|
|
 سيناريوهات : إسعاف تجارى !
|
صحيفة الرأى العام
عدد الجمعة الموافق 9 مايو 2008
موقع الكاتب www.alfatihgabra.com
كانت الحياة تسير بصورة عادية فى ذلك الحى الأمدرمانى القديم .. جاء (الأولاد) من الشغل .. بعد أن وضعت صينية الغداء وتناولوه جميعا وسط الونسة والقفشات هنا وهناك ، قامت (الحاجه) بتقطيع (البطيخة) التى أحضرها معه (عادل) أكبر الابناء ، شرب الجميع الشاى بينما كان الحاج يستلقى على عنقريب فى ضل (الصالون) يطالع فى إحدى الجرائد اليومية القديمة .
لم تمض دقائق حتى جاء صوت (هالة) الإبنة الكبرى وهى تصرخ من داخل غرفة (الحاجه) :
- يا عادل .. يا حسام حصلو أمى (تعبانه)
هرع الجميع إلى حيث مصدر الصوت ، كانت الحاجه تستلقى على أحد (الكراسى) الخشبية وهى تحاول التنفس فى صعوبه ، أنزعج الجميع فهى المرة الأولى التى تصاب (الحاجه) بهذه الحالة وهذا الضيق فى التنفس ، فى التو قام عادل وحسام (بتتكيل) الحاجه ووضعها فى (عربية) حسام (الأتوس) متوجها للمستشفى الحكومى ولم ينس حسام أن يقوم بأخذ (بطاقه التأمين الصحى) تحسبا لأى إجراءات .
فى طريقها إلى المستشفى كانت العربه الأتوس تنهب الأرض نهبا متخطية العربات التى فى الطريق بينما كانت أصوات أنين (الحاجه) الخافته تنبعث بين الحين والآخر ، وصلت العربة إلى قسم الطوارئ ، قام الخفير ذو الوجه العابس بفتح الباب بعد أن تمعن جيدا داخل العربة التى واصلت طريقها لتقف أمام الباب الداخلى للمستشفى الذى كان يعج بالمرضى والمرافقين .
- لو سمحت عاوز ليا نقاله نشيل فيها الحاجه دى تعبانه
- (مشيراً إلى كوم من الحديد والحبال المتدلية) : أهم ديك
على نقالة ذات قوائم حديدية (ملسلسة) تتدلى منها (حبال) بلاستيكية متقطعه تم حمل (الحاجه) ووضعها والإتجاه بها إلى غرفة الكشف الممتلئة بالمرضى والمرافقين .
- بالله لو سمحت يا دكتور الحاجه دى تعبانه شوية
- إنتظرو شويه ما الناس ديل كلهم تعبانين !
على كنبه أمامها ثلاثة ترابيز جلس ثلاثة (أطباء) بالتحديد طبيبتان وطبيب يبدو أنهما يقضيان فترة (الأمتياز) ، بعد أن تم الكشف على الحاجه قام الطبيب بمخاطبة عادل الذى كان يقف قريبا منه :
- أمشوا أعملو ليها فحص (بول) وفحص (دم) وكمان لازم تمشو هسه تعملو ليها اشعه (مقطعية للرأس)
- (الجميع فى إندهاش) : لى شنو ؟
- لى الرأس أنا شاكى فى إنها تكون وقعت أو ضربت رأسا
- يا دكتور الحاجه دى ما وقعت وما عندها حاجه فى راسا بس ما قادرة تتنفس
- إنت يعنى بتعرف أحسن منى ؟ قلت ليكم أمشوا أعملو الصورة دى وتعالو
- وبعملوها وين؟
- فى جزارة أقصد مستوصف (تنهبون)
تم وضع الحاجه وهى تحاول جاهدة التنفس إلى عربة إبنها حسام التى إنطلقت نحو مستوصف (تنهبون) ، عند الكاونتر جلست موظفة أمامها جهاز كمبيوتر تستقبل المرضى :
- عاوزين نعمل أشعه مقطعية للراس للحاجه دى
- 180 ألف
- (وهو يقوم بإستخراج بطاقة التأمين) : إنتو مش برضو تحت مظلة التأمين الصحى
