|
|
 جدول 7سبعة(محمد عبدالماجد) منقول
|
*مدخل اول ·
7 × 1 = 7
7 × 2 = 14
7 × 3 = 21
7 × 4 = 28
7 × 5 = 35
7 × 6 = 42
7 × 7 = 49
7 × 8 = 56
7 × 9 = 63
7 × 10 = 70
* في تخفيضات خاصة للمريخاب ·· في جدول سبعة بالتحديد·
* مدخل ثاني·
*جدول سبعة دي احفظوه ··· بسألكم منو ··· مفروض بعد كدا تقبلوا علي الاستاد·
* ان شاء الله تردموه رملة ساكت·
* الطوب الايامات دي ضارب الدلجة·
* يا جمال الوالي نكون (واضحين) معاك ··· طابق تاني ما بحلكم ··· طابق ثالث ما بحلكم ··· طابق رابع ما بحلكم ··· طابق خامس ما بحلكم ··· طابق سادس ما بحلكم·
* طابق (سابع) يمكن يمرقكم ····
* جهزوا السيخ·
* ما تقعدوا تغالطوا ساكت ··· الغلب دا غلب سبعة طوابق ··· ما يغشوكم بالطابق التاني ساكت·
* الطابق التاني ما بعمل حاجة مع السبعة·
* مدخل ثالث·
* مفروض المريخاب يحمدوا الله انو (وارغو) وقع معاهم ··· لو ما وقع معاكم ··· بعد (السبعة) دي ما بتسجل ليكم ·
* هسع بعد (السبعة) دي يمكن ما يرجع ليكم ··· معقول زول تجيبوه عشان تسجلوه في فريق الكورة ··· يكتشف بعد اربعة شهور ··· انو بيلعب في فريق كرة سلة·
* السبعة دي بي امانة شديدة ما سمعنا بيها في كورة القدم·
* لكن اقول ليكم حاجة·
* البرد ··· كان ليه اثر ··· في الهزيمة دي·
* برد شنو يا ود الناس ···· ناس الوحدات ديل لاعبين في (الصيف)·
* اقول ليكم حاجة تانية·
* الخريف ··· هو السبب·
* يا ود الناس خريف شنو؟ ····· ناس (الوحدات) ديل لاعبين في (الربيع)·
* انتوا يا الهلالاب ··· ما تصعبوا الحكاية ساي ·· الحكم ظلم المريخ ··· عندهم (طابق) ما حسبو ليهم·
* المشكلة ··· انو ناس الوحدات من الدقيقة التانية لاعبين (عشرة) ···
* لكن بالجد كدا ناس المريخ كانوا لاعبين (سبعة) ··· اكرم ما بنعدو ··· والزومة ما بنعدو ··· وبله جابر ما بنعدو ··· وامير دامر بنعدو ··· لكن بنعدو مع الوحدات·
* الشغيل دا كان صانع العاب عديل·
* المباراة كلها ··· وانا بقول ناس الوحدات المحترف دا سجلو متين؟·
* انتوا عارفين المريخ فقد (فرانسيس) ···
* فرانسيس لو كان لاعب ··· كان المباراة دي ما وصلت (سبعة)·
* كان انتهت ستة ونص·
* ستة ونص دي اول مرة نسمع بيها·
* مدخل رابع·
* جاءنا البيان التالي من غرفة تسجيلات المريخ·
* دخل كل من اكرم الهادي ومجاهد والشغيل وامير دامر والعجب وسفاري والسعودي وايدهور والزومة وبله جابر وقلق دائرة الشطب ·· وافادت الاخبار القادمة من الاردن ·· ان المريخ سوف يسجل (فرانسيس)·
* فرانسيس دا يتقطع ليكم يعني·
* غايتو فرانسيس دا بسهولة كدا ممكن ينافس اكرم الهادي سليم·
* مازدا الفيه معروفة من المنتخب·
* مدخل خامس·
* قالوا ليك اكرم الهادي سليم مفتكر المباراة (ضربات ترجيحية) ··· سبعة ·· اربعة دي سمعتوا بيها قبال كدا·
* الشيء شنو؟·
* قالوا ليك ··· ناس شركة نوكيا ··· بدل (تلاتين ·· عشرة) ·· ح يعملوا موبايل جديد اسمو (تلاتين ·· سبعة)·
* تلاتين ·· سبعة دا (شبكتو) ··· اسمها شبكة (اكرم)·
* كرم شديد·
