ياحزينه .. وشايله في جواك مدينه من مباهج ومن سكينه مهما حزنك هدَّ حيلك المشارق تبقي هيلك قلب طيب وروح أمينه ========= رغم جرحك عالي نزفو والمواجع برضو شينه رغم نيلكـ هدّ جرفـو والمفاجع فيك سجينه قادره تدي الجاي حرفو ريده تزهر طول سنينه ========= الدواخل مهما تتعب مابينضب يوم معينه والمداخل مهما تصعب ومهما زاد الهم أنينه تبقي فيها القدره مذهب تنزع الآهه الدفينه ========= المباهج مهما تضهب تكسح الورده وتهينه بالأمل أوجاعه تذهب والورود الغيم بِعِينه قولي أهلاً بكره مرحب كفكفي الدمعه السخينه فارقي حزناً لونه أشحب من خدودك ومن أنينه ======== العمر ساعاتو ماشه ليه نضيعو في المواجع؟ لو صحيح الخطوه طاشه والدروب إيقاعه واجع بي يقينك تبقي هاشه وجعة الزمن المخادع ======== هاتي إيدك نمشي بكره ما في واحداً فينا راجع دا العمر من غير أملنا ببقي ماسِخ وعمر ضايع والصباح لو يوم خذلنا من صبرنا ببدا طالع مهما نبعد .. يوم بِصلنا ويبقي بيه العمر ماتع =========== رغم جرحك ما فصلنا ليل يصارع وحزن فارع مهما كان البينا شاسع من طريقك ما ني راجع ومن عيونك ماني قانع ======== العيون لو طال طشاشه يبقي ليها الحزن فاجع والقلوب لو غاب دعاشه وسدَّ بينه وبينو مانع تبقي صابره وبرضو ماشه ما بتفكر في الموانع ========= الدموع لو سال رشاشه مابتغير أي واقع يلا أملي الكون بشاشه وما يهدِّك حزن لاسع مهما يوصل للحشاشه بي إرادتِك يبقي ناجع زيدي نيلك للعطاشه لسه ممشي الدنيا واسع
04-02-2009, 02:33 PM
Alsa7afa_30 Alsa7afa_30
تاريخ التسجيل: 02-06-2003
مجموع المشاركات: 6618
الدموع لو سال رشاشه مابتغير أي واقع يلا أملي الكون بشاشه وما يهدِّك حزن لاسع مهما يوصل للحشاشه بي إرادتِك يبقي ناجع زيدي نيلك للعطاشه لسه ممشي الدنيا واسع
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فاروق أبوحوه
Alsa7afa_30
فيس بوك
تويتر
انستقرام
يوتيوب
بنتيريست