كانت السينما زمان سينما كانت برامج السينما يعلن عنه فى الصحف(الايام..الصحافه) وكانت السينما دورين ..دور اول من سبعه الى تسعهونص ودور تانى من عشره ونص لاتناشر ونص ده كان زمن البرنسيات وابو رجليه والباصات السفنجات ده زمن الخرطوم بليل وزمن سوق الخرطوم الكان ما بنوم وعملوا محلو الواحه اها نرجع لذكريات السينما كان برامج السينما كالاتى خصوصا سينما النيلين السبت فيلم انجليزى يعنى فيلم بوليسى الاحد فيلم عربـــــــــــــــــــــى الاثنين فيلم كابوى (زمن ناس ترنتى) الثلاثاء والاربعاء فيلم كاراتيه ايام بروسلى الخميس والجمعه فيلم هندى وده مربك الفرس وكنت من مدمنى الافلام الهنديه(ناس شاشى كابور وشامى كابور ودهرمندر وكومار اب شلخه واميتاب بتشان وجيتندرا والصينى الخائن. طبعا انحنا كنا بندخل الدور التانى ولا ابالغ اذا قلت لكم اننى دخلت معظم السينمات فى السودان وبجى احكى ليكم عنها
(عدل بواسطة عبد الغفار عبد الله المهدى on 06-25-2008, 00:42 AM)
06-25-2008, 08:41 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
طبعا يا حبيب أنا ما حضرت العصر دا ، للاسف أنا قمت في وكت كانت السينما إتدهورت والاسر قاطعت مشي السينمات .. وكان المفهموم السائد إنو السينما بتاعت الشماشة والصعاليق ..!!
بيتنا كان بالضبط خلف سينما جنوب .. من البيت كنت بسمع أغاني الافلام وصدى المسدسات لكن كان عندي مشكلة ..
الوالد وناس البيت عموما كانو بيعارضو بي شدة مشيتي للسينما ، ودي ما فيها اي تفاهم .. اليوم الكنت بمشي للسينما كنت بسرقو سرقة !! بنمشي السينما وفي يدنا كراسات المذاكرة .. نحضر الأفلام ونطلع نتعشى سندوتشات طعمية بالشطة وبيبسي كولا ونرجع لي بيوتنا ..
لمن يسألوني كنت وين ؟! بقول كنت بذاكر مع واحد صحبي !؟
سينما النيلين بقيت أخشها بعد ما جيت الديم ..
يوماتي أفلام سينما هندية صرف ..!
لمن إتطورنا شوية وسينما جنوب كسروها بقينا نمشي قاعة الصداقة وقصر الشباب ..
لكن هسي وييييييييييين !!
كلو طار من الراس مع إنعدام ثقافة السينما ..
تقول لي فردتك تعال نمشي السينما يقول ليك ليه ؟! تلفزيونكم بايظ ولا شنو ؟!
طبعا يا ناذر سينما جنوب فى حلتكم معروف انو جمهورها من المنطقه الصناعيه وكان طبعا معروف انو روادها تلقى الواحد شايل معاهو(قزازتو)طبعا ما كل الرواد فقط محبى (القزاز) وتلقى الواحد قزازتو فى جيبو وعامل ليها درب. اما سينما غرب فكانت معروفه بخشوها اولاد القشلاق ورواد استاد الخرطوم. سينما (كلزيوم) كانت ليها شنه ورنه اما النيل الازرق دى كلامه براهو لانها كانت مخصصه للصفوه وطلاب جامعة الخرطوم زمن البركس بركس وزمن الطلبه كانوا بياكلوا بالتكت وبحلوا التلاته وجبات اى والله التلات وجبان وكانت الصفر صفر ده قبل ظهور ثورة التعليم وصندوق دعم الطلاب وشقلبة البركس. وممكن تقطع الكبرى وتخش سينما الحلفايه وكانت من السينمات الراقيه التى ترتادها الاسر والوطنيه بحرى ودى كانت ناس حى الوابورات وسينما الصافيه كانت من السينمات الراقيه ونقطع الكبرى وتمشى ام درمان وتلقى الوطنيه والتانيه الجمبها دى الكان اسمها سينما (برمبيل) وسينما العرضه وكانت ايضا روادها من الاسر وسنما بانت وبعد داك نمشى الحصاحيصا ومدنى
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ناذر محمد الخليفة
فيس بوك
تويتر
انستقرام
يوتيوب
بنتيريست