ايوه كنت شايل ولافي بجواز مزور.. ودشيت بيهو مطارات ليها ضل في الدنيا دي (شي دلاس وشيتن اديس ومنافذ الحدود في بلاد السعودية حيث العساكر لا يرحمون وايضا ميناء عثمان دقنة السوداني (رايح وجاي بالاضافة الي مطار الخرطوم الدولي ومطار الدوحة و دشتين في ميناء جدة حيث دق العيش )بالاضافة الي انه وثيقتي التي صارت رسمية في كل اولمبيادي الدوحية...!!!
تزوير رسمي وشعبي ومختوم بكل الختومات الضرورية واخضر اللون وبه (صقرا) للجديان واقف ديدبان.. امشي المكتب داك يازول؟؟؟ هكذا هتف شرطي الجوازات في مطار الخرطوم في مارس السابق وهو ينظر شذرا الي هذا القادم الجديد الي السودان وهو يحمل جواز مضروب ضرب تقيل ..!!!!! ليس الشرطي الشرس فقط من نظر شذرا بل الشرطيون والشرطيات في الكاونترات المجاورة اتو علي عجالة لممارسة النظر الشذري والتمتع بروية هذا المجرم الدولي الذي يحمل جواز سفر مزور تزويرة لا تخفي علي كل متامل عميق في شؤون الجوازات السودانية...!!! اسمك عمرك قاعد وين جااي من وين
افتح ملف التحقيق...!!!
ونعود
04-09-2008, 05:18 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
كان هذا الجواز موضوع الاتهام هو الجيل التاني من دورة حياتي الجوازية وتم استخراجه بعد ان انتهي امر الجيل الاول بعامل انتهاء العمر الافتراضي وهو عشرة سنين ..انقضت منها خمسة سنوات في انتظار الرحيل والغربة والخمسة سنوات الاخري انقضت في دهاليز الجوازات في الدوحة ومساككة الاقامة وساعتها كان دوار الجوازات الذي تحول الان الي جسر (حمرا وحلا) هو كلمة السر التي تعطي لسائق التاكسي الاحمر اللون الذي هو ايضا تحول الي تكسي اخضر اللون وسمي فيما سمي بكروة..!!!! من وين جبت الجواز ده يازول هوووووي...!!! هكذا عاد شرطي التحقيق في المكتب الذي اشاروا الي بالذهاب اليه في مطار الخرطوم الدولي
كيكي كيف حالك؟ ما غريب على الجماعة ديل.. البصل ريحتو واحدة.. عارف يا كيكي اناذاتي زور لي جهاز المغتربين ملف شغل، على اساس اني شغالة في السعودية في وظيفة صحفية.. ودخلني البطاقة الضريبية تحت بند الفئة العمالية، علما بان كل بياناتي على الدار السودانية للطباعة والنشر.. واني على كفالة زوجي في المملكة..المشكلة اني احتفظت بمهنتى في الجواز وما غيرتها.. لاغيرها لاحقا من صحفية الى ربة منزل تصدق قريت بت الجيران تلاتة شهور,، كل يوم ساعتين بالتمام والكمال اصر الجماعة، وهم سودانيين، و(عصروا) لي تلتمية ريال جات على بالساحق والماحق.. ودخلتني البطاقة الضريبية التي تراكمت ضرائبها لتصل الى 675 ريال..(تصدق).. وهددتهم باني ح اكتب القصة دي وانشرها في الانترنيت.. سخروا منى وقالوا انشريها في اي مكان عاجبك.. المهم بس تدفعي.. وقعدت ادفع سنة وازوغ سنتين .. وانا طبعا عاطلة.. تعرف اكتر حاجة ازعجتنى شنو؟ اني كنت صادقة لما حلفت على المصحف.. قام الراجل سالني من مؤهلاتي وراح (.........)ززززززززز كاتب قدام خانة المهنة: تدريس، ترجمة واخرى.. لغاية اليوم انا بفكر اخرى دي تكون شنو ما قادرة اعرف.. غايتو مؤخراها ليومن اخر.. شوف قصتي مع الجماعة ديل وتاملها.. في انتظار باقي الحكاية.. وقبل هذا وذاك ادي حكايتي دي معاك نظرة مودتي..
04-09-2008, 05:40 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: ما غريب على الجماعة ديل.. البصل ريحتو واحدة
الف مرحب وتحية استاذة حليمة وحبابك كاول القادمين في قصص ذلك البصل صاحب الرائحة (السيم سيم) وفعلا يا حليمة قصة تحير وتكاد ان تتعجب لما يدور في تلكم الاروقة ..
المشكلة انني قدر ما اقول ازوغ بحكاية جوازي الذي ساحكي لكي مشكلته الاساسية لا استطيع فكل سنة لازم اقيف قدام ضابط المطار ..ومرت وقفات كثيرة الا ان المرة الاخيرة وجدت شرطي يبدو ان مهنيته عالية فمارس فيني فن التلتلة لمدة ثلاثة ايام وتهديد بسحب الجواز وكلام كبار كبار خلاص... وكل الود يا حليمة وكوني بالجواز ستحلو (كشنة البصل)
04-09-2008, 05:52 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
جبتو من ووووين يا زول هووووي؟؟؟ وقبل ان ارد علي هذا السوال الذي كرره الشرطي ثلاثة مرات لفترات سريعة كان الهاتف هو من قطع انطلاق دفوعاتي ويبدو ان المتحدث من الجانب الاخر ظابط كبير له ضلا ودبابير تبدو كثيرة وظهر ذلك جليا من طريقة الشرطي في الكلام وترديد كلمة يا سعادتك حاضر سا سعادتك والراجل ياهو معانا هنا..!!! وكان الراجل الذي بحوزة الشرطي (هو انا) وفي خاطري مرت سحابة حيت المهنية العالية والقبقبة البوليسة التي وصلت لمستوي كبير في ظل غيابنا من اروقة الوطن الطويل...!!!
طلعتو الجواز ده من مكتب شئون المغتربين في مدينة ودمدني في شهر كيت كيت وباورنيك موجود رقمه في صفحات الجواز والاورنيك ذاااتو موجود يا اخونا الشرطي وده جوازي القديم... كتابة ثم استلام المعروضات ودخول لزملاء الشرطي للتفرج في في ذلك الجواز وصاحبة العجيبين والغريبين ونعود..
04-09-2008, 05:48 PM
حليمة محمد عبد الرحمن حليمة محمد عبد الرحمن
تاريخ التسجيل: 11-02-2006
مجموع المشاركات: 4052
انا التي درست بنت الجيران حشرت نفسي حشراً بين الجموع الواقفة في أحد المكاتب الضيقة بجهاز شؤون المغتربين بالخرطوم . لم يكن هناك عدد كاف من المقاعد للجلوس. كان الجميع وقوفاً ، باستثناء واحد أو اثنين فضلوا الجلوس والمتابعة بعين نصف مغمضة أو متظاهرين بالتحليق في ملكوت الله حتى إشعار آخر .. المهم كانت التجربة جديدة عليَّ لذلك شربت المقلب ..!! وقفت أمام الموظف وقلبي يخفق بشدة .. وكان صوت حنجرتي وهي تكركر نزولا وصعوداً عند ابتلاع ريقي مسموعاً .. اللهم جيب العواقب سليمة وجنبنا أولاد الـ....... دعوت في سري . - عندك بكالوريوس ؟ - ايوة . - بس ؟ - لا عندي دبلوم ترجمة ؟ - يعني دراسات عليا ؟ صمتُ ولم أحرك ساكناً . لم يحدث قط أن صنفت دبلومي المتواضع بين الدراسات العليا . بل اعتبرته زيادة في لقمة العيش أتحفني بها رب عملي , " ووقعت لي فوق جرح "، خاصة وان بكالوريوس اللغة الفرنسية، طلع لي " خازوق " في سوق العمالة السودانية . - طيب نشوف . إلا إن تلك " الطيب " لم تنزل عليَّ برداً وسلاماً . اجتهد موظف الضرائب بجهاز المغتربين في استنباط وظائف عديدة يفترض أنني اشغلها بناءً علي المعلومات السابقة التي استخلصها مني ، لغبائي الشديد، بكل بساطة . حوقلت وبسملت وقلت في نفسي : " الراجل دا كتر لي الأسئلة كدي مالو ؟ " عاد الموظف مرة أخرى إلى الأسئلة .. - اسمعي شغالة شنو ؟ - أ نا ؟؟ ما شغالة أي حاجة ؟؟ أبدا .. والله ما شغالة .. !! أقسمت و أغلظت في القسم علي الرغم من أنه لم يطلب مني ذلك .. يبدو أن الرجل كان يجيد تنفيذ المهام الملقاة علي عاتقه . كما أن معايير قسمه تختلف عن معاييري علي الرغم من وحدة المحصلة . يعرف هو كيف ينفذ القسم بطريقته السادية .. رمق المصحف الموضوع يمينه فوق الطاولة والتفت إلى الآية الموضوعة خلفه .. ثم ابتسم .. ارتعدت فرائصي " ونقز الفأر في عبي " كما يقولون .. الله يكضب الشينة .. وعملاً بالـ" فيك بادر بيهو ".. أسرعت إلى توضيح موقفي المالي وإزالة كل شوائب قد تعلق به .. - ياخي اسمع والله العظيم أنا مع شغالة .. بس أنا احتفظت بالمهنة في الجواز ساكت عشان ما كل مرة أغيرها لو اشتغلت .. واحلف صادقة بأنني طيلة السنة الماضية درست بت الجيران ستة شهور وأدوني 300 ريال بس .. علي العموم أنا بحلف صادقة علي الشي الحصل .. - يعني كنت شغالة ؟ - والله ما اشترطت عليهم وهم براهم ادوني المبلغ دا كهدية وأنا ذاتي ما كنت بمشي ليهم في بيتهم..بعدين هم ذاتهم سودانيين زيي .. كانت مجرد مساعدة ليهم بس وأنا ذاتي اتفاجأت .. وأوشكت أن أخبره المبلغ الضئيل كان مفاجأة شديدة الوقع عليَّ خاصة وأنني - في انتظارها - شيدت قصوراً من الآمال .. لكنني لم افعل .. شددت علي عبارة " الاخوة سودانيين " الأخيرة في محاولة مني مخاطبة الجانب الإنساني فيه وصولاً إلى تعاطفه معي .. إلا انه يبدو أن لا حياة لمن تنادي ، وأحسست أنني كمن ينفخ في قربة " مقدودة ".. - احلفي .. ختي أيدك هنا .. إن التشديد والانتشاء اللذين نطق بهما كلما "هنا"، وهو يرفع يده ويضعها مبسوطة علي المصحف ، أوحت لي بأن ذلك الرجل يعتبرني صيدًا ثميناً ستتحول أصفار مبلغه الاثنين إلى ثلاثة ، على أقل تقدير ، وفي ذات اللحظة التي أضع فيها يدي على المصحف .. غير أنني خيبت أمله .. وضعت يدي علي المصحف مقسمة بالمائة والأربعة عشر سورة مجتمعة أنني لم أكسب طيلة ذلك العام أكثر من المبلغ المذكور أعلاه .. علماً بأن كل شروط الاتفاق المسبق الذي يدل علي وقوع عمل ، لم تحدث مع جارتي التي جعلتني أضرب أخماسًا بأسداس أفكر في مجموع الهدايا التي اشتريها لنفسي ولأقاربي . ويبدو أن المرأة كانت متفهمة تماماً لنفسية العاطلات عن العمل حيث دأبت هي الأخرى علي تذكيري الدائم بأنها لن تقصر معي وأنها ستحضر لي طلاب آخرين . " وقعتي فيَّ ولا لا والله تاني راسك دا ما تقدري تحكيهو من كترة الشغل . " نصحتني إحدى الأخوات بألا اجتهد كثيرًا معها لعواقبه الوخيمة .. " شوفي كان بتها نجحت ما بتجيب ليك أي زول عشان تحظى باهتمامك الكامل . " وفعلا صدق حدسها .. لم تكتف " بتطنيش " استفساراتي العديدة عن الزبائن المنتظرين وإنما تمخض جبل عطاياها الموعودة " نطفة " فأر ، ليجعل من قيمة مجهودي ريالان ونصف فقط لا غير للستين دقيقة . انحني الرجل وبدأ يعدد في مهن مزعومة : تدريس ، ترجمة ، وأعمال أخرى .. !! لم تنفع توسلاتي .. ثم زمجرتي وزئيري .. كيف لا والحكاية فيها دفع وبالعملة الصعبة ، إضافة إلى تكلفة مستلزماتها .. فتحت علي نفسي باباً من أبواب جهنم .. أمام خانة المهنة وضع الموظف عبارة عامل. ولم يتوان في أن يجعل الجهة المخدمة هي السعودية دون مراجعة البيانات الموجودة في وثيقة سفري .. ولم تشفع توسلاتي .. طلب مني الذهاب ومتابعة الإجراءات .. وأردف قائلاً : كان ما عاجبك امشي للمدير .. شوفي والله كان اشتغلتي حَنـَّانة وكسبتي عشرين ريال نلحقك ناخد حقنا منك .. " آل حقهم آل ".. !! برطمت "هو كان أنا اشتغلت حَنَّانة في كوفير ولا في واحدة من الحدائق كان دا حالي كدي ".. عندما أدركت مدي فشلي وأن الفأس وقعت في الرأس " قررت أن أفش غلي قبل خروجي .. أقسمت له بأنني لو استقبلت ما استدبرت من أمري ، ولو علمت أن الصدق سيجر علي مثل هذه المتاعب لما توانيت لحظة واحدة في تنفيذ القسم دون أن يطرف لي جفن ، بأنني لم ولن أعمل قط .. تكرر نفس السيناريو مع المدير الذي لم تجدِ محاولاتي المستميتة معه شيئاً .. أصر هو الآخر بأن الموظف كان يقوم بواجبه بناء علي المعلومات التي أدليت بها حِـرت هل أضحك أم أبكي .. دخلت مبني تأشيرة المغتربين ربة منزل في الواقع المعاش أاخرج امرأة مهمة تحمل مهنتين موضحتين وأخريات محتملات وجيب خالي الوفاض .. أنا مهمة .. انتفخت .. وانتشيت و شققت طريقي إلى صف البطاقة .. !! عزيت النفس بان " الجاتك في مالك سامحتك ".. ولكي لا تسقط تأشيرة دخولي إلى المملكة، خاصة وأن المدارس علي الأبواب .. لم يكن أمامي سوي متابعة الإجراءات التي بدأت بأستوديو التصوير واستخراج البطاقة الضريبية ثم المرور بالبنك لشراء القيمة المقابلة بالعملة الصعبة عن فئتي العمالية والبالغ قدرها 137 ريالاً سعودياً من مجموع مكافآتي البالغ قدرها 300 ريال ..!! ولا يخفي علي أحد أن البطاقة الضريبية وملحقاتها مضافاً إليها ضريبة فئتي العمالية تجاوزت مبلغي طيب الذكر .. وما زلت أدفع سنوياً ... جهاز شؤون المغتربين ، كان يضع لافتة عند المدخل كتب عليها "انتم سفراء بلادكم".. بحيث إن المغترب يعطيها ظهره عند دخوله دون أن يلحظها .. لتحظى بسبه وسخطه عندما يواجهها وهو خارج خالي الوفاض ، آخر النهار .. خيراً فعل عندما قام بنزعها .. ما زلت أردد منذ أربع سنوات عبارة أنني التي درست بنت الجيران " ولا حياة لمن تنادي .. حتى أنني فكرت في كتابة القصة وإرفا قها للمسئولين عند طلب التأشيرة أو تجديد الجواز .. ولعل ملاحظة إحدى الموظفات في الضرائب أبدتها لي وضاعف تأثيرها في لهجتها المتشككة : طيب لما انتي ما شغالة محتفظة بالمهنة ليه وبتدفعي رسوم علي تجديد الجواز ليه ..؟؟ كانت نقطة تحول في تفكيري .. !! كانت المرأة علي حق .. الحمد لله الجات منكم..رغم انني ومنذ ذلك الحين، مازلت ادفع الضرائب عن الثلاثمائة ريال التي كانت تمن تدريسي لبنت الجيران..
