الحي اللاتيني... وكل الفريق والاهل والجيران يستعدون الي الذهاب الي مباني الجامعة للمشاركة في احتفال درة الحلةوست البنات (سوزي) والليلة قالوا متخرجة وخلاص كملت القراية وجضمت العلوم وبقت خريجة ليها ضل..!! كان لازم امشي معاهم واشارك في الفرحة فتخرج زول او زولة من ذلك الحي هو احتفال للجميع وفرحتنا كلنا.. خشيت في بلو جينز وقميص كاروهات ومعاها ريحة من باقي الشنطة التي فضلت بعدما قضي علي اخضرها ويابسها وعدموها نفاخ النار ..وانت كمغترب تمارس عليك القبقبة من الاصدقاء والاهل والجيران وما عليك الا ان تبكي بس...ونعود
07-14-2007, 07:42 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
اها وانا ماشي في الوفد وموصل معاي شلة من ناس الفريق كان لازم يكون معاي كل العدة الضرورية من موبيايلي وكيس التمباك والجذلان..الجذلان بصراحة وبدون فخفخة جذلاني اديسي من سوق ماركاتو جلد اصلي وبالجنبة كده مرسوم فيه علم الحبشة جذلان (حمرة وحلا) دائما شايلو لحام ولونمت ذااتو بكون في احدي جيوبي.. يحتوي علي بطاقات وكروت بصراحة المرة دي خاتي فيهو باقي الكنجيلات في شكل دولارات(ابوصلعة) لزوم الضرائب والذكاة وما شابه ذلك من رسوم الحكومة الما عارفين ليها (راس لا قعر).. واهم حاجة كان فيهو كرت السفر بتاع الخدمة الالزامية وببطاقة (اي تي ام) للفكة في بلاد الغربة... ونواصل
07-14-2007, 07:43 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
اها تحرك الوفد والوفد المرافق للجامعة وفي الطريق لزوم المنجهة والزوق المغترب لازم يغشي اقرب بقالة واشتري (حلاوة) مميزة وفتحت الجذلان في البقالة وتناولت اكبر كيس حلاوة في الرفوف الملانة حلاوة اشكال والوان والشاهد ان البقالات في السودان ملانة ملية عدوك وعيني باردة واشتريت كمان كرت موبيتيل وهي واحدة من الاشياء التي غدت جيبي وكرهتني الاجازة ذاااتو..للرد علي المس كولات التي انهمرت كالمطر (مس كول من القضارف_ وواحد من تلفونثابت في الروصيرص وتاني من الدمازين) ومس كولات تجي ومس كولات تفوت وانا امارس هوايتي الجديدة في كشط كروت موبيتل ...وكانت تلكم البقالة هي اولي محطات خروج الجذلان الذي اشتهر بعدها وصار حديث كل الفريق,,وصار مثل الشهير بن لادن يبحثون عنه في كل مكان...ونعود..
