|
|
 الشايقية.. ماضيهم المُشرق... حاضرهم الأخضر... ومُستقبلهم الواعد...
|
أحبتي الكرام...
نهاركم سعيد وكل عام وأنتم بألف خير وعافية... وتقبل الله منا ومنكم صالح الأعمال...
أهديكم مع محبتنا هذا البوست إمتداداً لحوش الشايقية السابق...
الشـــــــــــــايقية... ماضيهم المُشرق... حاضِرهم الأخ... ومستقبلهم الواعد...
ونأمل أن نقدم ما يُرضيكم عن تراث هذه المنطقة المهمة التي إمتدت من شمال سوداننا الحبيب إلى شرقه وغربه وجنوبه ووسطه ينشرون الفرح أينما حلُّو فلهم منا التجلة والتقدير وتعظيم سلام...
نبدأ ضربة البداية بقصيدة لشاعرنا الجميل السر عثمان الطيب وهي دعوة للتسامح والتصافي والمحبة والسلام...
وطن واحد بغَنِّيلُو...
وطن واحد .. وطن واعد
وطن واعـــد .. بغنِّيلو
موحَّد .. والمصير واحد..بغنِّيلو
وطن من كسلا للفاشــر ... وطن من نمولـي لي حلفا
وطن بالوحدة يتعافــى ... ربوعــو تعمهــا الإلفـة
يقيف ناهض على حيلـو
شمالو البي الجنـوب قـوَّة ... جنوبـو مع الشمال خُوَّة
غربـو ال للشــــرق يهوى ... وشرقو مع الغـرب يقوى
سلام .. .. والناس تناديلو
وطن ما فيهو قبليـــــة ... ولا نزعـــــــة إنفصاليــة
وطن زنجيتو عربيـــــة ... وعروبتو السمــــرا زنجيــة
سوا سوا .. كلُّو حريـة
سوا سوا يا بجــة ونوبة ... سوا سوا .. فور وشايقيـة
مسيرية وشلك ، دينكــا ... سوا سوا زانـــدي ، لاتوكا
وطن حق كل زول .. هولو
سوا سوا صحرا والغابة ... سوا سوا وحـــــدة نرضابا
سوا سوا نخلة وابنوســة... روا روا فوق ضفــاف نيلو
وطن واحد .. ولا غـيرو ... جميــع نتهنى بـي خيــرو
نغــني مع عصافيـــرو ... وننقـــرش فـي طنــابــيـرو
نصفِّقْلُو ونراقصو نشيل شبابيلو...
ــــــــــــــــــــــــــــــــــــ
وهذه دعوة للتوثيق والفرح نرسلها لكم جميعاً أحبتي للمشاركة...
وللجميع قواسيب مودتي...
أبو الحُسين....
|
|
 
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: nile1)
|
Quote: الأخ أبو الحسين
كل عام وأنتم بخير..نحن هنا بخير من الصحافة إلى المقل مرورا بام بده..ألخقونا |
قريبي الزاكي يا هندسة...
سلامات وأشواق من هني لااااااااااااعندك في الصحافة... كل عام وأنت والوليدات بخير وعافية...
تذكرناك في العيد طبعاً مشيت عيدت في الخُبر معاي عبد الحي إبراهيم عبد الحي تركت فراغ كبير خلاااااااااس في الشرقية... نسأل الله يكتب لك الخير أينما حليت...
لك قواسيب مودتي وتحياتي للأهل والمعاك كلللهم...
أبو الحُسين...
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: طارق جبريل)
|
Quote: اووووووووووووووه
قريبي كيفنك ياخي
والله لينا زمن مشتهنك وطارين ونستك |
إبن عمي يا طارق جبريل...
سلامات وتحايا نواضر وكل عام وأنت والأُسرة وكل الأحباب في المغرب العربي بألف خير وعافية...
يا اخوي والله أنا شوقي ليكم ما يحدو حدود... بس الإنشداهة بيني وبينك كانت حااااااااصلي...
يا الله تروقها وتلم الحبان ونعمر الدارة من جديد...
لك قواسيب مودتي التي تعرف...
أبو الحُسين...
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: أبو الحسين)
|
من هنا تعظيم سلام الأخ الحبيب إبن العم حسن الطيب ياسين...
تصلك يا صديقي وتجدك والأهل في أتم الصحة والعافية...
أشكرك على تفقدك وسؤالك عني... لكن يعلم الله يا قريبي بس مشغوليات الدنيا...
لك ولكل من سأل عني قواسيب مودتي...
والحمد لله تراهو الحوش فتحناهو فقط خليكم حضور جميل يزين جنباتُو...
والدعوة عبرك لكل الحبان أساس الحوش الفات... والذين سنضموا إلينا من جديد ولكل القراء من الخارج بإستقبال مشاركاتهم على الإيميل: [email protected]
وللجميع قواسيب مودتي...
