من صحابك ومن قرائبك ياحبيبي بغير عليك وكل من قال ( ياحبيبي ) أفتكرتوا بشير اليك
***
قالوا الفالنتين الما عندك في نفقة ما تعد أياموا ... جميل وهناء فالنتيين ( مختلف ) حبه.... وما خد من الحب وشو ( التاني ) مش بقولو الحب زي القمر لى وش مضوي ووجه تاني ...*مضّلم بس ماشديد
أكيد ما حاتكلم عن ( الحب ) ... بقولوا ( الغيرة ) وجه تاني من ( الحب ) ... ممكن لكين وش سخيف .. لما اسمع عن الغيرة بتذكر طوالى ( جميل وهناء ) مطمئن أنو ولله الحمد ويكمل ( هناء ) بعقله مافي سبب أنو تدخل حياتهم مشاعر زي دي غير أنو ( جميل ) كده بطبعوا مستأنس و رائق في علبوا ... لمن علبو ذاته زهجت منو ....
ومره عليهم حين من الدهر....... و( هناء ) فجاءة كدة بقت تمسك ( لجميل ) في الحكايات (الميتة) ... من يوم جات سيرة هنايه ... قريبته لأنو ( جميل ) في لحظة صفاء وتجلى دقس دقست عمرو ... ولأنو هناية دي كانت أخت صاحبو ونديدتو( في سنو تقريبا ) وفردتو ...... و كاسرة في كم ضلعة حكاية قديمة ززززززززمان قبل يعرف هناء ... وما حصل حاجة ... من قوله تيت حسمو سريع.. سريع زي القون الزمان بيجي في الهلال من أول دقائق ... ومرت الحكاية عادي ... والخوه في محلها
ومشت الايام شوية ... والآسي أكيد أتنسي و( جميل ) مرة صدفة قام قابل هناء ( قريبتهم ) ولّمح و ( هناء ) ماحسمتو... قالت في نفسه حرام خلينا نشوف موضوعوا شنو والموضوع بقي مواضيع والموضعة حصلت والحكاية أخد زمن إضافي وضربات جزء .... وبقت في مشية وشيلة فاتحة ووووووووووو وبقي بينهم حياة كده وكده مرات ماشينها حلوه وسلسة زي سكينه في جاتو ... ومرات قاسية ووعرة زي طلوع اللواري عقب بورسودان الزمان بس في الغالب ( هناء ) مخليه حياة ( جميل ) .... ماك ميلك شيك بالفراولة ومقرطين على كدة حامدين شاكرين ...
لحدى يوم المصارحات بسبب السيرة الجات والشمار الجابتو ليها اخته الكبيرة حول الموضوع وسيرتو ... والاعترافات الماكان في ليها اى داعي شلاقه ساى ... مشت الأيام عادية ... نسيتو ... أكيد نسينا وما تاخدوا في خاطركم دي حاجات عادية مش كدة ... طبعا عادية خالص
لحدي ماجات لى ( جميل ) وهناء دعوه لزفاف أخت هانية الصغيرة .... ومن ما هناية استقبلتهم وسلمت عليهم وجاملتهم وقعدت معاهم شوية ... ولأنو ( جميل ) زول مجامل ........ لازم يقول لهناية كم كلمة حلوه ... على الأقل تعبير عن شكرو لحسن الاستقبال وكرم الضيافة ... ودمتم وهناء ما طبيعية كلامه بقي قليل وكل ما جميل يقول ليها حاجة تضحكه وتطلع الموقف من الجو الشحنتو كهربته زائدة حبة ... بعد الكم كلمة مجاملة القالهم ( جميل ) متنشنه ... يابت الناس نحنه جائن نجامل الناس في فرح ما عزاء ما في فائدة قاعدة زي الداقاها مطرة ... وشوية تعائن في ( جميل ) والتاني تفتش بعيونه هناية ...
