|
|
 احترامى اليك....من صميم قلبى...غير ما اشعر
|
فى زمان كانت امى فيه ممشطه ومحننه..ومشلخة عارض..وما ميته
امى فاطنه (مرة ابوى) ممشطه ومحننه ومشلخه عارض وما ميته..
وابوى اخدرا طويل..بشوووش..ومشلخ سلم..وكله حضور
وبيتنا فى السابعه مفتوح على سهلتين..واحده شرقيه وواحده غربيه...
ويومنا ببدا ..وبنتهى..والابواب، زى ابواب الرحمه ..تدق و تجيب..فى الحبان..
اطفال يجوا يلعبوا
نسوان يجوا يتونسوا..ويضحكوا..
رجال يجوا لى مكتبة ابوى وونستو
ناس بجوا يجتمعوا..
ناس بجوا يذاكروا
اولاد يجوا بعد الكوره يشربوا مويه..ويتشطفوا..
بنات يجوا للبنات..
مثقفين..وزملاء ومذيعين و فنانيين وكتاب وتشكيليين وممثلين وممثلات..
يجوا لكل زول فى البيت..ونحن تستعتاشر..من الامهات الاتنين وقولواماشالله..
(اغلبنا بقى فنان..)
وعفاف شيخ الدين بتعزف عود..لانها اتخرجت (بشرقى) من المعهد العالى للموسيفى والمسرح..
ولما يترصرصن البنات فى حوكرية العناقريب ..المفرشه بالعصر والشاى يدور...
تعزف عفاف...
انا فى شخصك..
بحترم اشخاص...
وفجاه ينشق عنان..الساحة، الالفه
وطااااااابعن عندى احترامك خاص..
احترامى اليييييييييك من صميم قلبى..ى ى ى
غير ما اشعر...
اغنيه غريبه..
فيها احترام..
الناس فى السودان بتتكلم عن الاحترام..لكن ما بتغنى ليه..
بتتكلم عن الحب..لكن ما بتربطوا بالاحترام..
احترامى اليك من صميم قلبى....غير ما اشعر
اليومين ديل الغنيه دى مدوره فى راسى..
اغنيها..بدون صوت..جوه..شغاله زى الاسطوانه..
اتفانى عليييييييك والدليل حبى...تسمح تنظر..
وناس امى محننات وممشطات..ومشلخات..فى نص النغم..فرحانات بينا..
وابوى ..لما يسمع غنانا..بجى.
اتخيلو ..يجيب ضيوفو ويجى..
وكل اصحابنا وقرايبنا واهلنا البجوا..وفى المناسبات الحلوه..او حتى العصريات ام همبريب..ومع هفهفة الملايات بالعصر...
يغنوا..
احترامى اليك..من صميم قلبى..غير ما اشعر
واثناء ما انت بتغنى،
تتلاقى عيوتك فى لحظه..جميله
بام
بابو
..باخت
باخو..
بطفلة جيرانكم.
.بى زول بقرا معاك فى المعهد
بعيون بت خالتك
او عمك..
اخخخخ..
ليه الغنيه دى معذباااانى كده..
وشوف دموع عينى
سايله فى خدى..
ومن لهيب الشووووووووق
برضو مافى خلاص
هكذا يا ظالم
جزا الاخلاص..
ياسيرة البيت
ياسيرة العشرة الطيبة
ياسيرة الدنيا الولت وراحت..
ياسيرة الناس الحلوة
ياسيرة الزمن الفات..
الف سلام
واحترامى اليك من صميم قلبى غير ما اشعر.....
*******
بس ليه الغنيه دى معذبانى كده اليومين ديل؟؟
|
|
 
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
انا برضو يا تماضر الغنية دي بحبها جدا
واعتقد ان الاحترام هو عامل اساسي في الحب
وارجو ان تسمحي لي بان اورد مقطعا من احدى قصائدي عن ذلك:
"غريبان ,
ماذا تبقى لنا في زمان السقوط سوى الصور العاطفية,
والقبل المروحية,
والحلم,
والاحترام العميق؟؟؟؟؟
ارقدوا عافية
المشاء
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
العزيزة تماضر
تحياتى لك وللاسرة الكريمة
الاغنية جميلة جدا ومن الاروع ان تسمعيها عند الرايعة سميرة دنيا
بالمناسبة زمان كان عندكم سهرة فى التلفزيون انت واختك البتعزف عود وغنيتى ليك اغنية جميلة
وهى القماري قوقن يايمة ، فارجوا ان تتحفينا بيها فى هذا البوست ، وانا عندي تسجيل فيديو
للسهرة كاملة ، انت واختك والنجمين محمد نعيم ومصطفى الخليفة والفنان عبدالعزيز المبارك على ما اعتقد
مع تحياتى
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: ودالعباسية)
|
أنا يا ود العباسية ما طلبت مني أي حاجة لكن عندي مزاج أغني ...
خسوسا أنو هنا مافي زول بجيب خبر صوتي "السمح" ده....
جسمك حرير ملف ...
القماري قوووووووقن يا يمة
لا هده لا ما عرف شنو كده ...
قووووووووووقن يا يمة...
ترت ترارارم
قوووووووووووقن يا يمة...
القماري قوووووووووقون يا يمة
الفانا بالنيسان القماري قوووقن يا يمة
أنا دي سمعت من الحنينة بت الحويرص
لاااااااا حولاااااااااااااا
غصبن عنك احاسيسك تتكرفس و تنفرد و تقوم ترقص
قوووووووووووووووقن يا يمة
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Mandela)
|
مانديلا
الحجه ما خلقان القمارى قووووقن يايمه
الفانا بالنيسان
بريق العينه العام
ما خلى زول عطشان القمارى قووووقن يايمه
جسمك حرير ملف
لاهد لاكشف
كان القى لى حلف
ليه ديمه بتاسف
جسمك حرير ردوم
دلابا بجيب اللوم
ابراه مسافة يوم
البتطلون بحزامه
لى البعرفو تظامه
اخوكى ياابتسامه
فى ليبيا عندو اقامه
فتيلى ياب فله
سافر مع الشله
وكتين يغيب ويجى
بضوى الفريق كله
الصندل اب قوه
اب ريحتن حلووه
هيا جرح جوه
بشكوكا لمنوه؟؟؟
وهـكذا تمضى الانشوده..با اخا العرب ...ههههههه
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: ودالعباسية)
|
ود العباسيه...