أبو الحُسين...
| |
|
|
|
|
|
|
|
|
 Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: أبو الحسين)
|
السر عثمان الطيب
الحنين وداني جيت بالساقي سادر
الحنين وداني جيت بالساقي سادر***قلت انشد ناسا عن زولي المسافر
الحفير شوف عيني يبكي معاي يكابر***دمعو جدول جاري لبيتكم مجاور
قال لي وين ما بنت طوّل ماك ظاهر***دار اجيكم قلت لو كان لاقي خاطر
كانت الايام حنان بلحيل نواضر***الله يلعن حظي شوم يااخواني عاسر
لمحل اللقيا سقت خطاي ازاور***استعيد الماضي اتعللبو صابر
احضن الاغصان واهيم في وهم سادر***وحدي تحت المنقة للأحزان مصاقر
مالو من خلاني ما يكتب يخابر***بس لعلّو المانعو خيروكتر بشاير
ناس فلان قالوا لي طاريك ديمة ذاكر***بغرامك قلبو ديمه ملان وعامر
لابس الاخلاص حرير وهلال واساور***قلدو فوق عنقو اكليل من ازاهر
آه..تقاليد ريفنا يا الابو ماب تشاور***نحن سر مأساتنا بتنا قولا قاصر
برضي بمحبوبتي مهما كان بفاخر***زولتي خلقت مني زول فنان وشاعر
من جراحي ونوحي والاذي والدرادر***من جحيمي الفيهو مرمي كأني كافر
من ضيا القمرة البشق الليل يدافر***من حسيس طنبور يرن في روعة يناقر
من فؤادي وروحي من آخر وآخر***بهدي اجمل شعري لؤلؤ در جواهر
ابوالحسين
كل سنة وانت واسرتك بالف خير
وافر الشكر وانت تعودبنا لحوش الشايقية
التحية عبرك لكل مبدعي الشمال عامة وخاصة المبدع السر عثمان الطيب
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: مجدي عبدالرحيم فضل)
|
Quote: الحبيب أبو الحسين كل أيامك أعياد يارب
وجميل أن تأتي لنا بدوحة الكلمة الجميلة مجدداً وتحت نخلة نيلية وعلي ضفة جرف نلتقي بكم أهلي دار
شايق يشوقنا الشوق شوقين وأكتر التحية عبرك لكل أهل الشمال أبو الحسين.
،،،،أبوقصي،،،، |
صاحبي أبو قصي...
وييييييييييينك يا راجل ليك وحشة قدُر شوقنا ليك...
شرفت الديار الدايماً مُشرقة بي وجودك الأنيق...
لك قواسيب مودتي التي تعرف... وخليك قريب آ الحبيب...
أبو الحُسين...
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: mahmed alhassan)
|
| Quote: الحنين وداني جيت بالساقي سادر***قلت انشد ناسا عن زولي المسافر |
صديقي الجميل محمد الحسن... سلامات... وكل عام وأنت والأهل بخير وعافية..
عليك الله يا اخوي شوف حلاوة النشيدي دي كيف؟؟
بالمناسبة حسب تقديري لو إستخدم كلمة أسأل محل أنشِد الحكايي كان حا تكون من نوع مختلف...
ما أحلى الحنية لمن تنشِد عمَّن تحب...
لك قواسيب مودتي... وأبقى حضور جميل...
أبو الحُسين...
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: حسن الطيب يس)
|
بسم الله الرحمن الرحيم
السلام عليكم ورحمة الله تعالي وبركاته ...
أبوالحسين ... اب احمد .. حسن الطيب .. طارق جبريل..
محمد الحسن.. هاشم وابوقصي وعقبال عودة
دكتور ياسين وست الناس وبقية العقد الفريد ..
حياكم الله ...
بالله إنت شايقي
................
