كيف تعرف انك في بيتنا

والله قلت امشي مع موضة العناوين الايام دي في البورد لانو ما لقيت لي عنوان مناسب للبوست ده غير كدا
الله يجازي محنك يا مياده
المهم قلت انفض امخاخكم شويه من الهموم وعشان تحركوها وتعيدوا لها النشاط

قبل يومين ثلاثة اربعة خمسة كدا وزي كل يوم الساعة كم كدا ما عارف كنت ماسك الريموت كنترول
شاهدت مسدس
ثم بندقية
فرشاش
ار بي جي
دبابة
صاروخ
اباتشي
بي فيفتي تو
ودمار اينما تشاهد وفي أي قناة
المهم اخيرا وجدت قناة وكان فيها برنامج مسابقات وعلى غير العادة توقفت يدي عن الاغنية التي احبها عندك الامساك بالريموت وهي الساقية لسا مدورة فلا تجدني اقف عند قناة محددة خصوصا هذه الايام
وخرجت بهذا السؤال الذي اعجبني فيه الرد السريع للمتسابقة التي لم تتردد فيه على الرغم من انني ذهبت لأحضر ورقة وقلم ووجدت الجماهير يصفقون لها وانا في دهشة من امري ـ ما شاء الله عليها
سألها المقدم ثمانية زايد ثمانية كم قالت ليهو (سطاشر) قال ليها زايد ثمانية فاجابت اربعة وعشرين
لحدي هنا عادي
فقام سألها بانه يريد رقم تستخدمه ثلاث مرات وبأي عملية حسابية كانت وان يكون الناتج اربعة وعشرين ايضا غير الثمانية طبعا
وهناك رقمين يمكن ان يحققان هذه النتيجة باستخدامهما بطريقتين مختلفتين
يلا ابدو بعد ده ولو في زول توصل لاجابه ارجو ان يترك الحل الثاني لاحد المشاركين الباقين

الجائزة الأولى غرفة نوم والسرير لشخص واحد
الجائزة الثانية تلفزيون خمسطاشر قدم
الجائزة الثالثة غسالة بالاقمار الصناعية
الجائزة الرابعة تلاجة فوول اوتوماتيك
الجائزة من الخامسة لحدي الخمسين كيس تسالي لكل واحد

اخر موعد لتسليم الاجابات السنة الجاية إلا حداشر شهر
ترسل الاجابات مكتملة على عنوان بيتنا
بس كيف تعرف انك في بيتنا

اذا كنت ماشي ولقيت نفسك في بلاعة فاعرف انك قدام باب بيتنا
وبعد ما تطلع من البلاعة وتلقى نفسك قدام باب مكتوب فيهو حضرنا ولم نجدعكم فاعرف انو دا بيتنا
واذا لقيت الباب ضارباهو مطر السنة الفاتت ومصدي فاعرف انو ده باب الجيران
مع تمنياتي لكم بالوصول للاجابة الصحيحة
ومعاكم سلامة

الاخت وانجا
انتي عارفه انو اضمن عملية انو الواحد يحسبها بي يديها حتى العشرين زاتو واكيد حا تكون النتجية صحيحة
لكن ماك طولتي في كدا شكلي استعنتي بي يدين جيرانكم كلهم لكن نصيحتي ليك الحل ما بيحتاج اكتر من خمسه ايادي
وحاجز ليك جائزة حتى لو ما وصلتي للحل باعتبار انو اول زول يشترك في البرنامج ده

حبيبنا المهندس
هو ديل انتو البيتكم بابو مصدي وانا ما عارف
كل يوم تجدع الكلب حقنا لمن علمتو ليهو نفسيات وبقا يشرب من مويه الحفر
لوووووووول

newbie
فعلا ده الحل الصحيح
لكن طالما انو الحل كان في الباب اعتقد انو حا نعيد الامتحان عشان ننصف الناس الساهرو وتعبو على سبيل تسرب امتحان الشهادة السنة دي

وفي الختام اشكركم كثيرا علي المشاركة
ولكن في انتظار الحل بالرقم الثاني غير رقم ثلاثة

الاخ الحبيب ود عقاب
اشكرك كثيرا على مشاركتك الجميلة
نعم هذه طريقه اخرى توصلنا الى الحل ايضا
ولكن للاسف يا اخي طارت عليك الغسالة وشكلو الغسال ده ما حا يرحل من جمبكم
لانو عايزين رقم واحد وانت استخدمت رقمين في هذه المعادلة وهما (اثنين واربعة) لذلك اربعة وعشرين خارج حساباتنا
اشكرك مرة ثانية وانا بعتبرها ليك اجابه صحيحة عشان شكلك زهجان من الغسال بس اوعا يكون بينتظرك قدام باب البيت اخر الشهر
ولك كل حبي

وما زلنا في انتظار الرقم الثاني
مين يتبرع بمعرفته يا ترى