|
|
 الشهيد عبد الخالق محجوب صورة عائلية
|
http://www.rayaam.info/News_view.aspx?pid=452&id=33062
لم يستطع موقع البيت ولا ارقام اللافتة المتسلسلة لمدينة الرياض ان تحجب عن بيت عبد الخالق محجوب ابرز وأهم الرموز التاريخية والوطنية للحزب الشيوعي السوداني، ان تحجب عن تفاصيل البيت والاسرة تلك اللمسة الام درمانية السحرية التي تنتقل مع أهل البقعة اينما حلوا. تلك الاناقة الزاهدة دون بهرج أو إسراف. وذلك الولع بالفن عبر اللوحات المائية والمفارش المطرزة يدوياً والراديو الاثري العتيق الذي استمع منه عبد الخالق محجوب لاستقالة جمال عبد الناصر التي رفضها الشعب المصري. ثم من قبل ومن بعد تلك الصفة التي صكها العبادي وميّز بها المزاج الام درماني (الأنس) وابداع المسامرة الذي هو فن صنع في أم درمان.. وفي مسرد التاريخ الاجتماعي للعائلة كانت نعمات مالك تنثر النكتة السياسية والسخرية على طريقة نثر البهار على أطباق الحديث فكانت هذه السطور.
---------------------------------------------------------------------------------------------
شجرة العائلة:
بدأت الاستاذة نعمات مالك حديثها عن الأسرة قائلة: «زوجي عبد الخالق محجوب والده هو محجوب عثمان محمد من أوائل المتعلمين كان يعمل موظفاً في وزارة الصحة ويبدو انه ناشط ومهتم بالشأن السياسي والوطني. والدة عبد الخالق محجوب اسمها (أم النصُر) أبوه من جبل البركل وأمه من الزومة. اشقاء عبد الخالق بالترتيب عثمان وهو استاذ وملحق ثقافي، بعدين يجي بعده عبد الخالق بعدو آمنة وبعد آمنة علي. علي ده شغال في التعاون وبعدين فاطمة معلمة وما زالت ومحمد ضابط وقرا في يوغسلافيا بعد داك. اصغرهم هدى اتوفت بعد ما خلصت الثانوي.. بيتهم الأول جنب طرمبة جكسا في بيت المال يعني بين بيت اسماعيل الازهري وعبد الله خليل وبيت عبد الخالق كان جوار بيت والده طوالي.
سيرة عائلية:
عبد الخالق طبعاً درس أول حاجة في كلية غردون افتكر بعد سنتين فصلوه لاسباب سياسية طبعاً. بعدها مشى مصر واصل تعليمه هناك واشترك في تنظيم سياسي فيه شيوعيين مصريين برضو اعتقل وكده. وجا السودان واتفرغ للعمل السياسي بعد جيتو من مصر وكان معروف عبر الليالي السياسية والمحاضرات البعملها خاصة في نادي هنا في شارع الاربعين. قبل زواجي بعبد الخالق كنت متزوجة من ابن خالتي الطيب ميرغني وعندي منو ولد اسمو (بابكر) انفصلنا في هدوء تام لحد ما اتوفي علاقتي بيهو كانت طيبة جداً. ونحن بطبيعتنا ما عندنا قصة الخصومة دي. بابكر ولدي ده في انجلترا قرأ إدارة اعمال وتسويق ومتزوج من رحاب صلاح مالك وعندو بتين وولد أول حفيدة لي هي نون بابكر الطيب.
