|
|
 حين موت:العيد مبارك عليك يا ملكة الدار البكري ابوحراز
|
(اسمحي لي ان اناديك ست مكدار)
يا ست مكدار قولي لي غنية بنات مدرسة نيالا ..احس بفرحتك ويأتي صوتك الحنون
دوشكا ليلة هووي يا ليلة
ست مكدار هووي يا ليلة
دهب قنطار هووي يا ليلة
عشان بريدها هووي يا ليلة
ماسكة الجريدة هووي يا ليلة
صوتك سمح يا حجة... تقولي لي صحي؟؟ والله يا بت امي بابا اختي (البقيع) كان صوتها جميل وكانت بتحب الغنا لكن انا جاراكي انتي بالصوت الأبيض..
ينط (اواب) ضاحكا يعني ريهان صوتها ابيض؟
لم تنسي ابدا فترة انتدابك كناظرة مدرسة نيالا علي الرغم من تنكر ذاكرتك لاحداث كتيرة الا ان تاريخ عملك كان حاضرا امامك يحكي عن انجازات عظيمة لي زولة يتحكم في تصرفاتها وحركتها كل افراد البيت والحي والمدينة وبعد ده كلو بتتعلم وتشتغل استاذة وينتدبوها ناظرة في مدينة بعيدة ..
تجربتك كانت بتسعدني وانا المغرمة بتجارب النسوان عشان كده كنت بسالك وبخليكي تحكي وتحكي بستمد منك قوة وبشوف في عيونك شوق لطالباتك وصحباتك الاستاذات ست .. وست.. وتغني لي الغنية القطعوها فيكي بنات مدرسة نيالا .
ولغاية فترة قريبة كنتي قايلة انهم عبرو عن تقديرهم بالغنية دي لغاية ما عرف محمد ولدك انو في مدرسة في نيالا مسمينها علي اسمك ..يا سلام علي فرحتك وفرحتنا بالحكاية دي كنا بنجتهد انو نذكرك ليها كل مرة عشان بس نشوف الفرحة في وشك وتقول :عليكي النبي سموها مدرسة ملكة الدار البكري ؟ والله يا حليلهم وكتر خيرهم . وتستمري تشكري فلسانك لا يمل الشكر والدعاء الطيب .
العيد مبارك عليكي ست مكدار
كان احساس العيد بقربك يشعرنا بالعيد ، في كل مرة كنا بنصحي بدري ونجري جري نعيد عليكي نلقاكي في ابهي زينة .. توب جديد ومساير مسرحات بلمعة وابتسامة تنبئ عن حنان عظيم نحضنك ونحس انو الدنيا عيد وتتمني لينا السعد السمح والخير الوفير وامنيات كتيرة وجميلة وتهاتي عشان تضيفينا جيبو الشيالة جيبو العصير ويجي الاكل وتستمر حليفتك خسمتك بالنبي سبع مرات الرسول تاكلو ..
العيد مبارك عليكي وين ما كنتي اتمني انو تصلك عيديتي وامنياتي بانو تكوني مرتاحة في علياءك وخليكي عارفة انك كنتي المعني الحقيقي للحب والجمال في حياتي ودايما بتذكر وداعك لي كل يوم وانا ماشة الشغل خلاص ماشة المدرسة اضحك واقول ليك ماشة الشغل يا حجة ، تقولي لي ودعتك لأمين الوداعة ودعتك للمولي عز وجل- اليوم يا ستي احاول ان اتعود علي المشي للشغل دون وداع ولازلت اراكي في كل اتجاه في الشارع في وقار كبار السن وفي طيبة نساءنا...
كان نفسي اقول ليك زي كل عيد كل سنة وانتي طيبة وربنا يديكي العافية ويطول عمرك ويخلينا ليك للأسف (والحمدلله علي كل شي) ربنا ما خلاكي لينا وما اداكي العافية وما طول عمرك باين يا حجة انو باب السما في العيد الفات كان مقفول قصاد دعواتنا ..