- أيوه
- طيب ح ندفع كم عشان الحاجه دى تحت كفالتى
- ح تدفعو 180 الف
- والتأمين؟
- شوف يا استاذ الموظفه المسئوله عن حكايت التأمين دى الليله ما جات من بيتهم عشان كده لازم تدفع القيمة كاملة
- وأنا دخلى شنو إنها ما جات
- ما مافى زول ح يعمل ليك الحكايه دى
أصر (عادل) على موقفه بأنه غير مسئول عن غياب الموظفه المسئوله عن التأمين الصحى بينما أصرت الموظفة على موقفها إلا أنه نسبة للموقف الحرج وسؤ حالة الحاجه فقد قبل (عادل) أن يقوم بدفع مبلغ الصورة كاملا فى سبيل إنقاذ الموقف حيث تم التوجه بالحاجه إلى غرفة الطبيب الذى قام بعمل الصورة :
- أها الصورة ح نستلمها متين؟
- والله لمن (الفلم) يخلص
- (فى إندهاش) لمن (الفلم) شنو؟ إنتو مستوصف وإلا (أستديو) أصلو ؟
- والله كان (الفلم) ما خلص ما بنقدر نطلعا ليكم
- طيب قول الليلة كلو كلو ما جاء مريض عاوز ليهو صورة نعمل شنو؟
- (فى برود) : تنتظرو باكر !!
فى هذه الأثناء يدخل مريضان إلى غرفة التصوير فيتهلل وجه الطبيب :
- أهو كده ح إحتمال تستلمو الصورة الليلة .. مبسوطين !!
لما لم يكن بمقدورهم الإنتظار حتى (يكمل الفلم) فقد حمل أبناء الحاجه والدتهم وإتجهو بها للمستشفى وقد ساء ت حالتها بعض الشئ الشئ الذى دعا الطبيب الذى قال بإستخراج الصورة أن يقوم بالإتصال بالأخصائى المسئول :
- يا دكتور إنت وين ؟
- إنا ح أجى بعد شويه بس فضلو ليا فى العياده ذى 26 مريض كده أشوفهم وأجى
- لكن يا دكتور عندنا حالة إضطرارية وما قادرين نعمل فيها حاجه
- أعراضا الرئيسية شنو؟
- والله يا دكتور فى صعوبه فى التنفس
- طيب خلاص ركبوا ليها أوكسجين لحدت ما أجى !
يقوم الطبيب بإستدعاء الممرضة إحسان ويأمرها بإحضار وتجهيز أنبوبة الأكسجين وما أن تقوم بمحاولة فتحها حتى تصيح :
- ووووب عليا سجمى الأنبوبه ما فاضية !!
- كدى طيب أمشى عنبر الجراحه ده شوفى عندهم واحدة مليانه
بعد أن تغيب (إحسان) لفترة من الوقت تعودد خالية الوفاض وتخاطب الطبيب :
- ناس الجراحه ديل قالو أنبوبتهم ذاتا قربت تقطع
- كدى طيب شوفى ناس عنبر الباطنية
بعد أكثر من ساعه زمن حضرت (إحسان) وهى (تدردق) أمامها أنبوبة أكسجين وبعد أن هدأت قليلا ونفسها إرتاح خاطبت الطبيب قائلة :
- والله إنتظرتهم لمن خلصوا ليهم عملية (زائده) حتين أدونى ليها
تم إدخال الحاجه إلى غرفة (الأخصائى) ووضعها على كنبة الكشف وتوصيل أنبوبة الأكسجين إلا أنها كانت تعانى من تدهور حالتها التى أسهم فيها بشكل فعال تأخر التعامل معها
- هسه يا دكتور نعمل شنو يعنى؟
- مافى طريقه غير تنتظرو الأخصائى
- والأخصائى ده وين؟
- بشوف ليهو فى مريض وح يرجع بعد شويه !!
بعد أن قام (الطبيب الاخصائى) بمعاينة (المريض) الأخير (رقم 64 ) فى عيادته الخاصة إتجه صوب المستشفى ، عندما قام بالدخول إلى غرفة الكشف وجد حسام وعادل وهالة يقفون أمام والدتهم :
- لو سمحتو ممكن بس تطلعو برة عشان نكشف عليها !