بالله إنت شايقي!!؟
سؤال يا بت غريبب
أنا أيِّ شايقي
و بالتحديد بقولك بلدي أرقي
و كان دار تعرفي اصلي
في النيل و الجروف الخدرا في نوح السواقي
في نِغيم طمبور يبكي الليل و في لبس العراريق و الطواقي
و كان فتشتي في قلب الحسان من جُوة تلقي
أنا أيِّ شايقي
و جنسي شايقي و دمي شايقي
و جدي شايق
و كان دار تعرف اصلي أصبري لي دقايق
و خليني اللّدوِّر عجلة التاريخ و أسرد للحقايق
دنقل عيال منصور جعل و رباط و شايق
لا نهاية الدنيا أولاد عم شقايق
أنا أيِّ شايقي و كمان قاري العلم و عارف الكتابي
كلامي سمح و أكلي قمح و من النيل شرابي
و بملا العين و أزيد شبرين و أهز عضلات شبابي
و أشق أعداي عديل وكتين أشم ريحة ترابي
أنا أي شايقي و الشايقيي مازجي دماي في ذاتي و عروقي
كان مكضبي أقيفي أفصد ليكي إيدي و هاكي ضوقي
أنا أمي مهيرة بت عبود و شيخي الميرغني الختمي الطريقي
و جدي شايق شيّد الشايقيي جدد ليها شوقي
أنا أيِّ شايقي و شايقي أيِّ
بسوم الروح و أقدِّمة لي حياة العز ضحيي
و ما بهاب الموت مادام عيني حيي
في وقت السِلِم بدرع و ألِم فوق كتفي طوريي
و ساعة الحارة في وسط الصفوف تلقيني شايل البندقيي
أنا أيِّ شايقي و شايقي أيِّ
و ده ياهو كلامي مهما قريت واتعلمت و أصبح شاني سامي
و ده ياهو كلامي حتى ان كان بقيت سفير
و لّا كمان بقيت لجلاج أناطق الطير محامي
ده ياهو كلامي حتى ان كان بقيت عميد وقايد جيش نظامي
و ده ياهو كلامي حتى ان كان بقيت ريِّس وأصارع الموج ورا مِي
و ده ياهو كلامي حتى ان كان بقيت غوّاي و زي قيس في غرامي
ده ياهو كلامي أنا اصلي شايقي و ما بغير من كلامي
لما أقول أنا شايقي ما بقصد تِكِبِّر و إني أعلى من الثُريّي
لما أقول أنا شايقي ما بقصد أقسِّم و طني و أدعو العنصريي
لما أقول أنا شايقي بقصد إني سوداني و بسوق ستين سريي
و لما أقول إني شايقي بقصد إني بحمي حماي و احتضن الحريي
أنا أيِّ شايقي و شايقي أيِّ
و السودان عموم يا بت وطنّا ان كان نضمنا عديل
ولّا ان كان كسرنا الكِلمي حتى ان كان رطنّا
جُوارنا أمان و قلوبنا حُنان و أبيض من قطنا
و نحن المن زمان معروف نكِرم الضيف ولو نربط بطُنّا
أنا أيِّ شايقي و شققت العُقاب جيت من كريمي
زادي كسرة متمرة و حبّات جِريمي
لبسي جبي مبرقعة و غبشي و قديمي
و للبنادر جيت و كان أكبر جريمي أنا قلبي ما بدلتو بس بدّل هدومي
و ماني صايع ساكت آبت لا تلومي أنا أصلي أفندي في طرف الحكومة
عاد وحات اسم الله في شايقيتي فد يوم ما بزيِّف
و حبي للشايقيي من ما قُمتة درفوناً خِفيِّف
و لما أبقى شايقي و بين ضلوعي دوام يفر قلبي الرِهِّيف
و لهجة الشايقيي حلوي و في لساني يمين تكيِّف ...
ــ
أبوهاشم .
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: حاتم هاشم)
|
الحبيب ابو الحسين
كل سنه وانتو طيبين والسنه الجايه الاماني ....
ودي عيديه لانبل شايقي ...
يعنى خلا ص قررتى تسافرى تنزعى فرحك من جواى
آيـه قـولـيـلـى وراك فـاضـلـى لـما يغيب قمرى الضواى
يـاتـو طـريـق يـهديك الرجعه ويدى مسافة السكة خطاى
ويـاتـو دمـوع تـكفيـنى انوحك مهما يطول يا غاليه بكاى
بـحـر الـدنـيــا الـهـائـج فـيـهـو تـايـهى مراكبى بلا هداى
وانـتـا حـيـاتـك يـاهـا حـيـاتـى كـيـفـن اقـدر اعيشه براى
انـتى مـنـاهـل عـشـقـى الـصـافى لما تفيض تغمر دنياى
وانتى معانى العشق الزاهى وانت منامى وانتى صحاى
لـمـن تـرحـلـى يـا مـحـبـوبـه بـتمـشى جيوش الهم تالاى
تـهــزم صـبـري الداخرو عشانك دنيا فداها نزفت دماى
أيـوه بـريـدك مـن اعـمــاقـى انـتـى حـيــاتـى وكـل مناى
شـلـتـك فـى احـسـاسـى مـعـانى انـصـاغـت بلحـن غناى
عـشـتـك فـرحـة وروعه وبسمه وما خليتك لحظة وراى
وحـتى الـقـمـرى الأحـزنوا بعدك رددوا ليك مع القوقاى
رسـلـى طـيـفـك لـى يـواسـى لـمـا تـعـودى تـقـبـلى جاى
يـاهـو واحـاتـك لـمـا تـغـيـبي بيـبـقي انيسى ويبقى عذاى
بـلـغـى دارك عـنـى تـحـايـا قـدر الـشـوق الـبـاقـى معاى
كـم نــاديــت لـطـيــفــك يـرجـع إلا ارتـدا عـلـيّ صـداى
شـيـلـى هـواى فـى دربـك زادك يـلا اتـكلى على مولاى
الله يـسـهـل لـيـك طـريـقـك لـيـهـو إلـهـى رفـعــتــا يداى
والأشــواق الــدامــت بـيــنـا لـيـك مـرسـالـى مع الهبباى
ومـا بـنـسـاهـو الـحـسـن الـودر بـى طـلـت عينيك شقاى..