يبدو انيي علي وشك تطليق هذه المهنة ولو علي مستوي وثيقة السفر. ماذا جنيت من مهنة الصحافة التي لم تطعم فمي ؟ بل صارت بند استهلاكي ثابت تمتلك حق الإقامة الدائم في جيبي.. !! لك يا منازل في القلوب منازل .. وعلي رأي المثل السوداني"القلب ووكتين يعشق لِكة" -أي لا يعرف لغة. وللسلطة الرابعة منزلة عظيمة في النفس .. يدفعني جهاز المغتربين دفعاً إلى الترجل عنها وامتهان " المطبخ "
" ما كلو ببدأ من التُـكـُل .".!! كيف لا وفي زماننا صارت الضرائب تجبي من أصحاب عربات الكارو ، ومن لا يدفع تنزع عنه عربته ويترك له الحمار .. بند صرف هو الآخر .. وصار للزكاة كذلك حد أدني .. !! عجبي !! لك يا منازل في " القلب المحرور والمتآكل " منازل .. !! ودمتم سالمين .. حاشية:ـ الثلاثمائة ريال تضاعفت ضرائبها الى 675 ريالا سعوديا بالتمام والكمال والمغالطني.. الورق بحوزتي..
D
04-09-2008, 05:58 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: جهاز شؤون المغتربين ، كان يضع لافتة عند المدخل كتب عليها "انتم سفراء بلادكم".. بحيث إن المغترب يعطيها ظهره عند دخوله دون أن يلحظها .. لتحظى بسبه وسخطه عندما يواجهها وهو خارج خالي الوفاض ، آخر النهار .. خيراً فعل عندما قام بنزعها
والله ياحليمة لو عارف قصة جوازي دي بتجيب لينا (ها التداعي العميق) كان حكيتها زماااااااان
ياخ ده جواز متعة والامتع منو ضرائب ال675 ريال ضريبة دراسة بت الجيران دي
04-09-2008, 06:07 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
كانت التهمة الاساسية الموجهة ضد(جوازي) هي ان صفحة الصورة ليس بها (استكر ) وصورتي كانت تتهادي في السهلة بلا لباس من البلاستيك تغطي عورتها وملامحها الغليظة.... صورة قاعدة في السهلة كده...!!!! وكنت ويعلم الله لقد نبهت الشرطي الذي سلمني جوازي هذا حين استخراجه ساعتها بان هذه الصورة قاعدة (ام فكو) ولكنه زجرني بغلاظة وقال لي بالعربي الواضح يازول هوووي (فرتق بلاش فلسفة معاك جوازك سليم مية مية)... فرتق فرتق هو انا بفهم اكثر من البواليس ولا من وزارة الداخلية في شوون المواصفات الفنية في شوون الجوازات والهجرة... قلت ذلك للشرطي الذي بدات عليه بوادر عدم تصديق هذه الحكاية من فم مجرمان دولي مزوراتي شهير مثلي في ذلك اليوم ونعود
04-09-2008, 06:22 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
كانت التهمة الثانية والتي هي منبثقة من التهمة الاولي هي ان الختم في الصورة التي هي كانت جالسة في السهلة غير ظاهر في جزء من قوس الختم البيضاوي او الدائري . توافد جموع النبطشية في ذلك المكتب وبداء التنظير البوليسي فيما ماذا سيفعلوا بي..!! عندك جنسية.؟ عندي.. بعضهم افتي بان هذه هي السابقة الاولي في مطار الخرطوم واستغرب الاخريين كيف تم خروجي ودخولي وخمجي لسوق مطارات عديد دون مسالة تذكر.!!! واتي من اقصي المطار بوليسا قديما يبدو انه (شاويس مباحث) الشاهد بانه يمتلك شنبا يمكن للصقور ان ترك فيه بكل سهولة وافتي بخبرة عالية بعد ان تفحص تاريخ استخراج الجواز بان في هذه السنة بالتحديد اعدمت وزارة الداخلية كمية من الجوازات _(خالي استكر) وثم استخراج جوازات عديدة بمثل هذه المواصفات الا انها جميعها قد سحبت من الاسواق... وقال لي بالصوت الواضح انت يازول مشكلتك كبيرة خلاص..!!! جوازك ده مزورررررر شوف ليك صرفة ونعود
04-09-2008, 06:36 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
تنبيه لابد منه هذه القصة حقيقية تماما في كل جزئياتها ولا دخل ليها من بعيد او قريب بما يدور في مدارات اخري في هذا المنبر في امور مشابه وثلاثة من اعضاء هذا المنبر قريببن تماما من هذا الحدث واولهم الاخ متولي مالك الذي رافقني في الطائرة القطرية القادمة من واشنطون مرورا بمطار الدوحة والاخ صلاح الامين في المتابعة بالاضافة الي الاخ زهير الزناتي الذين احيطا علما بهذا الحدث ساعة وقوعه
04-09-2008, 06:51 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
بعد تحقيق منكري نكير افتي شرطي مباحث المطار وبعد التشاور مع الظابط الكبير باطلاق سراحي ضمان مع شفط كل ارقام الهواتف والعنوان بالداخل والخارج... اشد ما كان يملي القلب حسرة وتوجع علي جوازي الذي صار رهينة بايادي العسكر هو الختم بتاع بلاد اليانكي (الختم الذهبي) الذي قضي علي اخضري ويابسي في تذاكر وقومة وقعدة وسفر طويل كلافلام الهندية بالاضافة الي اقامتين في دولتين اهمها قطر حيث مكابسة الرزق ... اذن انها عودة عطية وهذه المرة عبر بوابة مطار الخرطوم الدولي لقد عاد عطية في زي شرطي منافذ وهجرة وحتما انها الطنبجة والغلغلة بالاضافة الي الاجازة ام كرت حيث الملفات في الانتظار..... ... وقع علي اقوالك وقعت يا اقوالي شيل الورقة دي معاك وتعال بكرة نشوف قصتك شنو؟؟؟ تجي بكرة بدرررررري فاهم
حاضرين يا بوليس بكري بدري باذن الله ونعود
04-09-2008, 06:54 PM
بشير أحمد بشير أحمد
تاريخ التسجيل: 03-21-2008
مجموع المشاركات: 10017
Quote: تخريمة يا عبدو :اعمل حسابك ناس البورد ديل مايعملو ليك فرش صور للجواز
هلا يا بشير ومرحب يا بشير البجي بعمل فرش جواز معانا هنا الا يطلعنو كرعينو وسنلحق به غنم الشهيرة زهرة.... وبعدين انا المقص بتاعي عملتو قبيل وامنت القصة تماما بالشهود العدول
هكذا دخلت الخرطوم بورقة استثائية وبدون جواز ويا حليلك يا جوازي الذي كان يومي هو صدر مثله ومثل ورق الكونان الشهير الذي يجب ان يكون دوما صدر خوفا من الطوف..!!! وبذا تكون هذه الفترة الاولي وبعد سنين طويلة (تبيت فيها بعيد من جوازك) الذي هو في الغربة اهم لاعب وتكاد تتحسسه علي راس كل ليلة...!!!! في احدي مرات شركات الكفلاء القساة في الخليج يصر الكفيل ان يكون الجواز برفقته في مكاتب الشركة حتي لا يهرب المكفول .. اذن انها عودة ايضا لذكريات الكفيل الذي يعتقل الجواز خلف الاضابير وعينك تطلع حتي تمتع نفسك بدهشة التامل في جوازك مرة اخري.... وايضا الختم الامريكاني الذي كان يملا المساحات ويعطر الصفحات لا طريقة له في ذلك الليل الخرطومي البهيم فانه وبرفقة الجواز القديم في ضيافة شرطة المطار او بالدقة مباحث شرطة المطار وما ادراك ما مباحث لقد صار جوازي في المباحث..!!!! امبدة نفر وعشاء فول وليلة كموج البحر مرخي سدوله بهموم الجواز وطنبجة الاجازةة ونعود
Quote: يعني الجماعة ديل يدفعونا مئات الفونتيهات ويجددوا لينا بي عشرات الايروهات كل مرة
هلا يا عادل وحبابك والله وشفت يا عادل محن طواحين الهواء البهناك دي وزادت دهشتي ومحنتي ياعادل واتخيل يا عادل انا جوازي موضوع البحث ده جددتو ثلاثة مرات ودفعت بيهو ضرائب ثلاثة مرات والحكومة حلبت منه جبايات طريق ودمغة كم جريح كده...والجواز في اخر النهاية طلع قاعد في السهلة بامر وختم السلطان
تسلم يا عادل وكل الود والتقدير
04-09-2008, 07:55 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
صباح الرحمن في اليوم التالي لم تكن الخرطوم مدينة ملهمة ولا شغلة لي بنبض المارة ورحيق الازوال فجل همي كان الوصول الذي ذلك المكتب الشهير في مطار الخرطوم... وقد لا اخفي كوابيسي الحلمي بحضور مارينز عتاة وغلظين واحتدام صراعي معهم في اصرارهم علي اقتلاع شي اخضر اللون من صفحات الجواز سيد الاسم... علي ظلال ذلك الحلم وتحت القلق من الغلغلة كان تحركي الكسول صوب مكتب المباحث... الثامنة صباحا شوكة وسكين كما قال توقيت الخرطوم الجديد...!!! لا احد في المكتب..!!! ولكن لابد من الانتظار وان طال السفر ثم حضور مفاجي لعسكري (ليس هو بزولي الامس) بل انه اخر تبدو عليه ملامح الطيبة السودانية.. عندك شنو؟؟ عندي جوازي ممسوك..!! ايوه انت المهندس بتاع التزوير اللييييييييلة...!!! تخيلت بان الداخلية السودانية ليلة امس ضربت الكمبيوترات ضرب تقيل وافتي خبرائها في امر جوازي وطلع القرار بانه مزورررررررر ولكن قطع حبل جرستي الشرطي عندما قالل اقعد يا زول الضابط بجي 10 ونشوف موضوعك ده شننننننننو..!!!!
تلتلة ومسخرة واستهتار تقيل وعدم مبالاة وتسيب ولكن لا بغلة يجب ان تقال الان بانها في الابريق فلابد من بولتيكا الانتظار ورحم الله الاب فيلب غبوش ونعود
04-09-2008, 08:48 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ساعة وساعتين ولا ضابط فوق الافق يلوح وقيل بان هذا اليوم هو يوم مرور مدير عام الشرطة شخشيا ويعتقدون بانني محظوظ فقد يبت في امري علي الهواء مباشرة ويقول القول الفصل.. 10 وماجاء الضابط 11 وما جاء الضابط و12 وما جاء الضابط ولا مدير عام الشرطة الذي قيل بانه اكتفي بزيارة الاقسام الاخري وشتت..!!! دي طنبجة شنو يا ناس. عينك في جوازك ولكن (نو وييي اوت). ونسة وتعارف مع التيم العامل في شعبة مباحث المطار فالحق يقال بانهم ناس ظراف خلاص وتعاملوا معي بكل لطف وتعاطف ولكن الشرطة- شرطة..!! 2 والضابط مافي ليفتي الشاويس الكبير ..!!! اقول ليك قولة يازول امشي وتعال بكرة تاني وشيل الورقة دي معاك خش بيها البلد...!!! يوم ضائع واجازة ضربت في مقتل وجهجهة ليها ضل .!! ويا عبدالمنعم سليمان جاك زول في اجراس الحرية حيث الخفير بتاعكم صاحب القطع الناشف ونعود
تعرف مرة عملت دعوة لاحد ابناء النوبة اسمه منير شيخ الدين لزيارة المانيا ليتدحث في مؤتمر
عن الابادة في جبال النوبة , السفارة الالمانية في القاهرة اعطت منير شيخ الدين تاشيرة دخول
وصل منير علي ظهر الخطوط المصرية
اتصل بي احد من مباحث مطار فرانكفورت واخبرني بان منير شيخ الدين يحمل جوازا مزورا ولابد من رجوعة الي القاهرة
طلبت تاكسي وفورا لمطار فرانكفورت اخبرتهم بانب عضو اللجنة التنفيذية لاتحاد طلاب جامعةد
فرانكفورت ومنير شيخ الدين قادم لمؤتمر يخص السودان , اخبروني بان الجواز غير طبيعي ولايمكن ان يدخل المانيا اتصلت بنائب برلماني واخبرته بما حدث , وثم اتصل بدوره بوزير الداخلية اتضح ان ناس الامن في السودان صبو علي اوراق الجواز مادة ما واظن كلور تمنع لصق اي شئ علي الجواز بل اكلت بسبب الاحتكاك جزء من الورق الثانية واحد اخونا جنوبي مرة علي مطار فرانكفورت ايضا والعهده علي الراوي سلم جوازو لناس الجوازات ومكتوب عليه الطول خمسة قدم عشرة بوصات والزول طوله مترين وربع يعني كان مدنقر وبتكلم مع ناس الجوازات البوليس قال ليهو يازول انت طالع في شنو صدق لحدي ما السفارة تدخلت الصورة ياهو الزول بس الطول لا تقولي منو وتقولي ود البشري تاني
04-09-2008, 09:33 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: واحد اخونا جنوبي مرة علي مطار فرانكفورت ايضا والعهده علي الراوي سلم جوازو لناس الجوازات ومكتوب عليه الطول خمسة قدم عشرة بوصات والزول طوله مترين وربع يعني كان مدنقر وبتكلم مع ناس الجوازات البوليس قال ليهو يازول انت طالع في شنو صدق لحدي ما السفارة تدخلت
الله يا سيف دي قصة عجيبة خلاص تبدو اخير منها قصتي انا يا زول القصة طالقة في السهلة ولتيق تقيل واحرف بتاع كوبي اند بيست ما بسوي سوات ناسنا ديل بس الله يهون القاسي ود البشري البتتوني الظاهر عليهو موضوع الجواز ده ما راكب ليهو في راسه وخايفو هو واحمد عبدالله يجو يعملوا لي (فرش جواز) فبالله خليك قريب لزوم المضايرة والبتتنة وكدا وتسلم يا عوج الدرب وانشاء الله ما نجيك ممسوك في جواز او بقرة
04-09-2008, 09:02 PM
Shams eldin Alsanosi Shams eldin Alsanosi
تاريخ التسجيل: 12-18-2003
مجموع المشاركات: 2135
عليك الله يا كيكي ما تتحاوم في البوستات التانية وخليك مرابط هنا عشان نشوف نهاية جوازك المزور دا
......... أنا عندي مصلحة في النهاية لأني ناوي علي نهاية الشهر لكن قالو اخوك كان حلقو ليه انت بل راسك.. وبالصورة الانا شايفها دي إلا اشيل معاي برميل موية عشان أبدأ البلبلة من سلم الطيارة.
