|
|
 حكاية الطاهر السقا...محمد السني دفع الله المدهش حقا..!!
|
بلا مقدمات طلب مني الفنان محمد السني دفع الله ان اكون مساعدا له في عمله الرهيب حقا
حكاية الطاهر ود احمد ودعثمان السقا ود السقا..والتي يوديها السني في اطار مسرح الرجل الواحد
وليته لم يفعل...وفي نفس الاوان شكرا لانه فعل..!!!
الطاهر ود احمد السقا عمل ضخم ومشحون بالجمال والحنية وتتداخل فيه الحوارت بين شخوص
مسحوقة مهمشة حقا...تحلم وتصارع الحياة ويعيشون بكل فرح ومرح من اجل حياة افضل....
وانت تابع النص حتي يجود محمد السني هذا العمل الذي قدم منه ما يقارب ال37 عرضا...تجد
نفسك محلقا ..حالما مندهشا لهذا الرصيد الضخم من وجدان محمد السني الذي قام بتاليف هذا العمل
الرهيب حقا...هذا العمل يجبرك علي البكاء..اجل البكاء..!!!
مركز اصدقاء البيئة بالدوحة صار ومنذ اليوم مكانا محببا ارنو اليه في كل مساء حتي
يمارس السني فينا شنقلة ريكة الوجدان...
ضخم هذا السني في كل اشيائه ولكن الطاهر ود احمد مسرحية ملانة ملانة يا السني...,!!!
|
|
 
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: khaleel)
|
Quote: دوما السني ياخذنا لعوالم ممعنة في الجمال
والطاهر السقا قريب من عبده تامرجرتا
شوقتنا كريم لروية هذا العمل الجميل
لان السني لا يقدم الا جميل
|
فعلا ياخلي كان هنالك عبده تامرجرتا..وكرجول ..وحسن ماكردة..كل الناس ديل موجودين في النص بتاع
السني الرهيب ده...
الجميل في الامر هو الانفعال المسرحي للسني مع الشخوص ..نساء رجال..زول عوير..زول مفتش بتكلم
بسنون مافيشة...السني لوحضرتوا في العمل ده..حتضحك..وحتزعل..حتفرح..حدبرس..حتسرح معاهو
...وحتبكي...!!!
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: معتصم الطاهر)
|
| Quote: و ما زلت اتشوق له .. |
مرحب ياباش مرحب بالريس ومنور المنبر والله...
وان كنت متشوقا فاذن عليك بالتحزم وجيب معاك كرتونةمناديل ورق عشان تقش الدموع...
السني يا باش مسرحي ضخم وكنز حقيقي ولم اراه منفعل مع مسرحه مثل هذا اليوم
كان في قمة حضوره المسرحي الطاغي....
العرض الاقرب سيكون بالامارات...وبعدها سنجبر السني علي شنقلتنا هنا في الدوحة بحكاية الطاهر
ود احمد ود عثمان السقا ود السقا...
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: عبد المنعم سليمان)
|
| Quote: وبالله اجتهد عشان تسحب البساط من تحت اقدام المطرب الصاعد ود رمليه .. |
مرحب منعم وتحياتك للسني ستصل باذن الله مع رياح الدوحة الوريفة المنتشية علي قدوم الاسياد
واما صحبك ودرملية الفنان الصاعد فموضوعو منتهي من زمان ومطقطق من بدري...
اليوم مساء جديد ايضا برفقة الفنان السني وسناتي بجماله المدهش اليكم عبر الطاهر السقا
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: عبدالكريم الامين احمد)
|
اليوم ايضا كان يوما اخر واخيرا في صحبة محمد السني دفع الله في مسرحه المتهيج الدسم
مسرح الرجل الواحد عند السني مدهش وملي بالدراما والشخصوص والحركة..والمتامل للسني عن قرب
يلاحظ انفعاله التام مع شخوص مسرحه...ويستدعي خبرته العالية ومعينه الخطير من الذاكرة الشعبية
للحارة السودانية ..ليعطي للشخصية بعدا لا ينفصل هن الواقع...
الطاهر ود احمد السقا ود السقا نموذج حقيقي للمهمش السوداني المسحوق لفظته كل الاشياء
الموسسة التعليمية التي عاملته باذدراء وتكبر والموسسة السياسية او قل السلطة التي قهرته
وحاولت سلب ارادته..العمدة وتمثل قمة دراما العمدة الحوار الضاج بالحماس والاداء الحركي
مابين حمار السقا والسقا..صامتا هو كان الحمار ولكن السني وعبر السقا استطاع استنطاقه..لنذهب
بعيدا في تلكم الدراما الغنية من مسرح الرجل الواحد لتتداخل شخوص نساء رجال اطفال...