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: أبو الحسين)
|
Quote: يا سلام يا ود الحسين
كل سنة وأنت طيب
تقبل الله منا ومنكم صالح الأعمال
جيت من تاني
نعم العود الحميد تلم لينا الحبايب
د/ ياكو
إخيتنا ست البنات
ودالقرير
الخليفة حاتم هاشم أبوهاشم
فدوة
بنات خوجلي
وغيرهم من العقد الفريد
تسلم على هذه الخطوة الجميلة
ولك منا أجمل التهاني بفتح هذا البوست
تحياتي ومودتي |
صديقي الجميل أبو أحمد "خالد المنسي" سلامااااااااااااااات وأشواااااااق لك وللمعاك في الغربة قاعدين...
ودعوة عبرك لكل أحباب الزمن الجميل للمواصلة في الحوش... وأهديك وإياهم رائعة شاعرنا الجميل محمد الحسن سالم "حميد" آه يا غُبش:
آه يا غبش..
آه يا غبش
آه يا غبش
ما عندي ليكم غير نغيم ..
برجاه ينفض
لي غبار زمن القسا ..الكتاحة
يهز عرجون نخل
صبر الغلابة الطال ..
يحت يخرت ..
تباريح الأسى
الممدودة فوق نور الدغش
يا نورا آهـ..يحرد كنائسنا المسيح
يعرش مدارسنا الصدى
ييبس .. يباس
حلق العصافير الوديعة من البكا
إندردر الصوت البعيد ..
أسيان تصر من دون صدى
يتكفرن الفجر الصبوح ..
يحمي الزهيرات الندى
تختا الدراويش الضريح ..
يسكن خلاوينا الجنون
يهجر جوامعنا الإله
يا نورا آه ..
تطرح غيوم الشوق تئن ..
تشرق
تموت
خيل .. كلمة الحق التناهد في الشفاه
يعقر بسيمة الصح
مع لوبي الجروف
تغرز ضريعات الحروف
ينشف مراح الأمسيات ..
تتمطق الأرضة المروق والأغنيات
اللّي الشروق ..
والأرض
والحب والمطر
تتضهب تتوه ..
ـــــــــــــــ
لك وللجميع قواسيب مودتي...
أبو الحُسين...
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: حاتم هاشم)
|
بسم الله الرحمن الرحيم
السلام عليكم ورحمة الله تعالي وبركاته .
النعام آدم - لا شوفتن تبل الشوق ..
...................................
لا شوفة تبل الشوق ولا ردا يطمّن
أريتك تبقى طيب إنت ، أنا البي كلو هين
قليبا لي رهيّف عارفو ماب يحمل حنيّن
إنت ماب يغباك حالو الفيهو كل البيهو بيّن
بقيت مالي غير أشعاري أكتبه فيك وأدوّن
أقول يمكن تزيل ما بي ولاّ قليل تهوّن
ومالكن يا قماري بتشدن إيش لازمة تغنّن
نغيماتكن تهيج أشواقي للعينين يبكّن
بدّيكن وصية أمانة لي سيد روحي طيرن
ترا الحال العي شفتنو قولن ليهو أحكن
قوليلو السحب في روضو ما عادن يكبّن
وأضحى محل خراب ما فيهو غير زهرا مضبلن
قولن ليهو ليلو طويل .. طويل.. طولا يجنّن
لا قمرا ظهر في سماهو ، لا نجمات يضوّن
وكل ماليهو يتصبّر يقول أيام يعدن
يمنّي لنفسو بي لقياك ولاّ ترد لو يمكن
ــ
أبوهاشم .
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: أبو الحسين)
|
Quote: أنا أيِّ شايقي و شايقي أيِّ
و السودان عموم يا بت وطنّا ان كان نضمنا عديل
ولّا ان كان كسرنا الكِلمي حتى ان كان رطنّا
جُوارنا أمان و قلوبنا حُنان و أبيض من قطنا |
صديقي الجميل أبو هاشم...
يا سلاااااااااااااام علي طلتك الجميلة وهذه المعاني الراقية في جوارنا أمان وقلوبنا حنان وأبيض من قُطُنا...
إعتقد هذه أجمل وأسمى معاني للشخصية السودانية...
نسأل الله يصفي نفوسنا ويجعلها أبيض من الحليب ونتعايش في سلام وأمان...
لك قواسيب مودتي التي تعرف وفوقها زيادة شوق...
والجابك يا الحبيب يلم بقية الحبايب...
