|
Re: "نون" فاطنة -- "ميم" السماحة (Re: سمية الحسن طلحة)
|
وبالسين شنو يا سمية؟
سمو مقام وسحر إلهام
الشكر مبزوم ومبذول ومختوت ليك براك
تستحقيهو وتستاهليهو، وبرضة قليل
ومعاه التقدير كله ليك
تعرفى يا سمية
إسمك دائما بذكرنى زول جميل ونبيل وأصيل
واحد من شموس أهلى البطاحين السمحين
أستاذنا الأنيق الرقيق
طلحة عمر أبو دم
يا ربى الزول ده وين هسه؟
وتانى وتالت شكرا ليك إنتى
وآلاف المراحب والحباب
| |
|
|
|
|
|
|
Re: "نون" فاطنة -- "ميم" السماحة (Re: أبوذر بابكر)
|
أبوذر ...
أ نت الذي به ـ والذي ذرأ ـ تقايضنا فراديس الجنان إطلق عنانك و اعتلي هام العلا و امتطي صهوات سر الإفتتان
شاكرة وممتنة والسماحة فضلة خيرك تقصد طلحة أخو علي أبودم المحامي ؟ ديل من المغاربة جيران وحبان أهلك البطاحين في (أبودليق) لو دا مقصودك بجيب ليك أخباره
وتاني تقديري وإحترامي ومن بعده بهدي سلامي
| |
|
|
|
|
|
|
Re: "نون" فاطنة -- "ميم" السماحة (Re: سمية الحسن طلحة)
|
سمية
يا إسم السمو الأعلى
وعليك السلام والمودة
حرفك بتق مرق سر الخدار والموية الفى مجارى غنانا سالت سقت روح الأرض وفرهد نواحينا النهار
ياهو طلحة ذاته
وزمان أى زول من جهات ابودليق بنقول إنه بطحانى
ولأنه طلحة زول وجيه ووسيم ونبيل ما جانا شك تب إنه بطحانى
لأنه البطاحين أهل الحاجات بدون منازع
والله ما مجاملة يا سمية
ده شى الخلق كلهم عارفنه بى أكيدة
وليك كل الود وعالى التقدير
| |
|
|
|
|
|
|
Re: "نون" فاطنة -- "ميم" السماحة (Re: أبوذر بابكر)
|
Quote: يا فاطنة
ندهتك بى لسان شغفى الأساهو طويل فكى جداول إسمك المسحور وحجينا شوفى بلية الولد المرق مجبور ونادينا اربطى جبيرة الخاطر الدوام مكسور ولولينا نرسم ليك شمس محروسة بالأفلاك نلون ليك قمر فى حضنو ركّ ملاك نحلب ليك غنا الليل المحين ريد تشربى بى كفوفنا لما تتكفى وتنهلى من قلوبنا لما تدفى |
أبو ذر الجميل ليك وحشه والله وحمداً لله على سلامتك
| |
|
|
|
|
|
|
Re: "نون" فاطنة -- "ميم" السماحة (Re: Ishraga Haimoura)
|
Quote: ندهتك بى لسان شغفى الأساهو طويل فكى جداول إسمك المسحور واروينا فتشى فى كتاب الليل حكاوى الريد مشاوير الضنا المستور وحجينا شوفى بلية الولد المرق مجبور ونادينا اربطى جبيرة الخاطر الدوام مكسور ولولينا نرسم ليك شمس محروسة بالأفلاك نلون ليك قمر فى حضنو ركّ ملاك نحلب ليك غنا الليل المحين ريد تشربى بى كفوفنا لما تتكفى |
واحنا زاتنا ندهناك وبنسال عن احوالك ووينك وكيفك يسلم احساسك الجميل والحنين ويارب كل ماتتمناهو يتحقق ليك يخلى ليك النون والميم ( وفاطنة ) البركة بالجية بعد الغيبة الطويلة تسلم يارب من كل شـــر ...
| |
|
|
|
|
|
|
Re: "نون" فاطنة -- "ميم" السماحة (Re: ماجدة عوض خوجلى)
|
ماجدة
القاعدة فى أعالى ذرى الأمجاد الشواهق
كيف حالك يا نبيلة ويا أصيلة
تسلم روحك إن شاء الله من كل شين وكعب
أنا موجود والله، والغيبة كانت فى السودان الشقيق
بلينا نشاف الروح فى نيل الأهل والأحباب
وشرينا الدم تحت شمس الضحويات الندية
ليك التقدير والمعزة وكامل الإحترام يا ماجدة
| |
|
|
|
|
|
|
Re: "نون" فاطنة -- "ميم" السماحة (Re: معتصم دفع الله)
|
معتصم
وفيك نظمت الدر نشيدى
ما هدا لسه الملائكة معاك
الشفيع وخوجلى؟
عاين
خوجلى عثمان ده طبعا نحن مصنفنه من أصوات الجنة برضو
مره غنا هو والجابرى سيد الإسم
والله وماك طالبنى حليفة
الحجار الجنبى حسيت بيها عايزه ترقص من الطرب
وأنا فى العيون ببنيلو دارين من مودة ومن منى وبضمه فى قليبى انبساط ومحبة فياضة وهنا ما ردت غيره ولا هو راد زولا سواى ابدا انا
يا سلام على كامل عبد الماجد والجابرى، وكمان جا معاهم خوجلى
زى تقول يعنى نحن ناقصين وجع
شكرا يا عسل على موسقة الفجة
| |
|
|
|
|
|
|
Re: "نون" فاطنة -- "ميم" السماحة (Re: أبوذر بابكر)
|
مطر يامطر ...
