|
|
 هل ستدعموني؟ سوف اشترك في السوبـراستار القادمه
|
اول الحكــي
هجرة عصافير الخريف ...في موسم الشوق الحلو
هيج رحيلا مع الغروب ....إحساس غلبني اتحملوا
وكتمت اشواق الحنين ....داير الدموع يتقلوا
ورجعت خليت الدموع....يرتاحوا مني وينزلوا
ليه ياعصافير الخريف ...خضرة مشاعري اشيلا صيف
الكلام لـ :اسحق الحلنقي : الغناء لوردي
ساحتاج دعمك ساشترك في سوبر استار
مشاكل كثيرة اعاني منها اللحظة ، فيروسات تزاحم كي بوردي ما ان اكتب حرفا ، حتى تزاحمت كل حروف الكي بورد وزهجتني ، ةوتفوةر بطني ، غايتوجنس سماجة عليها.. ومحاولات للرد على مشاركات في بوست اخر .. وكورايك باسمي تقلق قعدتي على مقعد هو الاخر محتار من ازعاجي له وشاشة لكومبيوتر هي الاخرى اظنها (شمتنني) بكثرة بحلقتي عليها ، طوال هذا اليوم ، فكلما زهجني هذا الفيروس العواليق ،ضربتها على وشها فرد ضربة رجتها رجا حتى انني في احدها سمعت اهاتها فحنيت عليها ، فربت عليها وقربت ابحث عن اضانها لاقول عليها معليش ، بس اعمل ليك شنو والفيروسات الزفت دي مكرهاني جدة ذاتها ..
فرأسي مازال معور بهذه الهبشة التي ادخلتي شتارة يداي فيها ، اذ انني وذات فجاة وجدتني وجها لوجه مع استمارة اشتراك في سوبر استار العرب للدورة الجديدة وليست المنتهية التي حصلت فيها كما عرفتم عنكبة شديدة ، كان ينقصها فقط تدخل شرطة النظام العام التي تتبع لولاية تسمى ولاية الخرطوم ، فما اظن سيطان العنج وسيخهم ونضاراتهم السوداء التي يضعونها على عيونهم كانت بكافيتهم .. فطالما ان كل القصة التي تبحث عنها تلك الشرطة ، اللبس المحزق ، وعدم وضع الطرح ، فيقطعوا شجر البلاد كلها وليشربوا كل العرديب والليمون المسكر حد العسوله ، بحثا عن طاقة تعيينهم على ضرب كل بنت او حرمة لا تلتزم بالزي الشرعي .. فهذه لوحدها قضيه ، ناهيك عن قضية البنات المغنيات ، مع انني في كثير من المرات شاهدت الريس وفي اخرى نائبه ، يتركان مقاعدهما الوثيرة ويتوكئان على طربهما , ويبشران ديك يا البشيره الماخمج في احدى الفنانات وان لم اخاف الكضب قلت لكم انها ندى القعلة ..
واعترف انني دخلت الى موقع السوبر استار في الانترنيت بعد ان اطربني صوت رويدا عطيه ، واحترت الى من يجب ان ادلي بصوتي اليها ام الى ديانا كروزنا .. وكنت ماخوذة بهذا الزخم الاعلامي الذي ادخلونا فيه .. فكل صديقاتي يتناولن في ثرثرتهن شمار السوبر استار .. ملحم زين حرام يطلع ، موش هيك يكون .. شفتي ازاي رويدا تسرحيتها وايد حلوه .. ولا فستانها . اسكتي اسكتي شفتي اش لون ديانا عبايتها مجملتها
انتي من ترشحين ..
اسكتي اسكتي ماشفتش بنت خالتي سافرت لي عن بيروت شان تشوف الحفلة النهائية .
فكيف لا تتزغل عيوني سادتي ، واصير في لحظات كثيرة سائرة ضمن هذه الجموعات الهادرة ..
بقلبي تبعت هذه الترشيحات ، وفي اخرى كان لصديقاتي دخل كثير فيما اهتمامي الذي ظهر فجاة على متابعة هذا البرنامج .
اعترف ايضا انني لم اشاهد حلقات كثيرة جدا في بدايات هذا البرنامج ويمكنني ان اجزم ان واحدة فقط من التصفيات الاولية هي التي شاهدتها ، وخرجت منها بانطباع ..
بس دي شنو العواره دي .. بالله فكونا من الفياقة دي ،
قلت ذلك الى كثير من صديقاتي ومنهن من تاثرن بهذا البسبسه والتشنيف ولم يرجعن الى مشاهدته ، الا بعد ان استحوذ البرنامج على كل اجهزة اعلامنا في الوطن العربي ، فما ان تفتح مجلة الا وتشاهد او تقرأ نشرة فنيه عن البرنامج
وحينما صجونا وخوطونا كان لابد ان ياخذ تلابيب احدانا واحدة وراء الاخرى ، حتى اذا ما اتنيلن ووقعن على بوزهن في دباديب البرنامج ، كانت الدائرة تضيق من خناقها علينا .. ودون ان ادري وجدتني اتابع هذا البرنامج ..