04-09-2008, 09:10 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: أنا عندي مصلحة في النهاية لأني ناوي علي نهاية الشهر لكن قالو اخوك كان حلقو ليه انت بل راسك.. وبالصورة الانا شايفها دي إلا اشيل معاي برميل موية عشان أبدأ البلبلة من سلم الطيارة.
مرحب يا شمس الدين وحبابك ويا صحبي بل راسك من حسسسسع دي فالقصة فيها تلتلة وكتلوك ولا جووك جووك وتنظير وتهديد بنزع كل مكتسباتك الثبوتية من اقامات وتاشيرات وايضا فيها دخول العاصمة المثلثة بدون اوراق ثبوتية وزي كم يوم كده من اجازتك ضياع ومساككة والاخطر من كده هو التحقيق والمزاررة . ما نخوفك كثير يا شمس ولكن بيني وبينك شيل شيلتك
04-09-2008, 09:16 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
غايتو ما طمنتني ..لكن على الاقل هيئاتني حتي لا اوخذ علي غرة زي ما بقولوا وعلى حسب وصيتك عندي بحيرة كاملة جمبي والكويس انو نحن مع بشاير الربيع اااها من هنا وعلي البحيرة لحدي مواعيد السفر
04-09-2008, 09:53 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: غايتو ما طمنتني ..لكن على الاقل هيئاتني حتي لا اوخذ علي غرة زي ما بقولوا وعلى حسب وصيتك عندي بحيرة كاملة جمبي والكويس انو نحن مع بشاير الربيع اااها من هنا وعلي البحيرة لحدي مواعيد السفر
غايتو يا شمس في حاجة برضو ممكن تخليك تغوص عميقا في البحيرة لزوم البلبلة المبكرة وهي لمن الناس ديل يقولو ليك حيكون في بحث بتاع كمبيوتر لنمرة الجواز .وفي حالة جوازي كانت الاشاعة التي اطلقها الشاويس ابو شنب داخل المكتب ايااه بان كل النمر والجوازات (الاستكر لس) تم اعدامها وليس لها سجل في الداخلية. فالعكة واقعة واقعة.وربنا يستر ونشوف اخرتها مع الجواز الذي اكل الان يومين ونص من الاجازة اياها ونعود
04-09-2008, 10:17 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
يوم وراء يوم وفي اليوم الثالث علي التوالي وانا ضيف دائم في انتظار المستحيل والسعي الجاد لافراج جوازي المستخرج بقنوات شرعية ولكنها يعاني من خلل فني مزمن ومتهم بالتزوير . وفي اليوم الثالث كان الضابط هو المتحري الاول وبداء في زيه المدني موشح بهيبة ضباط الشرطة وصرامتهم ... شوف يا زول جوازك ده غير شرعي (جواز طلع جنا طرادة وابن غير شرعي لموسسات الدولة السودانية) والقصة دي فيها حلين لا ثالث لهما.. الحل الاول نرفع تقرير ونحجز علي الجواز الي حين الفراغ من التحقيق وقد ياخذ هذا الامر في القليل شهر ونيف..!!! ,وحنجيب العسكري الطلعوا ليك في مدني والضابط المضي وحنجيب انت ذاااتك ونشوف اخرتها شنو واها الحل التاني شنووووووو وقبل ن نسمع الحل التاني سنذهب الي فاصل وثم نواصل
04-09-2008, 10:27 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
كيكي .. ياخي بطل ممارسة هوايتك المفضلة دي ياخي.. ما ممكن يا هندسة ياخي .. كل مرة تبدا ليك سرد جميل كدا وتخلينا في السهلة بعد نرخم تب.. ياخي ما ممكن تخلينا في النص كدا خشمنا ملح ملح كل مره ياخي.. إنت النايم ليها شنو هسع كان سألوك؟ إنت عارف عشان الحركات الزي دي أنا ما كنت بحضر المسلسلات المصرية البيجيبوها في التلفزيون.. وليومي يومك دا كان عجبني مسلسل بمشي البلاك باستر بجيب السلسلة كلها يا اشتري السلسلة كلها وبعد دا أبدأ أحضر.. ما بحب الشلهته..
ياخي عليك الله بطل حركات وتعال كمل الحكاية دي..
----------------- مشتاقين يا ماما دومه
04-10-2008, 04:01 AM
doma doma
تاريخ التسجيل: 02-04-2002
مجموع المشاركات: 15970
وقبل ان ينطق ضابط المباحث الجوازاتي بالخيار الثاني كانت سحابة قد مرت مرور بالحركة السريعة.. سحابه تحملك رغبة الهتاف ومطالبة السلطات الجوازية,,,وكانك تقول يازول مش الجواز ده انا ما دايرو..!!! ايوووه شيلوهو..شرطوا قطعوا حتة حتة ..وخلوا ورقوا يطاير في المليون ميل مربع ده وفكونا من تلتلة الغربة وعيشة ام دق دي...والواحد دي فرصة يقعد بعيد ويعمل شخيت من مدارات الغربة وبصراااحة كده ياضابط انا زهجت من تعب السفر..!!!! ايوه فرصة فيها نرجع للقبيل ونمشي الصعيد مرة ومرات الغرب البعيد ونخرطم مرة ونغيب خلف كراكير البلد مرات ونطلع الكراسي في الساحة وفرجة في الدافوري ولو لقيت ليك قرعة قرعتين بتاعة مريسة ضبانها ضكر ما بتاباها
وحنعود اليكم يا خالة دوما ومحمد نور
04-10-2008, 08:21 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: ياخي عليك الله بطل حركات وتعال كمل الحكاية دي..
هلا يا ابو حميد جاينك يا محمد نور وحبة حبة الليل نعدو وياصحبي قليل من الشحتفة والاعلانات لا تضر بالقضية المسلسلية واهو متاثرين بشغل الفضائيات المدورة في راسنا (كرو كرو ) منذ الازل دي كن بخير وتحياتي
04-10-2008, 02:18 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
هلا يا دوما وحبابك يا خالة في سيرة جوازي الذي الان هو تحت رحمة الاخوة بالبوليس وحرس المنافذ السودانية ووينك يا خالة قاطعة الحركة لشهور عديدة لاخبر ولا اثر
04-10-2008, 02:27 PM
doma doma
تاريخ التسجيل: 02-04-2002
مجموع المشاركات: 15970
كنت متيقن كما الضابط ايضا بان هنالك خطا واهمال من الجهة التي استخرجت ذلك الجواز الرعديد وومتيقن ايضا من حقي في مقاضاة وتلتلة وزراة الداخلية السودانية والوقوف معاها في ضل عدة محاكم والجرجرة معاهم ..ولكن القصة واقعة تحت اشكال المساحة والزمن والاقامة في مركز الحدث..!! ولذا كان اصراري العنيد هو علي معرفة الحل الثاني لاخرج من وسواس التفكير القهري لاردد بعصبية اها الحل التاني شنووووووو يعنيييييييي؟؟؟ جاء الرد حاسما وقاطعا كالسيف من الضابط (ابو قطعا ناشف) تعدم الجواز ده..!!!!! شنو.!!! ايوه تعدم الجواز .!!! اعدام جواز عدييييييييل كده..!!!! يازول قول كلام تاني غير كده دي حلولي يا زول وانت شوف البخارج معاك فيهم واحنا حاضرين..!!! لا حولا ولا قوة الا بالله
ونعود
04-10-2008, 10:03 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
اعدام رسمي وشعبي يعني خلاص (نو مووور فلايتس) وخلاص ماتش الغربة الطول انتهي بقرار شرطي وبسبب الجواز الذي بداء هو ايضا متامر مع ابناء جلدته يازول اعدام -اعدام..!!! وقبل ان افيق من صدمة اعلان الاعدام افتي الضابط ابو دبابير بعد ان مارس فيني فن الشواء الاعدامي وجهجة جوازي ما كان يتجهجه مدافع المريخ الشهير ابراهيم عطا (ابراهيم كبكبة) ذات يوم..!!!! افتي بان في امكاني الذهاب الي المدينة التي استخرجت منها الجواز وابلاغها بهذا الخطاء وباستطاعتهم استخراج جواز اخر وبرقم اخر.. وهنا تداعت ايضا اشكاليات كثيرة في مستقبل الاقامات والبلاوي التي هي في بطن الجواز الذي سيعدم وهذا ما سنعود اليه...
05-29-2008, 10:38 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
هلا يا مدير ومشتاقين والله والتلفون اتغيير يا شكري طبعا دي الاجازة الثالثة طوالي بجي الدوحة والشريحة بقدرة قادر بتروح وعمر سعد ومرجفي المدينة يشيلو حسي..!!!
ووينك انت يا شكري انا قلت ياربي الباش ده مشي الخرطوم في وفد المقدمة ولاشنو
04-10-2008, 11:04 PM
كمبورة كمبورة
تاريخ التسجيل: 01-14-2008
مجموع المشاركات: 2840
اعدام جوازي ثم تبديله بجواز اخر برقم اخر وورق فاااضي في بدايات خلعة القرار الاولي مرت سحابة هددت التاريخ الاقامي والتاشيري ومستقبلنا في الملاعب الخليجية والملاعب البديلة التي ستذهب كل ختوماتها الي مزبلة وزارة الداخلية السودانية ... سريع سريع في هذه الاجواء المشوشة قبلت بالقرار الثاني لعدة اسباب 1-نتخارج من نقة البوليس والعكتلة بتاعتهم التي لا تستطيع التنبوء به 2-استلام الجواز (الممسوك) واسترجاعه من براثن المباحث ام دق 3-لاحاق باقي الاجازة ووقف نزيف الايام الضائعة 4-كسب مساحة وزمن والحصول الي استشارات ونصائح من الخبراء مضيت علي قرار تسليم جوازي بعد ان تم ختم دخولي للسودان... وشتات خالي محطات والهم الجوازي لا يبارح البال في انتظار تنفيذ القرار الثاني وتداعياته ونعود
04-11-2008, 04:23 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
والان عاد الجواز المنتظر وعادت الي احلي الليالي وصرت اردد كما ردد جمهور الهلال ذات يوم وجع وجع الجواز رجع..!! ولكن عودة مشوبة بحذر وتحت العودة نيران نبرة الضابط وقوله الاخير عندما قال بصرامة مافي ليك طلعة تاني بالجواز ده ولازم تغييروا وانا ح اعمم الرقم ده..!!! لقد هددوني بالتعميم ووضع نمري في المنافذ والحدود (انه تقليع النمر) الذي كان يعنيه خليل.. ... اذن لابد من الذهاب الي مكاتب المغتربين وان طال السفر وهذا ما نعود اليه في لقاء السحاب مع جوازات المغتربين مدني ونشوف ايييه الصار
04-13-2008, 05:55 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
وفي يوم مارسي قليل الغيوم وكثير الحرارة ومع دغش الرحمن كنت من اوائل الحاضرين في مكاتب جوازت المغتربين بمدينة ودمدني متابط جواز عليل ومتهم ومنذر بالكرت الاصفر ومشاع في المواني والمنافذ بانه ممنوع السفر به تماما... وتوششششك علي الضابطة وليس ضابط هذه المرة بل ضابطة.. تبدو عليها سمات العسكرية الحقة وان كنت تحتاج الي تركيز عالي حتي تستوعب سمات العسكرية الحقة عند المراءة السودانية الطيبة القلب.. ولكن العسكرية عسكرية والضابط ضابط حتي وان كانت انثي.. ونعود
04-16-2008, 09:43 PM
صلاح الأحمر صلاح الأحمر
تاريخ التسجيل: 03-24-2006
مجموع المشاركات: 807
Quote: ويواصل سكسونيا قصصه وحكاياته الآسرة التي لايربط بينها غير خيال مترع بكثير من الخيال المتداخل مع وقائع حقيقية و كم هائل من المتناقضات والطرائف التي تجعل حديثه غاية في اللطف والتشويق والجنون.
هلا ابوصلاح وحبابك يازول يا جميل وحباب اسحق سكسونيا ذلك السرمدي المهيب وساذهب ياابوصلاح انهل من معين حكاويك الغزير المدهش فانا يا ابوصلاح ومنذ مجيئك هنا اتربص واترقب حكيك الطاعم... وحتما ساكون برفقتكم ورفقة اسحاق سكسونيا الملهم...
حليمة عملت ون تو طاعم ولكن اختفت عندما تكاثر الشرطيون في سيرة البوليس لعلها خافت علي الضرائب (ضرائب التواجد في بوست امر حكومي)
دوما في انتظارك وفي انتظارحليمة ومعا لعوالم اسحق سكسونيا
04-18-2008, 12:01 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
كانت خطة لعبي التي نويت عليها مسبقا لمكابسة اهل استخراج الجوازات في امر جوازي الموسم بالتزوير هي (ممارسة الجوطة والتمليح الي رفع دعوي قضائية ضد وزارة الداخلية).. وقلت في داخلي البوليس ده لازم تجيهو من فوق وبكلام كبار كبار عسي ان يرعو..!!! وايضا كنت اطمح وطمعان في الاعفاء من رسوم الجواز الجديد ان رسي الحل علي ذلك..!!! ولكن بعد رفع بياني الي الضابطة ام دبابير هر بان الامر (ماكل نيم عندي) وان الحل هو في الحل ودفع الرسوم ومعاها دمغات جديدة كمان.... والصدق اعتذرت الضابطة بعد فحص الجواز وتاكد لها بانه مستخرج من مكتبهم في عهد ضابط سابق تم نقله الان..وافتت بان حلي هو استخراج جواز جديد وبنمرة جديدة مع حمل الجوازين معا..... ونجا جوازي القديم المزور من الاعدام شنقا ولكن صار بلا روح اوجسد مجرد ورق اطالعه لكي اتمتع بدهشة الختم والختوم الموجودة في باطنه...
انتهي ....
04-18-2008, 04:34 PM
آدم صيام آدم صيام
تاريخ التسجيل: 03-11-2008
مجموع المشاركات: 5736
Quote: وانا كنت مفتكر الواسطة العملتها ليك في المطار خارجتك دا كلو ما اسمع بيهو يافردة نغني معاك ياقلب انا كنت قائلك تبت من تعب السفر
هلا بالفردة وحباب فرجينيا وحباب الناس الاصليين ويافردة شفت مشيتكم كده والفيلم ده دور والواسطة بتاعكم ذاااتو اضاير من المجرم الذي هو اخوك والشوق يا متولي ولنا لقاء عبر بوست قريبا عن ايامي الجميلة معاكم... ونردد مع المرحوم العميد احمد المصطفي سفري السبب لي اذاي (بصوت محمد تبيدي)
04-18-2008, 08:50 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: في الياقوت ده جوازي العاجب البنوت وفقدي الليلة
جوازي في الشنقين وتاني الليلةاجيبو بس من وين..