عمر عبد الخالق محجوب
وفي ذات السياق الاسري جاءت شهادة عمر عبد الخالق محجوب قائلاً: «ترتيبي أنا الكبير انا من مواليد سبعة وعشرين سبعة سنة تسعة وستين. درست مراحلي الاولية مع شقيقي معز بكمبوني أم درمان بعدين ?يلا قيلدا دي في شارع الحرية هنا في الخرطوم وحسب نظام كمبوني بعد سنة رابعة تنتقل الى كمبوني الخرطوم ده هنا في تقاطع شارع القصر مع المريديان حتى مرحلة الثانوي. بعد داك التحقت بمعهد نبيل وده كان معهد تأهيلي لشهادة لندن بدرس لغات وتوفل. امتحنت ودرست في المانيا الشرقية هندسة الكترونيات قبلها دخلت معهد للغة الالمانية في فراي بيرغ. انا مشيت سنة ثمانية وتمانين قبل انهيار الجدار البفصل بين الالمانيتين.
وبعد سنة واحدة تم توحيد الالمانيين نحن آخر دفعة تمتحن شهادة لندن وكانت بتعتمد في جامعة الخرطوم.
حكاية الهجرة والتعليم:
يواصل عمر عبد الخالق حكاية السفر والهجرة قائلاً: «بناء على نصح أصدقاء الوالد كتبت رغبتي الدراسية بالمانيا. المنح كانت عبر مكتب الطلبة في الحزب الشيوعي. سافرت عبر الخطوط البلغارية من الخرطوم إلى صوفيا ومنها الى برلين الشرقية واستقبلنا الالمان ووزعونا على مدننا ونظام التعليم فيه منهج علمي في المانيا واكتسبت اللغة من الاحتكاك بالزملاء.
العمل داخل وخارج السودان:
بعد ما تخرجت من الجامعة عملت مع شركات عابرة للقارات في مجال الهندسة والاتصالات منها شركة سيمانس للموبايلات والشبكات وشركة ميكوم وشركة انترويف مدير عمليات شرق افريقيا وعملت في كينيا وفي الفترة دي بنيت صداقات مع الراحل الدكتور جون قرنق وياسر عرمان وباقان أموم الفترة دي كانت من سنة الفين وواحد والى الفين وتلاتة. بعد الانفراجة جيت السودان عملت شركة خاصة بقدم فيها خبرات استشارية في مجال الاتصالات استفدت فيها من علاقاتي السابقة بعدين التقيت بي ناس (MTC) الكويتية سنة الفين وخمسة وكنت ضمن التيم البفاوض على حصة موبتل الى ان تمكنا من ذلك وتم الاتفاق وأُعلن، بعد داك أوكل لي قطاع المبيعات وخدمات المشتركين وده القطاع الفيهو تقريباً ستين في المية من القوى العاملة اشتغلت سنتين بعدها تمت ترقيتي واستدعائي لرئاسة زين في البحرين ومسكت قطاع المبيعات والمشتركين في الشرق الأوسط.
الاسرة الصغيرة:
اتزوجت سنة الفين.. وقبيل الوالدة نعمات قالت ليك أنا الكبير. الحقيقة انا ومعز اخوي فرقنا سنة وخمستاشر يوم معز اتولد في اغسطس سنة سبعين. وعندي عدد من الاطفال صالح وهيلانة وراشد، طبعاً راشد هو الاسم الحركي لعبد الخالق محجوب.
طفولة وذكريات:
يواصل عمر عبد الخالق شهادته التوثيقية: الحقيقة طفولتنا رغم المشاكل الكانت بتواجه الوالدة لكن كانت فيها حاجات حلوة انا ومعز اخوي كنا اصحاب اكثر من انو اخوان وبنحب الكورة شديد ونحن الاتنين هلالاب، لكن معز بحب يلعب حارس مرمى، معز شكلو رياضي كده، لما مشى امريكا الوالدة عندها نكتة قالت ليهو: «حقو تمشي هناك تلعب باسكت اصلك بتشبه ناس السلة». لما الوالدة نعمات مالك دخلت اللجنة المركزية في المؤتمر الخامس في يناير الفات كنا فخورين جداً بيها وهي فعلاً تستحق لأنها مؤهلة مش لأنها زوجة عبد الخالق محجوب وناضلت عشان تربينا بشكل يليق باسم وتاريخ الوالد. وكانت بتشتغل ساعات كتيرة جداً عشان توفر لينا احتياجاتنا، وحتى لما تكون في الاعتقال التحفظي بتشتغل في البيت تطريز وتعمل ملايات وكانت مكافحة.ربتنا بحيث تكون شخصيتنا مستقلة وكمان ما في زول فرض علينا قناعات معينة، لكن ما عشناه مؤكد بكون عندو تأثير في تشكيل خياراتك.