طلبتك بالمصطفى...ترسل لى الشريط ده...
بس قول لى "طيب" وانا بتحمل كل المشقات..
ياجماعه نحن تاريخ ما عندنا..والحاضر يكلم الغايب العندو سهرة "الهدهده" الفيها انا وعفاف الصادق ورشا اختى
مطلوب بالمصطفى يرسلها...لى
او اى شغل من التلفزيون..الزمان.
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
تماضر
تعرفى الغنية دى بتنط لى من وين ما عارف . تاخد ليها صنة وتانى بتظهر
هى ومعاها كمان - غتية انصاف
انصفنى يا روحى
وفى غنية بتعلق معاى فى الصباح بدرى قبل ما اصحى كويس
غنية انت حكمة ولا آية ولا انسان
فى غنا لذيذ وطرى وعندو طعم غالبنى اعبر عنو
وما بعيد عن الكلام دا
اغنية غضبك جميل زى بسمتك . انا باتخيل شاعرها لايوق لياقة ما عادية
اتصورى انو زعل المحبوب بكتابتو عن البسيمة وبعد ما فقع مرارتو بالاشعار الحلوة قال ليهو غضبك جميل زى بسمتك . بالله فى لياقة احلى من كدا
واصلى عن ضل العصرية وكفتيرة الشاى واللمة
تسلمى
| |
|
|
|
|
|
|
|
|
 Re: احترامى اليك....من صميم قلبى...غير ما اشعر (Re: Al-Masafaa)
|
عزيزتنا تماضر
تحياتى الخاصة للاخت عفاف ، المرة الاخيرة اللى مشيت
فيها السودان قدمت زيارة لى عفاف وفى خشم الباب
لقيت ماشاءالله صبى طويل القامة زى امه ، إكتشفت إنو ولد
عفاف قلت يا ألطاف الله انا طلعت من البلد يمكن قبل ما يعرسوها
دخلنا جوه ومعاى هاشم هريدى تخيلى فى الاول ما عرفتنى ، قلت يا ربى كبرت للدرجة دى المهم استضافتنا كعادتها والعود شايفو
فوق الدولاب . فلها تحياتى الخاصة والسلام امانة
احمد ساطور- وكمان لحمة ساطور زى ما بتقولى
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: ترهاقا)
|
بالله يا تماضر كيف بتقدري تنقلي احساسك بالبساطة العجيبة دي
يا بختك بذكريات في غاية الجمال عارفة هذه
الاغنية كانما تم تلحينها لتغني فقط بالعود
انا بتذكر اغنية كان ثلاثة من اساتذتنا في المرحلة المتوسطة
بمدرسة الخرطوم جنوب
بيغنوها مع بعض للفنان حسن سليمان
... ما شقيتك و انت الشقيتني راعي نص الهوي و الغرام ...
سمعتها مرة بصوت حمد الريح
و مرة غناها مصطفي سمعتها و انا راكب حافلة
زينة الازمان لو تبسم
نغمة المزمار لو ترنم
الدرر تنساب لو تكلم
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: ود العجمى)
|
تماضر انا الأن اسمع بنت الحويرص و هي تناجي اخو ابتسامة....واعاني من تكرفس حاد في المشاعر أعلى شمال الجسد. شكرا طريا
ود العجمي .....
جيتني في مقتل....
أنت صاااااااحي و لا ناااااااايم
و لا طرفك من طبعو نعسااااااااااااااااااااان
أنت حكمة ......و لا آآآآآآآآية
و لا انسااااااااااان
أنت ص ص ص ص ص صاااااااحي....
أنا مالي اللييييلة مع الغنا...؟؟؟؟
اتنمنيت اقول ليك "سبب نزول" اغنية غضبك جميل زي بسمتك . لكم بيني و بينك الرقابة الحامية الناس الكتابة...
لا تتطيب الاغاني الا و أتذكر...
"مسو نوركم شوفو في جبينها صباح
و الصباح أن لاح
لا فايده في المصباح..."
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
الاحترام وقود المحبة.. والأدب وقود الاحترام..
قال المصطفى عليه السلام: "أدبني ربي فأحسن تأديبي ثم قال: خذ العفو وأمر بالعرف وأعرض عن الجاهلين"
والمحبة الحقيقية لا تكون بدون احترام، ولا تكون بدون أدب..
ألم تسمعي:
يا رقية الراقية وأديبة
ذوق وأخلاق وجمال وطيبة
والرجل الذي لا يحترم المرأة لن يحترم الزوجة.. والذي لا يحترم الزوجة، "مرق من الجنة وسقطا"..
تماضر، أخدرا طويل ذكرتني الحجوة الشهيرة..
أبوي أخدراً طويل ياااااجلابة
توبو توب حرير يا جلابة
جملو الهدّير يا جلابة
سوطو الوروير يا جلابة
ولكن دعونا نغني للمستقبل.. شاهدت اليوم حفل تخريج ضباط وضابطات شرطة من خريجي الجامعات والفنيين من الفضائية السودانية.. برغم كراهيتي لنظام الانقاذ إلا أنني أحببت منظر هؤلاء الشبان والشابات ورأيت فيهم وفيهن أملا بمستقبل أحسن في السودان..
ويا ود العجمي، أو خالد الحاج، بالله سمعونا أغنية تماضر دي لو عندكم..
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
واثناء ما انت بتغنى،
تتلاقى عيوتك فى لحظه..جميله
بام
بابو
..باخت
باخو..
بطفلة جيرانكم.
.بى زول بقرا معاك فى المعهد
بعيون بت خالتك
او عمك..
يااااه
كم تعمقتي يا تماضر في وصف تلك الحالة الروحية العميقة لما نغني اغنية تحمل في لحنها وكلماتها ملامح ناس وزمن
والف سلام لسيرة زمن جميل ولى و زمن جاي وزمن احلى
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
ان في البيان لسحر
هذه اللوحة التشكيلية الرائعة التي رسمتها تماضر
بالكلمات في لحظة شاعرية لتمسك بزمن مضي و انقضي ذكرتني بقصيدة الشاعر المهجري ايليا ابو ماضي
وطن النجوم انا هنا
شكرا تماضر لهذه اللوحة ..ولا املك الا ان اقول للجميع قدموا لها الاقلام الملونة..فانها تحب الرسم
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
خناس
قلت لروحي يعني كل ما تكتب تماضر أناأعلق؟
المرة دي أصلي ما ح أرد , و قريت البوست و كالعادة أعجبني لكن لئلا يكون كلامي {زائد} قمت جليت الرد و مشيت بقيت أشوف البوست بي فهم
أعاين ليهو و اضحك
اضحك
واجري و أجيهو راجع
فقلت ياخ دقيقة
هي هترشة تفوت و لاحد يموت
جميل غناكم و زين حالكم
أقرب فرصة تكلمي عفاف قول ليها سلللمي على المصباح المنير, و غني لي :
دامعتا الشووق كووبي
حكم حبي أرعى نجم الليل ياااا
و أوهبيها لي زول مسكين بردان محروم و....
