|
Re: رباطابيات .. عيدية (Re: Dr Mahdi Mohammed Kheir)
|
رباطابى خلا الزراعة وفكر يربى دواجن .. بالقروش العندو كلها أشترى ليهو ديك وجداتين , وقعد مصاقرن ليل نهار .. حارس الجداتين ديل متين يبدن يبيضن .
الجداد باض .. والبيض فقس , والرباطابى متكيف يتابع فى السواسيو جوة الحوش يعلف فيهم , شئ برسيم , وشئ سمسم , وشئ فيتريتة ... ما خلاص المشروع نجح وبشايرو هلت !.
صقر من صقور جبال المناصير الناشفة ديك جا مارى لقى السواسيو رويانات وحايمات فى حوش الرباطابى , الصقر أنعكف وخطفلو سوسيوة .. والرباطابى قلبو أنقطع من الخلعة .
الرباطابى حاول بكل الطرق يحمى سواسبو من صقر السجم دا .. مافى طريقة . الصقر خلا الحًلال كلها وقعد مصاقر سواسيو الرباطابى .. كف .. كف , واحدة وراء التانية .. والرباطابى مصارينو أتهرن من المغصة .
فضلت آآخر سوسيوة ... الرباطابى ماسكة فى أيدو وقاعد فى ضل الحيطة متمحن يعاين للصقر والصقر راكى فى راس البيت منتظر الرباطابى يفك السوسيوة عشان يخطفا .
الرباطابى عندو شوال قديم جابو نتفو , فرش الشوال فى نص الحوش , دقا فيهو وتد وربط السوسيوة فى نص الشوال ... ومشى قعد فى ضل الحيطة منتظر .
الصقر جا يخطف السوسيوة مخالبو مسًكن فى الشوال , الرباطابى جا جارى ومسك الصقر من رقبتو وفكا مخالبة من الشوال .
الرباطابى عندو مقص جابو وبدأ يقص للصقر مخالبو واحد ورا التانى , وبعدا مسك منقار الصقر وقصا من آخرو وجدع الصقر لا فوق .. وقالو " أها دحين أمش .. شوف لك زولا يسويلك نشا "
|
|
|
|
|
|