هلا يا حليمة وحباب الباسبورتي بتاعك العاجب البنوت والبوست ملكك تمام ونحن سنظل جلوس علي عدة زوايا وامكنة في الجامعة الظليلة ويا حليلها(وخليني ندشن فيه الصداقة الهندسة الادابية عي صفحاته ولو بعد سنين طويلة)... كباية شاي من منتدي الفلاسفة الفوق واول جلسة ستكون في ضهر التور ونحن في انتظار ضربة البداية لحكاوي الجواز...
04-19-2008, 11:40 AM
حليمة محمد عبد الرحمن حليمة محمد عبد الرحمن
تاريخ التسجيل: 11-02-2006
مجموع المشاركات: 4052
انت الحكومة استخرجت لك جوازا مزورا، وانا الحكومة جردتني من جوازي السَمِح..
اعتقد ان وجه الشبه بين قصة جوازينا هو حسن النية في كلِِ..
فالضابط العظيم، اعطى جوازي الى مدير مكتبه وطلب منه اضافة تلك (الولية)، ونسى او تناسي ذلك المدير اننى لكي اسافر لابد من استخدام ذلك الجواز.. يعني انا كنت ماشة من حلة للتانية؟؟ ما راكبة طيارة ولا باخرة وقاطعة مجال جوي ومياه اقليمية..الخ.. ولعله القانون (النجيض).. المهم.. السيناريو بتاع الغاء جوازي سيناريو ردئ ويجعل قصتي اشبه بالفبركة البايخة.. ما زلت الى اليوم اقلب فيه ذات اليمين وذات اليسار واعيد الرأي كرات وكرات.. المهم دعنا نتجاوز هذه المحطة وننتقل الى مشاكل الجواز الاخضر..
سافر زوجي عائدا الى مقر عمله في الخليج، بينما واصلت انا رحلتى المكوكية بين الخرطوم واطرافه حيث اسكن.
في يوم من الايام تاخرت عن بص الموظفين الذي كان يقلنا في نهاية الدوام الى مضاربنا..
وفي المساء حينما عدت المنزل، وجدت ان الاخ العزيز الطاهر بكري، مدير القسم السياسي بصحيفة الخرطوم حالياَ، ترك لي رسالة مفادها ضرورة الاتصال عاجلاَ بالاستاذة علوية جمال بجمعية البيئيين بالعمارات، للترتيب لسفري لحضور سمنار في ملاوي. وضرورة حصولي على تاشيرة دخول للبلدان التي سامر بها واقضي بها عدة ليالي وهي كينيا وجنوب افريقيا..
واو.. حتة واحدة.. لم تسعني الفرحة، و كان لابد لي من الجهوزية ..
في اليوم التالي خلافا للمعتاد.. لبست ثوبا ملونا وحملت الثوب الابيض في شنطتى.. ويممت صوب الخرطوم..
دعني أقف بك قليلا عند قصة التوبين دي..
البص الذي نستقله للوصول الى الخرطوم، بص خُرْدة، مفروض يكون مرمي في أي كوشة.. بس ايادي الميكانيكي السوداني الماهرة، اعادة اليه الحياة مرة اخرى، على الاقل رممته داخليا وعمرته و اعادته الى الاسفلت مرة اخرى.. اما البودي فلم يكلف صاحبه نفسه عناء معالجة مشاكله.. فكان كل دخان العادم ياتينا الى الداخل عبر ارضية البص المهترئة، فتتبقع اثوابنا، ونكسى حلة من اللون الاسود الرمادي العجيب .. اضف الى ذلك ان لون البص الاصفر العجيب كان مدعاة لان تطلق عليه احدى زميلاتنا لقب (الكُدُنْدار)، ولصق به الاسم..
في اليوم التالي ذهبت الى دار السودان للطباعة والنشر(عليها الرحمة) حيث كنت اعمل. اول ما وصلت جرى عدل على الحمام، استحميت، وغيرت التوب وطوالي رجعت المحطة الاوسطى مرة تانية وركبت حافلات الصحافة ويممت صوب العمارات..
التقيت الاستاذة علوية جمال التي اخبرتني بان معهد ميسا
Media Institute for South Africa (MISA) بصدد عقد سمنار عن الـ(Mass Community Media) لمدة اسبوع وذلك في مدينة كَلَب ماكاكولا على بحيرة ملاوي، بجمهورية ملاوي. واخذت بياناتي وارسلتها الى المشرفين على ادارة
السمنار.. وقالت السفر ح يكون خلال عشرة يوم ولازم اجهز حالي فيها..
اهاااا.. هنا ظهرت مشكلة الجواز.. لازم اطلع جواز جديد... وكمان محجبة.. ليش؟ ما انا صحفية..
كيف الكلام دا؟
خلى مرة تانية نعرج على قصة الحجاب..
حينما انضميت الى مجلة سوداناو لم اكن محجبة، رغما عن ان لبسي كان محتشما جداَ، الباقي كان ناقصو ربط الشعر بالايشارب..
في احدى المرات ذهب رئيس التحرير الى احدى دول المغرب العربي، وجاب معاهو دستين ايشاربات،، وبعد انتهاء احد اجتماعات التحرير، طلب منا العنصر النسائي البقاء وفتح العلبتين، وطلب من كل منا ان تاخذ واحد.ا. كانت الايشاربات منتهى الروعة. فاخذت الصحافيات والعاملات في الدار،كل ايشارباَ، وحينما جاء دوري ومعي زميلة اخرى،، طلب منا ان تأخذ كل واحدة فينا ايشاربين..كنا نحن الاثنين غير محجبتين..
أخذت الايشاربات وبدأت استخدمها غطاء من البرد .. بس لرقبتي ..كل يوم الف واحد حولها واجي الشغل.. آخر انبساط بالذات مع زيف الصباح وقِرَه والبص ولا فيهو ستائر ولا من يحزنون.. واحدة زميلتي من الجماعة (اياهم) ما عجبها الحال.. استلطت علي وبقت مقابلاني.. كل يوم الصباح الصباح، تقول لي: والله يا حليمة كان غطيتي شعرك بالحجاب، شكل وشك بكون حلو خلاس.. كدى النجربو ليك..
بس على منو؟ على أنا؟؟؟ (وشوش ضاحكة كتييييرة)
المهم لما لقت جلدي تقيل بقت تقول لي عدييل يا حليمة يا ختى انتى الايشارب دا ما ادوك ليهو عشان الحجاب ما عشان شئ تاني.. وووو..
بقينا كمان لما نكون ماشين لتغطية اول شئ يعاينو ليهو راسنا.. قمت رفعت الايشارب من الرقبة وقنطرتو في الراس.. وبس من ديك وعيك.... وكان اول مناسبة نحضر تغطيتها بالسمت الجديد، حضور رافسنجاني الى الخرطوم في بداية التسعينات.. ودي قصة تانية قد اتطرق اليها لاحقا..
نعود الى الجواز. سالت واحد قريبي عسكري شغال في الأراضي عما إذا كان بيعرف واحد في الداخلية عشان يسرع لي الإجراءات.. طوالي رد: ايوة بكري الصباح تجيني في الأراضي .. عندي واحد صاحبى شديد ضابط في جوازات امدرمان.. اسمعي ..ده رتبة كبيرة..ما تنسي آآه.. بكرة الصباح تجيني من الدغش..
يا اخوانا السودانيين بسهلوا ليك الاشياء بطريقة عجيبة خلاس، لما مسيخة عدييييل كدا..
المهم اخدت صورة بالحجاب.. وشلت الجواز معاي وجيت البص جلست الى جانب واحد بعرفو، وفي اثناء الونسة عرف اني ماشة امدرمان عشان اطلع جواز.. طوالي استلم الموضوع.. قال لي: اعتبري جوازك هسع دي انتى شايلاهو في ايدك.. كيف؟ سألت.. بس انتي موش عايزة جواز؟ ايوة.. كان ردي .. خلاس اعتبري الموضوع منتهى...
الحق لله من غبائي عاينت لي يدي.. انا اصلي ما بطير..
ووصل في حديثه العذب: ليش تمشى امدرمان.. جيبي الورق وما تشغلي بالك.. انا عندي صاحبي ضابط كبير..
وحينما راي ترددي قدم اقتراحا اخر.. ارح نمشي سوا.. هسع دي انا من دربي دا بمشي معاك..في خلال ساعة واحدة بس بتكوني ماسكة جوازك في ايدك..أرح..
النصيحة الإغراء كان كبير.. وبدل مشوار امدرمان، يصبح المشوار في الخرطوم وكمان ساعة واحدة بكون أمر الجواز انقضي.. النصيحة نور.. طوالي غيرت رأيي وبوووووووووووو ..مشيت معاهو الخرطوم..
موش قلت ليك انا اصلي ما بطير؟؟
أريتني كان ما مشيت..
04-20-2008, 10:12 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
عفوا حليمة وعزرا علي التاخير ولكن عدت الي هنا ووجدت القصة احلوت والسرد رايع وفلاشي باكي ومدهش وسياحة ما بين صحف وبص مسمي اسم علي مسمي وطيبة سودانين تودي حتات عجيبة وفي الانتظاررررررر
04-21-2008, 02:09 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
طوالي توووش على الداخلية.. ما بعرف كان في شنو؟ بس اليوم داك كان في زحمة بشر عجيبة خلاص.. صاحبي قال لي حظك من السماء ياهو داك عباس قاعد.. وينو؟
صرت اتلفت ذات اليمين وذات اليسار، وابحث عن النياشين والدبابير. - وينو؟ كررت السؤال بزهج. - داااك . ما شايفاهو. واشار الى واحد ملكي.. - داااااك ابو جلابية؟ عباس الضابط الكبير الابس الجلابية داك..؟ - ايوة .. انتى بس اسكتي ساي.. هي يالله عباس دا ضابط شنو اللابس جلابية دا.. فعلا كان واحد واقف تخيييين ولابس جلابية وطاقية وماسك اوراق كتييرة في ايديهو ويكورك.. وينده على الناس..
صاحبنا وقف ساكت.. هو يزح شوية ويقبل على يقول لي يلا.. وبقي هو يزح وانا ازح لغاية ما قربنا لعباس.. وعباس عامل فيها ما شايفنا كلو كلو.. بعد داك صاحبنا رفع صوته قليلا.. ازيك يا عباس.. وعباس يكورك في ناسو.. عباس .. اسمع يا عباس.. بس عباس في وادي وصاحبنا في وادي مع انو المساحة بينهم لا تتجاوز المترين.. كلما صاحبنا يرفع عقيرتو بهذا العباس، يرفع عباس عقيرته الغاضبة وينادي على واحد من اصحاب الارانيك.. انا عرفت النتيجة ح تكون مطينة.. عشان كدا جهزت روحي.. وكوركت مع صاحبي.. عباس عباس اسمع يا عباس.. بس التفت الى بكل مساخة.. اها مالك دايرة شنو؟ يعني عباس دا ما من قبيل عامل فيها ما سامع صاحبو دا .. اول ما كوركت انا خلاص اضانو بقت جرس.. -اسمع ما انا الدايراك.. دايراك فلان دا..(وذكرت الاسم). التفت عباس الى صاحبي وقال ليهو بكل برود..اهلا.. بدأ صاحبنا عايز يشرح الامر لهذا العباس العابس. - اسمع يا عباس جيتك الليلة مخصوص.. حليمة اختنا دي فقدت جوازها وعايزة جواز مستعجل..وو نط عباس.. -اسمع ما شايفني مشغول.. ببييع فول انا.. الله ؟؟ دا كلام شنو د؟ دا موش عباس الصاحب اللي ح يطلع لي الجواز قبل ما ارمش ولا زولن آخر.. بدأ زميلي يلح... - اسمع يا عباس ياخي.. اسمعني.. يا عباس ياخي انت ماش وين.. كان عباس قد استدار الى الداخل ورت قفل الباب وراهو.. طوالي انا خمشت جوازي القديم من جيبو عديييل وفوووووووووو كسحت، تقول فاكنى بنبلة.. وهو يكورك وراي - اسمعي تعالي ياخي تعالي بس .. انا عارفو بقضي ليك امرك بس انتى اصبري شوية خلي عندك صبر يا بت الناس...الله.!! من دربي داك واخدت تاكسي على الاراضي طويل..عشان الحق الضابط التاني.. لقيت قريبي قاااااعد، وقفاهو يقمر عيش على راي اخوانا المصريين.. مدردم سفة كبيرة وجاري في نور طويييييل من بعيد، لما دنقرت.. اول ما قربت ليهو طولي سالني: - اها جيتي مالك؟ سؤال غريب.. وقبل ان يفتح الله علي بكلمة اردف متسائلاَ.. - انا ما قلت ليك تعالي من الصباح الحماك شنو؟ انا ما عارفك بتجي في بص الموظفين مع ناس فلان داك.. (وذكر اسم).. طريقة زوغة ولا كضبة مافي..ظبطني بالـ(ثابته) حكيت له الموقف بكل صراحة.. -خلاص شوفي .. الراجل هسع فات.. وانا ما بقدر اقول ليهو تعال بكرة تاني كمان.. انا ما كلمتك قلت ليك صاحبي شديد .. وهو سعادتو جا بنفسو عشان يخدمك.. دا اخوي شديد.. اها هسع امشيلو براك.. - كيف الكلام دا.. انا كان بمشيلو براي يا فلان اخوي كان جيتلك.. - شوفي والله انا تاني ما بطلبه لكن ممكن تمشيلوا انا من ناحيتي بكتبلك ورقة ليهو عشان يساعدك.. - طيب هو في ياتو قسم في امدرمان؟ امدرمان اقسامها ما كتيرة.. - والله هو مدير قسم غايتو؟؟ سمح ياتو قسم ياخوي.. اللهم طولك يا روح.. عرفت انو القضية بايظة.. صبرت لغاية ما كتب لي الورقة.. شلتها وركبت بصات امدرمان.. قررت امشي لبت عمتى في منطقة مرزوق.. بس في ياتو جوازات ما بعرف.. في النص اتذكرت انو عندي قريبي ضابط في مركز شرطة الصافية.. طوالي غيرت الى بحري.. في القسم لم جد قريبي الذي كان في مامورية.. على طول مشيت البيت لقيت والدته التي لم اخبرها بمقالبي وسالتها عنه، اخبرتني انه خارج الخرطوم.. لكنها تبرعت بان تاخذني الى القسم حيث يوجد احد اصحاب ابنها.. غايتو كان على جنس بشتنة ما حصلت.. شعثاء، غبراء ترهقني قترة المشاوير ومسغبة عدم الفطور. دخلت المراة الى المطبخ جهزت لي فطور وكباية شاي بالرغم من ان الوقت كان منتصف النهار.. وبعدها خرجنا نحن الاثنين الى مركز شرطة الصافية ببحري..