|
|
 
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ريهان الريح الشاذلي)
|
العيد مبارك على ملكة الدار البكري أبوحراز في عليائها
أدت رسالتها على أبدع ما يكون لكم أنتم أبنائها لهذا فهى قدوتكم
وأدت رسالتها كأبدع ما يكون لطالباتها لذلك يكرمونها بإطلاق إسمها على المدرسة
لك التحايا وتبريكات العيد ريهان الريح
_______________________
هل توجد ثمة علاقة بينكم والأخ الصديق د. كمال الشيخ البكري أبو حراز ؟؟
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ريهان الريح الشاذلي)
|
| Quote: هل تعني كمال البكري ابو حراز؟ ان كنت تعنيه فهو ود خالة امي |
شكراً ريهان
بل أعني
الدكتور كمال الشيخ البكري أبو حراز
والده العم الشيخ البكري أبو حراز
( الشيخ ) هنا إسم وليست صفة
كان العم الشيخ ( إخصائي مختبر ) مستشفى رفاعة
كمال صديقي ودفعتي في رفاعة في المراحل الإبتدائية والثانوي العام
إنتقل مع أسرته ودرس الثانوي العالي في أمدرمان
ثم إلتقينا مرة أخرى في جامعة الخرطوم
مع إختلاف التخصصات
____________
تحياتي لخالك كمال البكري أبوحراز
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ريهان الريح الشاذلي)
|
سعيد جدا أن إلتقيتها قبل الرحيل يا ريهان
عملت العليها و ارتاحت قليلا من عناء هذا العالم العجيب , لتظهر مجددا مع الخالدين و الخالدات في ذلك العالم العظيم ..
العيد مبارك عليها , ست مكدار , و معك نحييها و نبعث السلام و الدعاء و المحبة الباقية
الصورة أثارت شجون عديدة عندي و عند منى ! ..
تحيات بالكوم و كل عام و جميعكم بخير,
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: Elmuez)
|
الاستاذ عاطف عمر تحية مجددا وبعد التحريات علمت ان حبوبتي الغالية رحمها الله هي جدة د.
كمال الشيخ ايضا .. وشكرا ليك كتير
العزيزة تراجي مصطفي...
لكي من الود والشوق بقدر ايمانك بقضيتك وجسارتك ودفاعك المستميت عن حقوق كل المظلومين العيد مبارك عليكي وعلي اولادك وربنا يخليهم ليكي.
كمال الزين
خالص الاحترام والتحية وكل عام وانت بخير
مريم عز الدين تحيات حارة وكل سنة وانتي طيبة وجميع اسرتك
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ريهان الريح الشاذلي)
|
العزيزة ريهان
تحياتي مرة آخرى
ومعذره لم انتبه لانه ست ملكة الدار قد توفيت.
لها الرحمة و المغفرة
كنت اسمع اسمها عند امي وتحدثنا عن كتابتها
وانها من اوائل رائدات الآدب السوداني
الي جانب انها من رائدات التعليم.
كانت والدتي تتحدث عنها بمحبة وتقدير كبيرين
ياريت تحدثينا هن عن اول دواوينها او قصصها المنشورة لا اذكر تحديد.
واتاريك يا جميلة حفيدة هذه السيدة الرائعه وفعلا فيك الكثير منها
من صلابه واخلاص للمبادئي,وفقك الله.
وشكرا لك على كلماتك بحقي:
Quote: العزيزة تراجي مصطفي...
لكي من الود والشوق بقدر ايمانك بقضيتك وجسارتك ودفاعك المستميت
عن حقوق كل المظلومين العيد مبارك عليكي وعلي اولادك وربنا يخليهم ليكي.
|
ويحقق كل امنياتك وتوفقي بكل خطوة يا عزيزة.
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: Tragie Mustafa)
|
المعز ومني
،
كل عام وانتم بخير وصادق الامنيات والاشواق اعذروني فكم مؤلم استقبال العيد بدونها هي ارتاحت من العالم العحيب وخلد رحيلها فينا حزن عجيب ,, كانت تذكركم بكل خير وحب ، ولا زلت يا مني اتذكر وقوفها في صفك في هظارك مع لمياء ويا معز كل من قابلها احبها عارف الحجة دي كانت متفق عليها...
اسماعيل حميم كل سنةوانت طيب
Quote: أن تحمل مؤسسة تعليمية إسم من ساهم في بناءها وتأسيسها أو عمل بها
إنما هي إشارة لعظمة دوره وإخلاصه وصدق نواياه |
يقال انها كانت تتقاني في تعليم البنات وغرز كريم الاخلاق كن يحبنها ويتعاملن معها كأم اكتر من كونها مديرة المدرسة
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ريهان الريح الشاذلي)
|
ريهان..
