|
|
 دة اسمو بوست الزهج.....
|
زهجـــــــــــــــــــــــــــانة
يا جماعة
اعملوا حسابكم
حاتفشى فيكم....من حسام هلالى لغاية ارنست العجوز
ولا عزاء للسيدات
كلكم
شعرا على قصاصين ... ان شا الله قصاصين اتر زاتو ... على نقاد ان شا الله جداد زاتهم
على مؤرخين على كورنجية على كفنجية
على فنانين
واعدين او مخضرمين
والخضرمة دى شنو هى ؟؟؟ كلمات زى دى لما الزول يكون صغير يلقاها قاعدة قدامو وزول يوريه معناها مافى...
الفنان المخضرم ....
براك كدة تقعد تقول ياربى الخُضرُمّة دى بتقوم للزول وين
ظاهرة بى برة فى يدو ولا وشو ولا تحت الهدوم فى الضهر ولا الركبة
زى السردبة
لالا العندو سردبة داك اسمو محدودب ، ياجماعة حسة زول عاقل كدة يتخضرم ولا يحدودب
زول يحدودب؟؟ ما يمشى يزرع ولا ياكل ولا ينوم ، عليك الله المحدودب ليها شنو؟؟؟
تحدودب بى سجمك ولا بى رمادك
والعجب الفطاحلة، المتفطحل لها شنو؟؟
فى كلام غريب خلاص فى الدنيا دى ونحن ساكتين ليه ما بنسألو...
هسة كلمة عامل السن دى قاعدة وين ؟؟؟؟ لما ما يكون فى موضوع بتاع عرس وعجز اصلو ما فى زول بقولها ، اول من تجى السيرة ، كرب كرب كرب يفتحوا ليك العلب والشنط وطبج يرموها ليك ، عامل السن
زى كلمة "قد" فى موضوع الانشا فى المدرسة ، اول من تبدا حصة الانشا
ويقولوا ليهم اكتبوا اى واحد يسن ليك كلمة قد ويبدا ، قد
وقد تميز اهل المنطقة
وقد كان فى جواره
وقد جاء المطر بال....
قد
دة هسة ما قد؟؟؟
انا زهجانة يا جماعة
اعمل شنو؟؟؟
اوع زول ينصحنى باى حاجة ، بنفسها ليكم ساى
حتقولى لى السعادة فى الرضا ، والقناعة شنو ما بعرف ، لالالا
ما بنفع
ما حاقتنع ليكم الا اكون ما زهجانة عشان كدة ما تتعبوا
بس استحملوا
لكن اعمل شنو؟؟؟؟ خلاص انصحونى لكن فى حاجات معينة ما تهبشوها
المال هو سر السعادة الابدية
البرد ابقى ينقص بل زاد
العربيييييييييييييييه، عربيتى حبيبتى
اها يللا انصحوا كان دايرين
الغنا ؟؟؟ سمعتو كلو
الشعر ؟؟؟ قريتو كلو
اولادى ؟؟؟ حبيتهم لما فترت ، كسروا ضهرى بالخدمة ،
"الله يخليهم"
السودان؟؟؟ ابى يتطور وماقريب والكيزان ابوا يفوتوا
الحياة رتيبة
وفاضية
وما عندها طعم
ودونى السودان ومعاه مليون دولار وديمقراطية وعربيتى مصلحة
وحاجات تانية بقولها ليكم بعد داك
اخ يا رب
اعفو منى ياجماعة
الاقيكم بعد الزهجة تروح لكن ما شكلها بتروح
ما تتخضرموا
لا تتخضرموا عشان ما تقوم ليكم خضرمة فى ركبتكم
لا تبقوا فطاحلة ، عشان كراعكم ما
تتفلطح
رد الله غربتكم
|
|
 
|
|
|
|
|
|
|
|
Re: دة اسمو بوست الزهج..... (Re: SAMIR IBRAHIM)
|
كيف يعنى
الجملة دة فيها فاعل وفعل ومفعول لاجله زى باقى الجمل العجيبة ديك؟؟؟؟
يا سمير
؟؟؟؟ ولا دى جملة نوبيه حلفاوية
ولو الجمل العربيه بعربوها الجمل الحلفاوية بحلفوها
الغنماية بحلبوها طبعا
ياجماعة احسن زول يمسكنى من البوست دة
بزهجوا ليكم معاى ساى
| |
|
|
|
|
|
|
|
|
|
Re: دة اسمو بوست الزهج..... (Re: SAMIR IBRAHIM)
|
امتحان اللغة الحلفاوية
السؤال الاول
احلف الجملة الاتية
احلف ما تحته خط
هات
جملة لامحل لها من الاحلاف
امتحان اللغة الشايقية
شق الجملة الاتية
شق ما تحته خط البو اليشقك
امتحان اللغة الهدندوية
هدندو ما تحته خط
امتحان اللغة الجعليه
اجعل الكلمات الاتية مبتدا والكلمات الغير اتية خبر فى جملة جعليه مفيدة
امتحان اللغة الجبهجية
ناولنى السيخة دى
| |
|
|
|
|
|
|
|
|
|
Re: دة اسمو بوست الزهج..... (Re: AnwarKing)
|
loooooooooooooool
من حبوبتك يا انور كنج
والله انا بريد ليك النسوان العجاز ديل ريدة
والرجال العجاز برضو
خصوصا لمن يقعدوا يهاتوا با لدخل منو ؟؟؟ المرق منو؟؟؟؟؟
الفتح الباب دة منو؟؟؟ انت منو؟؟؟؟ انتى منو؟؟؟؟
نحن قربنا طبعا وخرفنا حيكون صعب
فيه بنيويه ملخبت بثقافة كدة وحبة فلهمة وفلقصة
انا غايتو عشان حاخرف فى امريكا حاخرف بلانجليزى
لا حيكون عمدى مفحضة ادق الشفع بى سيرها ولا قرقاب ولا بضفر سعف
واقعد انبح فى الممرضات،
who are you??
who is this???
where is everybody???
الهواه التمزع وشك
talk to me.
sakta malik???
yeskut feek el mudfa3???
يسكت فيك المدفع ، عان عويناتها
طبعا نحن النوع الحيختونا فى بيوت العجزة
ياجماعة مافى حبوب زهج؟؟؟
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
< font color = blue size= 4 >
وأنا كنت قايل براي الزهجان من الغربة والبعاد من وطن الجدود والاباء والاحباب
معليش ياستي دقة تفوت ولا حد يموت
Zahgandeema
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
زهجت الرجعة من السودان دي خليها ساكت تدخل عليك
وتشبك فيك شبكة العدو
وناس السودان غياظيين كله ماتضرب ليهم تسمع الضحك والقرقرة يذيدوها ليك الزهجة ذيادة
الله يجازي الكان السبب
| |
|
|
|
|
|
|
|
|
|
Re: دة اسمو بوست الزهج..... (Re: أحمد أمين)
|
تماضر عارفه
دي النزله بتاعه السودان
دي براها
طبعا النزله انواع
نزله معويه
نسبه الي معويه
معاويه ده منو ما بعرفو
ونزله ديكيه
علي وزن سعال ديكي
ودي طبعا معروفه
علاجه ساهل
ونزله شتويه
ودي بتصب الناس الفي البلاد الحاره
وعلاجه بالبنسلين العند التمرجي
ونزله من راس البيت
ودي بتكون بي مداعاه من الحجه
وعضه اصبع
واهم واحده طبعا هي النزله للبلاد
بالهجه الشاميه
ودي نزله ما عندها علاج
بتصيب لمده تتراوح
من سته اشهر وسنه
اها طمنتك ولا لا
(عدل بواسطة Elkhawad on 03-01-2003, 03:10 AM)
| |
|
|
|
|
|
|
|
|
|
Re: دة اسمو بوست الزهج..... (Re: أحمد أمين)
|
زهجة السودان
بس عرفتها ليك
انا دايرة الحر
دايرة التراب
دايرة الدقداق
دايرة الركشات
دايرة الدكتاتورية
دايرة الراكوبة
دايرة الكتاحة
دايرة الشمار
دايرة الكارو
دايرة الحمير
دايرة الغنم
دايرة الكوش
دايرة الحفر
دايرة الخيران
دايرة السوق الشعبى
دايرة سوق الملجة
دايرة كمونية
دايرة كسرة بشطة وملح
دايرة سحارة
دايرة نبق
دايرة لالوب
دايرة حنان
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
انا عن
دى نزلة بالعصر
وطلعة بالصباح
كل يوم لازم اطلع
امشى الشغل
الشغل دة الاخترعوا منو؟؟؟ بالغ لكن
ما بعرف يقعد فى بيتن؟؟؟ وينووووم
؟؟؟
القلق العليه شنو؟
عامل فيها ظريف؟
اهو ورطنا فيه ومشى
اخ انا لو كنت اعرف كنت عملت حسابى؟
ياحليل المسلسل
والوردة البجيبوها فى القطعات بين المسلسل والنشرة الجوية
ياحليل عضة الاصبع بتاعة الامات
يا حليل الجرايد
وشاى الصباح بى كباية الشب
ياحليل الشمس الما فضل ليها الاتبيت معانا
لى العشا حتى تمغرب
والكهربا طج تقطع
يا حلييييييييل السودان
| |
|
|
|
|
|
|
|
|
|
Re: Reاحيييييييي اتا (Re: مبيوع)
|
...