أبو الحُسين...
| |
|
|
|
|
|
|
|
|
 Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: أبو الحسين)
|
العزيز ابو الحسين
نور الله أيامك
شفت الحبايب القلبهم رهيف كانوا كيف مشتاقين للبلد
و للتراب الغالي للدميرة و للجروف و للسواقي البتنوح
تذكرهم و تشاطرهم البكي في البعاد
وقت سمعوا صوت الطمبور جري جو داخلين
كل واحد مشنف طاقيته و كل واحده مجهزة الشبال لي وليدات
العم
و انا صلي شايقي و دمي شايقي
و بي طول حسي اقول بريدك يل تراب بلدي وياولاد بلدي و يابنات بلدي
و العن ابو خاشك يادنيا الفرقتيني من اهلي
و الف مرحب بي كل الحبايب
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: أبو الحسين)
|
أبو الحسين إبن عمي ..
كيفنك يا خي ووليداتك والمعاك كلهن أعلكن عافي ..
ونعل ما فيكن زولا أبى عشاه ؟؟!!
يا أخوي والله الواحد ليه زمن يجي بي جنب البوست ده وزي تمسكو رهبة كدي ..
ماني عارف لها سبب ..
الليلي قلت آ ود الدغيس كدي يا زول إتوكل وطايب أخوك أبو الحسين ده ...
جيت داخل بلا ألقالك الحكايي شاطي ...!
شي شعر وشي غني وشي ونسي .....عووووووك و والحكايي مهيصي ...!
ربنا يديك العافية ويجعل أيامنا كلها مهيصي ...!
متنابعين نبع الإبداع اللانهائي ..
والغرييييييييييييييييييييييييييق ..
أها هادي صنقيرة ..
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: محمد احمد ابراهيم)
|
بسم الله الرحمن الرحيم
السلام عليكم ورحمة الله تعالي وبركاته ...
سيدالحوش والزوار الافاضل ... حياكم الله .
النعام ادم
..........
المكتوب لي مقدر
................
مكتوب لي مقدر
الحب والغرام مكتوب مسطر
الفرع المناوي نداه قطر
مع النسام يفوَح طيبو عطر
ود الأريل السارح مبطر
في بكر الخريف واديهو مطر
بي حكمو ابتلاني على تجسر
غير حالي في أفكاري أثر
مالكني الدقاق الشب خدر
فالق دافي ما دايرو كمتر
حراسو النشيط في زرعو بدر
جابق حوضو وما خلاهو ستر
وازن الموية ماسوق المغذر
تقرقر ليلا والجدول محدر
عارف حبو لي تعالى وتأمر
حرق قلبي فوق لهبو المجمر
بي جسمو الندي الفي الطيب مخمر
صدرو العالي الخصر المضمر
عجوة دنقلا الدفيقا عمر
خامي الموية سارب لونو حمر
يقوقي دباسو فوق كروقو زمر
من الطير وقف حراسو شمر
فوسيب الجزيرة الموجا دفر
رشرش بره نط القيف وطفر
هبهب توبو صمدو عليهو غفر
ينهر تورو عند الشاي وحمر
الكرش الفدع عرجونو جرجر
ما بدوه من الناس محجر
سبت النجمة قام تربالو فجر
ما بتكل سقايتو على الموجر
خلاص اصبح اسير الحب مكنتر
اقول انساهو من حظي المعتر
احس بي قلبي مايل ليهو واكتر
انفلت اللسان للساسو فتر
دمع العين مع ذكراهو بدر
انكشف المخبا الكان مستر
انتي اذى وشقا قلبي المعور
جيتي الليلة بيكي فريقنا نور
القالك نسيناك غشا زور
نحن كيفن ننسى حباً جرحو غور .
ــ
أبوهاشم .
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: أبو الحسين)
|
أحبتي الكرام...
بقلوب راضية بقضاء الله وقدره أنقل لكم هذا النبأ المؤلم من منتديات البركل الذي أورده الأُستاذ/ السر عثمان الطيب... برحيل شاعرنا المُبدع عبدالله محمد خير بعد مصارعته لمرض الكلى نسأل الله تعالى أن يغفر له ويرحمه ويكرم نزله ويسكنه الجنة مع الأبرار...
وصادق تعازينا لأُسرة المرحوم ورفقاء دربه شعراء الزمن الجميل وكل أحبابه ومعجبيه...
وإنا لله وإنا إليه راجعون...
أبو الحُسين...