يتبع..STAY TUNED
04-22-2008, 01:20 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
وكلنا بنكورك كما كوركت حليمة وقريبها ذات يوم لعباس حنكورك حليمة حليمة تعالي سريع بالله تمي لينا وبطلي حركات عباس دي
وتقولي لي مقدرات سرد وشنو يا استاذة حليمة ياخ ده سرد مدرسة وملان تفاصيل وكانك بتشاهد في المشهد كلو واستخدام رهيب للفلاش باك البص- قربتتك السوت الشاي والفطور وقربيك بتاع عباس وصحبي المدنكل السفة وراجي ممارسة دورالوسيط الدولي
حليمة يا استاذة هووووي انتي شيختي عديييلك كده وفي انتظارك
وصلنا إلى قسم شرطة الصافية، وسألنا عن صاحب قريبي، طلب منا احد العساكر انتظاره لأنه خرج وسيعود سريعا. استأذنت والدة قريبي لان الأطفال على وصول من المدارس ولتكملة إعداد وجبة الغداء.. جلست في مكتب خال به ثلاثة كراسي، وطال انتظاري.. في تلك الأثناء قررت الاتصال بالسفارة البريطانية، الجهة المخول لها إعطائي تأشيرة الدخول الى ملاوي، لعدم وجود سفارة لملاوي بالخرطوم، وبما ان ملاوي احد دول الكومنويلث، يحق لي طلب تأشيرة لملاوي من السفارة البريطانية، او هكذا اخبرني من سألته وتوسمت فيه المعرفة وقد صدقني القول.. قررت ، كسبا للوقت، الاتصال بالسفارة البريطانية بالخرطوم للاستفسار عن التأشيرة، دون التطرق إلى مهنتي أو الغرض من ذهابي إلى هناك. فطلب منى الموظف ، إحضار الوثائق المطلوبة، والحضور الى مبنى السفارة. آنذاك كان في ذهني أن الوثائق المطلوبة قد لا تتجاوز جواز السفر وبه تأشيرة الخروج، وكذلك التذكرة أن استدعى الأمر.. في أثناء حديثي مع السفارة، دخل احد أفراد الشرطة وجلس في الكرسي المقابل لي، ويبدو انه كان متابعا حديثي التلفوني، بعد انتهاء حديثي، حياني، وبدأنا نتجاذب أطراف الحديث.. نظرت إلى كتفيه لأحدد رتبه.. كان عقيدا في الشرطة.. الحمد لله حظي بدأ يبتسم أخيرا
يبدو انه علم من متابعته لحديثي مع موظف السفارة البريطانية إنني أريد السفر و اننى (مطلشة) قليلاَ.. في الحقيقة أنا مطلشة كتير.. تشعب بنا الحديث إلى قصة سبب حضوري إلى قسم الصافيةـ فعرف اننى بصدد استخراج جواز سفر .. وتطوعت من تلقاء نفسي وحكيت له قصتي واننى بصدد استخراج بدل فاقد..أخبرته الحقيقة واريته الوثيقة، فتأسف الرجل كثيرا وهب لمساعدتي..بحث عن احد العساكر ليعمل لي محضراَ، فوعد احدهم بالحضور، ولم يحضر.. بدأ القلق يدب إلى، ولحظ الرجل ذلك، فما كان منه أن اقترح على الذهاب إلى مكان آخر لعمل بلاغ بدل الفاقد.. - وين نمش؟ - حلة كوكو.. اصلو ولا كضبت طوالي ركبت وبووووووووووووووو حلة كوكو.. في الطريق إلى الحلة كان هناك اختناق مروري سببه فحص رخص السيارات، ولما راى الضابط زهج الناس وكواريكهم، طلب من العسكري أن يفك الاختناق قليلا.. في المكتب تمت إجراءات البلاغ بسرعة واخبرني الضابط أن على الذهاب صباح اليوم التالي، إلى الداخلية لمقابلة الضابطة فلانة الفلانية عند العاشرة صباحا.. في صباح اليوم التالي:ـ ذهبت إلى المكتب، مضيت اسمي ثم خرجت، وذهبت إلى مكتب شركة النيل الأزرق، بالقرب من القنصلية اليونانية، حيث كانت فاكسات السفر تأتيني عبر مكتب بروفيسور عاصم مغربي، زوج الأستاذة علوية جمال محمد احمد.
كما توقعت وصل الفاكس الذي ينبئني بقبولي بين الإعلاميين والصحفيين الذين سيحضرون السمنار في الفترة من 6- 12 أكتوبر.. بمدينة ، الواقعة على بحيرة ملاوي.. Club Makakola ووصف لسكة السفر.. واننى يجب أن اذهب إلي الخطوط الكينية لاستلام تذكرة سفر على الخطوط الكينية ، الخرطوم- نيروبي – جوهانسبرج.. ثم يممت شطر الداخلية..
لأول مرة أحب التعامل مع النساء في المرافق العامة..
سالت عن الضابطة، فدخل عسكري ثم رأيت ضابطة برتبة رائد، تنادي اسمي..
صافحتني ثم قالت أنا اليوم في إجازة لكن جيت مخصوص عشان أخونا الضابط فلان، طلب منى ذلك.. اصلو زول عزيز علي وما بقدر ارفض ليهو طلب.. يا سلام..
وأخذت الأوراق والرسوم ثم عادت إلى بعد نصف ساعة والجواز في أيدها..
شكرتها بحرارة، وأوشكت أن أعانقها بحرارة ثم عدلت عن العناق واكتفيت بشكرها بحرارة .. وكانت وجهتي الثانية السفارة البريطانية بالخرطوم..وفي معيتي ذلك الفاكس الذي يحوى أكثر من 5 صفحات متصلة..لم أفكر حتى في فصلها وترتيبها.. ولكن هل سارت الرياح كما تشتهي السفن؟ ذلك ما سنعرفه غدا.. يتبع Stay tuned
04-23-2008, 12:10 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: شكرتها بحرارة، وأوشكت أن أعانقها بحرارة ثم عدلت عن العناق واكتفيت بشكرها بحرارة .. وكانت وجهتي الثانية السفارة البريطانية بالخرطوم..وفي معيتي ذلك الفاكس الذي يحوى أكثر من 5 صفحات متصلة..لم أفكر حتى في فصلها وترتيبها.. ولكن هل سارت الرياح كما تشتهي السفن؟ ذلك ما سنعرفه غدا.. يتبع Stay tuned
04-25-2008, 07:19 AM
حليمة محمد عبد الرحمن حليمة محمد عبد الرحمن
تاريخ التسجيل: 11-02-2006
مجموع المشاركات: 4052
دخلت الى مبنى السفارة البريطانية بالخرطوم.. كانت السعادة لا تسعني.. وكنت أظن اننى بمجرد ان امد جوازي الى الموظف، سيبتسم لي محييا، ثم يطلب منى الجلوس وبعد اقل من نصف ساعة يعود الي بجوازي وبه التأشيرة، التي تسمح لي بالتحليق عاليا فوق الأجواء الكينية ثم الجنوب افريقية ثم ملاوي، هناك حيث بحيرة ملاوي، التي كنت اقرأ عنها في الجغرافية، وكيف ان خرير مياهها، سيكون السيمفونية الرائعة التي انام عليها كل مساء، واستيقظ عليها في الصباح الباكر.. وقد كان طلب منى الموظف الجلوس بعد دون ابتسامة ، بعد أن اخذ منى الجواز والفاكس الذي طوله خمسة تلاتة او أربعة أمتار..
جلست قرب احد الرجال ، وطال انتظاري، وكالعادة طفقت أتجاذب أطراف الحديث معه، أخبرته بوجهتي وإنني بصدد الحصول على التأشيرة الى العاصمة الملاوية لِلِنقواي.. كانت هناك ثلاثة صفوف او ممرات مفصولة بزوي ثقيلة، يقف طالبو التاشيرة كل في الصف الذي يعينه له الموظف.. او يرميه فيه حظه العاثر.. سألت جليسي عن معنى ذلك .. فأجابني ان: - الصف الاول.. للدبلوماسيين وأصحاب المناصب العليا وديل طوالي تووووووووووش بياخدوا تأشيرة. . والتاني للناس العاديين، والمعتادين يمشوا كتير أو أما عندهم مشكلة في المشي.. - اها والتالت دا حق شنو؟ كان تساؤلي الملهوف.. - التالت دا حق الناس الاوراقهم ما مكتملة عشان ياشروا.. - اها ما تقول لي ديل ما بمشو؟ - غالبا ما بمشوا الا بعد اكتمال اوراقهم ودا بياخد وقت.. غايتو البودوهو بالصف دا .. يطلع عديييييييييييل على الباب.. وأشار إلى الصف التالت. - يا لطيف.. بلعت ريقي بصوت مسموع.. حلقي اتسدَ.. نده الموظف على جليسي .. راح طوووالي وقف في الصف الأول.. بتاع الدبلوماسيين.. بس عيني وقعت ليك في جوازو الأحمر الما بغبى زول.. - الله يغيظك.. برطمت.. ما تقول كدي من قبيل. وطال جلوسي.. بعد قليل.. نادى الموظف على اسمي.. قمت بخطى متثاقلة.. أقدم رجل وااخر رجل.. الخوف دا تاريهو كعب خلاص.. بِفِك الجُبَارة.. على راي حبوبتي الله يرحمها.. تقدمت إلى الموظف الذي فجر في القنبلة.. ناسف، لن نستطيع منحك تأشيرة دخول إلى ملاوي.. - لماذا؟ طوالي نطيت ليهو في حلقو.. - لاننا لم نتلقي دعوة من ميسا (المعهد المنظم للورشة)، كما ان هذا المعهد غير معروف لنا.. - والحل؟ - لازم تخاطبنا إدارة الهجرة بخصوصك قبل أسبوعين من تقدمك بطلب التأشيرة.. - وبعدين..انا ما ماشة مهاجرة انا ماشة مؤتمر او ندوة.. انا صحفية.. - ماهو عشان كدا.. - وبعدين نحن اسفين.. خذي هذا الاتجاه ..واشار الى الصف التالت.. يا وكلي الغافلين.. دا نهار شنو دا.. بعد الجري الجريتو دا والجقلبة الجقلبتها دي وتقول لي بكل برود انجليزي سوري وكمان معاها ارشادي الى نفس الطريق القالو لي صاحبي قبيل .. شفتي الطريق دا من هنا وطوالي الشارع او بيتكم.. النار ولعت في من راسي لكرعي.. وقررت عدم رفع الراية البيضاء .. بس كيف الدبارة.. كيف الشورة..؟ لازم القي حل ولازم اسافر.. ويا ملاوي يا ني الجاياك..ويا جوهانسبيرج عليك امان الله ياني المقضية فيك تلاتة يوم.. بس كيف والباب قد تتربس بالضبة والمفتاح.. ما انا خلاص دستوري سفر وخيطي بقي طيارة.. استدعيت كل بلاغة جدتي مدينة بت الضوء في تلك اللحظة.. اردت ان استمد منها قوة.. واسلم امري لله مع عدم التسليم ابدا.. وانتظار حل المشكلة.. الطايرات بطيرن والصقور بارياهن وإن راكات بِرِكَن حِلْقا (طالما) الجُبارة معاهن. قررت العودة صبيحة اليوم التالي او الذي يليه الى هذه السفارة مرة اخرى.. بس لازم اتكتك الامور اولا.. يتبع..STAY TUNED
04-25-2008, 07:35 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
منتظرين يا حليمة والمصارين مقطعات من الضحك في دراما الذات الباحثة عن سفر ولو بالزندية ومافي لينا باب ثالث سنذهب اليه لحين اكتمال الاجرات بل جالسسسسسسسين القرفصاء في انتظار دراما السفر التي شعللت وجابت ليها انجليز وخواجات ووورق ناقص واماااني ما وقعت زولة
سريع النبي تكتكي الامور وراجينك
04-25-2008, 10:10 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ذهبت صباح اليوم التالي الى المكتب لاستكشف من زملائي عما اذا كانوا يعرفون شخصية نافذة للتاشيرة الى ملاوي.. اقترح علي بعضهم ان اعمل تاشيرة الخروج، ثم الحجز وبعدها اذهب اليهم مرة اخرى وبمعيتي كل هذه الاشياء.. تذكرت فجاة اننى اعرف احدى الضابطات في الداخلية، فقررت الذهاب اليها لاستشارتها في السفر. سالت عنها في الوزارة فقيل لي انها في قسم الكلاب البوليسية ببري.. على طول اخدت تاكسي وفُريرة على بري.. وجدتها تزين ذلك المكان بباكيها ( المتوحش) وكانت برتبة عقيد انذاك حكيت لها كل ما يحيط بالسفر.. فقالت بالحرف الواحد .. شوفي يا حليمة من غير تاشيرة دخول لملاوي اوعي تجازفي تسافري.. ح تتبهدلي بهدلة شديدة، ويجوز من الاجواء يجيبوك راجعة.. تظاهرت بالاقتناع وشكرتها.. وعلى طول على مكتب الخطوط الكينية بالخرطوم.. لم تكن التذكرة قد وصلت.. ذهبت مباشرة الى السفارة الكينية لعمل تاشيرة الدخول الي كينيا.. على امل ان اتمكن من هناك من طلب التاشيرة من الملاويين.. اخواننا الافارقة ديل مرات كتيرة يغيظوك.. لانهم زينا بالضبط.. الما متاكدين منو، يفتون فيه كانهم ملكوا كل نواصيه.. المهم رجعت قفاي يقمر عيش.. ليش ؟ برضهم قالوا انت ماشة عابرة لذا لا تحتاجين الى تاشيرة دخول الي كينيا.. - يا جماعة الخير الله يهديكم.. موش يجوز الطيارة تتاخر، او الجماعة هناك يقولوا لي ليه انا ما عندي تاشيرة.. - غايتو سدوا دي بطينة ودي بعجينة.. وحلفوا ما يسمعوني.. كنت اخلي الشباك دا وامشي والف واجي للشباك التاني او نفس الشباك داك بالذات لو شفت لي موظف مد راسو ساكت.. بب اخت جوازي الاخدر الكريه دا في وشه.. وطوالي كانهم متفقين نفس الاجابة.. قطيعة تقطع السفر وايامو.. جيت راجعة بتاكسي وطوالي على الداخلية..عشان تاشيرة الخروج الى كينيا وجوهانسبيرج وملاوي.. اول ما قدمت الجواز .. طوالي الضابط بدل ما يسألني عن بقية الاوراق او ولا يسألني حتى ماشة اسوي شنو.. قام سالني سؤال اصلي ما كنت متوقعاهو.. - وين موافقة ولي امرك.. -ولي امري منو؟ سألت بكل بلادة.. - ولي امرك منو كيف يعني.. ما عندك ابو؟ - لا عندي .. بس عشان يسوي شنو؟ يوافق على السفر؟ ما هو عملها قبل كدا ووافق على سفري انا لسع شوكة واضان فار.. طبعا انا ناسية الجواز الجديد.. قلب الجواز بين ايديهو.. وعاين لي كدا.. وكمان بدل فاقد.!.. طبعا الجواز الجديد ما فيهو اي نقل بيانات.. جديد لنج.. شكلا ومحتوى.. جواز (املط).. حالق كل بياناتو.. وقاعد لي (أدروج).. -لا لا؟ ما في سفر الا بموافقة ولي الامر.. ولا اقولك كان ما جاء ابوكي ووقف قدامنا هنا وقال موافق على سفرك، مافيش سفر.. - طيب نفرض ابوي دا ما في.. مسافر.. ولا ميت اجيبو من وين؟ - في الحالة دي جيبي لينا ولي امرك..بنقبلو - طيب انا من الاقاليم واهلي بعاد جدا.. وولي امري هنا اخو زوجي.. - زوجك مالو؟ -زوجك مافي .. مسافر.. - وين؟ - في السعودية.. واوشكت ان اعلق..جنس فضول غايتو يا اخواني.. الا اننى احجمت. - خلاص جيبيهو يمضي هنا قدامنا انو موافق على سفرك، بنعمل ليك التاشيرة.. غير كدا ما في طريقة. ونادي على الشخص البعدي.. عرفت اني لازم اتخارج وامشي اشوف حماي لعل وعسى يكون موجود في المكتب.. - طبعا حماي دا حُتالة امه وابوهو واصغر منى.. علما بان حماي ترتيبه رقم 7 وزوجي ترتيبه رقم 3.. بس شن اسوي .. لازم اجيب حماي الاصغر منى عشان يكفلني.. طوالي جري على سوق الاوراق المالية بالخرطوم، حيث كان يعمل حماي انذاك.. والحمد لله وجدته.. طيلة السكة وانا احفظ فيهو في الكلام المفروض يقولوا.. عشان الضابط دا ما يطلع ليهو في راسو يقوم يتاكد من روايتينا. لحقت التاشيرة بتاعت تلاتة.. واقسم حماي على انه ولي امري في غياب شقيقه وانه موافق على سفري ولا مانع لديه من ان اسافر.. دارت بي الارض.. معقول يا اخوانا..دا زمان ما في اي زول سالني قال لي ماشة تسوي شنو في فرنسا.. والله ضربتي جنس زهجة. .انا كبيرة كدا، وشغالة وسافرت قبل كدا قعدت سنة كاملة في فرنسا، اجي هسع دي مسافرة اسبوع واحد وبعد ما بقيت زوجة وام ، مطلوب موافقة ولي امري عشان اسافر.. انشاء الله كمان ما فيها تفتيش حريمي..!!