هذه كتابة أنيقة و حانية، و تعبق بعطور خاصة خاصة خاصة هي للوطن و الجدة التي
ضربت في أرضه البكر رسولة للعلم و للحياة، و أحساسك الجميل بالإنتماء إليهما
معا، و للأسرة الكبيرة في ذات الوقت
اكتبي.. اكتبي فالحروف تتحرق إلى مثل هذا البوح و عيوننا- نحن القراء- تنتظر أن
تعانق حروفك..
كل عام و أنت و الوطن بخير، و سلامي لأخي و زميل الزمن الأجمل..
خالك 
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ابوعسل السيد احمد)
|
ابو عسل السيد سلامات وخالص التحايا
Quote: اكتبي.. اكتبي فالحروف تتحرق إلى مثل هذا البوح و عيوننا- نحن القراء- تنتظر أن
تعانق حروفك.. |
امنت بان للحزن قوة واحترت من اين.. حتي الكتابة تصبح طاردة .
عارف البوست ده هربت منه زي هروبي من شوف المقابر في الشوارع لكن انصاص الليالي تماثل الحزن قوة اجبرتني للرجوع
ذكرتني علبة الحبوب الحمراء وانتي خلاص مستعدة للنوم ..
هاكي اكلي العيشة دي عشان الحبة يا حجة ..بري بت امي ما بندورها
عليك الله عشان الحبوب ما تعمل ليكي مشكلة .. خلاص كفاني الحتة دي تقسمي حتة وتقولي لي عليك الله اكلي الباقي..
اصحي علي صوت كلام ارخي اضاني اسمعك :ربنا اتينا في الدنيا حسنة وفي الاخرة حسنة وقنا عذاب النار..يا عزيز يا جبار
واسمعك تقري سورة تبارك والناس واواخر البقرة ..اصحي الصباح احكي لأمي وتقول لي ده العقل الباطني...
يا ست مكدار لعلك طيبة ولعلك مرتاحة راجياكي لسة بينا وداع...
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: Rihab Khalifa)
|
Quote: كان نفسي اقول ليك زي كل عيد كل سنة وانتي طيبة وربنا يديكي العافية ويطول عمرك ويخلينا ليك للأسف (والحمدلله علي كل شي) ربنا ما خلاكي لينا وما اداكي العافية وما طول عمرك باين يا حجة انو باب السما في العيد الفات كان مقفول قصاد دعواتنا ..
|
ريهان
مع اننا نتمني لمن نحب في اعيادنابطول العمر
الا ان الدعوات تستجاب مرات
ولا تجاب مرات كثيرة
هكذا يريد الرب
رحم الله ملكة الدار
فهي اجمل ملكة دار حين شاهدت صورتها اليوم
رحم الله كل حبوباتنا
فهم عتاد ماضينا واجمل القادم
نسلم ونستلم علي ذلك
حزنا وفرحا
كعادة الدنيا حين تهدينا الاشياء حلوها ومرها
يا ريهان الله موجود ونعم بالله
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: GamarBoBa)
|
ياريهان الريح ,كم تأسف المداخلة في معايدتك الجميلة والشفيفة لانها جائت متأخرة
لكن اكثر مايسعد القراءة ان تلامس مكنونات حرفهامعرفة الاخرين بك ,حتما ان مادفع ريهان
الى ان تفيض حرفاونظم دافئ بطعم العيد لهو امر صعب .
يحس القارئ باعتصار القلب والذاكرة وما اختلجه الوجدان من صور وذكريات ,
الى جانب حكاية عجيبة ومدهشة ان تحترفى الحروف الرائعة.
اتخيل منظرك يااختنا وانتى بتشبيها خصوصا فى حكاية المساير| Quote: ومساير مسرحات بلمعة وابتسامة تنبئ عن حنان عظيم |
رحمها الله
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ياسر حسن المبارك)
|
خضر حسين سلامات
| Quote: حتقابلي ملكة الدار في عيون تلاميذ بنات المدارس وفي شنط المدارس في كراساتهم في ألوانهم في طرحهن الأنيقة في أحلامهن بيوم باكر ! |
قالت لي ماشة الجامعة قلت ليها ياحجوج انا اشتغلت زييك زمان اشتغلت استاذة ..ضحكت عيونك وقلتي يا سلام اتوظفتي استاذة خلاص خلي بالك وخليك محترمة تلميذاتك بحترمنك ..
