(قنصلية- قيت !!) لن أعتذر عنها أبدا .. ثم أسألكم بربكم : من يعتذر لمن ؟؟

Quote: انت خضرعطاالمنان نعم انا( على عبدالرحمن) من القنصلية السودانية تشرفنا .. اهلا وسهلا .. خير ان شاءالله ؟ أنا قريت الكلام الكتبتو انت في ( سودانيزأونلاين ) .. والكلام دا ماصاح . تقصد ياتو كلام ؟ الكتبتو انت هناك طيب الصاح شنو ؟ وليه ساكتين انتو الزمن دا كلو ؟.. اقصد ليه ماوضحتو الصاح دا للناس ؟ قلنا في الأول نتكلم معاك وبعدين نشوف !!!!. بي ياتو مناسبة تتكلموا معاي ؟ أنا - بصراحة - ماشايف شي بيني وبينك ممكن نتكلم عنو لحدي ما تفتش عن رقمي وتتصل بي عشان تتكلم معاي .. وأنا ماعارف انت بي ياتو حق واللا ياتو صفة متصل علي اسع عشان تتكلم معاي .. يعني لا انت قريبي ولا صديق ولا زميل دراسة ولا عمل .. وانا ذاتي ... يقاطع : ياخي افهمني .. انت عندك دليل ؟ نعم بس اسمعني انا ضابط شرطة وبعرف القانون .. وبعدين ..... ياخي مادام انت ضابط شرطة وبتعرف قانون ليه ما مشيت محل القانون عشان تاخد حقك لو حاسي انك مظلوم حقيقية .. الشرطة موجودة والبلد دي فيها قانون ياخي .. بعدين كيف تقول لي بتعرف القانون وانت اتصلت من رقمك على رقمي الشخصي وانت عارف مجرد وجود رقمك في موبايلي يمكن أن يدينك لو لجأت الآن للشرطة لو حتى بسبب الازعاج !!! وبرضو تقول لي بتعرف قانون ياسيد؟؟. يقاطع : المهم نحن ...... أقاطعه : المهم ياخوي أعمل الداير تعملو وأنا جاهز ..ونحنا في الامارات يعني مافي السودان ..وأرجوك مرة تانية ما تتصل على الرقم دا لو سمحت ... مع السلامة .