* انا عرفت ليه الناس البمرضوا بمشوا (الاردن)·
* اتاريهم بمشوا فوق رأي·
* بامانة كدا ·· فريقكم دا محتاج يدخل (الانعاش) ··· امير دامر تحلف تقول لاعب (ضمنة) ·· اي كورة يجليها·
* لكن (البرد) برضو كان ليه اثر·
* اكرم قالوا ليه انت الكورة بتفوت فيك كيف بسهولة كدا ··· قال ليهم (البرد)·
* برد شنو؟·
* البرد دا يا ربي محترف مالي·
* ناس المريخ مرة اتغلبوا في الجزائر ··· قالوا (الالعاب النارية) هي السبب·
* اها المرة دي مرة يقولوا (المطر) ·· ومرة يقولوا (البرد)·
* انا ما عارف الناس ديل عاوزين يلعبوا وين؟·
* مفروض الجماعة ديل يودوهم يلعبوا في (الدوري الاسباني)·
* تجي مطرة يقولوا (المطرة)·
* ما تجي مطرة ··· يقولوا عدم المطرة هي السبب·
* تكون في العاب نارية ··· يقولوا بس ··· السبب الالعاب النارية دي·
* تكون ما في العاب نارية ··· يقولوا وين الالعاب النارية·
* الالعاب النارية نجيبها ليكم من وين في البرد دا·
* ناس امير دامر ديل بيلعبوا تنس·
* مدخل سادس·
* عرفنا من معلوماتنا الخاصة ·· ان المريخ سوف يدخل التسجيلات غدا بمفاجأة كبري·
* تحت ·· تحت عرفنا ان (المفاجأة) التي سوف يدخل بها المريخ غدا ·· هي لاعب الارتكاز (الضجة) ··· (الطابق التاني)·
* يلا صفقوا كلكم ··· ما تقعدوا لي كدا·
* لكن بيني وبينكم ·· كلو من (البرد)·
* الله يقطع سنين (البرد)·
* معقولة فريق يهزموا (البرد)·
* البرد في عينك·
* لاعبين عشرة ·· يغلبوكم (سبعة)·
* يعني لو لاعبين سبعة ·· كان غلبوهم عشرة·
* قالوا ليك الجماعة ديل لاعبين عشرة من الدقيقة التانية·
* دا كلو من (المطر) ··· ما تسمعوا كلام الهلالاب دا·
* كمان يا مريخاب (المطر) ماسكة ليكم (الجهاز الفني)·
* انتوا غلبتكم (المطر) ··· فريق انتوا وإلا ولاية الخرطوم ·· البتجهجهو (مطرة)·
* الراكوبة ما بتشكر في (المطر) ·· عشان كدا اكرم الهادي سليم ··· ما بتشكر في (الخريف)·
* مفروض ناس المريخ ينتظروا الهلال يشطب ليهم (روي قلواك) ·· عشان يسجلوه·
* اخير ليهم من اكرم الهادي سليم·
* انتوا تعالوا هنا ··· الشغيل دا متين بقي صانع العاب ·· الزول دا بقي اخطر من هيثم مصطفي ··· انتوا وقت عندكم لاعب بصنع الاقوان زي الشغيل دا بتلعبوا (العجب) ليه؟·
* بقت عليهم مطرة وبرد ·· وسبعة اقوان·
* مدخل سابع·
* قالوا فريق (الوحدات) اتغير اسمو واصبح اسمو (السبعات)·
* برضو (السبعات) احسن من (الستات)·
* قالوا ليك في جماعة بيلعبوا في كوتشينة ·· واحد في الجماعة ديل قافل من الصباح علي كرت·
* الزول كان قنعان من الخمسين ·· وبينو وبين نفسو قال انا قافل علي كرت ميت·
* فجاة كدا فكوا ليه (سبعة) هارتي·
* الزول جر ليك الخمسين ·· قال ليهو في زول بفك ليه (سبعة) في البرد دا·
* عمليتك دا (مازدا) ما بعملها ·· تفك ليك (سبعة) هارتي ·· والزول قافل ليك من الصباح·
* الكلام دا هسع خلوه·
* قالوا ليك في واحد سافر مغترب عشرين سنة ·· برة البلد ·· حصاد غربتو كلها قال عاوز يكبها في عمارة·