هلا يا احمد وحليمة قطعت لينا الفشافيش بتاعتنا بالحكاية بتاعتها المسبكة دي وفيها ملكة سرد وشحنات مرح قادرة علي اضحاك بلد كامل... وخلينا بالله قريب نشوف حكاية السفر بتاع ملاوي ده...
04-27-2008, 01:46 PM
حليمة محمد عبد الرحمن حليمة محمد عبد الرحمن
تاريخ التسجيل: 11-02-2006
مجموع المشاركات: 4052
خلاص استلمت الجواز مؤشر... خروج..بقت التذكرة وتاشيرة الدخول الى ملاوي. ذهبت ذات باكر صباح اليوم التالي الى العمل.. بتاع السنترال ناداني.. - اسمعي امبارح لما كنتى مافي، زوجك ضرب تلفون.. - خير.. - قال هسع هو ماشي على جدة عشان جايي بالباخرة.. - جايي.. ؟؟ وين؟؟ صرخت باعلى صوتي.. - هي يا زولة ها قولي بسم الله .. ما في عوجة جايي يقضي اجازتو السنوية.. - ووب على دا وكتو.. كنت في غمرة الجري نسيت ان زوجي قال لي عندي ليك مفاجاة كبيرة.. ولم ادري ان هذه المفاجاة ستكون فعلا مفاجاة.. والحل .. خلاص ناس بيتنا ح يلقو ليهم سبب عشان يقولوا لي انت ماشة وين مخلية راجلك الجايي دا وولدك الرضيع.. في الاول كانوا ساكتين بس هسع عندهم الف سبب.. بعدين الراجل دا ما لقي ليهو مواعيد يجي فيها احسن من دي.. رجعت الى موظف السنترال.. - اسمع سمح قال بيصل متين.. - قال بالكتير تلاتة يوم بيصل .. - يعني اذا كان الليلة الاتنين، غالبا يصل الخميس او الجمعة.. طيب انا مفروض اسافر بالجمعة اقصى حاجة.. - آآآه.. قلتي شنو؟ - لا ما قلت شئ.. قلت مفروض اسافر اهلي واجي راجعة كمان اسافر امدرمان يوم الجمعة.. - ذكرتيني هو كمان بيقولك.. ممكن تشوفي لينا بيت مؤقت، تاجريهو في الجبل نقضي الاجازة فيهو.. - لا الله الا الله محمد رسول الله.. اللهم طولك يا روح.. - انتى الليلة زهجانة من الصباح مالك؟ ما من عوايدك تصري وشك من الصباح. - ما في شئ.. هسع وشئ مصرور.. خلاص.. امشي اجيب لي مشابك اشد كل كضم بالجنبة عشان يبين اشدوا بالمشابك وارجعو زي زمان.. - ما بعرف لكن غايتو الليلة ما براك.. - كان ذلك في اكتوبر 1996. ما فيش جوالات.. وبالتالي وسائل الاتصالات الفعالة جد قليلة.. طريقة نخلي الراجل دا ياجل سفروا (ماكو).. مافي .. انا كمان أأجل السفر دي ما بتحصل..هو وينو ذاااتو السفر، على راي امي هو بليلة وعيشها في ا لشرق.. كناية عن الاستحالة..D : :shy ذهبت الى المكتب اضرب اخماس باسداس.. ركبتنى حالة زهج بطالة خلاص.. واي زول يسألني ارد بان (ما في شئ).. معقول اقول ليهم السفر يمكن يطرشق.. وانا سيرة السفر دي العارفنها ناس قُلال.. قررت ان اواصل في اجراءات السفر.. خرجت صوب الخطوط الكينية..لم تكن التذكرة قد وصلت.. ذهبت الى مكتب بروفيسور مغربي وارسل فاكسا من الى معهد ميسا، اعلمهم فيه بان السفارة البريطانية رفضت اعطائي تاشيرة دخول واننى – في انتظار التاشيرة، ساواصل في اجراءات السفر كالمعتاد.. بعدها عدت الى المكتب ثم اخذت البص عائدة الى منزلي عند الساعة الثالثة.. الخمسة والاربعين كيلو دي بقت لي طويلة بشكل عجيب.. طيلة الرحلة وانا صامتة خلافا للعادة.. هل ابطل السفر ولا اسافر.. وانا المطلوب مني توفير منزل الزوجية خلال اربعة ايام.. وصلت الى المنزل و بعد استراحة قصيرة وارضاع طفلي فكيت في ناس بيتنا الخبر.. يا اخوانا ابو خالد قال جايي بعد يومين.. - هااااااااااا.. النبي عليك.. مليح لك وجيدلك.. ان جابلك الخبر.. - التلفون دا بخلي شيتن ما بجيبو.. في تلك اللحظة دخلت واحدة قريبتي .. اعوذ بالله لسانها زي الفَلَقة وروحها روح كلب في الغلاط والمحاججة وكل شئ داقة صدرها ليهو.. نحن بتحت تحت مسمينها لزامة التقيلة، قرقاب الصلب...تهكماَ من شوبرتها.. - شن عندكن بتملحن لبعضكن(أي بتقولن مليح).. - حليمة ابو اولادها جايي بعد يومين بس.. - تلاتة يوم يا اخوانا طوالي قرمتو منهن يوم..!! - اها خلاص ركي في وطات الله دي.. وخلي النولع ليك الحفرة.. واتجيهي واتنظمي من البشتنة العليك دي.. دي قريبتي صاحبة التعليق دا.. بس انا قررت اقطعو ليها جاف.. وافتعل لي سبب للمناكفة.. - هسع دي القال ليكن انا مبشتنة منو.. مخاطبة امي وقريبتي.. - كيفن ماك مبشتنة.. هي البشتنة دي بتدورلها ضوء..راسك حفان (غير مدهن) وكراعك غبشا.. اتي المرة بعرسوها ليشنو..؟؟ مو عشان تَتْنَسَوَن..انتى مقارقة قبال العرس وبعدو يا كافي البلا وحايد المحن..!! - عشان تدخن في الصيف وتتحنن في الشتا.. انا ما من الصنف دا.. راجلي ذاتو الحمد لله ما بتاع الحاجات دي.. بعدين انتن موش بتقولن كل دهر بسوقوهو عيالو.. خلاص انا زمنى غير زمنكن.. - اسمعي يا اختى.. بتك وكتين الله خلق العقول... ما اداها منو الحبة.. وفي محل العقول ما اتمردغت.. دحين اسمعي.. انضمي مع بتك خليها تخت عقلها فرق شطورها.. وتبطل الطلاشة والطقاشة البتسوي فيها دي.. ان بقيتن ما عندك كركار، انا بديك كركار للدخان.. وسوي ليها خمرة الزيت.. قوام.. قَوّام بتقضي.. وشوفي ليها مشاهيد (اغراض نسائية) لميها على النسوان.. هسع يا بت الله بسعلك الراجل دا كان جا شافك بخلقتك دي .. مابقول انا معرس ود عمي عديييل.. عاينن ليها بتعاين لي كيفن.. قهرتك بالحفر البحر وجاب المطر.. يبدو ان الغضب قد اخرجني عن طوري، واننى كنت انظر اليها بكل حدة، وان ما لم تقله شفتاي قد افصحت عنه عيناي.. تمتمت في سري.. البعرفونا انشاء الله ما يحضرونا.. بس حلفت ووقفت ليهن الف احمر.. انو ما في شئ من البقولن عليهو دا ماشي يحصل.. - يا خالة كل دهر بسوقوهو رجالو.. ودا دهرنا نحن.. كل زمن بناسو..وبعوايدو وبتقاليدو.. غير ان قريبتى سدت دي بطينة ودي بعجينة وواصلت في نفخها في امي ومحاولة قلبها ضدي.. و امي، تسمع وتهز في راسها.. - نسويلها شنو.. ابت ما تسمع الكلام.. عليك امان الله .. انا كل يوم انضم معاها كان تتجيه وتلم على النسوان.. التقول بنضم لي مع حيطة.. كلامي يدخل بهنا ويمرق بهنا.. (مشيرة الى اذنيها)، عيلا ليها يوم.. يوم تفارق الشباب دا .. بقع ليها كلامي دا.. وبقول يا حليل امي الكانت دايرة جيهتي ومنجهتى.. - يا سيدي الشيخ احمد الطيب .. يا اليبست الجنية على الحوية..اركب عِرِي واضرب سِرِي (اي اركب حصانك دون ان تضع عليه سرجه، كناية عن سرعة الاستجابة)انتى بتك دي مهبوشة ولا شنو"؟؟ ولا انتى المخلياها علي كيف، وطالقاها.. انتى بتك دي يوم عقدها ما جابوها من الشغل، وصباحية العقد وكتين الناس جو يباركوا ليها لقوها كمان فت مرقت شالت شغلها ويوم العرس نسيتي السوتو..مودنها الكوفير.. كل ما تلاقي ليها مرة تشيل وتعزم فيها للعرس.. مسوية روحها مداعي.. تعزم في الناس هي .. مخالفة للقدرها والقدامها والاصغر منها..
اللهم طولك يا روح.. انا مفروض اسافر يوم الجمعة، يعني بعد اربعة ايام.. والراجل.. جايي في نفس الفترة.. الامور دي مالها متطينة في جميع الاتجاهات.. يا ربي امشي ولا اقعد.. اقعد ولا امشي.. وكان قررت امشي اجيب حق التذكرة من وين..؟ امشي ولا اقعد.. كان السؤال الخلا راسي يسوي زنننننننننننننننننننن
: D : --------------- تخريمة جانبية: كيكي يا خي شكرا على خاتمي.. عارف سمعتها يوم السبت عشان السماعات في البيت لاغينها.. عجبتني شديد .. يعجبك السمح.. واصبر عليى خلاص القصة قربت تخلص.. حلقتين بس.. وبجيب خبرها.. اعمل شنو.. نازل تشجع في لما فتحت شهية السرد على الاخر.. يا ابن يوسف.. عساك بالف خير ودم بالف خير يا رجل يا رائع.. سيكون بيننا تواصل كبير.. النبي فيك كان تنقطع.. والقطيعة تقعدلك فوق الدرب وتسوي ليك نبيح الكلب .. كان ما جيت تاني.. يا اخواني الغدا راجيني والراجل على وصول وامتحانات الوليدات.. شغااااااااالة وراجياني المذاكرة.. قربوا اضنيكم جاي.. قد احتاج ليكم في حجازة.. الراجل بوردابي، ويمكن يقرأ الكلام دا.. فزعكم يا ابواتي انجدوني..
04-27-2008, 02:15 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: كيكي يا خي شكرا على خاتمي.. عارف سمعتها يوم السبت عشان السماعات في البيت لاغينها.. عجبتني شديد .. يعجبك السمح.. واصبر عليى خلاص القصة قربت تخلص.. حلقتين بس.. وبجيب خبرها.. اعمل شنو.. نازل تشجع في لما فتحت شهية السرد على الاخر..
هلا حليمة تصدقي بالله... التسمير في تفاصيل البوست ده تسميرة من نوع عجيب والقصة ملانة دراما ولو لقت ليها مخرج حريف يطلع منها فيلم تاريخي (سفرة ملاوي ما بين المطرقة والسندان) والاجمل فيها هو التشويق ونهاية الحلقات يعني بتخلينا مقهين في حتة كده وبتمشي ويييييييين الله اعلم في انتظارك جالسين القرفصاء والراجل ذااتو حسع تلقيهو اخر متعة وتقهي في (هاي الدراما السردية)
طبعا قريبتكم بتاعة النقة دي اجمل شخصية من الشخوص وعاجباني نقتها شديد وطمعت فيها كشخصية ممكن الزول يكتب عنها ذات يوم لتقاطعها مع كثيرات علي هذه الشاكلة
واصلييييييي وانا لناطرون
04-28-2008, 12:38 PM
حليمة محمد عبد الرحمن حليمة محمد عبد الرحمن
تاريخ التسجيل: 11-02-2006
مجموع المشاركات: 4052
خلاص خلينا قصة السفر وبقينا في قصة البحث عن بيت.. استنفرت كل الناس البعرفهم يفتشوا لي بيت في نواحي أهلي عشان ما اعدم الزول البمسك لي طفلي الرضيع لما امشي الشغل... ولما كان الوقت ضيقا فقد، كان خلقي ضيقا أيضا، بقي أهلي يتندروا بحالتي وأطلقوا على لقب (رازة ونطّاحة)، أي بمعنى ضعيفة وطبعها شين.. اتلمت الشغلانيات كلها على بعضها، سفر مجهجه، زوج على وشك وصول، مقر زوجية مافي والمفروض الاقيهو في خلال تلاتة يوم بالكثير.. كأنما البيوت على قفا من يشيل.. انتهي اليوم الأول دون فائدة.. ذهبت صباح اليوم التاني إلى الخرطوم.. كم مشوار .. احتاجت كم تاكسي.. خلاص المصاريف (ضنبها رقَّا).. طوالي بدون تردد على مجمع الدهب بالسوق العربي..كان حظي من الدهب مثل حظي من تأشيرة الخروج، عدا دبلة صغيرة تزين إصبعي الأوسط في يدي الشمال.. رمقني صاحب المحل بتكاسل، يبدو انه قيم نوعي ليس من النوع الذي يشتري وبالتالي لا يمكن إن يبيع.. نوع كدا (املط).. المهم دخلت دون أي تردد.. - ايوة يا حاجة.. تشتري؟ غاظتني الكلمة..تذكرت جارتنا التي كانت تكره هذا اللقب وتفلسف كرهها له بطريقتها البسيطة.. يعني الحج دا ما زي الصلاة.. هسع الزول البصلي بيقوموا بنادوهو باللقب دا.. تعال يا الصلاي.. امشي يا الصلاة.. ويشتموهو بيهو كمان.. المهم بلعت كلمة حاجة، ونفيت عن نفسي تهمة الشراء وقلت أبيع.. نظرت الرجل إلي بنظرة لم تخلُ من الاستنكار، الذي سرعان ما خمد، خاصة بعد أن فطن إلى حقيبتي الضخمة، والتي لم تكن تحوي سوي الورقة والأقلام وجزمه المشاوير المجيهة..ويبدو انه كان متوقعا أن أقوم بفتح حقيبتي الضخمة وإخراج ما أود بيعه من بني صفار.. غير اننى واصلت في (لداحتى) وسؤالي.. - اسمع الجرام بكم؟ - الجرام بكذا.. وذكر الرقم.. وبدلا من أن افتح شنطتى ، أمسكت بيدي الشمال، وكف، نتلت منها الدبلة بسرعة وناولتها له.. - شوف دي بتجيب كم؟ وزن الرجل الدبلة طلعت اتنين جرام وكذا حبة.. - كم تدفع..؟ كان تساؤلي الملهوف.. - ستين ألف دينار.. - جيب.. ناولتي المبلغ، أخذته، وذهبت إلى الخطوط الكينية..جاءني الرد بان التذكرة لم تصل بعد..فذهبت إلى المكتب.