07-14-2007, 07:45 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
اها شلنا الحلاوة لزوم المنجهة وتوششك لمكان الحفل البيهج لتخريج بت حلتنا وزهرة فريقنا (سوزي) وساحة الحفل اخر انوار اشكال والوان كيف كيف ..وانوار تولع وتطفي وعاملين خيمة كبيرة والغناوي من الساوند بنتعطر المكان وبصراحة الجكس كثثثثير ونضيف ولابسين لبس السنين والكريمات ما تديك الدرب والروج والميك اب اشتغل شغل شديد اليوم داك والبدرة الشتتوها في الوشوش لو باصروها اكيد بتملاء شوال..وعرفت كمان لبسة جديدة اسمها كوني النجمة ..وغايتو محن عجيبة ..وانا منغمس في اجواء الاحتفال ومقهي في الناس السمحة دي..قلت يا ربي ديل مالو زي ناس سهرة ليالي النغم الشهير’ة.. سوزي دي متخرجة ولا جايبانا لسهرة ليالي النغم ام ناسا نضاف..ونواصل
07-14-2007, 07:47 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
اها وكما قلنا ونحن في التخريج اب ليالي النغم والناسوا نضاااف (ياكافي البلاء الضيوف انضف من الخريجين ذااتهم) معرض ازياء ضيقة خلاص ومهرجان بودرة والبغيظ هي الاغاني المصرية والزفات علي (شاكلة اها ونص) يلخبتوها ليك مع غناوي كابلي واحمد المصطفي لا تعرف نفسك انت في طنطا ولا حينا اللاتيني..وعرفت كمان من الفرد انو العرس في السودان بقي هو ذاااتو بعملوا فيهو زفة علي طريقة المسلسلات الشهيرة ورقصني يا جدع.. وفجاءة وانا في نص هذا المهرجان الليالي نغمي الطنطاوي السوداني لتخريج بيتنا (سوزي) اتذكرت اني مفروض امشي الاجزخانة عشان اجيب (حبوب) الضغط بتاعة (الحاجة)...وكرف كرف عملت انسحاب تيكيكي من الحفلة... ماشي وين يا زول؟؟ لا دقيقة بس مشوار صغيروني وجاي..فعلا مشيت الاجزخانة وطلعت الجذلان واشتريت الحبوبة ودي كانت المحطة الثانية لطلوع الجذلان الذي صار كم قلنا مثل بن لادن..وفاصل ونواصل
07-14-2007, 08:15 AM
ضحيه ابراهيم ضحيه ابراهيم
تاريخ التسجيل: 12-28-2005
مجموع المشاركات: 2103
Quote: تفتو لينا ولانفت نحنا حسب مصادرنا؟؟؟ (صوت وصوره)
هلا ضحية وهلا بناس الليلة السمرية.. بفتو برااي يا ضحية وخليك حنين.. والخطة ماشة كويش 1-فش غبينة 2- اوزوندام 3-الجذلان 4-حاجاتك القلت ليها من بيت الكلاوي (مع اني ما عارف ياتو كلاوي) لكن ح ادرجها ليك في الخطة 5- اخري ... خليك قريب يا ضحية لتسمع حكاية الجذلان الذي صار مثل شيخ بن لادن ولكن بعد الفاصل.
07-14-2007, 08:49 AM
معاذ حسن معاذ حسن
تاريخ التسجيل: 11-14-2006
مجموع المشاركات: 3353
اها من الاجزخانة فكرت وقدرت ولقيت القصة (قارصة) معاي اقرب كافتيريا (شاورما) وطعمية وفي اطار الاستلاب الخليجي اذكر بانني قلت لصاحب الكافتيريا داير شاورما وفلافل..!! فاندهش الرجل وقال شاورما وشنووو؟؟؟ خلاص معليش شاورما وطعمية..!! هنا وبفلاش (فورورد) تذكرت بان الاتصال قد انقطع ما بيني وبين (الجذلان) الشهير ولم اكن متاكد بان الشاورما دي دفعت ليها من الجذلان ولا باقي الهربشات اللفي جيب الامام... بعد هذه الخيانة الشاورمية انطلقت لمكان التخريج (الليالي نغمي ) تاني واندهشت عندما وجدت القصة جايطة جوطة تقيلةواتلخبت الضيوف مع الخريجات والخريجين وهيئة التدريس ولقيت الجماعة فنانهم دور ورقيص شديد(حت تقيل) النبق والقرد وجب جبة عجيبة...قلت يا ربي انا رحت ولا مشيت حفلة تاني لانو القصة اتكوجنت كوجان عجيب ولو ما الانوار البتطفي وبتولع ديك وشفت (الفرد) مجكسين وبرقصوا مع جكس اهل خريجة من حي تاني لكنت اعتقد بانني (دشيت) حفلة بالغلط في شندي فوق ولا الديم وعرس كمان مش تخريج...ونعود..
