ما أحلاها قبلنا ونحن فيها وبعدنا قليلاً.بالتحديد في الستينات والسبعينات.. كنا نأتيها فى الستينات ونحن طلبة في الإبتدائيات.عشان نرفه شوية ونرجع لى ناس الحامداب ونتفلسف عليهم.. كريمة تراها مرمي حجر لكن عطبرة كنا نشوفا عروس الشمال..كنا نجيها عشان كتار من أهلنا فيها يا في السكة حديد يا في الجيش يا في الشرطة...كان نجح للعسكرية وكان بطل للطورية.. ناس عطبرة كانوا خليط من قبائل الشمالية مع بعض السحنات الأخري هنا وهناك ناس عطبرة ما كانوا بيبدلوها بمدينة تانية ولا الخرطوم. ويتضايقوا لما يجوا الخرطوم....لأنو موش عنصرية ولا حاجة.لكن عطبرة وناس عطبرة كانوا مثال في الرقي.زرت أنا كل مدن السودان تقريباً بأمانة ما وجدت زيها أو يقارب لها غير كسلا..من مدخلا لى مخرجا كل شئ كان فيها سمح ومنظم.مدخلها في محطة السكة حديد ذات الارصف المتعددة. ولمبات الناليون الكتيرة والزاهية ومكتوب عليها بكثافة عطبرة..عطبرة..مافي حاجة اسمها بييعة بيض او شاي او مساويك او نبق أو زلابية أو طعمية بعكس محطات السكة حديد الأخري.. كنتين المحطة العامر.كان يغنيك عن كل حاجة.. وجنبو تلاجة الببسي الكبيرة. مردوم فوقا التلج وجنبو بتاع الشاي.أحمر وبي لبن زي ما عايز..اسكت كب..كان مدير المحطة أو ناظر المحطة كانو رئيس جمهورية كان مانع البيع فى المحطة حفاظاً على مظهر البلد الحضاري القطارات واقفة.قطر كريمة .. واكسبريس بورتسودان.. والمحلي قايم عطبرة وقطارات بضاعة كتيرة..المحطة كانت نضيفة ولا ورقة ما تلقاها طايرة فيها.حتي مستوي الحمامات في المحطة كانت عليها رقابة ونظافة.. مكاتب السكة حديد داخل المحطة. انيقة وجميلة ومكاتب الكمسارية والموظفين ومكاتب النظار. وناس الحجز.مكاتب الزول ذاتو يخاف منها ومن هيبة الناس الجالسين فيها والرونق والدعة والوضاءة.تفوق الان أتخن مكتب اي وزير او مدير إدارة... الشئ الملفت جداً في عطبرة وقتها كترة لمبات الوان النايلون وألوانها منتشرة بكثافة مقصودة.. كان جيت للسوق ما احلي ليمونها بالكوز بتاع الألمونيوم الراقي داك يغرفوا ليك.. والشعير المركز.موش زي شعير الزمن دا المجلبق النصو موية.. ونصو دقيق قمح والله دقيق شنو ما معروف.. كان درتا المخلوط بالخلاطات كمان تد ربك العجب.. حس الخلاطات دي تور ور.. في السوق. بي هناك محلات جنة الفواكة.. في قلب السوق..بي هناك جنب أكشاك الدامر.. او جنب مواصلات المشتشفي... القهاوي المدنكلة قهوة ناس ود البي وقهوة عمك اللمين.. العامل في السكة حديد ياكل زي ما عايز ويشرب زي ما عايز ويبني البيت من مرتبو.. ويرسل لى اهلو منو ويعلم اخوانو الفي المدارس منو... ويشتري العجلة الرالي الدبل منو.. كمان المطاعم النظيفة الراقية والخدمة الممتازة.مطعم ناس حسن خليفة العطبراوي.. وجنبها مطاعم عمك ابو يمن فاتحة على سوق الخضار.. فول مهرود جنس هردة زي المديدة.. ما عايز حاجة غير زيت سمسم اصلي ناقع جديد اخضر.. وكان درتا عليه صلطة.. زنك الخضار ورواكيب الخضار جنبو.. وناس الخضار عارفين الحكاية بدل ما يشروك كيلو طماطم او كيلو عجور..عاملين ربطة كدة بي قرش ونص.فيها تشكيلة من الخضروات دي بس تاخدها وتدخل اقرب مطعم ابو يمن.. وابو يمن يخدمك بكل ادب وكل تواضع..كمشة الفول كان بي قرش.كمشتين تعشيك لامن تقول بس...جنبك مطاعم ناس ادروب والسلات وما أدراكما السلات.. صحن السلات على الحجر بي خمسة قروش.. غايتو ونحن اولاد ستة سنوات وسبعة..