..
.
SwEeT Tumadir
Even PROZAC is not of valuable in ur case !!!
you need something quiet different and u know it .. just go and take it and ur gonna be just fine ...
| |
|
|
|
|
|
|
|
|
|
Re: Reاحيييييييي اتا (Re: hero)
|
الزهج ده شكلو كيف؟...نسيت ملامحو...كده وصفيهو...مربوع؟ واللا عيونو عسلية؟...
من كترتو...اتلخبط علينا اختصاصو
هسى عرفتو ..لما لقيت بوست الزهج...هو الزهج بقت عندو بوستات كمان؟
زهجك روقان بال ساكت
تحياتى
ودعزة
| |
|
|
|
|
|
|
|
|
|
Re: Reاحيييييييي اتا (Re: wadazza)
|
يا تماضر
والله انا اللية كنت ازهج منك
اول يوم في السنة التسعة ثلاثين
مافي زول هبب لي وقال لي كل سنة وانت طيبة
حتى اولادي نسو
مشوا المدرسة عادي
لا ابو مهيار ولاابو يسار
ولا ابو اي زول
ولا ام اي زول
زدي الشغالة ا طفشي من يوم الجمعة وماجات
قمت دكيت الشغل عاشن ا قعد مع بتي
يقوم المدير يتصل يديني دش
اها قلت اشغل تلفوني بالبورد عشان تاني ود اللذين مايقلى طريقة يطرب
لقيت بوستك دا
ضحكت لمن دموعي سالو
ماعارفه منو ولا من العلي
الله يدك العافية
ويزيل البينا
| |
|
|
|
|
|
|
|
|
|
Re: Reاحيييييييي اتا (Re: الجندرية)
|
غريبة ــــــــــــــــــ كنته قايل أنا براي
زمان لما كنا صغار .. علاقتي مع الطيارات كانت متوترة .. ولما أشوفه في السماء ما كنته بحترمه .. وما أحترمته أي زول كان بيسافر فيها ويتغرب .. اتعلمته أسافر بيها .. ومن لحظته انا زهجان .. زهجان مني انا ... عشان عملته كده .
كان لما النيل يفيض بيتفرع ويدخل تحت كبري أبوعنجه .. يمد لسانو يغيظ ويكاوي حاجه الشول ( حاجه الشول شخصية لطيفه ...الآ أنو لسانه متبري منها ...بتشبه بت الريس في موسم الهجرة إلي الشمال كان أتصادفت معاها أي مرا بتكون في ورطه حقيقية حاجه ( الشول ) لازم تعبر الخور من الناحية الجنوبية ...للشمالية قاصده سوق المورده .. في رحلة التسويق اليومية معاها قفته .. ومجموعة من المقاشيش مصنوعه من سعف النخيل وكانت فنانه جدا في تلوين السعف وتشكيلو بؤس حياته وخستكته الذايده عن اللزوم ... بتخاف من المركب ومن ركوب المركب ... لما تشوف البحر ذاد تسبو .. وتلعنو من ما يبدا مطرو يدفق في الحبشة .. مرورا بالمقرن وكل الجزر إلي محطة الديم – كانت لما تركب معانا المركب تبدأ تسجم في رماد خشمه .. وتسكلب .. أنا أضحك أغير أتجاهي للناحية الموازية ليها أمرجح المركب طالعه ونازلة ... تتشهد حاجه الشول .. وتسجم رماده من جديد ... وأي نوع من السجم تلقاهو تركبو معانا في المركب .. تنده أولياء خاصين بيها من ابو شراء إلي آخر العنقود مرورا بكل القباب والبنايات .. بنيه ..بنيه كانت خرفته عينه ... وكنا لزاز معاها ..
عم عمر زول عاقل جدا ... ما بتكلم كتير بيمارس حياتو الطبيعية بهدؤ عندو محل ألكترونيات وصيانة للراديو والتلفزيونات ..عيونو كبار جدا ولونم ابياااااااااااااااااض ولما يجي ينوم كان بيغمض من العصر .. لما البحر يبدا يذيد وحاجه الشول تتجرس ..كان عم عمر عيونو تبدا موسم الإحمرار ويبدا ينضم كتر ... من غير سبب .. يقفل دكان الصيانة .. ينتقل لي لحظات الجنون البحري .. ولما البحر يبدا ينقص ... كانت عيونو بتبيض تدريجيا . ويفتح الورشة .. ويرجع عمر البنعرفو ..
في الثانوي كنته في وادي سيدنا الثانوية في سوق امدرمان .. ولما الحصة التالته تجي كان راسي بيكبس – بشوف فقاقيع زي رغوة الصابون الكنا بنعمله بي الخرطوش وننفخ عليهو .. بشوفه قدام عيوني .. ابدا اطرشقه بي سن قلم الرصاص .. أكبر واحده ما بتطرشق . الآ أغمض ليها عيوني ..يعني أتخيلي !!! زول بيطعن بالقلم في الهواء .. ويغمض ويفتح من غير سبب .. أصحابي في الفصل فاكرني معتوه كانو بيقولو لي جني – في الحقيقة انا بكون قرفان ومليان زهج .. وبحاول أطلع من المود ده بالحركه دي .. أستاذ مادة الفيزياء بيلاوز مني حسب مرجعيتو بي جنوني الجواي ده ... استغل الفرصة دي .. ارفع أيدي واقول ليهو ::
يا أستاذ :: مواعيد الحبه ..
يقول لي أتفضل
اطلع من الفصل .. الشارع الأول والتاني بلاقي نفسي قدام مستشفي التجاني الماحي للمرتبين عقليا .. والغريبة كنته بلقي واحد من ناس البورد ده هناك .. في نفس الشارع لكن بيكون دايما ماشي بي سرعه وغالبا بيكون شايل كتب وعندو شنطة جلد .. كبيرة انا بعرف اسوى زيها وقاعد أرسم فيها بي اللون الموية ..الراحل مصطفي سيد أحمد .. واوعك تقولي لي سوي لي واحده .. لانو ما عندي جلد واجيبو ليك من وين ذاتو .. كدي حسع خليني في مشروعنا ده .. اها الزول ده كان الاستاذ يحي فضل الله .. وكنته مدمن لي كتاباتو وأعمالو المسرحية في الوقت داك قبل ما السودان يلفظو هو كمان . وكنته بستغرب يا ربي الول ده يكون طالع من هناك ؟؟؟ !! اضحك جنس ضحك .. والضحك ده وين ؟؟؟!! جواي بتلقيهو طوالي ساكن قدام الفقاقيع القبيل ديك الكانت في الفصل متذكراها ؟؟؟؟!!
في المستشفي دي اصحابي كتار .. كونسولت طبي – مميز . عنابر مكتظه بي نزلاء في قمت العقلانية جابوهم اهلم قالومجانيين .. زينب من بنات الحمر – جميلة جمال خرافي .. كانت بتحب ليها واحد تاني أبوهاعرسه لي ودعمها غصب ودعت قلبه وودعت معاهو الدنيا وقالو جنت .. كانت بتحكي لي عنو .. الرضي .. طالب كان في تانية هندسه مليان رياضيات فل .. شطح .. معاهو ورقه وقلم بيكتب معادلات رياضييه ويحلها في لمح البصر .. عرفته أنو أثبت بي نظرية ما أنو 1+1 ما بتساوي 2 وشرحه لي .. والحمد لله ما قدرته افهمه ليهو .. الريح .. كان بيغني لي عبد العزيز المبارك .. اذا ما شفتو بيغني وسمعته صوتو بتقول ده هو ذاتو ..