مظلوم
لك معزتي
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: دورنقاس)
|
ولو شفتو يا دور نقاس الله يمد فى ايامو..عالم متفقه..فى الدين ومتبحر فى العلوم الانسانيه..واحساسو باللغتين الانجليزيه والعربيه عالى فى الشعر والادب.. ونكتتو حاضره..وبتذوق الغناوناقد فنى لاذع..ولطيف مع كل الاعمار وكل الانواع من الزوار..ووناااااااس ..
وخلى زول واحد دخل بيته..ما طلع منه بمعلومه..او ضحكه..او بيت شعر جميل..او انبهر بكرمو ومقدرتو على العطاء..
وشكرا للانتباه لذوق الراجل العالى..
الله يمد فى ايامو.. (ابو الصحب) يوم شكرو ما يجى.
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
انتو قايلين..النت ده ما فيهو احترام خاص!!!؟
اسمو مبارك الشريف..من طابت بيبل دوت كوم
غناي جدا..والقحه الفي نص الغنيه ده اكتر حاجه بتذكرني السودان
زماااااان يا تماضر..
كنا بنتلم للمذاكره..في التسعطاشر..البيت الجار ناس هاله قوته..ويمني قوته ديل..حيطه بي حيطه..ويتلمو علينا ناس الحله
والعود..وحفاظة المويه تنقلب بنقس..والجيتار ..والحله يجقلبان
مره في واحد اسمو شاربه...وترجمتها
The one who drank it
انا ما عارف سموهو شاربه ليه!!علي اي حال..عمل الحله..وكتر الشطه والبهار..
مدني محي الدين..بعد ما اكل..مشي شرب مويه وجاء..في نص الغنا..قال ليهو..مليتها شطه..وقعدت!!!??!!راسك الغليد ده!!!
وانقلب الغناء..الي ضحك معافي
هذا فيما يخص الاحترام
ومن لهيب الشوق..برضو مافي خلاص
والسلام
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: الطيب بشير)
|
شكرا يا تماضر علي ذكري الاحترام الخاص
وشكرا دافي لانك حليتني من ورطة اغنيها براي
وارفعها في النت باتيانك للشريف برغم قحتو
فهي قطعا افضل من صميت خشمي...
بحثت عن هذه الاغنية يا تماضر في كل ما املك من شرايط قرابة المئتين شريط..
طبعا في شرايط كتيرة ما سمعتها اصلا...بهلتها قدامي زي التمر وبديت افتش...مع انها من اولي الاغاني الحافظها صم وكنت ارددها زمن الجمعيات الادبية زماااااان بالعود...
اها الشرايط مبهولة...محمد الامين لا..عثمان حسين لا واجدع..عثمان الشغيع لا واجدع..الكاشف لا واجدع..ثنائي اي حاجة لا واجدع...
لامن وصلت ساورا وجدعتهن كلهن ومسكت العود واتوكلت غنيتها براي
احتراما خاصا لك...تماضر..ربما لن تعرفي حدوده ابدا...
والشاهد يا قول العجايز لقيت دافي نزلها...وفكاني من ورطة وبقي احترامي لك في محله...
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: nazar hussien)
|
تماضر ليتنا نشد الرحال لتلك اللحظات ولا نرجع ، ابدا سفر ولو انه مستحيل ، كنا نعيشها طولا وعرضا واحتراما وحوش كبير بناسو وعم شيخ الدين الرائع وعشة ورشاوكتاب كيمياءفي يد رشا وتبارك بشقاوة لا انساها واعين ملى بالذكاء والوافر نسمة سماحة الخلقة والاخلاق والحوش التاني عامر بشلوخ يمة فاطنة وعفاف ومريم وخفةدم وسرعة خاطر متوارثة طبعا فعلا هذا ما نفتقده وناس خالتك امنه وبتها مريم داك كوم تاني ، ياسلام اما حكاية القماري دائما تنقلني الى الرحلات وسفرات المسرح لاني دائما اطلبها من تماضر فتصدح بصوتها واحساسها الدفاق ليك حق تتعبري يا تماضر وهانذي تخونني الدموع و....
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: nazar hussien)
|
| Quote: والشاهد يا قول العجايز |
اها انا بقرا وعيونى زى ناس افلام الكرتون..متابعات الشرايط البفنوا فيهم ديل ..شو شو شو
وقلبى يقول شح ح ح ..امكن شريط ينكسر ولا حاجه..
عينى دقشت الجمله دى...
انااااااايالله والعوذو بالله منها..
بركه الدافى جاب غنيتو..انت جيب حقتك..البوست بشيل اتنين..
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
تماضر
الباب الفاتح سهلتين دا
مشى وما برجع
بابنا ما بابكم
تعرفي ما كنت اكتشفت
الالم لكن اسي عرفتو
كنت بهرب منو
ليه كدا يا تماضر
ليه كدا يا دافي
جبتوها ليه حرام عليكم
كانت بتحبها شديد
ليه انا الدخلني
هنا شنو
تاني المويه دي
البوقفها شنو
الله يسامحكم
بابنا دا مشى زمان
وما برجع تاني
الحليوه الصغيرونه
تاهت
بقت فى حالة غياب
وحضور
ومن يومها
بابنا اتقفل
وابوي مشى وانا
ما شفتو تاني
وامي المشلخة مسخت
عليها قعدت الحوش
بقت تخاف منو
كلو ما تشوفها
ولسه بفتش عليها
فى الحوش
وهي
جنبي
الله يسامحكم
مع احترامي
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
تماضر .. حااف كدى
لحدى ما ايمان احمد ترجع ليك اللقب تاني
هذا البوست بشبه تماضر جد جد ..