هكذا هو السني..واكثر اهل الدوحة موعودين بعروض ثلاثة علي خشبة مسرح اصدقاء البيئة لمشاهدة
اعظم عمل من اعمل الرجل الواحد في دراما الواقع السوداني ككل...ولنا عودة..
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: محمد سنى دفع الله)
|
شكرا كريما ياعبدالكريم
وحكاية الطاهر ود احمد السقا ود السقا
وقد اشترك فيها يوما هنا فى الدوحة الخالد بفنه مصطفنا ود سيداحمد
وقد اشرت فى مداخلة سابقة فى هذا البوست ولم ادرى اين ذهبت بان هذا النص
تاليف مشترك بين الفنانين عبدالحكيم الطاهر ومحمد السنى دفع الله
لم ادرى اين ذهبت مداخلتى ولم ادرى ايضا لماذا لم يشر محمد السنى فى مداخلاته
فى هذا البوست ان هذا النص مشترك مع عبدالحكيم الطاهر
تنهدات :أعتقد أن الطاهر هو جد عبدالحكيم الطاهر واحمد هو جد محمد السنى ارجو تصويبى
يامحمد السنى او تعتبرنى مصوب لك
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: بدر الدين الأمير)
|
بدر الأمير
التحية والمودة
اسم البطل الطاهر هواسم والد عبد الحكيم
وعبد الحكيم كان من المفترض ان يمثل الدور واعتذر أخر لحظة
جاد على بفكره وارشاداته ولكن لم يكتب بوحي المشاركة
الطاهر احمد نعم اسم والد حكيم وعثمان جدي لأبي
هذه فرصة للشكر لكل من اضاف لي حرفا لهذا العمل
الشكر اجزله للفنلن النعمان حسن الرياضي المطبوع والمسرحي الرائد فهو من رواد المسرح الجامعي
ومعه بدرالدين هاشم زهم من لفتوا انتباهي لحكاية حمار العمدة والفنان المطرب انور عبد الرحمن عقد الجلاد الذي اضاف حكاية يكري الوكيل والتحية لكل من يضيف لهذا العمل
التحية
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: Masoud)
|
استاذي مسعود المسعود ابو السعد
انا لم اكرر وانما العرض يجدد نفسه كل يوم وكل لحظة
واذا شعرت انني اكرر نفسي فسوف اتوقف عن ادائه
العرض الذي قدمته في الشارقة فتح ابواب مهرجان الشارقة المسرحي وايام مهرجان الفجيرة للمونو دراما يعني العمل وجد الناس فيه هم يومي مواكب ولاوجود للتكرار فيه
تعرف ان هناك اعمال تعاد منذ الأف السنوات ولم تمل ولم تكرر
اتمنى ان اصل لهذا الفن
وانا صاحي يا أظرف وهاك
عوينة ام الطاهر جوها اخوان
هناي
سياسية
اغنية الموغاي الأخيرة
عن دارفور
الكتابة مشتركة مع الفنان التشكيلي والروائي
المعز العجيمي
بجانب عرض شتات للفرقة السودانية بالدوحة
مسعود حبي وشوقي لوصولك للدوحة
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: Masoud)
|
الاخ مسعود لك تحياتي..وهذه فرصة نادرة لارسال التحايا والسلام الخاص
من ارض الدوحة التي جئنا اليها ووجدنا سيرتكم العطرة معطرة اجوائها
وكم كنا نتمني ان نحظي بمقابلتكم بها..ولك ودي....
واجد نفسي معني بطريقة او باخري بالحديث عن حكاية الطاهر ود احمد كنص مسرحي
في حضرة صاحبه الفنان السني ..وذلك بحكم اطلاعي علي النص عن قرب ومشاهدته
كمشاهد عادي.....
وقد نتفق في ضرورة التجديد وضخ اعمال جديدة للساحة الثقافية والمسرحية لازالة الركود
وتنشيط الوعي الثقافي ومواكبة الاحداث المتلاحقة..لكن اختلف معك في جزئية تخص
حكاية الطاهر ود احمد الذي اعتقد تماما بانه نص اتي سابقا لزمنه....
حكاية الطاهر تتناول موضوع لم يحسم حتي الان في ساحة العراك السوداني في كل مجالاته
والمهمش الذي الهم السني ذلك العمل االضخم هو حديث الساعة وباسمه يرفع السلاح
وتقام ولائم المفاوضات ولكن لازال الطاهر ود احمد يبحث عن احلامه في ذلك النص الذي
اتانا به السني منذ عشرة سنوات......
