موديل 2008 الشيطان : سمعا وطاعه سيدى شمهروش : أيها الحاجب أحضر له (البغلة الطائرة) خمسة شنكل لتقله إلى جمهورية أمازونيا ليقوم بأداء هذه المهمة ولا تنسى أن تربط فى مؤخرتها عربية كوريلا موديل 2005 - ثم موجها حديثه لود إبليس - كم من الزمن يكفيك لأداء المهمة ودإبليس : أسبوع فقط يا سيدى شمهروش : لك الأسبوع – يلتفت إلى بقية الشواطين العائدين – أما أنتم فعليكم الحضور فى نفس هذا اليوم والوقت الأسبوع القادم لنرى إن كنتم صادقين ! ود إبليس فى أمازونيا : ما أن حطت (البغلة خمسة شنكل) رحالها وهى تحمل (ودإبليس) حتى قام بالدخول إلى العربة بعد أن قام فى لمح البصر بتركيب (لوحات) لها (ترخيص السنة) ثم بدأ فى تغيير (هيئته) إلى هيئة (بنى آدم) فإرتدى جلبابا أبيض (زبده) وعمة (توتال أصلى) ومركوب من جلد (النمر) ولم ينسى أن يضع على رسغه (ساعه ذهبية) فاخرة وصندوق بينسون كبير ، كان الوقت صباحا ، إنتظر داخل العربه قليلا حتى إذا ما بدأت الحركة فى الشوارع المحيطه أدار محرك العربه وبدأ فى البحث عن (معرض سيارات) ، أثناء ذلك كان (ودأبليس) يفكر فى عدد من (السيناريوهات) التى من الممكن أن يقوم بها ليتحصل عن طريق (الغش والإحتيال) على عربه موةديل 2008 بدلا عن عربته التى أحضرها معه من (مملكة شمهريشا) ، لم يلبث (ود إبليس) أن شاهد فى نهايه الشارع الريئسى حيث كان يسير لافته ضخمة مكتوب عليها (معرض الصدق والأمانه لبيع وشراء وإستبدال السيارات) - السلام عليكم - وعليكم السلام إتفضل – ثم- يا ود أمشى جيب بارد لى عمك ده ! - فى الحقيقه أنا عاوزأغير عربيتى دى لى 2008 وأدفع فرق (كان ود إبليس يفكر أن يزوغ بعد البيعه ) ! - والله شوف ياخونا حكايت نشيل منك العربية ونشيل منك (فرق) دى حكايه طويلة وكمان الفرق ح يطلع ليك كبير لكن نحنا ممكن نضيق ليك (الفرقه) شويه - يعنى شنو ما فاهم - أيوااا أفهمك .. عربيتك دى هسه بتجيب ليها فى السوق على أحسن تقدير 40 مليون - كويس أها - والعربية الـ 2008 ممكن لو ماشة بسيط تلقاها فى حدود 65 مليون - أها وبعدين - بعدين أنحنا نقوم نشترى منك العربية بتاعتك دى بى خمسة وخمسين مليون ونديك عشرين مليون كاش وخمسة وتلاتين بى شيك لمده أسبوع عشان كاش مافى – مستدركا- ولاحظ إنو سعرها كاش 40 مليون بس ما بتجيب أكتر منو !! قام ود أبليس بتضريب المسالة فى ذهنه فهو عليه أن يعود إلى (مملكة شمهريشا) وتحديدا فى بلاط (كهف) الملك شمهروش بعد أسبوع فقط - طيب أنا موافق لكن بس ممكن الشيك ده يكون خمسة يوم عشان أنا مسافر بعد أسبوع - (بعد شوية تفكير) : ممكن ما مشكلة تمت إجراءات (المبايعه) وإستلم ودإبليس عشرين مليون بالإضافة إلى شيك بخمسة وثلاثين مليون يصرف بعد خمسة أيام من تاريخه وخرج من معرض (الصدق والأمانة) وقد لمعت فى ذهنه فكرة سرعان ما قام بتنفيذها حيث دخل إلى أقرب (معرض سيارات) : - السلام