خفير المستشفي كان صعب عامل زي ويست أستوبر نيجيرياء موية ما بتخش من تحتو .. وشو ضخم جدا .. لما يتكلم كان بيطير من خشمو رزاز .. في خدو اليمين كان مرسوم مربع وفيهو علامة + عبارة عن وشم قبلي .. لما أصل الباب بتكون آخر زرارة في قميصي مفتوحه أكفكف البنطلون إلي حد الركبة في قدمي اليسري انطط عيوني الصغار ديل اكبر من عيون عمي عمر لما البحر يذيد .. أخفي أي ضحكه جواي .. أنكش شعري ..اقيف قدام الباب من غير عقلانية النسوان البجن المستشفي قلوبمكانت بتتقطع عشان جني الصبي ده الشايفنو قدام عيونن اسمع عباراتن العاطفه علي .. يا حليلك يا جنا حشاي .. وسجم خشم أمك .. في سري أقول ليها يا حليلك انتي .. انا عاقل بس مدبرس من الكون ده ومن الناس العامله عاقله دي .. عمي الخفير يفتح لي الباب علي مصراعيه وفهمو واضح ..ده زول مجنون وجاي بي نفسو .. داير حقنتو .. واكون ريحتو من الملاوة والمدافرة ..
اليوم داك دخلته ..لقيت زوله أول مرة أشوفه نضيفه جدا .. لكن طويلة جدا .زكانت واقفه في الماسورة بتتشطف .. مشيت عليها سلمته .. ردت لي ..
اسمعي : دكتورة منار وين ؟؟؟؟؟؟؟
عاينت لي قوي وما ردت ... مشيت .. بعد شوية صاحت لي .. بجعته ليها ... فتحت خشمه كبير جدا .. قالت لي دكتورة منار هنا .. وبي الاصبع الأوسط في ايده الشمال اشارت إلي مكان هنا .. اتماديت دخلته أصبعي مكان هنا قلته ليها كدي انا داير اتكلم معاها .ز ضحكت شديد جدا .ز قالت لي انته مجنون ؟؟؟؟ وأدتني احلي كف في الدنيا لفيت حوالين نفسي .ز ومن اليوم داك فقاقيع الصابون راحت .. طبعا أكيد تكون شايفاني مجنون ...
تعرفييا تماضر نصيحتي ليك .. وأصلي في الكلام الخارم بارم ده .ز وشوفي ليك فقاقيع صابون طرشقيها بالسهم بتاع الماوس .. يا كمان أنتظري البحر يذيد ....
لكن أنا ده البحلني شنو .... عليك الله بس قولي لي ...........
أنا كنته كاتب الرد ده ليك قلته شوية اساهم معاك في مشروع الخستكه ده .. لكن لقيتو بينفع بوست لي الناس الدايره تجن .. فعن أذنك انا شايلو فوق لي الناس دي .. ممكن ؟؟ مش حقي ؟؟؟
| |
|
|
|
|
|
|
|
|
|
Re: Reاحيييييييي اتا (Re: tmbis)
|
تماضر الله لا جاب زهج
تعرفي شكلك كدا بتكوني مفلسه
لانو زهجتك دي زهجه فلس والله
loooooooooooooooolz
طبعا هو اهم مسببات الزهج و الطمام و حاجات تانيه كتير
ذكرتيني خضر لما مره جاتو زهجه زيك حقتك دي و جا فكاها في البورد وما خلا شي
يا ستي والله الزهج دا بقى سمه غالبه و حاجه عامه ما منها مفر
انشا الله لي هسه تكوني فرفشتي شويه
تحياتي
| |
|
|
|
|
|
|
|
|
|
Re: Reاحيييييييي اتا (Re: الجندرية)
|
الجندرية الفنجرية
كل سنة وانتى حلوة كدة وطيبة كدة ومليانة روح وريحان كدة
واهلك صدقونى بحبوك زينا لكن مرات اعياد الميلاد بتنفس خصوصا لما الرقم يزيد
لوووول
بركة الضحكتى
ورئيسك فى الشغل ما يلقى مرادو
| |
|
|
|
|
|
|
|
|
|
Re: Reاحيييييييي اتا (Re: مبيوع)
|
مبيوع
ما بمسك الشغلة دى الاتجى تغنى لى فى الطرمبة
وانت قالوا فنان وطبيب اسنان
يعنى غناك كلو للسنون ؟؟؟؟
اللالاء عيونو
والبيضاء سنونو
وعضت على العناب بالبرد
اب خشما ابيض قطن الحواشة لونو
ولا برضو بتغنى فى تخصصات تانية ؟؟؟؟
سمعنا صوتك لو امكن يمكن يفك لينا زهجتنا دى
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
انا..كنت ازهج..من فؤاد ام موسي
مشيت جريدة الراي العام..قريت لي حاجه..روقتني شويه
زمان في الداخيله..كنت لما اكون زهجان..بنزل تحت..واقعد..اشاكل في الناس...وشكلي كده حا اقبل عليكم يا ناس البورد
مره..نزلت..لقيت واحد..ظريف اسمو ..احمد الزبال..بيضرب في زلابيه..بي شاي لبن..قلت ليهو..تتغذي سااااااااااي يا زبال..قال لي..وما اتغز!!!؟؟مش واطاة الله!!؟؟؟؟
..!!
يگتبها عبد اللطيف محمد نور
من يظن ان السفر ذهاباً أو اياباً، خاصة لدى القيام برحلات جوية طويلة متعة أو تغيير، فهو واهم
المحبة : من اعلى مقامات العارفين وهي ايثار الله تعالى لعباده المخلصين ومعها نهاية الفضل العظيم.
قال تعالى جلت قدرته :«يحبهم ويحبونه» ثم قال تعالى :«ذلك فضل الله يؤتيه من يشاء» وروى عن النبي صلى الله علىه وسلم «ما كان الله ليعذب حبيبه بالنار».
وفي قوت القلوب في معاملة ووصف طريق المريد الى مقام التوحيد الشيخ ابي طالب المكي رضى الله تعالى عنه وارضاه وردت الكثير من الاشارات واللطائف ذات الدلالات في معاني المحبة، ومن اشاراته وعباراته تلك :
ü قال بعض العارفين : اذا كان الايمان في ظاهر القلب يعني على الفؤاد كان المؤمن يحب الله حباً متوسطاً فاذا دخل الايمان باطن القلب فكان في سويدائه احبه الحب البالغ ومحبة ذلك ان ينظر فان كان يؤثر الله على جميع هواه ويغلب محبته على هوى العبد حتى تصير محبة الله هي محبة العبد من كل شئ فهو محب لله حقاً وان رأيت قلبك دون ذلك فلك من المحبة بعد ذلك، فأول علامات المحبة الايثار للمحبوب على ذخائر القلوب ولذلك وصف الله المحبين بالايثار ووصفه العارفون بذلك فقال تعالى في وصفه المحبين يحبون من هاجر الىهم ولا يجدون في صدورهم حاجة ثم قال تعالى :«ويؤثرون على انفسهم» وقال في وصفه تالله لقد آثرك الله علىنا، ومن علم المحبة سهر الليل بمناجاة الجليل، والحنين الى الغروب شوقاً الى الخلوة بالمحبوب، ومناجاة القلب سرائر الوجد ومطالعة الغيب، والمناجاة عند اهل المصافاة انما هي بالقلوب وهي مطالعاتها بواطن الغيوب وجولاتها في سر الملكوت وعلوها في معاني الجبروت بانوار ارواحها يحملها شعاع انواره فيوقعها على خزائن اسراره والمناجاة دليل رؤية القرب ومشاهد وجود الانس.
ü تقول احدى عبارات العارفين عن المحبة : ان لله عباداً ملأ قلوبهم من صفاء محض محبته وفسح ارواحهم بالشوق الى رؤيته فسبحان من شوق الىه انفسهم وادنى منه فهمهم وصفت له صدورهم، فسبحان موفقهم ومؤنس وحشتهم وطبيب اسقامهم الهي لك تواضعت ابدانهم والى الزيادة منك انبسطت ايديهم فاذقتهم من حلاوة الفهم عنك ما طيبت به عيشتهم وادمت به نعيمهم ففتحت لهم ابواب سماواتك وابحت لهم الجولان في ملكوتك بل ما نسيت محبة المحسن وعلىك معول شوق المشتاقين والىك حنت قلوب العارفين وبك انست قلوب الصادقين وعلىك عكفت رهبة الخائفين وبك استجارت افئدة المقصرين، قد يئست الراحة من فتورهم وقل طمع الغفلة فيهم، فهم لا يسكنون الى محادثة الفكرة فيما لا يعنيهم ولا يفترون عن التعب والسهر يناجونه بألسنتهم ويتضرعون اليه بمسكنتهم يسألونه العفو عن زلاتهم والصفح عن ما وقع من الخطأ في اعمالهم فهم الذين ذابت قلوبهم بفكر الاحزان وخدموه خدمة الابرار.
كلمات في المحبة :
قالوا : اهل المحبة على ثلاثة احوال : فالحال الاول من المحبة محبة العامة يتولد ذلك من احسان الله تعالى الىهم وعطفه علىهم وقد روى عن النبي صلى الله علىه وسلم انه قال :«جبلت القلوب على حب من احسن الىها وبغض من اساء الىها»، الحديث.