اري ان نصا بهذه الكثافة الواقعية ومحشود بمفردات ظلم المهمش واحلامه..حبه احباطه
تطلعاته ماضيه ازمته اري ان هذا هو نص النصوص وحصان طراودة المسرح السوداني
بل قد يمثل ناقوسا يلهم الكثير من الاعمال التي تتناول ازمة المهمش السوداني ويحفز
الفنون الاخري لاثراء الحراك الثقافي باعمال مشابهة..
واحدة من الملاحظات في حكاية الطاهر ود احمد هي المساحة العالية للتجديد في داخله
فهنالك احداث جديدة ومواكبة نلاحظ ان السني مارس الخروج الايجابي من النص لتذهب
الاشارة الي احداث حالية ..ورغم كل ذلك يظل العمل متحد البناء وكونكريت وشديد
التماسك ......
لو كان الامر بيدي لطفت بهذا النص الي كل المحطات والشواطي والمواني والمطارات
التي حملت الازوال....ففي داخل هذا الزول الضخم السني طاقة نووية مسرحية
كافية لتفجير الكثير من الاعمال في مدارات عديدة....
ولك شكري
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: عبدالكريم الامين احمد)
|
Quote: استمتعنا بالعرض الاسبوع الماضى
السنى الضخم دا فى العرض تحول لفراشة
يغنى ويرقص ويحكى
يستحق العرض الكتابة والتحليل ولكن حالت انشغالات
سوف نعمل لاستضافة العرض فى مهرجان الفجيرة الدولى للمونودراما |
مرحب الاخ محمد سيداحمد
وفعلا السني يتحول ورغم ضخامته الظاهره يتحول الي فراشة خفيفة الوزن ويتحرك
علي خشبة المسرح برشاقة نادرة وكما الغزال تماما تجده اعطي النص ابعاده الحركية
وكل جزء من السني يسلم امره الي هذا المسرح المتفرد...يغني يبكي ,,يضحك ثم ينظر بعيدا
بتامل عميق...تحس بمدينة تعج بالشخوص تسافر عبر السني الفنان ..
لك ودي العالي
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: Abuelgassim Gor)
|
| Quote: السنى( طائر الشفق الغريب)ذاتو |
مرحب الاخ ابو القاسم قور..في حضرة طائر الشفق الغريب فعلا السني دفع الله..
وبحضورك يحلو الحديث بينكم انتم اهل الابداع الفني والمسرحي بالتحديد
والمتلقي لفنونكم حتي نعمق فكرة التواصل مابين النص والمشاهد في حضور الفنان الحقيقي
او المودي الحقيقي للنص...واحسب انها من ايجابيات هذا المنبر التي اتاحت لنا التواصل
المباشر معكم لتعم الفائدة...
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: عبدالكريم الامين احمد)
|
السني مجنون يا كيكي ..
عندو بسم الله ..
يا حافظ يا حفيظ ..
السني يندهش إذا مثلا الباب عمل صوت و هو بيقفل .. مش حاجة عادية ؟؟
لأ .. السني بيشوف فيها : ( الباب بيتكلم و يعبر ) .. أها ده كلام ده ؟؟
مافي شي عندو جامد .. و مافي شي في الوجود ده عندو ما بيقول و يعبر , كل شي عند السني عندو لغتو و مداخلو و مخارجو .
في عربيتو في عرايس .. عرايس لعب .. دُمى .. و بلاوي غريبة , ورق و ملفات و بواقي شخبطات و حديد شكلو غريب كده و أربعة نضارات و زي عشرمية قلم , و ما عندو ساعة !!!
ما فارقه معاهو لو نطت في راسو فكرة ملهمة ينسى أي حاجة و يدور شغل مسرح مكرب جوه عربيتو .
و عندو كتابات عجيبة غريبة .. و كمان خطه سمح ( غريبة .. مش ؟؟ ) .. أي شي في الوجود و مكون لحركة الحياة السني بيمسرحو .. أي شي .
الزول ده ما بيشوف الحاجات زينا كده .. عندو ليها فهم تاني .. و الدنيا دي عندو بمجمل حاجاتا شي واحد و متماسك .. ناس و جماد و ظواهر و بلاوي , كله حاجة واحدة , زي نغمة كبيرة كده و متصلة من يوم مرقت من يد الله ليوم الليلة ده , نغمة ما عندها أول ولا آخر , و مستعد يغرق فيها و يغرف منها قدر ما الله سيدو ده أداهو .
الزول ما نصيح يا كيكي ..
