بنات بلدي المكملات السماحة والرزانة ووين تلقوا زي ده ..
واحد أخونا اغترابه طال قال : ــــــــــــــــــــــ من عشرينات العمر .. ما شفت حياة .. وما عشت حياة .. ما جربت وما أتهنيت .. زي الناس الزينين .. الناس الشالو حلاوة الدنيا .. في حدقات العين .. فرحت بيهم لمان شافت .. فرحن طل بضي العين .. ركنوا الهم والغم في رف القلب الوراني .. خلوهو يمارس يأسو القتّال .. فاتوه مسافات .. لو حاول يلحق .. ما بيلقى مجال .. ما الفرح الباين ما بيندسه .. وأصلو سعادة الزول تتكامل .. لما يصالح نفسه .. ولما يعانق الناس العايشين جواه .. وينكر ذاتو .. للناس الحلوين العاشوه مراحل .. للغبش الديمه تملي معاهو .. ماضي وحاضر ومستقبل .. فرحان بيهم .. والله شدييييد .. خاتيهم في قلبو الأخدر وعمران .. ومرت عشرين .. ومن بعدها تلاتين .. والعد ماشي .. وأنا .. ما زلت محلك سر .. أخطو خطاوي الخوف .. الختّ رحالو وعشعش جوه الجوف .. شلتك يا أحزان جوه الجوه .. وتبتبت على القلب السايق الدنيا .. وسايقاهو .. أقولو شنو .. ما عارف .. ما القلب الصاحي وحزنان .. ما بيتغشه .. القلب الشال الهم من بدري .. وختاهم جواه .. ما بيقدر يشكي .. ويشكي لمين .. ياهن ناسو .. ده كان فهموا .. من حبه المليان للسيرة العطره .. وفضلت أيامو تباريهو .. مرات لي قدام .. والمرات البعدها لي بكره .. مرات يتضايق .. ومرات يرضى .. ويقول .. هو بكره متين .. هو بكره متين آآآآناس .. ومتين تتغير هادي الحال .. ما العمر جرى .. وهو زي الواسوق ألفي الساقية .. من شوفة العين والناس نايمين .. هو نومه خزاز .. لا عندو صباح .. لا عندو مساء .. أيامو الجارية .. وتتخرت من بين أيديه .. ومليان بي حزنو الغرز جواه .. ورغم الحال المايل .. ياهو الصنديد .. شايل الضحكة الماليها حدود .. إلا حدود الدنيا الواسعة .. يشاغل ده .. ويطيب خاتر داك .. يمسحلو الأحزان .. وهو مليان بي أحزان تكفي الدنيا .. ومع أنه المحتاج .. لكنه .. يفضّل يدي عشاهو .. للجيعان .. ويبيت ساكت رضيان .. والحال يا هو ما بتغير .. الهم ماليهو .. ومن تعبو الزاد .. يرقد غفيان زي الميت .. إلا الحس صاحي والقلب ملااااان .. ورضاهو يزيد .. طول ما ناسو قاعدين جواه .. وهو في هادي الحال .. مابين مدو .. ومابين جذرو .. مشدوه لاهي .. يصارع الهم .. لا انصرع الهم .. لاهو المصروع .. ومن بين الزحمة الشاغلاهو .. قام شافا .. آآآآي والله .. وقعت في عينو .. طلعت من وين .. تب ما عارف .. ما صدق شوفو .. فرك العينين .. فضل متسمر زي الملسوع .. عاينلها زين .. دقق في ديك الخدين القمرين .. آآآآآه يا دنيا .. واحدة تشيلك .. وواحدة توديك .. تديك الإحساس المليان .. بحلاوة الدنيا .. وآآآآه لو شفت جمال النونات .. الشايلاها نداوة .. ومالياها طراوه .. وقوام ممشوق آآه منه .. تحلق بيكا بعيد .. لعوالم مخضرة .. وكان شفت العينين .. الله من ديك العينين .. فتننو عديل .. كتلنوعديل .. الله منك آآه يا دنيا .. وزي دي يا ناس .. تزيل الهم المتركب فوق القلب .. تعاين ليها .. تديك الفرح المندسي .. في ليلاً طول .. ساعاته طوال .. وفضل يسأل في روحو .. زولاً زي أكان قاعد وين .. وين كان مندسي .. حكايتو شنو .. وجاها عديل .. قالها كل ألفي خاترو .. ما خلا كلام .. وسنواته الجارية .. القالده الخمسين .. من رحلة جميلة في عينيها .. خلتو يشعر .. كأنه رجع تاني لأبن العشرين .. عارفنها مين .. دي بت بلدي .. السمحة وزينة .. الديمة رزينة .. جمالها أصيل .. والله يا ناس .. وين ما قبلتو .. ووين ما رحتو .. ما بتلقو أبد .. زي بت بلدي .. (عدل بواسطة معتصم مكاوي on 05-18-2009, 07:00 AM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]