وما ان انتهيت من ملء استمارة السوبر استار وقمت بضغط الاوكي ، وسندنتها اي ارسلتها ، الا واجدني وانتباهتي وانشداهتي تضعاني امام المفاجئة ، فالاستمارة التي ملئتها لم تكن بغرض تهيئتي للتصويت عن المتسابقتين ديانا ورويدا في مرحلتهما الاخيرة . انما كانت من اجل اشتراكي في سوبر استار للدورة الجديدة التي ستبدا بنهاية اكتوبر على ما اعتقد
ولست ادري كيف توصلت الى شهيقي لازفره حتى يعيدني الى الحياة . ولست ادري ايضا ماهو الغريب في هذا الموضوع ..فهو خطأ كاي خطأ اقوم به وغيري الاف المرات في اليوم ، فيا كثرتها هذه الفورمات التي نعبئها ، فياقة منا في احايين كثيرة ، وعدم موضوع وفشة خلق في احايين اخرى ..
دقيقة بس هسع بجي
للهترشه بقية
|
|
 
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: shiry)
|
ساغير في خارطة الغناء ، واكثر الدنيا
وتخيلتني مكانا في مكانا ومكرفونا بمكرفون وعباية بعباية (بس ياخسارة لن استطيع ان اقول شعر بشعر لامحال سوف اخسر هذه المعركة ، لكن لاباس ساستعين بشعر مستعار كالذي تستعرض بها فتاة اعلانات شامبو بانتين ) ويكيفيني هو انا جايبة حاجة من عندنا ..
اقول تخيلتني احدى المتسابقتين اليوم ، فكيف سيكون شعوري ؟؟ لقد جربتها تلك اللحظات ..
التي ننتظر فيها قرار ما او نتيجة تحدد مصيرنا وتضعنا بين مرحلتين اخرى انتهت واخرى على وشك ان تبدأ .. في كثيرا من تلك المواقف افقد احساسي واغيب عن العالم .. احمل قلبا ليس حملا لفرح زايد ولا واحاسيس متناقضة يغيبني عن العالم . يخيل الي ان كل نساء العالم كذلك .كمان مايقوم فرقاء المشاكل ومتلقى الحجج يمكسونها علينا ذريعة وينططون فرحين بما قالوه سابقا من ان المراة ناقصة عقل ودين . فليهبطوا شوية ويدوها صنه فانا لم اقصد ذلك ..فما قلته ، قلته في ذات دقسه ونقطة اخر السطر وانتهي الموضوع .
والرسالة مازلت على شاشتي ، وقدام عيني ، لم استطع ان اتخلص منها ، فعكفت يدي فوق راسي ورجعت بظهر كرسي الى الخلف ، وانا اخد نفسا طويلا ، كانني فعلا شيئا عظيما .
وتخيلتني احزم حقائبي بعد وداعي لصديقاتي بحفل شاي ، غنيت لهم فيه كل الاغاني التي ساشدو بها على شاشات العالمين اجمع ، واستمعت الى اختياراتهم من الاغاني التي يجب ان اتغني بها .. لن توقفني تدرجات اغنية صعبة او انسياب مخملي لاغنية ما ، او لون طربي معين ..
فكل ما يخطر على بالهن من اغاني من عبد الحامولي مرورا بسيد درويش ، ونفيسه المهدية وام كلثوم وعبد الحليم وحتى زبيدة الانقاذ وهاجر كباشي ، كل هذه الالوان ستكون لقمة سائغة على حلقي اقصد على حبالي الصوتيه .. كل ماعليهن ان يخترن وانا ساغني ، انا هي ملكة الطرب الجديدة التي اذا ما غنت تراخت لها الابدان وزاغت العيون ، وطربت القلوب .
ثم هاتفوني في البرنامج يتسعجلون حضوري ، فقلت لهم حاضر جاييياكم ، دقيقة بــس هسع بجي .
وكل الذي فعلته انني ارسلت نصف سيرلانكيتنا ان تستلم من الخطوط السعودية تذاكر سفري انا والماما ، وحلمت أن البابا ايضا سيرافقني ، وفي العدم ونسبة الى مشغولياته الكثيرة سينتدب اخي الصنغجروتي معنا ، وسنتسلف باذن خاص من جيراننا السعوديين نصف شغالتنا السيرلانكيه ، ليس لان ارداتي هي ان اعمل فيها معروفا فاقوم بتفسيحها فى بلاد الارز ، ومنابع العاووره .. لكن لشيء ما في نفسي ،ان تعلم تكل الشماته انني فتاة سوبر استار القرن الجاي دا كله ، وذات شعر مستعار وذات جمال يجعلك تحتار هل انا جميله فعلا ام انني جميلة لكن بعيون حوصاء ، وذات لون ماحصل شافتوا استديوهات لبنان كلها .
وحتى اتاكد من انني ساكتسح كل المشتركين واحد وراء التاني ، كان لابد ان استدعي صديقاتي كل يوم حتى اسمعهن صوتي ..
فانا ولله الحمد املك صوتا ، لم يحصل ابدا ..مبااااااالغة . ..ابدااااع عديل كده
فكل عيوبه وهي على ما اعتقد بسيطه وخبراء الاغنية والصوت والطرب على هذا البورد موجودون ويستطيعون ان يحكموا فانا راضية بحكمهم (كدي خليهم يقولوا غير كدة !! يعني ح تعملي شنو ؟ ولا حاجة حا اقعد ابكي ، هو انا عندي شنو غيرها ) ..
اقول ان عيوب صوتي بسيطة نوعا ما وتكاد تكون تحت بند ، يعني بتمشي حالها ..