وهذا الحال من المحبة عندما سئل احد العارفين رحمه الله عن المحبة فقال : صفاء الود مع دوام الذكر لان من احب شيئاً اكثر من ذكره.
وسئل ابا سعيد الخراز رحمه الله عن المحبة فقال : طوبي لمن شرب كاساً من محبته، وذاق نعيماً من مناجاة الجليل وقربه بما وجد من اللذات بحبه فملئ قلبه حباً وطار بالله طرباً وهام الىه اشتياقاً فيا له من محب اسف بربه، كلف دنف، ليس له سكن غيره، ولا مألوف سواه.
وصفة هذه المحبة عندما سئل احد العارفين فقيل له والمحبة الصافية التي لا كدر فيها؟ قال : حب الله الصافي الذي لا كدر فيه : سقوط المحبة عن القلب والجوارح حتى لا تكون فيها المحبة وتكون الاشياء بالله ولله فذلك المحب لله.
من هم أهل الخصوص :
قالوا : اهل الخصوص هم الذين خصهم الله تعالى من عامة المؤمنين بالحقائق والاحوال والمقامات وخصوص الخصوص هم اهل التفريد وتجريد التوحيد ومن عبر الاحوال والمقامات وسلكها وقطع مفاوزها.
قال الله عز وجل «ومنهم مقتصد ومنهم سابق بالخيرات» فالمقتصد خصوصي والسابق خصوص الخصوص.
«فمنهم مقتصد» يسلك طريق الىمين ويختار الصالحات من الاعمال والحسنات ويكتب الفضائل والكمالات في مقام القلب.
«ومنهم سابق بالخيرات» التي هي تجليات الصفات الى الفناء في الذات.
«باذن الله» بتيسيره وتوفيقه، «ذلك هو الفضل الكبير».
وصلى الله على سيدنا محمد وعلى آله وصحبه وسلم تسليماً كثيراً.
ونواصل ان شاء الله
| |
|
|
|
|
|
|
|
|
|
Re: دة اسمو بوست الزهج..... (Re: Dafi)
|
التحيات النواضر
من امس وانا بفتش اقول شنو غلبني
واليوم بفتش لقيت الكلام القالتو بت قضيم
عن حالتها
ولمن هبشت لقيتك ما هبشت ولا ردتي عليها
الله يكون في عونها
بعد داك اتضح انك بتدلعي
وعشان كده
هاك شوفي البلاء المازي بلاءك
وذي ما بقولوا
البشوف مصيبة غيروا تهون عليهو مصيبتو
عموما انت وهي قبلكن وحدكن و
الشر برة وبعيد
وذي ما سمها الخواض نزلة
انشاء الله ماتعادينا
لووووول
ركن المحبطين
| |
|
|
|
|
|
|
|
|
|
Re: دة اسمو بوست الزهج..... (Re: Abomihyar)
|
والله ياتماضر انت كان زهجانا نحنا البروقنا منو ، الزهج طالع من عيونا دخان
وهو شنو الما بجيب الزهج ماهو الحال كلو بزهج _ زهج فى زهج -
تعرفى اكتر شئ يزهج فى السودان شنو انو تقيفى ما تجيك المواصلات او تجى مليانه .
ولا تركبى حافلة فى كرسى النص النازل يضربك والطالع يضربك
ولا تلاقيهم واقفيف صفوف صفوف شايلين قصب السكر فى العربات الديوية - ديك البى يشيلوا بيها حاجات البناء - وتلقى الناص مرصوصة تمضغ فى قصب السكر وتتفل فى الشارع ، لما تجى ماشة وتشوفى الواحد يمضغ فى قصب السكر وجنبو الغنماية تمضغ فى التفل ، ينتابك شعور بانك اذا تكلمتى مع اى حد من ديل ما ح يفهم ، تحسى انو الناس بدأت تمشى لى وراء وانت فى امريكا بتتذكرى محلات الهامبورجر ، وشتان مابين العمارات البى تتبنى فى الكوش والشوارع الزى المراية ، تحت شارع الظلط العمارات انداحت
ايواه قبضت كلمة جديدة رايك فيها شنو - اسمها انداحت - ما عارف معناها شنو
دى الكلمات البى تسوقنا الى العولمة صحى البلد ظهرت فيها كلمات كثيرة كدة ما عارف بجيبوها من وين . غالبا اظنه من الدش
الناس اليومين ديل ماسكين كلمة آلية
وهى كلمة معروفة طبعا لنا وجاية من قال أيه ؟
والمصريين ينطقون قال = آل
آل أيه
وحذوا الألف أ للتخفيف
آلية
يعنى هم بتابعوا الافلام الاجنبية ومش فاهمين الحاصل
وبيقول لاخوه آلية
نحن كعرب او كذيالة العرب نحاول استخدام اللغة العربية
المهم اننا وكالعرب ننسب ان اي لغة اصلها من العربية
يقولون admeral قبطان البحر
العرب قالوا امير البحر
السودانيين قالو شكسبير سودانى واصله
شيخ الزبير كان احد القضاء فى مملكة الفوج
وهاجر الى بريطانيا بغرض الهجرة الى سكسونيا السفلى عبر اللوترى
الا ان استقر به الحال فى بريطانيا واستضافة مجمع الشعراء البريطانى فاصبح اميرهم
وقالوا كونداليزا رايس بتنا يعنى سودانية
اسمها كنينة الريس
عصبة الامم المتحدة دى عصابة ولا شنو ؟
ولا انا ما بعرف السياسة بس بتاع شمارات
ياخى زهجة رابطة ربطة يبدو انها
يحلها الحل بلة
لاكن بلة دا ذاتو منو
ويحلوا من شنو
ياخى بلة دا زاتو هسع كان بقى فى الزمن دا ما كان اتحل
كان لحدى هسع مربط
وكان حلوه تانى بشربكها
زى جلابية شيل الله يا حسن جلابية ام ماشى جاى
دى بلبسوها الشباب موضة الايام دى
وهى بقولوا عليها انصارية
الخليجين قالوا السودانيين كسلانين والدليل على كسلهم انهم يلبسوا جلابية لها وجهين ، يعنى ما عندهم وقت يشوفوا عدلتها من قلبتها
لاكن فى رأى هذه الجلابية لو كانت موجودة زمن سيدنا يوسف لكانت مشكلة . وكانت مشكلة سيدنا يوسف عويصة
الله ستر
لاكن انا عندى فكرة بفكر فيها ،
تخيل انو زول لبس الجلابية دى وختى قروش فى جيبها .
وقلعها ولبسها مرة ثانية بالجهة الثانية وما لاقى قروشوا تفتكر تكون راحت وين
انا بصراحة لما الاقى زول لابسها ما بكون عارفه هو ماشى ولا جاي
لاكن اعتقد انها وسيلة من وسائل الخداع الحربى
يعنى زمان الناس الاستخدموها كان قصدهم يوهموا الاعداء
فى ان الجيوش متحركة وين ؟
ولا شنو ؟؟
الا استغفر الله وسنعاود
| |
|
|
|
|
|
|
|
|
|
Re: دة اسمو بوست الزهج..... (Re: al_msaa)
|
المســـــا
اغرورقت عيناى بالدموع من الضحك
شغت ضحكة الزهج ؟؟؟؟ متذكرها
اخرها بكون فى استغفر الله العظيم اللهم اجعلو خير
بس
شكرا على النجمة الطلت فى العتمة
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
ياايتها الابنة: بتنا
بحثت عن اصل الخضرمة فوجدت:
خضرم تعنى كثير الماء ....يقال بئر خضرم
ورجل خضرم تعنى كثير الحنان.......
ورجل مخضرم........تعنى دعي او مدعي
والمخضرم هو الذي ادرك الجاهلية والاسلام.
..........
