|
|
 ماني كبيره بس كرعيني واجعاتني
|
حافله السودانيه هي نموذج مصغر للمجتمع السوداني طبعا ما اقدر اقول بكل شرائحه لانو في فئه من الحناكيش_وقبل ما ينط لي زول نافش ريشو يقول لي ليييييه...انا كنت بنتمى لتلك الفئه التى ترى ركوب المواصلات كدخول بطن الحوت...غير اني الان اصبحت بفضل الله شفته ومحكنه حنك شديد
طبعا المواصلات عالم صغير بدوره مليئه بكل الشرائح العمريه...الاطفال البنات الاولاد الرجال النسوان الحبوبين والحبوبات.....وعلى قدر ما الزول اخلاقو مرات كتيره بتكون في نخرتو وقرفان وزهجان بسبب ومن دون سبب وغالبا لو في سبب بيكون صعوبه الحصول على مقعد في الحافله الذي يكون مرات اصعب من الحصول على مقعد في الجامعات( على فكره وانا صغيره حكايه مقعد في الجامعه دي كلو كلو ما كانت راكبه لي عدلها...كنت بستغرب ليه ناس الجامعات ما ببنو مكان كبير يشيل مقاعد اكبر..او يخلو الزول الما عندو مقعد يجيب كرسي واللا بمبر معاو او يقيف مشمع حتى او يخمس مع صاحبو....اتزكرت الفكره دي لمن احدي الحبوبات المثقفات قالت وهي زعلانه على عدم قبول حفيدتها المسكينه في الكليه الهي دايراها....امشوا قولو ليهم البت دي صرتها مدفونها هناك وكان على المقعد انا بجيب ليها كبه ليها ولصحباتها)
المهم انو الزول لو لقى مقعد الحكايه لاتخلو من الشمس ودايما دايما لمن تجي راكب حافله تلقى الجهه البعيده من الشمس هي المليانه اولا ثم ياتي المساكين المتضطرين لاخدوا المقاعد البرونزيه
وطبعا ما اقدر انسى البتل (البطل) وهو الكمساري بصرتو المشهوره وهو اهم اداه لرفع الكثافه وفي عداء دائم وموضع اتهام سواء كان ظالما ام مظلوما من الناس وخاصه الطلبه اللي بدفعو نصف القيمه حسب القانون.....اتزكر مره كنا مجموعه كبيره مشرورين في الشمس ومافي مواصلات وبعد ادعيه وخراج روح جات احدى الحافلات وما ان ركب سادس زول حتى تحرك السواق وهتف بنا الكمساري كفايه طلبه خلو عندكم انسانيه.....ورغم الموقف الصعب لم نستطع التوقف عن الضحك لمده طويله....سبحان الله الانسانيه بتختلف من زول لزول
غير انك لو يوم قررت انك ما تصر وشك وترخي اضانك وترفع اريلك حتكتشف حاجات كتيره وتكتشف فعلا ثقافه المواصلات وهي علم يجب البدء بتاسيسو بعد كدا
البنات البنات نواره الحافلات نوع من يطلع ليك تنكش تنكش تنكش يقيف ويدي نظره عامه للحافله وعيونو تقول عليكم الله مش قيافه انا عاينولي يا اخوانا مش سكره...
والنوع دا بالزات لا خطر منو لانو عندو احساس داخلي انو احي احي مش حرام الحلاوه دي تركب مواصلات ...بالله الولد الفي المرسيدس داك مش اخير ليو انا من الككو القاعده جمبو....اها ولمن تجي نازله الطقطقه كيف كيف اما بسبب القلافز او يااااااااي.....وحينها يتطوع عشرات الشبان الشهمين للطقطقه بدلها ...لدرجه انو لو في زول سرحان يقول يبشر
اما النسوان يا اخوانا فهم اكتر ركاب المواصلات ظرافه وخاصه حبوباتنا الحلوين.... الونسه انشاء الله تسمع من السواق لكنبه شكرا( وكنبه شكرا للما عارفين دي الكنبه الاخيره لانو لو عندك زول ركب قدام اكيد حيدفع ليك وانت تقول شكرا )
في يوم حبوبتين صحبات اتقابلو في المواصلات طبعا بعد الونسه والسلام العشنا فصولو جميعا...جات واحده تنزل والمشي طبعا يعجبكم اها اها اها قام الكمساري استعجلها قامت صحبتها ديك زعلانه عيال اخر زمن المره قدر امك بدل ما تتكلها حته حته وتشيل ليها حاجاتها المره كبيره.....قامت التانيه النازله بصوت واطي قالت...والله ما ني كبير بس كيرعيني واجعاتني...
ونزلت...واستمرت صاحبتها في النقه والنقه قام الكمساري قال ليها...يا حجه انت سمعتي قالت شنو..قالت ماها كبيره لكن كرعينها واجعاتنها..... قامت حبوبتنا قالت اججججججججي المره المن ما حفروا البحر ما بتختشي....ودخلنا في موال تاني
اها يا رجال نقبل عليكم واللا لا؟
|
|
 
|
|
|
|
|
| العنوان |
الكاتب |
Date |
| ماني كبيره بس كرعيني واجعاتني | حنين | 07-17-03, 05:45 PM |
 Re: ماني كبيره بس كرعيني واجعاتني | ABUHUSSEIN | 07-17-03, 06:03 PM |
| Re: ماني كبيره بس كرعيني واجعاتني | حنين | 07-17-03, 06:19 PM |
| Re: ماني كبيره بس كرعيني واجعاتني | motaz | 07-17-03, 06:50 PM |
| Re: ماني كبيره بس كرعيني واجعاتني | Modic | 07-17-03, 10:28 PM |
| Re: ماني كبيره بس كرعيني واجعاتني | ود شاموق | 07-18-03, 00:50 AM |
| Re: ماني كبيره بس كرعيني واجعاتني | Modic | 07-18-03, 01:10 AM |
| Re: ماني كبيره بس كرعيني واجعاتني | حنين | 07-18-03, 07:01 AM |
| Re: ماني كبيره بس كرعيني واجعاتني | حنين | 07-18-03, 07:27 AM |
| Re: ماني كبيره بس كرعيني واجعاتني | Modic | 07-18-03, 04:16 PM |
| Re: ماني كبيره بس كرعيني واجعاتني | زوربا | 07-18-03, 06:31 PM |
| Re: ماني كبيره بس كرعيني واجعاتني | حنين | 07-19-03, 06:48 AM |
| Re: ماني كبيره بس كرعيني واجعاتني | حنين | 07-19-03, 06:57 AM |
| Re: ماني كبيره بس كرعيني واجعاتني | shiry | 07-19-03, 12:36 PM |
 Re: ماني كبيره بس كرعيني واجعاتني | sentimental | 07-19-03, 01:46 PM |
| Re: ماني كبيره بس كرعيني واجعاتني | زوربا | 07-19-03, 03:51 PM |
|
| |
فيس بوك
تويتر
انستقرام
يوتيوب
بنتيريست