وربما لأنك رجعتي للماضي رجعتي زي ما بحبك أنا بالضبط
يعني من غير عكلابة ونيش منفوش وووووو
أنت الآن .. الآن تماضر
هسي في بالله ما اشتقتي لي أهل العوض ومن لف لفهم
طيب ما سألتي نفسك لي ( طفشو )
بس بوست زي دا برجع اصحابك تاني
ويا داااب بديتي طحطرمينا
البوست للناس الدميعاتون قراب بكوا قبيييل والله
لو سمحتى .. اكلم دافى دا
يا زول انت جميل خلاااس
دكين ببقى ليك شنو؟؟؟
رحمابي
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: AlRa7mabi)
|
الرحمابى..
انت برضك "ضلالى" وتدعو الى "الجهلويه" ودايرنا ما نتبحر فى نبش القضايا الهامه المؤثره ؟؟؟
هاهاهاهاها
بالله كنت موجع منى ومتحزب ضدى مع اهل العوض قدر ده؟؟
يعنى داير الناس "تتونس" بس وتمشى بيوتا؟؟
والله عوجه..
كدى النشوف..
المهم بركه الجيت..واقعد فى العنقريب..تجيب ليك شاى احمر..وتغنى معانا..
شكرا للخوه..وانا فى شخصك ..بحطرم اشخاص
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
الرائعة تماضر
يا إبنة الرائع أستاذ الأجيال شيخ الدين جبريل(أمد الله في عمره) اّخر مرة رأيته كان عام 1973 فقد كان أشقاؤك هشام و أبوعبيده و همرور جميعا زملائي في الأهلية وكم جلست مرارا لوالدك في بعض العصريات التي أتحفتني بها الصدف الجميلة رغم ندرتها...لكن والله العظيم مازلي أذكر حتي وجهه (ذو السلّم)........لقد أنجب السودان دررا لا أدري إن كانت الأرحام هذه الأيام تسع من هم في مثل قاماتهم ....علماء( والله علماء) في كل ثانوية.....كل خريجي الأهلية يذكرون من هم في قامة والدك الفاضل: الأستاذ كرف...الدشين...نورين.......وغيرهم وغيرهم
أرجو أن نخصص بورد لتخليد ذكري هؤلأء..فمازال الكثيرون منا يذوبون حنينا و عرفانا كلما جاء ذكر هؤلاء الرائعون.......
تعرفي يا تماضر كنت أتمني لو عندي بعضا من موهبتك في رسم تلك اللوحات الرائعة..وبتلك البساطة والتلقائية...أولاد الحلة وهم يغتسلون بعد الدافوري....شلوخ أمي....لمة الجيران....وتلاقي العيون....أأأأأأأأخ...............إحترامي إليك ياتماضر
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Osama Mirghani)
|
اسامه ميرغنى..
لك التحايا والانحناء وانت تتحدث بهذا التبجيل عن استاذ الاجيال..والدى الاديب الفضيل ..الحبوب..
الغريبه ان كثير من مقدمى البرامج والمخرجين سعوا سعيا حثيثا..لمقابلته فى الوسائل المختلفه لمنه اصر على عدم الظهور فى الاضواء وان الذى فعله فى تجربته العامره,.. اراد به التقرب الى الله ولايريد عليه جزاءا ولا شكورا.
ربنا يمد فى ايامو..
ولك احترامى ايضا..
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Osama Mirghani)
|
تماضر اختي العزيزة.
إحترامي..
ومن صميم قلبي..
في شخصك احترم اشخاص تذكرني ب " عشان عين تكرم ألف عين " وهي ادب نمارسه في بلادنا وهي بت عم "المجاملة" التي ندمنها ..
هذه الأغنية وكلماتها من العمق بحيث تتشبث بك حبن سماعها وتعلق كما فعلت بك ..
كنا نسمي الأغنية التي تجد نفسك ترددها بلا ارادة ..طوال اليوم .." الفرمالة" ونتندر بأن فرمالتي اليوم كذا ..
فرمالتي اليوم سمعتها صباحا ..و"قتلتني" طربا ..وهي " ياحليك يا بلدنا" بصوت مجموعة تبينت منها الأستاذ الكابلي ..وكان الأداء ..رائعاً ..رائعاً ..والكلمات أروع ..رغم سماعي لها كثيرا ولكن وكأنني استمع اليها لأول مرة ..
في ظلالة الوارفة كم يحلو المقيل ..ياحليلك يابلدنا
وعند مقطع..
يابا شيخ الزومة العصر..تتخيل نفسك وانت تحت شجرة نخيل وارفة الظلال تتفرج علي " لعبة" في دار الشايقية
جميلة ياريت ..نسمعها اذا تيسر ..
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
تماضر
ربنا يرحم اماتك الاتنين
ويخلي ليك ولي اخوانك الوالد
احتمال السمات دي تكون مشتركة في الناس المشلخة سلم كلها
ولا في المدرسين
ولا في جيل الاستقلال
لانو كانك بتوصفي ابوي الله يرحمه
ونفس المشاركة الودودة من الجيران
فجأة تلتفتي تلقي ود الجيران بيغني معاكم
وابو مهيار خنفس وبالعود واخر وسامة
وطارق بالصفارة
ومدثر بالكمنجة
وعمر بالهارمونكا
شفت كيف كان العصريات ندية
والحاجة تطلب اغاني التاج مصطفى ومحجوب عثمان
الله يا تماضر
خليتنا نتذكر ونتحسر زي العجايز
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: الجندرية)
|
Quote:
ياسيرة البيت
ياسيرة العشرة الطيبة
ياسيرة الدنيا الولت وراحت..
ياسيرة الناس الحلوة
ياسيرة الزمن الفات..
الف سلام |
تماضر ..
اقول ليكي حاجة؟
شفتي جنس الكتبتيهو فوق دا؟ دا هو السبب البجيبنا النت ذااتو .. انتي عارفة ليه؟ لانو غالي وفي ازمة وما بتلقى بسهولة
واي حاجة غير كدة صدقيني متوفرة وما دايرة مجهود خالص
لانو نحنا بنسعى للفرح بكل ما نملك ونجهز ليهو عشان ما نلقى منو حتة، رغم انو الهم والحزن بيسعوا لينا ويجهزوا علينا عشان ما يلقونا كلنا (بالذات الليام دي).
فبالله عليكى وزي ما قال ليكي واحد قبالي TRY TO KEEP IT LIKE THIS
وبالمناسبة
انا فكرتا اخت الكوت الفوق دا SIGNATURE واكتب تحتو (قول مأثور) لكن في آخر لحظة اتذكرتا انو البيت طرف والاولاد براهم ولسة (سقار)
فغيرتا رايي.