فصوتي ولله الحمد ، حاجة كده عجيبة ، لاهو رخيم ولا هو غليظ ولا هو ملائكي وهو ماملائكي ، ولا هو حاد ولا هو تحت الحاد بشوية ، ولا هو متدرج ولا هو عندليبي ، صوتي حاجة كده ومن جماله يضيع ان كورتك به في شفع جيراننا او زهجتني مايا او مصطفى او ميدو ود بت خالتي ، اليس هذا الصوت يستحق ان يتغني به الاغاني التي لاتحتاج الى مجهود ..
اذن جميل جدا ، اقتنعتم بان صوتي ينفع ان للغناء لكن مع محسنات له تصاحبه فبرامج المحسنات الصوتيه ماليه السوق ..
والعيب الثاني وهو ايضا انا شايفاهو حاجة كدة موش ذات بال .. ايه يعني ما بعرف احفظ اغاني ، او لحنها مظبوط
فانا ولله الحمد ، يمكنني ان اقول انني الوحيدة من بين ملاييين الناس التي يكون في امكانها ان تغني اغنية خليط بستة الوان غنائية ، ليس لانني اعني ذلك ، لكن في الغالب الاعم تتخلبط عندي الالحان ، فادخل لحن اغنية دوان تو يو او لحن اغنية راجع خبرني العندليب لفيروز مع اغنية مع ساعة الغروب مشية اسال عليك ، مع اني ماعارفاها حقت منو ، لكن اهو برضو بتقوم تتداخل بشكل منساب ولطيف مع اغنية عز المزار لمصطفي سيد احمد ..
ارايتم كيف انها مشكلة بسيطة ولا تعيق اشتراكي كما انها لا تنقص من تفوقي على جميع اقراني ..
فمشكلة بسيطة مثل مشكلة التداخلات اللحنيه وغياب كامل للايقاع الداخلي ونسيان في بعض الاحيان للكلمات الاغاني لا اعتقد انها سوف تقف حائلا بين وبين احرازي للمركز الاول بلا شك ..
من جد اعلم اني زهجتكم
لكن للهترشه بقية
الصابرات روابح
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: shiry)
|
تري من تفوز اليوم بقلب السوبر استار رويدا ام ديانــا
هكذا شجعتني صديقاتي واخواني وابوي وامي ، واعضاء سودانيز اون لاين او بالاحرى انا هي من اقنعت نفسها انا انفع لهذه التجربة .. فكوني صديقة بالمرافقة لنصف شغالتنا السيرلانكية فهذا وحده يعطيني التفوق على كل اقراني ، لانني ودونا عنهم اعرف كيف اقني بلغة لا افهم فيها شيئا ولا اعتقد انني انطق مخارج كلماتها بالصورة السليمة ، لكن اهو من يهتم .. فكم من مذيع لا يعرف كيف ينطق القاف والغين ، ولا يمييز بين الزاي والذال ، ومع ذلك هو نجم متربع على اعتي شاشات التلفزة العالمية .
يعني جات على شيري المسكينة دي العايزه تغني بلغة ما عارفه ليها سقط من ملقط ..
وانا الملم في مايكرفوناتي اذ جاءني احساس ، الله يكضبوا ، ان المشتركين سوف يتعصبون للجنسيات الاخري وميلا لتكنيك الدم بحن سينحازون ضدي ، لذلك لابد ان اصير تفتيحه واحتاط لهذه الحركات (العفنة) من الحلب المعفنين ديلك ، واشيل معاي مايكرفوناتي ، وامشاطي دي جمع مشط ، وعباياتي ، وشعري المستعار ، وساحتاط اكثر فاحمل معي الاورغن بتاع اخوي الصغير ، فهو ايضا بصورة ما او كده كده سيرافقني ..
ان منعوني ان اواصل في ابداعاتي الغنائية وطربي الاصيل ، تكون اهو ، مايكرفوناتي في يدي ، من يمنع صاحبة حق من حقها ..
وانا شايلة معاي كل هذه الاشياء ، بالاضافة الى ملاح الويكة عشان اكون لاييوقه ، اذا ما حدثتهم انفسهم وتلايق معاااي الحرس ..
وحقائبي الكثيرة التي بداخلها ، كتب كيف تتعلم العزف على الاورغن في يومين لانني لا اضمن ان يستغلني اخي ويطلب فيما بعد نصف الجائزة ، وايضا كيف تتعلم ان تغني في يومين ، وايضا كيف تجعل الناس يتسمعون الى غناءك في يومين .. وكيف تضبطين ايقاعاتك وانت تغنين (هدول صارو كم يوم ؟ الم يكتمل الاسبوع ؟ ) لان كل الذي معي قبل الاشتراك في هذا البرنامج مدة اسبوع فقط ، فيجب ان اتقن كل هذه الاشياء واتعلمها في اسبوع .
وبينما انا اخرج لوداع ابوي ، فاذا به يسالني
وين ماشه يا قصفه انت ؟
شنو يا ابوي انت نسيت ولا شنو ، انا ماناس سوبر استار استدعوني عشان اشارك فيه
شنو ؟؟ شنو ؟؟ شنو ؟؟ تشاركي في شنو ؟؟ والله ياها الفضلت ؟؟
يا بوي انا وحات الله موهبة عظيمة ، سيرتفع شانها في الافاق
انشاء الله ، الافاق التغمتك . غوري كده ولا كده من وشي ، قبال اقوم عليك
وكان لابد ان اتراجع عن قراراتي واحلامي التي اصلا بدات شتره ، لكن نعمل ايه ، اهو ربنا اراد كده
يحرمكم من هذه الموهبة التي كانت ستبوظ تاريخ الغناء وتخرب كل تراتيبه وتشوه تراتيله ، لكن سموها رضينا
وانتم ربنا يكون في عونكم . .