السني ممكن يكون بيتكلم معاك و يعاين لشعرك .. وللا يدك وللا اللمعة الفي نخرتك وللا لفة لياقة القميص عندك , ما وشك و بس .. كل شي بيلقطو من زاوية يعرفها براهو و يوزنا براهو , لأنه ممكن يكون في شي عاملو شعرك مع الضو الوراك .. وللا صوتك دخل مع صوت عادم لوري بعيد وللا حتى تعبيرك لما قلت ليهو : قطع شك ,تفاصيل عادية عندنا و مملة و مكررة , عندو هو لأ .. ما مكررة ولا مملة .. فيها استمرارية جديدة و خاطرة أجدّ و زاوية لنج لمصيبة لافه في راسو البقى صغير بعد حلقو ده , فجأة ممكن يقول ليك كلام ينقلك لعالم خرافي مبني بس على زاوية الشوف ديك و وللا ربط الشوف الشافو ده يربطو ليك بذاكرتو ( و عندو ذاكرة بديعة ما شا الله ) ذاكرة فوتوغرافية مدهشة .. يجيب حاجة مرت عليهو من سنة حفرو البحر يلصقا ليك مع شي قبال ثانية حصل و يطلع منها شغل ما أنزل الله به من ... و بعد ده زول رقيق رقة الشفع ديك , و حساسيتو على الهبشة , و بيتحرج بسرعة عجيبة و يدخل في أضافرينو .. و أي حاجة جميلة تخلي في أم هلا هلا .. أي شي جميل يتعبو و يجهجهو .. كلمة سمحة .. بت سمحة .. صورة سمحة .. لقطة سمحة .. أكلة سمحة .. نكتة سمحة , و بعدين النكت بتاعتنا دي ما بيضحك فيها .. نكت الله و الرسول دي ما بتخليهو إلا يبتسم مجاملة كده غايتو .. يضحك لما يدمع في حاجات نحنا نشوفا عاااادية , هو بيشوفا شوف تاني , يضحكو بس الموقف الدرامي نفسو بتاع النكتة , وللا يقوم يسرح جوه النكتة وللا الموقف الكوميدي و يحولو في دماغو المقلوز داك لمسرح و يبني براهو منو و ليهو نكتتو , جن وللا هبشة وللا شنو ما تعرف ..
يا زول زولك ده مشوطن و مسكون .. نسأل الله السلامة .
| |
|
|
|
|
|
|
|
|
|
Re: حكاية الطاهر السقا...محمد السني دفع الله المدهش حقا..!! (Re: Emad Abdulla)
|
| Quote: الزول ده ما بيشوف الحاجات زينا كده .. عندو ليها فهم تاني .. و الدنيا دي عندو بمجمل حاجاتا شي واحد و متماسك .. ناس و جماد و ظواهر و بلاوي , كله حاجة واحدة , زي نغمة كبيرة كده و متصلة من يوم مرقت من يد الله ليوم الليلة ده , نغمة ما عندها أول ولا آخر , و مستعد يغرق فيها و يغرف منها قدر ما الله سيدو ده أداهو |
والله ياعماد انا لا عرفت المجنون السني ولا انت ياخ غايتو الليلة ضحكتني جنس ضحك في الدوحة
وجبت صحبك السني بضبانتو...
وغايتو الله يسرتنا ما نرفع جنينة ..ورغم انو جنكم الطاعم ده ذاتتو بجنن ..
وفعلا اتفق معاك انو السني ده عندو حاجات كده بعرفها براو..
اول يوم مشيت ليهو وقعدنا نشتغل..هو بمثل وانا منهمك في متابعة النص والقراية عشان
السني يتذكر..وفجاة جات حتة كده بصوت امراة اسمها حجا فاطمة..
بتقول حجا فاطمة
الاولاد قام ليهم ريش وطاروا
وخلوا البيت خلا ..
وبدون مقدمات صحبك السني سرح بعيد...وحرن وانا الفاره مفتكر ده جزء من النص وحركات
بتاعات ممثلمين...
لكن لا...
السني عاين بعيد شديد في سقف القاعة بتاعة اصدقاء البيئة
وقال لي اتخيل يا كيكي انا امس الليل كلو ببكي
قلت ليهو مالك يازول..؟؟؟
قال لي برنة حزن ودموع كده قربت تنزل
تتخيل حجة فاطمة الاستلهمت منها الحديث ده ماتت اول امس ..وانا اتذكرتها بالليل..!!!
السني يا عمدة فنان حقيقي وكنز وطفل كبير وقلب ابيض من اللبن ذاتتتو..
ا
| |
|
|
|
|
|
|
| |
عبدالكريم الامين احمد
khaleel
معتصم الطاهر
ودرملية
عبد المنعم سليمان
محمد سنى دفع الله
ابو جهينة
بدر الدين الأمير
abdalla elshaikh
mohmmed said ahmed
Abuelgassim Gor
Emad Abdulla
فيس بوك
تويتر
انستقرام
يوتيوب
بنتيريست