قرارات اسرية:
تواصل الاستاذة نعمات مالك قائلة:« بعد سنة واحد وسبعين ناس نميري كانوا فظيعين جداً. الناس كانت بتخاف تزورنا حتى وانا كنت متفهمة ده كويس. كان أهم قرار عملتو انو اقعد في بيت عبد الخالق محجوب يعني كان ممكن امشي اقعد مع أهلي مثلاً.. في ناس الوكت داك عارضوا المسألة دي لكن بعد داك اكتشفوا انو وجهة نظري دي صاح، الحاجة التانية كنت حريصة انو اولادي يقروا في مدارس خاصة لأسباب كتيرة جو المدارس كان ممكن يأثر فيهم بطريقة او باخرى المدارس كلها الوكت داك «ابوكم مين؟ نميري» ممكن برضو يتعرضوا لي حاجات كتيرة. المهم اصريت انهم يقروا في مدارس خاصة رغم انو ده مكلف جداً خاصة وانو أنا اترفدت من شغلي وبقيت اشتغل في القطاع الخاص في المستوصفات يعني ومرّات ارجع اشتغل في الاحفاد. المدارس الخاصة فيها الاحساس بالتنوع وكمان فيها اقباط وجنوبيين وخلفيات ثقافية وعرقية مختلفة ده كويس. عندي حاجتين ما بتدخل فيهم خالص مع الاولاد يقروا شنو ويعرسو منو؟! ما حاولت افرض عليهم قناعاتي زي ما قال عمر ولدي. القرار الثاني المهم انو كان عندي موقف حاسم من الزواج بعد عبد الخالق محجوب، أنا اتزوجت شخص استثنائي وما بقبل يجي زول يأثر على الاولاد. الجرايد لي يوم الليلة بتكتب عن عبد الخالق فموقفي كان واضح ومحسوم ما عايزة اتزوج بعد عبد الخالق.
الأُسرة والاصدقاء:
كان من أقرب الاصدقاء لعبد الخالق محجوب عبد الكريم ميرغني ومن الأهل والاصدقاء فاروق الطيب. فاروق الطيب ده كان لما يسافر بجيب شنطتين لي ولي أولادي. كان مدير البُسطة والتلغراف. مرّت علينا ظروف صعبة كنت بجيب الفراخ من الشركة العربية من الباقير ومعاي مني بت خالتي، وفي الاجازة يوم الاحد بسوق الاولاد معاي عشان يشوفوا المسألة دي وبعدما نجيبها نوزعها ومنها نلقى مصاريف نتعيش بيها. حاجتين ادوني قوة دفع: المسؤولية وحب عبد الخالق محجوب. من اصدقاء الاسرة الاستاذ التيجاني الطيب ومحجوب عثمان ونقد بزورونا دائماً ويسألوا عن الاولاد ونقد لما ولدوا (راشد ولد عمر ولدي) جاب خروف. ومن اصدقاء الاسرة قاسم بدري وقاسم ده فيهو صفات نادرة الاصالة والمحنة والتواضع والكرم والمرحوم مختار مالك ومنى كنتباي. ومن اصدقاء عبد الخالق محمد نور السيد، ومن سيدات الحزب الشيوعي سعاد ابراهيم أحمد وزوجها حامد الانصاري. فاطمة أحمد إبراهيم دي استاذتي في المرحلة الوسطى. صديقتي شديد طاهرة ابنة الصادق المهدي وانا بقوليها «طاهرة الطاهرة» وسبب صداقتي ليها مشينا هولندا نعمل ماستر هناك فقربت منها في الغربة ولقيت فيها صفات ممتازة.