وبما انني لن اشارك في تصفيات السوبر استار للعام القادم و اصلا لست مشاركة في تصفيات السوبر استار لهذا العام ، لعوامل كثيرة اهمها انني لم اكن مهتمة اصلا بها ، ولا عارفه عنها اي شيء ..
لذلك سامتنع عن التصويت لاي من المتنافستين على اللقب ، على اعتبارات كثيرة ، هي عتبي على الاعلام العربي على بزخه الشديد في ملاحقة تلك التظاهره ، وعتبي الاكبر على اعلامنا السوداني وعقليتنا السودانية اذ انها ، لا هي تغنت مثل باقي الدول العربية او بلون يدمج الاثنين معا ولا هي نست واجهتها العربية واتجهت الى االعالم الافريقي فتفوقت فيه .
وعتبي اكبر على ظروفنا في العالم العربي التي جعلتنا نسوق او نهتم بمثل هذه المسابقات رغم انها لا غبار عليها وهي تعبر عن هموم جيل ومشاغله وهي بديلة لغائبات كثيرة ، اخطاء من يعتقدون انهم هم الوصايا على هذه الامه فلم يوجدوا البدائل ولا يتركونا علىحالنا ..
ومع ذلك كله ، ساكون مبسوطه جدا ان فازت رويدا عطيه ، وسوف انطط وافرح ، فلن اخدعكم وادعي االعقلانية التي يفقدها هذا العالم كله ويفقدها ساستنا واولياء امورنا ، وساكون جنبا الي مع هموم جيلي ومشاغله ، فانا لست شاذه عنهم .. استاثر بما يجري حولي ..
ومع ذلك كله .. ان شجعتموني وواكدتم لي انكم ستقفون معي ، سالعن ابليس واشترك في هذه المسابقة ،
فكثيرون من الفنانين اللذين نستمع اليهم لم يقنعوا احد بجمال اصواتهم . فكل الحكاية محسنات تصاحب الفنان وتخلص الشغلانة ، وصوله طويله تشارك فيها الة الساكسفون وينطط النص ويملئون الارض غبارا . برقصات عجيبات
اقلاها رومانسيه هي رقصة القرد
وحدها الشعوب العظيمة هي التي تخلق
من عيوبها ممرات للمجد
التوقيع :شيري اثناء زهجها من الفايروس
| |
|
|
|
|
|
|
|
|
 Re: هل ستدعموني؟ سوف اشترك في السوبـراستار القادمه (Re: shiry)
|
شيري سلام
انتي عارفه قالوا زمان واحد من اهلنا اهل العوض وقف ليهو في كشك ليمون وقرطع ليهو كوز ليمون اها امسع بتاع الكش وقال ليهو تعرف يا اخينا ليمونك دا لو ما كان حار وسكرو قليل وليمونو بايظ كان يكون احسن ليمون
اها يا اختي دحين انتي متأكده انو الفايروس الفي جهاوك دا ما معدي .. يعني ما إتعدى حدو وتلب من الشاشه؟؟؟
Quote: فانا ولله الحمد املك صوتا ، لم يحصل ابدا ..مبااااااالغة . ..ابدااااع عديل كده
فكل عيوبه وهي على ما اعتقد بسيطه وخبراء الاغنية والصوت والطرب على هذا البورد موجودون ويستطيعون ان يحكموا فانا راضية بحكمهم (كدي خليهم يقولوا غير كدة !! يعني ح تعملي شنو ؟ ولا حاجة حا اقعد ابكي ، هو انا عندي شنو غيرها |
لكن دي ما بتكلم فيها
بس البدري زمان شال منى دلوكه ممكن اقول ليهو يرجعه واديك ليه
وعلي قول ابو حراز
قال سوبر زعموط قال
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: HOPELESS)
|
سلام مربع
استاذنا الموصلي
سلمت ياسيدي للمساندة ونصيحة غالية
وانا مازلت منتظرة منك الحان جميلة كده مثل احساسك
عشان اشارك بيها . ها قلت شنو ؟؟
هوبليــس
لكن والله احبطني .. سوبر زعموط ، كويس لكن
انا على اي حال الفورم سلمت خالص وكلها وايام
ويرسلوا لي ا لتذاكر ، وشوف بعدين .. التالق
هاهاهاهاهااهااها
زوربا السوداني الشفيف
حمادة بت .. حتة واحدة
انا بحب صوت ندى القلعة ، اكيد ح تساعدني هي
اساسي
معقولة دا رايك فينا ، نحن حواء السودانية
وهذه تحيتي الندية ابعثها الى اخيك
عساها تصله وهو بالف الف خير
ولمن افوز ح اوقع عليهو على صورتي
وانت خلي البت التانية (المانحجت) ترسل ليك صورتها
نحن موش شينين ، لكن طروفنا كده ..
