انتو ما شايفين المنبر بتاعكم دا .. فيهو ركشات .. !
اها طوالي كدا .. قلت ليهو لكن يا بروف .. الانبعاجية الاساسية في المنظومة الآحادية الجانب .. بتتجه صوب تمركز القوي العاملة في دول شمال الكاريبي .. مما يؤدي الي ارتفاع مؤشر داو جونز الي معدلات قياسية .. قد تحدو بدول شلة اوبك .. بأدانة العنف في منطقة البحيرات .. وهو ما دعى الرابطة الاوربية بقيادة الحكم كردش بفرض سياسة فك الارتباط .. والتي أدت نتائجها الي فركشة خطوبة سهير .. ! بعد ما دقت الحاجة كلتوم .. الثكلي .. وقالت العريس دا جنسو شنو .. والله عمتو دي .. فيها إنة .. ؟؟! عايني ليها عليك الله يا بت امي شعراتها ديل .. كل خمسة عاملات اجتماع .. بري .. بري .. يا بوش .. خطة الطريق دي ما بتفع معانا .. اخير منها فك الارتباط .. ! وشال عصام .. دلاقينه وفرتك .. وهبطت اسهم سهير بشدة .. في بورصة اولاد الحلة .. ! نطط عيونو .. وقال لي يا حميده يا ولدي .. مالك .. دا شنو الكلام البتقول فيهو دا .. انا ما قلت ليك البنقو والطرق الصوفية ديل بجيبوك لورا .. هي لكن يا بروف انا ما حدثتك .. طرق صوفية شنو .. انا ما بقيت مثقف .. وشيوعي ذو اتجاهات لبرالية منفتحة علي سياسات السوق .. من جهة .. وجمهوري فدرالي .. منشق الي نصفين .. جناح معارضة .. كلاشنكوف سفروك .. عضلات تبش .. من جهة آخري .. وفي الاوفرتايم .. بشتغل مرات لجبهة تحرير الجضاض .. في هنولولو .. ! وهسع مقدم لجوء سياسي .. في بعض الدول الاسكندنافية .. نظام عمرة .. وزوغة .. وكدا .. ! والله يا بروف .. زمان كنت بقرأ جرايد ... اها قلت الجماعة ديل بتفلسفوا كدي .. عشان بدوهم قروش .. واكل العيش ما هين .. اها جينا في العنترنت دي .. لقيت ليك الناس دي .. كل زول سايق ركشتو في اتجاه معين بزاوية حادة .. ويجدعوا فينا بالكلام .. شيء نفهمو .. وشئ نقول ليهم ( ...... ) .. للضمان يعني .. ! تصدق يا بروف .. في اتنين متشكلين في سياسة الانغلاق الحر في مرتكزات الديمقراطية لشعب الغابون .. الكيبورد قرب يقوم جاري .. هسع عليك الله لو استفادو من امكانياتهم دي .. ومشوا شافوا ليهم محل طباعة .. واشتغلوا فيهو .. وجو دفعوا قروش الضرائب المتأخرة عليهم دي ما احسن .. منها يقدروا يرجعوا يشوفو اهلهم .. ومنها يكونوا دخلوا قروش لناس الجبهة .. اصلو باقي ليهم ذي تلاتشر حرامي كدا لسع ما اغتنوا .. وتنتهي القصة .. وتجي حكومة جديد .. تستلم العفش .. رغم انه المعلوم صراحة .. ان العفش داخل البص مسئولية صاحبه .. لكن صاحبه ذاتو قام جاري .. ومشا اغترب .. لانه العفش القديم دا .. ما فيهو ملايات امريكية ولا تياب سويسرية .. اها مشا يجيبهم .. ولي هسع ما رجع .. اصلو العشرة سنين الاولي في الغربة .. بتكون حارة .. وبعدها بتتعود .. والرجعة ذاتها بتبقا صعبة .. وذاتو عليك الله يرجعوا لمنو .. عم ابشر سيد الطابونة ذاتو جا عمرة .. وزوغة .. تاني الراجعين ليها شنو .. الطابونة وقفلت .. حتة نقيف فيها صف بقا مافي .. الا صف شباك الألزامية .. وبعدين تعال هنا .. دحين البشرية دي .. خلي بالك علي قدر فلسفتها الكضابة دي .. ما بتقدر تسويها في البلد دي .. الا يمشوا الواق واق .. ويجونا بالبدع .. الناس هنا معروفين .. هم شنو .. لكن في البلد الباردة ديك .. حدث ولا حرج .. الواحد يقعد يطق الحنك .. لمن يرجع ليهو الصدى .. ما في زول بقول ليهو ام بق بق .. عليك الله هسع شفت فصاحة .. شروم ود السرة .. لقيتو منجعص وسط الجماعة وشابكهم ليك .. والله الهويمن رايس دي شيتن عجيبة بالحيل .. قال لاقاها في شارع الشافولزيه .. في اول درب التبانة .. جنب طرمبة شل .. وشل زاتو كان ساكن جارهم .. وشيتن عجيب وغريب يا بروف .. كلو معارضة .. وكلو مناضل .. وكلهم طلعوا كلاب الحكومة ساكاهم .. شوف عيني تلاتة ارباعهم .. عملوا ليهم حفلة وداع .. ما جا فيها غير عسكري ... كايس حق العشا .. ما سمعنا بزول هرب بالحدود .. غير مولانا .. !! ودا زاتو قالوا بتحت تحت .. الجماعة اساسا كانوا دايرنو يتخارج .. كلو طلع بالمطار يا بروف .. وبجواز سفر .. ماضي فيهو عبد الرحمن ود حسين .. وبطاقة بتاعت بلاستيك .. مكتوب فيها .. يسمح له بما عدده واحد سفرة .. وعيشة ذيادة بس يتلب بيغادي .. يقول ليهم شفتو قميصي المقطوع .. كان متشعلق فيهو عسكري .. يا كافي البلا .. بلد كاملة ما فيها مناضل .. يضرب بيهو المثل .. يقعد يتعذب لمن يعرف انه الله حق .. عشان يبقا قدوة .. كلو قام جاري يا بروف .. ولمن كشونا في دفار الألزامية .. قالوا علينا جبهجية .. ها يا ناس .. ها يا طير .. ما لنا ما نبقا جبهجية .. ما برضو كايسين الطرطيبة ذيكم .. بس نحمدو ونشكرو .. رطبنا في توريت .. علي الحرام البعوضة تقيف وتناضمك .. تقول ليك انت بني آدم .. ولمن تقرصك .. والله يا بروف لمن تحس بطنها طامة .. بس مجبورة .. اكل العيش ما هين .. وبعد دا يجيك واحد .. راسم صورته في الحيطة .. وخانق رقبتو .. بفوطة .. والشعر كيمان .. كيمان .. ومركب نضارات .. ذي فانوس الفلوكسواجن .. ويقول ليك .. ينبغي في ظل المرحلة .. يا زول .. ينبغي في ضل المزيرة .. قوم امشي شوف ليك شغلة .. !!! وبرضو تقول لي الشمالية للشماليين .. والله دي لو فكيت فيها ضب .. يقعد يبكي ويقول ليك داير امي .. عملتوا لينا .. قلق عضوي في منهاتن سيتي .. ! مش برضو في حاجة بالشكل دا .. !!

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]