* اشتري ليه قطعة ارض وقال عاوز يعمل سبعة طوابق ·· عندو واحد قريبو (مقاول) ·· قال ليه ما عندك مشكلة كل سنة رسل لي (الريالات) وانا بعمل ليك (طابق)·
* صاحبنا سافر مربط علي الكلام دا·
* بقي شغال ليل ونهار ·· بدك الفطور والغداء ·· عشان يوفر ويرسل القروش للبيت·
* كل سنة بجمع قروش الطابق وبرسلها للمقاول قريبو في السودان·
* شهر ·· شهرين ·· المقاول برسل ليه ·· بقول ليه شطبنا ليك (الطابق) ·· رسل لينا قروش الطابق التاني·
* المغترب داك يصبر سنة ·· ويجمع القروش ويرسلها للمقاول·
* المقاول يصبر ·· شهر ·· شهرين ·· ويرسل ويقول ليه شطبنا الطابق·
* الزول دا سبع سنوات بالطريقة دي يرسل في القروش·
* بعد فترة قال خلاص انزل معاش في الغربة وارتاح في عضمي ·· رجع مفتكر يلقي العمارة من سبعة طوابق ··· جاء نايم قفا·
* من المطار طوالي مشي علي العمارة ·· قال عاوز يشوف السبعة طوابق بقت كيف؟·
* مشي علي العمارة ·· لقي ليك اول طوبتين ظاهرات فوق الاساس ·· يادوب يتشافن ·· لو ما دققت النظر ما بتشوفن·
* لو انت بتلبس نظارة ·· ما بتشوف اي حاجة ·· عمارة صقيعة·
* صاحبك طوالي تلفن للمقاول ·· قال ليه تعال هنا ·· انت العمارة دي رحلتها من مكانها ·· اوعك تكون السبعة طوابق قامن لي تحت·
* المقاول ما كذب ··· قال ليه عمارتك دي فكيتها ليك ·· يعني عملت ليك الطوابق (فكة) ·· عندك طابق في الواحة ·· وطابق في استاد المريخ وطابق في بورتسودان ·· وطابق في مدني ·· وطابق في كسلا ·· وطابق في كادقلي·
* قالوا ليك طابق كادقلي حاجة ما تخلص·
* ملحوظة: البرد جااااكم·
هوامش
* معارضة الهلال ظاهرة صحية ·· لكن علي المعارضة قبل اي شيء ان تدعم الهلال وان تقدم اعمالها المادية للفريق·
* افتكر مجلس الهلال محتاج للمعارضة·
* قيل ان فريق جزيرة الفيل في انتظار شطب مجاهد من المريخ·
* اما فريق حي العرب فلن يرضي باقل من السعودي·
* بخت اندية الدرجة الاولي ·· (المشاطيب) كتروا·
* اكرم في الاردن افتقد (الطابق التاني)·
* حارس يجيبو فيه قون من منتصف الملعب ·· حارس شنو؟·
* كلو من البرد·
* برد ومطر·
* افياني شطبوه وإلا لسع·
* يا الطاش عجلوا لينا شطب الزول دا ·· خير البر عاجله·
* باقي نحن (مستعجلين) ·· لاحقين القطر·
* العجب في الموسم الجديد ما بلعب ليكم اكتر من اسبوع·
* اسبوع بالتحديد ·· ما بزيدكم فيه ساعة·
* مريخابي جابوا ليه ولد ·· قال ما بسمي ليه في (السبوع) ·· بسمي ليه في 15 يوم·
* مريخابي تاني قال بقي يشوف الممتاز ·· سبعة ·· سبعة·
* انتوا قايلين الممتاز دا لعب·
* ايداهور مفروض يسحبوا منو الجنسية السودانية ويمنحوه الجنسية الاردنية·
* كروجر عرفها·
* اكيد امس (ترباس) مشي يشرب موية·
* الشوط الاول انتهي تعادل اتنين ·· اتنين·
* انت يا ترباس تمشي تشرب موية في البرد دا·
* كلو من ترباس·
* اتوقع بكرة صلاح ادريس ·· يدافع عن جمال الوالي·
* انتظروا وارغو·
* خبر عاجل : بالجد كدا ·· دا كلو من مشاطيب الهلال·
* خبر عاجل جدا: كمان (البرد) شطبو الهلال·
من قوون
|
|
 
|
|
|
|
زول ساكت
فيس بوك
تويتر
انستقرام
يوتيوب
بنتيريست