هاهااههاهها
العمدة 4
يازول يارائع سلمت ياسيدي للدعم والمساندة
وانا طالباك اثنين لحن
عشان المشاركة في المسابقة دي
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: زوربا)
|
في الظهرية بعددوامي الاول اذهب الي المنزل واجد ان اخي سبقني من دوامه يشاهد في القناة السودانية قناتنا يعني ويصادف بداية المسلسل السوداني اليومي ويدور حوارا بيننا يومي فهو متعصب لكل ماهو سوداني وانا عكسه نوعا ما اليوم كان موضوع حوارنا اثناء مشاهدة المسلسل السوداني الدهباية وقلت له لماذا تلبس الممثلة الثوب في كل اوضاع تمثيلها اي تتحجب حجاب نص كم كدا في منزلها وعندما تكون وحدها وع زوجها في غرفتهم ومع مراة الجيران براهم فقال لي ان هذا قرار من ادارة التلفزيون بحجاب كل المذيعات والممثلات وقلت له لكنهم يعرضون مسلسل مصري وسوري اليس في الامر عورة ام الشاشة تتبدل ولكن خلصت انا وحدي مع غضبه طبعا انه السودانين والسودانيات شينات عشان كدا بغطغطوهم ويدسوهم وكلما اقارن بين مذيعينا ومذيعاتنا وممثلينا وممثلاتهم اخلص الي انه نحن شعب فقير الي الجمال حتي اني كنت مهوس بهذا الامر عند ذهابي من ميدان ابو جنزير وحتي جامعة السودان مرورا بشارع المليون مغفل اي الشارع الذي يمر بالجامع الكبير والقبة الخضرا فكنت مهوسا بالمطالعة في وجوه المارة والذين لا محالة هم صارين لوجوههم وشينين شناة مرة و واكد لي ذلك بعد اغترابي هنا وعمل بعض المقارنات بين السودانين والجنسيات الاخري فاجد اننا شعبا وصل الفقر المدقع في الجمال والحقيقة زمان كانت الاخلاق شايلانا ولكن الان اصبحنا لا خلقة لا اخلاق
حتي اغانينا تتغزل في الشناة والدشانة مثل اغنيةعقد الجلاد شين ودشن كلمة مافي الشين ولا ماعرف شنو غايتو اولها شين ودشن يعني سيك سيك معلق فيك
قلتي ماشة وين يا شيري لبنان سوبر استار العرب
انا غايتو متاكد كان شارك فيها فنان سوداني ناشئ كان اخذ جائزة اللعب النضيف بالرغم من انه غنا ولكن دا الفالحين فيهو يدقونا ونعتزر
غايتو كان اشتركتي اخوي كان اداكي صوته لكن انا كان صوته ضده عشان صوته يروح
لووووووووول
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: 3omda4)
|
سلام مربع
الفاتح
عارف انا مبسوطة جدا لاسرار بابكر
ويارب كل سوداني وسودانية يشاركوا في المحافل الدولية
يرفعوا راسنا
.بيني وبينك كرسي جابر ، لو لقيتو ح ازوغ من السوبر استار
بس هو كيف يجييني
خالو العزيز ابا
سلمت ياسيدي للمساندة والدعم الفني
بس اتبعت نفس الخطوات ، وهرست ليك الفيروس لمن بكي
لكن مع الفيروس اتضحت لي وجود منغصات اخريى
الله يسامح السيرلانكية
ابو جهينه
عارف البودي قارد دي اهم حاجة
لانو انا ح اكون سوبر استار مشهورة جدا
فمع كل العجب الذي اريته للناس
افلا استحق ان اكون الاولى بتفرد
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: shiry)
|
شيرى حد العسل الصافى
سوبر استار ؟
يا بت على الطاحونة تشاركى وتفوزى كمان
نحنا دائما الخوف كاتلنا والدمدمة وهدوم كدة
تعمل بيها صيوان عرس .....
بس حبة شيطنة وابتسامة مع الجمهور ومشاركة بسيطة
على الهارمونى وكلمة عن مشاركات زائفة سابقة
وفوز على بعض المغنيين فى مهرجان من المهرجانات
وخلاص تضمنى كرسى جابر اقصد كرسى الدرجة الاولى
شفتى المبدعة اسرار بابكر عملت شنو ؟
بأدائها وثباتها على المسرح وقوة الصوت وتحكم فيه من غير اى ارتباك ولا رجفة البت جات الاولى من غير منافس ....
لكن كان بترجفى كمان .... احسن ليك تمشى السوبر ماركت الجمبكم
داك فيهو لصاقات بتقعد فى الصوت وبتخليهو ما يرجف ...