لم يمض على خروج أبناء الحاجه دقائق حتى خرج الأخصائى حيث وقف وهو يتصنع الألم رافعا يدية :
- البركة فيكم ...
حينما ذهبت لأداء واجب العزاء فى وفاة (الحاجه) بدأ (عادل) وحسام يرويان لى فى حزن وأسى ما قصصته لكم أعلاه مما صاحب وفاة والدتهما المرحومة من (مرارات) منذ لحظة دخولها ذلك المستشفى الحكومى ، إبتداء من خطأ التشخيص (والصورة المقطعية) و(الفحوصات) بأشكالها إنتهاء بعدم تواجد (الأخصائى) وحضوره متأخراً من عيادته الخاصة ثم صمت (عادل) وأخرج زفيرا حارا فى درجة الغليان وهو يقول لى :
- تتخيل يا أستاذ لمن الحاجه ماتت قلنا لى ناس المستشفى أدونا إسعاف نوصل بيهو الجثمان البيت أدونا رقم موبايل قالو لينا أضربوهو طلع الإسعاف (تجارى) وكل كيلومتر بيمشيها بى خمستاشر ألف - ثم واصل صديقى- عليك الله ده كلام ؟ الإسعاف ده فى الحرب بينقلو بيهو الاعداء مجانن !!
سرحت بفكرى بعيداً وانا أرسم صورة يمكن أن نعيشها إذا إستمر الحال كما هو عليه وطغى الشره إلى جمع المال وتكديسه وتخلت (الدولة) عن أبسط واجباتها تجاه المواطن وهو قيامها بترحيل (جثمانه) من (مستشفيات الأخطاء الطبية) التى (دخلا بى كرعينو) إلى حيث يقوم أهله بتجهيزة والسير به إلى حيث يدفن !!
سيأتى يوم ينشأ فيه موقف (إسعاف تجارى) أمام كل مستشفى (حكومى) حيث تزداد نسبة الوفيات حيث يقوم (صبى الإسعاف) بالصياح :
- بحرى نفر ميت .. بحرى نفر ميت !!
- ميت واااحد ونتحرك .. ميت واحد ونتحرك
يقترب منه عدد من الأشخاص يحملون جثماناً :
- النفر بى كم ؟
- الميت وإلا المرافقين !
- الميت بى كم والمرافقين بى كم؟
- الميت يا حاج بى عشرين ألف والمرافق بى خمسين ألف !
- كيفن تشيلو من المرافق أكتر من الميت؟
- إنت ما سمعت يا حاج إنو الحى أفضل من الميت !!
يقوم الحاج ومعه أخرون بوضع الجثمان فى صندوق الإسعاف ويجلسون معه غير أن السائق يطلب منهم النزول قائلا:
- بالله يا جماعه الحته دى مخصصة (للميتين) بس ، إنتو ما شايفين التلاته (جنازات) دى ما معاها زول؟
- ونقعد وين طيب؟
- تقعدو فى الكنبه القدام ديييك .. عشان ما يجينا واحد من أهل الناس الميتين ديل يقول شلنا ساعه المرحوم (السيكو) وإلا (خاتم) المرحوم الدهب !!
يتحرك الإسعاف المتحرك نحو (بحرى) حاملا (الجثامين) الأربعه ويحل محلة فى (النمرة) الإسعاف الذى يلية والذى كتب عليه بخط أسود انيق (إسعاف خدمات متكاملة) بينما يصيح السائق :
- بالنص ، الثورة بالنص
عدد من الأشخاص يحملون جثمانا ملفوفا بثوب يقترب أحدهم من السائق قائلاً :
- عاوزين نرحل الجثمان ده الحارة التامنه
- طلب وإلا طرحه
- (فى إندهاش ) كيف؟
- لو طلب بنشيلو ليك طوااالى ولو طرحة نحنا الترخيص بتاعنا (أربعه ميتين) !! يعنى لازم تنتظرو لحدت ما العربية تقفل !!