والزول البقولوا ليه مخضرم دا غشوه
..........
shereef
| |
|
|
|
|
|
|
|
|
 Re: دة اسمو بوست الزهج..... (Re: Tumadir)
|
الاستاذة القامة تماضر لك التحية وانتي ما تزالين بنفس التوهج والحماس تتضفي للمنبر روعته وجماله المميز باسلوبك السلس الممتع ..فانتي لست وحدك الزهجانة والمدبرسة فان معكي كذلك اول حاجة انتي مفروض ابدا ما تزهجي يا مخضرمة لان لديك العديد من الوسائل والسبل للهروب من ذلك بالكتابة..بالطبخ ..بالكنس وببببب اما نحن الغلابة لينا الله وعيشة السوق زول جاي من البلد ليهو اسبوع ومفارق عروسته ولسع في بداية الطريق ..علييييييك الله انا ما احق منك بالزهج يامبدعة يامخضرمة
لكي التحية مرة اخرى
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
أم ساريه
لمّا قلنا (مدبرسين) قلتو لينا عرسو
أها إنتو كمان (زهجانين) نقول ليكم شنو ؟
أحسن (تتخضرمو) و لا أنا غلطان؟
يبدو أن الدبرسه صارت حاله عامه في هذا البورد الليموني ، و تحتاج إلى دراسه جاده من المهتمين بالدبرسات و الزهج و الخضرمه
سردبي يا أم سايه
و اندهي و قولي : يا داوووووووووووووووووووووووووووووووووووووود
| |
|
|
|
|
|
|
|
|
|
دا اسمو (Re: Tumadir)
|
تماضر بت امى
زهجك جميل زى بسمتك
اديك وصفة مستهلكة
اتصلى بناس عزاز
اسمعى غنا
اقرى رواية او شعر جميل
امشى لكن تمشى وين فى الجليد حقكم داك شوفى الكوميديا فى القمة العربية والشمطا القامت بين القذافى والامير عبد الله والله حاجات تضحك الامير قال للقائد الاممىم انت كذاب
القائد قام يستهبل وعامل ما سامع ويقول ايش قال ايش قال والكلام فات اضانو
الجندرية كل سنة وانت طيبة والله انا لو كنت فى صنعاء كان عملتلا ليك حفلة بس تعزمى الشاعرات الظريفات صاحباتك نبيلو الزبير وهدى ابلان والرائعة امنة النصيرى
| |
|
|
|
|
|
|
|
|
|
Re: دا اسمو (Re: mohmmed said ahmed)
|
على ذكر القذافى
عندى ودخالتى كان فى ليبيا
راكب فى التاكسى معاه واحد ليبى وسواق التاكسى ليبى
القذافى بتكلم فقام قال كلمة زندقة
السواق اتلفت على الليبى قال ليه
ايش يصير معنى كلمة زندقة؟؟
الليبى قال ليه
واالله مش عارف لكن لابد انه ليها معنى
| |
|
|
|
|
|
|
|
|
|
Re: دا اسمو (Re: Tumadir)
|
...
..
.
Sweetest Tumadir
follow ur heart .. follow ur instinct ..
how about awalk .. Ilike the rainy walk while its shinning ...
| |
|
|
|
|
|
|
|
|
|
Re: دا اسمو (Re: hero)
|
علي ذكر زهجة ما بعد الرجعة من السودان
عندنا واحد صاحبنا مشي عرس في السودان
ورجع بعد شهرين
وبدا يشتغل فينا
عليكم الله هسي الواحد لو مشي عمل طعمية في ابوحمامة والله ابوجنزير ما ارحم ليه
ستات الشاي تتصور الواحدة بقت زي الدكتور الاخصائي تجيب عدتها الساعة اربعة العصر وترجع بيتها عشرة مساء وعندها 300 الف
والله بتاع الموية والله سالت واحد قال ببيع في اليوم 60 الف جنيه
ياخي انت شفت بتاع الاورنيش
قلنا ليه صاح والله والعجب لو شلت ليك رقشة معاك قالو بتجيب في اليوم خمسين الف صافية
يا اخوانا والله ريحة طرنبات البنزين هناك ليها نكهة مش زي الطرنبات المتمرات ديل
وهناك زهج مافي والله شهرين انا ما زهجت هسي اول ما جيت هنا ما عرفت انوم والله اقوم والله اشتغل والله اسوي شاي والله جبنة والله ادخن والله اقرا
قلنا ليه يا اخي نحن متبرعين ليك بي حق الرقشة انت ارجع وما تلغي اقامتك جرب شهر واحد
وفعلا نفذ الفكرة
المسكين تاني يوم من وصولو كشوه بي دفار وحلقو ليه صلعة
جانا راجع بعد شهر ونص
اول ما سالناه طرش عديل كدي وقال خلوني اتم طرشتي واحكي ليكم
وهسي قال
غايتو الناقصاه دردرة اليقطع تذكرة بس يعدي البحر ده
ورقشتي دفعتها ضرايب ورسوم اعفاء من التجنيد
| |
|
|
|
|
|
|
|
|
|
Re: دا اسمو (Re: غدى)
|
غدى
طبعا النظرية صحيحة
وفى امريكا السمين فقير والضعيف يقيف
هاها
لانو الفقراء ما عندهم برنامج يقتلوا بيه الوكت زى الاغنياء البمشوا الجامعات ويسكوا الدرجات العلمية ويمشوا للمناشط الرياضية والثقافية والاجتماعية
اما الفقراء فما عندكم برنامج غير البطاطس والهمبرجر وما كونالدز
وزى ما الدعاية بتقول
Fat is Cheap.
فهذه الدهون فعلا ارخص ، وكونك سمين معناها بتاكل اكل رخيص ، والاكل الصحى ما بسمن
لسه ياغدى بحاول اتماسك وما ارمرم
لكن لو طالت القصة دى
جيبى ميزانك ولاقينى
وما تزهجى ، وانا لو اتخارجت من الزهجة دى ، لومك على ما اخليها تتدخل على تانى ، بس النمرقها
| |
|
|
|
|
|
|
|
|
|
Re: دا اسمو (Re: nazar hussien)
|
نزار حسين
زولك دة عجبنى عجب
انت عارف المشكلة انو السودان فى راسى كان حاجة كدة ، زى الحلم
كنت داعكة ومدورة كويس فى امريكا وهندى حلم اسمو الوطن داخراهو لى اليوم الاسود
لكن لما مشيت السودان لقيتو يومو اسود هو
اها نقبل وين؟؟؟
استراليا؟؟؟ ودى كان الزول نطط فيها شديد بتغطس فى المحيط
آسيا؟؟؟
سمينة بالحيل
اوروبا؟؟؟
واكون عملت شنو؟؟؟
الشرق الاوسط؟؟؟ بنبنان تقيل ما بتقعد
افريقيا؟؟؟ غربه اكتر، من كترة المستعمرين ما دعكوا فيها واشتغلوا ، شى فرنسى وشى برتغالى وشى اصفر وشى احمر
اها نطير ويييييين يا ناس؟؟؟
| |
|
|
|
|
|
|
|
|
|
Re: دا اسمو (Re: hero)
|
follow my heart??
ياهيرو العزيز؟؟؟؟
قالوا الببارى الجداد بوديه الكوشة
انا بلا قلبى دة السقط حجرى شنو؟؟؟
ما عندك لى نصيحة غيرها؟؟
كدى فتش
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
المتالقة دومآ [وقنقليزآ] تماضر المسكونة بالابداع والجن و،،،قبل ايام عدت من الخرطوم الى حضن هذه الغربة ال....التي تجيد إحتلاب عمرنا قطرة قطرة وعايشت زهج الرجعة الوجعة مرات عديدة ولذلك إكتسبت خبرة عريضة في إزالة اثر الجية من السودان وبالمناسبة عايز وملاوذ انو اعرف معنى وإعراب كلمة [إزالة]هذه لانه يبدو لي انها كلمة ساكت لامعنى لها ولاطعم إستخدمناها فيما يتعلق بآثار النكسة ،ومايو والوساخة ولم تتم [إزالة]غي حاجة ولاشتين ودى كمان من ياتو قاموس سمعتها من امي لمن تكون زهجانة زيك كدة تقول لاده لاده ولاشتين عاوزك تأصليها لي اها وهذه الاخرى [ألتاصيل] دي بتطلع ديشي زاتو خاصة لمن يقولها عديم اصل اتراني إنزلقت يمكنك [إزالتها] عفوآ المدير جه صنقر لي في راسي ونخلي موضوع الخبرة وفنيات إزالة القرفة مش بتاعت الشاي الى فرصة اخرى.