07-14-2007, 11:14 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
واها الحفلة التخريجة مدورة تدوير شديد ورقيص اشكال والوان واول مرة اشوف لي رقيص علي شكل (ارنب نط) تلكم الحركة الشهيرة التي اشتهر بها العساكر.وقلت لروحي الدفاع الشعبي والالزامية دي خربت الناس يا جماعة..الناس دي بتلقي لياقة وين لما تظل ترقص هذه الرقصات البهلوانية وبكل انسجام ومهارة والعرق نازل زي المطر والعجاج في السماء و(جب جب) ..غايتو لو ما شوية كده والمذيع الداخلي قال (اخوتي انتهي الحفل ويلا فرتقوا) كان قطع شك الفنان غنا(راجل مرة حلو حلا)..واها لملمك لملمك ركب الوفد والوفد المرافق بتاعني عائدين من ارض الحفلة والفرد عرقانين وعينهم طالعة وطالعين من معركة (الارنب نط) دي كل واحد بزي (دشيلون) رقم تلفون بتاع جكسوية شي موبيتل وشي سوداني وخليك سوداني وشيتن (اريبا).. وواحد شفت طلع برقم واحدة عندهم (كنار) لكن كنار في شكل موبايل او كما قالت....ونعود
07-14-2007, 06:01 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ونحن في طريق العودة من حفلتنا الغريبة عجيبة والناس مبسوطة وقبل الوصول الي مضرب خيام الحي اللاتيني اقترح واحد من الوفد المرافق انو نشيل (عشاء) حتي نتم باقي السهرة في البيت وهنا جاء دور الجذلان الشهير وضروروة خروجه الي الاضواء حتي نشتري (فول) وفلافل او طعمية بجانب كوارع شهيرة يمتاز بها هذا المكان ولو لقينا (اقاشي) بالحنبة كده ما بطال معانا.... وقفت العربة وكرف اليد في الجيب الذي هو ماوي للجذلان (الله الجذلان مافي) جيب الخلف الجذلان نهييي جيب القميص مافي...الله الجذلان ده جنا ولا شنو... ياشباب هوووي الجذلان اتحلسسسسس شنوووووو قلت ليكم الجذلان اتلحسسسسس اتنشلت انننننا يا جدعان....!!! كدي فتش كويس يا زول هوووي....!! فتشك فتشك...العربية تحت وفوق و(نو جذلان اوت).... واللللللليللللللللة والف ليلة............ ونعود
07-15-2007, 03:52 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ونعودالي سيرة الجذلان الذي (ان نو تايم) ذهب مع الريح ولحق بغنم زهراء او ركب التونسية او اتلحس او كل المصطلحات التي تواكب مثل هذا الاختفاء القسري الذي يشابه اختفاء الشيخ الاسطوري اسامة بن لادن في كهوف واكواخ وكراكير (تورا بورا) ومناطق القبائل ..... ياربي اكون اتنشلت وانا الكنت مفتكر نفسي (تفتيحة) وشايلة مفاتيحها اجي اتنشل علي اخر عمري....ولا يكون شالو ناس (الامن) الوطني بتاعين الموتمر الوطني (اصلهم قالوا الناس ديل بخطفوا من طرف)....الراجح واثناء تفتيشي القلق لهذا الجذلان( الجذلان) انني وفي اثناء انغماسي مع الحفلة والتقهي في رقصات (النبق) والقرد ورقصة (ارنب نط) و(الكشيف حسن) للجكس النضيف (اللابس كوني النجمة) الراجح ان احدي النشالين الكبار المتخصصين في نشل الجيوب بحرفنة ومهارة عالية يحسدهم عليها (كلاتشي) قد مارس هوايته و(كنجف نجف) سحب ابو الجذلانين بتاعي....!!!!والله اعلم ونعود
07-15-2007, 01:51 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
والجميع منهمك في التفتيش والاقاشي والكوارع طارت من الراس وكل الاشياء اللاحقه لهما طارت من الراس ايضاوبينما نحن في تفتيش وشمشة يحسدنا عليها (اجعص) كلب بوليسي في (غونتامو) وسط كل هذه الاجراءت التفتيشية مرت بنا عربة البص التي كانت تحمل الغالبية من سكان الحي اللاتيني وهم في طريقهم الي البيوت عقب انتهاء مراسم ذلك الحفل (الليالي نغمي)...وفجاء مارس صديقنا (عمر بلتني) هوايته المحببة في (خفة الخشم) اكثر زول خشمو خفيف في الشرق الاوسط والسودان القديم والجديد عمر (بلنتي ده) ..فاستطاع بمهارته الفائقة في توزيع الشمار توصيل الخبر الي كل من في البص واشاع ان جذلان شحمان وليهو ضل قد ضاع مني...وانه ملي اليورهات والدولارات وفيهو الاقامة وعقد العمل والتذاكر وورق الخدمة الالزامية وكروت البنوك (حراام عليك يا عمر بلنتي جذلان ولا سامسونايت ده)...فتقاطرات الجموع من الكبار والامهات والاخوات وكثير من الجكس وجدها فرصة لابداء مشاعر الحسرة والاسي والبودرة والكريمات تتقاطر من الوجه (قلت في قلبي مع الزعل ده الواحد يقطع فيكم كف كل كريم يرجع رف)...وبدات مراسم تفيش اخري للعربة ولك ان تتخيل عربة (كورلا) صغيرة الحجم تخضع لاكبر عملية تفيش يشهدها الشرق الاوسط الجديد..ونعود..