- خلاص ودينا طلب
- عاوزين خدمات متكاملة ؟
- كيف يعنى؟
- يعنى نحنا معانا (الحنوط) والكفن ممكن نوديكم وننتظركم لمن تغسلو المرحوم وتحنطوهو وتكفنوهو وبعدين نشيلو ليكم لحدت المقابر وكمان لو عاوزين عندنا (بكايات) جاهزات والله نزلتم من الإسعاف ده قدام البيت يحررو ليكم البكاء لمن تستغربو
- والخدمات المتكاملة دى بى كم ؟
- والله عشان إنتو ناس صباحين خير و(ميت ليكم زول) بى خمسميت ألف !!
- لا .. لا .. بس ودينا طلب بنشيلو برانا إنت أصلك عاوز تحييهو ؟
أمام مستشفى (يا ميت يا ميت) الحكومى تكدست عربات الإسعاف التجارى وطبقا لنظرية (العرض والطلب)
فقد بدأ أصحاب هذه الإسعافات فى إبتكار وسائل عديدة لجذب الزبائن الذين ينتقلون إلى (الرفيق الأعلى) بسرعة البرق مثال ذلك الذى قام بإيقاف أربعه (عتالة) عتاولة قام بإلباسهم لبسا أخضرا مميزا مهمتهم إستلام (الجثمان) ووضعه على الإسعاف ثم إنزاله فى (بيت البكا) وآخر قام بوضع (ميزان) أمام الإسعاف كتب عليه (كيلو الميت بى خمسة بى عشرة قروش بس) حتى يستميل إليه ذوى (المراحيم) ذوى الأجساد النحيفة الذين يموتون (بأنيمياء فقر الدم) و(السل الرئوى) وإلتهاب الكبد الفيروسى الذين تزدحم بهم المستشفيات ، وغير بعيد عن هؤلاء تراصت أكشاك بيع (الحنوط) و(الأكفان) تعلن عن بضاعتها .. أكفان دمورية الغزالتين تدوم طويلا .. هنا يباع حنوط المسك الأصلى !! ، وغير بعيد عن هؤلاء تراصت أكشاك بيع (الحنوط) و(الأكفان) تعلن عن بضاعتها .. أكفان دمورية الغزالتين تدوم طويلا .. هنا يباع حنوط المسك الأصلى .. وعلى أحد الأركان إرتفع صوت (إستريو) عاليا ينطلق منه صوت (جهورى) لشخص يقول فى نبرة حزينه (الفاااااتحة) لزوم وضعه فى (صيوان العزاء) ليقوم بمهمة رفع (الفاتحه) على روح (الميت) بينما على الركن الآخر جلس عدد من الأشخاص أقوياء البنية طوال القامة (مفتلين) يرتدون زياً موحدا ويضعون أمامهم كمية من (الكواريك) و(أبو راسين) يتوسطهم شخص يجلس على كرسى يرتدى (فول سوت) وربطه عنق (سوداء) يضع أمامه لافته مكتوب عليها :
دكتور سعد الحفار (دكتوراة فى الحفر الشرعى للقبور) جامعه (أم جلافيط) ملحوظة : توجد شواهد (سيراميك) ملونة
كسرة :
بينما كان مواطن يسير رأى آثار حادث مرورى فظيع فخاطب المتواجدين متسائلاًَ :
- بالله الحادث ده لو سمحتو حصل كيف ؟
- شفت يا أستاذ (الإسعاف التجارى) دااك؟ أيواا الخاشى فى العمود داك
- آآى مالو
- كان ماشى سريع ومشغل (الصفارة) بتاعتو وفجأة (لاوز) ليهو (بتاع ركشه) قام إنقلب ودخل فى العمود
- والناس الجواهو إن شاء الله ما حصلت ليهم حاجه؟
- ناس شنو يا استاذ؟ إتضح إنو ما كان مليان ناس
- طيب مليان شنو؟
- جركانات !!
- جركانات شنو؟
- يعنى ح يكون جركانات (زيت سمسم) !!
|
|
 
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
الاستاذ الرائع الفاتح جبرا.....
حمدلله على سلامة الرجوع .....
السيناريو لطيف جدااا .....وطريف وساخر كالعادة ....