| |
|
|
|
|
|
|
|
|
|
Re: دة اسمو بوست الزهج..... (Re: أبو ساندرا)
|
ابو ساندرا
الله يجازيك فقعتنى بالضحك
ازالة؟؟؟
انت قايلنى انا مهمومة بى شنو اكتر حاجة؟؟
توم كرروز ونيكول كدمان ديل كانوا متزوجين على سنة الله ورسولو
اشتروا قطعة ارض فى القمر، كدى دقيقة دى ماجاية كدة، ما ممكن زول يقول اشتروا قطعة ارض فى القمر، انقول اشتروا قطعة قمر، قمرة يعنى
اها حصل امر الله وطلقوا
قطعة القمر دى مفروض تتباع عشان كل زول يشيل نصها
نص القمر " دى مش غنية حمد الريح ؟؟؟؟ فى شكلو زى نص القمر""
المهم انا مهمومة بيهم قلت الناس ديل مفروض يمشوا مصلحة الاراضى ، بسم الله اراضى شنو؟؟؟؟ ، مصلحة القمارى
القمارى ، طبعا نص الغنا السودانى بقوقى مع القمارى
لانو فى نبوءة سابقة لى زمانها من المغنى السودانى لفكرة قطع ارض فى القمر وانشاء مصلحة القمارى هناك
واتخيل لى غنية كلم قمارينا دى بالذات هى غنية موظف الاستقبال فى مصلحة القمارى
الو؟؟؟ كلم قمارينا
المهم يضربوا تلفون لمصلحة القمارى ويشيلوا الاوتاد ويعلموا قطعة الارض ، قطعة القمر من الاتجاهات الاربعة
ويشختوا شخيت فى النص
كل زول يشيل نص
القصة بتبدو ساهلة من برة لكن فى مشاكل منوط بنا ان نعمل على ازالتها،
اها يا باو ساندرا
هسة اسهل كلمة "ازالة" ولا كلمة " منوط" دى ؟؟؟ يا منوت انت منوط دى بتبقى ليك؟؟؟
ارنب نوط ترانى منوط
المهم خلينا نقتل المشاكل التى تواجه المدعى فى قضية توم كروز ونيكول كدمان ضد آخرين، بحثا
طالما انو المشاكل المنوط بنا مناقشتهاخصوصا ما يتعلق بالوطن غالبانا،
من باب الغلبها راجلها مشت تادب حماها
1- القطعة المقابلة لهلال العيد تكون من نصيب منو؟؟؟
2- ابوزيد الهلالى حقو وين؟؟؟
3-القطعة الضارباها الشمس بتكون احر من القطعة المقابلة الضلمة البرضا بيها منو؟؟؟
فالاحسن انو يلقوا مشترى يشترى القطعة
طيب القطعة دى انا فكرت اشتريها
لكن ما عندى فكة
ممكن القى لى عندك سلف؟؟؟
او ممكن نعمل كشف؟؟
المهم البريحك ياابوساندرا
بديك مهلة لغاية آخر الشهر
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
تماضر
سلام
انت يادوب لمت فيك الزهجة دي وانشاء الله ماتبقي مزمنة زي حالتنا لانو اذا كان انت لسه في البداية سويت كدا مامعروف تسوي شنو لي قدام كان استمرت
ربنا يفكها منك ويجعلها من الزهجات اللحظية وترجعي بكل الابداع الفيك للبورد
محتاجين نقراك
يديك العافية ويكفيك شر الزهج
عبدالله جعفر
| |
|
|
|
|
|
|
|
|
|
Re: دة اسمو بوست الزهج..... (Re: Abdalla Gaafar)
|
ابداع؟؟؟
ابداع شنو يا صديقى عبدالله جعفر
دى زهجة افقية راسية
لالحظية ولا وقتية
تلاحقها اللعنة الوطنية
والنخوة الشعرية
والثقافة الازدواجية
والغربة الامريكية
والحياة العملية
والاحوال المادية
والانعتاقات الروحية
والمسالة الزمنية
وتطول القائمة
نخوة؟؟؟
حسة كدى النسالك
فى ذمتك دى
آخر مرة شفت ليك نخوة وين؟؟؟
النخوة العربية بعرفها ، لانو عربيتى نخت وقاعدة عند الميكانيكى ليها دهور
اكتر شى الزول بلاحظ ليه فى السودان النخوة العربية دى خصوصا عربيات التاكسى ، نخوة غريبة جدا، مكلكعات ومكسرات والسواقين ساخطين من الرقشات والامجاد
الله كريم غايتو
النخوة العربية
| |
|
|
|
|
|
|
|
|
|
Re: دة اسمو بوست الزهج..... (Re: Lark)
|
لارك
ما تزهج يا اخى
الزهج دة ما كويس
كدى اخد نفس عميق واشرب ليك كباية عصير باردة
اخد باقى اليوم اجازة من الشغل
ما تنسى قبل ما تمشى البيت تتمشى
شوية فى الرياض الغناء الورا البناية دى
من بكرة حنديك مكتب جديد باثاث جديد عشان حليت مشكلة تكنولوجية بالطريقة المنطقية دى
الكمبيوتر ما هم
الروح بتروح
المهم اعصابك تكون هادئة
وبعدين الزهج دة ما كويس
زى ماقت ليك
الواحد ليه يزهج؟؟
الدنيا دى ما حلوة،واسعة، وفيها كل جميل
لكن احيى فيك روح القتال الايجابى ضدالبياخات الروتينية
والثقالات العملية
والحلول الما عملية
لارك
اها انا الزهج زاتو خليتو
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
تماضر
قت ليك
ما تزهجى
ما ح يحصل اى حاجة
انسى انك زهجانة
انسى
اشغلى نفسك بى شى تانى
شى جديد او حتى قديم
و طنشى
بعد شوية الزهجة بتفك
بس عشان الطناش دا
لكن الزج برضو عندو فوايده
بخلى الزول شجاع شوية
اشجع من الاول و بالتالى لو عندك قرار مترددة فيه, نفذيه طوالى
قبال زهجتك دى تفك
و هى ح تفك ح تفك
ماتـــــزهـــــــجى
لكى الياسمين
و للمزهجنك الرماد
| |
|
|
|
|
|
|
|
|
 Re: دة اسمو بوست الزهج..... (Re: Lark)
|
يا زوله انشاء الله زهجه زي دي بركه الله ما تفك ،دي زهجه حلت صواميل
زهجنا ،الله يزهجك طوالي ،زهجتك بلت ريقنا ،وفكت ضيقنا
التحيه للما اعتياديه ،ويلا يا غالي ازهج طوالي
| |
|
|
|
|
|
|
|
|
|
Re: دة اسمو بوست الزهج..... (Re: fidyas)
|
فدياس
انت فرحان وانا زهجانة؟؟؟؟
دى صحبة شنو دى عليك الله
والله دى شماتة لاتضاهى
تضاهى؟؟؟
كلمة عجيبة تانية
بتنفع لى عيد الضهية
عيد الاضهى المبارك
انا غايتو تضاهتى حادسها لى عيد الضهية
انت تضاهتك ان شا الله تبيعها، التضاهى اليومين ديل غلت والضرايب عليها ارتفعت
كل زول يلم تضاهته ، ويتضارف عليها
احسن الزول يضارف ويمشى القضارف
خلاص كفــــــــــاية يا تماضر جننتينى بى جنك
شكرا فدياس
| |
|
|
|
|
|
|
|
|
|
Re: دة اسمو بوست الزهج..... (Re: Lark)
|
واصلي في زهجك يا تماضووووووووور
والله زهج مجيه جيهة
انقلب مسرح عديل
حقو تضيفيه لي تعالو نلعب مسرح مسرح
كمية من السخرية والضحك البي معني
وخيال واسع سعة غريبة
والله لما اتخيلت موظف استقبال الكبانية بيقول
هاك كلم قمارينا ويكون العاوز يكلم قمارينا ده
تعبان شديد وواقف في الصف منتظر دورو
وداقس من شدة التعب والخطوط ما بتجي والموظف بعد محاولات كتيرة يقول ليه
هاك كلم قمارينا
وكمية البهجة والامل والترقب