نجي نتمتع ونرجع بي حصيلة جديدة علينا.. لما جينا بعدين فى أواسط السبعينات للثانوي.. برضو لقينا الحكاية لسه تمام.. لكن المرة دي الحكاية اختلفت كنا نذهب مع زملانا للقري المجاورة .أم الطيور وخليوة وكنور ودار مالى والسلمة والتلواب.. وعنيبس وكدباس وجاد الله.. والباوقة وفتوار والجول.. يعزمونا كان لما واحد اخوهو عايز يتزوج او اختو عايزة تتزوج..ونقعد الايام معهم.بالجد اولاد الجعليين والمريفاب كانوا كرماء. ولكنا كنا نتعجب في إيقاعهم فى الغناء.ايقاع العرضة دا. البيطيروا وينطوا ليهو لى فوق..نحن لعهد قريب كان لا يطربنا سوي الطنبور. ونحن ناس صفقة ورسيس ودليب. ولكن بعد شوية استطعمنا ايقاعهم دا ورقيص حسناواتهم عليه.. قال شاعرهم.. بين السلمة والتلواب.قلبي انا في المكايلاب غاب.. والكمساري والسواق صفروا الإتنين... وقامو زيارة لى كدباس يا ناس اتعبوني خلاص.. لون المنقة والأنناس... وطال الشوق عليك يا الباوقة ام زهور...جنة الفردوس والسكانا حور..... وجناين الباوقة كانت تأسرنا بسحرها وجمالها. خاصة انها هي وام الطيور قد كانت تغذي عاصمة الحديد والنار بكل مستلزمات الخضر والفاكهة.. الناس كانت تريانة وشبعانة فى احياءها.. الطليح مرمي حجر.. الموردة.. الفكي مدني الحصاية.. الإمتداد الشمالي الإمتداد الجنوبي.. ام بكول.. حي السكة حديد..ما أجمل أن تمتلك عجلة رالي وتنافس بها يوم الجمعة فى سباق العمال بين عطبرة والدامر..العامل المتخرج من جبيت كان احسن من مهندس متخصص الآن في كم المعلومات وفي راتبه وفي وضعه فى المجتمع. رئيس صناع... قمندة.. ملاحظ.. وغيرو.. هم نفسهم كانوا سكانها حسهم راقي.. وزادونا رقي معاهم..المكيفات دي فى الكاكين كانت.. ناس فهمي ميخائيل عندو الساعات الرومر والسيكو .. والمسجلات قروندنق.. الدكان يلمع من السقف الي الفرش والحيط وناس بيرم وناس حبيب باسطة. هسه قالوا ناس فهمي ديل هاجروا من زمان. وأولادهم.. بإختصار عطبرة كانت عروس الشمال.. تملأ عينك لامن تفضل.... بالله عليك الله زرتها قبل اشهر لقيتا ليك اتدهورت جنس دهورة . غايتو ربنا يعيدها الى مجدها بقدرة الواحد الأحد.. منصوري
والله متعتنا عديل ..وذكرتنا الذي مضي ..ونتمني ان يعود ..وانت تتحدث تذكرت طعم ذاك الشعير العجيب في فمي ..فلدينا ايضا في الدامر مثله تمام ..كنا نأتي جنة الفواكه فسحة عديل ..وتلك العمارة ..والملتقي وحلوياته ..الرائعة "ولا تقول تركي ولا شامي" سوداني مية المية ..وجنينة البلدية والزونيا ..يا لها من نضارة وجمال ..ويالعطبرة الآن وجاراتها ..قفر يباب..ورغم ذلك تعتريك لحظات حنين دفاق ..لأي شبر فيها ..وتغمرك السعادة حينما تتنسم عبيرها الفواح ..رائحة أكاد اشتمها الآن ..علي مدخل "المدرية "خضرة ..ونقاء ..نفتقده بشدة الآن.. تذكر الفنان حيدر ..والذي نحتفي به في دامرنا وهو القادم من عطبرة ..ونسعد ..بسيدة لا وهو اول من غناها ..وابوعلي ..الذي ..يعطر سماوات الدامر بشدوه ..وأذكر الفراعة"من الفريع" يتفأءلون به ..ولا تحيا ليلة حناء الا بالعطبراوي..ونسانا حبيبنا المامنظور ينسانا.. وطال الشوق ..ياعطبرة
