المنهجية في كراهية الجبهجية

Quote: أختنا ملاك والله يا ملاك أنا زول كسلان كسل في الدنيا دي .. والمسألة دي ما عندها علاقة بي رمضان بس بالجد زول كسلان شوية .. عشان كده أتمنى إنو تطولي بالي معاي. على العموم النقطة اللي انتي وضحتيها في المداخلة السابقة كانت واضحة جداً بالنسبة لي من بداية ما قريت الجملة بتاعاتك في البوست ( إياه ) بس أنا داير أتكلم في نقطة تانية خالص. على العموم ممكن تديني وكت أحاول فيهو أوضح ليك النقطة دي براحة. خلينا حسي في المحور الأول اللي لسه ما اتجاوزناهو بي سبب كسلي اللي هو عن الشيخ الترابي، وبعد ما اتعرضنا سريع للسيرة الذاتية بتاعتو خلينا نتكلم عن فكر الشيخ الترابي المنشق من الأخوان المسلمين. أولاً: الشيخ الترابي بيفتكر إنو آدم عليه السلام ما أبو البشر. وده بيخالف منهج جمهور المسلمين وأعتقد إنو خلاف ما هو عليه عند الأخوان وأنصار السنة المحمدية والسلفيين عموماً. ثانياً: بي طريقة غير مباشرة أجاز الردة ومعلوم موقف الأخوان من الردة إنو كفر بواح. ثالثاً: أباح تبديل الدين من الإسلام إلى النصرانية وبالعكس، والكلام ده بالتأكيد معاضد للنقطة القبلها ومخالف تماماً للنصوص الشرعية (من بدّل دينه فاقتلوه) (ومن يبتغ غير الإسلام ديناً فلن يقبل منه). رابعاً: أنكر بعض علامات الساعة زي المسيح الدجال. خامساً: أحل ما حرّم الله وحرّم ما أحل الله. سادساً : الترابي بيفتكر أن التقدم العلمي بالزات في المجال الطبي أقوى من أحاديث الرسول وشايف إنو المعجزات النبوية لا تصل إلى مستوى النظرية العلمية اللي ممكن نعتمد عليها. سابعاً: سبق وإنو اتجرأ على الأنبياء وما عارف لو كنتِ سمعت إنو اتجرأ على الرسول صلى الله عليه وسلم ورفع عنه العصمة لمن قال ( ياخي ما كل حاجة بتطلع من خشمو صاح!) وفي مرة تانية قال عن الرسول ( هو مش جهاز كمبيوتر) يعني بيلمح لي إنو ممكن ينسى وممكن يخطأ. والكلام ده بفتكر إنو خطير جداً جداً. لأنو عدم الثقة بالرسول هو بالضرورة عدم ثقة بالله. وجانب من جوانب الجرأة بتاعتو إنو شايف نفسو أكثر علماً من الرسول لو تتزكري لمن قال إنو بيتكلم فرنسي والرسول ما كان بيعرف فرنسي. ومن الجرأة بتاعتو على الأنبياء إنو (جرّم) موسى عليه السلام عشان كتل ليهو زول. وشاف إنو الجريمة دي بتقلل من قدر موسى كنبي. ده كلو كوم وإنو أنكر نزول عيسى عليه السلام وقال إنو لا يمكن يكون لسّه حي . الكلام الفات ده كلو عن فكر الديني عند الترابي أنا كيساري ممكن يكون عندي فيهو رأي ، بس زي ما قلتا ليكي قبل كده أنا هنا بتكلم معاكي من وجهة نظرك كأخوان مسلمين. صحيح إنو ما بيجوز إنو الزول يكفّر ليهو لأنو أنحنا ما ربنا طبعاً وبالتالي فنسيب الخلق للخالق، (رغم إنو في علماء مسلمين اعتبروا كافر وخرج عن الملة خصوصاً بعد الفتوى الأخيرة بتاعتو القالها في قناة الجزيرة لمن اتكلم عن انكار حد الردة، وإنو اليهود والنصارى مؤمنون وما كفّار وإنو عادي جداً إنو المسلمة تتزوج ليها يهودي و لا نصراني ولمن اتكلم عن إمامة المرأة للرجال وقال إنو شروط الإمامة المعروفة والمتفق عليها عند الجمهور دي عبارة عن شروط منحطة وسخيفة) ولكن لمن نسمع كلام زي ده من مؤسس (الجبهة الإسلامية) فأنا بفتكر إنو على طول أي زول ممكن يعمل cross على الجبهة الدين اللي ما عندها أساس أو أي قاعدة حقيقية من الصحة على الأقل من الناحية الفطرية اللي اتربى عليها السودانيين. بالتأكيد داير أقول إنو إسلام الترابي لا يشبه إسلام المسلمين البنعرفو وبالتالي فأنا شخصياً ممكن أقول وأنا مرتاح إنو الترابي (وبالتالي أي جبهجي) نصاب ودجّال. وإنو الفكر الشايلو في راسو ده فكر فاسد جداً ما بيشبهنا كمسلمين أولاً ولا بيشبهنا كسودانيين تانياً. وبالتالي يبقى من المنطقي جداً إنو أرفض واحد زيو أو جبهة زي دي أو تنظيم زي ده يقوم يطلع لينا فوق راسنا بحجة إقامة المشروع الحضاري والدولة الإسلام ، وبفهم طوالي إنو زول زي ده لا داير إسلام ولا عندو علاقة بالإسلام ، بس زول داير سلطة، وتلقائياً تبقى الشعارات البيرفعها وعامل لينا بيها غلبة كتيرة كلام فاضي ومجرد جعجعات فارغة. وأنا شخصياً يا ملاك أكر زول ممكن أكرهو في الدنيا هو الزول البيتغطى بي عباية الدين من أجل مصلحة دنيوية حقيرة جداً. يعني لو كان جاني الترابي بي أي فهم تاني كان ممكن يكون فيهو نقاش ، وممكن نتفاهم ... بس بالطريقة دي .. يبقى المفروض إنو الترابي زول قاعد يشوه صورة الإسلام ما أكتر من كده. ولا أنا غلطان. ولمن نعرف الكلام دي يا ملاك يبقى نعرف إنو العلم اللي في راسو والثقافة البيتمتع بها دي ما فادتو في حاجة بل بالعكس .. وأنا شخصياً شايف إنو الترابي (كالحمار يحمل أسفاراً) زول شايل ليهو في راسو علم ما شايلو زول ، وبعد ده ما قادر يستفيد منو في حاجة بل على العكس قاعد يخرمج خرمجة بطالة جداً جداً زيو زي أي زول ما عندو أي حاجة فوق راسو ده. أهو الكلام ده لو كنت قلتو ليك قبل المقدمة الطويلة الفاتت دي ما كان ممكن تتقبليها ، ويمكن كنتي تعتبريني زول سفيه وبكره الترابي فقط لأنو الترابي أو لأني يساري ومن المنطقي إنو اليساري يكره الجبهجية. أعتقد إنو المحور بتاع الترابي لغاية هنا انتهى. بيجي صادي عشان نتكلم عن المحور التاني. طولة البال لو عندك يا ملاك ما تبخلي بيها عليّ في الموضوع ده بالزات.