هناك جلست أتجاذب أطراف الصاخبة، زميلي أمريكي مسلم من أصول افريقية، يعمل مصححا للمجلة والصحيفة.. محمود كان من القلائل الذين يتابعون مشواري المكوكي للسفر.. وكان دائما، يطلق ضحكته الصاخبة ، حينما اخبره بالتفاصيل، ويعلق قائلا.. - YOU ARE CRAZY HALIMA...
- وقال وريني الصيغة الكتبتيها ليهم في الفاكس.. أريته الفاكس .. راح مشرطه وراميهو في الزبالة.. وساقني قعدني في الكومبيوتر.. وقال لي الآن اكتبي ما أمليه عليك.. وبدأت أطقطق في الكيبيورد.. عزيزي فلان.. صرخ.. ما تكتبي عزيزي.. - سمح اكتب شنو؟ موش الرسالة لازم تبدأ بتعزيز الزول ولو ما كان عزيز؟ - نو..اكتبي بقوة.. سلمي.. بس ما تجاملي.. - نو شنو؟ ييس اور نو؟ - اكتبي بس وبلاش مناكفة معاك.. وبدأت اكتب كما املاني.. رغما عن رفض السفارة البريطانية إعطائي تأشيرة دخول.. أنا قادمة الجمعة القادم على متن الخطوط الكينية.. أرجو تجهيز التأشيرة وجعلها في متناول يدي حين وصولي إلى مطار العاصمة الملاوية لَلَنغواي وإخطاري بذلك فوراَ، وقبل تحركي من الخرطوم.. اكرر .. إخطاري فورا و قبل تحركي.. حليمة
وبديت اجقلب.. يا محمود ياخي الخطاب دا لهجتو حادة وخليني ألطف اللهجة شوية شويتين.. وبعدين أنا لهسع ما استلمت التذكرة..ووووووووو - شوفي حليمة، ما تغيري ولا كلمة في الفاكس دا.. واوعك تتكلمي بأدب في الظروف الزي دي..لازم تتكلمي بقوة.. انتى ح تخسري شنو؟ هل بتخسري حاجة؟؟ - ابداَ.. ولا شيئ .. كان ردي، وأضفت محدثة نفسي (العارف سعيدة في سوق الروب منو؟).. - لكن اسمع يا محمود أنا ما بقدر أرسل الكلام دا إلا تجي التذكرة، عشان كدا اخليهو لغاية الخميس.. - اسمعي الخميس قد يكون متأخر جدا.. أحسن ترسليهو على اقل تقدير، بكرة الصبح.. ودعته وصوبت نحو الجبل.. في البص، جلست بالقرب من احدي السيدات كبار السن..وكانت تقطن ليس بعيدا عنا.. وبدأنا نتجاذب أطراف الحديث.. سألتها عما إذا كانت عندها فكرة عن أي بيت فاضي إلى جانب منزلها. وشرحت لها اننى بصدد تأجير منزل مؤقت لمدة ثلاثة أشهر.. - ما عندي فكرة .. لكن انتى البيوت ما غالية الأيام دي.. بتاجري البيت بكم؟ - ما عندي فكرة.. اسمعي إن لقيت ليت بيت صغيروني بتاجري الشهر بتلاتين ألف؟ - طوالي .. - سمح أنا عندي صالون وعوضة (اودة) وحمام وحوش.. كان دايراهن باجرهن ليك .. عيلا بعد شهرين ولدي بعرس ، بمرقك منهن.. - طوالي بمرق ليك يا حاجة .. كدي هسع قعدني الشهرين الاوايل ديل وبعدين الله كريم.. لم اصدق أذني.. خلاص الصالون نقسمه النص بستارة والغرفة نحولها إلى مطبخ.. كفاية.. طوالي شلت تمن الدبلة الستين ألف بتاعت قبيييل كان متذكرنها وسلمتها لها.. وبقيت على البيت.. الحمد لله سدينا خانة بتاعت قلق .. فضل السفر ومشاكل.. التذكرة..هل ح تجي في مواعيدها.. ولا لا؟
هذا ما سنعرفه غداَ..
يتبع ..
STAY TUNED
04-28-2008, 04:39 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: عندي برنامج زي ده بس ربك ستر يا حبا بجيك راجع ..... بكرة لو في العمر باقي
هلا يا كع وحبابك شديد والله في ساحة حكاوي الباسبورتات التي ذهبت مع الريح جوازي طلع وعبر واذ بحليمة ايضا تمارس فنون السرد في اعلي درجاتها وتشوقنا الحكي ذاتو ثم الان سنجلس القرفصاء في انتظارك حتي تورينا (ايش صار في امرك) ووانا لناطرون
من امس واناشغال في الارشيف زي الهوفر عشان اقرأ كتابات كيكي وأشوف الزول الكارثة دا يكتب كيف .. فعلا لقد فاتنى المولد كمبو الري .. علوية عفش ولا اسمهاشنو ما عارف
عبدالكريم..عليك الله خلى التواضع..انت مشروع كاتب متمكن..زول يعرف كيف يلوي الكلمةعشان يطلع منها احساس قبل المعني دى نعمة من ربنا ماتضيعها .....
حليمـة وانا امشي وين طبعاالواحد لمن يعرف الانسان الاخر معرفة شخصية دا بيدى الحكاية بعد تانى والله متخيل حالك كيف والحمد لله الواحد ما لاقاك الايام ديك ...
امبارح كويت الهدوم.. وجبت كرتونة صابون الفيل فاضية ختيت فيها جرايد قديمة علي جوانبها.. دجاجة محمرة..بيض مسلوق..علبة مربي..رغيف..طحنية..جبنة..طعمية..ليمونة مقطوعة وشطة وملح الكرتونة قاعدة جنب الباب غايتو لو الله طلق ادوني خاطركم.. ولو جيت راجع ولقيت البوست دا قاعد لسع حا اكتب ليكم عن قصة جوازي السوداني وسجن مطار هافانا والخواجة المجنون الانا ما عارف انه فعلا مجنون ... والله يبدو انه تعليم اللغة الصينية اسهل من كتابة اللغة العربية بالماوس
04-29-2008, 01:27 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: من امس واناشغال في الارشيف زي الهوفر عشان اقرأ كتابات كيكي وأشوف الزول الكارثة دا يكتب كيف .. فعلا لقد فاتنى المولد كمبو الري .. علوية عفش ولا اسمهاشنو ما عارف
عبدالكريم..عليك الله خلى التواضع..انت مشروع كاتب متمكن..زول يعرف كيف يلوي الكلمةعشان يطلع منها احساس قبل المعني دى نعمة من ربنا ماتضيعها
هلا احمد والف مرحب والله في حكاوي الزنقة والجوا زالمنقة ووصفت الحكاية وصف سجعي خطير... وفخور جدا ومبسوط والله كونك طالعت كتاباتي في هذا المكان .. وتقول شنو غايتو مع النرجسيةبتاعت ام نخيل دي ويانا قاعدين نتونس هنا مع الاخوان والاخوات واتمني يا احمد ان اكتب دوما ذو بال ومفيد لهذا المكان .
والليلة حليمة اووف وحنقعد نتظر قدومها بشفقة حتي نري الامر في الجواز والسفر وما بينها من تداعيات تقطع المصارين من الضحك والتامل(حليمة حكايييييييية ياخي وقلت ليها انتي شيختي قعدت تخرخر ) كل الود والف شكر علي كلامك المشجع وبرفع الراس والله
ذهبت صباح اليوم الثاني إلى المكتب لتسجيل الحضور المعتاد، ثم يممت شطر الخطوط الكينية التي علمت منها ان التذكرة لم تصل بعد واننى يجب ان أخاطبهم بعد منتصف النهار.. ذهبت سريعا إلى الجمعية السودانية لحماية البيئة وأخذت خطابا منهم يوضح اننى عضوة بالجمعية مكلفة بالسفر إلى ملاوي لحضور السمنار الخاص بالإعلام الجماهيري، ثم ذهبت إلى مكتب البروف بشارع الجامعة وارسلت منه الفاكس الذي كنت قد اعدده يوم أمس.. فاخبرني بروفيسور عاصم، الذي يبدو انه قد ثمن المجهود الذي بذلته، بأنه سيحضر يوم الجمعة في المساء ويفتح المكتب ويتأكد عما إذا وصل الفاكس أم لا.. فشكرته وخرجت. عدت إلى الخطوط الكينية وعلمت بوصول التذكرة، فأخذتها وعلمت إن الإقلاع بعد منتصف ليلة الجمعة وان الوصول إلى مطار نيروبي سيكون صباح السبت.. ولدهشتي الشديدة كانت التذكرة الخرطوم نيروبي – جوهانسبرج والعكس.. - طيب وين تذكرة ملاوي.. امشي كيف يا ناس من غير تذكرة؟ - التذكرة تاخديها في مطار جوهانسبرج حيث يفترض أن تمضي الليلة في فندق المطار.. - مؤكد باخد التذكرة هناك..؟ - طبعا مؤكد.. نحن مهمتنا انتهت هنا .. لكن أول ما تصلي روحي الخطوط الملاوية عشان تاخذي تذكرة على الخطوط الافريقية، إلى العاصمة للنغواي، ومن هناك ستعرفين وجهتك إلى كلب ما كا كولا.. كان ذلك يوم الخميس، ولم يتبق سوى يوم واحد للسفر إلى ملاوي.. منتصف النهار ذهبت إلى المكتب، فاخبروني بان زوجي اتصل وقال انه وصل إلى امدرمان، وانه سيقضي النهار مع أهله وسيحضر في المساء، فاحترت هل اذهب إليه لتحيته أم اسبقه إلى المنزل، واخترت الخيار الأخير.. ذهبت إلى الجبل واستنفرت كل عشيرتي، رحلت العفش البسيط وفرشت البيت، وعند السابعة مساء وصل زوجي.. صباح اليوم التالي، كان الجمعة، مضى النهار بطيئا وأنا استقبل رتل المهنئات بحضور زوجي.. بس بالي كان غااااادي.. وبدأت اسلم بعدم جدوى السفر.. عند الخامسة مساء قررت الاتصال به.. وجدت لدهشتي الشديدة، أن الرجل كان قد قطع مشوار الرحلة التي كان يقوم بها مع أسرته وحضر إلى المكتب كما وعدني.. ولفرحتي الشديدة، فقد اخبرني بان الفاكس وصل وأنهم يخبرونني بان التأشيرة ستكون جاهزة في مطار ملاوي.. وأضاف ضاحكاَـ بالله لهجتك من شدة ما كانت قوية، المرة لما أتخلعت(يقصد المرأة المسئولة عن تنظيم السفر) وردت ليك في نفس الفاكس وبخط اليد كمان.. تعالي المساء في منزل جمال محمد احمد بالعمارات عشان تستلمي الفاكس وأنت في طريقك إلى المطار. تدفقت في الحياة، وابتسمت للمرة الأولي منذ أربعة أيام.. أخيرا ح أسافر.. يا سفر جاك بلا.. جريت بسرعة فتحت الشنط، طلعت تلاتة اسكيرتات وتلاتة طرح وخمسة بلوزات..حقاتي ما حقاتي.. مافارقة معاي.. بجي راجعة بغسلهم وأرجعهم لأهلهم..بَبْ. رميتهم في أول شنطة لاقتني.. جهزت شاي المغرب وطلبت من احد إخوتي إحضار بوكسي ليقلني إلى امدرمان.. وأرضعت ابني الرضعة الأخيرة.. وسلمته إلى والدتي مفطوما..وصراخه في أذني.. اخدنا البوكسي إلى امدرمان..فوصلنا إلى الموردة حيث نسابتي، قضينا معهم حوالي نصف الساعة ثم ذهبنا إلى أبروف لأخذ عربة حماي الكبير، لان أرقامها خاصة.. في ذلك الحين كان في حظر تجول بطال خلاص...بعد الساعة 11مساء .. زوجي المسكين شمر عن ساعد الجد وبدأ في صيانة العربية.. الحق لله كان هو الوحيد الذي يعلم باننى الصحفية الوحيدة التي تمثل السودان وليس معي زميل أو زميلة، كما ادعيت لامي وأبي ، حينما سألاني.. - الماشي معاك منو؟ براك ولا معاك زول؟ -عيييييييك .. ناس كتار خلاص.. بلاقيهم في المطار.. نسوان ورجال..من صحف كتيرة.. الصحف دي كلها اخدو منها ناس...مسافرين معاي..آآآي مسافرين معاي..وبنزلونا كل ناس براهم النسوان في بيت والرجال في بيت..