07-15-2007, 04:26 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
تم تفتيش العربية فوق تحت وبالجنبة وما فضل الا نفتش الاسبير والتانكي ولم نجد لهذا الجذلان البن لادني اثرا.. وهنا تبداء دورة الفلاش باك ومراجعة المسار الاخطبوطي ومنذ بداية خروجي لهذا الحفل العجيب وغريب.... 1-المحطة الاولي هي البقالة واشترينا الحلاوة ..والجذلان قاااعد 2- ذهابنا الي مكان الحفل والجذلان قاعدددد 3-الاجزخانة والجذلان قاعد 4-الكافتيريا والشاورمة والفلافل وهنا مافي تاكيدات بان الجذلان قاعد ولا ما قاعد 5- العودة مرة اخري للحفل والانغماس مع الجب جببة وبرضو مافي تاكيدات بان بن لادن قاعد ولا ما قاعد... تلك الافادات قلتها امام الجموع وكاني استعرض رحلة ماجلان الشهيرة او رحلة كلمبوس يستمع اليها الجميع باهتمام واصغاء عالي...وهنا امر من هو نافذ في كل هذه المجموعة الجموع بالعودة فورا الي (بكان) الحفل فوووووورررا وتفتيش هذا الجذلان الذي لو صار اردب سمسم فان ابناء وبنات الحي اللاتيني قادرين علي الاتيان به من طقاطيق الارض..... يا حاج طيب خلي الحريم علي الاقل ترجع البيوت ونمشي احنا الشباب وانتو امشوا نوموا خلاص...!!! حريم شنو يازول هوووي انت مطشش ولا شنو ما عندنا حريم ولا رجال احنا..وسوق عربيتنك والحقنا في الجامعة بلاش فلقصة معاك....!!! واتجهنا صوب الجامعة مرة اخري وانا كل اسف وزهج من (عمر بلتني) صاحب الخشم الخفيف الذي( تلتل فريقنا) علي بكرة ابيه في انصاص الليالي وايضا دارت سحابة حول اهمية بعض الاوراق الفعلا ذات اهمية قصوي في محتويات الجذلان (ود اللذينة) ..وكان اهمها الكنجيلات فهي الاهم بجانب بعض الاشياء التي يمكن استخراجها مرة اخري ولكن قد يحتاج الامر الي (تلتلة) ومرمقة وبشتنة ..وكان اكثرها بشتنة هو (كرت) السفر بتاع الخدمة الالزامية فهذا بالذات يعني صفوف ودفير واحتمال شكلة في اثناء الاصتفاف وممكن كشيرة من الضابط والشاويش واحتمال دفع وممكن يقولوا ليك بعد ده كلوا (امشي جيب ولي امرك)...اذن انها الخرمجة والبهدلة وضرب ايام الاجازة القليلة الباقية في مقتل ..واااه يا جذلان( ياوهم) رايح لييه حسع عليك دينك ياخييي؟؟؟؟ ونعود...