لك اعزازي
الجندرية ...
| Quote: فجأة تلتفتي تلقي ود الجيران بيغني معاكم |
الكلام دا كان بتين ..
انا غايتو ما بتذكر
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
الجندرية إزيك وإزي أيامك وكيف أبو التراث
وبعدين إنتو كان عندكم الأوركسترا الكاملة دي...ايامكم روعة......إنتو ما ناس رفاعة....أهل الروائع
وبعدين منو القال ليك نحن ما عجائز !!!!!
ياتماضر...عطفاً علي ذكرياتك ...وين أبو عبيده وهمرور؟......ولك الشكر
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
تماضر
الحبيبة القريبة
لو كنت عارف حبوبتك التاية من زمان كنت بقيت جزء من هذه الذكريات الحلوة ، أنا لولا الأولاد ( وديوسف وود الزين ، وودشمام ، وود السر ، وود المأمون ، وودالنيل ، ووداللازم ، وود قاسم وكثيرين ) كنت مت من الوحدة ،،، برجع وبقيف فوق أطلال الذكريات التي تحتضنها البيوت العامرة بأهلها ، وأخليهم يرجعوا لي الشريط تاني ، وأحترمهم احترام شديييييييييييد ، وهم أهل لذلك ،،
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
دا زمن زمان وايامننا ولت..
زمن العشق لأرواحنا هلت..
زمن الطرب والنظرة طلت..
مش زمن الغربه اللينفوسنا هددت..
قولي ارجع يازمان,,,,لو رجع سوقيني معاك,,,,,,
***************
تحياتي ام العنود
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
تماضر ....
بالجد ...
بالجد كده
ادفع نص عمرى .... (وممكن اقايض على الباقي )
مقابل ونسه معاك ( عصريه ولا مغربيه ولا حتى نص النهار)
حقيقه..
واحده من امنيات حياتى (البكون الواحد قنعان من تحقيقها )
اني اخد معاك عشرة ونسه كاااااربه ..
ونسه سااااااااكت كده ..حنقول شنو ونتكلم فى شنو ماعارف ..
المهم ... اتمنى جد جد ...اقضي معاك ساعتين تلاته ونسه ...
الله يخليك لينا ...
ولكل البشريه ..
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: samo)
|
سمو
انت بتلعب ولا شنو؟؟
انا عندى ويب سايت..تقول لى عشرة ونسه؟؟
تمشى تسجل اسمك فى سجل الزوار..
وتنتظررررررر
لغاية ما اغسل العده..واطبق الهدوم..
هاهاهاهاها
تسلم ياخ تسلم..
والله شكرا
اها قسما عظما الا كان اتونس معاك.
بس ورينا اراضيك..
شن طعمى؟؟؟؟
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
Quote: وبالمناسبة
انا فكرتا اخت الكوت الفوق دا SIGNATURE واكتب تحتو (قول مأثور) لكن في آخر لحظة اتذكرتا انو البيت طرف والاولاد براهم ولسة (سقار)
فغيرتا رايي |
لذاذتن عليك!!!
شيلو ياخ
اكتب عليه اى حاجه..قول ناثور قول ماسورة على..اى حاجه..والله ما برجع..
ما تكسر فينا "ماسورة" هسه..
ققب ققب ققب
(قلت قررر بالضحك) بدل لووووول "اسلمة الشمار"
| |
|
|
|
|
|
|
|
|
|
بسيمتك يا تماضر (Re: Tumadir)
|
تماضر
احترامى اليك....من صميم قلبى...غير ما اشعر
ترت ترا ,,ترت ترأأ ,, لالاي لالاه ,لالي لالاه,,,
واسه بسمع ليك غنيه رشا (قبل دي يعني),,قالت بسيمتك يا تماضر
والعصائر والشربات وتعان اقعدن يالبنات ,,,
حسيت ليك انو رشا دي بتغني عن واحده بت حلتنا ولا صحبتنا ولا شنو ماعارف غايتو حسيت تجاهـك الفه ومعرفه واحترام (غير ما اشعر)
دائر اسالك الغنيه دي الكتبتها منو ( بتاعه رشا ما دي)الفيها بسيمتك يا تماضر ,, والله فيها مزيكه ,,وهشام ما جابوه ليه؟؟
وتاني شنو قايله
شن لي؟
يا الضهبت علي
تلفت النجيض والني
شن لي؟ يا النفس والعافيه..مانايبني منك شي
شن لي؟ يا الطبلت القيد..بقيت غرقانه في شبير مي
شن لي؟ في الضٌلٌمه الكاسيه
وإنت الباقي لمبة ضي
أحضن حلمي زي الجاهل
أصحى بدار وألقى الصي
بعد مايلبن البيناتنا...حاذر لا يختفوا حدي
يا خليني أبقى بلاكا...وأعرف راسي من كرعي
ولا كمان ترش تحيي الورق والعود
مواسمك يا خريف الري
ده شنو ده
| |
|
|
|
|
|
|
|
|
|
Re: بسيمتك يا تماضر (Re: Ibrahim Algrefwi)
|
شكرا جريفاوى..الالفه منك وليك..
انا (الاحرم) يعنى من احترام..
ووالله ما مجامله عاجبانى طريقتكم انت واولاد جيلك فنانين وعارفين بتسووا فى شنو..
ومافى داعى لذكر اسماء ناس الفاضلابى ولا حاجه
ورشا كتبت الاغنيه ولحنتها وختت مزيكتها..ده كلو من الريده..
وليه قلت ده شنو ل
"دندنة عاشقه.." ماعجبتك؟؟
| |
|
|
|
|
|
|
|
|
|
Re: بسيمتك يا تماضر (Re: mohamed elshiekh)
|
شكرا البدعة تماضر وكل من كتب في هذا البور المميز
لا شك ان ما كتبته تماضر هو صورة كاملة الدسم اشتممت معهارائحة تراب الحوش وبقايا حديث المغارب .. همس العجيز وانتظار المسلسل اليومي ..
انا في شخصك .. انصاف .. هي اغاني اشتركت برايي في حالة الهدوء والصفاء والتامل لمن يؤدي ومن يستمع بان واحد
شبنا عظيم
وغنائنا جميل
ونحن منحوسين بالشتات والاهمال ..