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: أبو الحسين)
|
هذه مجموعة قصائد لشاعرنا الراحل عبد الله محمد خير منقولة من منتدي تنقاسي
وانتهز هذه المناسبة باعثاً التهنئة لهذا العمل الكبير
http://www.tungasi.com/vb/############.php?f=30
العيد المضى
صديق أحمد
عبدالله محمد خير
طـولـت شـايــل الـذكــرى فـــي عـيـنـي
لــــلـــــعـــــيـــــد الــــــمــــــضـــــــي
طـولــت بـحـسـب فـــي نـجــوم الـلـيـل
وأقـــــدر فـــــي مـســاحــات الـفــضــا
وأغصب مشاعرى علي الألـم وأروضـا
واتــمــنــي لــــــو لـحـظـاتـنــا ديــــــك
تــســـمـــح ظـــروفـــنـــا نـــعـــوضـــا
وتجمعـنـي بالحـسـن الـرفـض أفـكـاري
كــــــــــــــــــان بــــيـــــعـــــارضـــــا
يمـكـن قـبـل نتـبـادل الـحــب الـشـريـف
يــــــمـــــــكـــــــن رضــــــــــــــــــــا
تـمـضـي السـنـيـن وتـمـضـي الـشـهـور
واتـمـنــى لــــو كــــان تــمــت الأيــــام
وانـــــتــــــهــــــت الــــســــنـــــيـــــن
والــكـــون وقـــــف خـــــلا الـمـسـيــر
كــــان قـلـبــي فــتــش عــــن نـصــيــر
خــــفــــف عــــذابــــات الــضــمــيـــر
ومـــن قــبــل مــــا أصــــل الـمـصـيـر
الفيـهـو قلـبـي المـحـتـرق فـكــر كـتـيـر
اتــــذكـــــر الـــعـــيــــد الـــمـــضــــى
يــــوم بـيـتـنـا أصــبــح كــلـــو خــيـــر
يـــــوم كــنـــا بـــــي نــشـــوة فــــــرح
دايـريـن نطـيـر يــوم القـمـر فــي بيـتـنـا
مـتــواضــع قــعـــد فـــــوق الـســريــر
وقـــال ... كـــل عـــام وانــتــم بـخـيــر
نظراتـو كـان زي بسمـة الطفـل الغريـر
وخصلات شعر تنساب متل موية الغدير
وحبـات نهـودو الطعنـن فــوق الصـديـر
حــــاولـــــت بـــيـــهـــن اســتــجــيـــر
مـن العيـون الناعسـه والخصـر الصغـيـر
مـــــــــن الـــشـــفــــاه الــعــطـــشـــى
والــوجـــه الـمـنـيــر
ومـــــرت لـيــالــي طــــــوال عـــلـــىّ
وطـــــأت غــرامـــك مــــــا بــتــخــف
حاولت أصارحـك وليـك بالبـي اعتـرف
فــكـــرت أكــتـــب لـــيـــك رســـائـــل
بـي دموعـي المـا بتجـف مليـون حـرف
دايــر أخلـيـك عـــن دلالـــك تـنـصـرف
دايــــــر أعـــبـــر عــــــن مــشــاعـــر
عـــــــــن مـــشـــاعـــرك تــخــتــلـــف
ودايـــــــــرك تـــــصـــــدق إنــــــــــي
فــــي مــحــراب غــرامــك مـعـتـكــف
واجـيـب قـلـم واحـصـر تعابـيـر الألـــم
وكـــــــــل ابـــتـــهـــالات الـــعـــشــــم
لـــكـــنـــي مـــــــــن أول حــــــــــرف
أجـــــــــد الأنــــامـــــل تـــرتـــجــــف
وتـــتـــذكـــر الـــعـــيـــد الـــمـــضـــى
أعــيـــاد تــجـــي وأعـــيـــاد تـــفـــوت
والفرحة تصحب كل عيـد تمـلا البيـوت
وأنا كل مـا استقبلـت عيـد أحيـا وأمـوت
وأطبـع ملاييـن التهانـي علـى الـكـروت
تـمـضـي السـنـيـن وتـمـضـي الـشـهـور
وأنــــا قـلـبــي يـحـيــا بـــــلا شــعـــور
لكـنـو قــرر يــا القلـبـت ظـلامـو نـــور
قــرر يـحـارب كــل أوضـاعـو ويـثـور
قرر يكاشفك بـي ضميـر مـا فوقـو زور
قــــــرر يـــرســـل لـــيـــك ســـطـــور
مـكـتــوبــه فــــــوق ورق الـــزهــــور
مـكـتـوبــه بـــــي دمـــعـــو الــغــزيــر
دايـــــر الــحـــروف تـبـقـالــو نــــــور
وتـــــــــبــــــــــقــــــــــالــــــــــوا ....
لـــى قـلــب البـحـبـو جــــواز مــــرور
سماحك منى ضاريهو
الشاعر /عبدالله محمد خير
غناء الفنان / صديق احمد
داريهو .........
سماحك منى ضاريهو
اتاريهو .........