07-15-2007, 05:06 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
سواقة متوترة ولحظات قليلة وصلت بنا الي مكان الحفل الذي وجدت قوات الانتشار السريع من جحافل ابناء وبنات (لاتين) قد احتلت المكان وبدات اكبر عملية تفتيش شهدتها تلكم الربوع (الكراسي تحت وفوق) الترابيز تحت وفوق والاسئلة تتقاطر (اها انت جيت بهنا ولا لا..؟؟)..وعينك ما تشوف( توك شعر..صباع احمر شفاه..منكير اشرطة تسريح..بواقي علب برنجي ثم كروت موبتيل وسوداني والكثير من مخلفات ذلك الحفل الاسطوري) ووسط هذا الركام الاحمر شفاهي لا وجود لهذا الجذلان ابن الايه..اذن انها الفجيعة وعودة سيرة الطنبجة والغلغلة والبهدلة ورقاد الوطة قد عاودت كرتها ورحلة الكفاوي والبلاوي وانها (عودة عطية ) لكي يشاركنا حتي اجازتنا البسيطة التي نحلم بها طيلة السنة (لعنك الله ايها العطية لقد اخذت وروحت وطلعت ديشي)..... ونعود...[/blue]
07-16-2007, 01:26 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
نعود اليوم الي سيرة الجذلان والاخ الصديق عبدالمنعم الحاج يظلل بغيابه المدي ويمنح الاسفير ظلال موغلة في الغياب وهو الذي يمنحنا سيرة الجمال والابداع ونتمني ان يعود الينا سريعا.... ... كل جموع الحي اللاتيني رجعت بخفي (حنين) بل عندما تنظر الي وجوهم تكاد تري (حنين) بنفسه يمشي بينهم من الحسرة والاسي علي الجذلان المندكل الذي فتشوا عليه تلكم الساحة(الليالي نغمية) تفتيش منكر ونكير ولكن لا حياة لمن تنادي... وصارت كلمة السر في ذلك الليل البهيم هي (الجذلان) وعم ليلة الحي سحاب ومزن من الحزن والترقب لصباحات لابد ان تاتي لكي تواصل الكتيبة اللاتينة التفتيش وحتي لو اطرينا الذهاب الي خشم البقرة.. لم ينم الكثيرين ولكن انا (الرمة) نمت نوم السنين فقد كان هنالك صوت قوي يصيح بان الجذلان لم ولن يضيع (ماعارف الصوت ده جاي من وين ولكن كان صوت قوي وواثق من نبرته)... ونمت ورايت ما يري النائم جولات الجذلان ودورته وحكاويه التي زارتنا في منام احدي الغرف من حينا اللاتيني ونعود...
07-18-2007, 06:10 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
سرت تلكم الليلة بالهواجس والخوف علي مصير الكنجيلات والوثائق التي لا ندري جميعنا اين نامت (هي) في تلكم الليلة..ورايت ما يري النائم ان هذا الجذلان الشهير قد طار علي جناح طائر اسود اللون كثير (النعيق) طار الي ماركاتو ذلك السوق الشهير وقد حن جلده المصقول الي ربوع (اديس) وحرفنة نشاليها ومهارتهم العالية وتطور الحلم الي خناقة عالية الجلبة مع (النشال الحبشي) الذي بداء في تفاصيل ذلك الحلم السريع (احمر العينين) ومحتسي لجعة(الكلوميت) وينازع كل اهل الحي اللاتيني في جذلانهم الذي هو نتاج بلادهم الجميلة ثم ليغنمه ويركض به امام الجموع اللاتيني التي تسلحت بالسواطير والعكاكيز وبعضهم رايته يحمل (مرق) الالة المحببة لحسم الصراعات والنشال جاري وكل ا للاتيني جاري خلفه ويذهب دراما الحلم الي اعلي درجاته لنسمع ضربا علي الباب في ساعات الاولي من ذلك الصباح كنغ كنغ كنغ... ونعود
07-22-2007, 05:32 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ومع كنغ كنغ هذه تدافع الي المنزل العشرات من خيرة شباب الحي اللاتيني وهو علي اهب الاستعداد صباحا للذهاب الي (خشم البقرة) بحثا عن الجذلان الذي صار اسطورة.. اتوا صباحا وهم يحملون العديد من الاقتراحات والافكار النيرة والغير نيرة.. قال احدهم نذهب الي البوليص ونفتح بلاغ ونستخرج شهادات فقدان قال اكثرهم حماسا ساذهب الي (سوق الاخوان) في اطراف الحي وافتش ليكم الحرامية اولاد الايه من (طرف) وممكن نستيعن بود (بلية) فهو اصلا حرامي معروف لكنه متعاون مع اهل الحي في كل السرقات التي شهدتها الحي... ذهاب صباحي الي القسم البوليسي وكان وفدنا هو اول الواصلين الي المتحري (كبك) الذي طلب 20 الف كعربون (طقطقة) سريعة للاوراق واستخرج لنا شهادات فقدان في سرعة وهمة مقابل (الرشوة) او الزبالة كما اسماها هو حتي دون حضور الضابط النبطشي... ونعود..