عليكم - وعليكم السلام - يا جماعه عاوز ليا عربية نضيفه كده فى حدود عشرين مليون - جدا .. شوف العربية العاوزا ومافيش مشكلة لم يمض زمن طويل حتى كان ودإبليس يتهادى وهو يقود عربة كورية نضيفه فاتحا المسجل ع الآخر وهو يضع شيك (معرض الصدق والأمانة) أبو خمسة وتلاتين مليون أمامه على (طابلون) العربية ! - كده الواحد يلقى ليهو ناس ذى ناس معرض الصدق والأمانة ديل يبيع ليهم العربية دى بى شيك بى خمسة يوم أكان بى أربعين أكان بى خمسين وبعد خمسة يوم نصرف (الشيكين) وننط لينا فى 2008 وعلى (البغلة خمسة شنكل) وشمهريشا … يا ودإبليس والله إنت فعلا مبااااالغه !! بالفعل قام ودإبليس بعرض (العربية) لأحد معارض (السيارات) والذى قام بشرائها منه (حسب طلبه وحتى يرتفع السعر) بشيك لمده خمسة أيام وبمبلغ لا يحلم به … خمسة وثلاثين مليون !! - كده الواحد عندو سبعين مليون … يعنى الواحد كده ممكن يشترى الألفين وتمانية بالراحه وكمان يعمل ليها (كشب) وزينه !! (بعد أسبوع) : بلاط كهف الملك شمهروش: الملك شمهروش يجلس على كرسى المملكة فى منتصف الكهف (الحارسان) عن يمينه وعن يسارة ولجنة العائدين من أمازونيا يقفون أمامه ! شمهروش : أيها الحاجب .. أيها الحاجب الحاجب (وهو يتدلى من أعلى الكهف) : لبيك سيدى شمهروش : ألم يحضر الشيطان ودإبليس الحاجب : لم يحضر بعد يا سيدى شمهروش : أحان الوقت المحدد لحضورة الحاجب : بلى يا سيدى وتعداه كمان ش : ما قلنا ليكم ما بقدر ش : ود إبليس شنو .. ديل إبليس ذاااتو عندهم فيهو كلام شمهروش : ربما حدث له عارض بسيط .. إذن فلنجتمع بعد إسبوع فى ذات الزمان والمكان (بعد أسبوع آخر) : بلاط كهف الملك شمهروش: شمهروش : أيها الحاجب .. أيها الحاجب الحاجب (وهو يتدلى من أعلى الكهف) : لبيك سيدى شمهروش : ألم يحضر الشيطان ودإبليس الحاجب : لم يحضر بعد يا سيدى وليس لدينا أى أخبار عنه ش : ما تضيعو لينا زمننا ساكت يا جلالة الملك .. شوفو الينا بلد تانى نمشى ليهو ! شمهروش (فى حزم) : يا حاجب ..إذن جهز (البغلة) الطائرة خمسة شنكل الآن وأأمرها أن تذهب له فى أى مكان هو فيه وتعود به الآن فى التو واللحظة الحاجب : أمرك سيدى بعد أن غادرت البغلة الطائرة فى لمح البصر بدأ الجميع فى ترقب وإنتظار عودتها وهى تحمل (ود إبليس) ، كان الجميع يفكرون فى الإجابع على سؤال واحد وهو : هل يا ترى نجح ودإبليس فى الإختبار ؟ فجأة علا غبار خفيف سقف الكهف وحطت (البغلة الطائرة) التى لم يكن لدهشة الجميع أحد على متنها ، لكنها كانت تمسك بفمها على مظروف) شمهروش : أيها الحاجب أأت بذلك المظروف وأفتحه لنرى ما فيه الحاجب يقوم بفتح المظروف تسقط منه ورقه يلتقطها مكتوب عليها : متأسف للتأخير .. أنا بخير والحمدلله .. لو فى طريقه رسلو ليا كتيبه بتاعت مساعده ،، ودإبليس (مباااالغة) قسم الشيكات – عنبر الشواطين – السجن العمومى أمازونيا