قبل فترة شاهدت دكتور لا اذكر اسمه فى برنامج البيت السعيد بالتلفزيون القومى ...والبرنامج به حالات من ضحايا الاخطاء الطبية ....الذين اشاروا على ان اغلبهم يتعالج فى مستشفى خاص (اى دافع قروشه)....وحكوا عن الكثير من حالات الاهمال التى واجهوها......
فى كل بلاد الدنيا تتم محاسبة الطبيب المهمل ...وبالاخص فى السعودية ( وفيها ايضا الكثير من حالات الاخطاء الطبيه) ولكن تتم محاسبة الطبيب بواسطة لجان شرعية برئاسة قاضى وقضاة واطباء واخصائيون
يفتون بضمائرهم دون انحياز لزملاء مهنتهم ......
حقيقة بستغرب للتاجر ...اقصد..... الطبيب....الذى يدافع عن الاخطاء الطبية ......
اعتقد ان المشكلة الاساسية فى التشخيص .....وسرعة (الافتاء) فى مرض المريض.....
ومن السيناريو الذى اوجزته اتتضح لنا ذلك...
بنمسكها من الكبرى ....عفوا..... من النقالة....
التركيز على صحة المواطنين..........
يااولادنا..... يادكاترتنا...... انتبهوا بالله لاهلكم التعبانين ديل.......
مطلوب مراجعة القبول بكليات الطب ....وتدريب الخريجين من قبل اخصائيين مشهود لهم...
بقول ان ضعف الامكانيات طارد فعلا للطبيب السودانى .......
اما المتاجرة بالجثمان دى يطرشنى عاد ماسمعت بيها........
قتلى (وى وى وى وى وى ) تجارى ؟
(فى جزارة أقصد مستوصف (تنهبون)......)
دى بالغت فيها 
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
الاستاذ الفاتج
تحياتي
ماذا تنتظر من اطباء يدرسون تحت الشجر في جامعة يضبحون بدون مشرحة ولا معامل ، مدارس ثانوية تم تغيير لافتاتها لتصبح بقدرة قادر جامعة تمنح البكالريوس والدكتوراة كمان.
ووووب عليا سجمى الأنبوبه ما فاضية !!
بمناسبة المقطع دة احكي ليك حكاية
جيت مع وفد سعودي للسودان وكان عندنا موعد ثاني يوم مع أحدي موظفات الدرجة العليا بأحدي الوزارات واتصلت عليها الساعة الواحدة ظهرا لتاكيد موعد اليوم التالي الساعة العاشرة صباحا لافاجاء بها تقول لي سجمي لكن بكرة احنا ماشين بعربات النقل الجماعي نشيل لينا فاتحة عشان والدة واحد من زملائنا ماتت بالله ممكن تجو بعد اتناشر.
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
| Quote: الإسعاف ده فى الحرب بينقلو بيهو الاعداء مجانن !! |
استاذنا الفاتح
و اخير تنفسنا الصعداء لعودتك .. و كنت اظن انكم من جماعة (يتغيبون)، حمدا لله .. طلعتم من ناس ( يعودون)
نرجع لموضوعنا ..
نفس السيناريو حصل لى عندما كنت يوما فى السودان و أصيب ابنى فى رجله مما أدى لكسرها ..
فحملته بكل براءة و ذهبت الى حوادث الخرطوم ..
و من يومها انا لا (يستعجبون) و لا حاجة ، بقيت من ناس (يشاهدون) و (يستنكرون) و أحيانا قليلة (يستغربون)!
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
الأعزاء الأحباب :
ناهد بشير
الزبير صالح
أسعد الريفى
شكراً على المداخلات الجميلة .. أنا بفتكر إنو يعنى أقل حاجه تعملا (حكومةالمشروع الحضارى) إنها توصل المواطن لمن يموت لى أهلو (مجانن) ولا ما كدى يا جماعه !!
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
الفاتح ,, تحياتى وألف حمد لله على السلامه , أتمنى أن تكون بلغت تمام الصحه والعافيه , وقد كنت
قلقا عليك إلا أننى والحمدلله قد إطمأنيت عليك بالامس فى أحد البوستات .