أها في يوم بعد اليوم داك ... بدت عاصفة الصحراء قاعدين في أمان الله ( جميل ) في النت ... و( هناء ) قاعدة مسترخية في الصوفا بمزاج بتقراء في كاتبه المفضل How training you dog ( كيف تدرب كلبك ) ...
وشكلو كدة كان الهدؤ البسبق العاصفة لانو لما هناء أحتاجه لتلفون هناي اخو هناية ذاته في موضوع تحويل وما تحويل .... فقام جميل طلع تلفونوا بكل عفوية ... وأتصل بهناية وشال منها نمرة أخوها .... وأداهوا لهناء عشان تتصل بي تشوف موضوع التحويل ... خلت موضوع التحويل ومسكت في موضوع تاني موضوع جانبي لا في البال ولا في الخاطر
-مفروض هناي أخو صاحبك كيف ما عندك تلفونوا !!!! -عادي مالازم كل زول في الدنيا يكون عندو تلفون أخو صاحبو -و أشمعنا عندك تلفون أخت صاحبك ؟؟؟؟ -والله ملاحظة ...ما لى سبب معّين لكين جات كده صدفة -بما انو تلفونه عندك أكيد بتكلمه -بكلمه من وقت للتاني فيها حاجة دي ... -ده بتوقف على السبب البخليك تكلمه .... -لاني مرات مرات بساله عن أخبار أخوها صاحبي وأخوها الما صاحبي .. -ما بنفع تسال اخو؟؟؟ ... - بنفع بس الراجل مشغول طوالى وكل ما اتصل بي بحس أنو مستعجل ...
رسمت في وشها أوسع أبتسامه يشوفه ( جميل ) في يوموا داك - يعني اختو البتكلمك بمّهله وبتاخد وتدي معاك مش كدة -كدة طيب فيها شنو ؟؟؟ - فيها كتير بابا ... فيها......... وفيها.............. وفيها .............
لعن التلفونات ونمره وحلف من اليوم داك لو سالوا نمرتو ................. بقول ما عارفه
أها قبل عملية عاصفة الصحراء تخلص تماما .... يوم ( جميل ) جاى من الشغل ... ممني نفسوا بظهيره هادئة ..... وغداء سريع ويديها نومه لحدي قبل المغرب عشان يرجع تاني الشغل
قابلتو هناء من الباب ماده بوزه وشكله حتبتدي تفتح موضوع وتنق في ... عادي لسه عاصفة الصحراء مستمرة
-يعني ما شائفك قاعدة وبتقري في How training you dog ( كيف تدرب كلبك ) إن شاء الله خير كملتي الكتاب ده اخيرا ولا زهجتي منو ... أنا غايتو بقيت ما قادر اتخيل شكلك من غيروا ...والحالة ما عندنا كلب ....
-أبدا حبيبي اكتشفته الكلاب امرهم ساهل ......( الكلام الرجال ...) -خلاص نفتش كتاب تاني يكون عنونوا How training you husband ( كيف تدربى زوجك )
-( جميل ) ياخي خلينا في المهم ... عندي ليك خبر كدة ما ظن يبسطك -خير ... - حاقول ليك بس أخدو عادي وما يزعلك ... خلى روحك رياضية -يابت الناس خير في شنو !!!!!!!!! -كلنا لها ... هناية ... واوعدني تمسك اعصابك - ماله لعل ما عندها عوجة ... -لا أبدا بس حتتخطب الخميس الجاى أخيرا ( خالتو ) دي جاها عريس .... -طيب الله يتم ليها على خير و ده يزعلك في حاجة ؟؟؟ - أبدا أنا شخصيا ما زعلانه .... بس متضامنه معاك -وأنا مالى بتضامنوا معاي .... -كيف مالك مش حبيبة قلبك ..... -نعم ؟؟؟؟؟؟؟؟ -قصدي حبيبة قلبك ززززززززززززززمان
وتاني جات سيرة البحر وبدي ( جميل ) من اول يحاول يشرح الموضوع من منطلق انو الوقت داك ( جميل ) كان حاسي بعدم الموضوع في حياتو فحبه يموضع حياتو ... وماكان شائف في موضوع مناسب اكتر من هناية عشان يتموضع بي الما مهلتو لّمح .... قبل يصرح كان محسوم ودمتم والله ماكان في شي ... وده الحصل فراغ عاطفي يعني ... ومواطن كان بيحاول يموضع نفسو ............والله ما اكتر
-ياخي عادي أنا مقدرة مشاعرك نحوها ... وحاسة بعذابك -بابت الناس أنت عوزة تجنيني ولا شنو ما قلنا ليك فراغ عاطفي وراح لحالو ؟؟؟ بعدين الوضع كلو أتغير وأنت البقيتي حبيبتي وستي والحمد لله ماليه حياتي ووووووووووووووووو خلى تفكير أكبر من كده ... ليه ما سالتي نفسك أنت حتتك في الموضوع ده كلو ...