08-16-2007, 10:49 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
طقطقة سريعة من التحري طقطقة للاجرات وسلخنا زي كم جنيه من الجنيهات البسيطة التي فضلت في جيب الخلف واستطعنا بعدها استخراج شهادات فقدان واقرار من الشرطة بان الزول المغترب الفاره ده (راحن) منو الاوراق الكيت كيت.. وهنا انبري من وسط القوم زول متحمس اكثر مني لامر الجذلان واقترح مسح ميداني ثاني واخير للمحطات التي زرناها ليلة امس.. البقالة مكان الحفلة الاجزخانة الكافتيريا.. وكنا زهجانين وقافلة معانا وليس لدينا رغبة في تكرار هذه الجولة ولكن عمر كبريتة استطاع وبحماسه التاريخي الذي كان ظاهر ا في تشجيعه المتعصب لفريق الحي اللاتيني يام كنا بندور الكفر والتيوةاستطاع كبريتة اقناع الجميع بالجولة والمسح الميداني الاخير...وقلنا ارح ومشينا..
08-17-2007, 08:43 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
المشي الي نقطة البوليس كرجالة للحي اللاتيني لم يكن هو الجهد الصباحي الوحيد المبذول من اجل الجذلان..!! فقد كانت وفي مدارات ليس ببعيدة تجمع نسائي في اكبر قافلة نسائية تزور ليها (شيخة) صباحا.. نسوان الحلة طقطقن شرينغ صباحي سريع ولفحن تيابن وركبن ليهن امجاد وداهمن الشيخة الاسطورية زينب من الصباح فتم دقع عربون صباحي كان(مصرور في احدي التياب اثناء ركوبهن للامجاد)... وافتت الشيخة التي قيل ان كلامها لايقع وطة باذن الجذلان قاعد وما ممكن يروح وحتلقهو الساعة 10 صباحا.. رن التفلون لخبرنا بهذه النبوة والالوسية الشيخية الزينبية الصباحية .. وكان لسان حال البعض منا يردد شيخة شنو يااخي هو لو الشيخة دي فيها فايدة كان صلحت امور ولدها عبدالباقي كرتونة العامل فيها معارض للحكومة دي ويومي ناس الامن متلبين بيتها ولافحين كتبوا الشيخة دي لو فيها فايدة كان كشحت ناس الحكومة ابهانين دقون ديل وورتنا متين بالضبط حيتكشحوا كده ولا كده ومبعدين الجذلان هين ..ونعود...
