في يوم من الأيام حينما كنت في السنة الأولى بالجامعة، طلب مني أستاذ فاضل ان أعمل سمنار عن علاقة علم الاجتماع بعلم أصول الأجناس .. وان أقوم بتقديم هذا السمنار في قاعة الدراسة .. يعني داخل الـ Classroom.
تشعب الموضوع، وطبعاً سمنار داخل قاعة دراسية دي حاجة جميلة جداً، يعني بتكون بتعرف 101% من الحاضرين وجميع الأسئلة قابلة للطرح دون أي مقدمات.
واحدة زميلتنا سألت : على أي أساس بتقول إنو أصل الإنسان قرد ؟ قمتا قلتا ليها دا ما كلامي أنا دا كلام داروين، قام واحد تاني سأل : وليه انتا بتقول الكلام دا ؟ قلتا ليهو لأنها وجهة نظر، وهي جديرة بمحاولة الفهم.
في واحد صاحبي قام نطا من هناك وقال لي وما هي وجهة النظر ؟
ورغم ان هذا السؤال لم يمر علي من قبل، او يطلب مني احدٌ ما أن أفسر له ما معنى وجهة نظر، إلا أنني (ملك التنظير) ولم أشاء أن أترك هذا السؤال من دون إجابة.
قلت له وجهة تعني وجهة، ونظر يعني نظر، اربطهم مع بعضهم البعض تجد أنها تعني الزاوية أو الـ Sector الذي يرى منه الانسان العالم من حوله.
صديقي : ما فهمتا ..
طيب تخيل أن هناك تلفاز في منتصف هذه القاعة، وهو موجه على الشخص (س)، وظهره علي الشخص (ص)، و ص وس لم يرى أي واحد منهما التلفاز في حياته من قبل، .
قال س : يا سلام والله مسلسل جميل
ص : ياتو ؟
س : الفي التلفزيون.
ص : التلفزيون ما فيهو شيء.
س : فيهو مسلسل.
ص : فيهو فتحة أريل.
س : ما فيهو فتحة أريل.
ص : فيهو.
س : الخاين مات.
ص : مافي خاين.
س : انتا ما بتفهم ولا بتشوف كمان.
ص : والله انتا زول ما عندك علاقة بأي شيء.
س : أنا كلامي صاح.
ص : انا الكلامي صاح.
جبنا س ختيناهو محل ص وشلنا ص وديناهو محل س.
س : آي والله.
ص : فعلاً والله، شي غريب.
س : يا خي متأسف.
ص : والله انا المتأسف.
خلاصة : الحقيقة المطلقة هي محض وهم، والإنسان طالما أنه لم يجرب الشيء بنفسه فلا حق له بتاتاً في الحكم عليه أو على صحته من عدمها.
ليست محاضرة، ولكني أجدكم متحمسين يا أصدقائي لأفكاركم بصورة جيدة، وهذا حسن، ولكن اتركوا هامشاً ولو بسيطاً للتراجع متى ما ثبت أن غيركم هم على صواب أيضاً.
.
(عدل بواسطة ود شاموق on 08-17-2003, 10:24 AM)