الحقيقة اغنية المزار ممكن تفوز بجدارة
وحقو تشاركى نحنا معاك وبنشيل ليك الصفائح والجرادل وتشجيعنا فوق
| |
|
|
|
|
|
|
|
|
 Re: هل ستدعموني؟ سوف اشترك في السوبـراستار القادمه (Re: alfatih)
|
الإبنة المبدعة شيري
أولا لك دعمي وأم العيال
وهدية صغيرة من خالك عشان تخلصي من غلاصة الفيروس وعشان ما يحرمنا من حروفك الرشيقة تتبعي الخطوات دي
ٍClick :Start
Click :Run
write: Regedit
Click: Hkey-Local.Machine
Click : Software
Click : Microsoft
Click :Ole
Click :Enable Dcom (Y)
DubbleClick in the (Y) and change it to (N)
تحويل ال (واي) لي (نو) بتم طباعة أو قولي إكتبيها كتابة ولومك علي لو ضايقك تاني
تحياتي
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: shiry)
|
شيري السوبر استار السوداني المعجن المحنن
اتخيلي معاي انو عمر البشير عمل مثل الملك عبد الله وفتح الاتصالات مجان زيو كده وناس الخرطوم من الكلاكله الي الكدرو ومن العيلفون وحتي سوق الناقه متجمعين عند شاشات العرض العملاقه المستورده من امريكا خصوصا الي هذا الحدث العملاق
وتظهر شيري في الشاشه لابسه التوب السوداني وكل الناس تقول مشاء الله وتفوز بنسبة اصوات تبلغ 99 % وتتحول الخرطوم الي ساحة احتفالات ويقام مهرجان ضخم لتكريم الفنانه شيري ورسائل التهنئه تنهال عليك من الغرب والجنوب والشمال والشرق والجزيره والصعيد حتي الدمازين ويخرج الريس ويقول هذا كلو من فضل الثوره التي علمتكم تغنو لانو زمان كان عندنا فنانين بس الحين المراءه بتمثلنا في الخارج واتحاد نساء السودان بيقول انو وفر ليك فرص التدريب العاليه والتاهيل في اعظم دور الموسيقي العالميه وتتعاقد معاك شركة حصاد عشان تنتجي اسطوانات وتجري في يدك الفلوس مثل الانهار
وفجاءة تصحي من النوم علي صوت امك يا بنت ها قومي قطعي البصل للملاح هيهيهيهيهيهيهيهي
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: abas)
|
سلام مربع
عباس
اتخيل انا حبيبت اكتب في الحتة دي ، واتخيلتني والجمهور السوداني سافرنا بقطر حلفا ومن حلفا الى مصر ومنها الى بيروت
عشان يشجعوني
لكن خزلني الكي بورد ، من امس ما عرفت اشتغل
فانا اعمل في ظروف صعبة ، اكتب بقلم رصاص على الكي بورد
هل تتخيل دي ؟؟
كرهتهم ام التكنولوجيا ، صااااح ؟؟
مريم بت الحسين
والله انت الوحيدة الحا تجيبي لينا شمار الاردن
والملك عبد الله وحلوته الملكة رانيا
في انتظار شماراتك
ابو حراز
ليس تعصب مني اوجندرة مني ،
لكن بصراحة كده ، بركة والحمد الله الطلع ملحم زين
رويدة وديانا فعلا يستحقان المراكز الاولي
معليش اعذرني على الشلاقة .. قلم الرصاص ركن على الكي بورد
ابو يسرا
شفت كيف البرنامج دا مليان الف وزخم .. ؟؟
انا بس محتاجة لي دعمك الشديد ، اما ازياد الرحباني
فانا صوتي قادر على اقناعهم .. ثم تاني الم اقل لكم انني احمل
معاي مايكرفونات زيادة ….
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: مريم بنت الحسين)
|
عندي طبعاً بوست كنت بسخر فيهو من الشغلانية دي
لكن ازيدك من الشعر بيت
اليوم سمعت نشرة أخبار المستقلة
اليكم الموجز
الحريري يتصل على ديانا كرزون
ورئيس الجمهورية العماد ميشيل عوووووون يستقبل بمكتبه برئاسة الجمهورية ملحم زين
الملكة رانيا تهاتف ديانا كرزون
ومظاهرات صاخبة في الأردن وسوريا
يعني الليلة ناس بوش راحو فيها
وأخبار العراق
ومحادثات السلام السودانية
كلها راحت شمار في مرقة
انا ذاتي حا اشترك
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: AlAraby)
|
ٍسلام مربع
مهاجر
سلمت ياسيدي للاغنية الزوق والحلوة دي
وكتر لينا من الاغاني دي
فانا بكم ومعكم سوف احتل المركز الاول بجدارة
حمزه سليمان
طبعا انا منتظرة منك انت واستاذنا الموصلي كثير من الدعم
عشان افوز ليكم ..
سلمت ياسيدي للدعم والمسانده
اسامه الخاتم
ياسلام عليك يااسامه .وانت تساندني
بالله خلي مدام رؤي السقيد برضو تشجعني
عشان افوز ..
العربي
انت الوحيد العرفتها ..
لكن برضو مع الهترشه ، قول في حاجة اسمها
هترشه غنائية ..
اها بعد المعلومات دي ح تشجعني ولا لع ؟؟
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: shiry)
|
اها جيتكم بالشمار.. أمبارح عمان .. ولا بغداد أيام القصف.. انا قلت واحده من اتنين.. يا صدام يا اسرائيل... طلق نار... وألعاب نارية... الساعة حداشر بالليل.. الناس مرقت الشارع... مريم بنت الحسين طبعا عشان بيض.. وما بتشوف تلفزيون ما ناقشة الفلم... اها.. انا ديانا دي .. ملصقين صورها في الشوارع.. والله قلت رانية العبد الله جابو ليها ضرّه.. أمبارح الناس في الزغاريد.. قلت الأردنيين أخدوا التجربة السودانية كمثال.. واعتمدوا زواج الدسته... اها.. فتحت التلفزيون.. الأردنيين.. يغنوا.. والشاشات منصوبه في الشوارع.. الناس يتفرجوا في الأدرنية الفازت.. اها قلبت المحطة.. السوريين زي الصابه فيهم مطره... شركة الموبايلات الأردنية.. فاستلينك... ما خلت ليها جحر ما غزّت فيهو صورة البنيه.. والله يا شيري... اكان بسووا قدر ده.. انا وراك طوالي.. بس ما تنسينا بعدين... انا عندي تجربة في السلام على رانية.. انت كان سلمت على زوجة الرئيس (هي صحي .. نسيت.. هن اتنين).. خلاص انت سلمي على واحده وانا بسلم على التانية.. سلمي على الجديده..وانا بسلم على القديمة..