08-17-2007, 09:08 AM
الفاتح ميرغني الفاتح ميرغني
تاريخ التسجيل: 03-01-2007
مجموع المشاركات: 7488
Quote: المشي الي نقطة البوليس كرجالة للحي اللاتيني لم يكن هو الجهد الصباحي الوحيد المبذول من اجل الجذلان..!! فقد كانت وفي مدارات ليس ببعيدة تجمع نسائي في اكبر قافلة نسائية تزور ليها (شيخة) صباحا.. نسوان الحلة طقطقن شرينغ صباحي سريع ولفحن تيابن وركبن ليهن امجاد وداهمن الشيخة الاسطورية زينب من الصباح فتم دقع عربون صباحي كان(مصرور في احدي التياب اثناء ركوبهن للامجاد)... وافتت الشيخة التي قيل ان كلامها لايقع وطة باذن الجذلان قاعد وما ممكن يروح وحتلقهو الساعة 10 صباحا.. رن التفلون لخبرنا بهذه النبوة والالوسية الشيخية الزينبية الصباحية .. وكان لسان حال البعض منا يردد شيخة شنو يااخي هو لو الشيخة دي فيها فايدة كان صلحت امور ولدها عبدالباقي كرتونة العامل فيها معارض للحكومة دي ويومي ناس الامن متلبين بيتها ولافحين كتبوا الشيخة دي لو فيها فايدة كان كشحت ناس الحكومة ابهانين دقون ديل وورتنا متين بالضبط حيتكشحوا كده ولا كده ومبعدين الجذلان هين ..ونعود
حبيبنا كيكي ألم اقل لك إنك متفردا؟عد سريعا فنحن في إنتظارك. درامة السرد العجيب ده خلانا نفكر جادين انا وحيدر نرسل ليك ينات يابانية لزوم تصليح موازنة وكده( ده طبعا لو الجذلان ما إتلقى ولو إتلقى إعتبرها هدية من ناس بحبوك في اليابان)
08-17-2007, 09:22 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
Quote: درامة السرد العجيب ده خلانا نفكر جادين انا وحيدر نرسل ليك ينات يابانية لزوم تصليح موازنة وكده( ده طبعا لو الجذلان ما إتلقى ولو إتلقى إعتبرها هدية من ناس بحبوك في اليابان)
هلا بالاخ الراقي الفاتح ومنور والله سيرة الجذلان الذي ذهب مع الريح وجعلنا جميعا اهل الحي اللاتيني وقوفا وقياما من اجله... ومشكورين علي الينات اليابانية لكن بالله اشتروا لي بيها (مكنة) للكورلا المسكينة التي جابت في ذلك اليوم المدينة جوب السنين واكيد بكون قطعت وش اوحصلت فيها مصيبة من اللف والدوران بحثا عن جذلاني العجيب... الف شكر يا الفاتح ودوم نسعد بحضورك
08-17-2007, 11:47 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
والان وجحافل الحي اللاتيني تمارس محاصرة امر هذا الجزلان (الجذلان) بتاكيدات الشيخ زينب الرهيبة وبلاغ ليهو في امام تحريات نقطة الحي اللاتيني ذات البواليس الذين يعشقون الرشاوي بجانب حماس الفتية بقيادة عمر جاكات وادم كرونة وكل شفوت الحي وضعوا هذا الجذلان كهدف استراتيجي ومطلب شعبي مثله ومثل راس نميري في يوم من ايام بلاد السودان.. وبدانا المسح الجيومكاني ونحن تحت حماية الشيخة (زينب الروحية) لنبداء (سي جديد).. مكان الحفل ومرة اخري تفتيش منكر ونكير الاجزخانة والتي افتعل فيها (عمر جاكات) خنقة مع البت (الشرط) التي كانت امام الكاونتر وعندماسالناهوعن سرهذه الخناقة الغير مبررة مع هذه البت الشرط افاد بانه متاكد بان هذه البت الشرط هي من جازفت الجذلان واردف بالقول (الزمن ه اصلو مافي زول فقاع وحرامي غير الجكس النضيف ده..يبلعن في المسي جور ويربن في القصة بحق الناس المساكين)... ثم حط رحالنا في الكافتيريا عند الساعة( التاسعة وخمسة واربعين دقيقة) اي قبل ساعة الصفر التي حددتها الشيخة زينب وبتمام هذا التوقيت كنا امام كاونتر الكافتيريا ونحن في كل ترقب لانتظار المستحيل كما صح المرحوم مصطفي سيد احمد ذات يوم بعيد... وهنا نتوقف ويتوقف الزمن في استراحة وبعدها نعود الي سيرة الجذلان الذي يبدو ان احداثا ودهشة جديدة قد ضخت في امره.... ونعود