تحية لكم
صداح
| |
|
|
|
|
|
|
|
|
|
Re: بسيمتك يا تماضر (Re: Tumadir)
|
والله احترامك خاص شديد
وسلام شدي لرشا بلاي ماتنسي!!
كيف ما عجبتني (دندنه عاشقه) دي حشت قليبي حش الخدره !!
بعدين ياخ ما حرام عليك انتي ودافي ده , دافي داعي كان
تعملوفينا كده ولا دموعنا رخصت عندكم
الغنيه دي الاسمها (أسحار الجمال) وكتبها طبعا عبدالرحمن الريح وزولها ما لحن غيرها وحكت عنها تماضر ونزلها ليها دافي ومات بيها ابراهيم قرمبوز(الاهو انا) واسه هو في سما الارواح!!!
انتي تتجازي يابركه حسن ود حسونه!!!
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
تماضر يا حنينة
والله بكيتيني، وكل يبكي على ليلاه، لان الاغنية هينة: الكلام القعدة في الحوش في تلك العصرية، وتلك الايام
وبالمناسبة اختك رابحة محمد محمود بتسأل عنك بشدة وعايز رقم تلفونك ووعدتها ان اوصل لك الوصية
ايميلي تجديه في الماسنجر اذا اردتي ان ترسلي لها رقمك
ولك الود والتحية
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Alsawi)
|
الأستاذ أسامة ميرغني .. لك التحية
همرور هو أبي ... و أعدك بأن أوصل له سؤالك عنه في أقرب مكالمة لي معه ... و هو كما قالت تماضر في السودان حاليا
هذي الذكريات .. ليس لي فيها نصيب .. ربما حضرت أخريات تلك الأيام و أنا صغير أحبو في سهلة البيت أو ألعب مع سارية و سيرين و أروى و فيحاء و المصباح في براحاته .. و لكن كان لي شرف تلك المشاهدة ... مشاهدة شيخ الدين جبريل .. و علوية همرور .. و هي ليست مشاهدة بالعين فقط ... بل بالكل .. لقد تعلمت من جدي شيخ الدين الكثير من قواعد النحو ... و تعرفت منه على قصائد أحمد شوقي .. و عرفت منه أنه يلقب بأمير الشعراء .. كل هذا و قد كنت في سن لا أحب فيها هذه المعلومات .. و لكني أحببتها لأنها جاءت منه.. بل و كنت لا امل منها في حضرته .. و كلما أتذكره الآن أتذكر ترحيبه بي عندما أدخل لغرفته للجلوس معه في الصباح (قصي ... وليدا لي) .. و من ثم يأتي صهيب فيقول له (صهيب .. البختى العيب) ... و من ثم تأتي نبراس فيقول (نبراس .. ست الناس) .. و هكذا يواصل تحياته الصباحية السجعية لكافة أحفاده .. أقول الحق فقد كنا و نحن ما زلنا صغارا نشعر بحب يبلغ حد اللهفة له .. و بفخر عميق لإنتمائنا لذلك الرجل
أما علوية همرور .. فهي الأم بكل ما تعنيه الكلمة من معنى .. و حسب
إحترامي ليكم .. من صميم قلبي .. من غير ماأشعر
قصي همرور
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: DR.NET)
|
الأستاذ عادل عثمان
تحياتي العطرة
أبي يقول لي أن بعض أصدقائه يخبرونه عن كتاباتي في هذا المنبر .. و لكن لا أظن أنه إطلع عليها إذ أنه لم يصرح لي بذلك
أما عن موضوع كتابته للخطابات للصادق المهدي .. فلا أعتقد ذلك .. و لكني اعرف أن الصادق المهدي قد أرسل لجدي شيخ الدين في مرة من المرات خطابا له ليراجعه قبل أن يلقيه الصادق في ذكرى الإمام عبد الرحمن (أعتقد).. و أعتقد أن جدي قد درس الصادق في إحدى مراحله الدراسية .. و لكني لا أجزم إن كان يراجع له خطاباته دائما أو إن كان يكتب له خطاباته في الأساس
هذا مع خالص ودي
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Yaho_Zato)
|
تماضر
اخخخخخخخخخخ
عاد كيف اسميك في مسامات السهله الهناك في الوريد السرّي للغنا
تعرفي
اهلا
و اعضّك في كل بكانات غنانا السمح
تعرفي
اخاف ان اخش هنا ... كم هو المكان كما يجب لبراحات الروح الطاعمه
اها
زمان كنت سايح في حوش ناس بتهوفن الملم موسيقاهم واعيش معني ان يباغتك وتر في كمان مهملٍ في الروح فتندمل
جريت ورا سوناتا ضوء القمر و السابع والعشرين من كونسيرتو موتسارت المدهش وديبوسي الفرنسي الذي يزكّرني بالشاعر الانيق ( اميل سيوران ) المولود في سنة حداشر والمتوفي في سنة 1995 الروماني المولد الفرنسي الام والنشأة
تعرفي
كانت تلك الكلاسيكات تغمرني بالحنين فأتشظي لمليون الف ضوء واتكاثر كأميبا صالحه للعالم المناسب للانسان المشتهي
تعرفي
فجأه وجدتني في رياحين الصطفي ود سيد احمد في بدايات العشره الاخيره من قرن الحلم والهزيمة الفائت .. لملمت انفاسي وانصرفت في محرابه اتعبّد لانجو بالروح لمكانها الذي ابتغيه من الموسيقي و الغنا الطاعمين
تعرفي
من خلال المصطفي عليه افضل الترانيم والدعاء ببلادٍ تحترم موسيقييها ومسرحيييها وشعرائها ولجت لعوالم الحقيبه فكنت كما الظمآن لدوحةٍ تغرّد فيها بلابل الوتر والرق والطار وال....................................أخخخخخخخخخخخخخخخخخ
وها أنذا بين يدي هذا البوست المفعم بتنويعاته الحميمه
بين يديك والمتناجين هنا فيما يخص فوضي حواسهم التائهة في ليل اغانينا السودانيه السمحه
بين يدي ( مانديلا ) البوردابي القاهري وهو يحمي نواة انسانه بالانيق من موسيقي السودان وغناه ال............سسسسمممممحححح
حين يقول:
انت صاحي ولا صاااااااااااااااااااااااااحي ولّا نااااااااااااااااااااااااايم
ولّا طرفك من طبعو نعسااااااااااااااااااااااااااان
انت حكمه ........... ولا آيه
ولا انسااااااااااااااااااااااااااان
و
.