بنت النيل.أختنا سلام.. ناس الدامر الأصلاء.رياح المجذوب العامرة بعبق التلاوة... وناس حيدر وما اروع صوته.. هو أول من قال قطار الشوق متين ترحل تودينا.. لي بلداً حنان اهلا وترسي هناك ترسينا ............ دامر المجذوب سلام. دفعتنا التي تقسمت بين كريمة وعطبرة والدامر الثانوية كنا نزورهم.. أعمامنا تجار الفراشات. في سوق الدامر..بلد المحنة متدفقة فيها جداول...نهر عطبرة والرحلات المدرسية..وناس الزيداب والحديبة..والفرق الرياضية. وصفارة السكة حديد التي يسمعها كل سكان عطبرة.. كانوا يستخدمونها لإفطار رمضان.. بالإضافة الي مدفع مدفعية عطبرة.. هسع العمال بقوا ساعة الفطور لما يسمعوا الصفارة ما يقدروا يطلعوا يفطروا لأنو حق فطور مافي.. يقعد قبلوا يقضي فسحة الفطور دي لغاية زملاهو العمال ما يجوا.. يكون عندو كوز كدة مربوط بس سلك يخت فيهو موية وشاي يغليهو على قيزان الفحم.وينتظر بعدين لما يطلع مرة واحدة يأكل الوجبة الوحيدة الغداء مع البنيات والولاد والأسرة.. حتي البيطلع ساعة الفطور لسوق عطبرة تلقاهو اشتري ليهو شوية فول حاجات ..مررو.كدة نفضوا ونفخو من القشر واكلو وشرب عليهو كوز موية من السبيل. ورجع تاني الشغل بي رجليهو... لأنو ما يقدر يشتري عجلة.سعر العجلة طار راح.. منصوري
08-31-2003, 10:17 AM
adil amin adil amin
تاريخ التسجيل: 08-01-2002
مجموع المشاركات: 36972
الاخ المنصوري تحية طيبة حديثك ذو شجون ونشكرك على ذكر مدينتنا،فى الحقيقة نحن بنقيس جدوى اي حكومة تجى فى السودان على مرفق السكة حديد، اذا كانت الحكومة تهتم بهذا المرفق يعنى انها جادة ومخلصة وستطور السودان لان السكة حديد هى العمود الفقرى لتنمية والوحدة الوطنية ايضا اما اذا لم تهتم فهذه نكبر اربعا لوفاتهاوناس قريحتى راحت ديل بعد 13 سنة من الكذب بالدين عايزين يعملوا نفسهم بفهمو فى التنمية وانو السودان ليس" لجنةصفرة" او" لجنة مسجد" حسب ما كنا نرى من تعاطيهم السياسى القديم وافقهم السياسى المحدود والمسدود فى جامعة الخرطوم ونخشى اليوم الاسود الذي يصل فيه هؤلاء المعجزات الى السلطة،اصحاب التوجع الحضارىالسقيم والثورة الجنسية الكبرى "النكاح الجماعى" وللاسف يا عزيزى نحن نعيش عصر موت المدن السودانية والتضخم السرطانى للخرطوم المتخلفة والمتردية والما فيها كهرباء ولا ماء الخرطوم التى كانت حاضرة البحر زمن الانجليز الخرطوم اليوم المجهولة الهوية ا فما جدوى ان تكون اسلامية او علمانية وهى متخلفة حتى مجارى ذى الناس ما فيها،وبعد ده الضجيج والعجيج حولها لا ينقطع فى نا نيوكى والمواطن المغييب يتفرج ويا سلام كما كان يقول الراحل المقيم اسماعيل حسن نشكرك على تداعياتك الجميلة وربنا يرفع البلاء
08-31-2003, 12:10 PM
المسافر المسافر
تاريخ التسجيل: 06-10-2002
مجموع المشاركات: 5061
مرة ود الحوري يغني عند الكنارة والجماعة كل خمسة ماسكين في عكاز شغالين حمة حم حمة حم جابودي مع الطنبور والحوري شغال البنطون قام وانحدر والدموع سايلة كذا المطر بعد شوية قلبها ليهم ياكنارة ياغجر حقكم تقعوا البحر
بعد شوية انتهت الحفلة والجماعة مشوا اهلهم لقوا حاج قايم لصلاة الصبح قال ليهم انتو ياناس الغناي دة اش نفرو قالو ليه ده ود الحوري والشتيمة البقولها ليكم ما بتسمعوا فيها؟
قالوا ليه بقول شنو؟ بقول ليكم ياغجر حقو يرموكم البحر حي عليه الما بتسمى وبعدها رقد الفنان شهر بمستشفى عطبرة
08-31-2003, 08:11 PM
سجيمان سجيمان
تاريخ التسجيل: 10-03-2002
مجموع المشاركات: 14875