جبرنى أقوم اباريهو
كسح وانفر صاريهو
صدح بى لحنو ساريهو
فترت غلبنى اجاريهو
غراق بالحيل ......... مجاريهو
رحل فارق حواريهو
هجر (حشمو) ...... (وجواريهو )
سكت غفرو .... وسواريهو
خفت ..... قوقاى قماريهو
عذاب .... قلبى ........ المواريهو
وحاتك .. مانى .... حاريهو
حلال .... زولا تدوريهو
وسعيد ....... ال الله ....... يوريهو
زمانو معاكى طاريهو
زمن كنتى بتزوريهو
اماااانى قعد تضريهو
وكت ..... توبك ... تفريهو
قوامك جل ..... باريهو
وحات ...........ليلا مباريهو
يحير .. سفرو قاريهو
ويشكر ... سوقو .... شاريهو
حبل الصبر
عبدالله محمد خير
صديق أحمد
تلـب أمسـك حـبـل الصـبـر خـلـو قلـبـك لا يبـقـي نــي
أصلـو ود أب زيـد كـل يـوم مـن بلـدنـا يـرحـل جــدي
شــن بسويـلـك عــاد أنــا القبـلـك الحـرمـان مــر بــي
والضنـا الهسـا عليـك زاد مـن زمـان أنــا زايــد عـلـي
كـم حبيبـا شغـل الفـؤاد فـي العيـون كـان متـل الصبـي
حـل بـي (توفيـق) السـواد مافـي زول قـال كفـاره لـي
أرقــى يــا تـلـب ودعــت قـبـلـو كـــم قـمــره مـنــوره
وكم تحف نـادرات سافـرن وكـم فراشـه وكـم جوهـره
وكـم قلـوب متـلـك بالـفـراق الأنـيـن والـشـوق سـهـره
شوف عوض عبدون الحروف خل مـن باطنـه ظاهـره
يـا عـوض مدرسـة الشعـر بـي جــداره إيــاك نـاظـره
بي غناك حرف السيـن بقـت فـوق بنـات جيلـه مبطـره
سـابــك الـلــى بـلــد الجـلـيـد ودعـــك ودقّ مــغــادره
يـا قـلـب مـالـك انـجـرح ولـسـه لـيـه جـرحـك مـابـره
أمــا أنــا المسكـيـن الـطـروف غــرزت فــي أظـافـره
ويـن غنـاي لـي شتـل الـجـروف والجنـايـن وأزاهــره
أسألوا الدرويش عن صديق عمرو كم جمرات عاصره
خـلـو يحكيلـكـم عــن حـيـاه النجيـفـى الـهـو معـاصـره
الككـر يـا رحمـن زمـان ضـاع مــع العـشـاق شـاعـره
مانـفـع تغـريـدو الحـزيـن مــا نـفـع صـــدق مـشـاعـره
جنـنـو (البتوفـيـق) رحــل وهــام ورا الـقـام بالبـاخـره
خــلا دنيـاهـو فرنـدقـس مـــا عـــرف أولـــه وآخـــره
أرقـى يـا رحمـن فــي السـمـاح مـافـي بـلـداً بتجـاكـره
الله مديـهـا سمـاحـه صــاح مــن كـروهـا ولــى تـكـره
أصلـو ود أب زيـد معتـرف بـي جريمتـو ومـو نـاكـره
كـلـو جــور الـقـال سفـروهـا وقـطـع لـيـهـا تـذاكــره
روح فوت
كلمات شيخ العاشقين / عبدالله محمد خير
امشى روح فوت بلا ندم
لى جيت يا عيد بلا طعم
*****
فيك ما صبحت اهلى مشيت صليت
لا لا ما صافح صحاب للبينا صافيت
ما رجع لفيت بيوت حلتنا بيت بيت
لى يا عيد كان اريتك ضمه ما جيت
*****
جيت بلا اما تقول ترجوهو داير
لا زهيراتا حليوات سون ضفاير
لا عروسا فى صباحك من بسيمته كم بشاير
لا قريب تلزم زيارتو ولا غريبا جانا زاير
*****
فى الصباح حصل عذابك منتهاهو
ولى رضيت بى حالا العدو ما رضاهو
قلبى طاوع حزنو ماشى حسب هواهو
بكى ...و بكى ... وبكى ما لقى احسن من بكاهو
*****
زولك ات يا عيد براك عارف مزاجو
وكيف وسط خلانو يحلالو اندماجو
ماهو خاتى الليله كان افكارو لاجو
يطرى فى الحلوين معاك اشجانو هاجو
ما قضاك فى غربه من ايام زواجو
وكم حبايب فيك اتلاقو وتناجو
******
ديمه ذاكر فدوى والاموره يمه
وذاكر اخوات بيهو كم مقصوده تمه
يطرى انور يطرى ساميه يطرى سلمى
يطرى حين يطروهو ساعات الملمه
لعلو عبدون عافى ماتكون جاتو حمى
******
انت ما تلوم كتير ياعيد معايه
وحاشى ما ذميتك اصلى انا فى غنايا
شوقى لى احبابى عاش بين الحنايا
ومانى عارف كيف يكون عيدن بلايا
******
عمرى يا عيد ما بتجرسنى الشدايد
وما بتهد ايمانى اصناف المكائد
مافى عيدا ما بندور يجينا عايد
بس بدل احزانا يبقى فرحنا زايد