والخوف واللخبطة وعدم التركيز
الو الو
انا هسي منتظرك في السوق العربي
الو سامعني قمارينا
لا لا لا ما في حاجة بس ده صوت عربات السجانة بالنص
اسمع اسمع انت
ويجي صدا
كم كم
ما عندي بطاقة
ما عندي بطاقة
والمكالمة تنتهي بدون ان يصلوا لي نتيجة
والمكلم قمارينا حق الرجعة ما عندو
وبعد دا باقي ليه يكلم لي عيونك
وحكاية النخوة ونسبتها لي عربيتك
في هذا الزمان الكركباني
وتحويل الكلمة الي نخة عربية
عليك الله كلام الزهج ده ارجعي ليه تاني بتلقي فيه
مسرحية راقية رقي خرافي
ومنوط بك ان تشذبيه
لمسرح
وبعدين في ردك علي قريت عبارة
وهندي حلم اسمو الوطن
هي جاءت غلطة طباعة لانو العين جنب الجامع في الكي بورد
لكن حتي غلطات الزهج بتجي في شكل كوميدي
لانو فعلا الوطن اصبح حلم هندي
وخليهم لما يزرعو ليك مشروع سندس الزراعي
اخضاااااااااااار ومشروع الجزيرةابيااااااااااض
وناكل مما نقلع
ونلبس مما نقطع
حا يكون فلم هندي
رهيب
| |
|
|
|
|
|
|
|
|
|
Re: دة اسمو بوست الزهج..... (Re: nazar hussien)
|
انت برضو هندك حركات مسرحية يا نزار
الهندى انا ما بدى
لوووووووول
تتصور فى زول هندى فى السودان صاحب ناس فرقة الاصدقاء ، لما الزول يقول ليه كلام ما معقول ، يقول ليه : انت هندى؟؟؟
دى نسميها شنو؟؟؟ اسلمة محلات تفوير الساتك؟؟؟
سودنة الهنود؟؟ ولا هنددة السوادنة
شكرا على اعجابك بى جنى الزهجى
لكن دة كلو ما بخلى الزهجة تروح
الاقى معاك خمسمية دولار؟؟؟؟
| |
|
|
|
|
|
|
|
|
|
Re: دة اسمو بوست الزهج..... (Re: Lark)
|
اشمعنى؟؟؟؟؟؟
اشمعنى يا لارك بتقدر تنزل غنية وكاريكاتير وفيديو
بكل بساااااطة كدة
وانا ما بقدر؟؟؟
اشمعنى؟؟؟؟
مع انو كدايسك لذيذات ، لكن انا بغرانة
الا تورينى كيف
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
تيما ،، وتمومة ،،خلعت همومة ،،لبست هدومة ،،عملت عزومة ،، يا بت [شمين] جنك كلكي ،لابس ملكي بجماع صوتي الهادر ضحكت ضحكت وإنسربت متعتي بى جنك الشفيف الخلاق وإنداحت حتى زميلتي التي سرت فيها عدوى الضحك فاطلقت لصهيل ضحكتها العنان وكانت من الصباح عابسة فكافاتني بقبلة ارسلتها على الهواء مباشرة ،تفاديتها بصعوبة بالغة فإرتسمت على الجدار ورائي متخذة شكل الشفاة ،ولامانع عندي من تصديرها لك مغلفةبإعتبارك السبب في كل هذا والله يجازي الكان السبب جزاءآ جميلا ،،،ويا خيتي لمي قمرك عليك وشوفي ليك واحدغيري ودقسيهو ،القمر بعد ما كشف الدرين دمامته واماط [أها أماط ماخطر من منوط بتاعتك] اللثام عن وجهه القبيح ما بدقس ليك احسن لي جبرة ولاجبرونا ولازقلونا وكل مناطق الإقصاء العرقي ،، تيما خصمتك بالنبي [معارف خصمتك دى معناها شنو حاولي اصليها لي وافيدينا] ارنب نوط تراني منوط ده ماياهو الجن المبدع زاتو ،،،نرجع لموضوع القماري هل تصدقي إنو أعذب بيت شعر في القماري كتبو زول موتور وعمائلو عمايل زول مجر خط كتب سبدارات ،،،كيف تقوقي علي نخيلاتنا القماري ،،،وإنت واحش نيل وطنا علينا شمت الصحاري ده معقول مش ياهو البمخول ،ماعندي مانع افك فلسك واسلفك لكن بالتحويل من حساب لحساب وهذه إلا يفكها ليك هاشم كرار او محمد محمد خير وولد خضر البنقز ده ذكرني علوب واحد من شخصيات الخرطوم النمطية بينطط كدة في الحفلات تلقيهو في اي حفلة مرة خليتو في حفلة في نمرة تلاتصومشيت مناسبة اخرى في الديم لقيتو بينطط والمدهش إنو احدهم صرخ من الهشة ،،ياعلوب والله بالغت هسع انا ما خليتك تنطط في الإمتداد كانت ايام هي المدير تاني جه يلا باى نق تربيع وبالمناسبة عايز افتح بوست عن موضوع نشر الرسئل الخاصة الذي إبتدرته [امسكي دي كمان] غادة السمان بنشر رسائلها مع كنفاني وتلتها ديزي الامير مع منو ماعارف ثم بين محمود درويش وسميح القاسم وبين منو ومنو ولا شنو رأيك ؟
| |
|
|
|
|
|
|
|
|
|
Re: دة اسمو بوست الزهج..... (Re: أبو ساندرا)
|
ابو ساندرا العزيز
الفضل يرجع للالهام الجايينى منكم ومن صدى الزهجة الكلكية فيكم
ولو ما اديتنى القروش حاكلم ليك ام ساندرا واقول ليها زميلتو فى المكتب اطلقت لى ضحكتها العنان " العنان دة منو؟؟؟؟" ورسلت ليه بوسة فى الهوا
بالمناسبة ايميلى ابى يقبل ايميلك يقدر ايميلك يقبل ايميلى زى ما ايميلى قبل ايميلك؟؟؟؟
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
تحيات عاطرات يا استاذة تماضر و انشاءالله الزهج مايعاودك كولو كولو...بخصوص الكارتون والاغاني والفديو دي بتتم باستعمال ابجديات برمجية بسيطة ..في لغة برمجية تستعمل في صنع البرامج الكمبيوترية ودي اسمها هايبر تكست بروغرامينغ لانغوتش وفي اللغة دي نجد ادوات تسمي التاغ وعن طريقها يمكن للمبرمج انجاز العديد من المهام زي الصور والاغاني وغيرها واللغة دي يا استاذة من الغات الرئيسة التي تستخدم في تصميم صفحات الانترنت ..اها طبعا انت دايرة شوية دروس في الكمبيوتر طبعا انا محلل و مصمم برامج كمبيوتر وبرحب بيك في فصولي الدراسية وده الايميل بتاعي اضيفيني في لستة الماسنقر بتاعك [email protected] واتمني ان يكون الشرح بروعة ادائك في شرح حصص التمثيل المسرحي و رهافة ذوقك الفني دومت دوما
| |
|
|
|
|
|
|
|
|
 Re: دة اسمو بوست الزهج..... (Re: Lark)
|
الاستاذة تماضر الحكاية شنو الزهجة لسع ما فكت ولاشنو على وزن ....ما فكت
قلتي لي عائزة تتحجبي على وزن تتخضرمي والله اقول ليك حاجة اول حاجة شوارع الخرطوم ومواصلاتها العامة اصبحت مكان للعرض والازياء الفاضحة فلاانضباط ولانظام عام ولا هلمجرا الكان زمان الجماعة ديل طارت ليهم وقالوا احسن حاجة يخلوا الناس ديل براحتهم ويشغلهم عن المظاهرات وغيرها من السبل المناهضة لهم ..اما الحفلات الخاصة والعامة فحدث ولاحرج لبس فاضح محذق كانه مفصل على الجسم وخيط عليه عشان الناس اصبحت ملهية بهذه الاشياء الفارغة وهذا قليل من كثير ...