والله شئ مؤسف يحدث فى مستشفياتنا الان وهو عدم وجود الاخصايين بالمستشفى فى كل الاوقات وترك الامر
لأطباء الامتياز خاصة فى حالات الطوارى وهذا الامر قد شاهدته بنفسى , فالكل صار تجارى , وخوفى أن
يأتى يوم يكون فيه إتجاه الاسعاف من المستشفى إلى المقابر مباشرة بدون المرور على المنزل .
تحياتى ,,
الفاتح أرجو إرسال رقم تلفونك على رقمى 009745901792
| |
|
|
|
|
|
|
|
|
|
Re: سيناريوهات : إسعاف تجارى ! (Re: Nasr)
|
اخي الأستاذ الفاتح جبرا
سلام على روحك الطيبة
وأسالأ الله لك دوام العافية الوافية وأسأله تعالى أن تكون قد تماثلت للشفاء
ندخل في الموضوع ؛ وفيها ايه لما يخصصوا الإسعاف والمقابر و إيجاد فرص عمل جديدة باستحداث نظام الحانوتي كلها أعمال مكملة لبعضها وبعدين الحياة والموت بيد الله .. كمان لآزم تاخد بالإعتبار يا أستاذ الفاتح التطورات التي تجري من حولنا .. نحن جزء من العالم ولازم ونلحق و نحصل الركب وكمان لآزم نفوتهم بحيث نبدأ من حيث إنتهى الآخرون ؛ هناك إنفتاح ..وخوصصة ( بالمغاربي) .. خصخصة ( بالمشارقي)Privatization .. وعولمة
.. Globalization وكمان السموات المفتوحة Open Skies - وفي بوابات السماء .Sky Gates و أقعد أو أرقد عافية !!
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
شيماء بنتى شعرت بالم شديد وشكينا انها زايدة وذهبنا بها الى
مستشفى ام درمان الساعة الثالثة صباحا من الباب ادونا نقالة
مستوى من الظافة والحوادث تشوف فيها وشك والدكاترة والممرضات
ما شاء الله وبعد الكشف والاطمئنان عليها قالو لازم تقعد معاهم
الى الساعة السابعة صباحا لمزيد من الاطمئنان عليها فحوصات وصورة
اسرع من البرق وانا ووضاح ما اتحركنا من كراسينا والله وغرف الكشف
مرتبة ومعاها ستائر نضيفة ما شاء الله اسالوا اى انسان عن المستوى
الوصلت ليهو مستشفياتنا الحكومية ولسة لقدام ان شاء الله .
والله على ما اقول شهيد ..
والاخصائى ده فى اى مستشفى العندو عيادة فيها كم وستين شخص وعاوز يجى
يكشف فى المستشفيات الحكومية .
ياخى خاف الله فينا دى ما سيناريوهات دى سميها سخافات عليك الله .
Quote: - بحرى نفر ميت .. بحرى نفر ميت !!
- ميت واااحد ونتحرك .. ميت واحد ونتحرك
يقترب منه عدد من الأشخاص يحملون جثماناً :
- النفر بى كم ؟
- الميت وإلا المرافقين !
- الميت بى كم والمرافقين بى كم؟
- الميت يا حاج بى عشرين ألف والمرافق بى خمسين ألف !
- كيفن تشيلو من المرافق أكتر من الميت؟
- إنت ما سمعت يا حاج إنو الحى أفضل من الميت !!
|
احترم عقولنا بالله .
Quote: - ووووب عليا سجمى الأنبوبه ما فاضية !!