لما ادخل البورد واشوف اسمك بترجع فيني الروح وبجيني احساس جميل بالجد وبفكر انو حادخل المنتدي بكرة وبعدو بتذكر شتات وبينوتي والملا عمر.. وناس بتتمني يطلع الصباح عشان تشوف كتابتهم البترد الروح .. الواحد بحس مرات انو عجوز وبتكلم زي جدو عن ايام السكر بالراس والترماج من الاسكلا ..
دم بخير وابعث فينا الجمال ..
| |
|
|
|
|
|
|
Re: "نون" فاطنة -- "ميم" السماحة (Re: 3mk-Tango)
|
تنقو البديع
خالد السمح
الشوق بحور والله يا زول يا زين
جيتك صحت فى نفوسنا الوجود ورجعت لعيونا النهار
يا حليل ايام صفانا
جورج وشتات وبلقيس والهدهد وكل أغصان الزيتون الكانت مرفوعة
محبة وطيبة وإلفة
يا ريتهم يسمعو كلامك ده يا تنقو ونقعد نغنى كلنا
غنوات البهجة وفرح الدنيا يبشر فينا
خليك معانا يا حلو وأبقى قريب
وإن شاء الله يتلملموا الحبان أجمعين
| |
|
|
|
|
|
|
Re: "نون" فاطنة -- "ميم" السماحة (Re: أبوذر بابكر)
|
أبوذر
يامن تبعث فينا روح الخليل" الأعجمى الفصيح" وما فاطنة هذه الا من ناداها الخليل " شوف جمالا دهشنا معشر الفصاح بين ناطق صامت وبين
صامت صاح"
وأنت بهذا الجمال تستدرجنا للدخول خلسة الى الى هذا المنبر لنرشف من رحيقك ونتبختر زهوا فى حدائقك دون ان نقطف وردة ..
واصل ياجميل تتبعك الحروف منسابة طائعة خجولة وكيف لا تخجل وعيوننا بها مترصدة وحواسنا لها راصدة الى ان تزول الدهشة...
| |
|
|
|
|
|
|
Re: "نون" فاطنة -- "ميم" السماحة (Re: Yahia Abd El Kareem)
|
يا يحى
تقصد فاطنة الجبينها صباح
معنى الإصباح ما بين "نونها" الأخضر
واحظها الجراح؟
كيف حالك واريت حالك سعادة وطيبة
كلما تجى يا يحى بزيد طعم اللون هنا وتكبر نشوة الفجة، والفرح بى جيتك يهوش
ويبشر فى خبر البت الغنوة
شكرا يا جميل على مشاركتنا فرحنا بيها
| |
|
|
|
|
|
|
Re: "نون" فاطنة -- "ميم" السماحة (Re: عبد المنعم سيد احمد)
|
منعم
يا سيد السماحة
يا جمال يا سماح
شوق والله يا منعم ما أكبر منه إلا فرحنا بى طلة حروفك
ايام ما كنا هنا نعاقر القهوة وضحويات الحنين
اخدت لى انقطاعة من انحاء هذه الحديقة التدية
ولظروق عادية استمرت الانقطاعة
ودائما كان الشوق رسول
عشان كده ما لميت فيكم وانتم رفقة تلك القهوة
معليش يا حاج
انت عارف المشغوليات الجسام
الزهجنا منها
آى والله فترنا عديل يا منعم من مكابسة الرزق والطشيش وعدم العرفة
ياخ سعدنا بيك الله
واكيد حنتلاقى
| |
|
|
|
|
|
|
Re: "نون" فاطنة -- "ميم" السماحة (Re: أبوذر بابكر)
|
Quote: هاكى الفينا فضل من غنانا بعد عشرق علينا الصوت وهاكى الدنيا مزروعة مرسفة بالشدر والناس تسبح ديمه بى نونك لا بتفوت ولا بنفوت لا بتموت ولا بنموت هاكى رحيح ارواحنا كايسك يوت شيلى الباقى من فضلة منانا |
الْعزيزُ / أبَا ذر بابكر .
عِطْرُ حرفِكَ فائحُ عَبيرُهْ .
فلا تَغِبْ كثيرًا يَا صديقي ..
ثُمَّ أمَّا بعدُ :
*وَدِدْتُ لِقَاءَكَ عندَ حُضُوريَ الأخيرِ
لِجدَّة ، مَعَ أنَّني خُبِّرْتُ بمكانِكَ لَكِنَّها مشيئةَ الرَّحمنِ
هَكَذا كانتْ .. ولا عُذْرَ لي
غَيْرَ صَفْحِكَ .
احترامي .
أخوك / محمَّد زين . _______________________ *( مرسفة بالشدر والناس ) : هل تَقصِد مَسَرَّفَـة ..
| |
|
|
|
|
|
|
Re: "نون" فاطنة -- "ميم" السماحة (Re: محمَّد زين الشفيع أحمد)
|
عزيزى محمد زين
تحايا وسلام وتقدير
لسوء الحظ والله يا محمد
بقيت نادرا ما أكون متواجد فى مدينة جدة
وفى ترحال متواصل ومستمر
وأتمنى لقياك فى ظروف وأوقات اجمل وأسعد
بالنسبة لمفردة "مرسفة"
هى نفسها وبتستعمل باللفظ والطريقة دى عند اهلنا فى بعض مناطق البطانة وبقصدو بيها الشى المليات
يقول ليك مثلا الجراب ده مرسف ومليان حده الوكاى
وشاكر على الحضور المنور
| |
|
|
|
|
|
|
|