ساخر سبيل : ح نكرر العلاج
صحيفة الرأى العام عدد الأحد 25 مايو 2008م موقع الكاتب www.alfatihgabra.com جارى وصديقى (لطفى) منذ ان عرفته وهو (أصلع) لكنه غير مقتنع بهذه المسالة على الرغم من تكرارى له (دايمن) بإنو (الجاتك فى شعرك سامحتك) وإنو (قدر يا لطفى أخف من قدر) وكان المسألة ممكن تكون مافى (الشعر) – كلى مثلن وكده يا وحشين !! - وما إلى ذلك من كلمات (المواساة) غير أن صديقى لطفى لم تلن له قناة وهو يلهث بحثاً لإعادة ما أفسده الدهر فما أن يقرأ أو يسمع أو يشاهد عقارا لنمو (الشعر) حتى يسرع فى طلبه ولما لم تأت (الأدوية الطبية الحديثة ) بنتائج إتجه للطب (الشعبى) حيث أقترح عليه أحدهم شراء أحد كتب الطب القديمة إسمه (تذكرة داؤد) لمؤلف يدعى داؤد الأنطاكى حيث جاء فى باب (علاج الصلع) : يعالج الصلع بعمل عجينة من العسل والشعير وبياض البيض و(الخيار) يتم خلطهم جميعا حتى يصبحو عجينة لينه توضع على مكان الصلع وتترك لمده ثلاثة ساعات ثم تشطف بالماء البارد ، لم يخبرنى (لطفى) بذلك إلا بعد أن لاحظت أنه يقوم بتقديم (كباية شعير) لى كلما حضرت لزيارته يوميا ثم يعقبها صحن من (عسل النحل) وطبق من (الخيار) ! بعد أن قام لطفى بإستخدام عدد مهول من زجاجات العسل وكميات من البيض والشعير والخيار كانت المفاجأة والنجاح الهائل إذ لم تنبت له (شعرة واحده) لكن وزنه قد زاد أربعه كيلو ونص ! سافرت خارج البلاد وعدت بعد حوالى شهر لأفاجأ بلطفى وهو يلبس (نظارة طبيه) مقعرة فسألته مندهشا : - شنو الحكايه كمان المسألة جابت ليها (طشاش) ؟ أجابنى ببساطته المعهوده : - لا بس دى آثار جانبيه سااكت ثم بدأ يقص لى الحكاية : تعرف إنت سافرت كده قمت لقيت ليك إعلان فى الجرائد عاملو واحد من (المستوصفات) عن وصول البروفيسور (موسكوفيتش) أخصائى علاج حالات الصلع المزمن وعضو جمعية أطباء الصلع العالمية وزميل ما عارف الايه كده المهم مشيت ليهو قام قال ليا حالتك دى بسيطه جدا مستر (لوتفى ) تشيل (الحبوب) ده تمشى تبلع كل يوم (حبه) على (الريق) بعد أسبوع شعر بتاعك ده ممكن (تشقو) كمان !! شلت الحبوب وبديت إستعمل فيها لاحظت إنو (ضربات قلبى) بقت تزيد وأحس بهبوط قمت رجعت ليهو وشرحت ليهو الحاصل قام قال ليا : - ده شئ طبيعى (مستر لوتفى) واصل فى العلاج وهاك (الحبوب) دى ح تعالج ليك مشكلة زيادت دقات (القلب) دى بينى وبينك يا (جبرا) قلت فى نفسى كل شئ فى سبيل (الشعر) يهون ومشيت بديت(أبلع) فى الحبوب لكن لاحظت بعد كم يوم إنو عندى وجع شديد فى المفاصل فرجعت ليهو وكلمتو قلت ليهو الحبوب الأديتنى ليها عشان (القلب) دى عملت ليا وجع فى ( المفاصل) فقال لى فى ثقه : - لا لا إطمئن مستر (لوتفى) أى دواء عندو آثار جانبية ذى ما عارف ، أنا رايح أديك حبوب (توقف ليك الم المفاصل) ده على طول وشلت الحبوب بديت أبلع فيها عشان وقلت تااانى (كلو يهون عشان الشعر يقوم) لكن بعد يومين حسيت ليك بى (زغلله) وطشاش فى عيونى قمت رجعت ليهو تااانى ،ولدهشتى لقيتو عارف قصة (الزغلله) دى وقام قال ليا : - شوف (مستر لوتفى) إنت عارف ذى ما قلت ليك أى دواء بيكون عندو آثار جانبية - أيوه عارف يا دكتور - ما تخاف من حكايت الزغلله دى أنا ح أديك حبوب تعالجا ليك - بس يا دكتور ما تكون عندها آثار جانبيه هنا صمت البروفيسور الزائر (موسكوفيتش) لبرهه ثم قال لى فى ثقة : - لا مستر ( لوتفى ) الحبوب ده ح يحل ليك مسألة (الزغلله) تماماً - ثم بلع ريقو وواصل – بس عندو مشكلة بسيطه - شنو يا بروف ؟ - مشكلتو الوحيده إنو بيوقع الشعر فلو ده حصل ح (نكرر العلاج) ده كلوا تانى !!

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]