|
بدون تعليق ؟؟؟؟؟؟؟؟
ام وضاح
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
العزيز أبوبكر
إن شاء الله ما تشوف شر يا أخى وألف ألف شكر ليك ، ما عندنا مانع (الخصخصة) و(إقتصاد السوق) والشنو ما بعرفو داك (يحصل) والميتين وشيل الجنازة يكون بى قروش لكن حقو الدولة توفر إسعاف مجانى للناس الما بتقدر تدفع وإلا كلامى ده غلط !! تحياتى
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
السيدة الفضلى أم وضاح
التحيايا الطيبة
بداية ربنا يخلى ليك (شيماء) وأخوانها ويحفظهم يديهم الصحة والعافية (آمين)
لاشك أنك سيدتى تعلمين بأن الكاتب (الساخر) ليس مهمته (إضحاك) الناس فهذه مهمة تقوم بها فرق (الكوميديا) ومهرجى (السيرك) إنما مهمته هى تسليط الضؤ على (سلبيات) المجتمع فى كافة مناحيه من أجل لفت نظر (الجهات ذات الشأن) لإصلاح تلك السلبيات وذلك من أجل مجتمع أفضل كما ولا يعترينى شك - سيدتى- وأنت تمارسين الكتابه على (المنتديات الأسفيرية) أن واحده من سمات الكتابه الساخرة الأساسية هى تناول (الظواهر) موضوع المقال تناولاً فيه شئ من (التعظيم والمبالغة) حتى يخدم المقال غرضه فى تدارك الأمر المتحدث عنه .
| Quote: دى ما سيناريوهات دى سميها سخافات |
نحن - سيدتى- لا نكتب بدافع (الغرض) كما لا نكتب من (فراغ) فبعد أكثر من (ربع قرن) قضيناه فى (التربية) والتعليم (قبل الكتابة) نربأ بأنفسنا أن نكون ممارسين (للسخف) أو (العباطة) التى تفضى إلى عدم إحترام (الذات)!
إن قصة هذا السيناريو (السخيف) هى قصة واقعية حدثت قبل أقل من ثلاث أسابيع فبعد حضورى من (القاهرة) إثر تلك الوعكة (أعلاه) ذهبت لتقديم واجب العزاء لأخى وصديقى المخرج التلفزيونى المعروف (عبادى محجوب) الذى توفت والدته (رحمها الله) فى غيابى وقد كان معه شقيقه الممثل (المعروف ايضاً) السر محجوب وإبن شقيقه (مجدى) وقد قام بسرد (ملابسات الوفاة) الوارد معظمها فى المقال فى ألم شديد وقد وعدته حينها بالتعرض لهذا الأمر وكتابه مقال عنه حتى يتم تسليط الضؤ على هذا الأمر وهذا هو هاتف الأخ (عبادى) يمكنك الإتصال به وأستميحه عذراً فى ذلك : 0912295831 وهو بكل تأكيد سوف يحدثك عن هذه التجربة الأليمة التى عايشها وعن (المستوى الوصلت ليهو مستشفياتنا الحكومية)! : ألم أقل لك سيدتى الفاضلة أننا لا نكتب من فراغ؟!
| Quote: اسالوا اى انسان عن المستوى الوصلت ليهو مستشفياتنا الحكومية ولسة لقدام ان شاء الله |
يبدو أنك - سيدتى- مثلنا تقطنين (أم درمان) فلو كان الأمر كذلك (وأنا أعتقد) فإنى على إستعداد تام بأن أذهب برفقة (زوجتى) معك فى زيارة لبعض المستشفيات الحكومية لمعرفة (المستوى الوصلت ليهو) على أمل أن تقومى تفضلاً بكتابه (بوست) عن هذه (الزيارات) وعكس ما سوف تشاهدينه بأمانة وتشهدى الله أيضاًعلى ذلك ، وهذا هو رقم هاتفى (للتنسيق) : 0912459380
ختاما : فى حزن أقول لك سيدتى : ليس لمثلنا يقال له مثل هذا (الخطاب) الذى كان من الممكن أن يكون أكثر مراعاة لأشياء كثر !! وتقبلى إحترامى
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
الأخ الأستاذ الفاتح
مليون حمد لله على سلامتك و ما تشوف شر و يسلم قلبك و قلمك و لسانك إن شاء الله
سيناريوهاتك ننتظرها بشغف من إسبوع لي إسبوع، و لا أستبعد حدوث ما تتناوله فيها "سخرية" لأن في هذا الزمن كلو وارد..