08-17-2007, 01:42 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ربع الساعة قبل العاشرة وكل قلوب الحي اللاتيني متوقفة امام كاونتر كافتيريا وكانت هذه الربع ساعة هي اطول ربع ساعة في تاريخ ذلك الحي النشط دوما بالاحداث ففيه قد تكون سوداتل وكنار واريبا وكل شركات الهاتف السودانية ربحت الكثير من الدينارات في محادثات يتردد فيها كلمة (جذلان ) بمختلف اللغات العربية الامدرمانية والعجمية وبعضها يردده بالرطانات الافريقية... وفي هذه الكرنفال والوقفة التي بلاامل فجاءة ظهر احد الاشخاص من داخل هذه الكافتيريا متسائلا.. في شنو يا جماعة واقفين هنا؟؟؟ ياخ مافي جذلان وقع هنا امس..!!! جذلان؟؟ ايوه..جذلان مال حيكون شنو يعني ..!! طيب انا موظف صغير لكن انتظروا (عصام) صاحب الكافتيريا حيجي حسع عشرة دقيقة وممكن تسالهو ... ونعود..والساعة العاشرة اقتربت من الحضور واهتمامي كله الان منصب علي هدم نظرية الشيخة زينب واراحة نساء الحي اللاتيني منها ومساعدتهم في توفير قريشاتهن البسيطة .. والمعركة الان تحولت الي معركة هدم نظرية الشيخة زينب وليس معركة جذلان فانه مال سيذهب وياتي ونعود...
08-17-2007, 05:30 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ربع الساعة عشرة دقائق ثم خمسة دقائق اخيرة عن مواعيد شيختي (زينب) ثم حضور مفاجئي لصاحب الكافتيريا (عصام) شاب في العقد الثالث تبدو عليه سمات الضكرنة والسودانية الصارخة وطيبة القلب.. وقال انت فلان الفلان مش كده؟؟ هنا صحت وصاح كل القوم واظن ان النساء القابعات في (التكلات) لتجهيز قوت ابناء الحي اللاتيني ايضا قد صاحن جميعا (ايييي ده فلان الفلاني انشاء الله خير)... -يازول انت متاكد انت فلان الفلاني الفلاني صاح الجميع واعلاهم صوتا كان(عمر جاكات) الذين بدات علامات توتره التاريخي تدب في وجهه وعندما تاتي مثل علاماته تلك لا تدري ولا تستطيع التكهن بما يحصل فانه يتحول لي (بتاع مشاكل) لاجدوي معه.. ولكن قطعت عصام قوول كل جاكاتي وقال جذلاننننننننننك معااااااااي... شنو؟؟؟ شنو.؟؟ بدات شنو تلك كصوت كورالي يتردد صداه من نقطة وقوفنا وحتي داخل كل منازل الحي اللاتيني وكل ابنائه وبناته كن يرددنن شنو شنو شنو...!! -قلت ليكم الجذلان معااي يا ناس.. ونعود...
08-18-2007, 11:20 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
وعند الساعة العاشرة واكرر العاشرة تماما بلا ثواني ولا دقائق ولا حتي جزء من الثانية زائدا او ناقصا كان جذلاني عاد الي ثكناته بعد ان وجده عصام في ذلك اليوم (مرمي) امام الكاونتر وهنا تحولت الفرحة بعودة الجذلان الي دهشة واستغراب في امر الشيخة زينب التي افتت بان الجذلان سيرجع الساعة العاشرة صباحا.. والله علي ما اقول شهيد... وكنت قد اخذت الفتي العائد الجذلان ودون مراجعة محتوياته وذهبت الي مدارات اخري.. ولكن يظل امر تلكم الشيخة العجيبة سوالا يحتاج الي تفكير واجابة.. 1-هل هي صدفة 2-ام فعلا انها تتمتع بقوة خارقة 3-ام تسخر الجن.. والله اعلم... انتهييييي ....... .... ... .. .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالكريم الامين احمد
ضحيه ابراهيم
معاذ حسن
طارق جبريل
محمد على طه الملك
الفاتح ميرغني
فيس بوك
تويتر
انستقرام
يوتيوب
بنتيريست