المعز عبد الخالق محجوب:
المعز ولدي من مواليد اغسطس سنة سبعين قرا نفس المراحل مع عمر ولدي كمبوني وبعدين جامعة الخرطوم هندسة ميكانيكية. اشتغل بعد ما اتخرج مع ناس دال. لكن كان عندو نشاط سياسي طلابي فصل لمدة سنة وبعدين رجع خلّص وهو بالمناسبة متفوق جداً في الجامعة اشتغل في دال فترة. بعدين اتزوج سنة تسعة وتسعين مها محجوب عمر باشري ودي حصلت فيها نكتة. مشيت ليهو في الجامعة اسأل منو ما لقيتو الطلبة قالوا لي اسألي البت دي وكانوا خجلانين فقلت ليها ازيك يا «مهوية» قعدوا يضحكوا قالوا لي هسع نحن كنا داسين منك اتاريك عارفة!. معز عندو ولدين عبد الخالق ومحجوب.
الاقامة بالرياض
وتواصل الاستاذة نعمات مالك عن البيت والاسرة قائلة: «انت قبيل سألتني سؤال كويس انو انتو ناس أم درمان الجابكم الرياض دي شنو؟! البيت ده قدمت ليهو كقطعة ارض درجة اولى بعد رجعوا لي حقوقي بحكم عملي في الحكومة سنة تسعة وسبعين كان مدير الاراضي راجل محترم جداً رسل لي قال لي القطعة دي طلعت. حبوبة اولادي خالة ابوهم بتحب عبد الخالق محجوب وهي الربتو اسمها (الملكة) وهبت بيتها الفي أم درمان لاولاد عبد الخالق فبعناه وبنينا البيت ده الاسع قاعدين فيهو في الرياض.
عبد الخالق بورتريه مقرب:
وتختتم الاستاذة نعمات مالك بصورة عن قرب لـ عبد الخالق: «في البيت بقرا كتير. كان بحب الاكل البلدي. وبشرب قهوة كتير، في الصباح بيشرب شاي بي لبن، ويكتب بالحبر السائل ما بحب القلم الجاف ولما زول يهدي ليهو قلم باركر بهديه طوالي. الورق بكون سادة ما مسطر زي الفلسكاب مثلاً. في المساء بلبس جلابية واغلب الوكت بيقرا بدون نظارة. ما بحب الالوان الفيها بهرجة. بلبس نظارات شمسية في العطور بفضل الاود سبايس. وفي الغناء بحب يسمع خضر بشير وبحب اغاني الحقيبة شديد. لما يسمع صوت خضر بشير يغني بطلع يتابعو حتي لو كان مشغول بحاجة مهمة. يقرأ (النيوزويك)، ومشترك فيها ومعاها مجلات تانية. لما كان مسجون في مصر كان بتريض في السجن وأكثر رياضة كان يمارسها المشي. ما يحب زي ما قلت ليك الحاجات المزركشة والموردّه وكان يقول لي «دي خشونة في طبعي».
ابراهيم مطر داؤود
قبل ما اخلص كلامي يا مصعب في زول في الاسرة ديمهم شديد عمك ابراهيم مطر داؤود اللي اتوصر معانا ده ، نحن بنعتبره جزء من الاسرة . خدمنا والله شديد انا واولادي وبقولوا عليه عم ابراهيم هو من الجنينة وما بنقدر علي جزاءه خدمنا في اصعب الظروف وحتي اولادي ما بدخنوا قدامه بحترموه شديد.
|
|
 
|
|
|
|
|
| |
Muna Khugali
عاطف مكاوى
فيس بوك
تويتر
انستقرام
يوتيوب
بنتيريست