سكتت ... وشكلة خلاص اقتنعت ... ياسلام عليك يا( جميل ) الله يدي حنكك الموزون العافية ... كده خلصنا وبعد ما صمتت دهرا ... نطقت وقالت بجدية الدنيا كلها ..... ( طبعا عارفة حتتى ... أنا قريبة ............حبيبة قلبك ززززززززززززمان )
*** عشان كدة في ظهيرة الفالنتين …….. كانت ( هناء ) في النت و( جميل ) ..... قاعد في الصوفا مسترخي بقراء في كتاب How training you dog ( كيف تدرب كلبك )
Quote: أها في يوم بعد اليوم داك ... بدت عاصفة الصحراء قاعدين في أمان الله ( جميل ) في النت ... و( هناء ) قاعدة مسترخية في الصوفا بمزاج بتقراء في كاتبه المفضل How training you dog ( كيف تدرب كلبك ) ...
من صحابك ومن قرائبك ياحبيبي بغير عليك وكل من قال ( ياحبيبي ) أفتكرتوا بشير اليك
Quote:
عشان كدة في ظهيرة الفالنتين …….. كانت ( هناء ) في النت و( جميل ) ..... قاعد في الصوفا مسترخي بقراء في كتاب How training you dog ( كيف تدرب كلبك )
عبد الناصر الخطيب كل فلنتاين وانت والمدام بالف خير النص جميل شديد زكرتنى مسلسل هناء وجميل السورى لمن جميل طرق كل الابواب عشان ماهناء تغير على وفشل ____________
يامامن للرجال يامامن للمية فى الغربال
02-11-2009, 07:08 PM
عبد الناصر الخطيب عبد الناصر الخطيب
تاريخ التسجيل: 10-25-2005
مجموع المشاركات: 5180
Quote: عبد الناصر الخطيب كل فلنتاين وانت والمدام بالف خير النص جميل شديد زكرتنى مسلسل هناء وجميل السورى لمن جميل طرق كل الابواب عشان ماهناء تغير على وفشل ____________
يامامن للرجال يامامن للمية فى الغربال
عارفة البوست ده تاثيرات متناثرة جدا ما معني كدة انو حقيقي لا كانت شوية حاجات في الواقع مع كتير من الخيال
How training you dog كتاب بالجد ما حبيتو ومع كدة الدار الطبعتو كل مدة بتطبع نسخة منقحة ... زمان كنت عارف انو الانجليز وبس البقروا الكتاب ده
و
وقعدة ظهرية في المكتب كان ممكن النص يمشي إيميل ... وهو مجرد تحية ومحاولة لرسم البسمة ....
لقصص أكيد الناس لما تذكرة بتضحك ما اكتر أكيد السنة دي حيجي الفالنتاين بشكل مختلف شوية
الاخيرة دي ما متفق معاك فيها ...
وكل سنة وأنت طيبة
تقديري
02-11-2009, 10:44 PM
الوليد محمد الامين الوليد محمد الامين
تاريخ التسجيل: 04-10-2003
مجموع المشاركات: 1447
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست