الزهج...الزهج يا عماد...!!!

Quote: الزول ده زهجان خالص طالب : الاجواء الساخنة بتخلينا زهجانين طوالي! زهجاااان...!! هذا ما نطق به الملك شهر يار تعبيراً عن حالة الزهج التي انتابته بسبب طول انتظاره لحضور الملكة شهرزاد.. وقد طال جلوسه تحت ظل «شجرة الزهاجة» وهي شجرة موجودة في حديقة الملك «يعني ما حقت ناس الاذاعة» وقد كان ينتظرها لتروي له احدى حكاياتها التي استطاعت بسببها ان تريح بنات جنسها من ظلم الملك، فقد كان يتزوج يومياً بواحدة ويتخلص منها في اليوم التالي بسبب الزهج. وقد انتهى من تسعمائة تسعة وتسعين بنتاً من بنات حواء، وكانت شهر زاد رقم الف التي جاء بفكرة سرد الحكايات على الملك فكانت سبباً في بقائها على قيدالحياة، لكن ما اظن ده السبب الوحيد لانو لمن ظهرت من بعيد بدأ قلب الملك في الخفقان والظاهر انو وقع لكن بيظهر العكس كلما يشوفها يعمل فيها زهجان ويوحي ليها انو كان حكت حكاية بايخة يومها تمه لكن هو بجوه «ميت فيها موت» وبكده طالت ليالي شهرزاد، الى ما لا نهاية.. يعني الزهج ده من زمن ناس الف ليلة وليلة ولي هسه الواحد يقول ليك زهجان من المرأة وعايش معاها، زهجان من الشغل ومستمر فيه، من البلد وما خلاها، وصابر على الزهج، ده معناه شنو هل السودانيين بيعبروا عن مشاعرهم تجاه الاشياء بطريقة عكسية زي ناس «شهريار» ولا اصلاً زهجانين منها لكن ما في طريقة تغيير؟ محاسن محمد عمر ـ موظفة في ادارة الجامعة قالت لي والله هسع بشكي لي زميلي من الزهج وحقيقة الظروف الاقتصادية في السودان هي البتزيد الزهج، بالاضافة لتقلبات الجو «البتعمل ليك غمة في القلب» ولما يلاقيك زول يسألك انت لسه قاعدة في البلد دي. وفي ناس بيكونوا قاعدين مع نسوانهم مجبورين مثلاً تكون بت خاله وامه تقول ليه ما عافيه منك كان خليتا وبرضو ممكن يكون مفلس ما عندو طريقة عرس تاني والاسباب البتخليك تصبر على المر الامر مِنو. يرى اسماعيل محمد ـ طالب ـ كلمة زهجان دي بقت مصطلح متداول عند السودانيين فالواحد كان هبشتو ساي يقول ليك زهجان، ودائما الزهج بيرتبط باشياء مادية يعني لو الحالة المادية تمام ما في زهج.. وبرضو الواحد عندو مشكلة واحدة في اتجاه معين بيعمم الزهجة دي على كل الاشياء الاخرى. الدكاترة بيروا انو مرض عادي وما منو خطورة ـ محمد الزاكي محمد ـ طبيب امتياز قال امراض الزهج وزكام الضجر وجذام السأم والتهاب الملل دي كلها امراض عادية السودانيون اتعودوا عليها زيها وزي الملاريا، يعني انت بيكون عندك ملاريا وحايم بيها ما ماخد راحتك، عندك فقر دم وعايش.. فبالتالي عادي تكون زهجان من البلد وقاعد فيها زهجان من المرأة وعايش معاها زهجان من الشغل وشغال.. ويؤيده في هذا الرأي عمار طه/ موظف قال زهجان من الاثنين قلنا ليهو الاثنين هم منو قال الحكومة الكبيرة والحكومة الصغيرة «قاصد بيها مرتو» لكن ما في طريقة حل غير الصبر على الزهج فالعين بصيرة والحيلة قليلة. لكن موسى حاج على يخالفه في رأيه فهو دائماً بيكون في حالة زهج من الشغل من المرأة من الاولاد، لكن ما معناها انو عايز يفارقكم لانو الزهج ده مرات كثيرة بيكون لسبب حاجات هم ماليهم دخل فيها. محمد احمد موسى/ واحمد فيصل بيتفقوا على انو حتى لو الواحد زهج من شغلو اكيد ما حايخليه لانو ما وصل ليه بالساهل بعد تعب وواسطات وجهد ولو ما لقى البديل ما حايخليه حتى لو مات من الزهج. محمد الفاتح عبد الله ـ موظف ـ له تفسير مختلف يقول إن «85%» من السودانيين بياكلوا الفول والعدس وده سبب رئيسي بل من اهم الاسباب البتخليهم يصبروا على الزهج والحاجات البتزهج ويتعايشوا معاها بكل بساطة لانو في دراسة اكدت انو الفول والعدس ديل فيهم مادة بتزيد نسبة تحمل الانسان للحاجات البتزهج وبترتفع نسبة التحمل كلما زاد الانسان من تناولها وبالذات فتة الفول، لكن الـ «15%» الباقين ديل مشكلتهم كبيرة لانو معظم اكلهم عبارة عن سمك وفراخ ولحمة ضأن، ودي ما فيها ولو «1%» من هذه