.
.
تعرفوا كلما دخلت للبورد تخجل كلماتي ان تلتقيكم
و
سلام الي مطلع
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
في حوامتي الكثيرة، جمعتني سنوات مع واحد مهندس معماري،،،،، راجل حكاي ووناس جداً. كان دائماً يجيب سيرة صديقه "همرور" في ونستو. من حكاويه تعرفت علي همرور. "كنا نمشي معاه بيتم كلما زهجنا من الداخلية... بنمشي أعراسهم و مناسباتهم.. و نبيت عندهم أو عند أهلهم أو حتي عند جيرانهم بعد الحفلة...". كان يحكي عنكم يا تماضر أكثر مما يحكي عن أهله. " بحس زي كأني في بيتنا .. والله في بيتنا ما بكون مرتاح كدي". يحكي عنكم بكل فخر و إعزاز. كان راجل حكاي ووناس جداً. كان دائماً يجيب سيرة صديقه "همرور" في ونستو. من كحاويه تعرفت ...
قصي ولدنا.... معانا هنا في روشستر مينيسوتا..... ولد أديب (كما يقول أهلنا زمان) ولد ما ساهل ربنا يخليه. يحترم الجميع و يبادلونه الإحترام. بيعمل حاجات كتيرة كويسة بتفوت علي الناس العاديين. شارك في كرنفال مدينة روشستر السنوي ممثلا للسودانيين لوحده (كأبي ذر)، لبس ليه جلابية و عمة و مركوب. من دقش الرحمن جاء (وما قتله البرد) عشان يشارك في العرض بإسمنا جميعاً وإحنا ما جايبين خبر. وكمان الولد (كتاب) بطريقة السهل الممتنع زي عمتو. أسمعوه " أقول الحق فقد كنا و نحن ما زلنا صغارا نشعر بحب يبلغ حد اللهفة له .. و بفخر عميق لإنتمائنا لذلك الرجل".
الليلة أول مرة أعرف إنو قصي دا ، ولد همرور داك.
وحتي لا أخرج عن موضوع البوست أقول لقصي "أنا في شخصك بحترم أشخاص........... هم عيال شيخ الدين الرائعين"
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: خالد الأيوبي)
|
هذه الأغنية من الأغنيات المحبّبة جدا إليّ لما انطوت عليه من شكوى "مهذّبة" لمحبّ محروم جار عليه محبوبه الظالم، أما عن اللحن فحدّث وتعجّب من موائمته الأخّاذة للمعنى،
لا أعرف أغنية غير هذه للفنان ودالمقرن، لكنّه لو اكتفى بها لكفته
شكرا يا تماضر على حسن الاختيار
أحمد الريّح
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: خالد الأيوبي)
|
خالد الايوبى..
وانا مشبهاك لمن دخلت البورد على "التوحد الكونى" وكل مره الصدفه تقربك لى منه..
لقيتك متلبس بحب ال الجنيد..
ولقيتك متلبس بالكتابه الخلاقه
ولقيتك متلبس بالدم الخفيف..
وحسه حاصرتك فى دائرة اصحاب الاصحاب..
فحتروح من تكهناتى وين..
لك اعمق الاحترام
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
السلام والرحمة و اذيكم
عارفة يا تماضر الاسمح من الغنية شنو وصفك لايام زماااان ديك وعجبنى فيهاقولك
امى فاطنه (مرة ابوى) ممشطه ومحننه ومشلخه عارض وما ميته..
وابوى اخدرا طويل..بشوووش..ومشلخ سلم..وكله حضور
وبيتنا فى السابعه مفتوح على سهلتين..واحده شرقيه وواحده غربيه...
ويومنا ببدا ..وبنتهى..والابواب، زى ابواب الرحمه ..تدق و تجيب..فى الحبان..
اطفال يجوا يلعبوا
نسوان يجوا يتونسوا..ويضحكوا..
رجال يجوا لى مكتبة ابوى وونستو
ناس بجوا يجتمعوا..
ناس بجوا يذاكروا
اولاد يجوا بعد الكوره يشربوا مويه..ويتشطفوا..
ورجعتنى لايام زمان المذدهر ايام زمان الكانت ايام
رجعتنى لزمن ما كنا نقعد تحت شدرة النيمة ومنقدنا نارة مولعة وتجيك بت الجيران جارية شايلة صحن اللقيمات العملتو حاجة زينب الله يرحما
ويدور الشاى باللبن اللجابو حاج محمود وتتملى كبابى الشوب والماشى يسلم علينا والجايىيى يسلم علينا واهو ديك عربية النجدة سايقا حضرة الصول عمنا الدرديرى وحاجة عشة شايلة قفتاومع عدلت توباتقول لينااذيكم يااولاد ونقول ليها كباية شايى يا حاجة وتقول لينا والله ما بقدر ماشة احصل الجزر الحق اجيب اللحمة قوبال ما تخلص وعليكم الله تكلموا امكم وتجوا تتغدوا معانا وتقول ليا يا هشام الليله عاملة مولاح قرع يعنى شكلك كدة جاى جاى واردليا لا كان كدة جايى وفى لحظتا يكون سعادتة حضرة الصول عمنا الدرديرى وصل ويوقف عربيةالنجدة ويقعد يشرب شايهو ولمن يخلص بيشيل معاهو لقيماية لقيمايتين ويقول لينا ديل لىسعادت الملازم اصلو جاى من شندى وبالصباح دايمن بيكون جعان وستودعنا الله وتستمر الجلسة ويكمل الفحم وينتهى الشاى ونعيد الكرة من تانى فى اليوم التالى ودى كانت ايام زمان ويا الله تعيدا
وشكرا لك يا تمادر
ويا حليل ايلم زمان
| |
|
|
|
|
|
|
|
|
 Re: احترامى اليك....من صميم قلبى...غير ما اشعر (Re: Tumadir)
|
و الله يا تماضر بقرا في البوست ده و ما شايفه قدامي ...الدموع ما مخلياني أشوف
ده بوست المحنة....