..
شكرا الطيب شيقوق وربنا يرحمها ..
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ريهان الريح الشاذلي)
|
المعز ابونورة خالص التحايا والاحترام
والتحية لكل ابائنا وامهاتنا مربي الاجيال ..شكرا لمرورك اسعدني ..
رحاب العزيزة سلامات
| Quote: ياهن حبوباتنا و اهل امي الحنان يا ريهان |
فعلا هم كده حنان مدفق ويعم .. عماد الكهربجي يا رحاب كان بيصلح حاجة في البيت جا ماري لقاها قاعدة في كرسي سلم عليها سلمت عليه بحرارة وقالت ليه امشي ربنا يعدلها عليك بعد 10 يوم جا في البيت ودعها وقال انو سلامها الحنين ودعوتها ليه عمرو ما بينساها وانو اتوفق ولقي شغل في احدي اجازاته لاقيتو في الشارع سالني منها قلت ليه ماتت ... ما شفت غير دموع
..
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ريهان الريح الشاذلي)
|
قمر بوبا سلامات
| Quote: رحم الله كل حبوباتنا |
رحمهم الله .. حين تكون لك حبوبة تعلم انك لفي شان عظيم
لمن كنا صغار كانت هي المنقذ من هجمات السفنجات وسندان المفراكة كانت بالنسبة لينا هي رمز الحماية تدرجت لتشكل مصدر التوجيه والارشاد لتصبح
الحنان الباسم ...في كل مرة برفع عيني ليها اجدها تصوب نحوي طيبتها وحنانها ادرك جمال ان تكون لك حبوبة..
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ريهان الريح الشاذلي)
|
منتصر ابراهيم سلامات
شكرا يا منتصر الامر الاكثر صعوبةهو ان نتماشي مع امر الفقد وان نتعامل معه كقدر مكتوب ، لكم كانت 2008م بغيضة وهي تحمل عني من احببتهم، لكم كانت بغيضة وانا لا امتلك الا ان اضحك وابتسم وامارس نفاق الحياة لان الحياة يجب ان تمضي ولان القدر شاء لي الاكتواء...
لكم يحزنني ان القدر لم يمهلني ان اقول وداعا ..ولا ان احتفي بالنظرة الاخيرة
ابو عسل سلامات..
| Quote: فأكتبي بمداد من نور عسى نهر الأحزان ينضب.. |
شكرا لانك تحفزني وشكرا لاني وجدت في كلامك بعضا من الحل...
| |
|
|
|
|
|
|
|
|
|
Re: حين موت:العيد مبارك عليك يا ملكة الدار البكري ابوحراز (Re: ريهان الريح الشاذلي)
|
سلامات ياسر حسن المبارك
رحم الله الوالدة استاذتنا سلمي الجنيدابي اعلم كم كان فقدها مؤلم لك وليزيد وعمار وعزة ولرفيق دربها الوالد الاستاذ حسن المبارك ولنا جميعا ، اذكر ضحكتها واستقبالها البشوش لنا في مكتبها ونحن جيل شغوف بانتقاد القيادات ،اجابت علي اسئلتنا بكل اقتدار زرناها ونحن نحمل احباطاتنا الحزبية وخرجنا منها ونحن نحمل شعلة التغيير ونحترم النساء..
رحم الله سلمي المناضلة القوية الصلبة رحمها الله وجعل البركة في ابناءها ...
| |
|
|
|
|
|
|
| |
ريهان الريح الشاذلي
عاطف عمر
Tragie Mustafa
كمال علي الزين
مريم عزالدين صديق
إسماعيل حميم
ابوعسل السيد احمد
طلال عفيفي
خضر حسين خليل
الطيب شيقوق
Elmoiz Abunura
Rihab Khalifa
GamarBoBa
منتصر ابراهيم الزين
ياسر حسن المبارك
ودقاسم
فيس بوك
تويتر
انستقرام
يوتيوب
بنتيريست