|
نـــظرية الحاجات وتـطور البتاعات ..!!
|
زمان وزمان شديد .. شديد ولا بأس بعصر الديناصورات .. للناس العاشوا الحقبة دي .. كان كل واحد .. نفسو يكون عندو حاجة الشافع داير بزة .. يكبر شوية .. تنقلب سفنجة شوية .. شوية ... داير عجلة حسب التطور الميكانيكي .. الحاصل ليهو وكلها حاجات .. لانها بتنطلق من رغبات وفي بتاعات .. ودي بتفرضها .. الظروف الراهنة ذي شنطة المدرسة .. فهي في النهاية .. بتاعة كدا لزوم .. البتاعة التانية .. الا وهي المدرسة وفي هذا الخضم .. تتوالى البتاعات .. علي مضض والحاجات .. حسب الرغبة لحدي المتوسطة كدا .. والولوج الي شارع المدارس بالبنطلون فهنا .. البنطلون .. حاجة ملحة .. وكان الردا .. بتاعة كدا .. ترمز للشفعنة وممكن نأرخ لدخول مرحلة المراهقة الممتدة من لحظة ارتداء البنطلون في هذا الاثناء بتظهر حاجة ملحة .. تانية وهي الحاجة الي حاجة .. نظام جكسوية وكدا والموضوع خاضع للعرض والطلب .. وشيل جرب .. وكان ما نفعت فك عكس الهوا وكذلك الامر لدي الطرف الآخر لحدي ما تلقى الحاجة بتاعتك .. تقوم بقدرة قادر تبقى بتاعة كدا مع الاستمرار الدنميكي في حركة .. فك .. امسك .. فك .. امسك بعدها .. الواحد بجيهو أحباط .. وببقى جادي يقوم يلم حق الحاجة الباردة .. ولاحظ انها حاجة لانها باردة ويشتري بيها حاجات تانية .. تبدأ بقميص .. وممكن تصل لحدي عربية حسب مقتضيات الفكة .. الفاكيها في روحو .. ولا الفكة بمعني القروش بعد المرحلة دي .. نصل لمرحلة التفرد ودي بتكون اغلبها حاجات .. مع التوازى مع متطلبات الحياة .. البتاعات لكن بكون في هامش ربح .. بتيح ليك التحرك .. بطريقة بهلوانية وتطبيق نظرية .. بُص شوف بيبو بيعمل أيه وهنا بدخل المجال المهني .. والهواية .. والرغبات .. وكلام الجرايد داك في تحديد رغباتك لحاجات المرحلة القادمة في ناس بتشترك في قنوات فضائية .. وفي ناس بتشتري لاب توب وفي واحدين بحبو يشربو بربيكان .. ويأكلو جلاكسي وفي ناس الموبايلات .. وناس الملايات والستاير وفي واحدين فريدين .. بقلبوا الهوبة في شارع الزلط .. وبكسروا رقبتهم .. ومالو زاتو ياخي .. لو ناطحنا الزرافة دي .. ولا اشيل لك الاسد دا ادق بيهو الارض .. كلها حاجات .. مع الايمان المنقطع النظير بالبتاعات الضرورية الممكن مرات توقف الحاجات غايتو .. ربنا يستر ..
|
|
|
|
|
|
|
العنوان |
الكاتب |
Date |
نـــظرية الحاجات وتـطور البتاعات ..!! | humida | 01-07-06, 08:09 AM |
Re: نـــظرية الحاجات وتـطور البتاعات ..!! | humida | 05-07-06, 08:15 AM |
Re: نـــظرية الحاجات وتـطور البتاعات ..!! | almulaomar | 05-08-06, 05:35 AM |
Re: نـــظرية الحاجات وتـطور البتاعات ..!! | ابو جهينة | 05-08-06, 06:41 AM |
Re: نـــظرية الحاجات وتـطور البتاعات ..!! | humida | 05-08-06, 03:17 PM |
Re: نـــظرية الحاجات وتـطور البتاعات ..!! | Sobajo | 05-08-06, 03:43 PM |
Re: نـــظرية الحاجات وتـطور البتاعات ..!! | Sobajo | 05-08-06, 03:43 PM |
Re: نـــظرية الحاجات وتـطور البتاعات ..!! | Waly Eldin Elfakey | 05-08-06, 04:01 PM |
Re: نـــظرية الحاجات وتـطور البتاعات ..!! | humida | 05-09-06, 01:11 AM |
Re: نـــظرية الحاجات وتـطور البتاعات ..!! | almulaomar | 05-09-06, 01:15 AM |
|
|
|