المادة عشان كده بتلقى الواحد من الجماعة ديل كان زهج من مرتو يجيب الثانية طوالي وكان زهج من العربية يغيرها وكان زهج من الشغل بيفتح شركة جديدة. محمد حسن النور-ابو سعد - اعمال حرة- قال الواحد مرات من ما يقوم من النوم يصبح زهجان بدون سبب تصحى بزهجة شديدة تطلع للشارع تلقى ما في مواصلات تزهج اكثر تمشي الشغل في البقالة يجيك زبون يقفلها معاك من الصباح. لما ترجع البيت المرة تقفلها معاك وتكمل الناقصة نقة وطلبات واسئلة ما بتكمل لحدي ما الليل يكمل ويطلع النهار لو بيدي كنت غيرت الحال وما كنت زهجت لكن ما عارف لي حل للمشكلة ولو عندكم حل دلوني عليه وفي النهاية برضو زهج في زهج وربنا يهدينا ويهديكم.. علاء الدين محمد عبد الرحيم ـ صحافي ـ بيقول انو الحل للزهج تكثروا من الصلاة على النبي «صلى الله عليه وسلم» ويضيف يسألونك عن الزهج قل مختلفة ألوانه.. زهج طبيعي.. زهجان ديمه.. وده بي اسبابه وعلى رأسها الفلس والراجل الكلس على رأى المثل السوداني المشهور والراجل الكلس دا لو لاقاك من الصباح معناه انت موضوعك «بايظ» وحالتك تغني عن السؤال وتكون «مدبرس» الى حين اشعار بأموال وإن كانت ليست بالكثيفة في طريقها الى ايٍّ من جيوبك الخلفية او الامامية او اي جيب آخر خلاف الجيوب الانفية.. نسأل الله ان يعافينا منها جميعاً.. وبالاضافة للفلس نجد ان هناك اموراً اخرى تسبب الزهج ونكتفي بالراجل الكلس دا يا اخوانا عشان ما نقلِّب على الناس المواجع ونتمنى انو الناس كلها تكون فرحانة. فاطمة حامد أحمد ـ ربة منزل في حاجات كثيرة بتخليني ازهج اولها طلبات الأولاد من الصباح ومشاكل الزوج وملاحظاته الكثيرة في امور ما بتستاهل انه يعلق عليها والطبخ والكنس كل يوم حاجات تجنن لكن برضو صابرين ونتمنى ان ينصلح الحال وما تكون في اشياء تجيب الزهج والنرفزة حتى الجو الساخن والكهرباء لما تقطع «نص النهار» في مطبخ درجة حرارته «50» وتبقى حاجة صعبة خالص. تاج الدين عبد الفضيل ـ طالب قال: ما قاعد يكون زهجان طوالي لكن في ملل عام بحكم الظروف العايشنها الناس وضغوط الحياة والظروف الاقتصادية والجو السخن على العكس من عبد الناصر آدم حسن قال قافلة معاه للنهاية.. واكتفى بهذا وتركناه متمنين ان تفتح معاه برضو للنهاية. ندى محمد حامد ـ مهندسة اتصالات: قالت امريكا ذاتها زهجانة كان لي الزهج خليك مننا نحنا اول حاجة حاربت افغانستان وناس ابن لادن، قامت زهجت قبلت على العراق برضو زهجت جات على السودان بدأت بالجنوب ومن الجنوب مشت على الغرب وبرضو زهجانة منى عبد الرسول ـ ربة منزل: قالت الراجل مما تلقي زهجان تعرفي انو بفكر في المرة الثانية، صحي ما في حاجة بتزهجوا قاعد في بيتو ومع عياله عشان كده احسن حاجة يكون فلسان. قلنا كيف يا خالة الكلام ده. قالت كان بتصدقي يا بتي انا بدعي الليل والنهار الراجل ده ما يمسك في يدو قرش زايد بس الله يديهو قدر البعيشنا انا والوليدات لانو انا عارفه بزهجو الكتير ده كان لقى ليهو حبة قريشات بيجري جري على العرس لكن هسع مصبرو وماسكو عدم القرش. ترى منيرة عبد الباقي ـ طب الزعيم الازهري انو السودانيين تعودوا على الزهج وما بيحاولوا يكسروا الروتين لانه السبب الاساسي في الزهج فتلقى الواحد اذا عايز يودر الزهج يشاهد التلفزيون وهنا تكون الطامة الكبرى فبدل ما كان زهج بقى ارتفاع في الضغط والسكري، لكن اكيد في حلول ثانية فالروتين بتاع الدراسة والعمل ممكن الانسان يغيروا ببرنامج جديد فكرة ـ وجوه جديدة ويطور هواياته يشترك في جمعية نشاط رياضي يطلع رحلات، وغيرها فقد قال النبي صلى الله عليه وسلم «روحوا عن انفسكم ساعة بعد ساعة» فالناس فعلاً بيزهجوا من الروتين لكن بيحاولوا يكسروه ما يبتروه نهائياً. وأخيراً.. الليلة الاولى بعد المائة زهجت شهر زاد من سرد الحكايات.. الليلة الأولى بعد الألف ما زالت شهر زاد تحكي.. وتحكي.. وتحكي. جريدة الصحافة

(عدل بواسطة Faisal Al Zubeir on 02-05-2007, 10:51 AM)