الذمن دة مافي بورداب فاهمين وراقيين (( الفهم قسم ))!

Quote: صديقي النصف مسخوط في جلسة سمر تجاذبنا فيها أطراف الحديث عن التناول الشرقي البحت للعلاقات الزوجية في أطارها السوداني... لحدي هنا نحن كويسين!! ولكن عندما سألني فجأةً وانت مع أسرتك في البيت يوم من الأيام حسيت بي العلاقة الزوجية بين أمك ووالدك ؟؟ بمعني!! يعني هل حصلت ألتمست أشياء تدل علي أنو في تهيئ لخلوة أو صنع جو رومانسي بيوحي أنو ستحدث العلاقة في هذه الليلة بالذات!! ....!!! حاولت أن أجد أجابة لسؤاله وانا أتخندق بحيائي من الخوض في مثل هذه المواضيع الشائكة فأردف منفعلاً : ياخي انا أمي كانت ساهي لو عايزة (تولع حفرة الدخان ) ليلة خميس كانت بتتحجج بي الدخان كوسيلة للعلاج! تقول ليك يا ولدي الرطوبة !!!! وواحدة تانية تقول ليك: يا ود أمي مالي بقعد مبشتنة هسة لو جاتني مرقة في الحلة ساهي الناس يشيلوا حالي!!! لكن عمرها ما بتعترف أنها بتتدخن عشان زوجها!!! قلت ليه والله أنا عمري ما فكرت في الكلام دة من الزاوية دي لكن فعلاً هو واقع معاش!! قال لي حاجة حيرتني أكتر!! قال لي أنا الوالدة ربنا يديها الصحة كانت لمأ أبوي يكون ما بايت في الشغل مخصوص بتلبس جلابيتها القديمة البتعوس بيها الكسرة لحدي ما ننوم نحن الصباح وانا طالع للشغل بلقاها لابسة جلابيتها الحرير الجابتها ليها خالتي من الكويت! يعني بحس أنها بتحاول أنكار هذا الشئ مع أنو من حقها يعني لولبست الفستان الأحمر دة وولعت ليها لمبة سهارة فينا زول بقول ليها عملتي كدة ليه !!؟؟؟ ـــــــ حاولت أن أكون محايداً وأنا أنقل نص الحوار من الذاكرة ودة طبعاً بعد موافقة صديقي هذا علي ذلك كرهان بيننا !!!! والآن نتسائل مرة أخري! جهل السودانيات بتقنية الفستان الأحمر جهلُ أم حياء ؟؟!