بارك الله فيك يا سودان و بس...... لكن يا اخوي سودان عرفناهو......بس دا منو كمان؟....... تعرف قريت كلامك دا تلاتة مرات..... تلاتة يوم......وكل يوم اقراهو اقعد اجعر......واذكر الايام ديك....... اصلو عطبرة دي....زمان وانا طالب في الثانوي....... نشلوني في محطتها....... مائة خمسة وسبعين قرش.......كل ما املك.....ان شاء الله تدخل عليهو اربحاء وعقاب شهر....كل ما اطراهن...العبرة تخنقني
تسلم عادل امين وسيجمان .. والمسافر إنتا تعرف يا المسافر.. ود الحوري دا ما منصوري من المناصير الهاجرو للباوقة عليه رحمة الله. أمال الطنبور دا جابو من وين. بس هناك عندكم قلبو ساكت إيقاع جعليين. ومريفاب وانقرياب... وبعدين عندنا أهل في الجول. وزملاء دراسة فى كل تلك المناطق التي ذكرتها.. بعدين لأنها مناطق جميلة وحبيبة الي النفس عشان كدة الواحد ما نساها.. السودان على كبرو دا كانو قرية تلقي الناس اهل بعض شديد وبرضو ود الحوري عليه الرحمة كان لما يجينا هناك يغني بإيقاع الدليب.. وغايتو كانت ايام ومرحلة عمرية لا تتكرر من الجمال والروعة.. منصوري
09-01-2003, 11:22 AM
adil amin adil amin
تاريخ التسجيل: 08-01-2002
مجموع المشاركات: 36972
السلام جاكم.. والتحايا لكم و لعطبرة .. و سيرة ود الحوري غلبني افوت كلامك دا بدون مشاركة وحس طمبورو لا زال يرافقني اينما ذهبت.. المستشفى يوم زارو كل زول نسى أشغالو ولا زال صوت " طبلة " كباري ..عازفه المشهور يهزني فابحث عن عصاة او بسطونة واقول لي صاحبي لا جوة يا زول
عيني ما شافن جمالك .. ست جنوني .. ست الجمال هالكاني مالك
وكان ما شي بكرة اتبرة عليك الله جيب لي معاك شريط ودالحوري..
دا كلام دا. يا عادل عبد العاطي. أنا ما مشركليك الشرك دا تجي في الآخر بعد ما الناس فاتوك هنا في تسجيل اسماءهم الشرفي تحت اسم عطبرة الكبير... ناس بنت النيل. .ناس عادل امين.. ناس سجيمان ناس المسافر .... اوعا اكون نسيت لى اسم زول شارك...إنتا عارف يا سجيمان.بس دي معناها. يعني كل الصغائر تسقط بإزاء الوطن الكبير.. ونتمني نشوفو فوق رمز للسلام.... بعدين يا Gessan مالو نشوف ليك حاجة من ود الحوري لو لقيناها من ناس الباوقة المعانا هنا.. بس عشان تتذكر الباوقة انا ممكن اقول ليك بيتين تلاتة كدة للذكري فقط.معاني للسمو وذكري البلد بس ربنا يدي الفاقة والزمن .............. في ناس برضو كتابيييين كدة وسيرة عطبرة دي تهمهم.ثلاثتهم....؟ أنا أعاين واقيف وانتاوق وادخل وأمرق قلتا ياربي مالن ماجو .ما شمو ريحة عطبرة بي جاي والله شنو. والله فاتحين لينا والله مقالنا دا ما عاجبهم والله عطبرة ما عاجباهم والله مشغولين والله شنو يا ناس.. وغيرن وغيرن برضو في جماعة تانيين ينتاوقوا ويمرقوا من غيرو ما يعلقوا.يا ريت لو علقو..وانا عارفهم ناس أهل؟
09-02-2003, 08:05 PM
المسافر المسافر
تاريخ التسجيل: 06-10-2002
مجموع المشاركات: 5061
المسافر.نعم والله ما قصرت في سيرة الناس البي يحيوا ليالي عطبرة.خاصة عمنا ود الحوري..عليه الرحمن بالرغم من أنو فنان غناهو مليان.زلكن الروح الدينية تنضح من بين كلماته كما ذكرت أنت هذا الدعاء..كل هذا الجمال من أشعار الباوقة وفواكه الباوقة تصب في مدينة عطبرة وسوق عطبرة.فتجد الناس كانت مسرورة.. واحوالهم تمام عشان كدة الناس هنالك يا مسافر مرهفة وتتجاوب مع الأحداث الإجتماعية والسياسية بهمة عالية وقضايا مؤثرة.تصب في خير الوطن الكبير..ويجد نفعها كل مواطن سوداني.. منصوري
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
adil amin
المسافر
سجيمان
Abdel Aati
gessan
فيس بوك
تويتر
انستقرام
يوتيوب
بنتيريست