إتخيل أنا مرات بقول لي زوجي إنو "الفاتح جبرا" دة ياخي بيدي الناس ديل فكرة ما كانو مفكرين فيها قبال دة،، مثلاً زي قصة خروف العيد و الحاجات الزي دي
تحياتنا لك و ربنا يديك العافية
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
العزيزة نوسة
التحايا والود وإن شاء الله ما تشوفى شر :
Quote: إتخيل أنا مرات بقول لي زوجي إنو "الفاتح جبرا" دة ياخي بيدي الناس ديل فكرة ما كانو مفكرين فيها قبال دة،، مثلاً زي قصة خروف العيد و الحاجات الزي دي
|
توقع ما يحدث مستقبلاً والتنبيه له هى واحدة من مهام (الكاتب) ، أشكرك شكراً جزيلاً وتحياتى لزوجك العزيز
| |
|
|
|
|
|
|
|
|
|
Re: سيناريوهات : إسعاف تجارى ! (Re: الفاتح يوسف جبرا)
|
الاستاذ الفاضل الفاتح جبرا
آسفة للتأخير لاسباب خارجة عن الارادة والنت لا يفتح بالساعات .
انا زعلانة للمبالغات الزايدة عن حدها ودى دراما عديل كده والمكتوب
ده ممكن يكون حصل جزء بسيط منه وبعد كده الباقى كان من الخيال ما
اكتر من كده .
عشان نحن نكون فى الصورة انت اكتب حقائق عشان نعرف مستوى خدمات
المستشفيات عندنا وبعد كده اطلق لخيالك العنان واكتب للناس على اساس لو ما حصلنا
نفسنا يا وزارة الصحة ممكن يحصل كدة وكدة بالطريقة الدرامية دى.
وده راى شخصى يا استاذ ,,,,,
Quote: ولا يعترينى شك - سيدتى- وأنت تمارسين الكتابه على (المنتديات الأسفيرية) أن واحده من سمات الكتابه الساخرة الأساسية هى تناول (الظواهر) موضوع المقال تناولاً فيه شئ من (التعظيم والمبالغة) حتى يخدم المقال غرضه فى تدارك الأمر المتحدث عنه .
|
الظواهر سلبياتها وايجابياته كما ذكرت لك
لا احتاج لرقم عبادى محجوب لان الرقم معاى وعبادى اخ وصديق عزيز واعرف كل
ملابسات وفاة والدته بالمستشفى .
اولا الطبيب كان موجود بالمستشفى بس طيلة المدة ماكانوا عارفين مكانه لان الحوادث
فيها اخصائى واحد وامكن يكون نايم مرهق اى مستشفى فيها سلبيات وايجابيات لما تذكر
سلبيات اى شىء اذكر ايجابياته لان الامانة الصحفية تقتضى ذلك وبعدين عبادى ما دفع ولا
قرش للصورة وانا حاقيف لحد هنا عشان ما ارد على المقال بالتفصيل من واقع ما حصل لوالدة عبادى عشان ما يطلع تسعين فى المية من خيال الكاتب .
تحياتى استاذ الفاتح جبرا
وعذرا استاذ الفاتح
ولك العتبى حتى ترضى
والى اللقاء مع سيناريوهات اخرى
ام وضاح
| |
|
|
|
|
|
|
|
|
|
Re: سيناريوهات : إسعاف تجارى ! (Re: essam&amal)
|
السلام على من إتبع الهدى
أشكر لك ردك أستاذ الفاتح و إن شاء الله تاني ما تشوف شر
و تقبل تحيات زوجي بالمثل
أختي العزيزة أم وضاح 
يختي مالك محبكاها شديد كدة، الزول دة كاتب "سيناريوهات" موش "تحقيقات" ،، يعني بيشطح بخيالو، بس مسكوهو طرف الخيط و الباقي "بيجضمو براهو" موش كدة برضو؟؟
ربنا يحفظ ليكم إبنتكم و بقية الأسرة و ما تشوفي فيهم شر تاني ...
تحياتي و أكيد ودي 
| |
|
|
|
|
|
|
| |
الفاتح يوسف جبرا
ناهد بشير الطيب
الزبير صالح الزبير
اسعد الريفى
كمال سالم
Nasr
محمد مكى محمد
essam&amal
Abdelmuhsin Said
نوسة
فيس بوك
تويتر
انستقرام
يوتيوب
بنتيريست