والله هنالك ياتماضر زهج ابدا مافي كل خميس الواحد يانادي الضابط مع ود الامين او كازينو النيل الازرق مع عقد الجلاد يعني كده بالواضح الخميس هنالك لسع برونقه وجماله والقه الذي نفقده هنا حيث لاخميس ولاجمعة ولايحزنون آلة للعمل فقط
متين اشوف الخرتوم
| |
|
|
|
|
|
|
|
|
|
Re: دة اسمو بوست الزهج..... (Re: ebrahim_ali)
|
زهرة المدائن تماضر
فداك كل آلياتنا المتاحة والغير متاحة ترفيها عن حالتك
وفداك عمرا قادم نهديه لك عن حب ليسعد ويسعد كل من حولك كما هو ديدنك !! ولاتسألينى عن مفردات تتخضرم فى بوستاتى
كنت منذ يومين أتحدث مع الحبيب حمزه سليمان فأول كلامه قال أنه زهجان وخلاص لم يعد يحتمل ولكنه يعرف فك هذه الزهجة فى الرجعة للبيت الكبير كما قال
وعندما ينتابنى هذا الحال أجد عزائى فى ترديد كل أغنيات الشوق والحب والهيام واللوعة والولهة والغياب الخ وتسيل من عيونى دمعات سخينة وبعدها أشعر بالراحة ربما هذه هى ادواتى للتعبير
وأنت ايتها الحديقة فلن تغلبى فى أن تجدى وسيلة للتعبير لأن مواهبك لاتحصى فقط اشعلى فتيل الالهام وتخضرمى
| |
|
|
|
|
|
|
|
|
|
Re: دة اسمو بوست الزهج..... (Re: ebrahim_ali)
|
ابراهيم على
هلمجرا؟؟؟؟
الذ قصة اسمعها عن هلمجرا دى فى واحد مسرحى ، مطلق وعندو بتو صغيرة قاعدة معاهو، كل خميس بوديها لى اهل امها
فالكلمة كترت ، واديها اهل امها
جايبها من اهلمها
بقى يقول
واديها لاهلمجرا
ومازال الزهج طفلا يحبووووووو
| |
|
|
|
|
|
|
|
|
|
Re: دة اسمو بوست الزهج..... (Re: Lark)
|
لارك
لا رك الله زهجا فى عزيز لديك
ال
html
بعرفو لكن ما متبحرة فى العلم
والله عندى غنا غريب جدا جدا وشرايط فيديو نادرة لكن الخرابة دة الكمبيوتر ، ما مساعدنى ، مع انو
windows xp
والله جديد لنج مشترياه عشان المنتدى دة لانو بجيب لندن ، اقصد بجيب عربى
لكن انا ما صبورة واقل عصلجة بفط ليك الموضوع طوالى
اضيفنى انت لى الماسنجر بتاعك
وحاديك الايميل فى مكان آخر
شكراااااااان جزيلن
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
تيما،،،نوارة فريقنا [الاول] دومة منبر الحوار طبعآ وعلى حسب توجيهاتك في التاصيل إمتنعت عن تعبير تفاحة ال...وذلك دعمآ للفاكهة الوطنية وعليك الله إحتظي لي بكركعوبة دومتك [أوي] عشان نديها الجماعة التشكيليين ناس عصام عبدالحفيظ ومعز عجيمي ووليد وراق وهلمجرا ...،،و[العنان] ده والد السيد كوفي باللبن ...،،،القريشات مافيهن اي مشكلة او بالتعبير الوافد للسودان ماعندك مشكلة اي واحد يقول ليك كدة وتلقاهو هو زاتو المشكلة فما عندك مشكلة إلا مشكلة بسيطة مع أم ساندرا فلو حكيتي ليها موضوع البوث ديو ده وعرفت انو ضغط وتهديد عشان القريشات محايكون ليهو اثر هي اليومين ديل حا تتغاضى عن إي شي بس ماتهبشي القريشات غرقانة في بناء الفيلا [ إنتي المبيوتر ده مافيهو الفاء المعطشة الجاية من المويلح] ألآن كل مقدرات الامة مجيرة لدعم المجهود الفللي اللابس ملكي فما تحاولي....،،،موضوع الرسائل فالنتفق اولآ إنها ومع خصوصيتها تتحرش بالعام يعني لو طالعنا رسالة من عبدالخالق لأم عمرو بالتاكيد حانطالع إلى جانب الأدب الرفيع واللغة الرشيقة حانطالع تحليل لوضع ساد حينها او معلومة قبرت طي الرسالة او ،،،،الخ...عرفت إنو أحمد البكري كتب لإبتسام اروع الرسائل وبها ابداع عالي النبرة فلماذا لايحجبوا الخاص ويتيحوا العام وروائعه وكذلك الموصلي يقال إنو عزف لسكينة سيمفونية تضاهي اعمال موزارت وشابان دالماس [ده منو ده] وكذلك عرفت إنو عبدالله عبدالوهاب [كارلوس] كتب وقرني كتب والراحل العزيز عميرى كتب والخالد مصطفى كتب بل انه ذات يوم قرأء لي من الذاكرة مقطع مهول وقال رحمه الله ورحمنا إنو [جننتها إنو دي] ندمان عشان ما إحتفظ بنسخ من عدد من الرسائل التي وصفها بالمدهشة وكذلك اعرف إنو سيف الجامعة صاحب قلم رهيب وسامي سالم في الحب وعلم الجمال والفلسفة ومحمد محمد خير لديه رسائل الاخوانيات والسفسطة والسفسفة وهلمجرا ،،ماذا لو ،،نوماذا إذا و التحية والإحترام ل و[لذكرى] كل من ورد اسمه في الموضوع وتسلمي نسيت واحد من اعظم وافضل من كتب الرسائل المقصودة المبدع علي عوض وآخر هو عوض الفاضل .
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
صباحاتكم
بنكهة
شهوة
ايغال
المطر
تراب
شارع الثوره
بالنص
عارفه يا تماضر
امبارح كنت زهجان
حد السببه
والنقنقه
وكل ماعملتو
انا فتحت بالبورد
بالقلبه
يعني من اخر صفحة 100
وانت جاااايا
وما عارف
لو الواطه حرت اليوم
ح اعملها ولا لع ؟؟
| |
|
|
|
|
|
|
|
|
|
Re: دة اسمو بوست الزهج..... (Re: Tumadir)
|
تماضر صباح الخير
زي زهجتك دي في السودان كنتي بتسوي ليها شنو
بعدين سوال تاني
زمان كان الناس فس السودان طوالي زهجانين
هسه اتشتتو في كلو مكان
قربنا نصل القمر و لسه برضو زهجانين
الحكايه شنو و لا دا عصر العولمه يعني حتى زهجه الزول معاهو مكان ما يمشي
طيب الحل شنو نطير وين ولا نقع وين
حكايه بره الموضوع
قالو في سوداني مشا ليهو جزيرهمقطوعه كدا اظنها اسبانيه
اها لقى ليهو سوداني هناك اها مشا ليك عليهو قال يسلم و كدا وطبعا فرح ليك شديد
اها صاحبنا قام ما اشتغل بيهو الشغله و فتح ليهو
بعد مده قامت الحكايه دي حرقتو قام فات سالو ليك
قام قال ليهو ياخي ماممكن انا جيت هنا مخصوص قلتا عشان ما الاقي اي سوداني اها لما جيت انتا قامت قفلت معاي
سوال تالت
احنا بقينا كعبين للدرجه دي و لا الزمن و الظروف غيرت فينا كتير لي درجه ما عايزين نلاقي بعضنا
تحياتي
| |
|
|
|
|
|
|
|
|
|
Re: دة اسمو بوست الزهج..... (Re: ايهاب)
|
تيما تيمومة ،،للجرتق تمومة ،، للفرح قيدومة ،،موضوع ادب الرسائل شايفو إنفتح في بوست جديد مستقل وراحت علينا وبي اثر فقدك شعرنا وكفى الله المناضلين شرف القتال ،،،انا زاتي منو ،،والله ده السؤال المأزق لأني انا بسال نفسي السؤال ده في اليوم الف مرة انا منو ،وعايز شنو ،وجاي من وين متذكرة حكاية الاعرابي وكثرة الاسماء هذه الكثرة لن تفيك في شي يعني بلاضافة لابو ساندرا برضو ابو ماهيتاب وفي اروقة اخرى ابو التومات وزي ماقال احمد عكاشة في ترحيبه بي [شايفك رحبتي] ابو البنات يعني اللبوة كاتلاني ،،وما قلنا ليك بالبريد الالكتروني ،أوكي ناس الياهو [والياهوني] نكروني مع إنو بكري ابوبكر جاني عبره والياهو الحرامي ده ما نكرني قبل صياح الديك مرتين ،لكن قصة اكشف نفسك ولا طلع [بطاختك] ولا ابرز لي دي حاتدخلنا في حيص بيص [ديل تيمان وين] وانا زول بنزل الخرطوم [واحيا] وبعدين نتعرض لي سين وجيم [وديل برضو تيمان وين ولا شفتهم في ياتو فليم هندي] كدي راجعي محمد عبدالرحيم قرني بحكم علاقات الحي والهم المشترك ،اها دي معلومة لبيرة جدآ ومابقدر ازيد [صدقني ما بقدر أزيد] واخوك [انا] بلغت[يادوب] من الكبر عتيا وكذلك بلغت الروح الحلقوم وبلغ السيل الزبى الليلة كلهم ,وماعدت اقوى على حمل الاذى وحدي ومافيني شدة [مستردة] كف واحد بجيبكم كلكم عشان كدة عليك الله خليني اربي البنات ديل وسيبك من حكاية اظهر وبان عليك الامان [عندوم] وصباح السربعة و ووووافر الاحترام
| |
|
|
|
|
|
|
|
|
|
Re: دة اسمو بوست الزهج..... (Re: ايهاب)
|
يا ايهاب
دة زى الساق مرتو ومشى بيها الشاطىء
هروبا من القيود والتحفظات ، فى ىخر بقعة فى الكرة الارضية ولبسوا المايوهات وعاموا
اول من جوا طالعين
سمعوا ليك الصوت السوداااانى ما يغباهم
السلام عليكم
الراجل لقى روحو ملخوم بقى يقول لى مرتو :
يا وليه امشى البسى الجماعة ديل وصلوا
| |
|
|
|
|
|
|
| |
Tumadir
sharnobi
أحمد أمين
ود شاموق
AnwarKing
مبيوع
wadazza
الجندرية
tmbis
ايهاب
Dafi
Abomihyar
ebrahim_ali
منوت
mohmmed said ahmed
.... يفضلو اليوم كله فى المطبخ
أبو ساندرا
اسامة الخاتم
Husam Hilali
khider
عزيز
Alsa7afa_30
فيس بوك
تويتر
انستقرام
يوتيوب
بنتيريست