بس بدل احزانا يبقى فرحنا زايد
كلمنى عن رؤياك
كلمات شيخ العاشقين / عبدالله محمد خير
اداء الاستاذ/ صديق احمد
تعال كلمنى عن رؤياك وما فيها
صحيح بالله شفت النار وشفتنى ياجميل فيها
قول لى كان شعورك كيف وهل حاولت تطفيها
والله كمان رضيت بالحال وقلت اسيبو فى الفيها
دى ما احلام ؟؟؟ دى حاجة خفيه ما اظنك تعرفيها
وحاتك ظاهرة فى عينيك لو جاولت تخفيها
ليه ما تشوفى روضة غنية بالازهار تطوفيها
وتلقى كمان طيور الريد تناديك وتشوفيها
بقيت محتار شفاهك تروى حكاية الفى عينيك تنفيها
وارجع اناجى نفسى براى يبقى عهوده توفيها
وتشوف آيه وتنال غاية وتقول احلى الشعر فيها
وتسال الله من شر خلقو والحساد يكافيها
وتنوم مسرورة من هلواسا يشفيها
وتشوف الجنا فى احلاما والاحباب تصافيها
وعيونا تقول حكاوى الريد تصالحنا ونعافيها
ونعيش ف دنيانا فرحتا وابتهاجا وكل ترفيها
حليلى انا البنات افكارى ضاعت بين قوافيها
وتاهت فى بحور الريد بتسال وين مرافيها
وين مرسالا كان يا حليلو بالاخبار يوافيها
بعد عاش السعادة معاها كيف يقبل يجافيها
| |
|
|
|
|
|
|
|
|
|
Re: الشايقية.. ماضيهم المُشرق... حاضرهم الأخضر... ومُستقبلهم الواعد... (Re: أبو الحسين)
|
الإخوة الكرام... نواصل معكم...
كتب الأُستاذ بابكر محمد أحمد عن أدب السيرات...
بسم الله الرحمن الرحيم
ادب النظر في سيرات الأعراس
النساء اللاتي يقرضن الشعرفي بلاد الشمال كثيرات وهن يقرضن الشعر بانواعة :
شعر الفرح اومايسمي عندنا بالسيرة...
وشعرالحزن ويسمي المناحة...
وشعر الهجاء ويسمي (النعل)فلاني نعلت فلاني جنس نعل ..
ولابد من ذكر بعض اسماء هولاء النسوة وفي منطقة محصورة جدا هي الزومة حتي مقاشي.. فأ شهرهن( بت اد خير) جدة الفنان ايوب محمدالحاج المعروف وله منها من الاشعار الكثير وهي من مقاشي رحمها الله – ثم من مقاشي نفسها أُمنا (الحاجة القوت )رحمها الله والتي لها فروع بالزومة حيث تغني غناء مشترك للفريقين في قولها مثلا:
مقاشي الطراوة الزومة البسكويت وانتي الحلاوة
ثم هنالك الشاعرة العظيمة المعروفة أُمنا( حوة بت الدمامة) وهذه أُنسها شعراً ورجزا وهي بجانب انها كانت قد امتهنت عملية(دق الشلوفة) وهي عادة كانت تمارس في تجهيز العروس حيث تطعن بالابروتمسح ببعض الاشياء مما يجعل شكل الشفة جميلا واثناء هذه العملية كان الغناء يتم من النساء وتردد اغنية تحوي شكراً لوالد العروس0
( دقـولـة دقـولـة
بت الراجل اب شورة )
اي الراجل الذي لاتتم الامور ولاتنجز الابمشورتة ....
ثم هناك( بت اد طمبل) وهي من الشاعرات المشهورات في ذلك الزمن الجميل البسيط وقد كانت تشتهر بغنائها حسب علمي للاشراف السادة المراغنة (عليهم السلام) منها اغنيات كانت تردد للسادةالمراغنة من فمها واهلنا بالطبع في تلك المنطقة ينتمون لطائفة الختمية سمعت منها:
الزومة لي سيدي مسجلة
بي اراكا وبـي بركـلا
وكذلك سمعت منها:
ياسيدي وينـك لـي
دايرين شوفتك الشايقية
اما في مجال السيرات فقد تغنت النساءهناك لكل حلاوة الشمائل التي يتمتع بها الممدوح من شجاعة وكرم ومروءة واغاثة ملهوف وغيرها وغيرها..... ونواصل
ـــــــــــــــــــ
عاطر تحياتنا وتقديرنا للأُستاذ/ بابكر محمد أحمد...
وللجميع قواسيب مودتي...
أبو الحُسين...
| |
|
|
|
|
|
|
| |
أبو الحسين
هاشم أحمد خلف الله
nile1
طارق جبريل
mahmed alhassan
مجدي عبدالرحيم فضل
خالد علي محجوب المنسي
حاتم هاشم
عبد الدائم سيد أحمد
omer abdelsalam
Yasier Elsayed
محمد احمد ابراهيم
فدوى الشريف
على محمد على بشير
yasiko
الملك
ناهد بشير الطيب
فيس بوك
تويتر
انستقرام
يوتيوب
بنتيريست