- ابقي نجيضة.. وشدي حيلك.. - اكتر من كدي ما بحرف.. انتو ماكن عارفني محمسة ومملولة.. برطمت بمرح.. عند العاشرة والنصف خرجنا من ابوروف واتجهنا صوب العمارات شارع 21.. اوقفتنا كم دورية في الطريق، فكنا نريهم التذكرة والشنطة، والوجهة، فيسمحون لنا بالمرور.. عند الحادية عشرة الا قليلا.. كنا أمام منزل الأستاذ جمال محمد احمد..بعلامته المميزة المعروفة ، كما وصفت لنا.. بدأنا الطرق قليلا.. على استحياء.. ثم تصاعد، حينما لم تكن هناك استجابة.. وجعلت اضرب بقبضتي.. ثم بكلتا قبضتي.. أحس زوجي بالضيق، وبدأ يقول ياخي ما تضربي كدا.. خلاص خليهو كان ما جوكي.. ما معقول تزعجي الشارع كلو.. - اخليهو شنو؟ انت جادي.. وواصلت كوكو.. ولا شغلتي .. سديت دي بطينية ودي بعجينة وبدأت اخبط في الباب .. كو كو ..طاخ.. طاخ.. كو طاخ.. طاخ كو.. يبدو ان الناس كانوا نايمين جو.. خاصة وان الشتا بدأ نَسَّامو.. المهم بعد اكثر من ربع ساعة.. ولع نور الحوش ..وسمعالباب، زول جايي ماشي منزعج.. فتح الباب ، اطل وجه بين النوم واليقظة..وطوالي بعد كلمتين بس.. - انتى حليمة؟ - ايوة.. مد يده وسلمنى الفاكس.. بلا خجلة وقفت اقرأ في محتوياتي والراجل واقف مشحوط قدامي.. وزهجان باين عليهو من طريقتي العجيبة في إيقاظهم من النوم.. جرني زوجي جانبا وقال لي : خلاص ياخي اقري في حتة تانية.. شكرا جزيلا ياخي.. برطمت بصوت منخفض.. أقرا تاني وين؟.. كان طلع ما ياهو .. أقوم تاني اكوكو في الباب؟ كان الفاكس ذاااااتو.. وطوالي على المطار.. يبع..STAY TUNED ---------- اليوم القصة دي ناوية اخلص منها.. بقت زي المسلسلات الكولومبية..
Quote: وأرجعهم لأهلهم..بَبْ. رميتهم في أول شنطة لاقتني
هلا يا حليمة وبركة الجيتي والله... منتظرين يوم امس اووووف ولكن عودا حميدا وسرد زي المطر وطبعا بالجد عاجباني الحركة وتوصيف ايقاع الحاجات الباب كوكو والهدوم اترمن بب وهكذا في الانتظار يا حليمة وكوكو كوكو كوكو حتي تعودين كما عاد الرجل الذي كان (مشحوط)
05-01-2008, 06:18 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
في داخل صالة المغادرة.. طلبت من زوجي الواقف خارجها عدم المغادرة حتى تنجلي اموري.. وقفت امام الضابط الذي قلب جواز سفري بين يديه ثم قال لي:ـ - ما عندك تاشيرة دخول.. في الحين مددت له يدي بالفاكس الذي يوضح بان التاشيرة ستكون بانتظاري في مطار العاصمة الملاوية. لم يكتف بذلك سالني مرة اخرى.. - طيب عندك أي وثيقة تثبت انك ماشة من طرف جهة معينة.. رغم غرابة السؤال.. مددت له يدي بخطاب الجمعية السودانية لحماية البيئة.. قرأه.. قطب جبينه.. عض شفته السفلي، واستغرق هنيهة في تلك التقطيبة التي جعلت قلبي (يخبت) ..دل..دل.دلللللللللل. اخيراَ ختم الجواز.. الحمد لله، رغم الصالة المغلقة والهواء الصناعي الذي يطلقه هدير المكيفات.. احسست ببعض نسائم الصباح وقد هبت على حبيبات عرق خفيفة قد تجمعت على جبهتى.. وجدت صوتي اخيراَ.. وقلت شكراَ.. ثم طلبت منهم الاذن بالخروج الى زوج الذي ادعيت باننى نسيت ان انقل له وصية.. اخبرت زوجي بان الامور سارت على خير.. ودعته وولجت الى صالة المغادرة.. في الصالة اعلن عن تاخر طائرة الخطوط الكينية المغادرة الى الخرطوم لمدة ثلاثة ساعات.. جلست في الصالة التي تشبه الفريزر..ومددت رجلي امامي وضعت حقيبة ملابسي الصغيرة بينهما، ثم اغمضت عيني وضممت حقيبتي الصغيرة الى صدري.. وسبحت في ملكوت الله.
اخيرا اعلن التوجه الى بوابة المغادرة.. ثم ركبنا البص وجلست اخيرا في مقعدي في الطائرة.. في ذلك الزمان كان هناك فريق كرة قدم كيني.. قدر لي ان يكون جاري في المقعد المجاور، احد لعيبة الكرة الكينيين، وكان مصابا بملاريا.. اكتفي بعبارة بتحيتي بعبارة (هاي)، ورمى بجسده المتهالك على المقعد ، واغمض عينيه، مديرا وجهه الى الاتجاه الاخر.. خلاص فقدت اخر فرصة للكلام، وتطريق اللسان على انجليزي اخوانا الكينيين.. اخذت كتابا من حقيبة وجعلت اقرأ.. في ساعات الصباح الباكر اعلن عن وصول الطائرة الى مطار نيروبي.. دلفنا الى الداخل، لاخذ الطائرة المغادرة الى جوهانسبيرج.. مطار كينيا من المطارات التي تديرها النساء.. اغلب العمالة في الداخل نساء.. يا لطيف.. اجلت النظر حولي ورايت احدهم جالسا امام احد الحواسيب وامامه صف قليل من المسافرين.. في الحال توجهت اليه.. حينما حان دوري.. اخذ جواز سفري، قلب صفحاته، ثم اعاد تقليبها.. ورفع راسها يخاطبني: - WHERE IS YOUR ENTRY VISA? - I AM ON TRANSIT.. - I KNOW THAT YOU ARE ON TRANSIT..BUT YOU MUST HAVE AN ENTRY VISA. UNDERSTAND? - LISTEN. I WENT TO YOUR EMBASSY, THERE, IN KHARTOUM, AND I WAS DENIED ENTRY VISA. I WAS TOLD THAT IT WASN’T NECESSARY. MOREOVER, I AM NOT GOING TO A PASS A SINGLE NIGHT HERE - I AM ON TRANSIT.. - BUT THE COMPUTER SAYS YOU MUST HAVE AN ENTRY VISA. عرفت ان الحوار سيكون عقيما مع الراجل دا.. فقررت ان اعلق في عبارة (I AM ON TRANSIT) بس شبكت في العبارة دي .. وقررت التظاهر بعدم معرفة أي عبارة مما يقول.. في تلك اللحظة عينا في الطيارة ياها ديييك بدأت تتحرك.. وخلاص الاعصاب بقت مشدودة بصورة بطالة خلاص.. جاتني واحدة ضابطة تانية تسال، واتز رونغ ويز يو؟ نوثينق.. كان ردي.. المرة وقفت لي دّت..زي شاحوط المطر ، على قول امي .. ودايرة تبراني تاني بالموضوع بتاع تاشيرة الدخول.. بس ربك رب الخير.. قيض لينا واحد رجل (خواجة) متوسط القامة، رقيق (نحيف)، قبل على الضابطة وقال ليها.. اسمعي هنا.. الوقت من ذهب .. انا رجل اعمال، وتاكدي تماماَ، اني لو الطيارة دي فاتتني ح اقاضي ادارة المطار دي.. فاهمة ولا ما فاهمة.. بس في الحالة.. اصيبت الصالة بحالة هرج ومرج.. وتغيرت اللهجة التي كانت تخاطبنا بها الموظفة وباين عليها قررت التخلص من شبح الورطة الماثل امامها.. في الحال بدأت تتكلم.. - PUT YOURSELVES INTO GROUPS.. ACCORDING TO YOUR COUNTRY> واتكلمت مع بعض المسئولين في ادارة المطار.. بس عينا نشوف الطيارة سييييييت وقفت.. بسرعة بسرعة وقفنا في صفوف حسب بلداننا.. للمرة الاولي اكتشفت ان هناك مهندسين سودانيين يعملون في شركة مصنع سكر كنانة، كانو في طريقهم الى استراليا..كانوا معي في نفس الطائرة.. حمدت الله وقلت في سري .. الليلة شفت طير بلدي زي احمد ولدي.. وقفت في الصف.. وطوالي عدل على الطيارة.. ــــــــــــــــــــــــــ
بجيكم صادة.. سريييييييييع..
05-04-2008, 01:19 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
شتان ما بين الطائرة الكينية التي المسافرة من نيروبي الى الخرطوم والعكس، والطائرة الكينية المغادرة الى جنوب افريقيا.. الاولي تشبه بصات الاهالي التابعة للبراري او الحلة الجديدة.. والثانية تشبه على اقل تقدير بصات ابو رجيلة ايام مجدها.. جلست في المقعد الوثير ومددت رجلي امام، وسرحت في التفكير.. تاشيرة الدخول وتذكرة الطائرة من جوهانسبيرج الى ملاوي على الخطوط الافريقية.. الموضوع الاخير هذا لم يكن يخيفني كثيراَ.. فانا ساقضي الليلة في فندق المطار، ثم اغادر صبيحة اليوم التالي الى ملاوي.. كان حماي الكبير الذي يعمل بالخارجية السودانية قد زودني بارقام تلفونات السفارة والسفير واوصاني بشدة ان اذهب الى السفير في حالة واجهتنى أي مشكلة..
لم يكن في جيبي ثم مائتي دولار امريكي.. وصلت الى جوهانسبيرج وعدل على استعلامات المطار، حجزت الغرفة ووضعت حقيبة ملابسي الصغيرة في احد الدواليب ، اخذت دشاَ، ثم ذهبت بحثا عن الخطوط الملاوية. ما في حاجة اسمها مكتب الخطوط الفلانية.. كمية بتاعت مكاتب كتيرة خلاص.. ويافطات متحركة.. حسبما علمت مطار جوهانسيرج الفسيح بامكانه استقبال 30 طائرة في وقت واحد وتكون على مدرجاته نفس الكمية والعهدة على الراوي.. المهم اليافطات المتحركة دي سبب البلا.. قدر ما اتلفت ما شفت يافطة بتاعت أي ملاوي او اير افريك.. سألت الاستعلامات دلوني على تلفون معلق في عمود في النص ومطلوب اطلب رقم معين من تلاتة ارقام.. اتصلت على وطلبت الصعود الى مكتب الخطوط الجوية الملاوية او الافريقية.. - WHAT? YOU CAN’T.. - WHY? - GIVE ME YOUR INFORMATION. - I AM MRS. RAHMAN, FROM SUDAN. - OK. COME TO MORROW - CAN’T I COME NOW - NO, YOU CAN’T - WHY? - SIMPLY YOU CAN’T, WE HAVE NO OFFICE HERE? - WHAT DO YOU MEAN? - I MEAN THAT, COME TOMORROW AT 10 OCLOCK. WE WILL BE DRESSED IN (>>>). YOUR TICKET WILL BE READY . ذكرت زياَ محددا لموظفي الخطوط الجوية الملاوية.. قفلت راجعة وقد ازداد خوفي وقلقي.. لم يكن معي احد من السودان.. كما ان سمعي لم يتعود على طريقة نطق اخوتنا الجنوب افريقيين.. المهم تسعكت في المطار وعدت قافلة الى غرفتي حيث امضيت الليلة في ذلك السرير الوثير الذي غطس وغطس بي ثم قلع.. ثم غطس..ثم غرقت في نوم عميق.. في صبيحة اليوم التالي، استيقظت باكرا وخرجت من الغرفة قبل الموعد المحدد، خوف ان يحسب لي يوم جديد، خاصة وان مصروفاتي ضنبها رقيق خلاص.. تجولت في المطار وجعلت اقرأ في اليافطات المتحركة، عل وعسي تقع عيناي على يافطة الخطوط الملاوية، ولكن دون جدوى.. ما انا اصلي طالعة قبل المواعيد.. المهم عند العاشرة حضر طاقم المكتب الملاوي، استلمت تذكرتي وجعلت اتلفت ذات اليمين وذات اليسار بحثا عن بعض المؤتمرين.. لم اوفق.. تحركنا الى الطائرة التي اخذتنا الى العاصمة.. في داخل صالة الوصول تعرفت بشابة اثيوبية، علمت انها في طريقها الى مدينة كلب ماكَكولا.. فاخبرتها بقصتي وطلبت منها في حال عدم توفيقي في الحصول على تاشيرة الدخول من المطار ان تخبر الجهة المنظمة للمؤتمر بموقفي ، لانني قررت عدم مغادرة المطار.. فوافقت برحابة صدر.. وقفت امام صابط الجوازات الملاوي الذي اخبرته باننى موعودة بالتاشيرة هنا في المطار.. فكان رده: اسف لا توجد تاشيرة.. - في تلك اللحظة وصلت الى قناعة تامة، بان كل شئ باذن الله وان كل ميسر لما خلق له.. لا ادري لما طرقت ذهنى هذه الروحانيات.. لكننى اذكر اننى وقفت امام الضابط بكل هدوء وجوازي في يدي الممدودة اليه.. تلفت الرجل ذات اليمين وذات اليسار.. ثم سألني : ماذا تفعلين في ملاوي؟ هفا الى خاطري في تلك اللحظة عبارة الشابة الاثيوبية: اذا سالوك لماذا اتيت الى ملاوي ، لا تذكري ابدا انك اتيت في مهمة اعلامية.. قولي دائما انك في رحلة عمل.. بس طوالي رددت اننى في رحلة عمل.. بكل بساطة تناول جوازي وختم له بالموافقة على الدخول.. الاثيوبية التي كانت تقف خلفي في الصف، وكانت موعودة مثلي بالتاشيرة، رفض لها الضابط، فانفردت بي جانباَ وكررت على نفس وصيتي التى كررتها عليها سابقاَ: اخبري سلطات المؤتمر بان السلطات الملاوية بانني في انتظار التاشيرة في المطار.. ودعتها واخذت الطائرة المتجهة الى العاصمة الاخرى.. في الطائرة وجدت ان كل المؤتمرين كانوا معي في تلك الطائرة التي هبطت بنا في السهلة الواسعة دون أي مدرج.. وخجتنا ذات اليمين وذات اليسار.. بهذا انتهت رحلتي التي بدأت بالجواز الاخضر وانتهت بسفرتي الى ملاوي.. تبقت حلقة واحدة خاصة بعمائل الجواز بعد ما غيرت المهنة الى ربة منزل.. شكرا لكم على صبركم معي..
ملحوظة: يا جماعة مضروبة نزلة عدوكم.. الحس الفكاهي اختفي.. بعدين أي اخطاء املائية نجي نصححها لاحقا.. هسع اقبلوا القصة كدي.. وراعوا الظروف.. الله يلعن الظروف الجابت المعروف بلا صوف (واحد اصلع).. سعيكم مشكور..(وش ضاحك كبيييييييييير)
05-06-2008, 01:50 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالكريم الامين احمد
حليمة محمد عبد الرحمن
بشير أحمد
Abdel Aati
saif massad ali
Shams eldin Alsanosi
doma
محمد نور أحمد
شكرى سليمان ماطوس
كمبورة
احمد التجانى احمد
صلاح الأحمر
آدم صيام
Dr.Elsadig Abdalla
Mutwali Malik
:shy
عبدالله كع
فيس بوك
تويتر
انستقرام
يوتيوب
بنتيريست