ذكرتيني ناس بيتنا...ألفتنا، ريدتنا، و لمتنا
ذكرتيني أبوي، طيبته، عطاءه الصامت من أجلنا
و قوة ارادته...كم أشتاق اليك يا أبي الحبيب، أما زال مرض السكري اللعين يسرق "ضوء عينيك"؟
و أمي و غيرتنا الشديدة أنا و أخواتي من زرعها و شتولها
صحيتها من الصباح و قعادها لمن نطلع المدرسة و الشغل في الحوش و قدامها في التربيزة الصغيرة جبنة القهوة، حبتين بنادول و جك لسقي شتولها و هورها الجميلة و سؤالها لينا يا بت شربتي الشاي و شلتي سندوتش الفطور؟ و هي لسه بتكون مدنقره تقطع في أطراف الزرع بالمقص و تسقيه بجك المويه
و دايما تزعل لمن نقول ليها بتريدي الزرع حقك أكتر مننا...
تصويرك للمة العصر في بيتكم حنيييين و رويان ، انتو قاعدين ترشوا الحوش قبل ما تطلعوا السراير و تفرشوا الملايات، ما عارفه ليه يا تماضر شامة ريحة طين رويانه كده زي ريحة الدعاش طالعه من البوست ده، دايره لي حتة "طينايه" كده أمصها...بلقاها عندك؟ ! قايتو يا تماضر بوستاتك "بتهيج أشواك المحنة" ...قايتو على كيفك بطريقتك دي يوم حتقتلي ليك زول!
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
وعقبال شمعاتك..تحياتى للشباب..مره كتبت ليك تعليق فى بوست (احترامى اليك..)
وما سمعت منك..دحين رجعت شفتنى قلت ليك شنو؟؟
قريناالتعليق يا تماضر ، أنا وفوزية ، وفوزية بتسلم عليك كتير وبتقول ليك :
كل سنة وأنت طيبة ، ويا ريت لو أخدتو ود أهلكم وريحتونا منّو ، وأولها وآخرها من أهل العوض . وأولادكم ياهم شبه أبوهم ، بصراحة يا تماضر العيشة مع أهل العوض صعبة شديد ، ديل يقصروا العمر . والنسب باقي باقي ، شدي حيلك .
ودقاسم :
نسبنا نحن ساهل يا تماضر ، لكن نسبك مع فوزية هو المشكلة .
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
الاخت العزيزة تماضر
تحية طيبة
طبعا فى اغانى قديمة ارتبطت للناس باحداث معينة فى الزمن الجميل الماضى ...كلنا بنهرب بيها من وقعنا المذري الان..الذى عز فيه الاحترام واضحت سيرة السودان غير الكريمة فى كل مكان..كذب ....قتل ..تشريد..وما خفى اعظم
وتبقى هذه الاغنية سيدة الموقف عندما لانجد المعنى واللوحة الجميلة التى رسمتيها للبيت وللمدينة وللاهل...ونحن كمان تعجبنا دئما اغنية رحيل لحمد الريح..لانى اري الرمال وارى النخيل وارى النيل وارى الجدة لحرم ملهمة فنى...ولحدى هنا كفاية والحديث ذو شجون فى ظلمة المدن المسورة بالهواجس والضياع
يا نسمة يا جاية من الوطن
بتقولى لى ايام زمان ما برجعن
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: Tumadir)
|
تماضرنا
وين ما قبلنا
عارفة الغنية سمحة جد ومليانة بكل حاجة ولكن انا كنت عايزك تسمعيها بصوت نسائي عجيب وغريب وأنا متأكد إنك حتحلفي وتقولي انت أول مرة تسمعيها
طبعا أنا بقصد صوت الفنانة/ سميرة دنيا - والله انا ما عارفها دي بتغني ولا بتهزر واللا بتهمس
غايتو دي فرصة نطلب من المتخصصين في تنزيل الاغاني في البوستات ينزلو لينا الغنا القديم الغنتو سميرة دنيا (اتخيلي قبل كم يوم ذاعو ليها شريط أغاني في قناة تلفزيون النيل الازرق (طبعا اليومين دي القناة شغالة اذاعة بدون صورة) والله العظيم صوت سميرة دي بيحير وخاصة في اغنية انا باعتبرها من اجمل الاغاني للمرحوم حسن عطية (انت حياتي ) وخاصة في مقطع (طبيعي خلقت ربك ما داير اي زيادة) والله لو جاني الشريط من السودان برسلو ليك عن طريق هشام اخوك في جدة
حاشية :
اتذكرت د. علي شمو وكنت اجلس على يساره وكنا قاعدين قبل سنتين في بيت الدكتور محمد عبد الله الريح في الصافية ببحري في جلسة استماع وكان بيغني الاستاذ/ احمد الطيب البحراوي وهو مبدع ويجيد التغني للكاشف بطريقة مطابقة تقريبا وعندما انتهى من احدى الاغاني طلبت منه انا أن يغني اغنية ( لي حق اذا اتهمت فؤادي عندك انت) وابدع البحراوي في أداء هذه الاغنية بطريقة جعلت د.على شمو يلتفت إلى قائلا ( والله لكأني اسمعها لأول مرة)
| |
|
|
|
|
|
|
|
|
|
Re: احترامى اليك....من صميم قلبى...غير ما اشعر (Re: جمال السنوسي)
|
جمال السنوسى
اخونا ...من المهد الى اللحد...
الف مرحب بطلتك المنعشة..وانت صحى كنت وين؟؟
وشكرا لتداعياتك النديانه الحنينة...
وياريت اسمع الشريط الاتكلمت عنو..وانا سمعت سميره دنيا وبفتكر انه صوتها ..عميق ومطرب ولها شفافية المغنية الموهوبة.
المهم شكرا على العرض.
وياعادل امين للاسف ما شفت مداخلتك دى الا حسه... اشكرك ياجميل.
السنجك..منو هى؟
| |
|
|
|
|
|
|
| |
Tumadir
osama elkhawad
ودالعباسية
ود العجمى
Al-Masafaa
ترهاقا
Isam Widaa
Yasir Elsharif
Osman Hamad
omar ali
الطيب بشير
دورنقاس
معتصم دفع الله
مريم الطيب
Dafi
nazar hussien
عشة بت فاطنة
alsngaq
AlRa7mabi
Osama Mirghani
الجندرية
wd al geran
ودقاسم
samo
Ibrahim Algrefwi
mohamed elshiekh
Yaho_Zato
Adil Osman
سمندلاوى
عاصم الحزين
خالد الأيوبي
Hisham Amin
jini
adil amin
جمال السنوسي
فيس بوك
تويتر
انستقرام
يوتيوب
بنتيريست