يا أب حراز.. اسمح لي استعير الجملة حقتك
قال كرزون قال
بنت الحسين
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: مريم بنت الحسين)
|
حبيبة البي
مريم بت الحسين
سلام مربع
عارفه ، مظاهر الفرح التي يطلقها الناس العامة
على وجوههم ويعبرون بها الشوارع
دون ان تدري تجدين نفسك
فرحانة
بغض النظر عن اقتناعنا بهذه التظاهرة ورأينا السلبي
او الايجابي فيها
تبقى دائما
تجارب مثل هكذا تظاهرات
تشكل ملامح جيل وهوية بحالها
على العموم
الحمد الله انك اخيرا عرفت قيمة هذه المسابقة
عشان تجي وتازريني
انت توصي لي الشعب الاردني
بعدين يدعمني ويرشحني
وماتخافي ناس السودان كلهم معانا
كمان بنخلي ناس تشاد
ونيجيريا
واثيوبيا
نحن نتميز دون كل العرب بذلك
سلمت يامريم
وربنا يخليك
ام راينا الايج
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: shiry)
|
شيري العسل
عارفة المشكلة ما اشتراكك ومساندتنا الأكيدة ووقوفنا خلفك نؤازرك بالتصويت على النت أو الاتصال بـ 0900.. الخ من وسائل انجاحك.. المشكلة انه السودان المسكين ده حيدخل في أزمة حقيقية لو اختاروا واحدة منه.. لأن اخوانا العرب طبعا لا يعجبهم الكلام ده وما حيصدقوا انو في بلد كده اسمها السودان الفائزة جات طاحت ببنات اللعبة القاعدين نتفرج عليهم ديل... يعني هسع سوريا والأردن خلوا أمريكا بعيييد وبدأوا يحمروا لي بعض!!!!!
المهم ولا يهمك يا عسل... انا عارفة ملاح الويكة حيعمل شنو.. وكمان كده لو شلت معاك شطة حاااااااااارة
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: Raja)
|
سلاااام مربع
رجاء العباسي
شطة !!
دي كانت غائبة عني كيف ؟؟
لا خلاص المسالة محلولة ياشباب
هي شطة جبال النوبة الحمراء ديك
براها بتضمن لي 50 % من النتيجة
والباقية عليكم انتم
ناس زياد الرحباني وجماعته
معاي انا الاحسن منهم
معاي
موسيقارنا العظماء
الموصلي
وحمزة سليمان
والشعراء الجميلين
تماضر
ويحيي فضل الله
والكتيابي
المشكلة ماعارفه منو البلحن هنا في البورد
مع انه ليست بالنسبة لي دي مشكلة كبيرة
انا براي بلحن
اصلوا كل الحاني ممكن تكون بتشبه هذا الجن الملازمني
سلمت ياعسل على الطله الحلوه
واحشــني
سلمت ياسيدي للدعم والمساندة
شايفاك جبت معاك المشجعين
ربنا يخليك ياسيدي
وبعدين كل مشجعينك ديل
ما ح انساهم
صورتي مع التواقيع بتاعتي عليها
وكمان ح اهدي ليهم سي دي بمشاركاتي كلها
سلمت ياسيدي
الرائع العمدة 4
ياسلام علي يا عمدة يازوق
ياسلام على احساسك الراقي
بالله الاغنية انت العملتها
عجبتني جدا
بـس لو زدت شوية تناغم صوت الكمان
مع الفلوات
ح يطلع روعه
وكمان لو كترت من الصولات
عملتها كل ثانتين
تبقى ماقصرت
سلمت ياسيدي
و
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: 3omda4)
|
Quote: بـس لو زدت شوية تناغم صوت الكمان
مع الفلوات
ح يطلع روعه
وكمان لو كترت من الصولات
عملتها كل ثانتين
تبقى ماقصرت |
العزيزة شيري الماشه للسوبر استار سلام مربع
اها يااختنا عرفناها الهترشه كمان بقيتي تفتي في الموسيقي
ابقي مارقه علي السوبراستار وبطلي الهترشه بتاعتك دي وناس الجبتهم معاى ديل كلهم بصوتوا ليك لكن الطريقه التمرقك علي ناس لبنان ديل شنو
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: wa7shny)
|
سلام مربع
واحشني
ياسلام عليك انت يا ود بلدي
انا دا الدايراهو منكم .. انكم تخشوا الاستديو عشان تساندوني ، وبي فرد حس تشيلوا معاي الاغنيه ، يعني انا اقول كوبليه وانتو ترجعوهو لي
واقوم اعمل مقدمه ، موسيقية قاطعاها من راسي المدوقس دا ، وانت عارف انو الراس دا ، لمن يشرع في فتل حاجة اكيد ما ح تقوم ليها قايمة
المقدمه الموسيقية ح تكون عبارة عن اجتراح لمسامات التاريخ ، عشان تكون العملية في مجملها عبارة عن تلاقح اللازمه ولو سالتني ايه اللازمه الموسيقية وحات نظري ماعارفاها ، الا لقطها من برنامج بين الامس واليوم . المهم نرجع لموضوعنا الاساسي
عشان تكون المقدمه في مجملها الشكلي والاستبياني ، ترقيع لفراغات الروح التي خلت اثناء استماعكم بسبب انشغالكم بجمال شعر مقدمة البرنامج او فستانها ، فكان لابد ان احترز لهذه (البيعه) ثم هدهدتها حتى تغتسل بزخات صوتي التي استلف في تلك اللحظة طبقاته المخملية (اي صوتي) وهذه العملية تسمي الترتيب الداخلي للحواس واهو في النهاية طرب من طرب يختلف
ايه رايك ..تكون الجملة الموسيقي التي سامطر به المقدمه مستلفة من التماذج التاريخي والالتزام التام به
شوف الغبــش واقفين صفوف .
طبعا الجمهور ح يرجع لي جملتي التي حييتهم بها
غني يا كنار واسمعنا من صوتك المحبب
وحتى لا اكون انانية لابد ان اجد تلاقح اشكر به جمهوري على مشاعر الحب او ما يسمي ب تجاوب الجمهور
دي خلاني اقيف في وسط الدارة وادق صدري واقول دي اهلي ..
ويهيج الجمهوري ويصفق متجاوبا معي تطريبي الاصيل حتى يهتز الاستديو بكاميراتها ، معدات الانارة
ويستقبل مني هذه الترطيبه ، ويرجعها لي
وسط الغمام شايف مواكب الهجرة
واختم انا باحساس مبسوط ومنتعش :
لو ماجيتا من زي ديلا وماساتي وذلي ..
ديل اهلي
... اها باقي ليك ما ح افوز ..
| |
|
|
|
|
|
|
|
|
 Re: هل ستدعموني؟ سوف اشترك في السوبـراستار القادمه (Re: shiry)
|
أخي المواطن ..
صوتك امانة
يهيب السيد جمهورية الموز الديمقراطية من المواطنين دعم نجمة الغناء شيري هباشي , وطلب الإستماع للأغنية فلان الفلتكاني ويهديها لي سكان القصر الجمهوري .
على كل من يود الإشتراك الإتصال علي الرقم صفر صفر , صفر في الإيد الشمال والتاني في اليمين , صفر اليدين يعني ولو جاتك البت البتقول هذا الرقم موفوف من الخدمة مؤقتاً أعزمها على ختام منافسات السوبر ليق في ميدان عقرب وحتفتح ليك الخط
يا بت يا هتراشة إنتي هو رقم تليفون ما خاتينو ليكم عشان تتصلوا , قال عرب قال , كويس لقينا ناس الأكس أل قلايدر في الأوربيت منزلين رقم للإتصال من السودان , عشان كدة دي دعايتي المفضلة في الدش .
لو بتدفعي حق الإتصال بصوت ليك وبالمناسبة انا ساكن بعيد ختي في حساباتك حق المواصلات والفطور وبالمرة حق الدكتور بتاع الأسنان أصلي لي سنة داير اقلع ضرسي واهو المناسبة جابت مناسبة
أبنوسي
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: AlAraby)
|
سلام مربع
تبلدي
بالله ، هم رقم تلفون ما ختوهو لينا عشان نتصل بيه ؟؟
تخيل اول مرة الاحظ ..
بس عارف هم معذورين لانهم عارفين انو كل السودان بره ، يعني لمن يكتب رقم السعودية ، اكيد قاصدين ومعاهم السودانيين ، ولمن يكتب الامارات برضو قاصدين معاهم السودانيين ، حتى البرازيل لمن يكتبوها بكونوا قاصدين اللبنانين والسودانيين
فحقوا نعذرهم ياتبلدي ..
يااااخي اعذرهم الناس ديل نحن ماعايزين معاهم عنكبة ، عضلاتك دي خليها للحلقة الاخيرة ، دي الحا تحصل فيها (الافاااانات) زي مابقولوا
قلت لي دعاية الاكس قلايدر هي دعاية المفضله ،
انا دعايتي المفضله هي الرز الامريكاني
وفي القدر افوووور افوووور وافووور
في دقااااايق اصل جاهز ومعمول
امريكانا . الرز ذو الحبة الطويله من حقول الارز الامريكية
سلمت ياسيدي للطله
العربي
عارف يا عربي ، انا ماعايزه دعمكم بالكلام بس ، لازم تنظموا حفلات وغوافل تسيروهوا لدبي لحضور المباراة الختامية
عشان تشجعوا كويس ، وتجيبوا معاكم النحاس ، والدفوف
سلمت ياسيدي للدعم والمساندة
| |
|
|
|
|
|
|
|
|
|
Re: هل ستدعموني؟ سوف اشترك في السوبـراستار القادمه (Re: waleed500)
|
سلام مربع
ليد 500
ويظل عتبنا على الاعلام العربي
انه كان كعادته غائبا
خلال كل زمن البرنامج
كان مشغولا باشياء اخرى
في نظره كانت اهم كثيرا من قيادة مجتمع
نحو عالم اكثر اشراقا
واكثر اعتدالا
ومع ذلك لا هو نحج فيما شغل نفسه به
ولا هو توقع هذا النجاح
لهذا البرنامج
يعني اشتر
ويغرد كعادته خارج السرب
وعندما اصبح البرنامج حقيقة
وشر لابد منه
جاءوا ليعلنوا انهم
بطريقة او باخري
ضد هذا الزخم الاعلامي
الذي يخرب عقول الجيل
طيب اين البديل
؟؟
سنعطيهم مائة سنة
| |
|
|
|
|
|
|
| |
shiry
Elmosley
زوربا
اساسي
alfatih
aba
ابو جهينة
abas
مريم بنت الحسين
ابوحراز
ابو يسرا
مهاجر
HAMZA SULIMAN
اسامة الخاتم
Raja
wa7shny
waleed500
فيس بوك
تويتر
انستقرام
يوتيوب
بنتيريست